dgreca – Page 1431 – Dielli

Prof. Dr. NAIL DRAGA-KONTRIBUT STUDIMIT TË HAPËSIRËS ETNOGJEOGRAFIKE SHQIPTARE

May 8, 2018 by dgreca

Shkruajne: Prof. asoc. Dr. Florim Isufi & Prof. asoc. Dr. Shpejtim Bulliqi*/

Libri ETNIA DHE HAPËSIRA, i prof. dr. Nail Dragës, ka për objekt studimi, gjeo-hapësirën shqiptare dhe analizat etno-gjeografike dhe shoqëroro-politike të zhvillimit etnik dhe territorial të shqiptarëve nëpër etapa historike në Siujdhesën e Ilirisë (siç e quan autori), pra në Gadishullin Ballkanik e më theks të veçantë për trungun e tij me Malin e Zi. Libri ETNIA DHE HAPËSIRA, është material i shkruar në 208 faqe i pasuruar me harta, tabela dhe fotografi.

Në këtë libër autori me kompetencë të lartë shkencore shtjellon zhvillimet etno-gjeografike nga Konferenca e Berlinit 1878 e deri me tani, duke shfaqur në pah të gjitha mundimet dhe sakrificat e popullit shqiptar për ruajtjen e identitetit kombëtarë dhe shtrirjes territoriale.

Që në fillim autori bën një analizë detale të ndryshimeve demografike në pjesët veriperëndimore të territoreve të banuara me shqiptarë para dhe pas Kongresit të Berlinit. Këtu autori zbulon se si territoret e shteteve fqinjë rriteshin në dëm të territoreve shqiptare dhe se si prej padrejtësive të mëdha dëmtohej hapësira e jonë si nga aspekti territorial ashtu edhe ai demografikë. Në këtë kohë filluan shpërnguljet e mëdha si një nga elementet parësor të ndryshimeve demografike dhe luftimet për pushtime të reja në dëm të territorit dhe popullsisë shqiptare. E gjithë kjo sipas autorit ishte me bekimin dhe sipas planeve shtetërore për ndryshime etnike në viset shqiptare.

Më pastaj autori analizon të dhënat e S. Gopçeviqit mbi luftën për Tivarin. Këtu autori thekson se këto të dhëna janë autentike dhe objektive pasi që S. Gopçeviqi është dëshmitar okular i ngjarjeve të asaj kohe dhe se shkrimet e tij paraqesin objektivitet.

Në kumtesën çështja e Ulqinit dhe gjeopolitika e fuqive të mëdha (1880) autori analizon në tërësi mënyrën e shkëputjes së Ulqinit nga Perandoria Osmane. Këtu autori tregon se kërcënimet dhe shantazhet e Fuqive të Mëdha edhe në atë kohë kanë pasur sukses. Autori duke analizuar në thellësi këtë problematikë shkruan se si Fuqitë e Mëdha i’u kanë kërcënuar Perandorisë Osmane se po që se nuk e dorëzon Ulqinin do të sulmojnë qytetin e Izmirit. Ky kërcenim pati sukses sepse për Perandorinë Osmane shumë më mirë ishte të sakrifikonte Ulqinin sesa të hynte në luftë të drejtpërdrejt për qytetet në thellësi të territorit të saj me forcat perëndimore.

Ajo që këtë libër e bënë të nevojshëm për lexim jo vetëm nga profesionistet por edhe nga masa e gjerë është, analiza që i bënë autori periudhës së shpalljes së pavarësisë së Shqipërisë dhe pozitës së shqiptareve në Mal të Zi. Pas Kongresit të Berlinit vjen periudha e formimit të shteteve kombëtare dhe harta e re gjeopolitike e Ballkanit. Këtu autori thekson se tokat shqiptare u dëmtuan shumë dhe u ndanë në shumë pjesë. Ky dëmtim nuk ishte vetëm në aspektin territorial por është në aspektin demografik duke e sjellë shtetin shqiptarë dhe popullsinë e saj si një nga faktorë me ndikim tepër të vogël politik dhe strategjik në këto hapësira.

