Archives for May 2017

Përkujtohet studentja e aksidentit në Himarë

May 21, 2017 by dgreca

Nga Ahmet ZANI/Dorina Stafa, vajza 21 vjeçare nga Kruja, është njëra nga 13 viktimat e tragjedisë së Himarës, pesë vite më parë. Familja Hasan Stafa përkujtoi vajzën e saj Dorinën studenten e Univeristetit “Aleksandër Xhuvani” të Elbasanit e cila sëbashku me 45 studentë të tjerë ishin nisur për ekskursion në zonën turistike të Sarandës. Ndërsa autobuzi që shoqëronte këta studentë do të përfundonte në humnerë, dhe nga ky aksident tragjik humbën jetën plot 13 studentë dhe 22 të tjerë u plagosën. Dorina nga Kruja ishte njëra nga viktimat e kësaj ngjarje dhe ndërsa familjarët në ditën e sotme kanë përkujtuar njeriun e tyre që nuk u kthye më pranë familjkarëve. Hasani babaij i 21 vjeçares sjell momentet e rënda të ngjarjes së pesë viteve më parë, ndërsa apelon institucioneve për të zbardhur faktet dhe shkaqet që sollen këtë aksident të rëndë të ndodhur në afërsi të zonës turistike në Hmarë.

Me lotë në sy motra e madhe e familjes Stafa Sejada, tregon momente e kësaj ngjarje, nga marja e lajmit të rëndë, ndërsa akoma më e vështirë ishte dhe incidenti si përfundoj trupi i saj në Elbasan, nga një ngatërriesë njerëzore. Ishte një ditë e zezë që tronditi tërë kombin. ishte një tmerr, që kemi përjetuar, që do na shoqërojë tërë jetën. Sejada në njërën nga dhomat e shtëpisë së aj ka të vendosure tërë librat dhe materialet që dispononte motra e saj Dorina e cila nuk ndodhet më, por që nuk shuhet kurrë në zemrat e familjes Stafa dhe të shkollës së Universitetit të Elbasanit.

Mustafa: LDK ofron Hotin kandidat me kredenciale të larta

May 21, 2017 by dgreca

-Sa i përket listës zgjedhore të LDK-së dhe partnerëve të koalicionit, Avdullah Hoti ka thënë se “lista përfaqëson unitetin e plotë të LDK-së dhe partnerëve të koalicionit, dhe të rinjve që kanë ardhur, të cilët paraqesin për ne një vlerë të shtuar”. “Unë mendoj se ajo është listë e fitores”, ka theksuar ai/

Prishtinë, 21 maj 2017-Gazeta DIELLI/Kryeministri dhe kryetari i LDK-së, Isa Mustafa, ka thënë të dielën në Lipjan se Lidhja Demokratike e Kosovës dhe aleatët e saj ofrojnë Avdullah Hotin, kandidatë për kryeministër me kredenciale të larta profesionale, për ta qeverisur vendin në mandatin e ardhshëm.“Hoti është dëshmuar me punë të pastër dhe profesionale. Ai ka përgatitjen akademike, profesionale, integritetin dhe përvojën e duhur për të qenë një kryeministër i suksesshëm”, ka thënë Mustafa.Kryetari i LDK-së ka thënë se Hoti është i gatshëm që të përballet me të gjitha sfidat që i ka vendi, duke filluar nga zhvillimi ekonomik, krijimi i vendeve të reja të punës, luftimi i krimit, integrimi i vendit në familjen evropiane etj.

Kandidati i LDK-së dhe aleatëve të saj për kryeministër, Avdullah Hoti, ka thënë se Qeveria e kaluar ka bërë mrekullira, të cilat do të nxiten edhe më tepër pas fitores së 11 qershorit.Hoti ka thënë se rritja e të ardhurave ka krijuar mundësi më të mëdha për të rritur investime nëpër komuna. Ai ka përmendur projektet konkrete që janë zbatuar në Lipjan dhe ato që pritet të realizohen pas fitore së zgjedhjeve më 11 qershor. Hoti ka premtuar se buxheti për Lipjanin do të dyfishohet nga qeveria e ardhshme.

