Archives for May 2023

Shoqata Shqiptaro Amerikane “Skenderbej”Inc mori pjesë në Marathonën e 45 të Ҫiklizmit në Qytetin e New York-ut

May 9, 2023 by s p

Kishte ditë që rrugët e qytetit të New Yorkut tregonin gjallëri, disi ndryshe nga ditët e tjera të zakonshme vjetore. Ҫiklistat po sterviteshin rrugëve të tij për të përballuar aktivitetin sportiv të Marathonës së vitit në vazhdim. Sot përfundimitsht, më datën 7 Maj, 2023 , u zhvillua Marathona e 45 të e tij .

Në këtë aktivitet morën pjesë 32,000 çiklista nga e tëre bota. Ata përshkrun pesë lagjet e qytetit të New Yorkut , (Manhattan, Bronx, Queens, Brooklyn dhe Staten Island) dhe ndjenë kënaqësinë e lëvizjeve të lirshme përmes rrugeve te tij, pa stresin e makinave apo këmbësorëve të shumtë, pasi rrugët u liruan enkasi për këtë aktivitet.

Majori i qytetit, zoti Eric Adams, ka folur për shpenzime të reja (ne shumën prej 900 milion dollarësh) për të hapur edhe më shumë rrugë bicikletash ne qytet. Këto rrugë, jo vetëm do të ftojnë më shumë çiklista por, do të kryejnë një impakt në mënyrën se si qyteti i New Yorkut lëviz dhe mendon për qytetarët e tij.

Në këtë aktivitet mori pjesë edhe Shoqata Shqiptaro Amerikane “Skendërbej” Inc. e përfaqësuar nga z. Imer Lacaj (Kryetari i shoqatës), zotërinjtë Doris Bejrolli dhe Elton Xhaferri .

Ҫiklistat përshkuan 40 milje udhëtim (64 kilometra). Marathona filloi në pjesën Jugore të Manhattanit, vazhdoi përmes Avenusë së gjashtë, parkut qëndror të Manhattanit (Central Park) , kaloi në pjesen jugore të lagjes Bronx, përmes lagjes së Queens-it , Brooklyn-it dhe përfundoi në Staten Island ku pjesëmarrësit morën edhe medaljet e mbarimit me sukses të Marathonës së 45-të, të qytetit të New York-ut.

Shoqata përshendeti pjesëmarrësit në këtë aktivitet sportiv dhe i uroi atyre suksese

të tjera në të ardhmen.

Shoqata Shqiptaro Amerikane “Skenderbej”Inc

7 May 2023

“HISTORI SUKSESI TË KOMUNITETIT SHQIPTAR NË CHICAGO” – ILIR NUMANI

May 9, 2023 by s p

Intervistoi: Mirela Kanini/

KUSH ËSHTË ILIR NUMANI?

Unë jam një shqiptar që banoj në Chicago. Jam një bashkëshort dhe baba i dy fëmijëve të mrekullueshëm. Jam gjithashtu një biznesmen.

