Archives for May 2023

FEDERATA VATRA DHE GAZETA DIELLI PROMOVUAN VEPRËN E DALIP GRECËS, EDITORIT EPOKAL TË DIELLIT 2009-2021

May 1, 2023 by s p

Sokol Paja/

New York, 30 Prill 2023 – Federata Pan-Shqiptare e Amerikës “Vatra” dhe gazeta “Dielli” promovuan veprën e lënë në dorëshkrim nga Dalip Greca, editori epokal i “Diellit” (2009-2021). Me pjesëmarrjen e gjërë të familjarëve, vatranëve, patriotëve, veprimtarëve, miqve, bashkëpunëtorëve, kolegëve, mediave e personaliteteve të botës shqiptare në Shtetet e Bashkuara të Amerikës, veprat publicistike-historike “Editorët e “Diellit” në 110 vite histori” dhe “Editorial” si botim ekskluziv i Federatës Vatra, e kthyen promovimin në një homazh, respekt dhe nderim të thellë për jetën dhe veprën e Dalip Grecës. Për 12 vite në gazetën “Dielli” dhe Federatën “Vatra”, Dalip Greca në mërgatën e Amerikës u bë zëri më i fuqishëm i çështjes kombëtare dhe pena më e prehtë e jetës komunitare. Ai do të mbahet mend për cilësi dhe virtyte të veçanta si patriot, si gazetar, si vatran dhe si atdhetar i shquar. Gjatë katër dekadave aktive në media, Dalip Greca ishte simbol i profesionalizmit, sakrificës, durimit, qetësisë, urtësisë, mençurisë, thjeshtësisë, përuljes dhe këmbënguljes. Dalip Greca për katër dekada punoi me integritet moral, qytetar e profesional, me kurajo, drejtësi dhe ndershmëri. Promovimi i veprës së editorit Dalip Greca, filloi me një dokumentar përgatitur nga Tv Kultura Shqiptare e Adem Belliut rreth jetës e veprës mediatike dhe komunitare të Dalip Grecës.

Në fjalën prezantuese editori i “Diellit” Sokol Paja deklaroi se studimi “Editorët e “Diellit” në 110 vite histori” është një vepër monumentale në historinë e “Diellit”, “Vatrës” e shqiptarëve të Amerikës. Dalip Greca e drejtoi “Diellin” për 12 vite dhe la gjurmë të pashlyeshme në historinë e gazetës “Dielli” dhe Federatës “Vatra”. Libri përmbledh tërësisht veprat dhe kryeveprat e patriotëve shqiptarë në mërgatën e Amerikës që shkrinë talentin dhe kontributin e tyre në “Vatër” e në “Diell”. Fan Noli, Faik Konica, Kristo Floqi, Refat Gurrazezi, Bahri Omari, Qerim Panariti, Eftim Natçi, Andon Frasheri, Kostandin Çekrezi, Nelo Drizari, Xhevat Kalljaxhi e deri te profesor Arshi Pipa vijnë të skeduar mjeshtrisht në këtë botim. Dalip Greca si Editor i Diellit punoi, drejtoi dhe udhëhoqi me fanatizëm nën frymën e Nolit, Konicës, Floqit, Gurrazezit, Omarit, Kallajxhiut, Pipës e shumë intelektualëve të lartë që punuan dhe lobuan fort në shërbim të shqiptarisë dhe kombit tonë. Veprimtaria e gjërë e “Vatrës” e “Diellit” rrëfyer nga Dalip Greca si kronikan i kohës së lavdishme që shkroi e punoi, pasuron historiografinë tonë kombëtare dhe identitetin tonë kombëtar. Ai la pas një trashëgimi të shkëlqyer shkrimesh, hulumtimesh e kontributesh historike, mediatike, letrare, politike dhe publicistike. Nëpërmjet librit “Editorial” vijnë të paraqitura dhe të skalitura editorialet më me peshë në historinë 12 vjeçare të z.Greca që kanë mbajtur gjallë gazetën “Dielli”. Bien në sy shkrimet patriotike për Kosovën, Çamërinë, shqiptarët në trojet etnike e mërgatën në Shtetet e Bashkuara të Amerikës. Libri “Editorial” i Dalip Grecës për nga mënyra e trajtimit të çështjeve, mënyrës së hulumtimit të fenomeneve, fakteve, dokumentave, analizës së fakteve, trajtimit dhe shfletimit të dokumenteve, perspektivës dhe vendosmërisë për t’iu shkuar deri në fund çështjeve që ngre, e bëjnë një botim me vlerë historike të patjetërsueshme në publicistikën shqiptare, theksoi ndër të tjera editori i “Diellit” Sokol Paja.

