dgreca – Page 2194 – Dielli

TE PREMTEN, VATRA DHE BASHKESIA SHQIPTARE FESTOJNE PAVARESINE E KOSOVES

February 16, 2017 by dgreca

-ZOTI VALON MURATI, MINISTRI I DIASPORES NE QEVERINE E KOSOVES SONTE ME VATREN DHE BASHKESINE SHQIPTARE NE FESTEN E PAVARESISE SE KOSOVES….

– KANE KONFIRMUAR PJESMARRJEN AMBASADORJA E SHQIPERISE NE KOMBET E BASHKUARA BESIANA KADARE DHE KONSULLJA E PERGJITHSHME E KOSOVES TEUTA SAHATCIJA../

1 Gezim nika

Me 17 Shkurt, Bashkesia shqiptare, perfshire Bashkesite fetare, do te jene se bashku per te kremtuar 9 vjetorin e Pavaresise se Kosoves ne Eastwood Manor, ora 6.00 nen zerin e kengetarit te talentuar Gezim Nika dhe artisteve te tjere te komunitetit.

Me Vatren jane bashkuar:Tri Komunitetet Fetare; Shoqata Rugova,Levizja e Legalitetit, Dibra, Rrenjet Shqiptare, The Albanian American Open Hand Association, Shoqata Cameria, Shoqata e Shkrimtareve dhe Artisteve etj.

Kane konfirmuar pjesmarrjen: Ambasadorja e Shqiperise ne Kombet e Bashkuara Besiana Kadare dhe Konsullja e pergjithshme e Kosoves Teuta Sahatcija me stafin.

Ejani dhe festoni me ne

Telefononi: Marjan Cubi: 914-316-0045 1 Vatra 9 vjetori

Dalip Greca: 917-254-6103

Kliko mbi poster qe te marresh me shume informacion.
Kliko siper Posterit per rezervime

Nën peshën e mbresave dhe të përsiatjeve të Pavarësisë së Kosovës

February 16, 2017 by dgreca

Nga Anton Cefa*/

Atë ditë aq të pritur prej shekujsh, prej vitesh, prej orësh, atë ditë të 17 Shkurtit, kur në ndërgjegjen kombëtare u përvijua e dyta datë e Madhe, pas 28-ës së Nëntorit, m’u ndërmend vetëtimthi ai shfrim i furishëm impulsi i gjakut tonë, aq bukur i shprehur prej Poetit : “Erdhi Dita e Arbrit!”

E kujt nuk iu përlot syri dhe nuk i gufoi shpirti tallaz gëzimi e krenarie, duke parë shqiptarët që pushtuan sheshet jo vetëm ato të trojeve tona, në Kosovë e Shqipëri, në Dibër e Malësi, po edhe në mbarë botën, kudo ku jetojnë ata! Me ditë vazhduan festimet, u valëvitën flamujt, shpërthyen brohoritjet, jehuan këngët më të bukura dhe u hodhën vallet më të gëzueshme prej shqiptarëve të veshur me rroba festive të stolisura me ngjyra e simbole kombëtare! Qenë këto ditë që do të na ndrisin gjithnjë me bardhësinë e tyre, që na bënë të shprehim para gjithë botës, si asnjë herë tjetër, veten tonë si popull dhe, po ashtu, edhe ta njohim më mirë veten tonë. Dhe na njohu e na kuptoi njëherë e mirë e gjithë bota, që u gëzua me ne, na përshëndeti dhe na uroi me zemër të hapur. E gjithë bota pau se si gëzohet shpirti i lirisë, ai shpirt optimist e entuziast, i etshëm prej shekujsh për t’u shprehur në plotninë e vet, në vetëdijen dhe nënvetëdijen e vet, ai shpirt i çiltër e këmbëngulës që synon veç ecjen përpara. Pau e u çudit se sa fort shqiptarët e ndarë më dhunë e duan njëri-tjetrin dhe e ëndërrojnë e vlerësojnë bashkimin.

