dgreca – Page 1728 – Dielli

Lumturimi i Nënës Tereze, ditë historike për shqiptarët

October 19, 2017 by dgreca

-Presidenti historik i Kosovës. Dr. Ibrahim Rugova, para 14 viteve, 19 tetorin 2003 të lumturimit të Nënës Terezes, në Vatikan, nga Papa Gjon Pali i dytë, e vlerësonte ditë historike për shqiptarët dhe botën/

NeneTereza-Ibrahim Rugova -Presidenti Amerikan Bill Clinton në qershor 2002: “Nëna Terezë ishte e para që më bëri ta dua kombin shqiptar. Dhe tani ndihem shumë krenar që plotësova një detyrë morale ndaj saj dhe ndaj vlerave të lirisë”/

SPECIALE-Gazeta DIELLI nga korrespondenti në Kosovë Behlul JASHARI/

1 grupi Zefit PRISHTINË, 19 Tetor 2017/ Para 14 vitesh, më 19 tetor 2003, Presidenti historik i Kosovës, Dr. Ibrahim Rugova, në Vatikan, mori pjesë në ceremonitë e lumturimit të Nënës Tereze, misionares shqiptare Gonxhe Bojaxhiu me origjinë nga Kosova, lindur në Shkup. Para më se gjysmë milioni njerëzve, në sheshin Shën Pjetri në Vatikan, Papa Gjon Pali i dytë ka lumturuar Nënë Terezën.Presidenti historik Rugova, pas kthimit nga pjesëmarrja në ceremonitë e lumturimit të Nënës Tereze, e vlerësoi këtë akt si ditë historike për Kosovën dhe popullin shqiptar.”Po kthehem nga Roma, ku ishim në ditën e beatifikimit të Nënës Tereze, që është një ditë e madhe për Kosovën, për popullin shqiptar.Mund të themi se është një ditë historike dhe një ditë e madhe për gjithë botën, sepse ajo është Nënë shqiptare dhe poashtu Nënë e gjithë botës”, theksoi Presidenti Rugova në një deklaratë para mediave në Aeroportin e Prishtinës, në 22 tetor 2003.Gjithashtu Presidentti Rugova shprehu kënaqësinë që në ceremoninë e lumturimit të Nënës Tereze morën pjesë me mijëra shqiptarë nga Kosova, viset shqiptare dhe nga bota.

L Gjergji marjani Me këtë rast, Presidenti Rugova falenderonte Papa Gjon Pali II për lumturimin e Nënës Tereze dhe organizimin e ceremonisë madhështore që hapi rrugën për shenjtërimin e Nënës Tereze.Në 17 tetor 2003, para ceremonisë së lumturimit, Vatikani publikoi një biografi të Nënës Tereze. Teksti fillonte pikërisht me një deklarim të Nënë Tërezes në vitin 1995, ku ajo theksonte prejardhjen dhe besimin e saj me këto fjalë: “Me gjak jam shqiptare, me shtetësi jam indiane dhe me zemër i përkas Jezu Krishtit”.

RRUGËS PËR NË SHTETET E BASHKUARA TË AMERIKËS PRESIDENTI RUGOVA TAKON NËNË TEREZËN – 7 DHJETOR 1995/

Rrugës për në Shtetet e Bashkuara të Amerikës, Presidenti historik i Kosovës, Dr. Ibrahim Rugova, ka takuar të Lumen Nënë Tereza, nobelisten – nënën tipike shqiptare, që është edhe e gjithë botës, siç është shprehur ai.Ishte viti 1995, kur në 7 dhjetor Presidenti i Republikës së Kosovës, Ibrahim Rugova, takohet me Nobelisten Shqiptare Nënë Terezen. “Do të lutem për popullin e Kosovës”, tha Nëna Tereze gjatë këtij takimi me Presidentin Rugova. Takimi u zhvillua në Aeroportin e Romës, gjatë rrugës së Presidenti Rugova për në Uashington.

RUGOVA: NËNA TEREZË MË KA FRYMËZUAR SHUMË GJATË KËSAJ KOHE PREJ QË MERREM ME PUNË EDHE TË SHTETIT TË KOSOVËS

“Unë e kam takuar vetëm një herë Nënën Tereze në Aeroportin e Romës, rastësisht, por veprën e saj e njoh shumë, shumë mirë…Ato pak çaste që kemi kaluar, kur iu prezantova si President i Kosovës i rodhën lotët, ishte në vitin 1995…dhe dëshiroi sukses dhe punë dhe e ndinte në zemër popullin e Kosovës dhe popullin shqiptar që e ka dëshmuar edhe me vepër”, ka treguar Presidenti Rugova.

Ai ka vlerësuar se, Nëna Terezë është sublimim shekullor i kulturës e traditës shqiptare, nënës shqiptare dhe se shenjtërimi i saj është një përjetësim i filozofisë së saj, merr një formë institucionale dhe kanonike.