Kryetari i Vatrës z.Elmi Berisha në fjalën e tij theksoi se “Vatra” është krenare dhe “Dielli” po ashtu për shërbimin, përkujdesjen dhe mirësinë që mori prej Dalip Grecës. Dalipi ishte një ekspert i lartë i mediave, ishte një profesionist i veçantë edhe në fushën e historisë, të letërsisë dhe albanologjisë. Mënyra sesi i ka trajtuar çështjet në mënyrë shterruese Dalip Greca e bëjnë atë një gazetar shumë të veçantë në diasporën e Amerikës. Emri i Dalip Grecës do të jetojë përgjithmonë i lavdishëm në historinë e “Diellit” e të “Vatrës” si një patriot, profesionist, misionar i të vërtetës dhe dëshmitar i historisë së shqiptarëve të Amerikës e dishepull i përjetshëm i patriotizmës kombëtare shqiptare.

Recezenti shkencor i botimeve Dr.Paulin Marku u shpreh se ky promovim njeh publikun e gjërë me krijimtarinë e spikatur të z.Greca dhe punën e tij voluminoze në shërbim të “Diellit”, “Vatrës” e publicistikës shqiptare në mërgatën shqiptare të Amerikës. Dr. Marku paraqiti për të pranishmit detaje të vlerës së botimeve dhe punës voluminoze për çështjen kombëtare shqiptare në krijimtarinë publicistike të Dalip Grecës. Presidenti i Nderit të Vatrës z.Agim Rexhaj në fjalën e tij u ndal te njohja me Dalip Grecën, punën cilësore në gazetën “Dielli”, angazhimin, përkushtimin e punën e çmuar në Federatën “Vatra”, gjithashtu dhe kontributin në komunitetin shqiptar në Shtetet e Bashkuara të Amerikës.

Studiuesi Idriz Lamaj u shpreh se Dalipi e kthen lexuesin në vitet, vështirësitë dhe sakrificat e tyre, për krijimin dhe mbajtjen gjallë të “Vatrës” dhe të “Diellit”. Lexuesi i sotëm i këtij libri, jo vetëm që njihet në hollësi me jetën dhe veprimtarinë e Editorëve të “Diellit” në 110 vite histori por njihet në hollësi edhe me të gjitha zhvillimet historike në trojet tona në Ballkan, dhe natyrisht këtu në Amerikë. Njihet me varfërinë, vuajtjet e sukseset tona kombëtare. Në secilin shkrim të tij gjinden paragrafe, fjali dhe copa shkrimesh të editorëve të “Diellit”, perla tërheqëse ndjenjash atdhetare, që lexuesin e kthejnë në kohën e tyre dhe e bëjnë krenar me kolegët e tij, me editorët e “Diellit” 114 vjetësh të vjetër.

Sekretarja e “Vatrës” zonja Nazo Veliu në fjalën e saj u ndal te hulumtimet publicistike të Dalip Grecës në nxjerrjen në pah të figurave të rëndësishme të kombit tonë dhe rëndësinë e veprës publicistike e shkencore të Dalip Grecës. Dr. Preno Imeraj shpjegoi vlerat e njohjes me Dalip Grecën në Lushnje, kujtimet e kohës së vështirë të komunizmit dhe cilësitë e tij si qytetar dhe gazetar.

Zonja Mimoza Belliu shpjegoi punën me Dalip Grecën në arkivin e Televizionit Kultura Shqiptare, zonja Marjana Bulku veçoi profesionalizmin e Dalip Grecës dhe hapësirat që u dha të rinjve në “Diell” dhe në “Vatër”, zonja Kozeta Zylo rrëfeu bashkëpunimin e ngushtë me Dalip Grecën, punën me shkollat shqipe, dhe krijimtarinë e tij letrare dhe lëvrimin e gjinive publicistike duke e kthyer veprën e Dalipit të çmuar për të gjithë komunitetin shqiptar. Petrit Alibej kryetar i Shoqërisë Atdhetare Besa-Besën dha mesazhe bashkimi e bashkëpunimi.