Po çka se do të jenë dy shtete, dy administrata qeveritare, dy parlamente, dy data pavarësie, kur kemi një zemër dhe një shpirt! Do të jemi një e të bashkuar në shtetin e shpirtit tonë, shpirtit të kombit tonë, që nuk njeh kufij gjeografikë, por që, e thënë hapur, e ka të vështirë të pranojë dy flamuj, sado që njëri është thjesht një oportunitet politik i nevojshëm. Shqiptarët gjithnjë do të jenë shpirtërisht të bashkuar, do të glorifikojnë një hero kombëtar, do të shkruajnë një histori në një gjuhë të veten, do të kultivojnë një kulturë mbi të njëjtat rrënjë të qëmoçme, dhe do të valëvisin një flamur, flamurin e kuq të shpirtit tonë me shqiponjën me dy krerë, shtizën e të cilit e kemi të ngulur thellë në ndërgjegjen dhe nënndërgjegjen tonë; sepse ky flamur është simbol i patjetërsueshëm i qenies sonë, i vetëdijësimit tonë për ndjenjën e rrënjosur që motit të përkatësisë sonë etnike dhe të qenësisë sonë kombëtare, i ruajtjes së identitetit tonë si komb i lashtë, i plazmuar me virtyte aq të fisme, për t’u marrë si shembull prej të gjithëve.

* * *

Dita e madhërishme e 17-ës, na përhirohet sot e do të na përhirohet mot, së bashku me figurën e lavdishme të ideusit e të luftëtarit këmbëngulës të lirisë e të pavarësisë së Kosovës, Presidentit të Parë të saj, atdhetarit idealist, burrështetasit të urtë e të nderuar prej gjithë botës, gandistit të madh Ibrahim Rugova. “Një Kosovë e pavarur, demokratike e paqësore, e integruar në BE, në NATO dhe në miqësi permanente me SHBA, është vullneti politik i popullit të vendit tim”, pati thënë ai qartë e bukur, në Senatin Evropian, kur ky Forum i Lartë e shpalli atë Anëtar Nderi, në vitin 2004. Është ky vullnet politik që u jetësua atë ditë të 17-s dhe do të jetësohet më tej, kur Kosova do të hyjë në Bashkimin Europian dhe në NATO. Me këtë vizion politik transparent, me këmbëngulje, durim e urti të pashembullt, ai arriti ta bëjë të njohur çështjen e Kosovës në të gjithë botën, i siguroi asaj miqësinë e ngushtë me Shtetet e Bashkuara të Amerikës, me Bashkimin Evropian dhe me mbarë botën.

Në vitet e ndryshimeve kolosale, që ndodhën në të gjithë botën, por sidomos në Europë, nga shembja e komunizmit, Kosova shkroi një histori të lavdishme, për t’u paraqitur si shembull në historinë botërore i një lufte të qytetëruar gandiste, dhe i një qëndrese heroike vetëmbrojtëse. Hap pas hapi, ajo, nën drejtimin e tij, me pjekuri politike sendërtoi institucionet që mishëruan idealin dhe vullnetin e saj politik, duke shpallur para gjithë botës, në korrik të vitit 1990, Deklaratën e Pavarësisë, duke miratuar Kushtetutën, duke organizuar zgjedhjet e para të lira presidenciale e parlamentare. Në rrethanat e dhunës më të përgjakshme e më shnjerëzore të pushtuesit shekullor serb, në Republikën e Kosovës filloi të funksionojë një shtet sui generis, që qe quajtur në atë kohë “shteti paralel” dhe që u shtri në rrafshet më të rëndësishme të jetës politike, shoqërore, ekonomike. U mbajt një armatë e tërë mësuesish që ushtroi detyrën e vet në shkollat e improvizueme, një rrjetë shëndetësore aktive, u ngritën institucione të ndihmës sociale dhe u njëmendësuan detyra të tjera urgjente që kërkonte funksionimi i një shteti. U ndërkrye në përgjakjen e vet marramendëse pushteti kriminal serb, po edhe vërejti me vëmendje Europa dhe e gjithë bashkësia ndërkombëtare rrugën dhe përpjekjet paqësore të një populli të vogël për të fituar të drejtat e tij.

