Archives for August 2020

Antifa – grup rebelësh revolucionarë marksistë me taktika fashiste

August 16, 2020 by dgreca

“Lëvizja Antifa, është një kërcënim për fjalën e lire. Ajo është “fituese” në kryqëzatën e saj për të heshtur kundërshtarët. Llojet e betejave, që luajnë tani në rrugët e qytetit nuk janë asgjë e re për kolegjet. Shumë prej nesh në kampet studentore, kanë vite që merren me Antifën, dhe ajo po fiton. Unë kam dhënë mësim për 30 vjet dhe kurrë nuk kam parë nivelin e frikës dhe frikësimit në kampe që shohim sot.” – Prof. Tyrley Jonathan, Universiteti George Washington.-

Opinion Nga Klajd Kapinova-

Barr: “Ata janë grupe revolucionarë. Taktikat e tyre janë fashiste.”

Prokurori i Përgjithshëm i SHBA-së (AG), Bill (William) Barr, i ftuar në studio të dielën më 2 gusht 2020, në një intervistë prej 60 minutash, me hostin (mikpritësin) konservator Mark Levin (njohës shumë i mirë i Kushtetutës së SHBA), në emisionin e tij të Fox News, “Jeta, Liria & Levin”, diskutoi gjerësisht për shumë tema shqetësuese të rëndsishme, që e preukupojnë sot jetën dhe politikën amerikane.
Ai citoi Spiunllekun apo Përgjimin (Spygate), të kampit elektoral të kandidatit dhe më pas Presidentit Donald J. Trump, me urdhër të administratës së Presidentit Barok Hysen Obama dhe zv/Presidentit Joe Biden; mbylljen e shoqërisë amerikanë, gjatë kohës së pandemisë botërore të Covid 19 dhe analiza e saktë e të dejatuar mbi organizatat e dhunshme të majta, anarkiste dhe tipike marksiste, si: Antifa dhe BLM.
Ai u ndal më shumë në diskutimin e tij mbi trazirat anarkiste marksiste mbarëkombëtare të Black Lives Matter dhe organizatës terroriste Antifa (e shpallur si e tillë publikisht nga Presidenti Donald J. Trump), gjatë muajve të fundit.
Prokurori i Përgjithshëm Barr, i tha intervistuesit Mark Levin, se grupi anarkist Antifa, ndërsa përcaktohej nga përkrahësit e tij se është i përbërë nga aktivistë të të “drejtave civile” dhe të ngjashme, në fakt është organizatë e mirëfilltë anarkiste, e cila përbëhet nga bolshevikë, të përqendruar rreth synimit, për t’a kthyer vendin tonë në “një formë të socializmit apo komunizmit.”
Barr, tha: “Ata janë grupe revolucionarë. Taktikat e tyre janë fashiste.”
Kur i krahasoi trazirat me një “formë të re të luftës guerrile”, Barr shtoi, se: “Kjo është mënyra sesi guerrilja Antifa sulmon dhe fshihet në mesin e njerëzve si peshqit në oqean … Ajo që ata bëjnë, janë në thelb duke mbrojtur veten ose duke u copëtuar në aktivitetin e parë. Ata hyjnë në demonstrata, në të cilat po ushtrojnë dhunë, dhe krijojnë situata për të mbrojtur veten e tyre. Këtu ata notojnë. Dhe ajo që ata bëjnë është se synojnë të rrëmbejnë frenat e demonstrimeve dhe provokojnë dhunë.”
Barr, vazhdoi përgjigjen e tij, duke sqaruar se prirjet radikale të këtyre grupeve, janë reflektuese si kthesë e fortë e së majtë të Partisë “Demokratike” vitet e fundit, duke shtuar se “e majta” është tërhequr nga ombrella e vlerave klasike liberale.
Dhuna e tyre filloi qysh ditën e parë, kur kandidati republikan dhe sot Presidenti Donald J. Trump fitoi zgjedhjet presidenciale të vitit 2016 dhe “nga ajo ditë e deri sot, ka pasur rezistencë nga ana e tyre. Ata po përpiqeshin ta fajësojnë atë nga dita e parë. Ata kanë bërë gjithçka që munden … dhe unë mendoj se është për shkak të dëshirës për pushtet, që kërkon e majta anarkiste. “Ata duan të drejtojnë jetën e njerëzve në mënyrë që të mund të hartojnë utopi për të gjithë ne, deri sa ata të marrin pushtetin. Ata u zemëruan, sepse nuk e prisnin fitoren e Trumpit. Dhe kjo i zemëron sërisht edhe sot ata.”

Kongresmeni demokrat Jerrold Nadler e quan dhunën nga Antifa në Portland si një “mit”

Prokurori i Përgjithshëm i SHBA-së (AG) William Barr shkatërron Nadlerin. Kjo ishte një katastrofë tjetër në dëshminë e thirrur nga Dhoma e Demokratëve “demokratë” në Capitol Hill, Washington D.C.
Për fat të mirë, Departamenti i Drejtësisë i udhëhequr me zgjuarësi nga Presidenti Trump, po ngrihet me dinjitet, duke respektuar ligjin përpara rebelëve anarkistë.
Përpjekja e Nadlerit, për të shfrytëzuar Portland-in, kundër ekipit Trump, ishte këto ditë një tjetër dështim i sikletshëm i kongresmenit liberal.
Rep. Nadler, tregohet në një videoklip të ri në internet, duke e quajtur dhunën në Portland nga Antifa një “Mit”, pasi protestat rifilluan me trazira vandaliste.
“Demokrati” sot Kryetari i Komitetit të Gjyqësorit të Dhomës së Përfaqsuesve Jerrold Nadler, iu afrua shkrimtarit dhe producentit Austen Fletcher, i cili, tha se ai i kërkoi “demokratit” të shkatërronte rebelimet e Antifës, në qytetin Portland, Oregon.
Ai tregon: “Unë vrapova tek Jerry Nadler në DC dhe i kërkova që të mos pranonte dhunën (trazirat) e Antifës në Portland. Kjo është një MIT”, shkroi Fletcher, në një cicërimë (në Twitter) së bashku me videon e shkurtër.
Para se të hynte në makinën e tij, Nadler i thotë Fletcher se Antifa, është një “Mit”, që po përhapet vetëm në Washington D.C.”.
Demokrati i rangut të lartë të New York-ut, po sulmohet për komentet e tij në internet.
Në mesin e njerëzve që e hodhën në erë politikisht Nadlerin (për komentin e tij) ishte djali i Presidentit, bisnesmeni Eric Trump.
“Kjo është Partia Demokratike në vitin 2020”, shkroi djali më i ri i Presidentit Trump në Twitter. (Fox News, 27 korrik 2020)

