Archives for October 2016

Kryeministri Mustafa:Kosova, në krah të aleancës botërore për paqe dhe siguri

October 24, 2016 by dgreca

Mustafa: Dëshirojmë që të shndërrohemi nga një vend i cili ka qenë konsumuese e sigurisë, në një vend i cili do të eksportoj sigurinë, sepse kemi dëshirë të marrim pjesë në veprimet humanitare të NATO-s në vendet tjera, ose më vonë në operacionet paqësore, sepse vlerësojmë se e kemi një Forcë tani të Sigurisë dhe nesër do të kemi një Forcë të Armatosur, e cila është në gjendje që të aplikoj të gjitha standardet e NATO-s, dhe të jetë në krah të një Aleance Botërore për paqe dhe siguri./

-Kryeministri i Kosovës, Isa Mustafa: Vlerësojmë se e kemi një Forcë tani të Sigurisë dhe nesër do të kemi një Forcë të Armatosur e cila është në gjendje që të aplikojë të gjitha standardet e NATO-s dhe të jetë në krah të një aleance botërore për paqe dhe siguri/

-Përmbyllë punimet treditëshe Seminari i 93-të Rose-Roth i Asamblesë Parlamentare të NATO-s/

PRISHTINË, 24 Tetor 2016-Gazeta DIELLI-B.Jashari/ Kryeministri kosovar, Isa Mustafa, sot në në Prishtinë, në seminarin Rose Roth organizuar nga Asambleja Parlamentare e NATO-s, theksoi angazhimet e Kosovës në krah të aleancës botërore për paqe dhe siguri.Ai shprehu përkushtimin e qeverisë që të punojë në mënyrë që Kosova të shndërrohet në një eksportuese të sigurisë, duke u rreshtuar në krah të aleancës botërore për paqe dhe siguri. “Ne tani dëshirojmë që të shndërrohemi nga një vend i cili ka qenë konsumuese e sigurisë në një vend i cili do të eksportoj sigurinë, sepse kemi dëshirë të marrim pjesë në veprimet humanitare të NATO-s në vendet tjera, ose më vonë në operacionet paqësore. Vlerësojmë se e kemi një Forcë tani të Sigurisë dhe nesër do të kemi një Forcë të Armatosur e cila është në gjendje që të aplikojë të gjitha standardet e NATO-s dhe të jetë në krah të një aleance botërore për paqe dhe siguri”, tha kryeministri Mustafa.Kreu i qeverisë kosovare fillimisht foli për progresin e arritur në Kosovë që nga paslufta, në 17 vitet e lirisë, duke theksuar se dalja nga shkatërrimi i luftës dhe mbrojtja e jetëve të njerëzve e arsyeton në mënyrë të plotë ndërhyrjen e NATO-s.

Në kryeqytetin e Kosovës, Prishtinë, sot përmbyllë punimet treditëshe Seminari i 93-të Rose-Roth i Asamblesë Parlamentare të NATO-s, në të cilin u mirëpritën më shumë se 100 pjesëmarrës, përfshirë gati 70 deputetë nga 21 vendet anëtare të NATO-s dhe vendet partnere.Perspektiva e Kosovës në marrëdhëniet me Bashkimin Evropian dhe në rolin evolues të NATO-s në rajon, u diskutuan në Seminarnin në Prishtinë, i cili pasoi Samitin e Aleatëve, të krerëve të shteteve dhe të qeverive, të mbajtur në muajin korrik, në Varshavë.Kuvendi i Republikës së Kosovës merr pjesë në sesionet e Asamblesë Parlamentare të NATO-s në statusin e vëzhguesit, të fituar që nga qershori i vitit 2014.Forca paqeruajtëse e NATO-s, KFOR, është në Kosovë nga viti i lirisë 1999.

FJALA E PLOTË E KRYEMINISTRIT MUSTAFA:

Të nderuar anëtarë të Asamblesë së NATO-s, ju uroj mirëseardhje në Kosovë dhe po ashtu shpreh gëzimin dhe mburrjen tonë që ju kemi këtu të gjithë juve dhe që kemi shansin që bashkërisht të bisedojmë për disa çështje që ne i vlerësojmë të rëndësishme që t’i ndajmë së bashku me ju.Mund të them se ne gjatë kësaj periudhe, mbi 17 vjet pas ndërhyrjes së NATO-s dhe gati 9 vjet pas shpalljes së Pavarësisë në Kosovë, kemi bërë një progres të rëndësishëm edhe në evitimin e pasojave të luftës, në kapërcimin e fazës emergjente të rindërtimit të vendit, në ndërtimin e institucioneve demokratike dhe tani në ndërtimin e partneritetit me Bashkimin Evropian dhe me vendet tjera.

Në qoftë se ne e shikojmë zhvillimin tonë brenda një historie që përfshin një periudhë të shkurtër pas çlirimit për këto 15 vjet, kemi bindjen se ndalja e të këqijave nga shkatërrimi i luftës, mbrojtja e jetëve të njerëzve, pastaj kthimi i atyre që janë dëbuar, por edhe mbrojtja e dinjitetit të atyre që janë dhunuar, janë keqpërdorur, e masakruar gjatë luftës, e arsyeton në mënyrë të plotë ndërhyrjen e NATO-s në Kosovë, dhe po ashtu e arsyeton në mënyrë të plotë edhe progresin që NATO po e bënë si një forcë e cila e ruan paqen dhe stabilitetin edhe në rajonin tonë, por edhe në botë.