Dhe erdhi Rambuje-ja, ku një dorë e fisme shqiptare u shtri për paqe e miqësi, por mori një përgjigje arrogante: një mohim kategorik. Dhe më pas, ndodhi ajo që ndodhi: çmenduria serbe kaloi çdo kufi, duke dashur ta zgjidhte përfundimisht konfliktin me gjak, për ta zhbërë Kosovën sipas udhëzimeve të dikurshme të Naçertanie-s së Grashaninit dhe projekteve të Çubriloviçit. Kosova organizoi menjëherë rezistencën, siç e ka organizuar gjithnjë. Radhëve të luftëtarëve të lirisë dhe të nderit kombëtar: Haxhi Zekës, Sulejman Vokshit, Isa Boletinit, Hasan Prishtinës, Azem e Shotë Galicës, Idriz Seferit, Shaban Polluzhës, për të përmendur një numër fare të vogël, iu shtuan martirë të rinj, Adem Jashari me shokë, me luftëtarët heroikë të UÇK-es. Forcat e NATO-s ndërhynë dhe i dhanë lirinë; OKB-ja dhe Bashkimi Europian e futën atë në rrugën e ndërtimit të institucioneve demokratike; Ahtisari, i ngarkuar nga OKB-ja, përgatiti planin që e çoi Kosovën drejt Pavarësisë.

Kosova e ka dëshmuar gjithnjë që pavarësia është e drejta e saj historike, etnike, shpirtërore, shoqërore, politike, ekonomike, e drejta e saj e shenjtëruar nga jeta e lufta e saj, nga mundimet dhe përpjekjet e saj, nga vlerat, meritat dhe virtytet e saj; ajo e ka dëshmuar që pavarësia është dëshira e saj, vullneti i saj, ëndrra e saj shekullore.

Kosova, në këtë hulli të rrezikshme ngjarjesh, për herë të parë në histori të saj pati përkrah Europën dhe Amerikën dhe, pothuejse, gjithë opinionin botëror, me përjashtim kryesisht të serbëve të mbrojtur si gjithnjë prej rusëve. Fatmirësisht, Europa e sotme nuk është më ajo e Kongreseve Berlineze dhe as e Konferencave Londineze, por është një Europë e Bashkuar, e formësuar mbi ligjëshmërinë e të drejtave njerëzore dhe Amerika është ajo e gjithmonshmja, Amerika e Wilsonit.

. . . . . . .

E ardhmja do të dëshmojë që shqiptarët në Ballkan, duke bërë një politikë të urtë paqësore, do të shndërrohen në një faktor të fuqishëm paqeje e stabiliteti.

17 shkurti e futi jo vetëm Kosovën në rrugën e zhvillimeve normale politike, ekonomike, shoqërore e shpirtërore, që karakterizojnë një shtet, në rrugën e integrimit të saj në bashkësinë e shteteve të lira të Europës së Bashkuar; po dhe gjithë kombit tonë i hapi një prespektivë historike krejt të re, që do ta çojë atë drejt realizimeve të reja të shpirtërimit shqiptar, dhe do ta bëjë faktor të rëndësishëm ndikues edhe për një shpirtërim ballkanik më realist, më human e më paqësor.

*(Ribotim)

KOSOVA*

Kosovën të lirë e paçim,

tonën për jetë,

Kosovën të lirë e paçim!

Në ditën e dasmës së madhe

ta bajmë nuse,

mbi krrelat e ditëve të ardhme

të hedhim kokrra gruni

ugur për Pavarësinë.

*Poezi e shkrueme në kohën kur Kosova vuente nën robninë dhe shtypjen e egër serbe.

Kosova, pikëkalime të përhershme të IBM-së në kufi me Serbinë

February 16, 2017 by dgreca

-Para 9 viteve, më pak se një muaj pas shpalljes së pavarësisë në 17 shkurt 2008, Republika e Kosovës në 9 mars nisi të vendoste mbishkrimet me identitetin e ri në kufirin me Republikën e Serbisë. Solemnisht, së pari, u zbulua tabela me mbishkrimin “Republika e Kosovës – Mirë se vini” në pikën kufitare Kosovë-Serbi në Merdare/