Krimet e komunizmit në botë nuk permenden nga Antifa dhe BLM

Meqenëse komunizmi deshtoi si ideologji dhe praktikë, gjatë shekullit XX dhe XXI, forcat marksiste anakiste, kanë ndryshuar taktikë dhe janë shtrirë me antarësi në shtetet e zhvilluara të Europës Perëndimore dhe SHBA.
Ata janë anarkistë marksistë, që po kopjojnë me përpikëri metodat dhe praktikatë fashiste gjermane në vitin 1933 në Gjermani, kur Hitleri erdhi në pushtet.
Bilanci i sundit të sistemit socialist dhe komunist në shumë shtete të botës dhe veçanërisht në disa shtete të Europës Lindore dhe Azi, është një bilancë negativ, i mbushur me kufoma malesh dhe gjak të njerëzve të pafajshëm.
Ndërgjegjja e freskët e popujve liridashës nuk mund të harrojë 20 milion të vdekur si pasojë e terrorit komunist në ish-BRSS, 6.5 milion në Kinë, 1 milion në Vietnam, 2 milion në Kamborxhia, 1.5 milion në Europën Lindore, 150 mijë në Amerikën Latine, 1.7 milion në Afrikë, 1.5 milion në Afganistan, pra sipas studiuesit Stephane Courtois mbi 100.000.000 njerëz janë zhdukur nga ideologjia komuniste, ku kryesojnë terroristët diktatorë, si: Mao Ce Duni, Pol Poti, Lenini, Stalini, Ho Shi Mini, Kimi II Sungut, Fidel Kastro, Enver Hoxha, Çaushesku etj., e disa diktatorë afrikanë.

Antifa sipas Kyle Shideler drejtor për Sigurinë e Brendshme dhe Antiterrorizmin në SHBA

“Kombi ynë, është kapur nga anarkistë profesionistë, plaçkitës, kriminelë, si Antifa dhe të tjerë.”- Donald J. Trump

Presidenti Donald Trump, duket i bindur se ka një komplot të frikshëm, që përgjon në protestat për drejtësi racore, që përfshinë kombin.
Antifa, si një lëvizje militante anarkiste majtas, po përfiton nga demonstratat për të djegur vendin kudo me protesta “paqësore”, duke kopjuar praktikisht metodat origjinale fashiste.
Ai, ka fajësuar plaçkitjet dhe djegiet nga lëvizjet protestuese anarkiste si një çështje thelbësore të dhunshme, duke pohuar në një fjalim se “kombi ynë është kapur nga anarkistë profesionistë, plaçkitës, kriminelë, si Antifa dhe të tjerë.”
Presidenti Trump, vazhdimisht është zotuar të etiketoj zyrtarisht Antifën si një grup terrorist, duke e vendosur atë në një listë federale përkrah al-Qaedës dhe ISIS.
Ky grup radikalësh të majtë, që demostron në rrugë me simbole bolshevike, është një lloj alternative anarkiste për policinë e shtetit, që fillimisht zuri rrënjë në skenën e Amerikës, pa asnjë lloj strukturë komande dhe kontrolli kombëtar.
Prania e saj është në shumë protesta të fundit. Ajo është përgjegjëse për kthimet e tyre drejt dhunës, vjedhjeve, vrasjeve, vandalizmave. Drejtuesit dhe anëtarët e Antifës janë përgjegjës për trazirat.
Lëvizja e majtë u dallua shumë në protestat në Washington D.C., kundër festës kombëtare të inaugurimit të Presidentit Donald J. Trump më 17 janar 2017.
Aktiviteti i tyre, i dhunshëm, ekziston me shembuj filmike të qartë, që kalojnë vijën, duke përfshirë këtu sulmet direkte fizike të papërcaktueshme ndaj gazetarëve në sheshet apo rrugët e disa qyteteve që drejtohen dhe kontrollohen nga governatorët dhe kryetarët e bashkive të ekstremist te majtë të parties “demokratike”..
Organizata e mirëfilltë anarkiste marksiste, përdor sot dhunën për të imponuar ideologjinë e saj komuniste dhe socialiste si forma më e mire antikapitaliste.
Antifa, ka filluar të veproj në vitet 1960-1970 e fshehur në fillim në Gjermani dhe pastaj filloj të shtrihet në shumë shtete të botës deri sa u shfaq edhe në SHBA. Këtu ajo ka 50 vjet që përdor dhunën direkte, sabotazhin, krimet etj., në shumë protesta, që nuk kanë asnjë lidhje me liritë dhe të drejtat e njeriut.
Sot, shumë media të majta, duke përfshirë Fake News, si: The New York Times, Washington Post, Daily News, CNN, BBC, Boston Blobe, TIME, etj., u shpërlajnë trurin lexuesve naivë, se gjoja Antifa nuk ekziston edhe pse ata kanë websitin e tyre, me qindra dhe mijëra foto, programe propagandistike, ku ato paraqiten të armatosur etj.
Sulmet e Antifës janë sot shumë të sofistikuara, thotë njohësi shumë i mirë i Antifës eksperti i antiterrorizmit Kyle Shideler , njëkohsisht Drejtor dhe Analist i Lartë për Sigurinë e Brendshme dhe Antiterrorizmin në Qendrën për Politikën e Sigurisë së SHBA-së.
Ai është specializuar në grupet islamike, që veprojnë në Shtetet e Bashkuara, pasi kanë kaluar mbi një dekadë duke studiuar dhe shkruar për historinë, doktrinën dhe ndikimin e tyre.
Kyle Shideler, kohët e fundit ka shkruar dhe botuar librin: “The American Mind”, i cili, është pritur shumë mirë nga kritika dhe specialistët e antikrimit në këtu.
Në vitin 2019, Antifa organizoi protesta të dhunshme në SHBA. Për më tepër, në website e saj ajo publikisht u tregon atarëve të saj sesi të organizohen, të veprojnë, të ruajnë komunikimin mes tyre etj.
Ata shpërndajnë në mënyrë sistematike propagandë marksiste, ku, dhuna është mjeti kryesor për të marrë pushtetin politik dhe vendosur komunzmin etj.
Në një artikull interesant dhe investigues, me titull: “Historia e errët e krahut të zbatimit radikal të së majtës.”, autori Kyle Shideler, tregon mbi trazirat dhe trazirat civile në metastazimin në të gjithë Shtetet e Bashkuara, ku, Presidenti Trump deklaroi se synon të caktojë Antifa si një grup terrorist.
Media globaliste e majtë këtu, “argumentojnë” se Antifa është një shqetësim amorf, jo një organizatë funksionuese dhe sigurisht jo një lëvizje terroriste. Realiteti është i thjeshtë dhe shpesh kompleks.