Dëshiroj që edhe njëherë t’ju falënderoj për gjithë atë që NATO-ja ka bërë për Kosovën dhe të shpreh përkushtimin tonë që ne të forcojmë bashkëpunimin dhe që në një periudhë të caktuar kohore, atëherë kur të plotësohen të gjitha rrethanat, që edhe ne të bëhemi anëtarë të NATO-s.

Dëshiroj po ashtu të nënvizoj se ne jemi në rrugë të mirë të përkushtimit tonë euroatlantik, në rrugë që të bëhemi pjesë e koncepteve dhe projekteve gjeopolitike euroatlantike dhe një vend i cili është i përkushtuar që të ndërtoj institucione demokratike dhe vlera demokratike dhe gjitha këto t’i ndajë me botën demokratike perëndimore.

Sa i përket NATO-s theksoj se interesimi ynë është që të kemi bashkëpunim aktiv me NATO-n. Ne vlerësojmë shumë prezencën e KFOR-it në Kosovë. KFOR-i ka një autoritet shumë të lartë dhe një besim shumë të madh të qytetarëve, sepse nuk është një forcë që vetëm ka ruajtur stabilitetin në Kosovë, ka ruajtur paqen, por po ashtu ka treguar një integrim shumë të madh në pikëpamje të bashkëpunimit me komunitetin, përkatësisht me qytetarët në të gjitha pjesët e vendit në të cilin ai ka vepruar gjatë kësaj periudhe dhe po vepron. Ne po ashtu jemi të interesuar që edhe më tutje të qëndroj në Kosovë si pjesë e stabilitetit, paqes dhe besimit të të gjithë qytetarëve përfshirë edhe komunitetet.

Gjatë periudhës së pasluftës ne kemi pasur prioritete të ndryshme varësisht se çfarë periudhe kemi kaluar, nga ato të kapërcimit të pasojave të pasluftës si situatë emergjente, pastaj të ndërtimit të institucioneve demokratike dhe tani të konsolidimit të demokracisë dhe të integrimeve evropiane.

Si Qeveri jemi përcaktuar që si prioritet të kemi tani zhvillimin ekonomik, përkatësisht rritjen ekonomike dhe punësimin, forcimin e shtetit ligjor që nënkupton luftën kundër krimit të organizuar dhe korrupsionit, integrimet në institucionet e Bashkimit Evropian dhe ngritjen e cilësisë në fushën e arsimit dhe shëndetësisë, si dy fusha shumë të rëndësishme për ne, që nuk janë vetëm sociale por edhe ekonomike, sepse ndihmojnë zhvillimin ekonomik.

Vitin e kaluar ne kemi përmbyllur me një rritje ekonomike prej 4 për qind, që ka qenë rritja më e lartë në regjion dhe po ashtu me trende pozitive sa i përket punësimit. Por, nuk kemi arritur që të sigurojmë një fluks të punësimit i cili e përballon numrin e të papunëve që hyjnë në tregun e punës sepse tek ne diku rreth 22 mijë çdo vit hyjnë në tregun e punës, ndërkaq ne vitin e kaluar kemi arritur që të kemi 18 mijë të punësuar, por llogarisim që këtë vit do ta kemi prapë një diferencë më të ultë mes fluksit të atyre që hyjnë në tregun e punës dhe fluksit të punësimit që do të jetë një trend pozitiv. Rritja ekonomike kryesisht ka qenë rezultat i investimeve private por edhe rezultat i masave fiskale të cilat ne i kemi marrë për të krijuar një ambient më të mirë ekonomik në vend. Kemi stabilizuar tërësisht buxhetin e shtetit, kemi rrit të hyrat nga tatimet dhe taksat, për rreth 30 për qind gjatë këtyre dy viteve, po funksionon mirë marrëveshja që e kemi me Fondin Monetar Ndërkombëtar e cila na lejon që të kemi edhe borxh të jashtëm më shumë sesa që ne kemi pasur si kufizim të Fondit Monetar Ndërkombëtar, ndërkaq një përparësi që e kemi ne ndaj vendeve fqinje dhe vendeve tjera është se borxhi publik, ose pjesëmarrja e borxhit publik në GDP është shumë e ultë. Kjo pjesëmarrje tani është rreth 13.2 për qind, gjë që na lejon hapësirë shumë të madhe zhvillimore në bashkëpunim me vendet e Bashkimit Evropian, përkatësisht organizatat financiare ndërkombëtare, me Bankën Evropiane për Zhvillim, Bankën Evropiane për Investime, Fondin Monetar Ndërkombëtar, Bankën Botërore e tjera, të cilat instrumente ne tani po i shfrytëzojmë dhe kemi hapur mundësi të investimeve në fusha të ndryshme.