QË TË ARRINI ATY KU JENI SOT SIGURISHT QË KENI PATUR VËSHTIRËSI. NA TREGONI PAK MBI JETËN TUAJ…

Në fillim të viteve 90-të, me një valixhe me ëndrra dhe xhepat bosh erdha në Amerikë, vendi që më shumë se ç’do vend tjetër të jep mundësinë të realizosh imazhin që ke për jetën tënde. Rreth 30 vite më vonë, një pjesë e ëndrrave kanë dhënë fruta, një pjesë tjetër ende nuk kanë lëshuar filiza ndërsa unë vazhdoj të kujdesem për to duke ëndërruar. Të përshtatesh në një ambient të ri është gjithmonë e vështirë. Përshtatja është e domosdoshme dhe duhet të jetë gjithë dimensionale nëse dëshiron të ndërtosh jetën që dëshiron. Të punosh fort dhe me orë të gjata çuditërisht është pjesa më e lehtë. Familja fisnike e Dalan dhe Burbuqe Luzaj më pritën, më mbajtën në familjen e tyre ditët e para dhe më ndihmuan të sistemohem në punë dhe të gjej një apartament. Puna ime e parë ishte në restorantin “Cafe Saranda” me pronar Sundim ( Sonny) Dervishi. Ai më mësoi të gatuaj dhe nuk kaloi shumë kohë u bëra shef i guzhinës. Por kjo nuk më mjaftonte dhe në vitin 2000 u regjistrova në Triton College për dy semestra për tu transferuar më pas në Benedictine University ku studiova për financë. Fakti që gjuhën angleze e flisja dhe shkruaja që në Shqipëri bëri që suksesi në shkollë të varej kryesisht vetëm nga vullneti im. Universitetet në USA janë shumë të shtrenjta dhe e vetmja mundësi për të marrë bursë nga shteti ishte që të mirëmbaja mesataren 3.75. Ndërkohë punoja në një restorant që quhej “ The Viking Steak House”, ku gatuaja pranë tavolinave, në sallë disi me elemente shfaqjeje. Të mbarosh shkollën për biznes në Amerikë nuk të garanton gjithmonë një punë të sigurtë siç mendojnë shumë prindër dhe studentë. Gjithshka varet nga çfarë di të bësh me të. Unë këtë gjë e mësova nga eksperienca ime. Kudo që unë trokisja për punë kërkonin eksperiencë, por ku ta gjeja unë eksperiencën pa punuar. Mbasi punova 2 vjet për një kompani që jepte kredi për blerje shtëpish ne vitin 2005 vendosa të märren me siguracione dhe të punoj për Country financial një ndër më të mirat në USA në këtë fushë e për nga cilësia. Kjo kompani dikur kishte një sistem të tillë që nëse do ishe i suksesshëm të jepte mundësinë të kishe agjensinë tënde të siguracioneve. Mbas 4 viteve që u dukën si 14 vite të stërmundimshme, më dhanë të drejtën të kem agjensinë time. Biznesi i siguracioneve është më shumë i orientuar rreth krijimit dhe mbajtjes së marrëdhënieve me klientët se sa i një tranzicioni shit-blerje. Prandaj nëse nuk ke ndershmëri, integritet dhe t’ju gjendesh klientëve kur kanë nevojë për ty është e pamundur ta ndërtosh.

KUR MENDUAT QË KJO ËSHTË RRUGA JUAJ…

Gjatë këtyre 18 viteve edhe pse kam pasur vështirësi, asnjëherë nuk kam menduar se isha në biznesin e gabuar. Mua më pëlqen të punoj me njerzit dhe ky biznes më ka dhënë shansin të punoj jo vetëm me komunitetin shqiptar pa të cilin nuk do ishte e mundur por edhe me shumë klientë të tjerë që janë pjesë e “ melting pot “ dhe e bën Amerikën interesante. Mendoj të merrem me këtë biznes pjesën tjetër të jetës, për 50 vitet që më kanë mbetur.

ÇFARË KËSHILLE DO T’JU JEPNIT SOT BASHKATDHETARËVE TUAJ?

Unë uroj dhe i këshilloj të gjithë bashkëatdhetarët e mi që nëse kanë idera dhe mundësi të hapin biznesin e tyre ta bëjnë pa frikë. “ Just do it”. Gjeni diçka që ju pëlqen, jo domosdoshmërisht diçka që ju jep para. Paraja është e rëndësishme por nuk garanton një jetë kuptimplotë. Që të kesh sukses në biznes unë mendoj që duhet të bësh për klientët e tu diçka më tepër seç bën konkurenca juaj. Bëj mirë, ndihlmoi njerzit dhe herët apo vonë ata do të kërkojnë e do të gjejnë.

KUSH JANË PLANET TUAJA PËR TË ARDHMEN?