Sa i përket listës zgjedhore të LDK-së dhe partnerëve të koalicionit, Hoti ka thënë se “lista përfaqëson unitetin e plotë të LDK-së dhe partnerëve të koalicionit, dhe të rinjve që kanë ardhur, të cilët paraqesin për ne një vlerë të shtuar”.

“Unë mendoj se ajo është listë e fitores”, ka thënë Hoti.

Kryetari i Lipjanit, Imri Ahmeti, ka thënë se jemi të kënaqur me angazhimin dhe përkrahjen që kemi pas deri më tani nga kryeministri aktual, Isa Mustafa dhe shpresojmë që kjo përkrahje do të vazhdojë nga kryeministri i ardhshëm Avdullah Hoti.Ai ka thënë se organizatorët nuk kanë planifikuar pjesëmarrje kaq masovike sot në Lipjan, por kjo tregon se LDK po fuqizohet më tepër se kurrë./b.j/

Nexhmedin Spahiu në rolin e Ali Shukriut në Beograd?

May 21, 2017 by dgreca

Reagim i SHSHA-së në Çikago/

Nga SKENDER KARAÇICA/

Në paraqitjet publike të Nexhmedin Spahiut me motive ,,politike,,nga bulevardet në Prishtinë dhe Mitrovicë,ka krijuar më shumë tone skandaloze që kanë marrë përmasën e një njeriu me kurriz të thyer para kohës shqiptare dhe të Kosovës.Më këtë të dhënë relevante,

SHSHA në Çikago reagon kundër debatit të tij në RTS1 në Beograd bashkë me Ivica Daçiq dhe gjeneralin serb të policisë vrastare në Kosovë gjatë vitit 1998-99.

Nuk e kemi të qartë se çfarë ,,misioni paqësor,,(sic!)ka mare mbi supet e veta profesori i mjerë nga Mitrovica,që RTS1 e quante profesor të Universitetit të Prishtinës,i cili gjatë tërë kohës në këtë (pa)debat të shëmtuar me dy kriminelët serb,Saphiu fliste me gjuhën e renegatit dhe njeriut më antishqiptar të Ali Shukriut që kishte prejardhje nga Mitrovica,njeriu i ngjitur në organet më të larta të ish-Jugosllavisë dhe Serbisë,thotë në këtë reagim SHSHA në Çikago.

Përmes belbëzimeve të ,,sintaksës serbe,,Nexhmedin Spahiu ia bënte qejfin Ivica Daçiq,pionerit të Sllobodan Millosheviq, që përmes programeve ushtarako-policore kishte për qëllim të djegë tokën e Kosovës dhe të asgjësojë deri në substancë popullin shqiptar në tokën e vet etnike.

Këtë të dhënë të kohës,Spahiu e kishte harruar dhe shkonte aq larg saqë pa fije turpi dhe prej sedrës së tij prej,,profesorit,,e quante kryeministrin shqiptar Edi Ramën nën ,,ndikimin e drogës,,kur në disa paraqitje pati falur haptas për çështjen shqiptare në Ballkan dhe të çështjes së Kosovës në raport me BE-në,thotë për opinion SHSHA dhe ia tregon vijat e turpit Spahiut që në Beograd fynte Shqipërinë dhe Kosovën.

Po i tregojmë Nexhmedin Spahiut dhe Ivica Daçiq se shqiptarët e ripushtuar në Kosovë dhe në viset tjera etnike asnjëherë nuk e patën konsideruar për shtet të vetin as ish-Jugosllavinë e aq më pak Serbinë që ishin në luftë të pareshtur për liri dhe pavarësi që nga vitet 1844-1999,thotë SHSHA në Çikago.Si është e mundur që Spahiu rastin e masakrës deri në gjenocid të Reçakut pajtohej me dy kriminelet në RTS1 në Beograd,që e thoshte pioneri i Millosheviq,Ivica Daçiq se këtë rast e ka ,,fabrikuar,,

Viliam Voker se sipas tij nuk ka pasur masakër në Reçak dhe e tërë kjo është bërë për të bombarduar Serbinë.

