Archives for March 2023

LIRIE (LYDIA) MEMETI, NJË HISTORI SHQIPTARE FRYMËZUESE

March 24, 2023 by s p

Intervistoi: Mirela Kanini

Në Chicago kanë shkëlqyer plot shqiptarë që kanë emigruar dhe në fusha të ndryshme. Këtë radhë sjellim para jush historinë inspiruese të një nga grave më të njohura dhe më të sukseshme, me origjinë nga Prespsa e Maqedonisë Veriore, zonjën Lirie (Lydia )Memeti. Nuk do të mjaftonte as një memuar për të treguar historine e saj por jam e sigurtë që përgjigjet e goditura që ajo ka dhënë në keto 10 pyetje do ti gjejnë inspiruese të gjithë.⁃

Kush është Lirie Memeti?⁃

Une jam nënë e tre fëmijëve, gjyshe e 7 nipërve dhe mbesave, bashkëshorte, presidente e shoqatës Albanian American women association, pronare e Remax Legends (lifetime achievement, top 1% around the world).⁃ Që të arrini aty ku jeni sot sigurisht keni patur veshtirësi.

Na tregoni pak mbi jetën tuaj

-Në moshën 17 vjecare kam emigruar në Amerikë pa ditur as anglisht , pa para dhe madje me ëndrrat për shkollen të thyera në mes. Ishin vitet 70-të. U martova dhe në moshën 18 vjeçare u bëra nënë me lindjen e djalit . Në moshën 20 vjeçare u bëra nënë përsëri me lindjen e 2 vajzave binjake . Isha pra një 20 vjeçare me tre fëmijë tashmë. Më mundonte çdo ditë ideja se si do përparoja dhe kjo nuk ishte jeta që kisha ëndërruar. I ankohesha bashkëshortit që kjo nuk ishte Amerika që kisha përfytyruar unë. Dikush pastaj më tha të mos e humb shpresën se Zoti është I pari dhe Amerika e dyta, thjesht duhet të gjej rrugën time. Morëm një vendim me bashkëshortin, atë që ti dërgonin fëmijët tek vjehrra në Prespë ku i lamë për 3 vjet ndërkohë që ne punonim të mblidhnim para. Ishte një sakrificë e jashtëzakonshme larg tyre por nuk ishte e vetmja. Unë isha gruaja e parë të thyeja akullin në përparim. Në komunitetin tonë në atë kohë konsiderohej e turpshme të punonte gruaja edhe pse ishim në Amerikë. Ato nuk ngisnin makina gjithashtu ose të ndiqnin studimet. Gruaja sipas tyre e kishte vendin në shtëpi të kujdesej për burrin dhe të rriste fëmijët. Mu desh të shpërfill këtë mentalitet dhe kështu kam qënë femra e parë që kam ngarë makinën dhe e para të shkoj në shkollë për real estate broker. Theva me pak fjalë dy tabu ndërkohë që në atë kohë edhe në USA ky profesion dominohej nga burrat. Ky ishte pra një revolucion.

⁃ Kur menduat që kjo është rruga juaj?

Para se të merrja këtë drejtim për 4-5 vjet unë dhe bashkëshorti punuam shumë dhe me paratë e fituara morëm një restorant. Tërhoqëm dhe fëmijët por prapë nuk isha e kënaqur kur i shihja që i zinte gjumi nëpër kolltuqet e restorantit derisa ne të mbaronim punën. Ndaj puna si real estate broker me jepte mundësi të isha me fëmijët dhe merresha me edukimin e tyre. Njëra nga vajzat sot është doktoreshë me klinikën e saj private, njëra shkencëtare, ndërsa djali ka kompaninë e tij Iloan mortgage me shtrirje në 14 shtete të Amerikës. Vazhdimisht kam ndjekur kurse dhe programe të ndryshme për të edukuar më tej veten. Sot pothuajse të gjitha gratë e anëve tona ngasin makinën. Ndjej satisfaksion kur më përmendin që duke parë fëmijët e tu edhe ne I inkurajuam fëmijët tane të ndjekin studimet. Një vajzë që sot është producente në një nga stacionet kryesore të Chicagos më tha njëherë që prej teje duke të parë se sa lart u ngjite Ti babai na lejoi të vazhdojmë shkollën. Shumë të tjera më thoshin “ I wanted to be you” dhe vërtet sot ato janë doktoresha, mësuese ect. Mua gjithashtu më janë dhënë çmime të ndryshme nga Diaspora dhe mediat Jo vetëm për arritjet por edhe për ndihmën që i kemi dhënë komunitetit e bamirësitë e organizuara.

