dgreca – Page 278 – Dielli

PARADOKSE

December 13, 2020 by dgreca

Nga Astrit Lulushi/

Krimi është i shfrenuar, sepse secili prej nesh e pranon, e justifikon, e lejon, i nënshtrohet atij, sepse ne nuk e luftojmë menjëherë, aty për aty, ku ndodh. Krimi nuk është i shfrenuar sepse nuk kemi burgje të mjaftueshme, se gjyqtarët dhe prokurorët janë shumë të butë, apo se policia është inefikase nga teknikat absurde. Defekti është në karakterin tonë. Ne jemi një komb frikacakësh që u bëjmë dredha përgjegjêsive. Një shoqëri nuk mund të drejtohet, ose problemet e saj nuk mund të përballohen, nëse njerëzit nuk mbajnë përgjegjësi për atë që bëjnë. Sado paradoksale që tingëllon; “atje ku nuk ka ligj nuk ka liri”, shkruan John Locke, edhe pse ligjet kufizojnë lirinë.

Protesta në Shkodër…

December 12, 2020 by dgreca

Nga Gresa Kraja/*

Një efektiv i Policisë së Shqipërisë ka mbetur i plagosur gjatë përleshjeve me protestuesit në qytetin e Shkodrës, pasi këta të fundit thyen dhe i vunë zjarrin orendive të selisë së Partisë Socialiste në këtë qytet. Marshimi i thirrur në Shkodër për protestë ndaj vrasjes së Klodian Rashës nga një polic në një lagje të Tiranës, përshkallëzoi në dhunë kur një grup të rinjsh iu drejtua mesditën e së shtunës selisë së Partisë Socialiste. Policia reagoi duke shpërndarë turmën me gaz lotsjellës.

Kryeministri i Shqipërisë Edi Rama përmes një postimi në Twitter ka akuzuar opozitën për keqpërdorim dhe abuzim të të miturve.

“Terroristët e Boko Haramit i përdorin fëmijët si kamikazë, nuk janë të parët në radhën e abuzuesve të minorenëve! Historia njeh disa raste kriminale me fëmijët, por që të shfaqej në Shqipëri si streha e fundit e maskarallëkut të politikës opozitare kjo është tejet e dhimbshme”, ka shkruar Rama.

Kryetarja e Bashkisë së Shkodrës, Voltana Ademi nga Partia Demokratike, me anë të një statusi në Facebook, ka reaguar lidhur me ngjarjen. Ajo ka thënë se të rinjtë nuk ishin pjesë e protestuesve, ndërsa theksoi se pasi ka parë përshkallëzimin e situatës ka njoftuar autoritetet e policisë.

“Qytetarët duhet ta dinë se kur disa të rinj, të panjohur dhe të pambështetur nga protestuesit e tjerë, u drejtuan nga selia e PS, njoftova autoritetet më të larta të Policisë në Shkodër. Policia ndenji me duar në xhepa, duke parë dhunimin e selisë, pa bërë asnjë veprim. Të rinjtë dhe qytetarët nuk duhet të bien pre e asnjë provokimi kriminal, siç ka ndodhur në Tiranë nga regjimi i Edi Ramës dhe siç po ndodh sot në Shkodër. E drejta për të protestuar është legjitime dhe ajo duhet të ushtrohet pa pengesa dhe tejkalime”, shkruan Voltana Ademi.

Nga ana tjetër, zyrtarë të Partisë Socialiste kanë thënë se ngjarja është nxitur nga opozita. Drejtuesi i shtabit elektoral të socialistëve për qarkun Shkodër, Ilir Beqja tha se tashmë pas djegies së selisë së PS-së protestat nuk kanë më lidhje me vrasjen e Klodian Rashës.

Shqipëria që disa ditë po përballet me protestues që kërkojnë drejtësi për vrasjen e 25 vjeçarit Klodian Rasha nga një polic. Policia ka bërë të ditur se 87 protestues u arrestuan përgjatë tre ditëve të protestave. Ata kanë thënë se Klodian Rasha ka thyer orën policore kundër pandemisë, ka qenë i armatosur dhe ka bërë disa lëvizje të dyshimta.