Kemi një bilanc tregtar i cili është shumë negativ dhe të cilin jemi të interesuar ta përmirësojmë, sepse importet janë të mëdha të produkteve elementare dhe ne po bëjmë tani përpjekje që përmes dhënies prioritet të zhvillimit të bujqësisë të zëvendësojmë një pjesë të produkteve që ne duhet t’i importojmë me produkte vendore dhe të rrisim eksportin.

Sa i përket luftës kundër krimit dhe korrupsionit, mund të them se perceptimi në Kosovë për korrupsionin është akoma i lartë edhe përkundër masave që po ndërmerren çdo ditë për luftimin e krimit dhe korrupsionit. Ne kemi marrë masa sa i përket adaptimit të ligjeve në mënyrë që të krijohet një bazë juridike shumë më efikase për luftimin e krimit dhe korrupsionit, kemi përpunuar veçmas sektorin e prokurimit publik, ku kemi të bëjmë me investimin e parasë publike dhe kundërthënien mes pronës private dhe asaj publike.

Kemi hyrë në aplikimin e parë të prokurimit elektronik dhe atë po e bëjmë në fillim të këtij viti në disa institucione qendrore, ndërsa nga viti i ardhshëm do ta bëjmë në nivel të pushtetit lokal. Kemi marrë masa për suspendimin e gjithë atyre që janë ardhur në kundërthënie me ligjin, ose ndaj të cilëve janë ngritur aktakuza. Fjala është për shërbyes civil dhe punonjës qeveritar, dhe po ashtu mund të them se kemi një efikasitet më të lartë të prokurorisë, gjyqësisë dhe të institucioneve që merren me mbrojtjen e interesave të vendit.

Në fushën e bashkëpunimit evropian ne kemi nënshkruar Marrëveshjen për Stabilizim Asociim vitin e kaluar, ndërkaq këtë vit ka hyrë kjo marrëveshje në fuqi. Është një marrëveshja e cila neve na hapë mundësi që të kemi qasje në tregun e Bashkimit Evropian që është një treg prej mbi 500 milionë banorësh, dhe këtë mundësi e kemi. Por tani po punojmë që të përgatisim bizneset tona, në pikëpamje të konkurrencës dhe për këtë arsye ne me Bashkimin Evropian tani jemi duke punuar në reformën evropiane dhe në reformën ekonomike në mënyrë që të kapërcejmë këto sfida të konkurrencës në tregun e Bashkimit Evropian.

Për herë të parë ne jemi bërë kandidate të organizatës amerikane, Korporata e Sfidave të Mileniumit për të realizuar disa projekte që bashkërisht i konsiderojmë me këtë korporatë. Po punojmë tani në identifikimin e tyre. Orientimi është te energjia, efiçienca e energjisë, dhe forcimi i shtetit ligjor dhe mendoj se do të kapërcejmë edhe këtë sfidë.

Ndërkaq sa i përket arsimit dhe shëndetësisë, në vitet e kaluara ne në fushën e arsimit, prioritet i kemi dhënë përfshirjes në arsimin e lartë. Tani prioritetet janë kthyer kah cilësia e arsimit të lartë dhe gjitha niveleve të arsimit, parashkollor, fillor, të mesëm dhe të lartë dhe po ashtu kemi krijuar një konkurrencë ndërmjet sektorit publik dhe sektorit privat të arsimit dhe mendoj se kjo po jep rezultate të caktuara.

Kemi pasur kundërvënie të opozitës sa i përket dy marrëveshjeve që ne i kemi arritur vitin e kaluar: Marrëveshja për Asociacionin e Komunave me shumicë serbe dhe Marrëveshja për Demarkacionin me Malin e Zi, të cilat në një formë kanë ndikuar që ne një kohë të rëndësishme ta humbin duke u marrë me këto çështje. Është penguar puna e Kuvendit të Republikës së Kosovës dhe po ashtu kemi pasur protestë të dhunshme. Por, mund t’ju them se kemi arritur që këto t’i kapërcejmë si veprime të dhunshme, ndërkaq Asociacioni i Komunave me shumicë serbe do të themelohet, por do të themelohet mbi bazën e marrëveshjes, e cila është arritur si marrëveshje e parë dhe mbi bazën e vendimit të Gjykatës Kushtetuese, e cila siguron që ky Asociacion nuk do të ketë kompetenca ekzekutive dhe nuk do të jetë pushtet i tretë. Ndërkaq, sa i përket Demarkacionit me Malin e Zi, Qeveria është e bindur se vija kufitare është shënuar në vijën që është kufizuar më parë krahina e Kosovës me Malin e Zi, se e kemi ruajtur tërë territorin e Kosovës dhe nuk kemi humbur asnjë kilometër katrorë edhe përkundër asaj që opozita insiston se Kosova në këtë proces ka humbur rreth 8200 hektarë, por ne sipërfaqen e Kosovës e kemi edhe pas kësaj atë që e kemi pasur edhe më parë.

Me Malin e Zi nuk e kemi asnjë problem sa i përket marrëdhënieve ndër-fqinjësore, por çështjet i kemi të brendshme, të cilat ne duhet t’i zgjidhim në pikëpamje të bindjes edhe të opozitës, por edhe të qytetarëve për pjesën për të cilën kemi të bëjmë me shënimin e kufirit.