“Mbas Skenderbeut që ka fut popullin shqiptar në historinë moderne të Evropës e të perëndimit e të botës, Nëna Tereze e ka inkuadrur popullin shqiptar sot në universin, në botën globale të sotme që ne identifikohemi me të dhe ajo identifikohet me ne, por është edhe e gjithë njerëzimit dhe ky është ndër kontributet më të madha të Nënës Terezë, që i ka bërë kombit shqiptar, Kosovës, popullit të saj… Shenjtërimi i saj është një akt i madh për popullin tonë dhe një përjetësim i popullit tonë në historinë modene dhe në kohërat që vijnë”, është shprehur Presidenti Rugova.

Në punën e Shtetit, ka thënë Presidenti i Kosovës Rugova, unë gjithmonë jam frymëzuar nga vepra e madhe e dashurisë së ushtruar ndaj të afërmit nga Nënë Tereza dhe pandërprerë e kam pasur shembull e ideal timin.

“Mua më ka frymëzuar shumë gjatë kësaj kohe prej që merrem me punë edhe të Shtetit të Kosovës që e kemi formuar Shtetin modern të Kosovës, pra po bëhen rreth 15 vite, dhe Nënën Terezë e kam pasur si një shembull të dashurisë, të paqes, të mirëkuptimit mes njerëzve, të shërbimit për popullin e vet, për kombin e vet, ka qenë edhe një ideal, një prehje”, ka theksuar Presidenti historik i Kosovës, Dr. Ibrahim Rugova.

Ai ka përkujtuar edhe se, në Kosovë që nga viti 1990 ka funksionuarr shoqata “Nëna Terezë” e cila ka luajtur rolin e një ministrie sociale, ministrie të shëndetësisë…

2 KORRIK 2002: PRESIDENTI RUGOVA NË SHESHIN QENDROR TË PRISHTINËS PËRURON SHTATOREN E NOBELISTES SHQIPTARE NËNË TEREZA

Në 2 Korrik 2002, ditën e 12 vjetorit të Deklaratës Kushtetuese për Pavarësi, Presidenti i Kosovës dhe përjetëshëm i Pavarësisë së saj, Dr.Ibrahim Rugova, në Sheshin qendror të Prishtinës, para mijëra qytetarëve, ka zbuluar Shtatoren e Nobelistes Shqiptare Nënë Tereza. Ishin të pranishëm personalitete të jetës publike, politike e ushtarake të Kosovës dhe të komunës së Prishtinës.Para pjesëmarrësve në solemnitet, Presidenti Rugova tha se sot është ditë e madhe për Prishtinën dhe për Kosovën. “Është ditë e madhe, sepse sot po bëjmë zbulimin e shtatores së Nënës Tereze, Nënës sonë të dashur.Këtë shtatore të çmuar po e zbulojmë në Rrugën kryesore të Kryeqytetit, që para sa vjetesh e emëruam me emrin e Nënës Tereze, që e pranoi Prishtina dhe e gjithë Kosova”, tha Presidenti Rugova.

Ai vijoi se, “kjo ditë bëhet më e madhe me zbulimin e shtatores së Nënës Tereze, simbolit të dashurisë njerëzore, të kujdesit për njeriun, për jetën dhe për të mirën. Pra, e kemi simbolin e Nënës shqiptare, Nënës Tereze, që do ta ndiçojnë zemrën e Prishtinës dhe të Kosovës së lirë, ashtu siç e ka dashur ajo”.

“Prej sot, shtatorja e Nënës Tereze, do të jetë pranë Monumentit të Gjergj Kastriotit-Skënderbeut. Prej sot, fëmijët tanë dhe brezat e ardhshëm do të rriten me shtatoren madhështore të Nënës sonë të Madhe”, tha Presidenti i Kosovës, Rugova.

“Ne ndiehemi krenarë që jemi popull i Skënderbeut, që jemi popull i Nënës Tereze, Nënës sonë të shenjtë”, theksoi ai.Dr. Rugova tha se kjo shtatore e Nënës Tereze është dhuratë e Lekë Gojçajt, veprimtarit dhe atdhetarit të njohur në SHBA, i cili për shumë vjet punoi për Kosovën dhe popullin shqiptar.

“Të njejtën shtatore zoti Gojçaj e ka dhuruar dhe vendosur pranë Kishës Katolike Shqiptare në Nju Jork. Tash Prishtinën dhe Nju Jorkun i lidh më shumë Nëna Tereze”, theksoi Presidenti i Kosovës, Dr. Rugova.Presidenti Rugova me këtë rast shprehu mirënjohje të thellë për këtë dhuratë bërë Prishtinës dhe Kosovës, duke madhëruar festën e 2 Korrikut- Ditën e Pavarësisë së Kosovës.Presidenti Rugova uroi qytetarët e Prishtinës dhe të Kosovës për Shtatoren e Nënës Tereze dhe përmbylli fjalën e tij me lutje-urime bekimi:
– Zoti e bekoftë Nënën Tereze, siç e ka bekuar.
-Zoti e bekoftë familjen Gojçaj dhe shqiptarët e Amerikës.

-Zoti i bekoftë SHBA-të.

-Zoti e bekoftë Kosovën.