Është e çuditshme sepse edhe pas kaq viteve unë vazhdoj të dua ti bëj prindrit e mi të mrekullueshëm krenarë. Dua të jetoj dhe përjetoj gjithshka të bukur në këtë botë. Më pëlqen të udhëtoj dhe mendoj që në një jetë nuk do më mjaftojë të gjithë vendet e bukura të planetit.

KUSH JANË HOBITË TUAJA?

Edhe pse jam 50 vjeç më pëlqen të jem aktiv. Luaj futboll dhe shkoj për ski në dimër. Më pëlqen të eci me milje të tëra me gruan time. Kam një familje që për mua është burim frymëzimi dhe më mban në rrugën e drejtë. Gruaja ime Arlinda, djali im Joni dhe vajza ime mia janë dashuria që nuk shteron.

NJË CITAT QË JU PËLQEN SHUMË?

Ka shumë thënie që na ndihmojnë në momente të caktuara të jetës, por për mua një varg i poetit Octavio Paz vazhdon të jetë i përhershëm. “ Beyond myself, somewhere, I wait for my arrival”. “ Përtej vetes, diku, unë pres për ardhjen time”…

“SHTET BRENDA SHTETIT”

May 9, 2023 by s p

Lumir Abdixhiku/

Dokumenti i draft-statutit, i përpiluar nga Ekipi Menaxhues, e i bërë publik në medie është më tepër se Asociacion dhe është më tepër se Autonomi – është shtet brenda shtetit; Republikë brenda Republikës. Ky draft-statut, në të 67 nenet e në nëntë kapitujt e tij, projekton Federalizimin e Kosovës si koncept të ri organizativ pas shpalljes së pavarësisë.

Një trup që nxjerrë ligje, menaxhon asete kombëtare, pasuri publike e burime natyrore, një trup që organizon zgjedhje, mbanë referendume e merr kompetenca nga Kuvendi dhe Qeveria e Kosovës – nuk ka vend në rregullimin tonë shtetëror e kushtetues.

Si i tillë, ai jo vetëm që duhet të refuzohet si bazë negociuese por dhe të refuzohet si ambicie politike. Në Kosovë nuk do të ketë parti, nuk do të ketë qeveri e nuk do të ketë njeri që mund ta pranojë një organizim të tillë.

Qeveria e Kosovës ndërsa, duhet të marrë pronësinë në procesin vijues. Asociacioni bëhet nga institucionet tona dhe atë vetëm brenda rendit tonë kushtetues. Çdo ikje nga përgjegjësia është dorëzim dhe çdo dorëzim sjellë dokumente e koncepte të tilla; siç ka ndodhur dhe me këtë tani.”

Presidentja Osmani në Ditën e Evropës: Kosova është mishërim i vlerave evropiane

May 9, 2023 by s p

Në vijim mesazhi i Presidentes së Republikës së Kosovës, Vjosa Osmani në Ditën e Evropës:

Dita e Evropës është mundësi për të reflektuar mbi vlerat që na bashkojnë si popuj evropianë – liria, demokracia, të drejtat e njeriut dhe sundimi i ligjit. Këto parime themelore kanë qenë shtylla të rëndësishme të Bashkimit Evropian që nga formësimi i tij, e janë pikërisht këto vlera për të cilat Kosova dhe populli i saj ka luftuar historikisht dhe vazhdon t’i mbrojë edhe sot.

Në këtë kohë përcaktuese, Dita e Evropës shërben si një kujtesë e fuqishme për rëndësinë e solidaritetit, unitetit dhe mbrojtjes së njëri-tjetrit. Le ta shfrytëzojmë këtë moment për të reflektuar mbi të gjitha sukseset që kemi arritur deri tani dhe për ta rikonfirmuar vullnetin tonë të pashembullt për suksese të reja në rrugën drejt integrimit evropian.