-Presidenti Thaçi: Kosova e përkushtuar që të lëvizet pa pengesa në rajon/ MERDARE, 16 Shkurt 2017-Gazeta DIELLI-Behlul Jashari/ Në prag të ditës së 9 vjetorit të pavarësisë, sot sapo u zhvillua ceremonia e vënies së gurthemelit të ndërtimit të pikëkalimit të përhershëm kufitar të IBM-së në mes Republikës së Kosovës dhe Serbisë në Merdare.“Kosova gjatë gjithë këtyre viteve gjithmonë ka qenë e përkushtuar për dialog, për fqinjësi të mirë, për bashkjëpunim në shërbim të gjithë qytetarëve, në shërbim të zhvillimit dhe paqes në rajon”, tha presidenti i Republikës, Hashim Thaçi në fillim të ceremonisë, ku morën pjesë edhe kryeministri Isa Mustafa dhe Shefja e Zyrës së BE-së/Përfaqësuesja Speciale e BE-së, Nataliya Apostolova.“E vlerësoj lart vënien e gurthemelit të vendkalimit kufitar mes Kosovës dhe Serbisë, ky është një rezultat i drejtpërdrejtë i dialogut që kemi zhvilluar një kohë të gjatë, që nuk ka qenë i lehtë por po jep rezultate shumë të mira”, tha kryeministri Mustafa.Zyra e BE-së në Kosovë ka deklaruar se, në përputhje me marrëveshjen e dialogut mbi Menaxhimin e Integruar Kufitar (IBM), do të financojë tre pika kalimi kufitare permanente në mes të Kosovës dhe Serbisë, përkatësisht në Merdare, Mutivodë dhe Bërnjak, me një vlerë prej 9.42 milione euro.Ceremonia e vënies së gurthemelit sot në pikën e parë kufitare është organizuar nga Zyra e BE-së/Përfaqësuesit të Posaçëm të BE-së në Kosovë së bashku me Ministrinë për Dialog.

Ministria ka deklaruar se, ky është i pari nga gjashtë pikëkalimet kufitare të përhershme të IBM-së që do të ndërtohen në kuadër të projektit të gjerë të Menaxhimit të Integruar të Kufirit në mes të Kosovës dhe Serbisë, i paraparë më marrëveshjen e arritur në kuadër të dialogut të Brukselit.Para 9 viteve, më pak se një muaj pas shpalljes së pavarësisë në 17 shkurt 2008, Republika e Kosovës në 9 mars nisi të vendoste mbishkrimet me identitetin e ri në kufirin me Republikën e Serbisë. Solemnisht, së pari, u zbulua tabela me mbishkrimin “Republika e Kosovës – Mirë se vini” në pikën kufitare Kosovë-Serbi në Merdare.