Më pas autori analizon shtrirjen territoriale të vendbanimeve dhe popullsisë shqiptare në Mal të Zi. Ai këtë analizë e bënë në aspektin gjeografik dhe demografik duke shfaqur shifra të lëvizjes në kohë. Nga të dhënat e prezantuar nga autori konstatohet se numri i shqiptarëve pas Luftës së Dytë Botërore rritet vazhdimisht si në vlera absolute ashtu edhe në vlera relative. Popullsia shqiptare në Mal të Zi rritet nga 19.425 banorë në vitin 1948 në 47.682 në vitin 2003, apo në vlera relative nga 5.15% në vitin 1948 në 7.09% në vitin 2003.

Autori gjithashtu në këtë libër bënë analizën hartografike dhe demografike të Shasit si vendbanim shqiptar. Autori me kompetencë të plotë propozon mundësinë e valorizimit turistik duke u bazuar në atraktivitetet natyrore dhe shoqërore të tija. Ajo që autori thekson në këtë libër është edhe shpopullimi i viseve malore të banuara me shqiptarë. Ky shpopullim vjen si pasoj e kushteve të rënda për jetesë në këto zona dhe mungesa e infrastrukturës përcjellëse. Popullsia e këtyre zonave kryesisht ka emigruar në botën e jashtme e gjithashtu edhe në viset urbane.

Krejt në fund autori i librit analizon dhe studion regjistrimin e fundit të popullsisë në Malin e Zi, me theks në mjedisin në zonat e banuara me shqiptarë në Malin e Zi si dhe indikatorët e zhvillimit në zonat e vijës kufitare Mali i Zi – Shqipëri. Nga e gjithë kjo autori konstaton se lëvizjet demografike sipas regjistrimit të popullsisë të vitit 2003 paraqesin një mjedis heterogjen për nga aspekti kombëtar me diversitete etnike. Sipas autorit çështjet mjedisore duhet të jenë prioritet veçanërisht në brezin Ulqin-Shkodër si zona të banuara me shqiptar dhe hapësira me zhvillim të lartë të turizmit. Nga kjo autori konstaton se edhe infrastruktura dhe investimet në ate, duhet të jenë të rregullta dhe të mirëfillta.

Nga e gjithë kjo autori konstaton së këtu kemi të bëjmë më një zonë të veçantë gjeografike e cila meriton një qasje profesionale nga strukturat qeveritare. E gjithë kjo sipas librit të autorit do të ndikonte në sqarimin e ecurisë së lëvizjes së popullatave dhe socio-politike të popullsisë shqiptare në Mal të Zi, e gjithashtu do të ndikonte edhe në kontributin e shqiptarëve në stabilitetin rajonal dhe integrimet në organizatat evropiane dhe botërore.

Bazuar në atë çka ka shtjelluar autori në këtë libër mund të konstatohet se ia ka arritur qëllimit dhe së vepra e tij përbën një thesar të çmuar për zonat e banuara me shqiptarë në Mal të Zi.

*Nail Draga, ETNIA DHE HAPËSIRA, Botoi:Art Club, Ulqin, 2017

Kosova, Partneritet me Iowa-SHBA-të

May 8, 2018 by dgreca

-Kryeministri Ramush Haradinaj: Partneriteti që Kosova ka me shtetin e Iowa-s është partneritet me SHBA-të/

-Komandanti I Gardës Kombëtare të Iowa-s, Gjeneral Major Timothy Orr Nuk kemi gjetur partneritet më të mirë sesa Kosovën dhe popullin e saj/Prishtinë, 8 maj 2018-Gazeta DIELLI/Marrëdhëniet bilaterale dhe miqësia e mirë që Kosova ka me shtetin e Iowa-s, janë marrëdhënie me Shtetet e Bashkuara të Amerikës. Ky ishte vlerësimi i Kryeministrit të Republikës së Kosovës, Ramush Haradinaj, në takim me Komandantin e Gardës Kombëtare të Iowa-s, Gjeneral Major Timothy Orr.

Gjatë takimit me Gjeneralin Orr, kryeministri Haradinaj e njoftoi për të arriturat dhe prioritet e Qeverisë së Kosovës, veçmas në fuqizimin dhe avancimin profesional të Forcës së Sigurisë së Kosovës, për çka Kosova ka nevojë për ndihmën dhe asistencën e ShBA-ve.