⁃ A ishte e vështirë të hapje biznesin tënd? Sigurisht, asgjë nuk është e lehtë në fillim por këmbëngulja dhe sakrificat janë natyra ime e dytë.⁃ Si arritët që sot të jeni një nga “top selling companies?”

⁃ Me punë, devotshmëri dhe duke ndjekur intuitën. Përpiqesha të ndihmoja klientët në bazë te buxhetit por edhe kam inspiruar dhe drejtuar disa që sot janë kthyer në multimilionerë duke ndjekur metodat e mia dhe drejtimin tim.

⁃ A keni pasur ndonjëherë momente që keni dashur të tërhiqeni? Jo, asnjëherë. Nuk I lë gjërat kurrë në mes të rrugës.

⁃ Kush janë planet tuaja për të ardhmen.

Të vazhdoj të punoj, të ndihmoj njerzit dhe të ndjek pasionin tim. Të ndihmoj gjeneratat e reja të jenë produktive.⁃ Çfarë është një gjë që do ti rekomandoje njerzve sot për ti inspiruar. Ndiq pasionin dhe çdo gjë që bën bëje duke dhënë maksimumin për të arritur objektivin.

⁃ Kush janë hobi tuajat?-Noti, basketbolli, kercimi madje tranoj në këtë fushë. Udhëtimet Ect.

⁃ Një citat që ju pëlqen?

-Mos u dorëzo kurrë. Kij besim në Zot dhe Amerikën.

Vjena – Qytet i Requiemeve – Requiem për Musinenë!

March 24, 2023 by s p

Bisedë me Gjergj Jozef Kolën

Mbi takimin e organizuar në sallën e Kongreseve në Europahaus . Vjenë! Intelektualja e rrallë Musine Kokalari, nyje e randsishme e kulturës shqiptare, mblodhi nji grup dashamirës të kulturës shqiptare në Vjenë! Arsyeja ishte e thjeshtë: Te kjo figurë janë bashkë: Intelektualja, Shkrimtarja, Politikania, Martirja po edhe Modeli moral i nji shoqnie që prej kohësh e ka pranuar se degradimi i saj asht e vetmja zgjidhje tashma e shpallun në heshtje… Në Vjenë, kam zbritë për s’pari herë, po kaq shumë e dashtun m’ka qenë Vjena, për gjithçka ka ba ajo për historinë tona, sa e ndjeva nji qytet tejet familjar, i dashtun e mikpritës sa e ndjeva qytetin pjesë e diçkaje të randësishme që ka jetue mbrenda meje dhe vetëm prej kësaj bisede me Gjergj Jozef Kolën, ma së fundmi u gjet njaj i bekuem çelës me e vendosë harmoninë midis asaj që ashtë histori edhe i asaj që asht bashkëkohsi! Kët bisedë në formë interviste asht frut i nji bashkëpunimi të hershëm me zotin Kola, por që kësaj here u ndalëm ma gjatë të figura e Musinesë.

Jozef Radi – Vjenë, 21 mars 2023

Si autor i nji drame mbi Musine Kokalarin dhe jo vetëm por edhe fakt që kjo dramë u vu në skenë prej “Teatri për të Rinj” në Shkup, i cili pat edhe vleresime europiane, desha të di cilat janë ndjesitë tua si autor për kët udhëtim të dyfishtë artistik të veprës suej në 40 vjetorin e largimit të Musinësë?

