Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Spektakli Socialist

by

Opinion nga Arben LLALLA/

Prej kaq kohësh qysh kur reforma me të drejtë u votua nga 140 deputetë shqiptarë mediat janë marrë me thashetheme për qeveri teknike, për prishje të koalicionit PS dhe LSI. Por, socialistët e PS dhe LSI janë mjeshtra për spektakle duke e zhvendosur vëmendjen e opinionit publik nga korrupsioni e varfëria tek thashethemnaja për prishje të ekuilibrave të koalicionit dhe rënien e qeverisë Rama. E vërteta është se s’do të ketë prishje të qeverisë, as dalje të LSI nga qeveria deri në qershor 2017, sepse askujt nga deputetët socialistë të PS-së dhe LSI-së nuk u intereson një trazirë e këtillë apo zgjedhje të parakohshme, sepse shumë nga këta deputetë të sotëm nuk do jenë më deputetë duke humbur privilegjet shtetërore që i ofron posti i përfaqësuesit të popullit. I vetmi naivitet në këtë lëmsh është PD që ushqen opinionin se do ketë qeveri teknike apo një koalicion në të ardhmen PD-LSI.

As në ëndërr nuk duhet kush ta shoh një prishje të PS-së me LSI-në dhe jo më ta mendojë se në të ardhmen do ketë një qeveri të sigurt të PD-së me LSI-në. Shkuan ato kohëra të vështira për Metën dhe LSI, ku me zor ekzistonin në opozitë. Ashtu si kanë thënë pleqtë dikur, të cilat ne sot i quajmë “Fjalë të Urta”, duhet të kemi parasysh se shqiptari, kur kalon lumi, thotë: “Të dhjefsha kalin”. Në këtë rast Ilir Meta dhe LSI pasi kaluan lumin 2009-2013 e përshëndetën përfundimisht PD dhe Sali Berishën në prill të 2013 dhe s’kanë ndërmend të kthejnë kokën më pas për martesën e imponuar më 2009 me shkues, të cilët politikisht kanë vdekur sot.

Takimet për kafe dhe dreka të Metës me Koçon, ky i fundit me Tomën apo edhe me ndonjë tjetër janë normale për politikanët shqiptarë, të cilët herë pas here shahen me libër shtëpie me njëri-tjetrin dhe në ditët e vështira, kur duhet të mbushin xhepat me mijëra euro përqafohen dhe bëjnë selfie. Kujtoni dikur Meta çfarë i ka thënë Topallit, Meta-Ramës dhe së fundi Lad Kosta-Ramës dhe Arben Ahmetajt, në mbrëmje të gjithë janë të lumtur për atë selfien e famshme.

Spektakli socialist PS-LSI do vazhdojë më tej në shtator në zgjedhjet e parakohshme për kryetarin e Bashkisë së Peshkopisë, ku PD me militantët e tyre do dëshpërohen tej mase kur do shikojnë vallen dorë për dore për të rifituar këtë bashki përsëri koalicioni i majtë.

Fatkeqësia e popullit shqiptar është se shumica e deputetëve, ministrave, kryetarëve të bashkive, gjyqtarëve, prokurorëve dhe shumë drejtues të lartë të shtetit janë nga i njëjti rreth, vijnë nga tarafet fisnore prandaj SHBA dhe BE ngulmojnë me aq ngulm për realizimin në praktikë të Reformës në Drejtësi që të shkatërrojnë njëherë e përgjithmonë këtë grup mafiozësh shtetëror që kontrollojnë me injorantët e familjeve të tyre çdo strukturë shtetërore, çdo qelizë të shqiptarëve duke na lënë në errësirë, në varfëri të tejskajshme, duke na zhveshur nga çdo gjë njerëzore. Për fat të keq ky grup mafiozësh farefisnor pushtetar na kanë shitur edhe interesat kombëtare, e kanë zhveshur shqiptarin nga kulti i traditës së ndershme të familjes.

Pra, faji për gjendjen e rëndë ekonomike, politike dhe kombëtare në Shqipëri prej 25 vitesh bie vetëm mbi një grusht njerëzish me një gjysmë diplome në xhep që godasin të tjerët me shkopin e ligjit të korruptuar dhe që një ditë zbatimi i Reformës për Drejtësi të sapo votuar do t’ua hajë kokën njëri pas tjetrit. Shpresa vdes e fundit, nëse nuk ke shpresa do të thotë se je i vdekur.