Antifa u themelua nga Partia Staliniste Komuniste e Gjermanisë

Për të filluar duhet thënë, se Antifa ka emrin e vërtetë: Antifaschisitsche Aktion. Ajo lindi gjatë luftimeve në rrugë të Republikës Weimar në vitin 1932.
Antifa u themelua nga Partia Staliniste Komuniste e Gjermanisë (PKGJ), megjithëse njësi të ndryshme të “mbrojtjes antifashiste” komuniste ishin të lidhur me KPD shumë më herët.
Qëllimi i vetëm i Veprimit Antifashist ishte të ndihmonte KPD-në të luftojë partitë e tjera politike për kontrollin e rrugëve në politikën revolucionare të Republikës Weimar që dështoi shpejt. Po, ata luftuan nazistët gjermanë. Antifasit, gjithashtu luftuan partinë liberale, partinë konservatore dhe këdo që mori rrugën kundra tyre. Historikisht ata nuk kanë pasur sukses.
Më shumë se gjithçka, Antifa ekziston për të shërbyer si një mjet i politikës revolucionare në një shtet të dështuar (ose të dështuar). Ajo do të rivendoste veten në sferen politike në fillim të viteve 1980, gjithashtu në Gjermani dhe jashtë saj.
Autonomizmi, i praktikuar nga Antifa, është një ideologji anarko-marksiste e shoqëruar me organizatat guerrile urbane komuniste të viteve 1970 dhe 1980 në Evropa nga njerëzit që e quanin vetën si Ushtria e Kuqe dhe Brigadat e Kuqe.

Antifa me simbole dhe veshje të zezë

Rreth kësaj kohe, taktikat e Antifa-s si “blloku i zi”, dallohej nga një numër i madh i rebeluesve, që vishen me rroba të zeza nga koka në këmbë dhe lëvizin së bashku si pjesë e një proteste më të madhe.
Me ardhjen e saj në Amerikë, Antifa do të formohej në një mënyrë të ngjashme, por nën një emër tjetër.
Këtu, ajo ishte një përpjekje e të rinjve me formim bolshevik, për të dëbuar neo-nazistët dhe supremacistët e bardhë nga skena muzikore, duke çuar gradualisht në formimin e Aksionit Anti Racist (ARR), nç fillim në pjesën qendrore dhe perendimore të shteteve të Amerikës dhe më pas u përhap jashtë tyre.
Disa ARR të veçantë do të vazhdojnë të formojnë një nga rrjetet më të mëdha Antifa në vend, Torch Antifa, faqja e internetit e të cilit u regjistrua nga një ish anëtar i JBAKC.
Nga ana e tjetër, vetë JBAKC u formua si një front për Organizatën Komuniste të 19 majit (MCO), e themeluar nga mbetjet e Motit Nëntokësor, Ushtrisë Clirimtare e Zezë (njerëzve me ngjyrë), FALN dhe grupet e tjera terroriste të viteve 1960 dhe 1970. Data 19 maj, u zgjodh për nder të ditëlindjes së Malcolm X dhe Ho Chi Minh.
Anëtarët e ZKK-së ishin përgjegjës për disa bomba dhe plaçkitje në vitet 1980, duke përfshirë grabitjen famëkeqe të vitit 1981 të Brinks të blinduar.
JBAKC përdori gazetën e saj “Vdekja për Klan!”, për të nënvizuar luftimet në rrugë me Klansmen, të akuzojë zyrtarët Reagan për epërsi të bardhë, të aprovojë grabitjet e bankave të MCO si “shpronësim”, dhe të promovojë kryengritjet komuniste, që po ndodhnin në Nikaragua dhe El Salvador.
Logjika e JBAKC dhe Organizatës Komuniste të 19 majit, është e njëjta ideologji që drejton sot Antifa, ku, në themel të saj është se Shtetet e Bashkuara u themeluan mbi epërsinë e bardhëve, dhe për këtë arsye duhet të shkatërrohen.
Sot, ata janë të shtrirë në redaksitë e dhomave të lajmeve, sallat e fakulteteve dhe në mesin e stafit të kryetarëve të bashkive dhe zyrave të avokatëve të përgjithshëm.
Lëvizja moderne Antifa përparon në infrastrukturën e trashëgimisë së fortë të së majtës revolucionare, përmes një besimi në efikasitetin e organizimit të lirshëm.
Baza themelore e organizimit të veprimit të drejtpërdrejtë është “grupi i afrimitetit”, që është pikërisht ajo që tingëllon si një grup njerëzish me mendje të njëjtë, të cilët ndajnë një objektiv të caktuar të përbashkët.
Anëtarët e Antifa-s, kanë lidhje me organizatat politike me komitete mbështetëse të tyre, siç janë: Socialistët Demokratikë të Amerikës (DSA), Punëtorët Ndërkombëtarë të Botës, Partia Revolucionare Komuniste (RCP) dhe organizata ose kolektivë rajonalë radikalë të majtë.
Antifa është në shumë mënyra një përsëritje e përmirësuar e organizatave militare të militantëve të mëparshëm guerrile.
Ajo, me strukturën e saj të jashtme anarkiste dhe besueshmërinë e mundshme, lejon që e majta radikale të ketë tortën e tyre dhe ta hajë atë gjithashtu.
Në të gjitha periudhat e trazuara të politikës revolucionare, qoftë vitet 1930, 1970, qoftë sot, aftësia për të projektuar forcë në rrugë për të ndëshkuar armiqtë, gjithmonë ka deshtuar deri tani
Për të majtën amerikane sot, Antifa është ajo force e tyre mbështetëse.