– Qysh se jam njoftë me jetën e Musinesë nuk m’asht nda për asnji çast figura e saj, derisa u krijue edhe kjo dramë, që e kam quejtë Requiem. Vjena asht qyteti i Requiemeve të famshme të Mozartit, Bethovenit, Haydenit e këtu pata qetsinë me e zbritë deri në fund dhimbën krenare të Musinesë. Nji njeri, nji zojushë shqiptare që vuen 20 vjet burg e mandej edhe 15 vjet internim, me vdekë aty prej sëmundjes së pamjekueme, tash e 40 vite të shkueme, pa u thye asnjiherë, porse tue ruejtë dinjitetin njerzor, asht nji ndeshje e jashtzakonshme për nji shkrimtar, aq ma tepër që vetë Musineja ishte e tillë…Ftesa në Festivalin europian të dramës dhe nderimi me disa Diploma natyrisht asht nji kunorzim i jashtzakonshëm për Musinenë, po edhe për të tanë ne. Musine Kokalari mbrrin në Vjenë përmes nji projekt që solli emocione e përcolli edhe nji mesazh humanizmi e frymë largpamësie.

A vlen me u përsëritë ky mesazh në tjera realitete shqiptare e me tjerë personazhe në epiqendër?!

Së pari gjej rast me ju falenderue Ju dhe gjithë të tjerët që morën rrugën e gjatë si Shën Pali dikur prej Jerusalemi m’u ndalë në Durrës, edhe ju erdhët prej larg dikush prej Ancone, dikush prej Gjinokastre, dikush prej Prishtine, e dikush prej Tirane, me sjellë në Vjenë sekush nji mesazh cilësor për Musinene. Në Vjenë vijnë mjaft personalitete të ndryshme shqiptare, porse shumë pak vijnë për art, letërsi o përkujtime figurash të martirizueme! Besoj se kjo ishte nji eksperiencë pozitive, porse s’ka nisë me Musinene. Fjala vjen, vitin e shkuem kena pasë nji kuvendim për Martin Camajn, edhe mendoj me e vazhdue kët cikël përkujtimesh! Mendoj se në Vjenë ku ka nisë edhe zanafilla e pavarësisë sonë, kanë me gjetë zbatim edhe idetë e sipërpërmenduna…

Ç’ka mendoni se mund të bahet ma mirë në nji tjetër organizim për Musinenë apo për ndonji tjetër personazh të kulturës shqiptare ende në hije prej politika e 80 vjeçare?!

Organizime të tilla komplekse shërbejnë edhe si eksperiencë edhe padyshim mund të perfeksionohen në shumë elementë. Në kët Konferencë kanë shprehë dëshirë me ardhë edhe tjerë studjues, shkrimtarë porse rrethanat s’e kanë ba të mujtun. Falenderoj edhe zonjën Nashi Broker, që merret prej vitesh me Musinenë, dhe nuk u ba e mundun që të ishte pjesmarrëse. Pastaj tashma të gjithë e dijmë se shteti shqiptar, ndryshe prej shumë shtetesh tjera, asht thuejse inekzistent në art, kulturë e sidomos letërsi. (në tallava jo) Edhe nji takim i Shkrimtarëve të Diasporës që u ba para tre vjetësh në Tiranë, në panele ishin shkrimtarët që siç u thona na n’Shkodër që: “S’e kane kalu Urën e Bahçallëkut…” në vend që kjo të drejtohet prej vetë shkrimtarve të Diasporës! Konferenca në fjalë ishte shumplanëshe, me personazhe e trajtime prej mjaft fushave.

Ç’ka mund të queni risi e këtij organizimi në Vjenën ku bajmë nyje edhe shumë figura që janë shkelë prej diktaturës?!

Risija qëndron të fakti se u banë përpjekje që Figurën e Musinesë me e ndriçue prej shumë kahjesh të ndryshme. Nga koha e studimeve, shkrue në kujtesën fisnike të Dr. Lazër Radit e përcjellë me dinjitet nga Ju zoti Radi; kujtimet e familjarëve nën reflektimin e ngrohtë e të dhimbshëm të Arjeta Kokalarit; studimi analitik i nji nji vepre të saj nga penda e mprehtë e filologes, Dr. Elona Gjata, nga trajtimi paralel në kohna i shkrimtares Angjelina Marku; po edhe përshëndetja dashamire e shkrimtares dhe politikanes, Flutura Açka. Mendoj se nji risi dhe pikë e fuqishme ishte edhe shfaqja e disa pjesëve të dramës që solli emocione të fuqishme për krejt pjesmarrësit, dhe e shoqnueme në gjermanisht prej aktores së njoftun austriake Elke Hagen! Për dramën në fjalë po ta besoj nji ‘sekret’. Në fund të saj ka nji skenë mes Musinesë dhe personazhit mito-real Shpend Bardhi. Ndërkohë që Musineja naltëson poetin kombtar At Gjergj Fishtën, Shpend Bardhi dënon shkrimtarët e oborrit komunist… Kjo skenë asht lanë jashtë. Në frymën e kompromisit e mos me ecë gjithnji me parimin: “për nji plesht me djegë jorganin”, Fundja këto pleshtat e realsocializmit koha ka me i djegë vetë nji ditë, o ndoshta i ka djegë e hala s’e kanë marrë vesh!