Në pikëpamje të raporteve me fqinjët, mund të them se raportet i kemi shumë të mira. Me Serbinë tani po punojmë në dialogun për normalizimin e marrëdhënieve. Kemi pasur tre takime të vendeve të Ballkanit Perëndimor, gjashtë vende të saj, përfshirë Kosovën, Maqedoninë, Shqipërinë, Malin e Zi, Serbinë, Bosnjën, në të cilat takime kryesisht jemi marrë në çështjen e infrastrukturës, e cila ndërlidhë këto vende, në mënyrë që ne të ndërtojmë infrastrukturën e cila do të jetë kompatibile me infrastrukturën e vendeve të Bashkimit Evropian dhe që në momentet kur ne të bëhemi anëtarë të saj, të kemi rrjet cilësor të komunikimit, ashtu siç i kanë edhe vendet tjera të Bashkimit Evropian.

Marrëdhëniet tregtare dhe ekonomike i kemi po ashtu të avancuara me këto vende. Me Serbinë kemi arritur disa marrëveshje, në të cilat ka ngecje të madhe në implementimin e tyre, meqenëse ju keni pasur informim për këtë nga ministrja Tahiri, unë nuk do të shtoja më shumë, por nëse ka pyetje dhe interesim më vonë do t’ju jap përgjigjen për këto. Por, ne jemi të interesuar që tani me prioritet të punojmë në implementimin e këtyre marrëveshjeve me Serbinë dhe pastaj të shohim se në cilat fusha të diskutojmë, përderisa dimë situatën që Serbia do ta pranojë pavarësinë e Kosovës.

Një aktivitet të rëndësishëm tonin, ia kemi përkushtuar luftës kundër ekstremizmit dhe terrorizmit. Ju e dini se edhe ne nuk kemi qenë imun ndaj njerëzve, të cilët janë bashkuar në frontet e ndryshme të luftës jashtë vendit.

Kuvendi i Republikës së Kosovës vitin e kaluar e ka aprovuar ligjin vitin e kaluar me të cilin e ka ndaluar bashkimin e qytetarëve tanë në frontet e jashtme, dhe ne kemi arritur nga shtatori i vitit të kaluar të ndalojmë që asnjë qytetar i Republikës së Kosovës të mos bashkohet në konfliktet e jashtme, përmes një pune shumë të rëndësishme që e ka bërë Policia e Kosovës, e ka bërë Agjencia i Inteligjencës, e ka bërë shoqëria civile, partitë politike në aktivitetet e tyre. Kemi punuar me shkolla, kemi punuar me bashkësitë fetare jo vetëm me komunitetin mysliman por edhe me komunitetet tjera fetare. Kemi aprovuar në Qeveri Strategjinë për Luftë Kundër Ekstremizmit të Dhunshëm dhe Terrorizmit dhe mendoj se është arritur një rezultat mjaft i madh. Ndërkaq nga ana e Ministrisë së Punëve të Brendshme janë marrë masa që të pezullohet puna e 19 organizatave joqeveritare, për të cilat është vlerësuar se në aktivitetet e tyre nuk kanë të bëjnë me punë humanitare, por kanë edhe zhvillime tjera politike të cilat mund të cenojnë stabilitetin e vendit.

Ne jemi të interesuar që të rrisim edhe më tutje dhe të forcojmë sigurinë. Vlerësimi jonë është që gjendja e sigurisë në vend është e mirë. Kemi institucione të cilat janë mjaftë të avancuara, dhe të cilat po aplikojnë praktikat më të mira evropiane dhe euroatlantike. Jemi shumë të kënaqur me Policinë e Kosovës, me cilësinë e tyre, me disiplinën, dhe me organizimin. Jemi po ashtu shumë të kënaqur me Forcën e Sigurisë së Kosovës, dhe kemi një falënderim të veçantë për NATO-n për gjithë punën që e ka bërë në konsolidimin dhe organizimin e kësaj Force, dhe presim që kjo Forcë nesër të jetë anëtare e NATO-s, dhe para kësaj, të shndërrohet në Forcë të Armatosur të Kosovës, gjë që edhe këtë do ta bëjmë, por lypset që të kemi një mirëkuptim më të mirë brenda Kuvendit të të gjithë grupeve parlamentare që përfaqësojnë, edhe komunitetet. Dhe po ashtu kemi një Agjenci të Inteligjencës e cila është ndërtuar mbi bazën e përvojave më të mira të vendeve të avancuara në këtë fushë.