Tashti Serbia përmes protagonistit të kohës vrastare të Serbisë ndaj Kosovës,Ivica Daçiq dhe argati i djallit N.Spahiu,mundohen që problemin e luftës dhe të masakrave që patën kryer formacionet ushtarako-policore dhe paramilitare serbe ndaj Kosovës,të shkojnë sipas kriminelit serb në ,,muzeun historik,,të harresës historike.

N.Spahiu në debatin e me dy kriminelët serb TVS1 në Beograd,foli në rolin e një ,,prokurori,,edhe për dy liderët shqiptar presidentin e Kosovës Hashim Thaçi dhe Ramush Haradinaj.Përderisa N.Spahiu mendote e harronte se çfarë të thoshte më parë,Ivica Daçiq,në stilin e tij prej,,diplomati,,thoshte se ai kishte propozuar,,paqe,,,me Hashim Thaçin,që për dy popujt viktima të luftës në Kosovë të bëjmë një ,,përmendore,,të përbashkët(!).Kush e bën këtë në botë,agresori dhe çlirimtarët të jenë në një përmendore të përbashkët(shqiptarët dhe serbët).

Skandaloze se jo mahi,këtë e bën Serbia dhe me çdo kusht gjatë këtyre viteve,ajo shpeshherë ka luajtur në kartën e xhokerit për të fituar në tovolinë luftën politike.Kjo kurrë nuk do të ndodhë që të kemi sërish përmendore të ,,vëllazërim-bashkimit,,me motivet e njohura të Serbisë,vraj natën e qaj ditën,thekson në këtë reagim SHSAHA në Çikago.

ATDHETARI E HUMANISTI I SHQUAR, DR. MUHAMET MALO, NDEROHET ME ÇMIMIN “KONICA”

May 21, 2017 by dgreca

NGA RAMIZ LUSHAJ/

1.Këto ditë, në “Dajti Tower Belvedere Hotel” në Parkun Kombëtar të Dajtit në Tiranë, Qendra Shqiptare e Studimeve Amerikane e Britanike (ACABS) e nderoi atdhetarin e humanistin e shquar, dr. Muhamet Malo, me Çmimin e madh “Konica”, në 60 vjetorin e lindjes së tij, në prani të të pranishmëve edhe nga bota diplomatike, akademike, e biznesit, kulti fetar i bektashinjëve, shoqëria civile, letrat shqipe.

Ky Çmim është i madh, me vlera të veçanta, përfaqësues e nderues, sepse Faik Konica (1875-1942) i derës së hershme të bejlerëve të Konicës, i shkolluar në vendlindje e në shkollën e jezuitëve në Shkodër dhe Liceun Perandorak Francez në Stamboll, me studime të larta për gjuhësi romane e filozofi në Dizhon e Paris të Francës e me gradën “Master” në letërsi me medalje ari në Universitetin e Harvardit në SHBA (1912); poligiot (fliste anglisht, frengjisht, greqisht, turqisht, arabisht, etj.), ishte Konsull i Përgjithshëm i Shqipërisë në Washington (1914) dhe ambasador i Shqipërisë në Shtetet e Bashkuara të Amerikës (Washington, 1926-1939); Sekretar i Përgjithshëm (1912) e Kryetar (1921) i Federatës PanShqiptare “Vatra” në Amerikë; një ndër përfaqësuesit e Shqiptarëve të Amerikës në Koferencën e Ambasadorëve në Londër (1913); kryetar i Kongresit Shqiptar në Triste (1913); ndërmori disa udhëtime diplomatike e politike për çështjen kombëtare shqiptare në Amerikë, Mbretërinë e Bashkuar të Britanisë së Madhe, Austri, Belgjikë, Francë, Zvicër, Itali e gjetkë; botoi revistën “Albania” në shqip e frengjisht e pjesërisht në turqisht (Bruksel-1897, Londër 1903-‘09) dhe i gazetës “Dielli” e “Trumbeta e Krujës” në Amerikë; pianist i shkëlqyer, shkrimtar gjenial (autor i disa librave brilant), krijuesi i prozës moderne shqipe, publicist, përkthyes, etj.