Kosova dhe populli i saj kanë qenë, janë, dhe do të mbeten gjithnjë mishërim i këtyre vlerave. E gjersa afrohemi më shumë drejt Bashkimit Evropian, angazhimi ynë mbetet i palëkundur, sepse vendosmëria jonë për demokraci, paqe, të drejta të njeriut e sundim të ligjit, mbetet poashtu e palëkundur.

GJERGJ KASTRIOTI – SKENDERBEU VAZHDON TË “PUSHTOJË” AMERIKËN

May 9, 2023 by s p

Nga Frank Shkreli

Gjergj Kastrioti – Skenderbeu, trim i trimave, i përgjithëmonshmi i Kombit — shqiptar i përmasave botërore, në Ditëlindjen e tij, 6 Maj. Por, a është i tillë, Gjergj Kastrioti -Skenderbe për të gjithë shqiptarët?!

Presidentja e Republikës së Kosovës, Vjosa Osmani ka kujtuar ditëlindjen e Heroit tonë kombëtar Gjergj Kastrioti – Skënderbeu — Presidentja Osmani ka kujtuar ditëlindjen e heroit tonë kombëtar Gjergj Kastrioti – Skënderbeu – Lajme – Presidente e Republikës së Kosovës – DR. VJOSA OSMANI – SADRIU (president-ksgov.net)

Edhe Kryeministri i Republikës së Kosovës, Albin Kurti e kujtoi Gjergj Kastriotin Skenderbe në ditëlindjen e tij me një deklaratë, fund javën që kaloi — Albin Kurti | Facebook, duke e cilësuar Heroin Kombëtar me këto fjalë: “Luftëtar i guximshëm e patriot i madh, prijës i shquar dhe strateg ushtarak, politikan vizionar dhe diplomat i shkathët, Gjergj Kastrioti – Skënderbeu është personaliteti më i rëndësishëm në historinë e shqiptarëve, kurse figura e tij prej heroi, nga koha e tij te rimarrja prej rilindasve dhe deri te ne sot, ka mbetur qendror në identitetin shqiptar. Lavdi heroit të kombit Gjergj Kastriotit – Skënderbeut për jetë e mot!”, është shprehur Kryeministri i Kosovës Albin Kurti në Ditën e lindjes së Skenderbeut.

Ndërsa në Shqipëri nuk pashë të jetë kujtuar kjo ditë. U vendosën kurora me lule pranë monumentit të Dëshmorve të Kombit – Një akt shumë me vend!

Por, pranë Monumentit të Gjergj Kastriotit -Skenderbe, në Sheshin me të njëjtin emër në Tiranë, nuk lexova të jetë vendosur, asnjë buqetë me lule për të kujtuar, zyrtarisht, “kryendërtuesin e atdheut të shqiptarëve” – Qofsha i gabuar për këtë, dhe nëse jam i gabuar, kërkoj ndjesë, paraprakisht! Nejse, duket sikur pozita dhe opozita politike në Shqipëri janë kacafyt në një fushatë për pushtet – “për jetë e vdekje” – dhe nuk kanë kohë as të mendojnë për Skenderbeun, as për historinë e Kombit dhe as për rolin e këtij vigani në historinë e shqiptarëve dhe dhe në ruajtjen e identitetit historik të Kombit shqiptar. Sidoqoftë, kjo është puna e tyre dhe e votuesve shqiptarë që tolerojnë shkelje të tilla të historisë së kombit dhe të heronjve të saj, si Gjergj Kastrioti -Skenderbe, por të jenë të sigurt, të dy palët e politikës shqiptare, se pa Skenderbeun – nuk shkohet “përpara”, as nuk fitoni të “bashkuar”.