Ne tani jemi të interesuar që të anëtarësohemi në INTERPOL. Kemi aplikuar për anëtarësim në INTERPOL, sepse kemi dëshirë që të ndajmë të gjitha të dhënat në mes veti dhe të jemi koherent me atë se çfarë ndodh në sigurinë ndërkombëtare. Jemi anëtarësuar në FRONTEX, për të cilën gjë ministri i Punëve të Brendshme më vonë mund t’ju njoftoj edhe më qartë dhe po ashtu jemi të interesuar të avancojmë bashkëpunimin me EUROPOL-in, për të cilën e dimë se s’mund të anëtarësohemi përderisa mos të bëhemi anëtarë të Bashkimit Evropian, por mund të kemi forma të ndryshme të bashkëpunimit. Ne tani dëshirojmë që të shndërrohemi nga një vend i cili ka qenë konsumuese e sigurisë në një vend i cili do të eksportoj sigurinë, sepse kemi dëshirë të marrim pjesë në veprimet humanitare të NATO-s në vendet tjera, ose më vonë në operacionet paqësore, sepse vlerësojmë se e kemi një Forcë tani të Sigurisë dhe nesër do të kemi një Forcë të Armatosur e cila është në gjendje që të aplikoj të gjitha standardet e NATO-s dhe të jetë në krah të një Aleance Botërore për paqe dhe siguri.

Ministri Hyseni në samitin e NATO-s : Ekstremizmi i dhunshëm,terrorizmi, probleme transnacionale

October 24, 2016 by dgreca

Hyseni:Kosova është shtet sekular i definuar me kushtetutë, ndonëse 90 përqind popullsi myslimane, kryesisht jo praktikuese dhe Kosova dhe shqiptarët në tërësi i shquan sensi për harmoni ndër fetare dhe ndër kulturore dhe bashkëjetesë ndër fetare dhe ndër kulturore dhe ne jemi të vendosur që këtë sekularizëm, këtë kulturë të fuqishme harmonie nderfetare ta ruajmë me çdo kusht./

Nga Skender Hyseni/*

Prishtinë, 24 tetor 2016/ Me jep kënaqësi të veçantë mundësia që t’i drejtohem juve sot, një auditoriumi kaq impresiv, rreth një çështje që e preokupon Republikën e Kosovës, po aq sa pjesën dërmuese të vendeve të globit. Me këtë dua të nënvizoj se ekstremizmi i dhunshëm, i cili shpeshtë herë përfundon në akte terroriste, radikalizmi i shoqërive të ndryshme, tashmë janë probleme komplekse transnacionale, nuk janë probleme ekskluzivisht të një vendi, dhe rrjedhimisht kërkojnë një koordinim transnacional dhe bashkëpunim të ngushtë ndërkombëtarë, nëse duam të jemi të suksesshëm në adresimin dhe luftimin e këtij fenomeni.

Me 11 shtator me rastin e sulmeve të kullave binjake në New York, janë krijuar percepcionet se kjo ka të bëj me Amerikën dhe jo me pjesën tjetër të botës. Percepcion skajshmërisht i gabuar dhe historia e më vonshme e ekstremizmit të dhunshëm dhe akteve terroriste në botë, ishte një dëshmi e dhimbshme se ishte percepcion i gabueshëm, sepse ekstremizmi, qasjet radikaliste, manipulimi i doktrinave mbi çfarëdo baze ideologjike për qëllime politike, apo përfitimi materiale, janë më shumë se transnacionale. Prandaj edhe bota e ka pasur të vështirë që të përcaktoj një sfond specifik të shkaqeve rrënjësore. Cilat janë ato shkaqe rrënjësore që e bëjnë një grup të radikalizuar të angazhohet në akte makabre terroriste, që për përfundimin kanë humbjen e jetës së njerëzve të pafajshëm.

Në Republikën e Kosovës kemi një vit që e kemi aprovuar Strategjinë Kombëtare për Parandalimin e Radikalizmit dhe Ekstremizmit të Dhunshëm, përpos që kemi aprovuar edhe një ligj shumë të mirë për parandalim, i cili ndalon bashkimin e qytetarëve të Kosovës në konflikte të jashtme, ligji mbështet kryesisht në dispozitat e rezolutës së Këshillit të Sigurimit, 21/78 e shtatorit të vitit 2014. Kjo rezolutë përfundimisht e sanksionon edhe në rrafshin politik nevojën e bashkimit politik të botës kundër ekstremizmit të dhunshëm.

Askush vetmas nuk mund ta luftoj këtë të keqe, kjo e keqe mund të luftohet vetëm përmes bashkëpunimit ndërkombëtarë, koordinimit të veprimeve, këmbimit në kohë të informacionit, sepse këmbimi i vonuar nuk ndihmon. Në këtë rrafsh Republika e Kosovës, ka dëshmuar si pothuaj askush në Ballkan për të bashkëpunuar dhe rezultatet janë evidente. Kemi pasur pothuaj një vit që nuk kemi regjistruar asnjë rast të shkuarjes së qytetarëve tonë në Siri dhe Irak. Ndërkohë që më fund të muajit shtator kemi gjashtë raste, dy prej të cilave i kemi konfirmuar që kanë arritur në vatra të krizes përmes rrugëve të ndryshme.

Sidoqoftë rezultatet në Kosovë janë të prekshme, janë të dukshme dhe këto vijnë si rezultat i zbatimit konsekuent të strategjisë nacionale për luftimin e ekstremizmit të dhunshëm, përkatësisht planit të veprimit të kësaj strategjie, sepse mbi bazën e kësaj strategjie, Ministria e Punëve të Brendshme, ka hartuar një plan shumë të përpiktë të veprimit.