Ky Çmimi i madh “Konica” iu është dhënë ndër vite personaliteteve të larta shqiptare e botërore si presidentit amerikan Bill Klinton, kryeministrit britanik Tony Blair, presidentit të Kosovës dr. Ibrahim Rugova e të tjerë, ndër të cilët hyn dhe Njeriu i Mirë, shqiptari i shquar, bamirësi i madh, i mirënjohuri e i paharruari, dr. Muhamet Malo.

2.Motivacioni i dekoratës, i Çmimit (ndër)kombëtar “Konica”, i stilizuar në studio grafike e i kornizuar në galeri arti, duket paksa i gjatë nga teksti i shkruar, por është tërësisht i saktë nga realiteti përshkrues e përgjithësues, pasi na e paraqet të plotë e meritor Presidentin e Nderit të Qëndres Shqiptare të Studimeve Amerikane e Britanike, atdhetarin e humanistin e shquar, dr. Muhamet Malo.

Aty thuhet tekstualisht, mirësisht e lartësisht: “Për kontribute, arritje e imazhin e tij të lartë në promovimin e forcimin e marrëdhënieve shqiptaro-amerikane-britanike në fushën e arsimit, kulturës, historisë, masmediave e letërsisë; për rolin e tij si President Nderi dhe Senator i Qëndres Shqiptare të Studimeve Amerikane e Britanike; për arritjet vetjake gjatë jetës së tij; për veprimtaritë e tij të shumta atdhetare dhe humanitare si Njeri i Mirë, biznesmen i suksesshëm, shqiptar i shquar, misionar i kohës, duke kontribuar në sporte, art e kulturë, turizëm, botime, për institucionet e kultit, tek njerëzit në nevoja jetike e shoqërore, me ngritjen e Telesport e Teleferikun e Dajtit, etj., duke dhënë gjithçka mundi, arriti e diti në jetën e vet, duke e lënë emrin e modelin e tij të mirë”.

Çmimi i madh “Konica” shoqërohej edhe me një portret medaljor të Konicës së madh, i realizuar në Argjendari “Pirro” në Tiranë, i përshtatur me vendmbajtje në një kuti ceremoniali për këso rastesh nderuese.

Çmimin e madh “Konica” (pas vdekjes) për personalitetin shqiptar lartnor shumëdimensional dr. Muhamet Malo, e ndau ambasador Islam Lauka, doktor i shkencave politike, President i Qëndres Shqiptare të Studimeve Amerikane e Britanike (ACABS), autor i disa monografive në shqip e gjuhë të huaja (anglisht, rusisht, arabisht, persisht, serbisht) me interes e vlerësime ndërkombëtare.

Z. Enklajd Malo duke e marrë këtë dekoratë, Çmimin e madh “Konica”, shprehu falenderime për këtë nderim e mirënjohje ndaj babait të tij të nderuar Muhamet Malo dhe premtoi se do të ecin në rrugët e tij të traditës së mirë të biznesit, bamirësisë e atdhetarisë.

3.Dr. Islam Lauka, president i Qëndres Shqiptare të Studimeve Amerikane e Britanike (ACABS), ish-ambasador i parë i Shqipërisë në Kosovë, ish-drejtor i Përgjithshëm i Drejtorisë së Përgjithshme të Organizatave Ndërkombëtare në Ministrinë e Punëve të Jashtme të Shqipërisë, në fjalën e tij përcjellëse foli për jetën e veprimtaritë e atdhetarit e humanistit të shquar dr. Muhamet Malo, duke e cilësuar si një personalitetet i veçantë i kohës shqiptare, ambasador i paqes, një burrë i lartë e i rrallë në bamirësitë e tij të shumta e të mëdha, të vazhdueshme, misionar me zemër të madhe, kontributor i madh në sporte e kulturë, në institucionet e kultit, në turizëm, letërsi e arte, shëndetësi, etj.