Miku i Dalip Grecës Mark Mrnaçaj rrëfeu emocionet e dashurisë së Dalipit për “Vatrën” e vatranët, miqësinë me z.Greca që në Lushnje, bashkëpunimin në New York dhe përkushtimin e Dalipit në “Vatër” e komunitetin shqiptar.

Djali i Dalip Grecës, Dorjan Greca në emër të familjes u shpreh me një fjalim prekës mirënjohjeje e falenderimi: “Federata Pan-Shqiptare e Amerikës “Vatra”, Kryesia, Këshilli, anëtarët e saj, miqtë dhe kolegët e të ndjerit babait tonë, Dalip Greca, meritojnë një mirënjohje dhe falënderim të veçantë për punën e tyre në botimin dhe promovimin e kontributit të tij shumëvjeçar permes librave “Editorët e Diellit ne 110 vite histori” dhe “Editorial”. Sinqerisht, ndjehemi të nderuar e të respektuar që Federata “Vatra” botoi një pjesë të punës dhe veprës voluminoze së babait tonë. Babai do të na mungojë shumë, por kujtimet, mësimet, influenca dhe VEPRA e tij do të jenë gjithmonë këtu mes nesh, si frymëzim, burim inkurajimi dhe udhërrëfyes për të gjithë ne. Puna dhe misioni i Federatës “Vatra” janë me të vërtetë shembulli më i mirë. Përmes botimeve të veprës së babait tonë dhe kontributit të jashtëzakonshëm në “Vatër” dhe gazetën “Dielli”, “Vatra” po le pas gjurmë të thella në trashëgiminë kulturore të vendit tonë për brezat e ardhshëm” tha në mesazhin e falenderimit të familjes Dorjan Greca.

Promovimi vazhdoi gjatë me një koktejl të përgatitur nga familja Greca dhe shpërndarjen e librave për të pranishmit. Ky promovim ishte një nderim i lartë për Dalip Grecën, ikonën e shtypit të shkruar shqiptar në Shtetet e Bashkuara të Amerikës, veprimtarin, patriotin, vatranin, gazetarin, atdhetarin e shqiptarin e shkëlqyer që sot na mungon kaq shumë.

I përjetshëm kujtimi, amaneti dhe vepra e Dalip Grecës.

“Vatra” dhe “Dielli” falenderojnë fotografin e mirënjohur Bujar Verzivolli dhe Adem Belliun e Tv Kultura Shqiptare për pasqyrimin profesional të aktivitetit publicistik e patriotik.

“EDITORËT E “DIELLIT” NË 110 VITE HISTORI”, NJË KRYEVEPËR PUBLICISTIKE MË RËNDËSI PËR HISTORINË E “VATRËS”, “DIELLIT” DHE SHQIPTARËVE TË AMERIKËS

May 1, 2023 by s p

Sokol PAJA/

Studimi “EDITORËT E “DIELLIT” NË 110 VITE HISTORI” i lënë në proces botimi nga editori i ndjerë i Gazetës “Dielli” Dalip Greca, përbën një kontribut shkencor dhe publicistik të jashtëzakonshëm për historinë e gazetës më të vjetër që botohet në mërgatën shqiptare. Studimi “Editorët e “Diellit” në 110 vite histori” është një vepër monumentale në historinë e “Diellit”, “Vatrës” e shqiptarëve të Amerikës. Nëpërmjet këtij botimi lexuesi njeh në detaje organizimin patriotik, kulturor e politik të shqiptarëve të Amerikës dhe ndihmën e fuqishme për Kombin dhe Atdheun. Dalip Greca e drejtoi “Diellin” për 12 vite dhe la gjurmë të pashlyshme në historinë e gazetës “Dielli” dhe Federatës “Vatra”.

