Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

A JEMI VËRTETË TË PAVARUR!

by

Nga Simon Shkreli/

Është Ditë Pavarësie!

Isha fëmijë dhe fshehurazi mbaja ne xhep nje fotografi të flamurit kuq e zi! Atdheu im aso kohe ishte i ndaluar për mua! Atdheu im si sot ashtu edhe aso kohe, festonte diten e pavarësisë! Sot historia e Skenderbeut dhe levizja për pavarësi me duken aq surreale saqë kam vështirësi edhe të besoj nëse ata njerëz që u flijuan për atdhe ishin real apo vinin tek ne si legjenda, që të motivojne brezat se ky vend ka pasur edhe ka ende atdhetar, patriote që luftojn për te miren e vendit. Dhe vetvetiu pyes sa herë veten nese realisht ne Shqiptarët jemi te pavarur?

Këto 110 vite a arritem ne të pavarësohemi sa duhet politikisht, ekonomikisht, ushtarakisht, e sa e sa isht isht te tjere?…

Deri para disa vitesh ekonomia jone varej nga dërgesat e emigranteve dhe investimet e tyre. Fermeret tanë nuk kanë as treg te brendshem per shitjen e prodhimeve të tyre, se per eksport as që behet fjalë. Sukses kanë vetëm prodhuesit e “barit” që verës e kultivojnë në bjeshkë e dimrit në shtëpi. Industria prodhuese nuk egziston, turizmi është ende ne “shpargaj”. Natyres i jemi futur me egersi në zemër duke i ngulur hekur e beton, pyjet i shkretuam, fshatrat i boshatisem. Permbytemi ne verë edhe në dimer! Kufinjte na i ruan NATO, radaret i fikin trafikantet e droges, aeroportet dhe portet i falim, minierat i kemi kthyer ne varreza, kanoçet i mbledhin pleqte e femijet. Rruget e urat i vjedhim! Për Kosoven e Albinin themi se i kemi fqinj ndersa Serbinë dhe Aleksandrin vëllezer, ata që kanë mbetur ne Maqedonine e Veriut dhe në Preshevë e dime se egzistojnë, ndërsa për keta ne Ulqin, Tuz, Plavë, Guci e Dacaj të Rozhajes, na bie në mend kur kthehemi nga Budva apo Kollashini!

Është dita e pavarësisë e kujt? E Shqiptarëve të Shqiperisë apo veç e Gjergj Kastriotit, Rilindasve, Ismail Qemalit me shokë, e Martireve, e Adem Jasharit, e herojve që sot nuk jetojnë ? Se ne të gjallët jemi veçse gjallë se të pavarur aspak!

U PAVARSOFSHIM!

Komuniteti Shqiptaro-Amerikan në Staten Island festoi 110 vjetorin e Pavarësisë së Shqipërisë

by

Keze Kozeta Zylo/

Ja, pra, ky është Flamuri Ynë i kuq e me shqiponjën dykrenare të zezë në mest.

Dhe tani, të gjithë bashkë, si një trup i tërë dhe i pandarë, le të punojmë për t’a mburuar, për t’a përparuar e për t’a qytetëruar si i ka hije Atdhenë t’onë të Lirë.

Nga Fjala e Atit të Pavarësisë Ismail Bej Vlorës, më 28 Nëntor, 1912

Në mjediset e LiGreci’s Staaten Restaurant në Staten Island, Komuniteti Shqiptaro Amerikan u mblodh për të festuar 110 Vjetorin e Pavarësisë së Shqipërisë. Mjediset të rregulluara me simbolet e Flamurit tonë Kombëtar, kuq e zi e bënin dhe më festive këtë ditë të shenjtë Kombëtare. Mbrëmja u organizua në nderim të 110-të Vjetorit të Pavarësisë së Shqipërisë. Shqiptarët grupe grupe me flamuj në dorë vinin të gëzuar për të marrë pjesë në këtë aktivitet të bukur për të festuar së bashku.

Mbrëmjen e hapi z.Naser Nika një patriot dhe aktivist i njohur në komunitet i cili ishte organizuesi kyresor i këtij aktiviteti si Albi’s Party në bashkëpunim me z. Genti Holli.