450 të vrarë afrikano amerikanë në 8 muaj të vitit 2020

Në Chicago City deri më 4 gusht të vitit 2020, janë vrarë mes vetës 450 afrikano amerikanë. Po aty, janë qëlluar me armë zjarri (kryesisht pistoletë) mbi 900 vetë, nga janari deri më 4 gusht 2020.
Po në Chicago janë vrarë 9 engjëj apo fëmijë të pafajshëm afrikano amerikanë nga vrasës afrikano amerikanë. Viktimat e pafajshëm fëmijë i përkasin moshës 1 deri në 13 vjec.
Shefja e Departamentit të Policisë në Chicago (CDP), ka dhënë dorëheqjen nga detyra, në shenj proteste, sepse pushtetarët “demokratë”, kanë shkurtuar fondet financiare pë policinë.
Këtu 80% e oficerëce të policisë dhe dedektivëve janë afrikano amerikane dhe ispanjik (me origjinë nga vendet e Amerikës Latine dhe Mexico)
Protestat e dhunshme të Antifës dhe BLM, janë më shumë në qytetet e shteteve ku drejtojnë “demokratët” governatorë dhe kryetar bashkie si në: Chicago, New York, Portland, Seatle, ka shumë të plagosur dhe vdekur.
New York City, ka policë të zot dhe profesionistë, por ata nuk po lejohen të bëjnë punën e tyre nga kryetari i Bashkisë Bill de Blasio, të cilët, së bashku me governatorin e shtetit të New York-ut Andrew Cuomo, kanë shkurtuar mbi 1 bilion dollarë fonde për NYPD, duke i detyruar shumë policë profesionistë të japin dorëheqje dhe të dalin në pension para kohe.
Gjatë muajit të kaluar në Minneapolis, anarkistët marksistë vandalistë të Antifës dhe BLM, kur mësuan se forcat federale të policisë dhe ato speciale federale po vinin në qytet, ata u larguan dhe humbën si kripa në ujë.
Krimi në shtetin e New York-ut për disa muaj është rritur 60%, vrasjet dhe të shtënat me armë janë rritur në masën 70%.

Shqipëria është “pa kokë, pa shpatulla dhe pa këmbë”

