Archives for June 2024

Ramazan Çeka/

Katër netë magjike në Aulonën e lashtë e Vlorën e re.

“Aulona Inter Folk Festival” shpalosi sërish këtë vit një spektakël madhështor në qytetin e Vlorës, aty ku flamujt ndërkombëtarë u valvitën duke rrezatuar ngjyrat dhe vlerat e artit dhe kulturës të kombeve përfaqësuese.

Ashtu si edhe në disa edicione të mëparshme, edhe këtë vit pata nderin që për katër ditë e netë me radhë të jem pjesë e kësaj feste të madhe.

Nga t’ia filloj më parë? Natyrisht nga organizatorët dhe qyteti mikpritës i Vlorës. Natyrisht nga Sejmen Gjokoli, drejtor i këtij festivali, si dhe nga banorët e mrekullueshëm të Vlorës që kishin hapur zemrat dhe dyert e tyre, për të mikpritur miqtë e ardhur nga anë e mbanë Botës.

“Aulona Inter Folk Festival”, ky emërtim, sa motivues, po aq edhe autentik, shpalosi siparin e edicionit të 16-të të tij në qytetin bregdetar, në qytetin e historisë, kulturës, trashëgimisë e turizmit, detit dhe malit, në Vlorën e bukur, perlë e vërtetë e Mesdheut, ku u zhvillua e u përmbyll me sukses manifestimi folklorik ndërkombëtar, tanimë tradicional, listuar në kalendarin botëror të CIOFF.

“Aulona Interfolk Festival” është një ngjarje e rëndësishme në kalendarin kulturor të Shqipërisë dhe një shembull i mirë për krijimin e një marke të fortë të turizmit kulturor shqiptar.

Dhe sërish gjithça lidhet me emrin e një njeriu, Sejmen Gjokoli, pasi largpamësia dhe konributi prej vizionari në sektorin e kulturës e ngre këtë festival në peshën e një institucioni të përkushtuar, duke ndikuar në rritjen e nivelit artistik të tij, në rritjen e numrit të artistëve dhe turistëve që e vizitojnë Vlorën dhe Shqipërinë.

Kështu sezonet verore në Vlorë, në këtë rrugëtim, nisin me të vërtetë bukur nga performancat e grupeve që me paraqitjen plot ritme e ngjyra përndritën qytetin, duke e gjallëruar me madhështinë e këtij spektakli, që solli këngë e valle, ngjyra e kostumografi të larmishme, i cili përveçëse traditë tashmë është kthyer edhe në atmosferë, entuziazëm e bukuri në qytet.

Për të 16-in vit me radhë, Qendra Kulturore “Aulona” në bashkëpunim me Bashkinë Vlorë dhe mbështetjen e Ministrisë së Kulturës dhe Sporteve, solli edhe këtë vit një eksperiencë të përkryer, si organizatore e këtij Festivali Ndërkombëtar Folku, duke e kthyer qytetin në një oaz të vërtetë kulturor e turistik në brigjet e Mesdheut.

Dita e parë nisi me nderimin që Festivali u bëri burrave të Kombit në Sheshin Historik të Flamurit me paradën e kostumeve me ngjyra të larmishme, në Bulevardin “Ismail Qemali”, me performancat në miediset e hapura të Qendrës Historke në Lungomare e kudo në rrugë e trotuare, duke e mbushur qytetin me ritme vallesh, që i dhanë Vlorës një atmosferë festive, si dhe duke i shtuar edhe më shumë bukurinë dhe magjinë që natyra i ka dhënë me shumë dashuri, pasi folku mbart dhe sjell kudo që shkon bukurinë e artit bio, artistët e mjeshtrat e papërsërtshëm popullorë me talentin, energjinë, emocionet dhe vlerat e mëdha.

Në të gjitha ditët e festivalit, grupet dhe ansamblet që erdhën nga vende të ndryshme të Europës, të mbështetur edha nga donatorë të tjerë, performuan në sheshet, trotuaret dhe qendrat kryesore të qytetit, si dhe në mjediset historike e turistike të Vlorës, duke shpalosur vlerat më të mira të trashëgimisë shpirtërore.