 

Nderohet Kryepeshkopi Shqiptar Nikon nga Kisha Ortodokse e Amerikës

by

Eminenca e Tij NIKON, Kryepeshkopi i New England-it dhe i Arkidioçezës së Kishës Ortodokse Shqiptare në Amerikë, është nderuar me një rezolutë të veçantë nga Asembleja Vjetore e Dioçezës së Jugut (Annual Assembly of the Diocese of the South), e cila u mbajt në Wilmington, North Carolina në muajin korrik 2016. Asembleja, gjithashtu, Kryepeshkopin Shqiptar e shpalli Antar Nderi të Dioçezës së Jugut (The Diocese of the South).
Lexuesëve do t’u kujtohet Kryepeshkopi Nikon, i cili, bashkë më Vëllaun e mirënjohur, At Arthur Liolin, Kancellar i Katedrales së Shëngjergjit në Boston (Kisha e Nolit), pat ardhë në kremtimin e 100 vjetorit të “Vatrës”, ku i priu lutjes fetare në hapjen e Konferenceës shkencore me 28 prill 2012.
Në emër të “Vatrës” dhe të gazetës “Dielli”, i shprehim Eminencës Nikon përgëzimet më të thella për nderimin e merituar dhe i urojmë shëndet dhe arritje të larta në misionin e shënjtë fetar e kombëtar, në frymën që la trashëgim Themeluesi i Kishës Ortodokse Shqiptare në Amerikë dhe i Autoqefalisë së Kishës Ortodokse të Shqipërisë, Rilindësi i ndritur kombëtar Fan S. Noli.
Këtu poshtë po ju sjellim dokumentin origjinal të Resolutës që nderon prelatin shqiptar.
The following resolution was adopted at the Annual Assembly of the Diocese of the South – Orthodox Church in America; on 28 July 2016 held in Wilmington, South Carolina.

Kosovë-Korrespondenti i DIELLIT, Behlul Jashari nderohet me Çmim nga Ministria e Diasporës

by

Kosovë-Korrespondenti i DIELLIT, Behlul Jashari Çmim nga Ministria e Diasporës/

-Ai, duke u falënderuar në ceremoni për vlerësimin tha se Çmimin për kontribut të veçantë në promovimin e diasporës shqiptare që iu dha ia dedikon VATRËS dhe gazetës organ i saj  DIELLI në Shtetet e Bashkuara të Amerikës/

-Në ceremoninë sonte në Prishtinë mori pjesë dhe u përshëndet veçantë edhe zv/kryetari i Federatës Pan-Shqiptare të Amerikës VATRA, organ i së cilës është Gazeta DIELLI, Agim Rexhaj – Nderi i Kombit, i dekoruar nga Presidenti i Shqipërisë

PRISHTINË, 2 Gusht 2016-Gazeta DIELLI/ Në Prishtinë, organizuar nga Ministria e Diasporës, në kuadër të manifestimit tradicional Dita e Diasporës, në një ceremoni sonte, ku mori pjesë dhe u përshëndet veçantë edhe Agim Rexhaj-Nderi i Kombit, i dekoruar nga Presidenti i Shqipërisë,

zv/kryetar i Federatës Pan-Shqiptare të Amerikës VATRA, organ i së cilës është Gazeta DIELLI, korrespondentit të saj në Kosovë, gazetarit shumëvjeçar Behlul Jashari, iu dha Çmimi për kontribut të veçantë në promovimin e diasporës shqiptare. “Duke ditur kontributin tuaj dhënë diasporës përmes shkrimeve të ndryshme për të, komisioni për ndarjen e çmimit ‘Gazetari me shkrimin/kronikën ose emisionin më të mirë për diasporën’ vendosi që  çmimi për kontribut të veçantë në promovimin e diasporës t’ju jepet juve, i nderuari z.Jashari”, është njoftuar nga Ministria kosovare korrespondenti i DIELLIT, gazetës më  të herëshme shqiptare në gjithë botën, e themeluar nga Fan Noli e Faik Konica, organ i Federatës Mbarëshqiptare të Amerikës Vatra, e cila gazetë në 15 shkurt 2016 festoi 107 vjetorin.

Gazetari Behlul Jashari duke u falënderuar në ceremoni për vlerësimin tha se çmimin që iu dha ia dedikon VATRËS dhe gazetës organ i saj  DIELLI në Shtetet e Bashkuara të Amerikës.  Çmimin për kontribut të veçantë në promovimin e diasporës shqiptare korrespondentit në Kosovë të DIELLIT ia dorëzoi  Sekretari i Përgjithshëm i Minisrisë së Diasporës, Osman Shahini.