August 16, 2020 by dgreca

Nga Prof.dr. Eshref Ymeri/Viti 2020 është viti i përkujtimit të dy përvjetorëve për familjen time. Më 18 shkurt 1970, në moshën 80-vjeçare, ndërroi jetë Babai im i dashur Hasan Ymeri. Kurse më 16 gusht 1980, po në moshën 80-vjeçare, ndërroi jetë nëna ime e shtrenjtë Hanko Ymeri.
Çdokush prindërit i kujton me nderimin dhe respektin më të madh, sepse ata janë njerëzit më të shtrenjtë të jetës së tij. Ata janë busulla orientuese, janë ylli i karvanit për fëmijët e vet, të cilët i rritin dhe i edukojnë me një kujdes të jashtëzakonshëm.
Kur kthej kokën prapa dhe kujtoj rrugën e jetës që kam ndjekur sipas këshillave që më patën dhënë prindërit që në moshë të vogël në fshatin Mesaplik, njëri nga katër fshatrat e Smokthinës së Vlorës, ku jetonte familja jonë, them me plot gojën se ata, ashtu si edhe të gjithë prindërit për fëmijët e tyre, kanë qenë shenjtorë për mua dhe menjëherë më vijnë në kujtesë ca fjalë të arta të disa prej personaliteteve të shquara të lashtësisë, si Menandri (342-291 p.e.r.), komediografi i lashtësisë greke, i cili ka lënë një këshillë fort të vyer për pasardhësit:
“Prindërit nderoji gjithmonë, ashtu si edhe Hyjninë”.
Vlera mjaft të çmuara edukative përcjellin fjalët e Ciceronit (Marcus Tullius Cicero – 106-43 p.e.r.), filozofit, oratorit dhe personalitetit politik të lashtësisë romake, i cili theksonte:
“Dashuria ndaj prindërve është themeli i të gjitha virtyteve”.
Më kujtohet Horaci (Quintus Horatius Flaccus – 65-8 p.e.r.), poeti i “shekullit të artë” të letërsisë romake, i cili thoshte:
“Virtytet e prindërve janë paja më e madhe për fëmijët”.
I ati i Babait, i sëmurë nga pleviti, pati ndërruar jetë në moshë 45-vjeçare, duke i lënë në ngarkim tre vëllezër dhe dy motra më të vegjël. Motrat i martoi, vëllezërit gjithashtu, duke u ndërtuar secilit shtëpi më vete. Vëllai i tij më i vogël, Baxhuli, nuk arriti ta gëzonte jetën pas martesës. Ai qe plagosur në Luftën e Gjormit, në përpjekje me trupat e milicisë fashiste në dhjetor të vitit 1942, kurse në shkurt të vitit 1944, si partizan i Brigadës së Pestë, ra dëshmor në një përpjekje me trupat gjermane në afërsi të fshatit Pilur.
Vëllai im më i madh, Selfoja, në vitin 1948, kur ishte 21 vjeç, si shumë të rinj, pati shkuar vullnetar për gjashtë muaj në ndërtimin e hekurudhës Durrës-Tiranë dhe Peqin-Elbasan. Kur u kthye, Babai dhe Nëna u gëzuan shumë. Në darkë, kur ishim shtruar për të ngrënë, vëllai i tha Babait se në hekurudhë ishte pranuar si kandidat partie. Babai buzëqeshi paksa me ironi dhe i tha: “Po ç’pate, more bir, që i hodhe vetes një zinxhir për gryke?”. Babai nuk kishte pasur simpati për komunistët që gjatë luftës, sepse ata i kishin vrarë padrejtësisht baxhanakun e tij, Murat Hasimin, krejtësisht i pafajshëm. Njëri nga komunistët e fshatit banonte në një kodër, përballë Muratit, matanë një përroi, në shtëpinë e të cilit, që asokohe, ushtonte muzika nga pllakat e gramafonit. Kur dëgjonte tingujt e muzikës, ai komunisti, siç më ka rrëfyer Babai, thoshte me smirë dhe inat: filloi kuja në shtëpinë e Muratit. Që asokohe Murati vishej “allafrënga”, në Vlorë kishte një dyqan të vogël.
Njësiti i Smokthinës, në fshehtësi, kishte hartuar listën se kë duhej të pushkatonte. Në atë listë figuronte edhe emri i Muratit. Një ditë të bukur, kur Murati sapo ishte kthyer nga Vlora, njësiti e arreston dhe vendos ta pushkatojë, paçka se ai s’kishte bërë asnjë krim. Që asokohe Babai pati ruajtur brenda vetes një mëri të heshtur kundër komunistëve.
Nga Babai i ruaj të pashlyera në kujtesë disa këshilla dhe porosi që më pati dhënë, sidomos derisa mbarova shkollën e mesme, dhe një mendim shumë të çmuar, të cilin e kam pasë vlerësuar lart deri tani, kur po i afrohem moshës 82-vjeçare, mendim që më shërbeu edhe si titull i këtij shkrimi.
Më 30 gusht të vitit 1955, në oborrin e shtëpisë sonë, kur po më përcillte për të vazhduar Gjimnazin “Ali Demi” në Vlorë, për ku do të më shoqëronte i ndjeri vëllai i madh, Babai më dha tri porosi:
E para: “Dëgjo, bir i Babait, ki parasysh se këtu e tutje do të jesh larg nënës e Babait. Prandaj ki mendjen, të jesh i kujdesshëm në jetë se Shqipëria është baltë e mallkuar, e ka mallkuar Zoti se shqiptarët nuk e duan njëri-tjetrin. Kur shqiptarët ta duan njëri-tjetrin, atëherë Zoti do ta bekojë baltën shqiptare”.
Disa dhjetëvjeçarë më vonë, Nënë Tereza, 42 vjet pas porosisë së Babait tim, dhe pikërisht pas katrahurës së vitit 1997, erdhi për vizitë në Shqipëri. Para se të hipte në aeroplan për t’u larguar nga aeroporti i Rinasit, ajo iu drejtua Zotit:
“O Zot, hiqja mallkimin Tand Popullit Shqiptar!”.
E dyta: “Atje në gjimnaz përpiqu të jesh i pari në mësime, siç ke qenë këtu në shtatëvjeçare. Por po nuk pate mundësi të jesh i pari, mundohu të jesh mes të parëve dhe atë që është i pari, ta duash dhe ta respektosh si veten tënde, se po pate smirë për të, do t’i bësh shumë dëm kokës”.
Falë kësaj këshille aq të çmuar, nuk e kam njohur kurrë smirën në jetën time dhe ata që kanë qenë më të aftë se unë, i kam nderuar dhe respektuar si veten time.
E treta: “Mos vër kurrë dorë në mallin e botës se, siç të kam thënë dikur, do ta kesh dëmin njëqindfish. E kam porosi nga i ndjeri im atë”.
Këtë porosi Babai ma kishte dhënë që kur isha nxënës në klasën e gjashtë të shtatëvjeçares. Përveç porosisë së të atit, ai kishte pasur edhe një përvojë të hidhur nga jeta e vet. Njëherë, diku aty nga fillimi i viteve ’50, ai kishte shkuar për pazar në Vlorë, e cila ndodhet 54 km larg Smokthinës. Kështu që, për të qenë në Vlorë ditën e pazarit, pra, të dielën në mëngjes, ai nisej me kalë nga Smokthina të shtunën, në të perënduar të diellit, dhe udhëtonte gjatë natës. Atë ditë, pasi kishte blerë gjërat që i duheshin, qe nisur për në Smokthinë pa perënduar dielli. Kishte kaluar mesi i shtatorit. Kur kishte edhe dy orë natë, ai pati arritur në anën e djathtë të lumit të Smokthinës, përballë shtëpive tona, që ndodheshin në një gjysmë lartësie të anës së majtë të lumit. Aty, çuditërisht, kishte sjellë ndër mend atë porosinë e të atit për të mos vënë dorë në mallin e botës. Dhe, aty për aty, kishte thënë me vete: do ta provoj një herë për të mos e vënë në zbatim atë porosinë e tim eti dhe do të shikoj nëse do ta kem dëmin njëqindfish ose jo”. Pati zbritur nga kali dhe i qe afruar një are me misër që ndodhej në anë të lumit, pronë e një fshatari nga fshati Ramicë. Kallinjtë e misrit ishin të shëndetshëm. Këputi njërin prej tyre, i hipi kalit dhe u nis për në shtëpi. Kur arriti, lidhi kalin dhe i hodhi haje, kurse vetë shkoi pranë furrës që kishim