Dalip Greca ishte një gazetar me shumë eksperiencë, profesionist i lartë, menaxher i suksesshëm dhe gazetës “Dielli” i dha menjëherë një energji, një frymë, një stil të veçantë që e ktheu gazetën fuqishëm në treg. Studimi “Editorët e “Diellit” në 110 vite histori” është i pari studim për jetën e veprën e editorëve të Gazetës “Dielli” duke sjellur risi dhe fakte historike pak të panjohura për publikun. Në këtë libër të lënë në dorëshkrim, Dalip Greca ka lënë një punim fenomenal. Studimi “Editorët e “Diellit” në 110 vite histori” analizon me detaje themelimin e “Vatrës”, punën e jashtëzakonshme dhe barrën që kanë hequr mbi supe editorët e “Diellit”, rolin e “Diellit” në mjedisin shqiptar në Shtetet e Bashkuara të Amerikës, jetën e personaliteteve më të shquara të kombit shqiptar që drejtuan “Diellin” e “Vatrën” në 110 vite histori. Libri “Editorët e “Diellit” në 110 vite histori” i ndarë në nëntë kapituj përmbledh tërësisht veprat dhe kryeveprat e patriotëve shqiptarë në mërgatën e Amerikës që shkrinë talentin dhe kontributin e tyre në “Vatër” e në “Diell”. Fan Noli, Faik Konica, Kristo Floqi, Refat Gurrazezi, Bahri Omari, Qerim Panariti, Eftim Natçi, Andon Frasheri, Kostandin Çekrezi, Nelo Drizari, Xhevat Kalljaxhi e deri te profesor Arshi Pipa vijnë të skeduar mjeshtrisht dhe të analizuar në veprimtarinë e tyre nën drejtimin e “Diellit” e pa dyshim dhe të “Vatrës”. Falenderim dhe mirënjohje Federatës “Vatra” për botimin si një vlerësim dhe amanet për përkushtimin, kontributin dhe dedikimin me të cilin Dalip Greca punoi në “Diell” e në “Vatër” për 12 vite.

Libri ka në brendësi ngjarje, argumente dhe të dhëna të shumta e të rëndësishme për historinë e “Diellit” dhe të “Vatrës”.

Falenderim special studiuesve Idriz Lamajt e Dr. Paulin Markut të cilët dhanë ide, sugjerime, perspektiva dhe mbështetje në çdo hap të botimit të këtij libri. Mirënjohje dhe për vajzën e Dalipit Elisabeta Greca e cila ndihmoi në redaktim, korrektim, grumbullim të materialeve origjinale të lëna në dorëshkrim nga Dalip Greca. “Vatra” dhe “Dielli” kane qenë dhe do të jenë një urë lidhëse e fuqishme me institucionet e larta amerikane e jetëdhënëse e traditës, kulturës e ruajtjes së vlerave tona kombëtare në mërgatë e Amerikës. Dalip Greca si Editor i Diellit punoi, drejtoi dhe udhëhoqi me fanatizëm nën frymën e Nolit, Konicës, Floqit, Gurrazezit, Omarit, Kallajxhiut, Pipës e shumë intelektualëve të lartë që punuan dhe lobuan fort në shërbim të shqiptarisë dhe kombit tonë. Veprimtaria e gjërë e “Vatrës” e “Diellit” rrëfyer nga Dalip Greca si kronikan i kohës së lavdishme që shkroi e punoi, pasuron historiografinë tonë kombëtare dhe identitetin tonë kombëtar. Dalip Greca ndërroi jetë papritur ne 15 maj 2022 duke lënë pas një dhimbje të thellë dhe zbrazëti tek familja, miqtë, dashamirësit dhe komuniteti shqiptar. Ai la pas një trashëgimi të shkëlqyer shkrimesh, hulumtimesh e kontributesh historike, mediatike, letrare, politike dhe publicistike. Dorëshkrimi i papërfunduar, studimet, kumtesat dhe materialet e gjendura në arkivin personal të Dalip Grecës për editorët e gazetës “Dielli” në 110 histori të “Vatrës”, vijnë të ideuara nga autori, me rend tematik, kohor dhe organizacional të vendosur nga grupi i punës cituar më lart.