Ambasador Islam Lauka, ndër të tjera, theksoi se dr. Muhamet Malo ka qënë prej vitit 2002 President Nderi i Qëndres Shqiptare të Studimeve Amerikane e Britanike (ACABS) dhe kemi marrë vendim se do të jetë edhe në vitet e ardhshme, edhe pas vdekjes së tij, pasi miku ynë i çmuar i bën nder Qëndres e kohës tonë me emrin, veprimtaritë e trashëgiminë e tij. Dr. Lauka pohoi se Muhamet Malo ishte dhe mbeti një institucion i bamirësisë njerëzore, qytetare e atdhetare; një kult, simbol, ikonë e Njeriut të Mirë, humanistit të madh, biznesmenit të shquar, të cilit i ndrittë jeta edhe pasjeta, fjala edhe vepra, është Nderi i Kombit tonë.

4.Dr. Muhamet Malo, vitin e kaluar (2016), u nderua nga Presidenti Amerikan Barack Obama me “Çmimin e Presidentit për Arritjet e Jetës” me motivacionin: “Për angazhimin e tij gjatë gjithë jetës në ndërtimin e një kombi më të fortë nëpermjet shërbimit vullnetar…”. Ky, një vlerësim i madh për një njeri të rrallë si filantropisti Muhamet Malo e në një vend të vogël në planetin tokësor si Shqipëria.

Kohë ma herët, Muhamet Malo, u nderua me titullin “Doktor Honoris Causa” nga OKB në vitin 2004, me Çmim për Paqe, Prosperitet dhe Sporte. Njëherash, Misioni i OKB në Shqipëri e ka vlerësuar me çertifikimin nderues “Lidershipi më i mirë në biznes”. Misioni Diplomatik për Shqipërinë i ka akorduar titullin “Ambasador i Paqes”. Iu ka dhënë nga Presidenti i Shqipërisë Medalja “Për Merita të Veçanta Civile” dhe e meriton ta ketë edhe titullin e lartë “Nderi i Kombit”. Ai është vlerësuar me Çmimin “Pjetër Bogdani” nga Forumi Shqiptar i Kulturës, Edukimit e Shkencës, me Çmimin “Konstandini i Madh” nga Akademia Mshqiptare, etj. Ai ka marrë edhe disa medalje si Medalja “Përfaqësues dinjitoz i biznesit shqiptar për kontributin e shquar në ndihmë të njerëzve në nevojë”; Medalja “Mirënjohje për ndjeshmëri të thellë ndaj personave të verbër”; Medalja “Mirënjohje nga Lidhja e Pensionistëve të Shqipërisë”, etj.

Atdhetari Muhamet Malo është i origjinës nga një familje atdhetare nga Skorovoti i Kolonjës, kurse nana e tij vjen nga Aliçkajt, të origjinës atdhetare nga Frashëri në Përmet. Ai e ka ngritur në Tiranë me mjaft sakrifica “perandorinë” e tij të biznesit të suksesshëm, si: Teleferiku ‘Dajti Ekspres” me kullën “Dajti Tower Belvedere Hotel” dhe restorantin “Ballkoni i Dajtit”; kompanitë “Euro-Lloto”, Televizionin e vetëm sportiv “TeleSport”, etj.

Humanisti i shquar Muhamet Malo ka financuar veprimtari të karakterit kombëtar e kulturor. I veçojmë vetëm disa prej tyre, si: Festivali i Filmit për të Drejtat e Njeriut; emisionet televizive “Ethet e së premtes mbrëma…”në të gjitha edicionet; filmin e Hollivudit për periudhën e Tranzicionit Shqiptar; telenovelën e parë shqiptare “Njerëz dhe fate”; ekipin kombëtar të peshëngritjes në kampionatin botëror të Polonisë; spektaklet “Miss Shqipëria”; albumet për Tiranën e Bylisin; shtatoren e Sali Butkës; dokumentarin “Shqipëria në vite”, spektaklin “Yjet e Sportit”; filmin dokumentar për dr. Jani Bashon; ansamblet “Dardania” dhe “Jehona shqiptare”; botimet me vlera si “Pavarësia”, “Kosova e lirë”, “Gjuha shqipe-gjuhë kozmike”, “Prapaskenat e Konferencës së Londrës”, “Shqiptarët dhe grekët”, “Kush e vrau Amerikën”, “Ikja e madhe”, “Ditarët”, “Përmeti dhe Pavarësia”, “Rrëmbimi i Europës”, “Arkeologjia shqiptare”, “Dodona”, “Portrete njerëzorë”, etj; për vënien në skenë të dramës “Ali Pashë Tepelena”; albumet e grupit “West Side Family”, të artistit Gëzim Kruja, të këngtares Ema Qazimi, etj.;