NË 26 GUSHT 2005 RUGOVA VURI GURTHEMELIN E KATEDRALES NËNË TEREZA NË PRISHTINË

Gurthemeli i Katedrales në Prishtinë është vënë në 26 gusht 2005 për nder të 95 vjetorit të lindjes së Nënës Terezë nga ana e Presidentit historik Ibrahim Rugova, Ipeshkvit të Ipeshkvisë së Kosovës Imzot Mark Sopi dhe Kardinalit të Uashingtonit Teodor Mekkerik.

“Sot është një ditë e madhe për kryeqytetin dhe për gjithë Kosovën, sepse po e bekojmë gurin e themelit të një tempulli të shenjtë, që i kushtohet Nënës së dashur shqiptaro-kosovare dhe Nënës së Njerëzimit – të lumturës Nëna Tereze – asaj që lartësoi nderin e Kosovës dhe të shqiptarëve në gjithë planetin duke i afirmuar vlerat tona dhe duke ndihmuar gjithë njerëzimin”, shprehej gjatë ceremonisë Presidenti Rugova.

“Papa Gjon Pali i Dytë e ka përkrahur personalisht ndërtimin e kësaj katedraleje”, theksonte Presidenti Rugova.

Presidenca e Kosovës tradicionalisht ndanë dekoratën Medalja Humanitare Nëna Terezë, që u jepet personave që kontribuojnë në çështjet humanitare.

Katedralja në Prishtinë nisi të ndërtohej ndërkohë që ishte festuar 6 vjetori i Kosovës së lirë nga qershori 1999. Në 2005-tën shënohej dhe 600 vjetori i lindjes së kryeheroit kombëtar shqiptar Gjergj Kastrioti-Skënderbeu.

4 SHTATOR 2016, FESTË PËR SHQIPTAREN NËNË TEREZA E SHPALLUR SHENJËTORE NGA PAPA FRANÇESKU NË VATIKAN

Në 4 shtator 2016, në Kosovë ishte atmosferë feste për shqiptaren Nënë Tereza e shpallur atë ditë shenjëtore nga Papa Françesku në Vatikan, në meshën e shenjtërimit që u ndoq nëpër familje e kudo në transmetimet televizive.Papa Françeskut në Meshën e Shenjtërimit të Nënë Terezës, në Vatikan, i kanë shërber edhe diakonët e Kosovës, Don Daniell Markprekaj dhe Don Meriton Dedaj.“Ky privilegj i bukur i dy diakonëve të Ipeshkvisë sonë është një shenjë e kujdesit që Selia e Shenjtë tregon për popullin e Nënë Terezës në festën e madhe të 4 shtatorit”, theksonin në Ipeshkvinë e Kosovës.

Nëna Terezë u bë edhe urë lidhëse në mes të shqiptarëve dhe botës.
Ish-Presidenti Amerikan Bill Clinton në qershor të vitit 2002 ka thënë: “Nëna Terezë ishte e para që më bëri ta dua kombin shqiptar. Dhe tani ndihem shumë krenar që plotësova një detyrë morale ndaj saj dhe ndaj vlerave të lirisë”.

Në 10 dhjetor 1979 Nana Terezë, pasi kishte pranuar Çmimin Nobël për Paqe në Oslo, siç ka shënuar në atë kohë gazeta tradicionale e Kosovës Rilindja, ka deklaruar: “Përsa i përket prejardhjes, unë jam shqiptare, indiane përkah nënshtetësia, motër murgeshë katolike, përkah thirrja, që i përkas tërë botës…”Në ceremoninë zyrtare të shenjtërimit të Nënës Terezë, në Selinë e Shenjtë, në Vatikan, morën pjesë edhe krerët e shtetit të Kosovës.

5 SHTATOR 2017-VATRANËT NGA SHBA NË FESTËN E MADHE SHQIPTARE – SHUGUROHET SHENJTËROREJA SHËN NËNË TEREZA NË PRISHTINË

Në 5 Shtator 2017, shumë solemne dhe madhështore ishte festa, mesha e shugurimit të Katedraljes-Shenjtërores Shën Nënë Tereza në Prishtinë nga i Dërguari i Posaçëm i Papa Françeskut, Kardinali shqiptar Ernest Simoni – Troshani, e me pjesëmarrje edhe vatranësh nga SHBA, të cilët edhe u vlerësuan e falënderuan për kontributet, madje ishte edhe pjesë e celebrimit Marjan Cubi, anëtar i Kryesise së Vatres, njëherësh arkëtar si dhe kryetar i Komisionit për mbledhjen fondeve për ndërtimin e Katedrales, i cili ka ardhë në Kosovë bashkë me bashkëshorten Dila.

Shugurimi i Katedralës Nënë Tereza u bë në 5 shtator 2017, në ditën që është e 1 vjetorit të shenjtërimit e të 20 vjetorit të kalimit në amshim të shenjëtëreshes shqiptare.