Kontributi i Dalip Grecës dhe pas vdekjes, ashtu siç punoi me pasion e përkushtim në të gjallë të tij, vlen për tu vlerësuar për rëndësinë dhe vlerën e veçantë që ka libri për historinë e “Diellit” e Federatës “Vatra”. Libri “Editorët e “Diellit” në 110 vite histori” është botuar mbi bazën e materialeve të gjetura në proces punimi prej Dalip Grecës dhe vijnë në formën autentike ashtu siç ai i ka lënë në dorëshkrim. Libri është një kontribut i shquar në historinë e shtypit të shkruar shqiptar. “Editorët e “Diellit” në 110 vite histori” përbën një udhërrëfyes për gazetarët, historianët, studiuesit e letërsisë e gjuhësisë dhe kërkuesit shkencor në katedrat universitare që njihen me një libër me vlera të shumëfishta historike e mediatike. Për 12 vite Dalip Greca jo vetëm që e shkroi historinë e tij unike në “Diell” e në Vatër por sot na la pas një studim me vlerë të çmuar për historinë tonë kombëtare dhe historinë e shqiptarëve të Amerikës.

DALIP GRECA, PROFESIONISTI, ATDHETARI, PENA E FORTË E KOMUNITETIT DHE ÇËSHTJES KOMBËTARE

May 1, 2023 by s p

Nazo Veliu/

Te nderuar vatranë, të nderuar vëllezer e motra të të njëjtit gjak, e nderuara familja Greca, të nderuar bashkëudhetare të Dalip Grecës. U bëmë bashkë për të kujtuar këto vite të vështira të imigrimit por edhe të punës e mundit të gjithësecilit nga ne e veçanërisht shokut, mikut, vëllait por edhe të editorit me shpirt e zemër atdhetari, të paharruarin Dalip Greca. Hedh sytë në sallë duke kërkuar së ku Dalip Greca është ulur por fizikisht se shoh askund. Shpirti e zemra e tij është e do të jetë mes nesh në çdo kohë e në çdo situatë me fjalen e tij të urtë, me kritikat por edhe me rrugën se ku duhet të shkelim në mbrojtje të fjalës së lirë, mendimit konseguent por edhe me dashuri për atë që korifenjtë Noli, Konica e bashkëudhetarët e tyre në misionin fisnik të Kombit e për Kombin na lanë trashëgimi “VATREN”. 111 vjet pune, luftë me të keqen por edhe histori se ku i është duhur të ecin burrra të tillë që nuk kursyen asgjë për kombin. Atë që shekujt e shkuar nuk e bënë dot, VATRA dhe vatranët e përjetuan jo vetëm në memorjen e çdonjërit atdhetar e liridashës por edhe në faqet e ndritura të asaj gazete që emrin e ka DIELLI ashtu siç punën e ka bërë. Dalip Greca pati jo vetëm fatin e madh që për 12 vjet rresht ishte në zemrën e historisë së Vatrës, pra editor i Gazetes DIELLI por edhe përkushtimin e durimin e pashoq që të shfletonte çdo faqe të historisë së saj në atë që të parët e pozicionit të tij e kishin lënë të shkruar e dokumentuar. Pa u lodhur Dalipi krahas detyrës së tij të vështirë për të paraqitur në faqet e Gazetës DIELLI realitetin nuk linte pa shkruar për figura kombëtare jo vetëm aktivitetin e tyre por edhe porositë që ata kishin lënë për të mos e larguar VATRëN nga shinat në të cilat historia e kishte drejtuar, për ta ruajtur VATREN të pastërt ashtu siç ajo kishte qenë e për ta bërë VATREN shtëpi dhe djep ku të diskutoheshin hallet e kombit të vuajtur e pse jo edhe të goditur në çdo kohë nga historia, nga ata që me pjesët e trupit të kombit arbëror plotësuan tekat e cilitdo që nuk e pranonte lashtësinë e ekzistencës sonë. Hulumtimi dhe dëshira për të parë nga afër historinë e asaj që i parapriu themelimit të shtetit shqiptar, pra Vatres, per Dalip Grecën u panë jo vetem si vleresim por edhe si nje detyrim qe Ai i vuri vetes per ta perjetuar vepren e editoreve te DIELLIT te permbledhur ne nje te vetme : EDITORET E DIELLIT NE 110 VJET HISTORI” apo edhe “EDITORIAL” jo vetem per te vazhduar rrugen e atyre qe e krijuan dhe e shkruan Vatren por edhe t’iu jepte dashamiresve te VATRES e vatraneve mundesine jo vetem per tu njohur me punen e palodhur te atyre qe nuk kursyen asgje per kombin arberor, qe jetuan me hallet e kombit e u perplasen me cilin do qe kerkonte ti vinin shqelmin kombit. Puna e Dalip Greces eshte sa atdhetare aq edhe shkencore sepse ne ate qe Dalip Greca shkrojti e la pas jo vetem eshte historia e Vatres, e asaj qe Vatra dhe Vatranet e nderuar e te pa kursyer bene per Kombin por i ka dhene mundesi historianeve te tashem e te ardhshem jo vetem te hulumtojne ne punen qe Dalipi ka bere por edhe ta shkruajne historine e viteve qe Dalipi shkro,j te vertete ashtu sic ka qene e ishte derisa Dalipi u largua nga ne fizikisht por jo shpirterisht. Te shkruash per Dalip Grecen kur ai ka shkruar aq shume per te gjithe eshte teper e veshtire. Profesionistit te penes eshte jo vetem e veshtire por ndonjehere edhe e pamundur t’i dalesh perpara. E megjithate neve na duhet ta bejme kete edhe pse jemi te bindur qe nuk do mundemi te bejme me te miren e mundeshme jo sepse nuk duam por Dalipi i ka lene te gjitha ketu mes nesh e keto rreshtat tane nuk do mundin ta lartesojne figuren e Tij por do shprehin mungesen e madhe qe ai ka lene mes nesh. Une nuk e di pse por dua qe kujtimet per Dalipin ti mbaj brenda meje e kur nje dite te takohem me te t’i them se ashtu si Ti ishe besnik me mua ne cdo problem qe mua me shqetesonte edhe une e mbajta ne zemer jo vetem dashurine vellazerore por edhe dhimbjen e mungeses Tende, ndaj falem qe po ti them keto fjale:

Familjare, miq e shoke,

Kemi humbur fizikisht shokun, mikun, vellain tone te shtrenjte, por kemi fituar nje editor te rralle te DIELLIT, nje bashkeluftetar ne mbrojtje te ceshtjes kombetare qe per asnje moment nuk e harroj Kosoven , Camerine, Shqiptaret e Malit te Zi apo edhe Shqiptaret e Maqedonise se Veriut. Problemet e tyre nuk i pa asnjehere te shkeputura nga problemet e Shqiperise por kudo ku kishte e ka shqiptare Dalipi i pa e i trajtoj si nje familje sepse ne jemi nje gjak, nje komb e kemi nje gjuhe.

Humbja e Dalipit ishte e parakoheshme dhe e dhimbeshme. Nuk kam humbur nje njeri te zakonshem. Kam humbur nje shok, mik e vella qe per vite e vite e kam patur mbeshtetje jo vetem te puneve te veshtira ne vendlindjen time por edhe ilac te halleve e derteve te emigracionit. Nuk di cfare te them me pare sepse kujtimet e mia per Dalip Grecen kane nje fillim te larget por edhe nje fund pambarim. I pa kompromis me te keqen ashtu si ne Shqiperi edhe ketu Dalipi u be jo vetem mbeshtetja jone por edhe udherrefyesi per gjithcka qe ne na nevojitej. Se bashku une e Dalipi u beme pjese e VATRES ku ai ishte vene me pare se sa une ne krye te “DIELLIT” jo vetem si profesionist por edhe si atdhetar. Puna dhe devotshmeria e Tij beri qe “DIELLI” te rimarre shkelqimin dhe per 12 vjet qe Dalipi e drejtoi e ktheu ate ne lavdine e dikureshme te Nolit dhe te Konices. Krahas “DIELLIT” Dalipi nuk rreshti se punuari edhe per ta perjetesuar historine e VATRES duke shkruar e lene pas vepra me vlere por jo vetem kaq. Punen e kryer e le ne mes vellai yne jo se deshe por sepse Zoti te deshi per vete.