Në edicionin e këtij viti ishin pjesëmarrës grupe dhe ansamble nga Shqipëria, Kosova, Maqedonia e Veriut, Rumania, Hungaria, Italia, Greqia dhe Ukraina, duke e kthyer qytetin bregdetar të Vlorës në epiqendër të folkut europjan, si shkëmbim vlerash kulturore, pse jo edhe një event e promocion i rëndësishëm publicitar për turizmin e këtij qyteti.

Në natën e parë, sipas traditës së festivalit, u prezantuan në skenë Flamujt Kombëtarë, grupet dhe ansamblet pjesëmarrëse në këtë edicion.

Festivali startoi me performancen e grupit të valltarëve të vegjël, të Qendrës Kulturore të qytetit të Vlorës, të cilët me zërat e tyre të gëzuar si lulet e freskëta të pranverës, e hapën këtë festë, për t’i treguar të gjithëve se kjo pasuri e madhe e popullit tonë nuk do të shuhet kurrë, por do të trashëgohet brez pas brezi.

SHQIPËRIA, Ansambli “Hazis Ndreu”, Dibër, që mbart me vehte jehonën e 9 maleve të Dibrës, me udhëheqës dhe koreograf të tij Avni Ndreun, “Mjeshtër i Madh”. Në gjirin e këtij ansmbli nuk kishte si të mungonte bilbili i këngës dibrane Liri Rasha, “Mjeshtre e madhe”.

GRUPI POLIFONIK I LAZARATIT, një nga grupet polifonike më në zë në pjesën Jugore të Shqipërisë, erdhi në këtë festival me një përgatitje e paraqitje virtuoze, pasi në krahasim me shumë grupe të tjera të Jugut, ku lëvrohet polifonia, grupi i Lazaratit është nga më karakteristikët dhe të dallueshmit për stilin, melodinë dhe interpretimin skenik.

DIASPORA, Grupi i Valleve “Jeta”, Selanik – Greqi, është krijuar në vitin 2017 nga një grup vajzash dhe grashë shqiptare dhe ka në repertorin e vet valle koreografike nga të gjitha krahinat e vendit, nën drejtimin e koreografes Margarita Evangjelou.

Si pjesëmarrëse në këtë festival, këngëtarja IRINI QIRJAKO “Mjeshtre e Madhe”, një nga këngëtaret më të shquara të këngës popullore shqiptare, si gjithmonë ndezi atmosferën me performancen e saj të jashtëzakonshme.

Ajo njihet me kohë në skenat shqiptare edhe si soliste e shquar e Ansamblit Kombëtar të Këngëve dhe Valleve Popullore, Tiranë.

FOLK GRUP “BILBILI”, VLORË, është krijuar në vitin 1994 me qendër në qytetin e Vlorës, me drejtor z. Sejmen Gjokoli, njëkohësisht themelues dhe drejtues i këtij festivali.

Edhe në këtë edicion, ky grup virtuoz solli një performancë të shkëlqyer, duke u dalluar mes grupeve pjesëmarrëse të folkut shiptar.

Ky grup tashmë ka një biografi të shkëlqyer historiko-kulturore të pasuruar ndër vite me një pjesëmarrje shumë të madhe, në aktivitete e festivale të ndryshme kombëtare e ndërkombëtare, siç janë pjesëmarrja në tre Festivale Folklorike Kombëtare të Gjirokastrës dhe në shumë aktivitete ndërkombëtare si në Itali, Greqi, Turqi, Bullgari, Poloni, Kroaci, Lituani etj.

Ky grup është gjithashtu pjesëmarrës në dy festivale botërore folklori: Hollandë 1996 dhe Rusi 2021.

Më poshtë po radhisim edhe grupet pjesëmarrëse të ardhura për të marrë pjesë në këtë aktivitet.

HUNGARIA, Ansambli i Valleve “Nógrad Tancegyuttes” i themeluar në vitin 1975, në Salgótarján të qarkut Nograd.

ITALIA, Grupi Folklorik “Città di Palagianello”, i cili është themeluar në vitin 1982 në Komunën e Palagianellos, në provincën e Tarantos, në Pulia, Itali.

KOSOVA, SHKA “Anamorava”, komuna Viti, e cila është krijuar në vitin 2011, dhe me aktivitetin e zhvilluar gjatë kësaj periudhe ka dëshmuar se është ansambl i vlerave të pastërta kulturore, ku me paraqitjet e bëra në festivalet kombëtare dhe ndërkomtare, ka patur vazhdimisht suksese dhe vlerësime të shumta.