Brenda Katedralës në meshën solemne nga vatranët e SHBA ishte edhe Zef Balaj, anëtar i Kryesisë së Federatës Pan-Shqiptare të Amerikës Vatra, që ka ardhë në Kosovë bashkë me bashkëshorten Lina, anëtari i Këshillit të Vatrës, Lek Përlleshi, me bashkëshorten Vera, anëtari i Komisionit për mbledhjen fondeve për ndërtimin e Katedrales, Fran Marku, si dhe Nue Balaj, nip i Zefit, Tomë Paloka që do e botojë së shpejti librin “Shqiptarët më të mirë në Amerikë që i njoha unë”….

Shqiptarët nga SHBA – Këshilli i Fondacionit për ndërtimin e Katedralës Nënë Tereza në Prishtinë, që vepron në Nju Jork dhe rrethinë, kanë kontribuar për mëse 9 vite me 2 milionë dollarë, që janë mbledhur dhe janë dorëzuar.

Ipeshkvi i Ipeshkvisë së Kosovës, Imzot Dodë Gjergji në fjalën përshëndetëse në hapje të “Ditëve të Nënë Terezës”, në 26 gusht, vlerësoi lart të gjitha kontributet. “Dua me këtë rast të falënderoj të gjithë donatorët, që na kanë ndihmuar për ndërtimin e kësaj Kishe, ata që janë sot prezentë e ata që do të jenë në 5 shtator”, është shprehur Ipeshkvi Gjergji.

Në mbrëmjen e 4 shtatorit 2017, pas meshës Lutja e Mbrëmësores me Lutjet e Nënë Terezës në Kishën e Shën Ndout në kryeqytet, Ipeshkvia e Kosovës ftoi edhe në darkën e falënderimit për donatorët e ndërtimit të Katedrales Nënë Tereza në Prishtinë.

Prizren-50 vjetori i Qendrës Rajonale për Trashëgimi Kulturore

October 19, 2017 by dgreca

-Në ceremoni u bë edhe promovimi i katër botimeve të Qendrës Rajonale për Trashëgimi Kulturore në Prizren/-Pasuria arkeologjike e rajonit të Prizrenit, asetet e shumta të trashëgimisë kulturore, dhe asaj shpirtërore, janë një thesar i çmuar/

PRIZREN, 19 Tetor 2017-Gazeta DIELLI-Behlul Jashari/ Në Prizren, qytetin më të madhin jugor të Kosovës afër kufirit me Shqipërinë, në mbrëmjen e djeshme u organizua ceremonia e shënimit të 50 vjetorit të themelimit të Qendrës Rajonale për Trashëgimi Kulturore (ish Institutit për Mbrojtje të Monumenteve).

Në këtë ceremoni u bë edhe promovimi i katër botimeve të Qendrës Rajonale për Trashëgimi Kulturore në Prizren: “Zejet dhe Artizanatet e Prizrenit në Kompleksin Monumental të Lidhjes Shqiptare të Prizrenit” të autores Shpresë Siqeca, “Gurët Mbivarrorë në Kompleksin e Teqesë Sinani në Prizren” të Media Fishekqiut, “Katalog me Eksponate nga Rajoni i Prizrenit” dhe “Katalog Araste Vice-Versa”.

Mes pjesëmarrësve në ceremoninë në Hamamin e Gazi Mehmet Pashës në Prizren ishte edhe ministri kosovar i Kulturës, Rinisë dhe Sportit, Kujtim Gashi, i cili mbajti fjalim përshëndetës.Ai u shpreh se është një kënaqësi e dyfishtë që po merr pjesë në shënimin e 50 vjetorit të themelimit të Qendrës Rajonale për Trashëgimi Kulturore, në Prizren, apo siç është emërtuar në fillet e themelimit tij si Instituti për Mbrojtjen e Monumenteve në Prizren.“E para për faktin se po e shënojmë 50 vjetorin e themelimit të këtij institucioni të veçantë, ku për pesë dekada jeni angazhuar në ruajtjen, mbrojtjen dhe promovimin e trashëgimisë tonë të çmuar kulturore. E dyta, se nga ky ambient rikonfirmoj faktin se qyteti Prizrenit përveç se është bërë qendër universitare, nga viti ardhshëm do jetë edhe qendra apo selia e Ministrisë së Kulturës Rinisë dhe Sportit”, tha ministri Gashi.Ai foli për rëndësinë dhe kontributin që ka dhënë QRTK-ja në Prizren e cila ka bërë të mundur që vlerat e shumta e të pakontestueshme të kulturës materiale të krijuara pa ndërprerë, në këtë areal gjeografik të ruhen e të promovohen.“Pasuria arkeologjike e rajonit të Prizrenit, asetet e shumta të trashëgimisë kulturore, dhe asaj shpirtërore, janë një thesar i çmuar, për të cilin ashtu siç mundi t’i ruajë toka me shekuj, duhet të mbetet obligim i yni që institucionalisht të përkujdesemi për to”, tha ministri, duke e shprehur edhe mirënjohjen për stafin e vyeshëm dhe profesional të QRTK-së por edhe për të gjithë ata, që për dekada, me përkushtim dhanë kontribut të madh në këtë fushë.“Njërin ndër personalitetet të cilin nuk mund të mos e përkujtojmë sot, është Muhamed Shukriu i cili tërë jetën ia kushtoi trashëgimisë kulturore. Andaj në përputhje me mandatin tim si Ministër me kënaqësi do i ndaj mirënjohjen për ‘Post Mortem’ për kontributin e dhënë në fushën e trashëgimisë kulturore këtij personalitetit të çmuar të vendit tonë”, theksoi për fund ministri Kujtim Gashi, duke i ndarë këtë çmim familjarëve të Shukriut.Ministri u zotua se do të punojë për një përkrahje edhe më të madhe, për t’u mundësuar institucioneve të trashëgimisë kulturore ta avancojnë këtë fushë.Prezantimin e historikut të Qendrës Rajonale për Trashëgimi Kulturore në Prizren¸ që nga themelimi në vitin 1967, të sukseseve dhe proceseve nëpër të cilat ka kaluar ky institucion, e bëri Jusuf Xhibo, ushtrues i detyrës së drejtorit, ndërsa kishte edhe një koktej përcjellur me muzikë klasike.