Republika e Kosovës është anëtare e koalicionit global anti-terrorist që nga samiti i Shtëpisë së Bardhë, i shkurtit të viti të kaluar. Kosova ka anëtarësuar pesë qytete të saja në atë që quhet rrjeti i qyteteve të forta. Një projekt ambicioz që është lansuar në samitin e liderëve kundër terrorizmit në Asamblenë e Përgjithshme të OKB-së, vitin e kaluar. Natyrisht në pajtim me ligjin, policia, prokuroria dhe gjyqësia e Kosovës kanë vepruar dhe tashmë kemi një numër të madh për rrethanat e Kosovës, të arrestuarve, ose të dënuar ose në proces të gjykimit.

Në MPB theks të veçantë i kemi vënë tek parandalimi dhe këtu jemi duke bërë punë të madhe me gjithë spektrin social dhe politik të Kosovës, duke përfshirë edhe bashkësitë fetare, shoqërinë civile, shkollat, kryesisht përmes forumeve komunale të sigurisë, sepse ne mendojmë se zgjidha është te parandalimi, tek kundër mesazhi, tek kundër narracioni, e jo tek përballja me pasojat. Gjithsesi përballja efikase dhe e vendosur me pasojat ka edhe ndikim parandalues, por synim i shoqërisë sonë është të parandalojmë pasojat dhe të intervenojmë sa më herët që është e mundshme, përmes fushatave të ndryshme në shkolla, në xhami, kisha, komunitet dhe këtë po e bëjmë për çdo ditë.

Në cilësinë e Ministrit të Punëve të Brendshme, njërit nga njerëzit e zbatimit të planit të veprimit, vitin e kaluar dhe këtë vit, kam vizituar të gjitha komunat e Kosovës, me përjashtim të katër komunave në veri dhe kemi debatuar hapur me spektrin e gjerë social dhe politik rreth nevojës të angazhimit në një fushatë të fuqishme kundër radikalizmit dhe ekstremizmit. Kosova është shtet sekular i definuar me kushtetutë, ndonëse 90 përqind popullsi myslimane, kryesisht jo praktikuese dhe Kosova dhe shqiptarët në tërësi i shquan sensi për harmoni ndër fetare dhe ndër kulturore dhe bashkëjetesë ndër fetare dhe ndër kulturore dhe ne jemi të vendosur që këtë sekularizëm, këtë kulturë të fuqishme harmonie nderfetare ta ruajmë me çdo kusht.

UNDP: Korrupsioni, problem i dytë pas papunësisë në Kosovë

October 24, 2016 by dgreca

PRISHTINË, 24 Tetor 2016-Gazeta DIELLI/ Korrupsioni radhitet si problem i dytë më madhor në Kosovë, menjëherë pas papunësisë.

Ky është raporti i Programit të Kombeve të Bashkuara për Zhvillim (UNDP), i cili analizon të dhënat e mbledhura nga anketa me 1300 respondentë/qytetarë dhe 500 intervista me përfaqësues të institucioneve publike të Kosovës.

UNDP, përmes projektit Përkrahje Përpjekjeve Kundër Korrupsionit në Kosovë (SAEK) lançoi sot botimin special të Pulsit Publik për korrupsionin, në një konferencë shtypi në Prishtinë./b.j/

Ferhat Dinosha, ambasador i Malit të Zi në Kosovë

October 24, 2016 by dgreca

-Presidenti Thaçi priti ambasadorin e ri të Malit të Zi në Kosovë, pranoi kredencialet e tij/

1-thaci-dinosha

-Dinosha para ardhjes në Prishtinë ishte ambasador i Malit të Zi në Tiranë/

PRISHTINË, 24 Tetor 2016-Gazeta DIELLI-B.Jashari/ Presidenti i Republikës së Kosovës, Hashim Thaçi, sot ka pranuar kredencialet e ambasadorit të ri të Malit të Zi, Ferhat Dinosha.Presidenti Thaçi ka shprehur kënaqësinë që Mali i Zi ka ngritur përfaqësimin në nivel ambasadori në Kosovë.“Marrëdhëniet me Malin e Zi janë marrëdhënie të shkëlqyera fqinjësore”, u shpreh presidenti Thaçi.

“Mali i Zi ka marrë vendimin më të drejtë kur ka njohur Kosovën, përkundër presioneve që kishte, si dhe vazhdon të përkrah Kosovën në të gjitha organizatat dhe forumet ndërkombëtare dhe për këtë jemi mirënjohës”, ka thënë presidenti Thaçi.

Nga ana tjetër, ambasadori i Malit të Zi, Ferhat Dinosha, u shpreh se do të “punojmë të thellojmë bashkëpunimin në mes dy vendeve dhe të promovojmë paqen, stabilitetin, bashkëpunimin, fqinjësinë e mirë dhe integrimin në NATO e BE për tërë rajonin”. Presidenti Thaçi i shprehu përkrahjen e tij ambasadorit Dinosha për thellimin e bashkëpunimit në mes dy vendeve në të gjithë sektorët.Mali i Zi është shteti i 48-të që ka njohur Kosovën në 9 tetor të vitit historik 2008 të shpalljes së pavarësisë.Ferhat Dinosha para ardhjes në Prishtinë ishte ambasador i Malit të Zi në Tiranë.