Muhamet Malo filloi sportist i klubit “Studenti” e tek “Partizani” dhe arriti të jetë Kampion Kombëtar në Mundje Klasike (1982-1990), të marrin titujt: “Mjeshtër Sporti” dhe “Mjeshtër i Merituar i Sportit”; arriti të jetë President i Federatës Shqiptare të Mundjes (1992-1996); President i Shoqatës Kombëtare të Mundjes (prej vitit 2005); President Nderi i Federatës Shqiptare të Mundjes (prej vitit 2008), etj. Ai ka dhënë kontribute të mëdha për sportin shqiptar ndër vite, duke shpërblyer në mundje Elis Gurin, në shtangë Arkand Qerimin dhe Ilir Sulin, etj. “Medaljen e Meritës” për 25 sportistët më të mirë e shoqëroi me afërsisht nga 1.000 Euro për secilin prej tyre. E sponsorizoi ardhjen nga SHBA në Atdhe të trupit të Aleksandër Kongos, i arratisur nga Shqipëria më 1987 dhe i vrarë në atje nga Sigurimi i Shtetit Shqiptar. Ai ka sponsorizuar veprimtari sportive si të peshëngritësve të rinj në Kampionatin Europian në Francë, për një kampionat kombëtar të bilardos, për zhvillimin e futbollit të femrave, për Federatën Kombëtare të Notit, për volejbollin femra të “Studentit”, etj. etj.

Humanisti Muhamet Malo, edhe pa qënë monarkist apo legalist, i ka përballuar të gjitha shpenzimet e rikthimit të Familjes Mbretërore në Shqipëri, të dërgimit me çartër të Nanës Mbretëreshë Geraldina e Shqiptarëve për mjekim në Francë, etj. Ai ka ndihmuar edhe Arian Bakirin, Kastriot Fejzon, Viktor Babameton, Sotiraq Kulen për operim në Itali, Rexhep Çelikun për një ndërhyrje në mëlçi, e shumë të tjerë.

Dr. Muhamet Malo ka financuar me dhjetra e dhjetra shkrimtarë, këngtarë, aktorë, poetë, kineastë, gazetarë, regjisor, botues, sportistë, studentë në projektet e tyre për librat, filmat, koncertet, etj.

Njeriu i Mirë Muhamet Malo ka ndihmuar institucionet e kultit, veçanërisht për ngritjen e Odeonit të Kryegjyshatës Botërore të Bektashizmit.

Në letrën përcjellëse të Shtëpisë së Bardhë për humanistin Muhamet Malo, me fjalë e firmë të Presidentit Obama, jepen mirënjohje dhe mesazhe aktuale: “Përgëzime për marrjen e çmimit të Presidentit për shërbime vullnetare. Gjithashtu ju falenderojmë për ndihmesën e dhënë në adresë të komunitetit tuaj për nevojat më të ngutshme…Në adresën time përuruese, deklaroj se ne kemi nevojë për një periudhë të re të përgjegjësisë, …se ne kemi detyrën për veten tonë, kombin tonë dhe për botën”.

Humbësit e zgjedhjeve

May 21, 2017 by dgreca

Nga Anton Marku/Vjenë/

Mbi shitësit e mjegullës, përbuzësit e lirisë, mbledhësit e kokrrava, guralecët dhe gurët që ndrrojnë vend përditë.