KONKURS- Promovim imazhit të Kosovës

October 19, 2017 by dgreca

Mnistria e Puneve te Jashtme-Promovim imazhit të Kosovës/

-Konkurs për përzgjedhjen e Fotografive dhe Shkrimeve më të mira për promovimin e Kosovës për vitin 2017/

Foto Gazeta DIELLI-Behlul JASHARI: Sheshi Medlin Olbrajt në kryeqytetin e Kosovës – Prishtinë, te Newborn, afër selisë së Ministrisë së Punëve të Jashtme/

PRISHTINË, 18 Tetor 2017-Gazeta DIELLI-B.Jashari/ Ministria e Punëve të Jashtme e Republikës së Kosovës dërgoi sot këtë njoftim:Me iniciativën e Zëvendës-Kryeministrit të Parë dhe Ministrit të Punëve të Jashtme, Behgjet Pacolli, Ministria e Punëve të Jashtme i bën thirrje publike të gjithë fotografëve dhe gazetarëve profesionistë, ekspertëve të këtyre fushave si dhe të gjithë qytetarëve të zakonshëm, që të marrin pjesë në garën për përzgjedhjen e fotografive dhe shkrimeve më të mira për Vitin 2017, që kanë për qëllim promovimin e imazhit të Kosovës. Konkursi, fokusohet në kategoritë që përfshinë, por, nuk kufizohen vetëm në çështjet si më poshtë: Trashëgimi kulturore dhe fetare; (Shkrime dhe fotografi që ndërlidhen me promovimin e objekteve kulturore dhe fetare);

1. Atraksionet turistike natyrore (Shkrime dhe Fotografi mbi bukuritë natyrore të Kosovës);

2. Muzikë (Fotografi dhe shkrime në kontekst të cilës përshkruhen yjet brenda dhe jashtë Kosovës dhe që kanë dhënë kontribut në ngritjen e imazhit të Kosovës);

3. Sport (Fotografi dhe shkrime që përshkruajnë ngritjen dhe zhvillimin e sportit vendor si dhe të yjeve të sportit në nivel kombëtarë dhe ndërkombëtarë, që kanë dhënë kontribut në ngritjen e imazhit të Kosovës);

4. Film (Shkrime dhe fotografi, që ndërlidhen me zhvillimin e kinematografisë kosovare, si dhe sukseset e filmit dhe yjeve të filmit kosovar si në aspektin kombëtarë ashtu edhe atë ndërkombëtarë);

5. Histori (Fotografi dhe shkrime nëpërmjet të cilave tregohen vlerat historike të Kosovës dhe personalitete kombëtare, që kanë kontribuar në historinë e Kosovës);

6. Ekonomi (Fotografi dhe shkrime që përfshinë zhvillimin dhe ngritjen e ekonomisë së Kosovës, sektorët më atraktiv për bërje të biznesit si dhe bizneseve të suksesshme vendore dhe atyre ndërkombëtare, që kanë investuar në Kosovë);

7. Kuzhina Tradicionale; (Fotografi dhe shkrime mbi kuzhinën tradicionale);

8. Veshjet tradicionale (Fotografi dhe shkrime nëpërmjet të cilave tregohet historia e veshjeve tradicionale).Aplikuesit në këtë garë përfshijnë edhe shtetasit e huaj që jetojnë në Kosovë, por, pa dyshim edhe të gjithë shtetasit e Republikës së Kosovës që jetojnë jashtë vendit. Të gjithë pjesëmarrësit duhet të aplikojnë me fotografitë dhe shkrimet e tyre autoriale.