Z. Nika përshëndeti gjithë të pranishmit dhe iu uori atyre Gëzuar Ditën e Flamurit Kombëtar, gëzuar 110 Vjetorin e Pavarësisë së Shqipërisë! Unë i ftova disa lider të Malit të Zi për t’u bashkuar në këtë mbrëmje së bashku dhe për t’i respektuar të zgjedhurit në Ulqin tha midis të tjerash z. Nika.

Më vonë ai ftoi në foltore z. Faik Nika Kryetari i Këshillit Kombëtar të Shqiptarëve në Mal të Zi. Keto vizita vëllazërore përforcojnë lidhjet tona mes jush dhe ne ndihemi si në shtëpinë tonë. Është njerëzore të kemi respekt reciprok dhe ju falënderoj. Faleminderit z. Naser Nika për ftesën i cili pëpiqet t’i bashkojë shqiptarët dhe të kemi lidhje të përbashkëta duke vazhduar me pëpjekjet tona të vazhdueshme tha z. Nika.

Fatmir Gjeka Ministër i të Drejtave të Njeriut dhe të Pakicave në Mal të Zi iu uori gjithë pjesëmarrësve gëzuar festat dhe i falënderoj për mikpritjen. Është hera e dytë që vimë brenda dy muajve dhe duhet të realizojmë projekte të mira me vendin, vëllezërit dhe motrat. Vizita jonë është zyrtare dhe jemi takuar me përfaqësus në Staten Island, në NY etj.

Z. Omer Bajraktari Kryetari i Bashkisë së Ulqinit tha midis të tjerash se kemi pasur disa takime me të gjithë përfaqësuesit dhe kemi rënë dakord për një bashkëpunim më të ngushtë për ta ndihmuar vendin tonë.

Dr. Bari Ceka falënderoi të gjithë pjesëmarësit dhe i uroi nga zemra si i zgjedhur Qytetar Nderi në New York. Falënderoi të gjithë shqiptarët dhe shtetin e Nju Jorkut dhe premtoi se do t’i shërbej gjithë popullit me nder dhe profesionalizëm.

Dr. Bari Ceka është jo vetëm një doktor i njohur dhe shumë i dashur, por dhe dallohet për humanizëm dhe ndihmat që i ka dhënë vendlindjes së tij dhe më gjerë.

Sabri Salaj Nënkryetar i Komunës së Ulqinit shprehu kënaqësinë që ndodhej midis bashkatdhetarëve dhe tha se këto projekte në shërbim të vendit tonë do të jenë afatgjatë dhe ne do t’i mbajmë lidhjet dhe më ngushtë me vëllezërit dhe motrat shqiptare në Diasporë.

Z. David Carr Këshilltar në Bashkinë e Nju Jorkut iu uroi gjithë pjesëmarrësve për 110 Vjetorin e Pavarësisë së Shqipërisë dhe tha se e kam kënaqësi dhe detyrë të bashkëpunojë dhe të suportojë Komunitetin Shqiptar. Ai ishte krenar që Dr. Bari Ceka ishte shpallur qytetar Nderi i Nju Jorkut nën kujdesin e tij dhe gjithë organizuesve që e propozuan.

Znj. Jessica Scarcella-Spanton Senatore e shtetit të Nju Jorkut iu uroi gjithë pjesëmarrësve gëzuar 110 Vjetorin e Pavarësisë së Shqipërisë. Komuniteti shqiptar është një komunitet i respektuar dhe është në nderin tim të suportoj shqiptarët kudo ku jetojnë.

110 Vjetori i Pavarësisë së Shqipërisë për Komuniteti Shqiptaro Amerikan në Staten Island do të ngelet pëgjithmonë në kujtesën e tyre, pasi ata e festuan së bashku Diasporë dhe vendlindje ashtu siç ka thënë Ismail Vlora në fjalën e tij se: “Le të punojmë për t’a mburuar, për t’a përparuar e për t’a qytetëruar si i ka hije Atdhenë t’onë të Lirë”.