Interpretimi i shkëlqyer i këngëtarit virtuoz Fahrush Azemi, ndezi skenën e festivalit, duke kënduar një këngë të cilën e ka kënduar së pari i madhi Agim Tomorri dhe me zërin e tij të bukur, Fahrushi e solli shumë orgjinale këtë këngë të rrallë shqiptare, e cila u duartrokit me shumë ovacione nga spektatorët e pranishëm.

“Anamorava” është shembull i sukseseve jo vetëm për Komunën e Vitisë, por për të gjithë rajonin e Ana Moravës dhe Karadakut.

MAQEDONIA E VERIUT, Ansambli “Vapcarov”–Delçevë, i cili është në juridiksion të Qendrës së Kulturës “Nikola Jonkov Vapcarov” të qytetit dhe i ka fillimet në shtator të vitit 2009.

RUMANIA, Ansambli Folklorik “Romanasul”, i cili është krijuar në vitin 1974 nga një grup studentësh të Institutit Politeknik të Cluj-Napoca. Në përbërje të asamblesë janë studentët dhe pedagogët e Universitetit Teknik.

UKRAINA, Ansambli “Gorytsvit”, Lviv, cili është një ansambël universitar në qytetin e Lvivit dhe është nga ansamblet më të njohura e më të mira të Ukrainës.

Ky ansmbël ka një aktivitet të jashtëzakonshëm përmes një pjesëmarrjeje shumë të madhe në të gjitha vendet e Botës. Ai është vlerësuar me shumë çmime e laurime, si dhe është mbajtës i “Gjerdanit të artë” të Dizhonit në vitin 2001.

Ky grup erdhi me një përbërje të re, me një grup rinor, pasi ata më të rriturit kishin angazhime të tjera në llogoret e mbrojtjes së Atdheut.

Ky ansambël popullor ukrainas, solli në këtë festival mesazhin e paqes mes popujve dhe po këtë mesazh e përcollën të gjithë grupet pjesëmarrës në mbështetje të një populli që lufton për liri.

Ansambli “Gorytsvit” në edicionin e kaluar ishte fitues i Kupës së këtij Festivali.

“Aulona Inter Folk Festival” tregoi edhe një herë se instalimi i një aktiviteti të tillë me karakter kulturor e turistik, ka qenë një ide e duhur dhe e nevojshme jo vetëm për qytetin bregdetar të Vlorës, por edhe për hapësirën kulturore mbarë shqiptare.

Kjo është patjetër një arritje që realizoi të gjithë pritshmëritë dhe standartet që ky festival ka prej fillimit. Është një festival që ka startuar qysh në vitin 2009 dhe ky edicion ka ardhur me risi, duke u shtrirë edhe më shumë në pjesën komunitare në qytet, që padiskutim është një sipërmarrje e madhe organizative e z. Sejmen Gjokoli, drejtuesi i këtij organizimi gjigand, duke i dhënë sigurinë dhe besimin e suksesit, i cili është më se i merituar.

Vetëm për efekt të këtij aktiviteti, qytetin e Vlorës dhe rrethinat kanë pasur rastin ta vizitojnë rreth 125 ansamble folklorike me mbi 4400 pjesëmarrës nga 36 vende të Ballkanit, Evropës dhe Azisë.

Nisur nga natyra dhe përmasat e Festivalit, ai mbetet krejt i veçantë, mbasi për të 16-in vit radhazi, jo vetëm për qytetin e Vlorës, por edhe për trojet shqiptare, mbahet një aktivitet kaq i rëndësishëm i folklorit në nivel evropian dhe botëror.

Prapa skenës gjigande, para Stadiumit “Flamurtari”, binin në sy “ethet e bukura” të organizimit, angazhimi i stafit të palodhur të “Aulona Inter Folk Festival”, si dhe përkushtimi i regjisorit të qindra veprimtarive artistke z. Llesh Nikolla “Mjeshtër i Madh”, me një eksperiencë të suksesshme në RTSH.

Ishin mijëra qytetarë dhe turistë, ata të cilët u bashkuan dhe shijuan spektaklin e dhuruar, si dhe traditën e sjellë me vete nga të gjitha ansamblet e pranishme.