Aplikuesit, fotografitë dhe shkrimet e tyre për pjesëmarrje në këtë garë duhet t’i dërgojnë në adresën elektronike zyrtare të Divizionit për Komunikim Publik të Ministrisë së Punëve të Jashtme: dkp.mpj@rks-gov.net apo edhe nëpërmjet formës fizike në adresën si më poshtë:

Divizioni për Komunikim Publik/Njësia Wikipedia dhe Wikimedia

Ndërtesa e Ministrisë së Punëve të Jashtme, Rr. Luan Haradinaj,
10000 Prishtinë, Republika e Kosovës

Fotografitë e dorëzuara nga aplikantët duhet të përmbajnë një mesazh të shkurtër në lidhje me vendin ku është bërë ajo, datën si dhe autorin, duke përfshirë edhe kontaktet e tij/saj. Fotografitë nuk duhet të jenë të publikuara më parë në rrjetet sociale dhe internet. Shkrimet, të cilat kanë qenë të publikuara më parë, duhet të përmbajnë emrin e medias, datën dhe numrin e faqes së publikimit, emrin si dhe kontaktet e autorit. Fotot dhe shkrimet më të mira do të përzgjidhen nga një Komision/Juri Profesionale, e cila do të bëjë përzgjedhjen e tre çmimeve të para si dhe 20 fotografive dhe shkrimeve të tjera më të mira për vitin 2017. Shkrimi dhe fotografia, e cila do të vlerësohet nga Komisioni/Juria për vendin e parë do të shpërblehen me 1000 Euro, ato në vendin e dytë me nga 800 Euro, ndërsa ato në të tretin me nga 500 Euro.

20 shkrimet dhe fotografitë të tjera të përzgjedhura nga Komisioni/Juria Profesionale do të shpërblehen me nga 100 Euro.Autorët e shkrimeve dhe fotografive do të ruajnë të drejtën tyre autoriale, por, me pjesëmarrjen në këtë garë, i japin të drejtën Ministrisë së Punëve të Jashtme për publikim dhe përdorim që ka për qëllim promovimin e Republikës së Kosovës, por, jo edhe atë për qëllim përfitimi komercial. Fotografitë dhe shkrimet përzgjedhura do të publikohen edhe në Wikipedia dhe kompani gjigante të teknologjisë dhe kërkimit dhe do të përdoren edhe për organizimin e ekspozitave fizike në Ambasadat e Republikave të Kosovës, ekspozitave online në ueb-faqe të tyre si dhe në hollet e Institucioneve më të rëndësishme ndërkombëtare, ku Kosova merr pjesë.

Konkursi do të mbetet i hapur nga sot, datë 18 Tetor, 2017 deri më datën 31 Tetor, 2017 në orën 16:00. Ministria e Punëve të Jashtme inkurajon të gjithë aplikuesit potencial për një aplikim sa më të madh në këtë garë mbarëkombëtare, qëllimi kryesor i së cilës është promovimi i një imazhi sa më të mirë për vendin tonë.

Me respekt,

Ministria e Punëve të Jashtme

Mirënjohje që do përcillet në breza

October 19, 2017 by dgreca

Nga Thanas Hoda/ Çikago/Ne që erdhëm nga Shqipëria në Amerikë, pas vitit 1990, vërtetë gëzonim, se erdhëm në vendin e lirisë dhe demokracisë, ku mund të ndërtonim një jetë më të mirë veçanërisht për fëmijët tanë por njëkohësisht ishim të ngarkuar edhe me plot strese e shqetësime shkaktuar nga vështirësitë jo të vogla të fillimit. Erdhëm në një vend, që nuk e njihnim, me mënyra te reja pune e jetese. Shumica nga ne nuk njihnin gjuhën angleze, nuk kishin profesionin e duhur për bizneset amerikane, ishim me dokumente e pa dokumente, thjesht me një vizë turistike, por me mendimin e vullnetin për qëndrim të përhershëm. Për më tepër ishim të lodhur nga hallet e përditëshme të jetës në vendin tonë.

Të stresuar para vështirësive, në muajt e parë në jo pak raste na ka humbur besimi dhe ka lindur mendimi për t’u rikthyer nga kishim ardhur.Por fati na buzëqeshi. Këtu në Çikago, jetonin shqiptarë, të ardhur që para lufte të cilët kishin hapur biznese të fuqishme, që ruanin gjuhën shqipe dhe zakonet tona të bukura. Këta shqiptarë hapën zemrat, dyert e shtëpive duke ofruar mikpritjen dhe inkurajimin dhe mbi të gjitha krijuan mundësitë e punësimit në vetë bizneset e tyre.

Veçanërisht në vitet e para të emigrimit pas 90-tës, emri i biznesmenit të shquar në Çikago, George Samatas, (Jorgji Shamata), u bë shpejt i njohur për mikpritjen e ndihmën e pakursyer të emigrantëve të rinj, jo vetëm me lidhje të afërta e të largëta familjare, por thjesht për faktin se ata ishin shqiptarë.Rrugën e emigracionit, nga fshati malor Sinicë, në Devollin e Sipërm të Korçës ai e mori që në moshë të re. Fillimisht qëndroi në Kanada. Më vonë në vitin 1946 u vendos në Çikago plot ëndrra dhe vrull rinor.

Ishte vetëm 29 vjeç , kur në vitin 1949 hapi restorantin me emrin e fshatit të lindjes Sinicë që më pas u shoqërua me veprimtari të tjera biznesi.

U martua me një vajzë shqiptare, Antigoni Pano, nga fshati Qytezë po nga Devolli i Sipërm.