Korrespondenti në Kosovë aktualisht i Gazetës DIELLI – korrespondenti i ATSH nga Kosova e themelues i bashkëpunimeve të para të medias Kosovë-Shqipëri prej çerek shekulli, Behlul Jashari, gazetar shumëvjeçar, ishte redaktor e kryeredaktor i gazetës tradicionale kosovare Rilindja, si dhe kryeredaktor i parë-themelues i gazetës së rezistencës e lëvizjes për liri e pavarësi “Bujku”, me orientim e përcaktim të fuqishëm properëndimor euroatlantik, e cila nisi të dalë në Prishtinë nga 18 janari 1991 dhe deri në lirinë e Kosovës informonte në kohën e paraluftës e luftës, është laureat i çmimit më të lartë të gazetarisë shqiptare- Çmimit Karriera të Unionit të Gazetarëve Shqiptarë, që iu dha në ceremonë në Prizren në 13 nëntor 2015.

Çmimi për kontribut të veçantë në promovimin e diasporës shqiptare iu dha edhe Radio-Rilindjes në Osllo të Norvegjisë.

Çmimi për emisionin më të mirë televiziv iu dha Valdete Osmanit, për reportazhin “Shemsi (Papi) Brahimi, një trajner i futbollit për fëmijë në Suedi”.

Çmimi për shkrimin më të mirë në medie/portale iu dha Alban Hamzës, nga Albinfo për reportazhin “Ardiani dhe vera e tij Norah që lindi nga dhimbja”.

Në hapje të manifestimit, ku ishte edhe ministri i Mirëqenies Sociale dhe i Rinisë i qeverisë së Shqipërisë, Blendi Klosi, ministri i Diasporës i qeverisë së Kosovës, Valon Murati tha se, “sot diaspora nuk është sikur ajo e disa dekadave më parë. Përveç përkrahjes financiare të cilën Kosova e merr çdo vit nga ajo, diaspora sot i ofron Kosovës edhe kapacitete njerëzore, profesionale, kulturore e shkencore. Prandaj, është detyrë e jona si institucione që të vazhdojmë t’i forcojmë lidhjet me diasporën”.

Çmimi “Mërgimtari i vitit” u dha për sukseset e arritura në arsim, kulturë, sport, biznes, veprimtari humanitare, si dhe për kontribut të veçantë për shtetin e Kosovës ose për diasporën.

Çmimi për arsim iu dha Ermira Morinës, mësuese, ndër më të suksesshmet dhe shumë aktive në organizimin e mësimit plotësues të gjuhës dhe kulturës shqipe në Greqi.

Çmimi për sport iu dha Arlind Ajetit, futbollist i Kombëtares Shqiptare, i vlerësuar më i spikaturi në “Euro 2016”.

Çmimin për biznes e mori Gani Nuha, biznesmen në Gjermani, themelues dhe promotor i Unionit të Bizneseve Shqiptare në Gjermani, ndërsa aktualisht Sekretar. Gjatë vitit 2015 ka investuar mbi 10 milionë euro në krijimin e Hidrocentralit në Albanik – Kosovë, ku ka gjeneruar mbi 200 vende pune.

Çmimin për kulturë e mori Alketa Xhafa Mripa, artiste, e cila bëri ekspozitën me veshjet e grave të dhunuara gjatë luftës në stadiumin e Prishtinës, ekspozitë kjo që bëri bujë në të gjitha mediet botërore. Jeton në Londër.

Çmimi “Mërgimtari i vitit” iu dha  Drenusha Shalës, themeluese e kompanisë “Baruti GMBH”, 26-vjeçare, e cila ka themeluar një biznes të shërbimeve në Prishtinë dhe ka punësuar brenda vitit mbi 300 punëtorë, duke u bërë kështu shembull i të rinjve shqiptarë të diasporës për sukseset në biznes dhe teknologji informative, si dhe duke kontribuar në atdhe me  vende të reja pune.

Çmimi i nderit iu nda Noel Malcolm, historian, gazetar politik dhe akademik, kontribuues i madh i çështjes shqiptare dhe i bashkëpunimit me diasporën shqiptare në Angli.

Çmimi post-mortem iu nda Aleksandër Stipçeviqit, i lindur në Arbanas të Zarës – Kroaci, ilirolog dhe kontribuues i jashtëzakonshëm i hulumtimeve të prejardhjes shqiptare.

Pas ndarjes, së çmimeve mbrëmja vazhdoi me performimin e bendit të Radio Televizionit të Kosovës – RTK, të Bardh Jakova&Spartiti per Scutare nga Italia dhe të grupit “Zoria” nga Kroacia, të cilët kënduan këngë të zgjedhura shqiptare.