Miq dhe familjarë të Rashës kanë thënë se ai nuk ka qenë i armatosur. Ministri i Brendshëm i Shqipërisë, Sandër Lleshaj, dha dorëheqje pas vrasjes së 25-vjeçarit duke thënë se “vendi ka nevojë për një model të ndryshëm sjelljeje politike”.

* Evropa e Lire/ Fotografite-Kortezi MAPO

Sfida të reja për PD në 30 vjetorin e themelimit

December 12, 2020 by dgreca

Partia Demokratike, që ka hyrë në histori si partia, e cila rrëzoi regjimin komunist në Shqipëri, feston 30-vjetorin e themelimit. Mesazhe urimi vijnë edhe nga politikanë europianë.

Partia Demokratike, (PD) e para dhe më e madhja Parti Opozitare në Shqipëri feston të shtunën (12.12) 30 vjetorin e themelimit të saj. Ajo ka hyrë në histori si partia që rrëzoi diktaturën komuniste, më të egrën ndër vendet e ish-Europës Lindore komuniste.

“30 vjet më parë u ngritëm nga hiri i një vendi të shkatërruar. Ne sollëm demokracinë, anëtarësuam Shqipërinë në NATO, dhe bëmë të mundur lëvizjen e lirë, pa viza, ne jemi zëri i popullit që nga dita kur përmbysëm diktaturën komuniste, që nga ditët në shesh ne jemi në shërbimin të shqiptarëve, jemi zëri i tyre,” theksoi Lulzim Basha, kryetar i i PD, në një video mesazh të publikuar të shtunën në median sociale.

PD u themelua 1 ditë pas shpalljes së pluralizmit politik nga presidenti i fundit komunist, Ramiz Alia, dhe 3 ditë pas Lëvizjes Studentore, më 8 dhjetor 1990, duke ndezur shkëndijën e protestave që sollën përmbysjen e regjimit komunist, 46 vjeꞔar. Kryetari i parë i PD, Sali Berisha, mbetet lideri i saj historik dhe një nga politikanët kryesorë të së djathtës në Shqipërinë post- komuniste. Ai ka qenë President i Republikës, 1992-1997 dhe Kryeministër në dy mandate, 2005-2013.

Ne shkurt të vitit 2019 deputetët e Partisë Demokratike hoqën dorë nga mandatet e tyre parlamentare dhe nisën protestat 4 mujore për rrëzim të kryeministrit Rama, i akuzuar prej se ” fitoi mandatin e dytë qeverisës, 2017-2021 me vota të vjedhura”.

PD nuk mori pjesë në Lokalet 2019 gjë që solli që nga 61 bashki që ka Shqipëria 60 prej tyre të drejtohen nga kryetarë bashkish, që i përkasin PS në pushtet.

Sfida të reja përpara për PD

Donald Tusk, Presidenti i Partive Popullore Europiane, ku bën pjesë edhe PD, në mesazhin e urimit për 30 vjetorin e themelimit thekson se ajo ” i dha fund regjimit komunist dhe orientoi Shqipërinë drejt Evropës”. “PD ka sfida të reja përpara” vë në dukje Donald Tusk.

Kreu i Unionit Demokrat Ndërkombëtar (IDU), Stephen J. Harper në mesazhin e tij të urimeve thekson se ky Union ” ka besuar tek PD si një mbështetëse e vendosur e lirisë dhe demokracisë në kushte shumë të vështira të të bërit politikë. Ne jemi shumë të vetëdijshëm për sfidat e përditshme që përballet PD si parti politike në Shqipëri”. Ish-deputetët e PD janë pjesëmarrës në reformën zgjedhore, duke u bërë kështu pjesë e sistemit politik, edhe pse jashtë Parlamentit. PD do të marrë pjesë në zgjedhjet parlamentare të radhës, në prill 2021.

Protestat, të shëndetshme për Demokracinë, Dhuna e Pa Pranueshme

December 12, 2020 by dgreca

Nga Zenel Çeliku*/

Pak ditë më parë ndodhi ajo që tashmë e kemi parë, është vrarë në mënyrën më të pa përgjegjshme një 25 vjeçar pa asnjë arsye ligjore. Kjo shkaktoni zemërimin mbarë të shoqërisë civile e cila rezultoi në protesta të forta ku pjesa dërmuese ishin të rinj që dënonin vrasjen e beftë të 25 vjeçarti Klodian Rasha.