Zonja Antigoni Shamata është një grua e nderuar në mbarë komunitetin shqiptar në Çikago për sjelljen e ngrohtë e mikpritjen që tregon ndaj të gjithve. Ajo i qëndroi pranë bashkëshortit të vet në rrugën e gjatë deri sa ai u nda nga jeta më 20 Nëntor të vitit 2004 në moshën 84 vjeçare. Sot znj. Antigoni, 88 vjeç nuk rresht së treguari për burrin e vet shëmbullor duke shprehur në veçanti dashurinë e përherëshme të tij për vendlindjen e shqiptarët.

Vitet 80-të do të ishin vite të një një suksesi të jashtëzakonshëm në fushën e biznesit të z.Xhorxh Shamata, duke e bërë atë në një nga biznesmenët më të nderuar dhe më të shquar në Çikago.

Biznesi i tij shtrihet në fushën e kujdesit dhe shërbimit shëndetësor ndaj të moshuarve. Pa hyrë në hollësi po përmendim se biznesi familjar që ndërtoi z. Xhorxh Shamata përfshin 12 godina të natyrës së kujdesit shëndetësor por edhe të të jetuarit në mënyrë të pavarur, me apartamente banimi dhe mjedise të shumta për jetesë e veprimtari të larmishme, si restorante, pishina, biblioteka, ambiente sportive, për veprimtari argëtuese e deri sallone bukurie etj.

Në biznesin e tij janë punësuar mbi 3 mijë punonjës mes të cilëve qindra shqiptarë emigrantë të pas viteve 90-të, duke u ndihmuar të aftësohen në profesione te ndryshme.Ai i njihte me emër shqiptarët, ndiqte përparimin e tyre në punë dhe në jetë, i inkurajonte dhe i nxiste të ecnin përpara. Veçanërisht të rinjtë i këshillonte dhe ndihmonte që të vazhdonin shkollat e larta duke realizuar ëndrrat dhe ambicjet e tyre.

Shqiptarët i janë shume mirënjohës këtij njeriu me zemër të madhe, që kurrë nuk u mërzit, nuk u lodh e nuk përtoi asnjëherë të ndihmonte këdo që kishte nevojë dhe lutej për një vend pune.

Që nga fillimet e viteve 90-të kanë kaluar mbi 20 e ca vjet dhe gjërat kanë ndryshuar për mirë. Shqiptarët emigrantë kanë shtëpitë e tyre, shumë prej të cilëve edhe biznese të suksesëshme, fëmijët kanë mbaruar shkollat e larta dhe punojnë në vende ku kërkohet kualifikim e profesionalizëm. Sot vetë ata janë në gjëndje të bëhen përkrahës të emigrantëve të rinj si dikur ai burri energjik, fjalë urtë e zemërartë Xhorxh Shamata, kujtimi dhe mirënjohja për të cilin do të përcillen në breza.Figura e Xhorxh Shamatës merr shkëlqim jo vetëm si biznesmen i fuqishëm, me intuitë e larpamës, por edhe si një njeri patriot që ka dhënë shumë për komunitetin në Amerikë dhe ka kryer mjaft bamirësi në vendlindje. Ai është ndër kontribuesit kryesorë për ngritjen e Kishës Othodokse Shqiptare Shën Nikolla në Çikago me një histori mbi 70-të vjeçare. Pas 90-tës financoi për restaurimin e kishës së Shën Nikollës në Sinicë. Po këtu në Sinicë dha kontribut financiar për ngritjen nga themelet të Kishës së Shën Thanasit që ishte rënuar në vitin 1967 . Vëmendjen e drejtoi edhe në qytetin e Korçës. Dhuroi një shumë të konsiderueshme për ndërtimin e ikonostasit të Kishës Shën Ilia në Korçë ku në shënjë respekti është vendosur mbishkrimi “Dhuruar nga Jorgji dhe Antigoni Shamata.” Ndihmesë dha edhe për Kishën e Shën Prodhomit në Voskopojë dhe atë të Shën Pjetrit në fshatin Vithkuq. Në Maj të vitit 1996 krijoi fondacionin “Jorgji dhe Antigoni Shamata” duke ndihmuar financiarisht fëmijë me aftësi të kufizuara mendore. Ka dhënë gjithashtu ndihmesë për spitalin dhe senatoriumin e qytetit të Korçës.

Më 30 shtator të vitit 1996 për gjithë kontributin e tij , Këshilli i Bashkisë së Korçës e nderoi z. Xhorxh Shamata “Qytetar nderi”ndërsa për të nderuar veprën e kujtimin e tij Bashkësia Sinicare në Çikago e shpalli Anëtar Nderi të saj.

Ishte dëshira një grupi emigrantësh shqiptarë që për të përjetësuar jetën e veprën e tij të hartohej një libër me kujtime, mbresa dhe intervista nga të afërm dhe shqiptarë të tjerë, që kanë ndjerë në mënyrë të prekëshme dorën e ngrohtë mikpritëse të z. Xhorxh Shamata. Për gati një vit u mblodhën materialet, shkrime, intervista, foto të ndryshme, mes të cilave edhe një intervistë e bashkëshortes së z. Xhorxh Shamata, Antigoni Shamata.