m-01

PRESIDENTI THAÇI: KOSOVA E PËRKUSHTUAR QË TË LËVIZET PA PENGESA NË RAJON

Presidenti i vendit, Hashim Thaçi, bashkë me kryeministrin Mustafa, ministren Tahiri dhe shefen e Zyrës së BE-së në Kosovë, Nataliya Apostolova, sot kanë vendosur gurthemelin e pikës së re të kalimit kufitar mes Kosovës dhe Serbisë në Merdarë.Presidenti Thaçi ka thënë se ky pikëkalim është vetëm një nga gjashtë pikëkalimet kufitare të përhershme të Menaxhimit të Integruar të Kufirit, të cilat do të ndërtohen në kuadër të projektit të gjerë në mes të Kosovës dhe Serbisë.“Në këtë mënyrë, ne jo vetëm që po i përmbushim standardet evropiane, por po ua zvogëlojmë hapësirën edhe dukurive të ekonomisë joformale”, u shpreh presidenti Thaçi.Gjatë gjithë këtyre viteve, presidentit Thaçi tha se Kosova ka qenë gjithmonë e përkushtuar për dialog, për fqinjësi të mirë, për bashkëpunim në shërbim të qytetarëve, në shërbim të zhvillimit dhe paqes në rajon.“Institucionet e Kosovës kanë qenë dhe mbesin të përkushtuara për lehtësimin e lëvizjes së njerëzve dhe mallrave. Jo vetëm brenda Kosovës, por edhe me shtetet fqinje, si në këtë rast me Serbinë”, ka thënë ai.Vënia e këtij gurthemeli në Merdarë, për ndërtimin e pikës së kalimit ndërmjet Kosovës dhe Serbisë, presidenti Thaçi theksoi se është edhe një dëshmi tjetër e rrugës së duhur që kemi ndjekur përmes dialogimit.“Ndoqëm rrugën e bashkëpunimit dhe dialogimit për të mirën e qytetarëve, rrugën e ndërtimit të urave dhe vendkalimeve të reja”, u shpreh presidenti Thaçi.Ai ka thënë se Kosova gjithmonë e ka respektuar lirinë e lëvizjes së njerëzve, automjeteve dhe mallrave.Për këtë qëllim, presidenti Thaçi theksoi se janë arritur marrëveshje që mundësojnë edhe kalimin e kufirit vetëm me letërnjoftime, që të gjithë qytetarët e rajonit të lëvizin pa pengesa.“Këto kanale të reja të kalimit të qytetarëve tanë, shqiptarë e serbë, por edhe të bashkatdhetarëve tanë, po krijohen falë marrëveshjeve në kuadër të dialogut në Bruksel”, u shpreh presidenti Thaçi.Kreu i shtetit e falënderoj Zyrën e Bashkimin Evropian në Kosovë për mbështetjen financiare dhe UNOPS-in, si partner implementues të BE-së, si dhe Ministren e Dialogut, Edita Tahiri, për punën e bërë.Me dialog dhe bashkëpunim, presidenti Thaçi tha se çdoherë e më shumë po e forcojmë identitetin tonë, sovranitetin, por edhe subjektivitetin shtetëror.Ai theksoi se dialogu dhe bashkëpunimi janë rrugë e vetme përpara për tërë Ballkanin Perëndimor.

Kryeministri Mustafa: Do të vazhdojmë që përmes dialogut të zgjidhim problemet me fqinj

unnamed (2) Kryeministri i Republikës së Kosovës, Isa Mustafa, ka marrë sot pjesë në ceremoninë e vënies së gurëthemelit të ndërtimit të pikëkalimit të përhershëm kufitar në mes të Republikës së Kosovës dhe Serbisë në Merdare.Me këtë rast, kryeministri Mustafa theksoi se kjo është një e arritur e dialogut të ndërmjetësuar nga Bashkimi Evropian, në mes të dy shteteve fqinje, Kosovës dhe Serbisë.Kryeministri Mustafa po ashtu ka vlerësuar se ndonëse dialogu nuk ishte gjithmonë i lehtë, rezultatet e arritura dëshmojnë se vetëm përmes dialogut zgjidhen të gjitha problemet me shtetet fqinje. “Unë e vlerësoj lart sot vënien e gurëthemelit të vendkalimit kufitar ndërmjet Republikës së Kosovës dhe Serbisë. Vlerësoj se ky është një rezultat i drejtpërdrejt i dialogut që ne kemi zhvilluar për një afat të gjatë, që nuk ka qenë i lehtë, por po jep rezultate shumë të mira, dhe është një dëshmi që ne duhet të vazhdojmë që përmes dialogut të zgjidhim të gjitha problemet tona me fqinj. Unë dëshiroj kësaj radhe të falënderoj Bashkimin Evropian për mbështetjen e këtij projekti dhe t’ju uroj shumë suksese” tha kryeministri Mustafa.Marrëveshja për Menaxhimin e Integruar të Kufirit, e arritur në kuadër të dialogut të Brukselit, parasheh ndërtimin edhe të pesë pikëkalimeve tjera kufitare në mes të Republikës së Kosovës dhe Serbisë.

Fjala e ministres për Dialog Edita Tahiri me rastin e vënies së gurthemelit të pikëkalimit kufitar në Merdarë

unnamed (3)

Prishtinë, 16 shkurt 2017/ ,/Menaxhimi i kufijve sipas standardeve evropiane demonstron përkushtimin e shtetit tonë për integrime evropiane dhe euroatlantike. Republika e Kosovës është ndër shtetet e para të rajonit e cila ka vendosur dhe zbaton politikat e menaxhimit të integruar të kufijve, si një model i avancuar i kontrollit të kufijve, në mbrojtje të sovranitetit shtetëror dhe për një lëvizje më të lirë për njerëzit, idetë dhe mallrat. Ne po konsolidojmë standardet evropiane në fushën e kontrollit kufitar me gjithë shtetet fqinje, për të rritur sigurinë, paqen dhe stabilitetin në rajon dhe Evropë. Por edhe më shumë, ne po ndërtojmë vlera shtetërore, të qëndrueshme dhe moderne. Ne po bëjmë progres për të jetësuar vizionin tonë euroatlantik, prandaj presim mbështetjen e merituar për të përshpejtuar integrimin e Kosovës në BE, NATO, OKB dhe institucione tjera relevante.