*Ne Foto: Agim Rexhaj, Valon Murati, Behlul Jashari- 2 gusht 2016-Prishtinë-foto Gazeta DIELLI

Ilir Meta “rrëzon” qeverinë teknike

by

Basha: Qeveria teknike kusht i patejkalueshëm. Fton LSI-në/

Kryetari i Partisë Demokratike, Lulzim Basha, artikuloi një kusht të ri gjatë një bashkëbisedimi me gazetarët kur tha se do të punojë për një qeveri teknike që garanton zgjedhjeve të lira e të ndershme. E meqë qeveria teknike kërkon një mbështetje të gjerë partish ftesta e parë për një gjë të tillë nga Kryetari i opozitës i drejtohet LSI, partisë së dytë në qeveri me të cilën PD ka ndarë së fundmi disa momente të frytshme bashkëpunimi siç ishte reforma në drejtësi dhe arritja e konsensusit. Basha e cilëson të tejkaluar momentin politik të kësaj reforme dhe thotë se tashmë ka një proces teknik duke hedhur poshtë mundësinë e përfshirjes në një krizë të re politike.

Tirane- Kryetari i Partisë Demokratike Lulzim Basha, ka një kusht të patejkaluashëm për zgjedhjet e ardhëshme parlamentare. Qeveria teknike sipas tij rruga e vetme qe garanton zgjedhje me standarte.

Lulzim Basha: Me asnjë çmim nuk do të lejojmë prishjen e procesit të ardhshëm zgjedhor. Dua të përsëris kushtin se për garantimin e zgjedhjeve të lira dhe të ndershme është dhe mbetet qeveria teknike

Beteja për zgjedhje të lira nuk pret tha Basha, ndaj sipas tij qeveria teknike duhet të arrihet një orë e më parë. Por si mendon se mund te arrihet qeveria teknike.

Lulzim Basha:  Ka një rrugë bashkëpunimi politik mes palëve. Unë nuk e mbyll këtë shteg po kërkoj kontributin e çdo force politike për zgjedhjeve të lira dhe të ndershme që përfshijnë qeverinë teknike. Por nëse kjo qeverisje, siç pres nuk reflekton mbi këto dy kushte themelore dhe qeverisjen teknike rruga tjetër është ajo e detyrimit me presion popullor

Kryetari i opozitës, tha se koalicioni për zgjedhjet të lira e të ndershme tejkalon opozitën dhe po zgjerohet çdo ditë. Basha ftoi për të bashkëpunuar mbi këtë qëllim Lëvizjen Socialiste për Integrim, e cila aktualisht është në koalicionin qeveritar edhe pse më herët kryetari i saj ka artikuluar mundësinë e një qeverie teknike në kushtet e mungesës së konsesusit për reformën në drejtësi. Dhe kjo ftesë vjen vetëm një ditë pas takimit që ai pati me kryetarin e LSI Ilir Meta.

Lulzim Basha: Sapo thashë kërkoj bashkëpunimin e çdo force politike, LSI dhe PS të cilët nuk duhet të nisen nga premisa e frikës së votës së lirë por nga përgjegjësia për ti dhënë shqiptarëve zgjedhje të lira dhe të ndershme. Mirëpres kontributin e çdo force politike, sic mirëprisja kontributin për të arritur konsensusin e 21 korrikut. Reforma zgjedhore është shans për Edi Ramën dhe Ilir Metën. Një gjë është e sigurtë ne nuk do rrimë duarkryq”

Por a është i gatshëm ti besojë Ilir Metës ?

Lulzim Basha:Ne jemi gati ti besojmë vetëm qytetarëve shqiptarë, as Ilir Metës as Edi Ramës. 

Në bashkëbisedimin me gazetarët në selinë e PD-së Basha shtoi: “Kushdo që kërkon alibi për të rindezur konfliktin politik do të zhgënjehet thellë e do të përballet që nga dita e sotme me arsyet pse kërkon të rishpikë një luftë politike”

Kryetari i opozitës në këtë fillim gusht, piku i pushimeve verore thirri ne bashkebisedim gazetarët, për të njoftuar se opozita do të jetë në punë pa pushime. Edhe pse minorancë numërash ne Parlment, Basha tha Partia Demokratike në vitin e fundit ka qënë promotore e reformave të rëndësishme duke permendur ketu dekriminalizmin dhe drejtësinë.