Libri me titull “Mirënjohje që do të përcillet në breza” është ndarë në tre kapituj: Ribashkim pas një ndarje të gjatë. Si një familje edhe pse pa lidhje gjaku. Intervista.

Në fund nëpërmjet fotosh të ilustruara jepet një vështrim në rrugën e biznesit që mban firmën Shamata.

Për përgatitjen dhe redaktimin e këtij libri punoi krijuesi Kostaq Duka. Korrektimi u realizua nga Thanas Hoda dhe puna në kompjutër nga Albert Sakaj. Sponsorizuan Josif Kotemelo dhe Gjergji Tumba. Libri u botua dhe u vu në qarkullim në Amazon.

Më 15 Tetor, në hollin e Kishës Orthodokse Shqiptare u bë promovimi i këtij libri në prani të një pjesëmarrjeje të gjërë.

Uroi mirëseardhjen At Kostandin Tuda i cili tha se nuk është rastësi që ky promovim u bë në mjediset e kishës. Z. Xhorxh Shamata do të kujtohet e nderohet gjithmonë si një nga kontribuesit kryesorë për ngritjen e kësaj kishe dhe si një njeri që dha aq shumë ndihmesë për komunitetin shqiptar.

Sollën mbresa dhe vlerësime për veprën e paharruar të z.Xhorxh Shamata Josif Kotemelo, Thanas Hoda, Jani Depo, Paskal Gjikdhima, Sokol Gjata, Andon Shamata, Flora Tumba, Spiro Haxhi,Memo Gjonzeneli. Për natyrën familjare të z. Xhorxh Shamata, sjelljen me të afërmit etj, solli mbresat e tij z.Randi Sutter nipi i zonjës Antigoni Shamata. Me interes të veçantë ishte ideja që u hodh në këtë veprimtari nga z. Paskal Gjikdhima për të bërë propozim nga komuniteti që z. Xhorxh Shamata të nderohet nga Presidenti i Shqipërisë.

Znj.Cindy Thiem, vajza e z. Xhorxh Shamatës falenderoi komunitetin shqiptar për respektin e treguar ndaj babait të saj, veçanërisht bashkëpunëtorët që ndihmuan në hartimin e librit. Veprimtarinë e mbylli me fjalën e tij krijuesi Kostaq Duka.

Me këtë rast në një kënd të vecantë u bë shitja e mjaft librave. Të hollat e grumbulluara kaluan si ndihmesë për kishën.

TË DENJËT PËR NDËSHKIM

October 19, 2017 by dgreca

ATA JANË TË DENJËT PËR NDËSHKIM TË HIDHUR QË I BËNË TË ECIN KOKËULUR/

Nga Ramadan Bozhlani/

Kryetarëve të komunave u erdhi koha për t’i zbritur shkallët e frontit, së bashku me drejtorët e tyre. Braktisja e kolltukut është e dhimbëshme, por dyfishohet ajo nëse detyra e ushtruar nuk ka qenë e justifikuar me zotësi dhe përgjegjëshmëri. Çdo identifikim i mos qeverisjesë së duhur të periudhës katër vjeçare ua rëndon shpatullat duke ju shkaktuar trazira në ndërgjegjje.

Ta vështrosh me fytyrë të zbehur për të fundën herë zyrën e kryetarit ose të drejtorit dhe pastaj ta mbyllësh duke e tërhequr pas vetës ngarkesën psikologjike dhe emocionale të abuzimit, fajit, padrejtësisë, padijenisë dhe të mos zotësisë është sikurse të nisësh në funeral për ta varrosur ndërgjegjjen.

Ky katër vjetësh skalit gjurmë në historinë e qytetit. Këto gjurmë i ndjekun deri në varr dhe përtej tij prijësit. Udhëheqsat në ikje kur përballohen me pasojat e shkaktuara nga ana e tyre, së bashku me familjen dhe pasardhësit i përjetojnë më dramatikisht se sa të tjerët. Dhe në këtë mënyrë shndërrohen në kryeviktima të skenarit të tyre tragjik. Të abuzosh me besimin e njerëzve nga cilësia e udhëheqësit është krimi i ndëshkushëm ligjërisht dhe moralisht nga e kaluara e tashmja dhe e ardhmja. Por, ne kemi prijës të atillë që në vend të brejtjes së ndërgjegjes marrin kurajo për t’i ringjitur shkallët e pushtetit.

Qytetarët sistemohen në bankën e kryefajtorëve nëse e marrin guximin e verbër për t’i ndihmuar që t’i ringjesin shkallët e pushtetit partit ose prijësit që na kanë zhgënjyer për katër vitet e kaluar. Mos të funksionojmë me trurin e peshkut duke harruar çdo pakënaqësi, vuajtje, dëshprim, zhgenjim dhe sfidë përballë premtimeve naive të shijusëve të pushtetit.Ata janë të denjët për ndëshkim të hidhur që i bënë të ecin kokëulur.