Në parim protesat të cilat marin shkak nga ngjarje shumë të rënda siç është rasti I të ndjerit Klodian Rasha, janë apsolutisht të shëndetshme, janë të mirprituara të cilat kërkojnë vëmëndjen dhe mbështetjen e mbarë shoqërisë. Por protestat nuk duhet të degradojnë me pjesmarjen e politikës dhe nuk duhet të shkaktojnë dhunë dhe demtime tek prona private, deri tek Muzeumi Kombëtarë dhe më e shëmtuara dhunë deri tek Bibloteka Kombëtare. Protestat e këtij rasti e dhanë rezultatin e tyre duke nxjerre përgjegjësinë e vrasjes së 25 vjeçarit, arrtitën të detyrojnë Ministrin e Brëndshëm Lleshaj, që të jepte dorëheqje nga posti i tij. Ndoshta akti I dorëheqjes së Lleshajt kishte më shumë moral dhe qytetari, por përgjegjësia ligjore ishte dhe I takonte dikuj tjeter. Piksëpari, duhej të jepte dorëheqje Drejtori I Policisë të Qarkut Tiranës, e pse jo, edhe Drejtori i Përgjithshëm I Policisë së Shtetit . Gjithsesi, dorëheqja e Lleshajt sikur e mbylli qarkun e përgjegjësisë e cila tashmë ka ngelur tek polici I cili në mënyrë të papërgjegjshme mori jetën e Klodian Rashës. Shumë kush iu bashkua këtyre protestave me qëllimin për të dënuar dhunën policorë, shumë kush u përfshi në veprimet emocionale të protestave. Shumë nga shoqëria civile mund të ketë këndvështrime apo qëndrime të ndryshme për mënyrën e të protestuarit, por mos të harojmë se momentet emocionale bëjnë të veten dhe protestuesit pa kuptuar dalin nga vetja. Ka qytetarë që mendojnë se protestat duhet të jenë pa dhunë, ka nga ata që mendojnë se qytetarët kanë të drejtë edhe të rrebelohen dhe për pasojë të ushtrojnë edhe dhunë, ka qytetarë që dalin në rrugë për të protestuar fort dhe larg dhunës, ka qytetarë që dënojnë dhunën ndaj policëve, sikurse ka nga ata qytetarë që janë kundër protestës në rrugë, por kur vjen moment ata e shprehin revoltën e tyre me votë duke u organizuar në rrjete sociale. Dhe gjithkush duhet ta respektojë mendimin dhe qëndrimin e tjetrit por pa lënduar askënd.

Mbarë shoqëria shqiptare I ka ndjekur me vëmëndje këto protesta të cilat për fat të keq kanë përfunduar në dhunë sociale, por pse ndodhën këto veprime të dhunshme? A ka skenar politik? A përjashtohet mundësia se brënda protestuesve ka edhe politikë? Pse Kryeministri Rama nuk kërkon takim me një përfaqësi të protestuesve? A do të kemi protesta të tjera të dhunshme? Këto pyetje e kanë përgjigjen brenda protestusve të cilët qëllimin e tyre për të dënuar dhunën në polici e kanë shprehur dhe e shprehin me akte dhune të cilat realisht janë të papranueshme. Mbrëmë DW në emisionin e lajmeve, ndër të tjera dha edhe sekuenca filmike nga dhuna e protestusve dhe sekuenca filmike nga dhuna e policisë ndaj protestuesve. Si shumë qytetarë edhe unë jamë ndjer keq, por në fund të fundit është realitet. Është për të ardhur keq kur në ditën e dytë protesta përfundoi me sulme të dhunshme ndaj Muzet Kombetar, ndaj Biblotekës Kombëtare dhe drejt bizneseve private të cilat po mbijetojnë me shumë vështirësi si pasojë e Covit 19. Dhunën askush nga shqiptarërt nuk e pranojnë, sepse më shumë se kushdo, janë shqiptarët që nëkëto 30 vite e kanë pësuar nga dhuna e herëpashershme. Dhuna është dënuar edhe nga Ambasadori I BE dhe nga Ambasadorja Amerikane të cilët u shprehën egzakt se – ata që kërkojnë të jenë në pushtet duhet të shfaqin aftësinë për të udhëhequr në mënyrë të përgjegjshme, përfshirë edhe duke refuzuar dhunën. Ata që kanë qenë në pushtet më parë nuk duhet të bëjnë gabimet e të kaluarës duke sugjeruar se dhuna është e pranueshme. Ata iu bënë thirrje të gjitha palëve të tregojnë përmbajtje, në përputhje me përgjegjësitë e tyre, në mënyrë që të drejtat e të gjithë qytetarëve shqiptarë të mbrohen dhe që zërat e tyre, gjithashtu të mbrohen të drejtat protestuesve që të kenë mundësi të shprehen por të dëgjohen pa dhunë.