në oborr. Nëna, zakonisht, që në darkë, thëngjijtë i mbulonte me hi që të mos fikeshin, në mënyrë që të nesërmen ta ndizte zjarrin me lehtësi. Aty ai i zbuloi, u hodhi ca lëmishte përsipër dhe ndezi zjarrin, zhveshi kallirin e misrit, e poqi, e hëngri dhe shkoi të flinte. Njerëzit e shtëpisë të gjithë ishin në gjumë. Natën e nesërme, gjë që nuk kishte bërë vaki kurrë, një tufë derrash të egër, zbresin nga pyjet në lindje të shtëpive tona, hyjnë në arat me misër dhe batërdisën një dynym e gjysmë. Kur njëherë pati qëlluar që t’i kthehej kësaj ndodhie, unë i thashë me shaka: po ndoshta rastisi që derrat e egër atë natë dëmtuan arat tona, jo se shkaktar qe ai kalliri i misrit që ti more nga ara e huaj. Jo, bir i Babait, – ma ktheu ai. – Ishte ndëshkim nga Ai atje lart në qiell, sepse syrit të Tij nuk i shpëton asgjë nga prapësitë që bëjnë njerëzit këtu në Tokë. Po ja, filani, – ndërhyra unë, – dhe i përmenda emrin e dikujt nga fshtarët, i cili njihej si njeri që vinte dorë në mallin e botës dhe s’kishte pësuar gjë. Prit, bir i Babait, – ma ktheu ai, – se të ligën e ka pas veshit, se kështu është taksur nga Ai lart, që shtëpia jonë ta pësojë menjëherë kur vë dorë mbi mallin e tjetrit, kurse ai që më përmend ti, do ta pësojë më vonë të ligën, mbama mend llafin. Dhe me të vërtetë: ai fshatari pati hipur dikur në hardhinë e tjetrit për të marrë rrush, rrëzohet prej andej dhe mbeti i paralizuar gjatë 18 vjetëve, derisa ndërroi jetë.
Në maj të vitit 1956, mbarova klasën e parë të gjimnazit në Vlorë dhe u ktheva pranë familjes. Komunistët kishin filluar fushatën e ethshme për kolektivizimin e bujqësisë. Ishte muaji qershor. Po korrnim grurin. Bënte vapë dhe vendosëm të çlodheshim pak në hijen e një peme. Ndërhyn Babai: “Këta komunistët qenkan bijtë e djallit, kërkojnë të na marrin tokat dhe bagëtitë dhe të na kthejnë në argatë të shtetit”. Ç’t’i thoshja? Po ndoshta e kanë për mirë, o Baba, – ia ktheva unë. Në fund të majit të vitit 1959, mbarova mësimet e klasës së katërt të gjimnazit dhe gjatë qershorit do të kishim provimet e maturës. Shkova pranë familjes dhe çdo javë kthehesha në Vlorë për dhënien e tyre. E mbaj mend si sot. Ishte data 10 qershor. Po hanim drekë nën hijen e shtratit të hardhisë në oborr. Më 25 maj pati ardhur për vizitë Nikita Hrushovi. Qëndroi tetë ditë në vendin tonë dhe u largua më 03 qershor. Babai pyeti: “Po ky Enveri pse nuk bisedoi me Hrushovin që të ndërhynte te Titua për ta kthyer atë Kosovën këtej nga ne, se ajo është truall shqiptar, është toka jonë?”. U zura ngushtë dhe s’dija ç’përgjigje t’ jepja. I thashë se ndoshta i ka ardhur zor, meqenëse e kishte mysafir. Atëherë ai ma kthen: “Dëgjo, more djalë i Babait! Shqipëria, në këtë gjendje që është, duket si një kopaç përdhe, se kështu na e katandisi Evropa për fajin tonë që s’qemë të zotë t’i mbrojmë tokat tona. Në këtë gjendje, kjo e shkretë Shqipëri është pa kokë, pa shpatulla dhe pa këmbë. Po nuk u bashkuan koka, shpatullat dhe këmbët, ky vend jo vetëm që nuk do ta marrë veten kurrë, por edhe bota do të tallet me të. Dëgjomi këto fjalë që po të them se ti je i ri, e ke jetën përpara, kurse unë sot për nesër jam”. Me “kokë” ai kishte parasysh trojet tona në Mal të Zi dhe Kosovën, me “shpatulla” – trojet e sotme në Maqedoninë Veriore dhe me “këmbë” – Çamërinë. Fakti që Shqipëria s’ka qenë në gjendje të ndërtojë shtet ligjor edhe gjatë këtyre tridhjetë vjetëve, vërteton se ajo s’ka për ta ndërtuar kurrë pa ribashkimin e trojeve tona etnike, që nga Arta e Preveza e deri në Tivar, hapësirë kjo, në të cilën jetojnë gati 10 milionë shqiptarë.
Presidiumi i Kuvendit Popullor, me vendim nr. 4040, datë 14 korrik 1965, Babain, si veteran i Luftës së Vlorës, e dekoroi me medaljen “Për veprimtari patriotike’, me motivacionin “Për trimërinë, guximin dhe vetëmohimin që tregoi në luftë kundër pushtuesve imperialistë italianë më 1920 për çlirimin e Vlorës”.
Ky ishte një gëzim i madh për familjen tonë. Babai ishte vazhdues i traditave atdhetare të pararendësve të vet. Gjyshja e tij nga Babai, Kale Hodja, ka qenë e bija e Hodo Ali Nivicës, e njërit nga udhëheqësit e shquar të kryengritjes antiosmane në mesin e shek. XIX kundër Reformave të Tanzimatit, përkrah Tafil Buzit dhe Zenel Gjolekës, stërgjyshërit e tij, Lulo dhe Muk Bajrami, bashkëluftëtarë të Bilbilenjve të famshëm të Progonatit të Kurveleshit, me urdhër të pashait, janë varur në Rrapin e Janinës dhe në një këngë të vjetër të rapsodit smokthinjot Xhevit Zeneli janë dy vargje: Lulua me Muk Bajramë / gji në gji ç’e dhanë xhanë.
Me respekt dhe nderim të madh kujtoj Nënën e shtrenjtë, e cila njihej për zemrën e saj bujare, për ngrohtësinë e jashtëzakonshme të shpirtit human, për natyrën e saj aq mikpritëse, saqë banorët e lagjes sonë Parika thoshnin: “Hankua i pret mysafirët me bukë që në oborr”, sepse ishte mjeshtre e vërtetë në përgatitjen e gatesave nga më të ndryshme. Veç kësaj, ajo ishte e famshme për punë artistike në vegjë, nga e cila nxirrte qylyma shumë të bukur shumëngjyrësh. Ngrohtësia e shpirtit të saj ishte e përmasave mitike në edukatën që na jepte neve, si fëmijë. Fjalët e saj “kujdes në jetë, të keqen Nëna, që as mizën të mos e shkelni me këmbë”, qenë skalitur për jetë në kujtesën time dhe të të dyja motrave dhe vëllait të madh, Selfos, që prehen në atë jetë. Ajo ishte bijë e një familjeje të madhe nga fshati ynë: ishin shtatë motra dhe katër vëllezër. Njëri prej vëllezërve, Selim Tahiri, kishte dalë partizan dhe pati rënë dëshmor në Jugosllavi. Babai i saj, Abedin Tahiri, kishte marrë pjesë në Luftën e Janinës. Ndërroi jetë në moshën 96-vjeçare. Duke marrë parasysh fëmijët e tezeve, të dajave, të xhaxhallarëve dhe të hallave, ne bëheshim 72 kushërinj të parë.
Unë me time shoqe, Havanë, jemi përpjekur që, të dy fëmijët tanë, djalin dhe vajzën, t’i rritim dhe t’i edukojmë sipas këshillave dhe porosive të prindërve tanë. Dhe ne e ndiejmë veten krenarë me sjelljen e tyre. Të dy erdhën për studime universitare këtu në Shtetet e Bashkuara (djali në vitin 1996, kurse vajza në vitin 1998), ku mbaruan dy fakultete secili dhe tani janë të nderuar në vendet e punës ku japin kontributin e vet.
Me rastin e përkujtimit të datës 18 shkurt dhe 16 gusht, kur Babai dhe Nëna ime patën ndërruar jetë, respektivisht në vitin 1970 dhe 1980, dëshiroj me gjithë zemër që gjithë prindërve dhe fëmijëve të tyre, t’u drejtohem me urimin në vijim:
Qofshin të bekuar prindërit që i edukojnë fëmijët me virtyte të larta! Qofshin të bekuar fëmijët që prindërit i nderojnë po ashtu si edhe Hyjninë!
Kolumbus, Ohajo
16 gusht 2020