Ja që sipas të gjitha parashikimeve ndodhi ajo që pritej: Qeveria e Kosovës nuk arriti të përfundojë mandatin e saj dhe zgjedhjet e parakohëshme do të mbahen me 11 qershor 2017. Në këtë kontekst tashmë ka filluar gara, jo në atë se kush është më i zëshëm në mbrojtje të shtetit dhe interesave të qytetarëve të tij, por kush bërtet më shumë. Kush ulurinë më gjatë.E të shkumbëzojnë po shkumbëzojnë të gjithë.

Arrat, pjeshkat dhe shalqini

Koalicionet e krijuara me këtë rast për shumëkënd kanë qenë befasi. Për njohësit e zhvillimeve politike në vend jo. Tani definitivisht, kur mjegulla u hoq dhe maskat ranë, secili pe gjeti lëmshin që i takon. Dhe që e meriton. Në njërën anë kemi ‘‘Të fortit’’, në tjetrën ‘‘Të butët’’. Mes tyre ‘‘Thuprat’’. Pra ‘‘Arra’’ (PDK-AAK-Nisma) që janë të fortë nga jashtë e të butë nga brenda, ‘‘Pjeshka’’ të butë nga jashtë, të fortë nga brenda (LDK-AKR-Alternativa) dhe ‘‘Shalqini’’ (VV), i gjelbërt nga jashtë dhe plot nacionalizëm të kuq nga brenda.

Për dikë këto koalicione mund të ndahen në neopesimistët (PDK & Co), postoptimistët (LDK &Co) dhe light-anarkistët (VV). Aty janë bërë bashkë liberalët me socialistët, konservatorët me modernistët, globalistët me nacionalistët dhe fanatikët fetarë me ateistët.

Ajo që bie në sy është se kësaj radhe duket se listat zgjedhore janë më ndryshe se sa deri më tash. Megjithatë, edhe aty mund të bien në sy anomalitë e tipit: djali i një kryetari komune në Drenicë (PDK), gruaja e një ish-futbollisti (AAK), mbesa e shtatë vllezërve (LDK), bashkëshorti i lideres partiake (Alternativa), zonja me shami (AKR), etj.

Sidoqoftë, bashkësia ndërkombëtare duhet siguruar se këtë radhë, në krahasim me vitin 2010, çdo votë do të numërohet. Dhe atë vetëm një herë. Jo më shumë se kaq.

Interneti nuk harron

Politikanët i kanë shndërruar konfliktet konceptuale në një betejë të ashpër, në të cilën, pas aktit të fundit, askush nuk do të jetë fitues. Kufinjtë e gjuhës së tyre janë kufijtë e botës së tyre. Ata mohojnë gjithë atë që deri më tani kanë deklaruar. Kur nuk kanë nga të ja mbajnë nuk turpërohen fare të thonë se, mbase edhe ‘‘në një çast ligësie’’ edhe mund të kenë pohuar ashtu, por se në fakt nuk kanë menduar ashtu. Tek ata ajo që duket e pabesueshme nuk është dhe e pamundur. E në anën tjetër, po të mundnin, dje dhe sot, do t’i hanin njërit-tjetrit kokën. Dhe atë pa kripë.

Kjo vlen sidomos për liderin e AAK, por jo vetëm për të. Kryetari i kësaj partie në vitin 2014 ishte kundërshtari më i ashpër i PDK duke lidhur marrëveshje paszgjedhore me LDK. VV dhe Nismën. Nga aty vazhdoi vetëm me këto dy të fundit, për t’i ndarë rrugët edhe me ta dhe përfundimisht t’i hidhet në përqafim ish-oponentit kryesor. Ky ishte pra një rrugëtim plot kthesa në vetëm 3 vite kohë. Për më tepër, gjatë nënshkrimit të koalicionit ‘‘Shefi’’ nuk duhej asgjëkundi por të gjithë e ndjenin prezencën e tij. Ai nuk u pa. Edhe ashtu është kjo një marëveshje për armëpushim. Jo dhe për paqe.