“Jemi të përkushtuar që marrëdhëniet tona bilaterale të fuqizohen në fusha të interesit të përbashkët dhe përvoja juaj do të na ndihmojë në avancimin e sektorëve të ndryshëm, veçmas në fushën e sigurisë, arsimit, shëndetësisë, në kulturë”, tha kryeministri Haradinaj, duke falënderuar Gjeneralin Orr për rolin dhe kontributin e tij në forcimin e marrëdhënieve bilaterale ndërmjet Kosovës dhe shtetit të Iowa-s, veçmas për mbështetjen e vazhdueshme të FSK-së.

“Ne kemi nevojë për storie suksesi, duke çuar përpara bashkëpunimin shumëvjeçar me shtetin e Iowa-s. Tani me ardhjen e delegacionit prej 60 anëtarësh nga ky vend nga institucione dhe profile të ndryshme, ne po e profilizojmë këtë bashkëpunim, duke i dhënë theks të veçantë fushës së arsimit dhe fushës ekonomike, krahas prezencës ushtarake”, tha Kryeministri Haradinaj, duke kërkuar nga Gjenerali Orr vazhdimin e mbështetjes ushtarake në aksione të përbashkëta me FSK-në.

Ndërkaq, Gjenerali Orr tha se sa herë është për vizitë në Kosovë ndjehet mirë, duke e vlerësuar progresin e Kosovës në këtë dekadë të parë të pavarësisë së saj.
Ai gjithashtu falënderoi Kryeministrin për pritjen e delegacionit nga Iowa dhe për gatishmërinë e bashkëpunimit në fusha të ndryshme.

Në takim ishte edhe Colleen Hyland, zëvendës shefe e Misionit të SHBA-ve në Kosovë.Pas takimit me kryeministrin Haradinaj, në një adresim para kabinetit qeveritar, Gjenerali Orr tha se partneriteti Kosovë-Iowa është më i miri që ka Iowa dhe SHBA-të, dhe kjo falë popullit të Kosovës. “Nuk kemi gjetur partneritet më të mirë sesa Kosovën dhe popullin e saj”, tha gjeneral majori Timothy Orr.Duke folur për raportet e mira ndërmjet dy vendeve, Orr tha se janë në pritje të nënshkrimit të dy marrëveshjeve me qytetet simotra./b.j/

Kur Greqia ta shtrëngon lakun në fyt

May 8, 2018 by dgreca

Nga Arben Llalla/

Greqia po kërkon të luajë rolin e xhelatit të Ballkanit duke ju vendosur haraç vendeve të varfra që kanë mbetur jashtë anëtarësimit në NATO dhe BE. Ministri i jashtëm i Greqisë Nikos Kotzias para dy ditësh deklaroi se pasi të ndërrohet Kushtetuta e Maqedonisë, identiteti, heqja e përmendoreve mitologjike, e kështu me radhë, do të organizojë party.

Kurse në lidhje me kushtet që i ka vënë Shqipërisë për votën greke për në BE, Kotzias ka deklaruar se po vendosim rregull në Shqipërinë e kaosit.

Deri tani Greqia e ka detyruar qeverinë e Shqipërisë të nxitojë hapat për ndërtimin e varrezave të ushtarëve grekë, dhënien e shtetësisë shqiptare për ish-oficerin e zbulim-kundërzbulimit Anastas Janullatosit, sot me detyrë kryepeshkop i Shqipërisë, eliminimin nga skena politike të partisë PDIU-së, zgjerimin e zonave të njohura si ekskluzive për pakicën greke, zgjidhjen e pikave të kufirit tokësor dhe detar, heqjen e termit “çam” dhe “Çamëria” nga librat shkollorë të historisë e gjeografisë.

Megjithëse qeveria “Rama 2” pothuajse i ka plotësuar kërkesat e Nikos Kotzias, Greqia ende nuk është e gatshme të heqë Ligjin e Luftës me Shqipërinë, apo të japë votën pozitive për çeljen e bisedimeve për anëtarësimin e Shqipërisë në BE.