Kam drojë se në këtë fushatë politike në Shqipëri, por jo vetëm, pasi ka ndodhur edhe në të kaluarën, kur përvjetore të jetës dhe veprimtarisë së Skenderbut kanë kaluar pa u përmendur fare nga disa qarqe të caktuara – duket se edhe sivjet aktivitetet dhe brohoritjet politike në Shqipëri, me qëllim ose pa qëllim, vazhdojnë të jenë pjesë e një harrese që çon drejt shuarjes së kujtimit të tij dhe të veprave të lavdishme të Krye-Heroit Kombëtar Gjergj Kastriotit-Skenderbe.

NDËRKAQ dhe për fat të mirë, shqiptarët këtu në Shtetet e Bashkuara të Amerikës, mundohen që çdo vit ta kujtojnë Skenderbeun, në data të caktuara, për vetën e tyre dhe të brezave këtu, por edhe për amerikanët që edhe ata të dinë e të mësojnë se kush ishte Gjergj Kastrioti-Skenderbeu i Kombit shqiptar dhe kush në të vërtetë janë shqiptarët!?

Komuniteti shqiptaro-amerikan, nën drejtimin e aktivistit të dalluar të komunitetit tonë këtu, Z. Mark Gjonaj, i cili me ndihmën e shumë organizatave shqiptaro-amerikane, organizuan edhe sivjet — në pervjetorin e dytë të shpalljes me emrin “Rruga Gjergj Kastrioti Skënderbeu” në Bronks të Nju Jorkut — Frank Shkreli: Gjergj Kastrioti – Skënderbeu me një rrugë të tijën në Nju Jork | Gazeta Telegraf — u organizua festimi dhe panairi i rrugës. Të Dielën me 7 Maj, për nja 6 orë me mijëra pjesëtarë të komuniteti shqiptaro-amerikan morën pjesë dhe u argëtuan me programe të ndryshme, nga dhjetëra këngëtarë e këngëtare të ardhur nga të gjitha trojet shqiptare në Nju Jork për këët qëllim. Ata me kreanri kombëtare, me fjalë, këngë e valle shpalosën traditën dhe kulturën, muzikën, vallet popullore, ushqimet dhe aktivitete të tjera, jo vetëm për komunitetin, por edhe për amerikanët vendas. Ishte kjo një ditë gëzimi e festimi, në kujtim të Heroit të madh të Kombit shqiptar – aty në hapësirën e rrugës që mban emrin Gjergj Kastrioti -Skenderbeu – këtu në Amerikën e largët u mblodhën shqiptarët nga të gjitha trojet dhe pa dallim — duke shpalosur krenarinë dhe Bashkimin e tyre rreth Kryeheroit Kombëtar.

Ndërsa në një komunitet tjetër shqiptaro-amerikan – që cilësohet si më i vjetri këtu në Shtetet e Bashkuara – në Uster të shtetit Masaçusets, jo larg Bostonit – një kryeqenër tjetër e madhe e shqiptaro-amerikanëve, me 21 të Marsit që kaloi, mësuam se Këshilli Bashkiak i atij qyteti miratoi, në parim, kërkesën e përfaqsuesve të komunitetit shqiptaro-amerikan atje për të emëruar një rrugë të atij qyteti me emrin Gjergj Kastrioti- Skenderbe. Kronika e gazetarit Ardian Murraj në Youtube: VOAL Gjergj Kastrioti Scanderbeg Way, Public Works Committee, 04 /24 /2023 – YouTube. Sipas këtij informacioni, Komiteti i Punëve Publike të Bashkisë së qytetit të Usterit miratoi, përfundimisht dhe zyrtarisht, me 25 Prill, 2023 vendimin për nderimin me emrin Gjergj Kastrioti Skënderbeu (Way). Ceremonia zyrtare festive e nderimit me emrin Gjergj Kastrioti Skënderbeu do të mbahet në prag të Festivalit Shqiptar të Usterit, që pritet të bëhet gjatë fundjavës së parë të muajit Qershor, 2023.