Në fund disa personalitete shqiptare dhe amerikane dhanë intervista të shkurtra për TV “Alba Life” të cilat do të transmetohen së shpejti në kanalet televizive.

Pjesëmarrësit u argëtuan nga këngëtarët Taulant Bujaniu, Burak Vehapi dhe Donjeta Morina.

Aktiviteti u filmua nga z.Qemal Zylo themelues dhe producent si dhe Enes Basha bashkëpunëtor për TV “Alba Life”, New York.

28 Nëntor, 2022

Staten Island, New York

HASAN PRISHTINA DHE ADEM JASHARI, DY HALLKAT MË TË RËNDËSISHME TË PËRPJEKJEVE TONA PËR LIRI E PAVARËSI

by

Çdo njëri nga ne sot ndjehet krenar por edhe me fat që si gjeneratë dhe si shoqëri arritëm të kurozojmë fitoren që sjell sakrifica për liri. Kuptohet që kjo sakrificë kishte kosto të lartë, por për lirinë e atdheut, çka do që të bëjmë, është pak.

Megjithatë detyrim i yni moral e patriotik është që të nderojmë kujtimin për heronjtë dhe ideologët tanë, pa të cilët nuk do ta kishim edhe lirinë që kemi sot.

Pra, imagjinojeni për një moment sikur në shiritin e kohës të mungojnë dy figura markante të kombit tonë – Hasan Prishtina dhe Adem Jashari.

A thua vallë si do të dukej ajo kohë e cila nuk do të kishte këta dy kolosë të mendimit e të pushkës? Si do ta interpretonim ne sot historinë dhe çfarë të ardhme do të kishte kombi ynë nëse do të mungonte fuqia e ndikimit politik të Hasan Prihtinës në lëvizjen tonë kombëtare dhe nëse do të mungonte rezistenca e Adem Jasharit, e cila u shndërrua në kushtrim lirie për qindar e mijëra djem e vajza të rreshtuar në UÇK-në tonë legjendare?

Por, fatbardhësisht, ata i kishim në momentin dhe vendin e duhur, atëherë kur për fatin e kombit tonë duhej të vendosnim ne, por ata i kemi edhe sot këtu në mesin tonë….

Ideologu i Pavarësisë dhe i përpjekjeve tona shtetndërtuese – Hasan Prishtina sot ndodhet krah për krah me Komandantin legjendar Adem Jashari këtu në fshatin Mushtisht, dhe ky është një nder modest që ne si gjeneratë, por edhe si familje po ua bëjmë këtyre dy vigajve të kombit tonë. Me këtë, Kosovës po i kthehen vlerat e saj edhe jasht qendrave, sepse këto vlera ndodhen të shpërndara si thërmija të çmueshme dhe ato tash vijnë natyrshëm dhe marrin formën e këtyre dy figurave në bronz që percjellin historinë njëshekullore te luftes për liri e dinjitet kombëtar, duke filluar nga Hasan Prishtina dhe Adem Jashari .

Hasan Prishtina dhe Adem Jashari, edhe pse vepruan në kohë e kontekste të ndryshme politike e kombëtare, ata megjithatë përfaqësojnë hallkat më të rëndësishme të përpjekjeve tona për liri e pavarësi . Këto dy figura markante do të donte t’i kishte çdo komb i përparuar i botës, dhe për rrjedhojë një komb që në gjiun e vet ka arritur të kultivojë figura të tilla, ai komb jo vetëm që e meriton lirine, por duhet të merret edhe si model për kombet tjera, siç po merret si model në shumë doktrina ushtarake të botës rezistenca titanike e Familjes Jashari e cila me aktin e vetflijimit dëshmoi se nuk ka fuqi në botë që mund ta shuaj dëshirën dhe vullnetin e një populli për liri dhe pavarësi.

Prandaj jo edhe rastësisht sot në Mushtisht, krah për krah me Hasan Prishtinën, po e vendosim edhe bustin e komandantit legjendar Adem Jashari, pikërisht kur ditëlindja e tij sot përkon me Ditën e shenjtë të Flamurit tone kombëtar.

Urime ditëlindjen komandant dhe kujtimi për ty dhe familjen tënde qoftë i përjetshëm.