Ka shume per te thene per Vella Dalipin por dua qe disa kujtime edhe ti privatizoj e te jene vetem te miat kujtimet per Te sepse vetem keshtu mendoj qe une jetoj me kujtimet per Dalipin por edhe me detyrimin per ta cuar perpara ate qe Dalipi e la ne mes.

Mire u takofshim vellai yne sepse edhe ne ato momente qe do te jemi bashke kemi shume per te diskutuar.

DALIP GRECA, DISHEPULL I DIELLIT E VATRËS, MISIONAR I SË VËRTETËS

May 1, 2023 by s p

Dr. Elmi Berisha/

Me Dalip Grecën kam punuar ngushtë dhe bashkëpunuar gjatë. Qe në fillim të njohjes sonë më ka lënë përshtypje të një njeriu dhe gazetari shumë të veçantë. Mënyra sesi pyeste, sesi ngrinte çështje për diskutim, sesi dëgjonte dhe mbante shënime, tregonte se ishte një njeri shumë i lexuar dhe shumë detajist. Dalip Greca do të kujtohet gjithmonë si një gazetar, patriot dhe njeri i respektuar i letrave e medias shqiptare në mërgatën e Amerikës. Ai jo vetëm që ka hyrë në histori, por ka shkruar me historinë, jetën dhe kontributin e tij të madh, historinë e tij dhe të shqiptarëve të Amerikës e trojeve tona etnike. Dalip Greca për vendin ku jetoi, punoi e shërbeu me profesionalizëm të lartë, ka ngjallur respekt të madh. “Vatra” është krenare dhe “Dielli” po ashtu për shërbimin, përkujdesjen dhe mirësinë që mori prej Dalip Grecës. Çdo herë do të ruaj të paharruara kujtimet dhe përshtypjet më të mira për Dalip Grecën, mikun, bashkëpunëtorin, njeriun që për 12 vjet i dha “Vatrës” dhe “Diellit” një dedikim dhe përkushtim të jashtëzakonshëm. Ai kishte pasion të madh dhe arriti që atë frymë e pasion ta përcillte kudo në “Vatër” e në “Diell” në komunitet e bashkësitë e tjera komunitare. Dalipi ishte një ekspert i lartë i mediave, ishte një profesionist i veçantë edhe në fushën e historisë, të letërsisë dhe albanologjisë. Mënyra sesi i ka trajtuar çështjet në mënyrë shterruese Dalip Greca e bëjnë atë një gazetar shumë të veçantë në diasporën e Amerikës. Me Dalip Grecën jam njohur që me ardhjen e tij në Amerikë e sidomos kur punonte te gazeta shqiptaro-amerikane Iliria. Pas ardhjes sime në krye të Vatrës lidhja jonë u forcua shumë dhe e them me bindje se kam pasur fatin ta njoh si profesionist dhe patriot. Dalipi ishte një gazetar dhe njeri shumë besnik, i përkushtuar, i ndershëm, i dashur dhe shumë kërkues. Dalipi kishte një aftësi specifike si njeri dhe si gazetar që t’u shkonte gjërave deri në fund. Kishte një vendosmëri të pa lëkundur që e gjen pak te gazetarët e sotëm. Ai ishte një gazetar rrace. Ai i realizonte të gjitha që i besonte. Kishte argument, stil të veçantë dhe angazhohej maksimalisht në realizimin e qëllimeve që i vinte vetes në sherbim të komunitetit e çështjes kombëtare, “Diellit”, “Vatrës” e komunitetit shqiptar në Amerikë e më gjërë. Dalip Greca nuk bënte kompromis asnjëherë dhe ngulmonte shumë për të bërë më të mirën e përbashkët kudo ku bëntë pjesë. Emri i Dalip Grecës do të jetojë përgjithmonë i lavdishëm në historinë e “Diellit” e të “Vatrës” si një patriot, profesionist, misionar i të vërtetës dhe dëshmitar i historisë së shqiptarëve të Amerikës e dishepull i përjetshëm i patriotizmës kombëtare shqiptare. Mirënjohje për përkushtimin e tij, i pa harruar.