Shpesh media shqiptare në përgjithësi ia “ben me hile” këtij komunitetit në Uester, duke e qitur në harresë pa të drejtë, pasi edhe sot ashtu si, historikisht, ky komunitet ka luajtur dhe luan një rol të rëndësishëm në historinë e shqiptarëve në Amerikë që kanë emigruar heret, por që është ringjallur si të thuash me emigrantë të ardhur dekadat e fundit nga të gjitha trojet shqiptare, por sidomos nga Shqipëria, prandaj vendimi për të emruar një rrugë në emër të Skenderbeut është domethënse për shqiptaro-amerikanët, duke u kujtuar atyre Heroin dhe Atdheun.

“Kjo shënoi me të vërtetë një ngjarje historike pasi lidhet me disa vite jubilarë përkujtimorë së bashku dhe po kaq festive për shqiptarët e Usterit të cilët kanë treguar në vazhdimësi përpjekjet e mërgimtarëve të vendosur këtu gati 150 vite më parë. Prania e bashkëatdhetarëve shqiptarë dhe të Kosovës (në seancën e Bashkisë) me flamuj dhe kostume popullore ishte e gëzueshme dhe solemne pasi ata bashkohen rreth Heroit të tyre Kombëtar, figurës shumë të dashur për ta, Gjergj Kastrioti Skënderbeut”, ka shkruar me këtë rast gazetari Ardian Murraj në kronikën e tij mbi këtë ngjarje historike për komunitetin shqiptaro-amerikan në Uester dhe për shqiptaro-amerikanët, në përgjithësi.

Gazetari Murraj me të drejtë lavdëron rolin historik të komunitetit shqiptaro-amerikan në Uester të shtetit Massachusetts, “Si një bashkësi që vlerëson dhe shkëmben vlerat e historisë, kulturës dhe traditave të shumë kombësive Usteri u bë qyteti parë në Masaçusets që nderon një figurë legjendare të historisë botërore të lidhur ngushtë me krenarinë e një populli, një histori që bashkatdhetarët shqiptaro-amerikanë kanë filluar ta shkruajnë pasi ata shquhen gjerësisht dhe janë pjesëmarrës në zhvillimet e jetës së këtij qyteti”, është shprehur ai.

Përkujtimi i Gjergj Kastriotit – Skenderbeu, sidomos në Shqipëri e Kosovë, por edhe anë e mbanë trojeve shqiptare, pa përjashtuar edhe diasporën shqiptare qoftë në Amerikë, qoftë në Evropën Perëndimore – ka shumë rëndësi, sepse siç është shprehur me një rast Ernest Koliqi: “Pak janë ata të huaj që na përfillin. Dikush na urren, shumica harron se ka një komb shqiptar. Kemi nevojë për kuptim e mbështetje sepse shumë paragjykime ushqejnë përgjithësisht të huajt mbi ne dhe çeshtjet tona…”. Duke shënuar përvjetorë të Gjergj Kastriotit -Skenderbe, ka shkruar Koliqi, i kujtojmë vetes dhe botës, njëkohësisht, ekzistencën tonë dhe vuajtjet e padrejta që na kanë mbuluar, por njëkohësisht, një përkujtim i tillë i Skenderbeut, sjellë një shërbim të pashoq, Shqipërisë dhe shqiptarëve, kudo. Është obligim moral dhe atdhetar që Skenderbeu të kujtohet dhe të mos harrohet nga diaspora shqiptare në Amerikë, por as nga Shqipëria dhe Kosova. Përkujtimi i Gjergj Kastriotit -Skenderbeut është një përgjegjësi numër një e udhëheqësve aktualë të Kombit – në të njëjtin nivel siç është përgjegjësia e tyre për mbrojtjen e sigurisë, të territorit shqiptar dhe identitetit kombëtar të shqiptarëve.

Frank Shkreli

Foto Gazeta Dielli

Foto: Gazeta Dielli

Nga akitiviteti nl Bashkinë e qytetit Uester në shtetin Masaçusets