Kushtet e reja që Greqia do t’i vendosë Shqipërisë për në BE në të ardhmen do jenë edhe më ekstreme. Nëpër sallonet e ministrisë së jashtme të Greqisë po flitet për një projekt-kushtëzimi ndaj Shqipërisë për të njohur Autonominë e Veriut të Epirit, faza e parë për këtë njohje do jetë zgjerimi i zonave të pastërta, ku jeton pakica greke me Korçën dhe Himarën. Më tej, kërkesa vazhdon për tetë vende të sigurta në Kuvendin e Shqipërisë për pakicën greke, dy vende për pakicën bullgare dhe nga një vend për pakicat e tjera, serbe, malazeze, vllehe, egjiptiane dhe rome. Këto do kërkohen në bazë të të Drejtave të Njeriut.

Por, në fillim Greqia do t’i kërkojë Shqipërisë ndryshimin e Kushtetutës, ku ulëse të sigurta në Kuvend t’u garantohen pakicave përjetësisht. Atëherë Shqipëria do të njihet si vend multietnik.

Plani i Greqisë për zgjedhjet e 2019 është fitimi i Bashkisë së Konispolit për të krijuar më tej Asociacionin/Bashkësinë e bashkive që udhëhiqen nga pakica greke si Konispoli, Finiqi, Dropulli, Himara, Saranda.

Përpjekja e Greqisë do jetë frontale dhe e ashpër për të caktuar kandidatë me kombësi greke me logon e partive shqiptare PS, PD dhe LSI për të fituar bashkitë në fjalë edhe më tej këta kryetarë bashkie do shkëputen nga partitë tradicionale shqiptare dhe do themelojnë Asociacionin/Bashkësinë e bashkive greke.

Ashtu siç thotë edhe një fjalë e urtë popullore “Oreksi vjen duke ngrënë” dhe Greqisë oreksi po i shtohet, pasi i kemi plotësuar kërkesat e saj ekstremiste për cungimin e tokës sonë.

Grupimet ekstremiste greke në bashkëpunim me institucionet shtetërore të Greqisë janë duke punuar që ëndërra për Megali Idea dhe Aneksimi i Jugut të Shqipërisë të realizohet me kushtëzimin e votës së Greqisë dhe Qipros për anëtarësimin e Shqipërisë në BE. Deri atëherë duhet të vendosen njerëzit e tyre në drejtimin e disa institucioneve shtetërore të Shqipërisë, të zgjidhet njeriu i tyre nazisti D.Z. në krye të OMONIA-s në qershor 2018, themelimin e një partie të re ekstremiste të pakicës greke pas dështimit të PBDNJ dhe MEGA.

‘Po fillon një kapitull i ri midis Kosovës dhe Iowas’

May 8, 2018 by dgreca

Pas fjalës së kryetarit të Kuvendit, Kadri Veseli, ka vazhduar takimi i delegacionit nga Iowa e SHBA-së me anëtarë të komisioneve të Kuvendit.

Një nga drejtuesit e delegacionit amerikan, Zach Nunn, përfaqësues në Komitetin për Marrëdhënieve Ndërkombëtare nga Iowa State Capital, tha se po fillon një kapitull i ri midis Kosovës dhe Iowa. Ai shtoi se qytetarët e Iowas në fushën e sigurisë kanë ndihmuar Kosovën në zgjidhjen e problemeve të saj. Nunn shprehu dëshirën që bashkëpunimi mes Iowa dhe Kosovës të jetë i përhershëm.

“Është mirë të shoh se sa keni përparuar. Ne dëshirojmë të jemi partner i juaji dhe pjesë e kapitullit tuaj të ri, jo vetëm për 10 vjetët e ardhshëm, por për tërë jetën. Kosova ka bërë partneritet me ne, kemi edhe konsullatën tuaj atje. Kjo ka vendosur marrëdhënie edhe më të forta”, theksoi Nunn.