Duke qenë krah për krah njëri tjetrit, Hasan Prishtina e Adem Jashari, tash e tutje do të jenë edhe një arsye më shumë që nga lulet e bukura të Sharrit të ndërtojmë kurorën e lavdisë dhe respektit për gjithë kontributin madhor që ata kanë dhënë për kombin. Heronjtë vetëm fizikisht shkojnë nga kjo botë. Ata vazhdojnë të jenë me ne, edhe atëherë kur menaxhimi i proceseve ka nevojë për një vëzhgim të heshtur të heronjve tanë. Jemi me fat që rrugëtimi ynë si komb u trasua falë angazhimit dhe sakrificë sublime të Hasan Prishtinës dhe Adem Jasharit, nën vëzhgimin e të cilëve do të jenë edhe proceset në vijim.

Në fund faleminderoj organizatorët dhe të gjithë juve që sot me praninë tuaj këtu nderuat dy figurat tona më të dashura- Hasan Prishtinën dhe Adem Jasharin, sepse e pakta që mund të bëjmë ne është të freskojmë kujtesën duke sjellë në vëmendje lavdinë e heronjve tanë.

Lavdi dhe Urime Dita e Flamurit të Pavarësisë!

Mehmet PRISHTINA

Mushtisht, 28 Nëntor 2022

Flamuri Kuq e Zi përsëri valon në sheshin e bashkisë së Philadelphias

by

Anekënd botës shqiptarët sot festojnë 28 Nëntorin – Ditën e Flamurit, 110 Vjetorin e Shpalljes së Pavarësisë së Shqipërisë. Edhe në Philadelphia u organizua një veprimtari madhështore, ngritja me ceremoni e flamurit Kuq e Zi në sheshin e bashkisë. Që nga festimi i 100 Vjetorit të Shpalljes së Pavarësisë së Shqipërisë më 2012, shoqata “Bijtë e Shqipes” në bashkëpunim të ngushtë me qytetin e Philadelphias organizon ngritjen e flamurit tonë në bashkinë e qytetit me një ceremoni solemne. Pra, edhe ne e shënojmë një vit jubilar, dhjetëvjetorin e organizimit të kësaj ceremonie mjaft domethënëse. Kjo veprimtari nuk është thjeshtë një akt ku ngritet flamuri në mënyrë mekanike, por është shndërruar në një festë të bukur e madhështore ku mblidhen shqiptarët të veshur me rrobat më të bukura, shoqëruar me simbole kombëtare, këndojnë e vallëzojnë, shprehin krenarinë e të qenit shqiptar, shpalosin vlerat tona kombëtare para qytetit të Philadelphias. Ngritja e flamurit Kuq e Zi në bashkinë e Philadelphias, vendlindjen e ShBA-ve është nder për Shqipërinë e gjithë shqiptarët, posaçërisht për bashkësinë shqiptaro – amerikane të Philadelphias.