Në fjalën e tij z. Sejmen Gjokoli deklaroi se këtë herë ka qenë e jashtëzakonshme pjesëmarrja e publikut dhe e turistëve, të cilët i janë bashkuar valleve, duke u bërë si pa dashtë edhe pjesë në këtë spektakël.

Një grup turistësh nga Amerika dhe një grup turistësh nga Anglia, kanë qenë ata që janë bashkuar, duke krijuar grupin e tyre në mënyrë provizore e të shpejtë, sigurisht duke performuar aq sa kanë mundur traditën e tyre.

Është një festival, i cili argëton dhe i ndryshon në një farë mënyre energjinë qytetit të Vlorës, duke qenë absolutisht krenarë për të gjitha fjalët dhe vlerësimet që turistët dhe folkloristët, që këtë herë ishin rreth 300 folklorist, kishin në përshtypjet që ata do të regjistronin në përvojën e tyre.

Është mirë kur organizime e aktivitete të tilla shërbejnë jo vetëm në aspektin artistik kulturor me informacione të ndryshme, por edhe si një promovim i turizmit, si një mirëseardhje për gjithë turistët e huaj.

Sigurisht që mbështetja e donatorëvë meriton një falenderim të veçantë: “Dhoma e Tregtisë Vlorë”, “Vlora beton 2013”, “Regina Grup”, Resorti “Gjurma”, Hotel “Kral”, “Polifonia”, “Beler”, “Hako”, “Reha”, “Birra Stela” dhe “Uji Vlora”, si dhe një falenderim për paraqitjen: Studio “Sai”; “Enea Elektronik” dhe “Pixel Studio”.

Për organizimin e këtij festivali ka punuar një staf me specialistë të artit e kulturës, të trashëgimisë shpirtërore e pasionantë të ruajtjes dhe transmentimin e vlerave të trashëgimisë tonë kulturore.

Kupa e Festivalit në edicionin e 16-të u fitua nga Ansambli “Romanasul”, Rumani dhe për ta dorëzuar këtë kupë, në skenë u ngjit zv. Ministrja e Turizmit Vilma Bello.

Unë e ndoqa për katër ditë e netë me radhë këtë festë madhështore në qytetin e bukur të Vlorës, jo vetëm si mik i festivalit, por dhe si gazetar që me pasion përpiqet të pasqyrojë vlerat etnokulturore të folklorit të trashëguar, që ruhet me kaq dashuri nga brezi në brez.

Unë isha në këtë festival jo vetëm me penën time, por edhe me kamerën e Televizionit “Kultura Shqiptare” ACTV në Amerikë.

Nuk është hera e parë që unë kam nderin të kem në krah dhe kamerat e Televizionit të shquar Publik Shqiptar, që natyrisht është edhe shkollë për të gjitha mediat që emetojnë në hapsirën mediatike shqiptare.

Ndjekja e këtij aktiviteti nuk ishte e lehtë për mua, pasi kërkoja që të mos më kalonte asnjë detaj. Në këtë ngarkesë arrita të marrë opinionet edhe nga moderatorja e mrekullueshme Afërdita Krasniqi, regjisorit të shquar të Radio Televizionit Shqiptar z. Llesh Nikolla, drejtorit të këtij festivali z. Sejmen Gjokoli, si dhe drejtuesit të Ansamblit të Rumanisë, i cili fitoi kupën e Festivalit.

Këtu qëndron dhe vlera më e madhe e këtij festivali, i cili ka si kryefjalë “Mjeshtrin e Madh” Sejmen Gjokoli, një njeri i aposionuar, njeri i përkushtuar, njeri me fantazi dhe një nga realizuesit më të mirë të gjithë festivaleve.

Prezenca ime me telereportazh, me angazhim, është modeste karshi punës që bën stafi drejtues i Sejmen Gjokolit.

Madhështia dhe suksesi i këtij festivali kishte injektuar në gjithë qytetin e Vlorës magjinë e pavdekshme të krijimtarisë popullore dhe spektatorët e të gjitha moshave. Vendas, vizitorë apo turistë të huaj e ndoqën dhe shijuan me ëndje këtë event kulturor, historik dhe tradicional, që çdo vit gjallëron perlën e bregdetit shqiptar, Vlorën e Flamurit.