Timothy Orr, Gjeneral i Gardës Kombëtare të Iowas, tha se Kosova ka qenë pjesë e bashkëpunimit me Iowan edhe më përpara se të fillojë partneriteti në mars të vitit 2011. Ai shprehu kënaqësinë që ka pasur rastin të jetë në Kosovë që nga paslufta.Ai tha se për shtatë vite të partneritetit dhe bashkëpunimit me FSK-në, është ecur shumë përpara. Partneritetin me Kosovën, Orr e konsideroi më të mirin nga 77 partneritete sa ka Iowa në gjithë botën.“Zemra ime do t’i takojë çdo herë Kosovës. Kjo është shtëpia ime e dytë”, theksoi gjenerali Orr.Në vazhdim të takimit, të cilin e drejtoi kryetari i Kuvendit, Kadri Veseli, fjalën e mori kryetari i Komisionit për Administratë Publike, Qeverisje Lokale dhe Media, Nait Hasani, i cili evokoi kujtime nga koha e luftës, përkatësisht masakra e Dubravës e vitit 1999.Ai tha se tani po bëhen përpjekje për të ndërtuar dhe zhvilluar vendin, ndërsa mbështetja amerikane dhe veçanërisht e Iowas, sipas tij, është shumë e rëndësishme.

Hasani tha se nëse në luftë qëllimi ishte liria, tani synim kryesor i gjithë spektrit politik është zhvillimi i mëtejmë i shtetit dhe integrimi në strukturat euro-atlantike.Deputeti Dukagjin Gorani, u tha mysafirëve amerikanë se kjo është shtëpia e tyre e dytë, ndërsa Kosova po përpiqet që të bëhet model i së ardhmes. Gorani tha se është e vështirë të artikulohet mirënjohja për SHBA-të.Ai tha se ajo çfarë Kosova ka mësuar nga SHBA është se kërkesa dhe nevoja për liri është tejet e çmueshme.“Është kënaqësi t’ju shohim në Prishtinë, duke parë që kemi miq nga jashtë që mendojnë për ne”, theksoi Dukagjin Gorani. Të pranishmëve me një fjalë rasti iu adresua edhe deputeti Ismet Beqiri, i cili theksoi përkushtimin për vazhdimin e ndërtimit të marrëdhënieve miqësore me SHBA-të.Ai tha se historia e lidhjeve me Amerikën e bën bashkë gjithë spektrin politik të Kosovës. Beqiri kujtoi maksimën e ish-presidentit Rugova se “Kosova do të ketë miqësi të përjetshme me Shtetet e Bashkuara të Amerikës”.Deputeti Milaim Zeka falënderoi në mënyrë të veçantë pilotët e NATO-s, duke i quajtur heronj t gjallë, të cilët më 1999 bombarduan sistemin e Milosheviqit. Ai tha se SHBA-ja dhe perëndimi kanë ruajtur substancën biologjike të popullit të Kosovës.Zeka shtoi populli ynë është i vogël por i ka dhënë Amerikës dhe botës emra të mëdhenj.Kryetari i Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi, Ismajl Kurteshi, theksoi se Kosova është një shtet i cili mbështet fuqishëm SHBA-në.Në vazhdim ai foli për sistemin e arsimit në Kosovë, duke theksuar nevojën e rritjes së kualitetit në këtë sektor, e cila, sipas tij, do të ndikonte edhe në uljen e papunësisë. Në takim folën edhe pjesëtarë të tjerë të delegacionit nga Iowa, të cilët shprehën kënaqësinë e tyre për arritjet e Kosovës në shumë fusha, ndërsa konfirmuan vazhdimin e mbështetjes së vendit të tyre për Kosovën edhe në të ardhmen.

Kosovë-Nisin Ditët e Mësimit të Bashkimit Evropian

May 8, 2018 by dgreca

-Festohet Dita e Evropës 9 Maji/

-Dita e Evropës 9 Maji është festë zyrtare, përcakton Ligji për festat zyrtare në Republikën e Kosovës i miratuar në Kuvend në 21 maj 2008/

PRISHTINË, 8 Maj 2018-Gazeta DIELLI-B.Jashari/ Ditët e Mësimit të Bashkimit Evropian në Kosovë fillojnë sot me një orë mësimi në Gjimnazin “Sami Frashëri” në Prishtinë. Shefja e Zyrës së BE-së/Përfaqësuesja e Posaçme e BE-së, Nataliya Apostolova, hap serinë e Ditëve të Mësimit për BE-në me një ligjëratë së bashku me ministrin e Arsimit, Shkencës dhe Teknologjisë, Shyqiri Bytyqi.