“EDITORIAL”, NJË KRYEVEPËR E MENDIMIT KRITIK, KRIJUES DHE PUBLICISTIK TË DALIP GRECËS

May 1, 2023 by s p

Sokol PAJA/

Libri “Editorial” që vjen para lexuesit nga editori i ndjerë i gazetës “Dielli” Dalip Greca, përbën një vlerë dhe risi të madhe në dokumentimin e mendimit kritik, krijues dhe publicistik të z.Greca. Ky libër përmbledh në vetvete një kontribut shkencor dhe publicistik rreth historisë së “Vatrës”, të “Diellit”, vatranëve, të patriotëve shqiptarë e veprimtarëve në mërgatën shqiptare të Amerikës. Nëpërmjet librit “Editorial” publiku i gjërë njihet në detaje rreth veprimtarisë memuaristike dhe publicistike të Editorit të Diellit 2009 – 2021 Dalip Greca, fazave në të cilat ka kaluar “Dielli”, “Vatra”, komuniteti shqiptar përgjatë drejtimit të “Diellit” nga z.Greca.

Me profesionalizëm dhe mjeshtri Dalip Greca e drejtoi “Diellin” për 12 vite dhe la gjurmë të pashlyshme në historinë e “Diellit”, Federatës Vatra e komunitetit shqiptar në Shtetet e Bashkuara të Amerikës. Dalip Greca ishte një gazetar me profil të lartë, kishte të zhvilluar një aftësi specifike të gazetarisë dokumentare. Nëpërmjet librit “Editorial” vijnë të paraqitura dhe të skalitura editorialet më me peshë në historinë 12 vjeçare të z.Greca që kanë mbajtur gjallë gazetën “Dielli”. Bien në sy shkrimet patriotike për Kosovën,Çamërinë, shqiptarët në trojet etnike e mërgatën në Shtetet e Bashkuara të Amerikës.

Nëpërmjet eksperiencës së tij të gjatë në media, libri “Editorial” i Dalip Grecës është një libër shumë i arrirë mediatik, publicistik dhe historik. “Editorial” padyshim është një libër që do u vlejë Fakulteteve të Gazetarisë në Shqipëri e Kosovë, studiesve e kërkuesve shkencorë në fushën e medias, shkencave humane, albanologjike e studiuesve shqiptarë në Universitetet e Amerikës. “Editorial” do të jetë një libër që do të na tregojë shumë histori dhe rrëfenja që me stilin që i shkruan Dalip Greca dhe mënyrën sesi ia ka ofruar publikut, tregohet shpirti i madh i Dalip Grecës si patriot, vatran, dokumentues, ekspert i lartë i çështjeve të trajtuara, njohës i shumë fushave dhe mbi të gjitha amanetqar i “Diellit” dhe “Vatrës”.

Falenderim dhe mirënjohje Federatës “Vatra” për botimin e librit “Editorial” që ashtu si me librin “Editorët e “Diellit” në 110 vite histori” përmbush një amanet të Dalip Grecës pas vdekjes për nxjerrjen në pah të krijimtarisë dhe kontributit të tij të lartë në Federatën “Vatra” dhe në gazetën “Dielli”. Falenderim special studiuesve Idriz Lamajt e Dr. Paulin Markut, vajzës së Dalipit Elisabeta Greca të cilët gjatë gjithë kohës ndihmuan në përgatitjen me korrektësi dhe profesionalizëm të lartë të këtij botimi. Mirënjohje redaktores Luljeta Xhediku dhe Adnan Mehmetit që dhanë një ndihmesë të veçantë në këtë botim.

Libri “Editorial” i Dalip Grecës në tematikat e trajtuara dhe kontributin publicistik e historik e bëjnë një vepër të shkëlqyer në historinë e medias shqiptare dhe të mërgatës Shqiptare në Shtete e Bashkuara të Amerikës. Libri “Editorial” i Dalip Grecës për nga mënyra e trajtimit të çështjeve, mënyrës së hulumtimit të fenomeneve, fakteve, dokumentave, analizës së fakteve, trajtimit dhe shfletimit të dokumenteve, perspektivës dhe vendosmërisë për t’iu shkuar deri në fund çështjeve që ngre, e bëjnë një botim me vlerë historike të patjetërsueshme në publicistikën shqiptare.