Si i gjykoni mardhaniet e shtetit shqiptar me figurat intelektuale të persekutuara prej Diktaturës ku ban pjesë edhe Musineja, Marie Tuci, Nane Tereza… gra madhështore që në fakt ju i keni përcjellë përmes veprave tua?!

Shteti shqiptar ka veç nji interes: Fasadën, e asnjiherë themelet e kombit shqiptar! Kjo asht nji fatkeqsi e madhe për ne si komb. Këto tri figura monumentale të kombit shqiptar s’i kujton askush ashtu si duhet, mbasi janë në themele të qëndresës së tij, porse vetëm merren me fasadën e shndritshme, të sapolyeme, së cilës i bjene ngjyra me shiun e parë kur i qesin në bulevard! Asnji film, asnji dramë të ngjitun në skenë, asnji opera, asnji monument si duhet, pra, vepra që i qindrojnë shekujve për këto tri zojusha legjendare na nuk kena. Drama për “Nane Terezën” mori e vendin e parë prej komisionit të kulturës në Bashkinë e Shkodrës, porse drejtoresha e teatrit znj. Kacarosi nuk pranoi me e vu në skenë. Shteti shqiptar postkomunist asht kujdesë që ndër institucione të artit me vendosë “Njeriun e ri” që e ka përgatitë në 45 vjet diktaturë e mos më lanë askënd me prekë themelet, veç m’u kujdesë për fasadën…

Cili mund t’jetë nji angazhim i juej promovues dhe cila ka me qenë vepra e fundit që ka me u botue prej Jush?!

Angazhimi jem promovues asht si gjithnji ai i shkrimtarëve e poetëve të vërtetë, artistave antiestablishment në kryeqytetin e muzikës botnore, në Vjenë. Mendoj se nji shkrimtar duhet me lanë vepra edhe “mbasi t’kalojnë n’amshim”, libra të pabotuem, si ai ylli që edhe kur shuhet në univers vazhdon me e pru dritën në botën tonë, vepra që njashtu siç i ndodhi Franz Kafkës, nji shkrimtarit vjenez, i lindun në Prage, prej prindësh hebrej e sllavë, që shkroi gjermanisht apo edhe Migjenit, nji shkrimtar shkodran, me prind ortodoks e gjuhë serbo-kroate në shkollë e familje, që shkroi shqip, e që iu botue vepra mbasi u largue prej kësaj bote.N’se këto vepra të pabotueme kanë me gjetë rrugën drejt publikut e drejt skenës asht kjo nji prove dashnije edhe talentesh të vërtetë.