Vënia e gurthemelit për ndërtimin e pikëkalimit të përhershëm kufitar këtu në Merdarë, është dhurata jonë për ditëlindjen e nëntë të shtetit tonë të ri. Ky është një gur më shumë në themelet e shtetit, sovranitetit dhe prosperitetit.Ky është rezultat i dialogut të për fqinjësi të mirë dhe paqe që po e zhvillojmë në Bruksel. Është rezultat i Marrëveshjes së IBM-it me të cilën vendosëm kufijtë ndërshtetëror mes dy shteteve, Kosovës dhe Serbisë, me ndërmjetësimin e Bashkimit Evropian dhe mbështetjes së fuqishme të SHBA-ve.

Që nga viti 2011 kur e kemi arritur këtë marrëveshje, autoritetet shtetërore kufitare të Republikës së Kosovës dhe të Serbisë kanë rritur bashkëpunimin me qëllim të kontrollit sa më të mirë të kufirit, duke përmirësuar dukshëm lëvizjen e lirë të qytetarëve dhe automjeteve si dhe duke detektuar dhe penguar dukuritë negative kufitare, në dobi të dyja shteteve.Me këtë rast dëshiroj të falënderoj Bashkimin Evropian për mbështetjen e projekteve për ndërtesat e përhershme kufitare përfshirë dhe financimin e tyre, për gjashtë pikëkalimet kufitare.Projekti i PKK në Merdarë është më i madhi prandaj e kemi nisur të parin. Ky PKK ka rëndësi madhore për infrastrukturën dhe konektivitetin rajonal të shtetit tonë, duke marrë parasysh autostradat dhe korridoret rrugore rajonale që kalojnë përmes tij. Duke marrë parasysh sukseset tona në ndërtimin e infrastrukturës së rrugëve dhe autostradave, infrastruktura moderne e pikëkalimit kufitar në Merdarë që po e fillojmë sot është edhe një sukses i madh i Qeverisë së Kosovës.Bashkëpunimi mes Qeverisë së Kosovës dhe Bashkimit Evropian dhe UNOPS-it si partner implementues i përzgjedhur nga BE ka qenë i shkëlqyeshëm për realizimin e projektit, dhe i tillë do të vazhdoj edhe në fazat e ndërtimit. Ne po punojmë intensivisht për vënien e gurthemelit edhe në dy pikat tjera kufitare ku Kosova është shtet mikpritës, Bërnjak dhe Mutivodë, ndërsa për tre të tjera do të jetë pala e Serbisë.Dua ta bëj një falënderim të veçantë për Grupin punues qeveritar për IBM, gjithë anëtarëve të saj, Bordit të projektit të përbërë nga Ministria e Dialogut, Ministria e Punëve të Brendshme, Ministria e Mjedisit dhe Planifikimit Hapësinor, Policia e Kosovës, Dogana e Kosovës, AVUK, Zyra e Bashkimit Evropian në Kosovë, EULEX-i.Në fund dua ta ndaj me ju një storie nga negociatat e IBM-it në Bruksel. Unë kam pasur një kolonel të nderuar në delegacion, por të cilin e shpalla gjeneral në grupin punës, në emër të reciprocitetit me palën tjetër. Ai është kolonel Guda. Që nga ajo ditë është gjenerali im.Urime të gjithëve. Urime 9 vjetori i Pavarësisë së Kosovës!

Ju faleminderit!