Edhe këtë vit, në datën 28 nëntor, pikërisht në ditën e shpalljes së pavarësisë së Shqipërisë, u organizua ceremonia e ngritjes së flamurit në sheshin e bashkisë. Numri i pjesëmarrësve ishte shumë i madh në këtë ceremoni, gati i tërë sheshi ishte mbushur me bashkatdhetarë të gëzuar, të veshur me rrobat më të bukura, disa edhe me veshje kombëtare. I tërë sheshi jehonte nga këngët dhe vallet shqiptare. I tërë sheshi ishte zbukuruar me flamuj të shumtë shqiptarë e amerikanë. Kësaj ceremonie ia shtuan madhështinë edhe pjesëmarrja e mysafirëve tanë të nderuar: zëvendës ambasadori i Republikës së Kosovës në Uoshington, z. Bujar Maxhuni dhe këshilltari i kësaj ambasade, z. Drilon Zogaj; kryetari i Këshillit të Qarkut të Kukësit, z. Avdullah Domi, i cili edhe e ngriti flamurin në mënyrë ceremoniale. Fjalën e rastit e mbajti kryetari i shoqatës “Bijtë e Shqipes”, z. Bujar Gjoka. Z. Gjoka foli për rëndësinë historike të kësaj Dite të Madhe, ndihmën e Amerikës dhënë Shqipërisë e Kosovës si dhe rolin e bashkësisë shqiptaro – amerikane në zhvillimin e qytetit të Philadelphias. Ndërsa në emër të kryebashkiakut (Mayor-it) të Philadelphias përshëndeti zonja Sheila Hess, Përfaqësuese e Qytetit (City representative) të Philadelphias, e cila edhe i dorëzoi kryetarit të shoqatës, z. Bujar Gjoka, Proklamatën me të cilën kryebashkiaku e nderonte Shqipërinë, kombin shqiptar dhe bashkësinë shqiptaro – amerikane të Philadelphias, për nder të 28 Nëntorit, Festës sonë Kombëtare dhe e shpallte 28 Nëntorin si Ditën e Shqipërisë në Philadelphia. Në këtë ceremoni përshëndeti edhe z. Avdullah Domi. Nga Zyra për Çështjet e Imigrantëve, përshëndeti z. Alain Joinville. Shoqata “Bijtë e Shqipes” e nderoi me një mirënjohje zonjushën, Katie Katro, gazetare në kanalin 6, stacion lokal i rrjetit televiziv, abc. Zonjushet, Sara Matraku dhe Silvana Çela e moderuan për bukuri këtë ceremoni madhështore.

Për këtë veprimtari dhe veprimtaritë tjera të organizuara nga shoqata “Bijtë e Shqipes” për nder të 28 Nëntorit, në ditët në vazhdim do të përgatitet një material pak më i detajuar.

Philadelphia, më 28 nëntor, 2022

Sadik Elshani është anëtar i Këshillit Drejtues dhe ish kryetar i shoqatës “Bijtë e Shqipes”.