Zyra e BE-së/PSBE në Kosovë në bashkëpunim me Ministrinë e Arsimit, Shkencës dhe Teknologjisë së Kosovës si dhe drejtoritë komunale të arsimit, po organizojnë një sërë bisedash me nxënës të shkollave fillore dhe të mesme të Kosovës. Për një muaj me radhë, ambasadorët e shteteve anëtare të BE-së do të mbajnë “orë mësimi” në shkolla të ndryshme në gjithë Kosovën. Projekti është mbajtur me sukses çdo vit që prej vitit 2009 dhe është mundësi për nxënësit e shkollave të Kosovës që të takojnë diplomatë të BE-së dhe përfaqësues nga institucionet e BE-së, si dhe që të mësojnë për BE-në dhe mundësitë dhe sfidat e procesit të integrimit evropian. Prezantimet nga ambasadorët do të përfshijnë përvoja nga vendet e tyre përkatëse, për sa i përket procesit të integrimit evropian, derisa edhe shpjegojnë para nxënësve se çfarë do të thotë perspektiva evropiane për Kosovën.

Duke marrë parasysh që këtë vit, Ditët e Mësimit për BE-në qëllojnë në muajin e Fushatës së Zyrës së BE-së për Arsim Cilësor, ambasadorët e BE-së do të përqendrohen posaçërisht tek rëndësia e shkollimit të mirë për zhvillimin personal, por edhe për zhvillimin socio-ekonomik të vendeve përkatëse, si dhe se çfarë do të thotë përparim i Kosovës në rrugën e saj evropiane.

Në Kosovë kanë nisur dje një sërë aktivitetesh treditëshe edukative dhe kulturore për shënimin e Ditës së Evropës – 9 Majit.

Aktivitetet nisën në mesditë në Mitrovicë me Lançimin e fushatës për arsimin cilësor në Kampusin e Kolegjit të Biznesit Ndërkombëtar (IBCM) në jug të qytetit dhe me hapjen e lokaleve të reja të Zyrës Informative dhe Kulturore e Bashkimit Evropian (EUICC) në veri, ku zhvillohet edhe ceremonia e dhënies së çmimit për posterin më të mirë për arsimin cilësor. Ceremonia e dhënies së çmimit për posterin më të mirë për arsimin cilësor është zhvilluar edhe në ambientet e EUICC në Prishtinë.

Në 8 maj pasdite Konferenca për mbrojtjen e trashëgimisë kulturore në Kosovë mbahet në Parkun Arkeologjik të Ulpianës, organizuar nga Aleanca Franceze (në bashkëpunim me ambasadën franceze). Në mbrëmje, në Amfiteatrin e Bibliotekës së Universitetit të Prishtinës,një Koncert i posaçëm me piano mbahet nga Ramë Lahaj, tenor, i cili paradite mban një konferencë shtypi në ambientet e EUICC.Në Ditën e Evropës, 9 Maj, në mesditë hapet Panairi i arsimit me shtetet anëtare të Bashkimit Evropian, në EUICC në Prishtinë.Aktivitetet, që vijojnë edhe pasdite, përmbyllen në mbrëmje me Prezantimin e çmimit Evropiani i Vitit gjatë pritjes për Ditën e Evropës, në një nga hotelet e kryeqytetit të Kosovës. Dita e Evropës 9 Maji është festë zyrtare, përcakton Ligji për festat zyrtare në Republikën e Kosovës i miratuar në Kuvend në 21 maj 2008.Dekretimi, nga Presidenti i Republikës, i këtij ligji si dhe i 40 ligjeve tjera të dala nga paketa e Propozimit Gjithpërfshirës për Zgjidhjen e Statusit të Kosovës të Kryenegociatorit Martti Ahtisaari – Emisarit Special të OKB-së, ishte një nga zhvillimet e ditës së 15 qershorit 2008 të hyrjes në fuqi të Kushtetutës së Kosovës, e cila është miratuar nga Kuvendi para 10 vitesh në 9 prill, më pak se dy maj pas shpalljes së pavarësisë në 17 shkurtin historik 2008.