Tregimi për zonjat e suksesit shqiptar- ideja që jeton pa kohë

March 24, 2023 by s p

Nga Flora Nikolla/

Është ngazëllim kur mbyll siparin e një aktiviteti dhe kur ti sheh se ke dhënë gëzim dhe konkretësi mbi idetë e përcaktuara qartazi në një udhë të gjatë dhe ku qëllimet janë tashmë të bashkuara, konkrete si në vijimësi ashtu edhe në ardhmëri.Praktika inteligjente e këtij shekull, pragmatizimi, ndoshta ta kufizion kohën e sistemin e jetës tënde, por hera herës të kujton në qetësi se, ti e ke rritur një ide, e ke përcuar tek të tjerë, e ke ndërtuar e ke parë duke e jetuar dhe ke qëmëtuar veten paskësaj kur çdo gjë ka mbaruar me një emër fisnik, të madh e të përgjegjshëm mbi vete që quhet Albanian Excellence .Kështu po më ndodh edhe tani, kur në një natë marsi me erë të ngrohtë pranvere, jam ulur në vëndin tim të prefruar në shtëpinë time në Tiranë, të shkruaj këto rreshta …Për çfarë ? Kam gëzim të shkruaj mbi një ide që më lindi në Nju Jork në vitin 2016… e të tregoj ku ndodhet kjo ide në këtë natë marsi të vitit 2023 … Cila ishte ideja që të lindi atëhere? Të tregoja për zonjat e suksesit shqiptar … Cila ishte pikënisja ? Motra ime ….një mjeke e realizuar me një karierrë brilante në Nju Jork, por edhe miket shqiptare të motrës time, me një jetë dinjitoze, të barabartë ndoshta edhe me amerikanin më të mirë …! Si jetonin, punonin, luftonin këto vajza shqiptare për të ndërtuar jetën familjare, profesionale, njerëzore…, suksesin e tyre në një nga pikat më të rëndësishmë të planetit?Kështu u shkrua libri “Zonjat shqiptare në Nju Jork” së bashku me Kozeta Zylon , për t’u konkretizuar bukur në një mbrëmje Gala shtatori, ku zonja nga Shqipëria, Kosova, Maqedonia, Mali i Zi ,u ngjitën në skenën e Simphoni Space në Manhattan me regji e skena nga Andis Gjoni.Zonjat shqiptare në Nju Jork , hapi siparin e kësaj udhe të gjatë më pikënisje këtë ide që u mbështet fort nga një Memorandum të nënshkruar në firmë të parë, nga Kreu i shtetit shqiptar të asaj kohe Shkëlqesia e tij, zoti Bujar Nishani . Memorandumi quhej , “Të qënët grua në shekullin e XXI” .Nga detyrat e këtij memorandumi pikënisi sërish hartimi dhe nënshkrimi në Nju Jork në vitin 2018, i Peticionit për viktimat e dhunës seksuale të luftës në Kosovë në vitin 1999, më pas Albanian Excellence do të themelonte çmimin, “Zonjë që bën Shqipërinë”, çmimi, “Zonjë që bën Shqiptarinë”, shoqëruar edhe me botimin e dy librave përkatës ku mbi bazë të një pyetësori, zonjat tregonin pikat kyçe se si e kishin realizuar suksesin .Idea për të treguar për zonjat e suksesit shqiptar vijonte bukur … Dhe kështu në këtë kudër të kësaj ideje, zonjat e suksesit shqiptar tregonin jetën e tyre, në intervista të shkruara, në dalje televizive, në mbrëmje Gala, plot jetë , me tinguj… me zanore të zëshme e të pazëshme, me vullnet , zell , ambicie, e me plot dashuri për jetën , zhvillimin , ecjen përpara të fënijëve të tyre, të punës dhe të qëllimeve të tyre veshur me erën e mirë të të qënit grua… Jetët paralele e të shumëllojshme të zonjave shqiptare , bashkoheshin në një pikë të përbashkët, të qënët shqiptare dinjiteti, të qënët të barabrata mes të barabartëve kudo që ishin , ku jetonin dhe ku punonin,“121 Jetë suksesi në 121 foto “, do të ishte një tjetër rrëfim i bukur i zonjave të suksesit shqiptar kudo janë . Shekulli i XXI në memorandumin e Nju Jorkut tashti do të ishte në 121 foto … Një rrugëtim