Ekonomi – Page 199 – Dielli

PROJEKTLIGJI PËR BUXHETIN E REPUBLIKËS SË KOSOVËS PËR VITIN 2017

November 23, 2016 by dgreca

KOSOVE- LAJMI I FUNDIT: KOMISIONI PARLAMENTAR PËRKRAHU NË PARIM PROJEKTLIGJIN PËR BUXHETIN E REPUBLIKËS SË KOSOVËS PËR VITIN 2017/

1 Qeveria e Kosoves ok -Komisioni përkrahu edhe kërkesën e Ministrisë së Diasporës, për mbështetje financiare lidhur me manifestimin për: “Ditët e javës së kulturës në diasporë”/

Buxheti i Republikës së Kosovës, i paraparë për vitin 2017, do të jetë 2 miliardë e një milion euro, tha ministri i Ministrisë së Financave Avdulla Hoti, gjatë prezantimit të Projektligjit për Buxhetin e Republikës së Kosovës, në mbledhjen e sotme të Komisionit për Buxhet dhe Financa, të kryesuar nga Naser Osmani, kryetar.

Ky Projektbuxhet, tha në vijim ministri Hoti, bazohet plotësisht në dokumentet strategjike që i ka të aprovuara Qeveria dhe Kuvendi i Kosovës, përfshirë këtu edhe Strategjinë Kombëtare për Zhvillim, Programin e Qeverisë dhe Programin për Reforma Ekonomike.

Ai më pas sqaroi se lidhur Projektligjin për Buxhetin, paraprakisht janë konsultuar të gjitha organizatat buxhetore, përfshirë edhe komunat, ndërkaq, anëtarët e Komisionit i siguroi se ndarja e mjeteve është bërë në mënyrë shumë të balancuar. Duke folur për investimet e parapara, ministri Hoti, sqaroi në detaje investimet në secilin sektor të paraparë. Me këtë projektbuxhet, vijoi ministri, synojmë të arrijmë dy objektiva: të krijojmë hapësirë më të madhe për investime kapitale, si dhe t’i mbajmë nën kontrollë shpenzimet rrjedhëse.

Pasi që njoftoi se projektbuxheti i propozuar është i harmonizuar në tërësi me qëndrimin e Fondit Monetar Ndërkombëtar, ministri u shpreh i bindur se, buxheti i paraparë për vitin që vjen, do ndikojë në një rritje ekonomike më të lartë se 4%.

Pas kësaj, anëtarët e komisionit zhvilluan debat lidhur me Projekt-buxhetin e propozuar, ndërkaq, përfaqësuesit e opozitës, pasi shprehën vërejtjet dhe mospajtimin e tyre lidhur me këtë projektligj, u deklaruan kundër edhe gjatë procesit të votimit.

Ky projektligj, ndonëse (me shumicë votash) u përkrah në parim nga anëtarët e komisionit, kundër votoi edhe deputeti, Shukri Buja (PDK), përfaqësues i koalicionit qeverisës në Komision.

Në këtë mbledhje, Komisioni përkrahu edhe kërkesën e Ministrisë së Diasporës, për mbështetje financiare lidhur me manifestimin për: “Ditët e javës së kulturës në diasporë”.

Në këtë mbledhje, komisioni shqyrtoi dhe përkrahu edhe këto projektligje: Projektligji për sponsorizime dhe donacione në fushën e kulturës, rinisë dhe sportit dhe amendamenteve të Komisionit funksional për Arsim, Shkencë, Teknologji, Kulturë, Rini dhe Sport, Projektligjin për Akademinë e Drejtësisë dhe amendamenteve të Komisionit funksional për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit, Raportin me rekomandime për Projektligjin për Ndihmën Shtetërore dhe Projektligjin për ndryshimin dhe plotësimin e Ligjit për Fondet Pensionale të Kosovës, i ndryshuar dhe plotësuar me Ligjin nr.04/L-115 dhe Ligjin nr. 04/L-16

Ambasadori i SHBA në Kosovë, Greg Delawie përkrahje Agjencisë Kundër Korrupsionit

November 23, 2016 by dgreca

PRISHTINË – Gazeta DIELLI/ Drejtori i Agjencisë Kundër Korrupsionit, Shaip Havolli priti te Marten në takimin e parë njoftues Ambasadorin amerikan në Kosovë Greg Delawie, me të cilin bisedoi rreth angazhimeve të Agjencisë në zhvillimin e politikave kundër korrupsionit në Kosovë.