***

META:Nuk është opsion. Situata u tejkalua/

Kreu i Kuvendit Ilir Meta i ka mbyllur shtigjet për krijimin e një qeverie teknike dhe sqaroi se ku ndryshon opsioni i tij për një gjë të tillë me atë të kreut të opozitës tani.

Meta: “Qeveria teknike për të cilën flet zoti Basha është diçka tjetër. Nuk ekziston një opsion i tillë. Në rast se ka një keqkuptim për propozimin tim në një situatë të ndryshme disa ditë para 21 korrikut, ajo ishte thjesht me qëllimin për të bërë çdo gjë për të miratuar reformën”.

Kryeparlamentari ka konfirmuar qëndrueshmërinë e koalicionit, duke garantuar se shumica i ka 84 votat për miratimin e ligjeve që bëjnë të zbatueshëm reformën. Por Meta, erdhi me një propozim surprizë, kur shtoi numrin e ligjeve për diskutim, sikurse edhe seancat plenare.

Kryeparlamentari iu përgjigj në distancë edhe zërave që vijnë nga radhët e PS për të rishikuar koalcionin pasi reforma në drejtësi dëshmoi problem brenda aleancës.

Kreu i Kuvendit rrëzoi mundësinë që me Rexhep Meidanin një ditë më parë të kishte diskutuar për një qeverë teknike, dhe se ish presidenti në rast të këtij skenari mund të ishte kryeministër. Dreka me Mejdanin dhe ish deputetin e PS, Koço Kokëdhima, kryeparlamentari tha se ishte miqësore.

Ilir Meta i përcolli këto mesazhe për politiken nga vendi ku bën masazhe dhe për ta konfirmuar këtë u shfaq përkrah fizioterapistit.

Meta doli në një deklaratë për median rreth orës 16:00 ndërsa dy orë pasi kryetari i Partisë Demokratike Lulzim Basha në një bashkëbisedim me gazetarët artikuloi një kusht të ri kur tha se do të punojë për një qeveri teknike që garanton zgjedhjeve të lira e të ndershme. E meqë qeveria teknike kërkon një mbështetje të gjerë partish ftesta e parë për një gjë të tillë nga Kryetari i opozitës iu drejtua LSI, partisë së dytë në qeveri me të cilën PD ka ndarë së fundmi disa momente të frytshme bashkëpunimi siç ishte reforma në drejtësi dhe arritja e konsensusit. Ndërkohë Rama përmes një postimi në fb i kujtoi Bashës se ai mund të vendosë kushte vetëm brenda PD-së

Intervista e plote që Meta dha për gazetarët

Pyetje: Sa i takon drekës me ish presidentin Meidani Meta kërkoi mos politizimin e saj.

Meta: Më vjen keq për këtë konferencë të pazakontë shtypi, por në respektin tuaj që në këtë kulm vape keni pritur këtu për dy orë, keni pritur dhe dje për disa orë por nuk komunikuam dot dhe duke qenë i shqetësuar se përsëri nesër apo në ditë të tjera mund të ketë ndonjë sms që Meta vajti tek Grandi dhe Koço është trek Grandi që ka shtëpinë këtu tek Grandi dhe rri vazhdimisht këtu tek Grandi apo politikanë të tjerë që vinë këtu për arsye dhe të vendodhjes së Grandit duhet tu sqaroj se unë kam qenë për dy orë me Arjanin.Dhe rri vazhdimisht këtu. Arjani është miku im por njëkohësisht dhe trajneri dhe masazhatori im për një kohë shumë të gjatë dhe më ndihmon të çliroj trupin dhe mendjen nga toksinat në mënyrë që përpiqem të kontribuoj pozitivisht për të detoksikuar dhe politikën shqiptare aq sa të mundem.

Pyetje: Do sillni dhe zotin Rama këtu?
Meta: Ushtrimi më i mirë këtu është biçikleta në ujë, për të gjithë.Është ushtrim i jashtëzakonshëm.Në një kohë shumë të shkurtër, duke fituar kohën fiton dhe veti të jashtëzakonshme, jo vetëm harxhim kalorish por dhe masazh, relaks dhe shumë elementë të tjerë, edhe performancë trupore. Të gjitha këto janë falë Arjanit, unë do vij vazhdimisht. Nuk mendoj se është e nevojshme që ju të vini vazhdimisht këtu për arsye se ju thashë kush është arsyeja kryesore pse unë vi tek holel Grandi. Nuk kam qenë as në katin e parë, as në katin e dytë, as për kafe dhe as për drekë dhe mendoj që është pozitive që ju të mos keqinformoheni më.Jam gati për çdo pyetje politike dhe pse kisha vendosur të mos flisja.