që nisi në kopshtin presidencial me mikpritjen e presidentit të Republikës së asaj kohe, Shkëlqesia e tij, zoti Ilir Meta, e që do të vijonte të përshfaqej në Pogradec, Patos, Strugë, Uqin, Prishtinë, Preshevë, mision i vërtetë vlerash pa shumë komente e fjalë që teprojnë …Po pse 100 dhe 21? Sepse Albanian Excellence e nisi jetën në mbushjen e 100 të viteve të jetës së shtetit shqiptar … simbolikë e goditur tani që kujtoj duke shkruar këto rreshta idenë e bukur të tregimit të jetës së gruas së suksesit .Idea, ky përfaqësim mendor që lind , mbi bazën e arsyes apo të imagjinatës , mendoj se qëllon e godet fort kur vijëson e rimbushet me ide të reja , forcohet e pasurohet, rritet më tej … piqet për të qënë sukses … Si arrihet ? Me shumë mund , në mënyrë shumë sistematike, konseguente … , herë me vlerësim monetar dhe here jo … Por në këtë natë me erë pranvere, di të them se misioni që te jep ideja është kaq hapsinor e pa kufinj sa ti sa më shumë e ndjek aq më shumë hapsirë e jetë të hapet para teje… (qesh) as të lëshon dhe as e lëshon…!!! Ja kështu është edhe tregimi i bukur për zonjat e suksesit shqiptar nën siglen domëthenëse Albanian Excellence vijoi bukur me “Suksesi i zonjave shqitare dje dhe sot-sfidat e së ardhmes”, një takim i nivelit të lartë të zonjave të suksesit shqiptar nga të gjitha trojet shqiptare. Qershia mbi tortë e këtij takimi ishte një sallon që ju kushtua zonjave të sukssesit shqiptar ga Londra. Tri ditët e këtij takimi , ishin ditë të mbushura me emocion rrëfimi njerëzor të zonjave… Muzikë, arte, mjekësi, biznes, sistem bankar, media, estetikë, biznes, politikë, konceptuar në sallone, ishin fokusi i këtij takimi me të paktën 100 zonja nga e gjithë hapësira mbarëshqiptare dhe jo vetëm. Tematika e mirëpërcaktuar e kësaj konference i ngrinte këto zonja padiskutim në një rang akademik, por hapsira e shpirtit të tyre, qëmësia së bashku, i bëri të vërteta në zë e në shpirt.Jo rrallë herë gjatë konferencës, referati e tema e tyre e shkruar, qëndronin fluide mbi tavolinë e loti i tyre njerëzor pa dashje e njomte këtë fletë të menduar e të shkruar në ditët frenetike që jetojnë. Ishin të vërteta ne jetën e tyre profesionale dhe njerëzore,në tregimin e tyre të suksesit tregonin pa droje se nuk kishte qënë e lehtë qoftë edhe nga dhuna verbale e seksit të kundërt. Krijimi i aleancës së zonjave të suksesit shqiptar , ishte një nga konkluzionet e kësaj konference. Çfarë është kjo Aleancë ?Së pari një zë më shumë në jetën Planetit tonë, një zë që do të flasë më dinjitet për cdo dukuri e fenomen që ndodh e që do një qasje , së dyti krijimi i një data base i zonjave të suksesit shqiptar kudo janë , një potencial i fuqishëm njerëzor e profesional në vijimësinë idesë që më lindi në Nju Jork , frymëzuar nga njeriu im më i dashur e që më bën gjithnjë krenare kudo jam .Por ajo që më jep ngazëllim në këtë ndarje dite, është gëzimi që pashë në sytë e të gjitha zonjave të suksesit shqiptar, dëshira për të qënë mike pavarësisht se ku jetojnë …Një dëshirë pa kushte për të qënë së bashku në këtë rrugëtim të Albanian Excellence .Unë them se kjo është arritja më e madhe e idesë që më lindi në Nju Jork pë të treguar për zonjat e suksesit shqiptar : Të qënët gjithnjë së bashku nën siglen e kuptimtë të Albanian Excellence … , të qënët së bashku,pa mllefe e mëri, por me shumë dashuri e mirësi sepse së bashku jemi më të forta !!!