Mbas apelit të fortë të ndërkombëtarëve, duke u nisur nga shqetësimi i qytetarëve për të qëndruar larg dhunës policia dhe protestuesit, le të shpresojmë se protestat në vijim do të jenë larg frikës dhe ankthit qyeteraë, le të shpresojmë se nuk do të sulmohen sërisht institucionet shteterore, nuk do të sulmohen objekte e rëndësisë historike dhe nuk do të dëmtohen bizneset private.

*Zenel Çeliku

TIR-Fax News Agency 12 Dhjetor 2020

AMBASADA AMERIKANE NË TIRANË U KËRKON PALËVE TË REFUZOJNË DHUNËN

December 11, 2020 by dgreca

Ambasada e SHBA-ve në Shqipëri shprehu ngushëllime të thella për familjen dhe miqtë e të riut Klodian Rasha, duke e vlerësuar një tragjedi vdekjen e tij.

Ambasada publikoi një deklaratë, ku thuhet se ambasadorja Yuri Kim ka folur sot me kryeministrin Edi Rama, drejtorin e policisë Ardi Veliu, kryetarin e Partisë Demokratike Lulzim Basha dhe kryetaren e LSI Monika Kryemadhi për të diskutuar të drejtat e qytetarëve dhe përgjegjësitë e drejtuesve.

Ajo ka nënvizuar në këto biseda, sipas deklaratës, se “ata që janë në pushtet kanë përgjegjësinë për të siguruar një hetim të plotë dhe transparent për incidentin, për të ushtruar kufizim në mbrojtjen e sigurisë dhe pronës publike dhe për të siguruar llogaridhënie në të gjitha rastet.

“Ata që kërkojnë të jenë në pushtet duhet të tregojnë aftësinë e tyre për të udhëhequr në mënyrë të përgjegjshme, duke përfshirë refuzimin e dhunës. Ata që kanë qenë në pushtet në të kaluarën, nuk duhet të kompensojnë gabimet e kaluara duke sugjeruar se dhuna është e pranueshme” – thuhet në deklaratë.

Ambasada Amerikane u bëri thirrje të gjitha palëve të përmbahen, në mbajtjen e përgjegjësive të tyre, në mënyrë që të drejtat e gjithë popullit shqiptar të mbrohen dhe zërat e tyre, përfshirë në protestë, të jenë në gjendje të shprehen dhe të dëgjohen pa dhunë.

Ambasadori i BE-së shkroi në rrjetet sociale se ishte shumë i pikëlluar nga ngjarjet e ditëve të fundit dhe ngushëlloi familjen e të riut Klodian Rasha.

“Tani është thelbësore që kjo ngjarje tragjike të hetohet si duhet dhe të vendoset drejtësia, dhe shqetësimet e shprehura paqësisht të dëgjohen. Por dhuna duhet të shmanget në çdo rast, nga të gjitha palët” – shkroi ambasadori Soreca.

Edhe OSBE reagoi se “ligjshmëria dhe rendi publik janë në themel të demokracisë dhe shtetit të së drejtës”.

Prania e OSBE-së në Shqipëri shprehu keqardhjen e saj të thellë për vdekjen e të riut Klodian Rasha dhe besimin se ajo do të hetohet si duhet.

“Ne bëjmë thirrje për përmbajtje nga çdo lloj dhune dhe që të lejohet ligji të veprojë” – deklaroi OSBE-ja.