Gjatë këtij takimi të përzemërt, Havolli e njoftoi diplomatin amerikan me prioritetet e Agjencisë dhe sfidat me të cilat po përballet në zhvillimin e politikave anti-korrupsion, ndërsa falënderoi për përkrahjen e vazhdueshme që qeveria amerikane ka dhënë në fuqizimin e klimës anti-korrupsion në Kosovë dhe për ndihmën që mekanizmat amerikanë u kanë dhënë institucioneve kosovare që janë të mandatuara për zbatimin e ligjit. Havolli përmendi angazhimet e skajshme që është duke i bërë Agjencia në forcimin e politikave kundër korrupsionit, për të siguruar zbatueshmërin maksimale të kuadrit ligjor.

Nga ana e tij, ambasadori Delawie duke uruar Havollin për detyrën e re i siguroi mbështetje të parezervë në punën e tij dhe në angazhimet në luftimin dhe parandalimin e korrupsionit në Kosovë, që në fakt janë dy shtyllat kryesore të misionit të Agjencisë. Ai poashtu shprehu gatishmërinë për thellimin e bashkëpunimit dhe garantoi përkrahje për Agjencinë në fuqizimin e politikave anti-korrupsion drejt realizimit me sukses të mandatit të saj.

Të dy bashkëbiseduesit u dakorduan për fuqizimin e përpjekjeve për luftimin dhe parandalimin e korrupsionit në Kosovë që esencialisht sigurojnë zhvillimin e një shoqërie me vlera demokratike./b.j/

TRUKET E NARKOTRAFIKANTËVE

November 17, 2016 by dgreca

PËRDORIMI I MBIFARËRAVE DHE KULTIVIMI NË TUNELET E NËNDHESHME./

Shkruar nga Leonard Berberi/ “Corriere della Sera” e enjte, 17 nëndor 2016/

Misionet e para në helikopter të Rojes së Financës mbi plantacionet e trafikantëve shqiptarë u pritën me të shtëna kallashnikovi. Sot aeroplani hi-tech i Flakëve të Verdha mbikqyr 20 % të territorit në bazë të një marrëveshjeje me qeverinë e Tiranës. Regjistrimi ka vërtetuar se Shqipëria është serra evropiane e mariuhanës, me 213 mijë hektarë të mbuluar nga serra të paligjëshme : bimët e shkatërruara nga policia do të kishin siguruar fitime më të mëdhha se dy miliard euro, pothuajse një e katërta e PPB të Shqipërisë. Por edhe trafikantët përsosin teknikat për t’i u ikur kontrolleve : mbjellje në tunele dhe drone spiunë.

Harta e mariuhanës në Shqipëri është e gjitha në dhjetë faqe të një dosjeje të fshehtë. E kanë shkruar autoritetet vendore në sajë të ndihmesës italiane e gjermane. Ai dokument thot se në Vënd janë, së paku, 363 zona ku janë të pranishëm plantacione tëcannabis sativa. Jo vetëm në Jugë, zemra e dukurisë, por edhe në Qendër e në Verì. Përgjatë lumenjve, në kodrina, në mal, brënda kopshteve shtëpijake ose në copa toke, me kohë të kthyera në tokë të askujt. “Mbjellin deri nëntokë në tunele – tregojnë, për Corriere-n, funksionarë të policisë shqiptare – ose në laboratorë të stërholluar. Ndihmohen edhe nga trafikantë që sjellin nga jashtë farëra aq të përpunuara saqë gjethet rriten shumë shpejt. “Farëra që vijnë nga Vietnami e që janë në gjëndje t’a kryejnë ciklin jetësor në 45 ditë” përcakton dosja.

Që nga fillimi i vitit janë shkatërruar së paku 1,5 milion bimë. “Është një bilanc i përafërt, shpesh shkohet me vlerësime mbi bazën e shtrirjes së plantacioneve”, sqarojnë nga Tirana. Nënvizojnë faktin se tashmë organizatat kriminale shërbehen edhe nga dronë e, jo vetëm nga armët, për të kontrolluar çdo anë. Herën e parë ndodhi jo shumë larg Krujës. “I përdorin edhe për të kuptuar kush hyn e del nga fushat e mbjella”shkruan një dokument.

Për qeverinë të dhënat tregojnë se lufta kundër kannabisit po shkon mirë. Për opozitën e qëndrës së djathtë, shifrat vërtetojnë se ekzekutivi i kryeministrit socialist Edi Rama ka dështuar. Për specialistët statistikat e fundit tregojnë se dukuria është shumë më e shtrirë dhe po bëhet madje më e përparuar dhe e fshehtë. E gjithë kjo megjithë operacionin ushtarak të nisur më 16 qershor 2014 e të mbaruar një muaj më vonë në fshatin e Lazaratit, “kryeqytetit të mariuhanës”, pak km. nga Girokastra ; 900 policëtë zotuar për të luftuar rrugë më rrugë, 133.567 bimë të shkatërruara, 4395 kg. farash të sekuestruar, 51 t’arrestuar e 308 të paditur.