Pyetje: E takuat zotin Meidani, ishte apo nuk ishte zoti Kokëdhima?

Meta: Kam patur një drekë me Profesor Meidanin dje, zoti Kokëdhima ka qëlluar rastësisht për arsye se ju thashë që zoti Koço ka shtëpinë ngjitur me hiotelin dhe rri vazhdimisht te hoteli.Ka ndjenjur një pjesë të kohës me ne pastaj ka vazhduar, ne kemi vazhduar drekën tonë.

Pyetje: E takuat zotin Meidani, ishte apo nuk ishte zoti Kokëdhima?

Meta: Kam patur një drekë me Profesor Meidanin dje, zoti Kokëdhima ka qëlluar rastësisht për arsye se ju thashë që zoti Koço ka shtëpinë ngjitur me hiotelin dhe rri vazhdimisht te hoteli. Ka ndjenjur një pjesë të kohës me ne pastaj ka vazhduar, ne kemi vazhduar drekën tonë.

Pyetje: Temperaturat si në gusht kanë qenë edhe në korrik të larta, duket se të tilla kanë qenë dhe në politikë, me diskutime për reformën në drejtësi, por nuk kanë munguar dhe zërat mes grupeve parlamentare për çështje që i përkasin koalicionit. Deri ku është toksikuar pjesa e koalicionit nga diskutimet dhe debatet sipas jush?

Meta: Mendoj se çështja e koalicionit nuk duhet të përzihet me çështjen e reformës në drejtësi. Reforma në drejtësi ka përmasa të tjera, koalicioni ka programin e tij, detyrimet reciproke dhe vazhdon punën e tij kështuqë nuk mendoj se ka ndonjë arsye për ti trazuar këto dy çështje të ndryshme.

Pyetje: Koalicioni vazhdon në të njëjtën linjë?

Meta: Koalicioni sipas vlerësimit tim duhet të vazhdojë të bëjë maksimumin që të përmbushë detyrimet e tij programore, qeverisëse dhe morale ndaj qytetarëve shqiptarë, të gjithëve sepse ky koalicion qeveris të gjithë shqiptarët, por në mënyrë të veçantë ndaj atyre që e kanë përkrahur dhe votuar si detyrim moral për të mos i zhgënjyer.

Pyetje: A është zoti Meidani kandidat për Kryeministër të ri të qeverisë teknike?

Meta: Mendoj se kjo është një pyetje pa vend sepse nuk ekziston një opsion i tillë. Në rast se ka një keqkuptim për propozimin tim në një situatë të ndryshme disa ditë para 21 korrikut, ajo ishte thjesht me qëllimin për të bërë çdo gjë për të miratuar reformën.

Pyetje: Për reformën në drejtësi sot është mbledhur Komisioni.I qëndroni gatishmërisë që keni shprehur gjatë javës së shkuar për të arritur të gjitha proçeset dhe afatet edhe të diskutuara dhe vendosura nga ndërkombëtarët për ta plotësuar reformën në drejtësi?

Meta: Ne do bëjmë çdo gjë për të përmbushur të gjitha afatet, në mënyrë të veçantë që deri me 30 gusht të mund të votojmë tre ligjet më kryesore të kërkuara, duke filluar me atë të vetingut dhe kemi rënë dakort dhe me kryetarin e opozitës Lulzim Basha dhe përfaqësues të opozitës, padyshim dhe me zotin Xhafa si kryetar i një komisioni që përfaqëson shumicën që të ecim në këtë drejtim.

Sot është  bërë një seancë ku opozita ka paraqitur të gjitha pikëpamjet dhe propozimet e saj që do të shqyrtohen dhe nga partnerët tanë që na asistojnë dhe për këtë ligj kaq të rëndësishëm dhe për reformën.Ndërkohë do të gjendet një moment i dytë që përsëri në Komision opozita të paraqesë për dy ligjet e tjera më prioritare përsëri mendimet e saj dhe sa më shpejt ne të jemi në gjendje të planifikojmë një seancë të suksesshme plenare për ligjin e vetingut ose të treja sëbashku, ose dy seanca të njëpasnjëshme.Jam shumë dakort me qëndrimin e zotit Basha që ky proçes duhet parë si një proçes ligjor, jo si proçes politik.