SUZANNA SHKRELI DY JAVË PARA ZGJEDHJEVE PËR NË KONGRESIN AMERIKAN

October 24, 2016 by dgreca

*Gazeta Detroit News shkruan e cila thekson se Kongresisti i mandatit të parë nga zonë elektorlae e shtetit Michigan, Mike Bishop i Partisë Republikane — i cili konsiderohej se kësaj radhe do të fitonte lehtë mandatin e dytë për në Kongresin e Shteteve të Bashkuara – tashti dy javë para zgjedhjeve të 8 nëntorit, përballet me një sfidë agresive nga një politikane e re në fushatën për në Kongresin Amerikan, kandidatja e Partisë Demokrate, 29-vjeçarja Suzanna Shkreli, prokurore në lagjen Macomb./

1-suzana-640x349

*Megjithse shqiptaro-amerikania Suzanna Shkreli merr pjesë për herë të parë në një fushatë politike dhe megjithse ajo ka filluar vonë fushatën vonë, pas tërheqjes për arsye shëndetsore të kandidates së parë të nominuar nga Partia Demokrate,“Cook Political Report” një organizatë e pa-anëshme e cila analizon fushatat dhe zgjedhjet anë e mbanë Amerikës, njoftoi se demokratët po tregojnë një entuziazëm të papritur dhe të dukshëm ndaj kandidaturës së Suzanna Shkrelit për të përfaqësuar zonën elektorale numër 8 të shtetit Miçigan, në Kongresin Amerikan./

1-frank_shkreli

Nga Frank Shkreli/

Po ngushtohet hendeku në fushatën për Kongres në lagjën elektorale numër 8 të shtetit Miçigan ku po bën garë shqiptaro-amerikania, Suzanna Shkreli. Kështu shkruan Gazeta Detroit News shkruan e cila thekson se Kongresisti i mandatit të parë nga zonë elektorlae e shtetit Michigan, Mike Bishop i Partisë Republikane — i cili konsiderohej se kësaj radhe do të fitonte lehtë mandatin e dytë për në Kongresin e Shteteve të Bashkuara – tashti dy javë para zgjedhjeve të 8 nëntorit, përballet me një sfidë agresive nga një politikane e re në fushatën për në Kongresin Amerikan, kandidatja e Partisë Demokrate, 29-vjeçarja Suzanna Shkreli, prokurore në lagjen Macomb. Gazeta thotë se ajo ka mbledhur më shumë fonde dhe është duke shpenzuar më shumë në krahasim me kundërshtarin e saj, ç’prej kohës që njoftoi kandidaturën e saj në korrik. Por kongresisti republikan Bishop, shton gazeta e Detroitit, konsiderohet ende në avantazh me një sasi më të madhe fondesh, në përgjithësi.

Në një takim javën që kaloi në New York, Suzanna Shkreli tha se kishte filluar transmetimin e reklamave politike në televizion, ndërsa gazeta Detroit News njoftoi të premtën se kandidatja demokrate po transmeton një seri reklamash politike duke e lidhur kundërshtarin e saj Mike Bishop me kontribute nga korporata të ndryshme si dhe me komentet e vitit 2005 jo të hijshme për femërat, të kandidatit republikan për president, Donald Trump. Sipas analistëve ka mundësi që problemet me të cilat përballet fushata e Trump-it për president të ndikojnë negativisht anë e mbanë vendit, jo vetëm në fushatën presidenciale, por edhe në fushatën e kandidatëve republikanë për Senatin dhe Dhomën e Përfaqsuesve, duke shkaktuar humbjen e tyre ditën e zgjedhjeve në një numër më të madh se ç’pritej, duke humbur kështu shumicën që tani gëzojnë republikanët në të dy dhomat e Kongresit.

Gazeta shkruan se megjithse kandidati republikan Bishop se në një përpjekje për tu disntacuar nga Trump, u ka thënë votuesve se, “është i zhgënjyer nga komentet agresive seksuale” që Trump-i ka bërë rreth femrave në vitin 2005, po ai, shton gazeta, nuk e ka tërhequr mbështetjen e tij ndaj kandidatit republikan për president, duke thënë se ai dëshiron të përqendrohet në çështjet ekonomike. Ndërsa kandidatja e Partisë Demokrate, Shkreli është shprehur, sipas gazetës, se kritikat ndaj mbështetjes së kundërshtarit të saj për Donald Trump për president janë me vend. “Votuesit duan të dinë”, ka thënë Shkreli, “nëse kundërshtari i saj do të vazhdojë të mbështesë kandidatin republikan për president i cili ka denigruar një hero të luftës, i cili është tallur me një gazetar me aftësi të kufizuara, a do të vazhdojë të përkrah ai njeriun i cili ka fyer familjen e një ushtari të rënë në luftë dhe i cili tani tallet me sulme seksuale sikur nuk janë asgjë.”