SHUMË URIME PËR KUJTIM QAFËN NË DITËN E LINDJES!

August 15, 2020 by dgreca

Sot, sipas kujtesës së Facebook-ut, është Ditelindja e Veteranit vatran,(Vatran i Dimrit e i Beharit, quheshin në kohën e Nolit ata që nuk i ndaheshin Vatrës në të mirë e në të keq).GËZUAR DITËN E LINDJES- Kujtim QAFA!
Shumë urime prej miqëve, Vatrës, vatranëve dhe Diellit!..
.Një urim special përcillet në emër të Kryesisë së Vatrës, Këshillit dhe të gjithë vatranëve nga Kryetari i Vatrës z. Elmi Berisha: GËZUAR DITËLINDJEN I DASHUR KUJTIM!

HAPPY BIRTHDAY!

FLUKS VERE NGA KOSOVA DREJT BREGDETIT SHQIPTAR

August 15, 2020 by dgreca

-Fluksi veror nga Kosova drejt Shqipërisë ka rritje edhe në këtë situatë pandemie/

-Qeveria e Republikës së Kosovës vendim të ri për hapjen e kufijve shtetërorë me Republikën e Shqipërisë, Republikën e Maqedonisë së Veriut dhe me Republikën e Serbisë/

PRISHTINË, 15 Gusht 2020-Gazeta DIELLI nga korrespondenti në Kosovë Behlul Jashari/ Mëngjesin e sotëm dhe në këto momente këtë paraditë të mesit të muajit gusht, në fluksin e verës drejt bregdetit shqiptar, në dalje nga Kosova në Shqipëri në vendkalimin kryesor kufitar nëpër autostradën e kombit në Vërmicë-Morin kalohet për 20 deri 30 minuta në kolonë 150 metra. Në dy vendkalimet tjera, Qafë e Prushit dhe Qafë e Morinës, kalohet për 3 deri 5 minuta pa kolona.