Debatet politike ishin tek çështjet e ndryshimeve kushtetuese si çështje shumë parimore. Ky është një proçes që duhet të ecë në linjën e ndryshimeve të Kushtetutës dhe të rekomandimeve të Venecias. Është e vërtetë që mazhoranca i ka 84 vota dhe mund ti votonte në çdo moment. Por mendoj që dhe linja e konsensusit duhet ndjekur. Jo vetëm kaq, është e rëndësishme që të mos bëjmë veprime të nxituara të cilat mund të çojnë një nga këto ligje në Gjykatën Kushtetuese apo në Komisionin e Venecias dhe mund të na kthente mbrapa procesin. Duhet të bëjmë gjithçka në mënyrë konstruktive të gjithë, në mënyrë që të arrijmë një rekomandim pozitiv nga Komisioni Europian në nëntor për çeljen e negociatave të Shqipërisë në BE.

Pyetje:  Ju e përjashtoni kategorikisht një qeveri teknike. Në këtë mënyrë ju i mbeteni besnik deri në fund mazhorancës, nuk do të ketë ndryshim qeverie deri në zgjedhjet e ardhshme?

Meta: Unë kam folur për një qeveri teknike që mund të garantonte klimën e besimit për të miratuar një reformë, ku shikoja se një nga shqetësimet e opozitës ishte shqetësimi se mos qeveria do të përdorë pushtetin ekzekutiv për të ndikuar tek reforma në drejtësi. Kjo situatë është një situatë e kapërcyer, reforma u realizua me konsensus, pretendimet e opozitës në përgjithësi për rekomandimin 88 u dakordësuan. Qeveria teknike për të cilën flet zoti Basha është diçka tjetër, ndërsa ajo që unë mund të them është se angazhimi për zgjedhje të lira dhe të ndershme do të jetë maksimal në mënyrë që të gjithë qytetarët shqiptarë të jenë të qetë dhe të sigurtë se vota e tyre do të jetë e barabartë dhe njësoj e rëndësishme.

Pyetje: Meqë opozita ka vendosur si kusht se nuk do të hyjë në zgjedhjet e ardhshme me qeverinë Rama, sa do ta ndikojë koalicionin një qëndrim i tillë?

Meta: Jemi në momentin për tu përqëndruar tek ecuria e reformës në drejtësi, është reformë shumë e madhe, është një punë akoma më e madhe që na pret ërpara. Të bashkëpunojmë ngushtë dhe me OSBE-ODIHR dhe për reformën zgjedhore dhe për plotësimin e standarteve më të mira për zgjedhjet e ardhshme.

Pyetje:Vlahutin është hetuar për fshehje pasurie, ndërsa këtu ka qenë negociatore?

Meta: Nuk kam asnjë njohuri dhe asnjë koment.
Pyetje: Po me zotin Meidani çfarë diskutuat, nëse nuk diskutuat për qeverinë teknike?

Meta: Ka qenë një drekë e planifikuar prej kohësh dhe kemi pasur shkëmbime shumë miqësore, kështu që nuk e kuptoj pse duhet politizuar qoftë një drekë apo kafe.

Koment: Kërcënim absurd nga Ankaraja

by

Nga Bernd Riegert/

Shantazhi nuk mund të jetë mjet politike mes partnerëve. Dhe BE-ja dhe Turqia ende e shohin veten si të tilla në politikën e refugjatëve, pavarësisht tronditjeve të rënda në politikën e brendshme turke. Prandaj është logjike që Komisioni i BE-së i kundërshton përpjekjet e qeverisë turke për ta detyruar BE-në që në këmbim të kthimit të refugjateve dhe migrantëve të heqë regjimin e vizave për qytetarët turq. Në marrëveshjen e marsit BE-ja e njohu edhe një herë si objektiv heqjen e vizave nëse Turqia plotëson kushtet përkatëse. Po në samitin e marsit nuk u vendos ndonjë datë e veçantë për këtë.

Turqia e vë vetë veten nën presion

Ideja e qeverisë turke për të vënë tani një ultimatum dhe për të përmendur tetorin si datë për fillimin e lheqjes së vizave është absurde. Me këtë qeveria turke e vë më shumë veten nën presion. Ajo duhet të plotësojë deri në tetor shtatë kushtet e fundit nga 72 kushtet e BE-së, përndryshe nuk do të ketë heqje vizash për shtetasit turq në BE. Por meqë qeveria turke ka deklaruar edhe se ajo nuk do të plotësojë të paktën një kusht, zbutjen e ligjeve antiterror, ajo e ka bërë vetë të parealizueshëm afatin e tetorit.