Ndërkaq, në Tiranë, Durrës e Fier vazhdojnë për të tretën ditë protestat, që shpërthyen pas vrasjes së një të riu nga policia mesnatën e të hënën pranë banesës së tij.

Në rrjetet sociale protestuesit kërkuan vazhdimin e protestave dhe ashtu ndodhi.

Policia shpërndau me ujë dhe gaz lotsjellës protestuesit e mbledhur para kryeministrisë, dhe ata u zhvendosën në zona të tjera. Po ashtu kanë nisur arrestime nga policia.

Tubimi sot nisi me thirrjet “Poshtë Diktatura” dhe “Rama, ik”. Protestuesit kërkuan reformimin e forcave të rendit dhe largimin e drejtorit të përgjithshëm të policisë.

Por kryeministri Edi Rama deklaroi se drejtori i përgjithshëm i policisë nuk do të largohet nga detyra.

Policia bëri të ditur se ka marrë si të arrestuar 59 protestues dhe janë nën hetim janë 116 pjesëmarrës në protesta.

Forcat e rendit kanë shoqëruar edhe të mitur nga mesi i protestuesve, të cilët më pas janë liruar, ndaj u ka kërkuar familjarëve të shmangin bashkimin e fëmijëve të mitur me protestuesit e rritur.

Ministri i punëve të brendshme dha dorëheqjen e parevokueshme një natë më parë, por largimi i tij nga detyra nuk e uli ritmin e protestave, përkundrazi ato u bënë edhe më energjike e më të dhunshme.

Ministria e brendshme, ministria e financave dhe një seri institucionesh të tjera publike pranë sheshit Skënderbej dhe shëtitores Dëshmorët e Kombit pësuan jo pak dëme në fasadat e tyre, kryesisht thyerje dyersh dhe dritaresh, mes të cilave e pësuan edhe Biblioteka Kombëtare dhe Muzeu Kombëtar.

Po ashtu janë dëmtuar jo pak semaforë në kryqëzime, reklama dhe ndricues të rrugëve e trotuarëve, kazanë mbeturinash, pra, objekte publike të administruara nga bashkia, ndërsa protestuesit nuk kanë prekur dyqane apo prona private.

Protesta nisën dy ditë më parë pas vrasjes mesnatën e të hënës nga policia të të riut 25-vjeçar, Klodian Rasha, i cili nuk iu bind patrullës së shërbimit, por u largua me vrap.

Familjarët e tij pohuan se djali kishte dalë vetëm për të blerë një paketë cigare dhe faji i tij i vetëm ishte se nuk kishte maskë anti-covid dhe gjendej jashtë banesës pas mesnate, vrapoi për t’iu shmangur gjobës, megjithatë u vra afër hyrjes së shtëpisë.

Polici që vrau të riun 25-vjecar Klodian Rasha mesnatën e të hënës doli sot para gjykatës, ku u konfirmua masa e arrestit të tij me burg.

Ndërsa qeveria dhe opozita vazhdojnë të shkëmbejnë akuza mbi përgjegjësitë e këtyre ngjarjeve.

Opozita akuzoi qeverinë, kryeministrin, ministrin e brendshëm që po frymëzojnë dhunën në radhët e policisë, gjë që solli edhe vrasjen e të riut 25 vjecar Klodian Rasha, krahas shumë e shumë raste të tjera dhune ndaj qytetarëve kudo nëpë Shqipëri.

Ndërsa kryeminstri Rama shpërndau pak më parë një tjetër mesazh në rrjetet sociale, ku sërish akuzoi presidentin e republikës dhe drejtuesit e opozitës si nxitës dhe orkestrues të dhunës.

Për t’u shënuar është edhe se protestat shpërthyen në kohën kur epidemia Covid-19 po shton përditë e më tepër rastet e qytetarëve të infektuar dhe atyre që po humbin jetën.

Në rrugë e sheshe dalin e përplasen mes tyre qindra qytetarë e policë pa maska sanitare, gjë që sipas mjekëve, edhe këto protesta do të shtojnë infektimet, ashtu si ka ndodhur edhe me protestat e majit, kur u shkatërrua Teatri Kombëtar, dhe policët u përleshën me qytetarët, që mbronin atë.(Sipas Zerit te Amerikes)