Qendra Kombëtare për Menaxhim Kufitar nga ora në orë jep njoftimet për fluksin në të gjitha vendkalimet kufitare të Kosovës. Fluksi veror nga Kosova drejt Shqipërisë ka rritje edhe në këtë situatë pandemie.

Kosova me vendimin e Qeverisë të 31 Majit 2020 ka hapur kalimin në pikën kufitare me Shqipërinë në Vërmicë-Morin e me vendimin e 15 Qershorit edhe në dy pika tjera kufitare – në Qafë Prush dhe Qafë Morinë, të mbyllura për një kohë në ballafaqimin me pandeminë.

Qeveria e Republikës së Kosovës, në mbledhjen e djeshme ka miratuar vendimin për hapjen e kufijve shtetërorë me Republikën e Shqipërisë, Republikën e Maqedonisë së Veriut dhe me Republikën e Serbisë.

“Për të shmangur paqartësitë eventuale, sqarojmë se ky vendim ka të bëjë vetëm me hapjen e disa pikave të caktuara kufitare me këto vende, me qëllim të lehtësimit të lëvizjes së qytetarëve, mirëpo kjo nuk do të thotë në asnjë mënyrë se janë hequr masat dhe protokollet e deritanishme kundër pandemisë COVID 19”, theksohej në një njoftim të dërguar mbrëmë.

Shtohej se, vazhdojnë të mbeten në fuqi të gjitha masat që Qeveria e Republikës së Kosovës ka miratuar më parë sa u përket hyrje-daljeve në territorin e vendit.Sipas Qendrës Kombëtare për Menaxhim Kufitar për kalim sot nga Kosova në Maqedoni të Veriut në pikën kufitare të Hanit të Elezit dhe në Mal të Zi në pikën kufitare të Kullës kërkohet testi COVID 19.

BARCELONËS Ç’I PANË SYTË…!

August 15, 2020 by dgreca

Dielli Sport- BARCELONËS Ç’I PANË SYTË…!-

Liga e Kampioneve: Gjermanët turpërojnë spanjollët 8-2-

Përgatiti: Albano Kolonjari-

Bayern Munich turpëroi plotësisht Barcelonën me një fitore 8-2 në Ligën e Kampioneve të premten në mbrëmje duke rezervuar një vend në gjysmëfinalen e turneut që po zhvillohet në Lisbonë. Kjo ishte humbja më e thellë e Barcelonës në Ligën e Kampioneve, ndërsa Bayern u bë skuadra e parë që shënoi tetë gola në një ndeshje të raundit çerekfinal të kësaj lige. Barcelona raportohet se ka zgjedhur të shkarkojë tranjeri Quique Setien pas humbjes 8-2. Setien, zëvendësoi Ernesto Valverde në janar 2020, dhe arriti që të realizojë 16 fitore-4 barazime dhe 5 humbje në krye të Barcelonës. Ndeshja pati një fillim të çuditshëm me Thomas Muller i cili kalon Bayern në avantazh. Por është mbrojtësi i Bayern David Alaba që pas disa minutave shënon aoutogol vendosur rezultatin në barazpeshë 1-1 . Gjermanët u kthyen në avantazh në të 20-të minutë, kur Ivan Perisiç kapi një pasim nga Serge Gnabry dhe gjuajti me këmbë, në drejtim të portës së mbrojtur nga Marc-Andre ter Stegen, topi mori një devijim të lehtë dhe përfundoi në rrjetë. Barcelona kërkoi të reagonte, por kampionët e Gjermanisë, me një sulm të shpejtë shënojnë edhe dy herë të tjera me Gnabry dhe Muller që realizon golin e tij të dytë në këtë takim. Kur kanë kaluar vetëm 31 minuta lojë, gjermanët udhëheqin 4-1. Pas ndeshjes, mbrojtësi i Barça, Gerard Pique tha: “Unë jam në dhimbje. Ne të gjithë jemi. Ne nuk mund të konkurrojmë kështu. Klubi ka nevojë për ndryshime. Jo vetëm lojtarët. Nuk dua të fasoj askënd. Por futbolli është një sport ku ndryshimi kërkohet vazhdimisht. Ne duhet të ndryshojmë dinamikën në të cilën jemi, sepse besoj se kemi arritur në fund. Duhet të shohim rrotull, duhet të kemi besim se njerëzit do të bëjnë gjërat e duhura për klubin. ” Pjesa e dytë ishte kopje e asaj të parës. Luis Suarez shënon për Barcelonën, duke i dhënë pak “frymarje” në 4-2. Por vetëm kaq. Kimmich në të 63 minutë i jep goditjen përfundimtare në 5-2. Barcelona dorëzohet. Brenda harkut kohor të shtatë minutave, gjermanët shënojnë edhe tre herë të tjera. Robert Lewandowski dhe Philipe Coutinho dy herë, e çojnë rezultatin në 8-2.

“Është e vështirë të shpjegohet,” tha Muller i cili pas ndeshjes u shpall lojtari më i mirë i këtij takimi. “Unë mendoj se në këtë moment skuadra jonë është në formë të jashtëzakonshme. “Faleminderit për trofeun e takimit- ndoshta kemi 12 deri në 15 lojtarë që e meritojnë atë. Ne kemi punuar kaq shumë dhe kemi këtë intensitet të lartë. Është e vështirë të na rrahësh. Sot ishte një ndeshje shumë argëtuese. Për stilin tonë të lojtarëve nuk ka rëndësi për emrat e kundërshtarëve me të cilët përballemi pasi kemi shumë talenet në vijën sulmuese.”