Komandantët po ja japin krahun edhe një herë njëri-tjetrit. Moto e bashkimit të tyre dikur ishte ‘‘Vendlindja thërret’’. Tash çdo ditë e më tepër ‘‘Gjykata troket’’.

Në këtë ambient kontaminues është vështirë të mbetesh normal. Lajm i mirë është se interneti nuk harron. Kurrë.

E aty mund të gjendet mjaft. Për të gjithë nga pak.

U gabove Veton

Është mendim i përgjithshëm se nëse proceset në Kosovë vazhdojnë me këtë ritëm, atëherë nuk do të kemi liberalizim vizash para vitit 2020. Dhe atë, për fat të keq, jo vetëm për shkak të demarkacionit.Shumë nga ne ishin optimist kur menjëherë pas luftës Veton Surroi bashkë me një grup intelektualësh, krijuan ‘‘Forumin 2015’’ me shpresë se ky do ishte viti i aderimit të Kosovës në Bashkimin Evropian. Por, nëse vazhdohet të ecet kështu, më shumë prapa se para, atëherë e vetmja që do të mund të ndodhë është që dy numrat e fundit të ndrrojnë vendet: nga 2015 në 2051. Kësaj radhe do doja të gabohem. Pra, qofsha i gabuar!

Ështe afër mendësh të pritet se demarkacionin dhe asociacionin do i miratojnë mu ata që i kundërshtuan me kaq këmbëngulësi deri më tash. Po ashtu ata do gjejnë edhe ‘‘formatin’’ e duhur që të vazhdojë edhe dialogu me Serbinë në Bruksel, i cili asesi të prodhojë epilog, si dhe të bashkëpunohet me Gjykatën Speciale. Këtu bën pjesë dhe gjendja në veri të vendit, i cili ka mbetur pak Serbi e pak Kosovë. Më së paku Mitrovicë.Zjarri shuhet në dy mënyra: Duke i hedhur ujë apo duke e lënë të vetdigjet. Duket se ndërkombëtarët kanë përzgjedhur këtë të dytën.

Dita tjetër

Një nga skenarët e mundshëm është se kriza politike do të vazhdojë edhe pas mbajtjes së zgjedhjeve pasi që asnjëri bllok nuk do të arrijë të ketë numra të mjaftueshëm për të krijuar qeverinë. Një mundësi mund të jetë që VV të arrijë të mbledhë rreth 20% të votave dhe me këtë të luaj rol përcaktues të fatit të mëtejshëm të vendit. Në tërë këtë matematikë po harrohet edhe fakti se serbët dhe minoritet tjera mund të kenë një rol edhe më qenësor duke bërë që koalicioni i cili fiton më pak se gjysmën e votave të popullsisë shqiptare të udhëheqë me qeverinë e ardhshme. Në rast të kundërt shteti do të detyrohet të shkojë në zgjedhje të jashtëzakonshme. Kriza kështu do të hyj në një fazë të re. Nëse po, do të jetë ky edhe një vit i humbur për Kosovën.

Mrrekullitë ju ndodhin vetëm atyre që besojnë në to. Shumë nga ne kemi hequr dorë prej tyre. Me shumë duam të besojmë se ajo që po na ndodh është ëndërr, e mira e së cilës do të qëndronte jo në gjatësinë por në bukurinë e saj.

Edhe pse ka tentativa për të ndryshuar diçka në këtë relacion, sidomos nga aktivistët e VV, e të cilat duhet vlerësuar, mbase diaspora, si dhe tërë viteve të pasluftës, do ta vazhdojë të qëndrojë pasive dhe indiferente në raport me zgjedhjet në Kosovë. Pjesërisht ajo do i gëzohet më shumë hapjes së ndonjë xhamie të re, siç ishte rasti ky i ditëve të fundit në Gjenevë, i cili entuziazmoi shumë mërgimtarë tanë në Zvicër.

Shteti dhe Kombi edhe mund të presin. Deri në ndonjë shi tjetër.

Humbësit më të mëdhenj kësaj radhe do të jenë ata që nuk do dalin në zgjedhje. Pra, dil e voto!

Jepi frymë zërit tënd!

Vjenë, 21 maj 2017