Ish-diplomati Syla, ftesë qeverive tona t’i promovojnë shtetet në SHBA, Kanada dhe Izrael

March 24, 2023 by s p

Shani Pnishi/

Donat Syla, ish-konsull i përgjithshëm i Kosovës në Toronto të Kanadasë, u ka bërë thirrje qeverive të Shqipërisë dhe të Kosovës që të përkrahin një iniciativë të nisur nga ai për prezantimin e vlerave më të mira kombëtare para botës. Përmes një postimi në Facebook ai ka njoftuar se deri më tani janë publikuar nëntë artikuj në revista prestigjioze në SHBA, Izrael dhe Kanada, përmes së cilave promovohen të dyja shtetet. “Kjo ka ardhur si rezultat i vizitëss së mikut tim, gazetarit Dave Gordon në fillim në Kosovë pastaj edhe në Shqipëri gjatë shtatorit të vitit të kaluar” ka thënë ai. “Artikujt ne keto revista prestigjioze kanë pasur impakt të madh në prezantimin e vlerave më të mira të Kosovës dhe Shqipërisë para hebrenjeve të mbarë botës”. Syla ka njoftuar se një grup prej gjatë gazetarësh pritet të vijnë nga Kanadaja dhe SHBA-ja për të vizituar Kosovën dhe Shqipërinë gjatë muajit gusht të këtij viti, dhe si rrjedhojë do të ngritet imazhi i vendeve tona para botës. “Impakti i punes së tyre në ndërtimin e imazhit atraktiv të vendeve tona do të ishte pakrahasimisht më i madh sesa kosto që duhet të bartin institucionet në suportimin e vizites së tyre”. Në një deklaratë për gazetën “Dielli” Syla thekson: “Qëllimi i vizistës së tyre është të shkruajnë për historinë, traditën, kulturën dhe mikpritjen shqiptare. Planifikohet që vizita të jetë rreth shtatë ditë, dhe gjatë kësaj kohe ata do të vizitojnë vendet me peshë historike dhe kulturore në trojet shqiptare”.Ai e ka bërë publike ftesën që ia ka adresuar ministres së jashtme të Shqipërisë Olta Xhacka, ministres së jashtme të Kosovës Donika Gërvalla, ministres për kulturë të Shqipërisë Elva Margariti dhe ministrit për kulturë në Kosovë Hajrulla Çeku. Edhe sa ishte në detyrë në Kanada, Konsullata e Përgjithshme e Republikës së Kosovës në Toronto të Kanadasë së bashku me organizatën hebreje të këtij qyteti “Yad Vashem” patën organizuar një ngjarje domethënëse për dy komunitetet këtu: shqiptare dhe hebreje. Të dyja bashkorganizuan ekspozitën me fotografi të shqiptarëve të Kosovës dhe trojeve tjera shqiptare që i dolën në ndihmë popullit mik hebre në periudhën më të vështirë për ta, në Luftën e Dytë Botërore. Ekspozita e quajtur “Besa- Kodi i Nderit” u hap në prani të një numri të konsiderueshëm të komunitetit shqiptar dhe hebre në Kanada, si dhe në praninë e korit diplomatik në Toronto. Ngjarja qe pasquruar me pozitivitet nga disa media kanadeze.

Agjërimi, adhurimi më unifikues i këtij muaji

March 24, 2023 by s p

Endrit Himaj/

Ramazani është një muaj i shenjtë në Islam, i cili përfshin agjërimin, lutjen dhe dhënien e solidaritetin. Në SHBA, ka një numër të konsiderueshëm të komuniteteve myslimane shqiptare, dhe kjo periudhë është e nje rëndësie të veçantë për kultivimin e vlerave tona dhe afrimin me Zotin e me njëri-tjetrin.Në këtë muaj, myslimanët shqiptarë në SHBA kryejnë agjërimin si adhurimi me unifikues i këtij muaji, dhe gjithashtu janë më të përkushtuar në aktivitete të ndryshme të fejes, si lutje dhe lexim i Kuranit. Gjithashtu, ata shfrytëzojnë këtë periudhë për të dhënë në mënyrë të larmishme dhe të ndihmuar ata që janë në nevojë.Komunitetet myslimane shqiptare në SHBA janë të njohur për organizimin e iftareve, dhe pjesëmarrës shpeshherë jane jo vetem agjerues shqiptar por edhe pjesetar nga shume komunitete tjera, e kjo si nje tregues i vlerave tona kombetare si bujaria e zemergjerësia. Nga kjo na vjen dhe shprehaj ‘shtepia e Shqiptarit e Zotit dhe e Mikut’. Këto iftare jenë edhe një mundësi e mire për të mbledhur fonde për qëllime humanitare dhe të ndihmuar qendrat fetare e kulturore.Përveç kësaj, shumë komunitete shqiptare organizojnë dhe marrin pjesë në aktivitete të ndryshme kulturore dhe fetare në këtë muaj, si festivale, konferenca dhe tryeza të diskutimit, për të festuar dhe perjeturar këtë muaj të shenjtë në mënyra të ndryshme.Për shumë myslimanë shqiptarë në SHBA, Ramazani është një periudhë e rëndësishme e bashkësisë dhe kultures, dhe ata e shfrytëzojnë atë për të rritur përkushtimin e tyre ndaj fejes dhe ndaj njëri-tjetrit.Ramazan të bereqetshëm e lutje të pranuara!