Megjithse shqiptaro-amerikania Suzanna Shkreli merr pjesë për herë të parë në një fushatë politike dhe megjithse ajo ka filluar vonë fushatën vonë, pas tërheqjes për arsye shëndetsore së kandidates së parë të nominuar nga Partia Demokrate,“Cook Political Report” një organizatë e pa-anëshme e cila analizon fushatat dhe zgjedhjet anë e mbanë Amerikës, njoftoi se demokratët po tregojnë një entuziazëm të papritur dhe të dukshëm ndaj kandidaturës së Suzanna Shkrelit për të përfaqësuar zonën elektorale numër 8 të shtetit Miçigan, në Kongresin Amerikan.

“Cook Political Report” cilëson se hendeku i përkrahjes për të dy kandidatët po ngushtohet në këtë zonë elektorale që përfshinë lagjen demokrate Lansing, por përfshinë gjithashtu edhe shumë republikanë të edukuar të cilët mund të jenë të zhgënjyer për faktin se kundërshtari republikan i Suzana Shkrelit përbën një pengesë për kandidatin republikan Mike Bishop, i cili vazhdon të mbështesë Donald Trumpin për president dhe si rrjedhim, thuhet se kjo mund të shkojë në favor të kandidates demokrate Suzana Shkreli. Redaktori dhe botuesi i Rothenberg&Gonzales Political Report, Nathan Gonzales citohet të ketë thënë se, “Në përgjithsi, demokratët besojnë se kësaj radhe do ta mundin republikanin Bishop”, dhe se deklaratat e Donald Trumpit mund të ndihmojnë për ta mundur Mike Bishop. Suzana Shkreli shkruan në faqen e saj facebook se komentet e fundit të Doland Trump janë më tepër se ofenduese dhe se kongresisti Bishop duhet t’i denoncojë ato menjëherë dhe të tërheqë mbështetjen e tij për kandidatin republikan për president.

Ndërsa zyrtarët e fushatës së kongresistit Bishop thonë se janë të sigurt se kandidati i tyre do të fitoj përsëri në zonën elektorale ku ai fitoi me mbi 12 për qind të votave në krahasim me kundërshtarin e tij demokrat në vitin 2014.

E vërteta është se sipas disa shënjave, fushata në këtë zonë elektorale për në Kongresin amerikan po zhvillohet në një mënyrë që ka tërhequr vëmendjen e udhëheqësve më të lartë të dy partive kryesore, Partisë Demokrate dhe Partisë Republikane. Pak kohë më parë në atë zonë ishte ftuar të bënte fushatë në mbështetje të kongresistit republikan Bishop, Kryetari i Dhomës së Përfaqsuesve në Kongres, Paul Ryan.

Ndërsa ditët e fundit, duke parë ngushtimin e hendekut të mbështetjes për Suzana Shkrelin, në zonën elektorale numër 8 të Kongresit, në Miçigan kishin vajtur për të bërë fushatë me Suzana Shkrelin, tre senatorë demokratë të njohur të Shteteve të Bashkuara, Senatori Gary Peters, Senatoria Debbie Stabenow, të dy këta nga shteti i Miçiganit dhe Senatori Cory Booker i shtetit Nju Xhersi, gjatë një mitingu elektoral në Univerisitetin e shtetit Miçigan, javën që kaloi.

Suzanna Shkreli ka siguruar mbështetjen e Senatorit Peters, Senatores Stabenow, të dy nga shteti i Miçiganit dhe Senatorit Booker i shtetit Nju Xhersi, gjatë një mitingu elektoral në Univerisitetin e shtetit Miçigan, javën që kaloi.

Në një nga komentet në facebook të kandidates demokrate, një komentues shkruan se Suzanna Shkreli më në fund e detyroi kongresistin Bishop që të mësojë se si të shqiptojë mbiemërin Shkreli, duke sugjeruar se edhe kandidati republikan po e merr tepër seriozisht kandidaturën e shqiptaro-amerikanës për në Kongres.

Sidoqoftë, Suzanna Shkreli është duke zhvilluar një fushatë të fortë dhe dinjitoze, pa fyerje dhe inate, por duke u përqëndruar në zgjidhjen e problemeve dhe të sfidave me të cilat përballen qytetarët amerikanë të zonës 8 elektorale të Kongresit. Gjatë një takimi me ‘të javën që kaloi në New York, Suzanna Shkreli u zotua se nuk do të pushojë së bëri fushatë deri në momentin e fundit të kësaj gare me qëllim që gjatë dy javëve të fundit të kësaj fushate, të informojë bashkqytetarët e saj mbi planet dhe programet që ajo ka në plan të sjellë në Washington, plane dhe programe për përmërsimin e jetës së tyre të përditshme, në përgjithësi.

Tani është në dorë të votuesve të kësaj zone elektorale që të vendosin më 8 nëntor, nëse do të dërgojnë një fëtyrë të re në Kongresin e Shteteve të Bashkuara në personin e shqiptaro-amerikanes Suzanna Shkreli duke bërë kështu dy herë histori. Nëqoftse ndodhë një gjë e tillë, Suzanna Shkreli, jo vetëm që do të ishte e para femër shqiptaro-amerikane e zgjedhur në Kongresin amerikan, por do të ishte edhe femëra në moshën më të re në historinë e Amerikës që ka shërbyer ndonjëherë në Dhomën e Përfqsuesve të Shteteve të Bashkuara.