DITA KUR DO T’I BASHKOHEMI FAMILJES EVROPIANE, NUK ËSHTË E LARGËT

“Të rinjtë e Kosovës duhet të dinë që ne do t’i takojmë familjes së madhe evropiane, familjes qindra milionëshe. Tërë popujt që kanë bindje, perspektiva, vlera, ne do të jemi pjesë e tyre. Dhe kjo ditë nuk është e largët, këtë duhet ta dini. Koha po shkon shpejt, dhe besojmë se këtë vit do ta marrim lajmin e drejtë dhe të merituar për liberalizimin e vizave, por nuk duhet të shkoj në pakufi edhe pozicioni i Kosovës për t’u bërë anëtarë i BE-së, sepse këtë e meritojmë dhe është e drejtë e jona”, kështu tha Kryeministri i Republikës së Kosovës, Ramush Haradinaj në bashkëbisedimin me të rinjtë, me temën “Ardhmëri-Zhvillim-Perspektivë”, “Çka nënkupton integrimi evropian për të rinjtë e Kosovës”, që u organizua nga Ministria e Integrimit Evropian në shënim të ditës së Evropës.

Me këtë rast, kryeministri Haradinaj tha se Evropa është pak skeptike në zgjerim, pra nuk është aq entuziaste në zgjerim, por këtë skepticizëm nuk e ka të lidhur me Kosovën, por për shkak të proceseve të veta të brendshme.

“Njëkohësisht, Kosovën nuk e ka njohur Serbia dhe pesë vendet e BE-së dhe për këtë arsye për Brukselin është më i vështirë partneriteti me Kosovën. Megjithatë, edhe pse ka pasur një lodhje vitin që shkoi në marrëdhëniet Kosovë-BE, mendoj se e kemi rikthyer dinamikën Kosovë-BE , dhe raporti i fundit i progresit për vendin është konfirmim se Kosova është në hartë, është pjesë e vendeve të Ballkanit dhe rinia e Kosovës nuk janë të pabarabartë. Në fakt jemi më të vonuar, por jo të pabarabartë, dhe ne tash jemi në një etapë kur dikur kanë qenë vendet tjera, Shqipëria, Mali i Zi apo Maqedonia”, tha kryeministri Haradinaj.

Duke folur për proceset avancuese të Kosovës që nga shpallja e pavarësisë, kryeministri Haradinaj tha se kur sot flasim për liberalizimin e vizave, nesër do të flasim për statusin kandidat, për hapjen e negociatave me Kosovën, e më vonë edhe për kapitujt veç e veç, dhe theksoi se gjithë kjo është ligë që Kosova duhet të kualifikohet, për të vazhduar garën mes popujve, ekonomive, e vendeve, edhe atëherë kur jemi anëtarë të BE-së.

Po ashtu, kryeministri Haradinaj u tha të rinjve, se edhe pas marrjes së liberalizimit të vizave, nuk duhet të gabojmë me veprime të cilat do të mund të ndikonin tek BE-ja, në ndaljen e vizave, pra duhet të jemi shumë të kujdesshëm në udhëtime dhe veprimet tona.

Ministrja e Integrimit Evropian, Dhurata Hoxha tha se e ardhmja jonë është në BE, por e ardhmja jonë nënkupton se duhet të bëjmë shumë punë që Kosovën të bëjmë vend ku të gjithë të kemi të ardhme të ndritur dhe secili nga ne e ka këtë rol.Në këtë debat nga një fjalë para të rinjve, e kanë mbajtur edhe kryetari i Kuvendit Kadri Veseli dhe shefja e Zyrës së BE-së/përfaqësuese speciale e BE-së në Kosovë, Nataliya Apostolova.Në këtë debat kryeministri u përgjigj në shumë pyetje që u adresuan nga të rinjtë për proceset e rëndësishme nëpër të cilat po kalon vendi, me theks të veçantë proceset integruese euro-atlantike.Debati u organizua nga Ministria e Integrimit Evropian në kuadër të 9 Majit, Ditës së Evropës.