Qeveria e Kosoves,homazhe te shtatorja e Presidentit Historik, Dr. Ibrahim Rugova

February 16, 2017 by dgreca

1 Qeveria homazhe te Rugova

Prishtinë, 16 shkurt 2017/Kryeministri i Republikës së Kosovës, Isa Mustafa dhe kabineti qeveritar, me rastin e shënimit të nëntë vjetorit të shpalljes së Pavarësisë së Kosovës, bënë homazhe te shtatorja e Presidentit Historik të Kosovës, Dr. Ibrahim Rugova.Pas homazheve, kryeministri Mustafa vlerësoi lartë figurën e Presidentit Rugova, luftën heroike të UÇK-së dhe Komandantit Legjendar Adem Jashari dhe të gjithë atyre që u flijuan për pavarësinë e Kosovës.“Jemi së bashku me zëvendëskryeministrin Kuçi, me ministrat e Qeverisë së Republikës së Kosovës për t’i bërë nderime Presidentit Ibrahim Rugova. Ne si institucione të Republikës së Kosovës vlerësojmë lartë figurën e Presidentit Rugova dhe kontributin e tij në shtetndërtim, ashtu siç vlerësojmë shumë lartë luftën heroike të Ushtrisë Çlirimtare të Kosovës, të Komandantit Legjendar Adem Jashari dhe të gjithë atyre që u flijuan qoftë me mendje, qoftë me jetë për lirinë dhe pavarësinë e Kosovës dhe për ndërtimin e shtetit të Kosovës”, tha kryeministri Mustafa.

Kosova feston 9 vjetorin e Pavarësisë, kryeministri Rama në seancën solemne të Kuvendit

February 16, 2017 by dgreca

1 seanca solemne-Kuvend-Kosove-sot

-Mes pjesëmrrësve në seancën e hapur me Himnin Shtetëror të Kosovës është edhe ambasadori i SHBA në Prishtinë, Greg Delawie, dhe diplomatë të tjerë e përfaqësues të pranisë ndërkombëtare në Kosovë/

PRISHTINË, 16 Shkurt 2017-Behlul Jashari/

Kuvendi i Kosovës u mbledhe sot në një seancë solemne në të njëjtën orë e në të njëjtin vend ku para 9 viteve, në 17 Shkurtin historik 2008, shpalli pavarësinë.Seanca solemne, ku po merr pjesë edhe kryeministri i Shqipërisë Edi Rama, është pjesë e axhendës treditëshe të festimeve, me aktivitete të organizuara nga Presidenca, Kuvendi, qeveria dhe nga komunat, të nisura që dje për të vazhduar edhe nesër në ditëlindjen e shtetit më të ri evropian, të dytë të shqiptarëve. Mes pjesëmrrësve në seancën e hapur me Himnin Shtetëror të Kosovës është edhe ambasadori i SHBA në Prishtinë, Greg Delawie, dhe diplomatë të tjerë e përfaqësues të pranisë ndërkombëtare në Kosovë.“Ne, udhëheqësit e popullit tonë, të zgjedhur në mënyrë demokratike, nëpërmjet kësaj Deklarate shpallim Kosovën shtet të pavarur dhe Sovran”, theksonte Deklarata e Pavarësisë e lexuar nga atëherë kryeministri Hashim Thaçi, tash president i Republikës, i cili po flet edhe sot në seancën solemne.Kosova 9 vjetorin e Pavarësisë e pret e njohur nga 113 shtete anëtare të OKB-së dhe e anëtarësuar në mbi 50 organizata ndërkombëtare, politike, të sigurisë, ekonomike e të tjera.Para 9 viteve shpallja e pavarësisë është pasuar me miratimin nga Kuvendi në 9 prill 2008 të Kushtetutës së Republikës, e cila në nenin 1 përcakton se “Kosova është ështet i pavarur, sovran, demokratik, unik, dhe i pandashëm”. Kushtetuta ka hyrë në fuqi në 15 qershor 2008, dhe në këtë një zhvillim shumë i rëndësishëm ishte dekretimi i 41 ligjeve të dala nga paketa e Propozimit Gjithpërfshirës për Zgjidhjen e Statusit të Kosovës të Kryenegociatorit Ahtisaari – Emisarit Special të OKB-së.Një nga këto ligje është është Ligji për festat zyrtare në Republikën e Kosovës të miratuar në Kuvend në 21 maj 2008, sipas të cilit Dita e Pavarësisë 17 Shkurti, po edhe Dita e Kushtetutës 9 Prilli, janë festa shtetërore.