Fotot: Eva Dori – gazetare

VATRA DHE SHQIPTARËT E AMERIKËS FESTUAN 110 VJETORIN E PAVARËSISË SË SHQIPËRISË DHE FESTËN E FLAMURIT KOMBËTAR

by

Sokol Paja/

Federata Panshqiptare e Amerikës Vatra bashkoi patriotët shqiptarë nga të gjitha shtetet e Amerikës, Kanadasë e Europës në New York dhe festuan me gëzim e madhështi 110 vjetorin e Pavarësisë së Shqipërisë dhe Festën e Flamurit Kombëtar. Me pjesëmarrjen ekskluzive të Ambasador Frenk Wisner, Konsullit të Nderit të Shqipërisë Ekrem Bardha, patriotit të madh Jim Xhema, ish-Kryeministrit të Kosovës Avdullah Hoti, Mark Gjonaj, Irfan Hysenbelliu, Harry Bajraktari e shumë personalitete të shquara të kombit tonë e bënë mbrëmjen patriotike të paharrueshme. Në një ceremoni mbresëlënëse patriotike: patriotë shqiptarë, autoritete fetare, veprimtarë, kontribues të çështjes kombëtare, përfaqësues të të gjitha shoqatave shqiptare, vatranë, media, familje patriotike shqiptare në diasporën e Amerikës, përfaqësues zyrtar shtetëror nga Prishtina e Tirana, deputetë, ish-kryeministra, ish-ambasadorë, profesorë, miq e të ftuar, festuan për orë të tëra nën tingujt e muzikës së mrekullueshme shqiptare me gëzim, krenari e vëllazëri. 28 Nëntori, festa e Flamurit Kombëtar si themeli dhe identiteti ynë kombëtar shqiptar bashkoi si kurrë më parë shqiptarët nën një flamur për të festuar dhe uruar njëri-tjetrin në ditën e lirisë së shtetit e kombit shqiptar. Pavarësia si datë e veçantë në kalendarin e shtetit dhe të kombit shqiptar ku Vatra ka meritë historike në të gjitha fazat historike ku ka kaluar shteti e kombi ynë. Nën drejtimin brilant të dr.Pashko Camaj, mbrëmja patriotike filloi me këndimin e dy himneve kombëtare të Shteteve të Bashkuara të Amerikës nga Mikela Nonaj dhe himinin kombëtar të Shqipërisë nga Gëzim Nika (Mjeshtër i Madh). Më pas fjalën e mori kryetari i Vatrës i cili u uroi mirëseardhjen të ftuarve dhe renditi në mënyrë kronolgjike rëndësinë e datës historike të 28 Nëntorit dhe kontributin e jashtëzakonshëm të Vatrës në dobi të shtetit e kombit shqiptar. Imam Edin Gjoni bekoi darkën e Pavarësisë dhe u ndal ndër të tjera te kontributi i burrave të shquar të kombit në pavarësinë e Shqipërisë dhe ndihmën e Shteteve të Bashkuara të Amerikës për çështjen kombëtare. Konsulli i Nderit z.Ekrem Bardha, Ambasador Frenk Wisner dhe Jim Xhema në fjalimet e tyre përshëndetëse për të pranishmit kaluan në retrospektive festimet e Pavarësisë së Shqipërisë, ndihmën që Shtetet e Bashkuara të Amerikës i kanë dhënë Kombit shqiptar sidomos në Pavarësinë e Kosovës dhe në mbështetjen e vazhdueshme të çështjes shqiptare në institucionet amerikane. Ata u ndalen dhe në kontributin dhe rolin e Vatrës si një instutucion i fortë atdhedashurie në mërgatën shqiptare të Amerikës, si një bashkësi patriotike historike në përpjekjen për shqiptarinë, historinë kombëtare të Shqipërisë dhe të Shteteve të Bashkuara të Amerikës. Këngëtarët Gëzim Nika (Mjeshtër i Madh), si drejtues artistik dhe kryetar i Darkës Gala organizoi dhe performoi në mënyrë të shkëlqyer bashkë me Grupin Rozafati të drejtuar nga koreografe Angjelina Nika (Mjeshtër i Madh), këngëtaret e mirënjohur Alberie Hadergjonaj, Barbana Dini, Argjend Lloga, duke e shëndërruar këtë festë patriotike në një natë magjike me  mbresa të jashtëzakonshme te të gjithë pjesëmarrësit. Si kurrë më parë, Federata Panshqiptare e Amerikës Vatra udhëhoqi festimet dhe organizimet solemne të festimit të 110 vjetorit të Pavarësisë së Shqipërisë ku Vatra ka pjesën e saj të jashtëzakonshme në historinë e shtetit shqiptar, tregoi edhe këtë herë forcën, seriozitetin, shpirtin e saj patriotik në organizimet kombëtare në nder të flamurit e historisë sonë kombëtare. Federata Panshqiptare e Amerikës Vatra me rastin e Festës së Flamurit Kombëtar dhe të 110 vjetorit të Pavarësisë së Shqipërisë nderoi me: “Mirënjohje” miq të kombit tonë, personalitete të shquara të diasporës shqiptare në Amerikë e më gjërë për kontributin e tyre të jashtëzakonshëm në dobi të çështjes kombëtare dhe fushave të spikatura me dobi dhe interes publik kombëtar. Drejtuesit më të lartë të Vatrës kryetari Elmi Berisha, nëkryetari Alfons Grishaj, Presidenti i Nderit Agim Rexhaj, Kryetari i Këshillit të Vatrës Kolec Ndoja, përgjegjësi për degët, lobimin, zgjerimin dhe bashkëpunimin Mondi Rakaj nderuan me Mirënjohje: Ambasador Frenk Wisner, Ekrem Bardha, Avdullah Hoti, Irfan Hysenbelliu, Adem Belliu, Beqir Sina, Dritan Haxhia, Agim Aliçkaj, Bajram Hajdarmetaj, Sandra Bojaj (Tv Boin), Lulash Palushaj, Anton Raja, Halil Mula, Ruzhdija Axhoviq. Gëzuar Pavarësinë dhe Festën e Flamurit Kombëtar. Zoti e bekoftë Shqipërinë, Zoti i bekoftë Shqiptarët, Zoti i bekoftë miqtë dhe aleatët e përjetshëm të popullit, shtetit e Kombit Shqiptar.