Bernd RiegertBernd Riegert

Kërcënimet nga Ankaraja janë kështu më tepër një teatër absurd që ka për qëllim efek politik të brendshëm, por nuk e zgjidh problemin. Po ashtu kërcënimi për prishjen e paktit për refugjatët nuk është krejtësisht i ri. Përfaqësuesit e Turqisë e shprehën një gjë të tillë në maj, pasi donin që ta arrinin liberalizimin e vizave më 1 korrik. Por afati kaloi pa pasoja. Qeveria turke duhet ta ketë të qartë që heqja e kërkesës për vizë për në BE nuk është vetëm një proces teknik, por gjithmonë edhe një vendim politik, i cili zhvillohet në një mjedis politik. Me një vend në një gjendje të jashtëzakonshme, presidenti i të cilit u përball me një përpjekje për grusht shteti dhe tani po ndërhyn disproporcionalisht për standarde të BE-së, nuk ka gjasa të bihet dakord për një hap të tillë.

Në këtë moment liria e vizave është në radhë të parë një trofe politike që presidenti Erdogan do të fitojë prej BE-së. Liria e udhëtimit pa viza për turqit nuk është me rëndësi vitale. Pa dyshim është e vështirë dhe e shtrenjtë për të aplikuar për vizë, por 90 përqind e të gjitha kërkesave miratohen lehtësisht. Kushdo që dëshiron apo ka nevojë për të udhëtuar, mund të udhëtojë.

Dëbimet në Turqi deri tani një përjashtim

Me paktin për refugjatët, Bashkimi Evropian, i kryesuar nga kancelarja Angela Merkel, ka hyrë natyrisht në një lloj varësie ndaj Turqisë. Kufiri i mbyllur midis Greqisë dhe Maqedonisë dhe mundësia për t’i kthyer nga ishujt grekë sërish në Turqi i ka frikësuar aq shumë refugjatët dhe emigrantët saqë ata nuk guxojnë të kalojnë më përmes detit Egje.

De facto për në Turqi janë ekstraduar faktikisht vetëm disa qindra vetë. Midis tyre nuk ka thuajse fare sirianë, për shkak se procedurat e azilit në Greqi zgjasin shumë më gjatë nga sa parashikohet në paktin e refugjatëve të muajit mars. Shërbimi që ofron Turqia nuk lidhet për këtë arsye jo aq me kthimin masiv të emigrantëve dhe azilkërkuesve të refuzuar, por sidomos me kujdesin ndaj refugjatëve dhe emigrantëve në Turqi. Për këtë organizatat humanitare marrin fonde dhe ndihma nga BE-ja, edhe pse Erdogani e mohon këtë.

Turqia mund ta abrogojë nga sot nesër paktin për refugjatët, i cili është vetëm një deklaratë politike dhe jo një traktat sipas së drejtës ndërkombëtare. BE-ja po ashtu. Por çfarë do të ndodhte? Do të shtohej përsëri menjëherë numri i refugjatëve që vijnë përmes detit Egje? Askush nuk mund ta parashikojë këtë me saktësi. Disa ekspertë të BE-së shpresojnë se efekti parandalues do të vazhdojë për aq kohë sa rruga e Ballkanit, pra udhëtimi nga ishujt grekë në Evropën Veriore, do të jetë e e pamundur.

Asnjë solidaritet me Greqinë

E rrezikshme është situata veçanërisht për Greqinë. Aty mund të mblidhen edhe më shumë refugjatë nga sa ka tani. Dhe deri tani shtetet e tjera të BE-së nuk po bëjnë shumë përpjekje për ta lehtësuar Greqinë. Pas kësaj ndoshta ka edhe llogari cinike. Në fund të fundit, sa më e keqe të bëhet situata në Greqi, aq më e madhe do të jetë frika e emigrantëve të rinj për të shkuar atje.

Nëse nga Turqia do të vijnë në fakt përsëri më shumë refugjatë në Greqi, BE-ja duhet të merret të paktën formalisht edhe një herë me rialokimin e diskutueshëm të refugjatëve. Kësaj teme BE-ja iu shmang për shkak të marrëveshjes me Turqinë në muajin prill.

Kjo do ta përkeqësonte në mënyrë dramatike situatën, nëse presidenti turk do ta bëjë vërtetë atë që kërcënoi vitin e kaluar: pra që mund t’i fusë në çdo kohë refugjatët në autobusë dhe t’i dërgojë përtej kufirit në Greqi ose Bullgari. Tingëllon e sforcuar? Në qoftë se mbajmë parasysh situatën aktuale politike në Turqi, vërtetë që nuk mund të përjashtohet më asgjë .