Për pak javë tregu dukej i shkatërruar. Por bandat këmbyen strategjitë e tyre. U shtynë nga Veriu, filluan të shfrytëzojnë zonat e shumta të pabanuara mes Shqipërisë, Kosovës dhe Maqedonisë. Pushtuan madje edhe pjesë pyjesh, ku Shteti nuk ve këmbë. Ose morën kapanone industriale të braktisura e i kanë kthyer në laboratorë me sistem ngrohjeje e ndriçim. Kështu u kalua muri i njëmijë tonëve të mariuhanës të eksportuar në një vit.

“Trafikantët janë çvendosur nga anët e Shkodrës, një zonë më e vështirë për t’u kontrolluar” ve në dukje dosjeja shqiptare, që citon të dhënat e përcjella nga Roja e financës italiane : nëse në 2013 plantacionet në gjithë Vendin ishin rreth 305 dhe bimët e mbjella 81.300, në 2014 u kalua përkatësisht në 815 dhe 165 mijë, për t’arritur në vitin e shkuar në të cilin plantacionet u katërfishuan kundrejt 2013-ës, duke kaluar kuotën 1200 ndërsa bimët e shkatërruara kanë qenë 243 mijë. “Në 2015 15,83 % e territorit shqiptarështë përdorur për mariuhana” llogarit raporti i autoriteteve vendore.

Shqetësimi më i madh vjen nga zonat më të varfëra : “Shumë të ndaluar janë fshatarë të thjeshtë që përdornin tokat e tyrepër të patur ndonjë lek për të blerë diçka për të ngrënë” shkruajnë funksionarët. Dhe dokumenti shpjegon se ku përfundon mariuhana. Një pjesë trasportohet me gomone në Itali ose, – në këmbë apo me makina – në Greqi, prej nga më pas shpërndahet në Hollandë, Francë, Austri. Pjesa m’e madhe merr rrugët malazeze, serbe e hungareze për të përfunduar drejt në Gjermani.

“Corriere della Sera” e enjte, 17 nëndor 2016

Përktheu nga italishtja Eugjen Merlika

Gjermania, thellim bashkëpunimi me Kosovën

November 17, 2016 by dgreca

-Ministri federal gjerman, Christian Schmidt vizitë në Kosovë dhe Shqipëri/-Gjermania, kontribut të jashtëzakonshëm për çështjet jetike në Kosovë. Ministri federal gjerman për Ushqim dhe Agrikulturë, Christian Schmidt në vizitën në Kosovë u prit nga kryeministri Isa Mustafa e ministri Memli Krasniqi/

-Ministri Federal i Ushqimit dhe Bujqësisë i Gjermanisë, Christian Schmidt, i përcolli kryeministrit Mustafa përshëndetjet e Kancelares Federale Gjermane, Angela Merkel, duke theksuar mbështetjen e mëtejme të Gjermanisë për Kosovën në shumë drejtime/

-Ministri gjerman Schmidt ka vlerësuar punën që është bërë deri më tani dhe sipas tij tani prioritet është zhvillimi i Kosovës si një shtet evropian, i cili dëshiron të integrohet jo vetëm në tregun evropian, por edhe në bashkësinë e vlerave evropiane/

PRISHTINË, 17 Nëntor 2016-Gazeta DIELLI-Behlul Jashari/ Ministri federal gjerman për Ushqim dhe Agrikulturë, Christian Schmidt zhvilloi sot një vizitë në Kosovë dhe do vazhdojë me vizitën dhe në Shqipëri. Në Prishtinë, ministri federal Schmidt takoi kryeministrin e Republikës së Kosovës, Isa Mustafa, si dhe ministrin e Bujqësisë, Pylltarisë dhe Zhvillimit Rural, Memli Krasniqi për të zhvilluar biseda politike.Gjatë takimit, kryeministri Mustafa dhe ministri Schmidt kanë biseduar për marrëdhëniet ndërmjet dy vendeve, si dhe për mundësitë e thellimit të bashkëpunimit.Kryeministri Mustafa theksoi progresin e arritur në Kosovë dhe prioritetet e qeverisë për zhvillimin e gjithanshëm të vendit.Më tej, kryeministri Mustafa e njoftoi më gjerësisht për zhvillimet në Kosovë në fushën e bujqësisë, energjetikës, arsimit, investimeve, minierave dhe mineraleve, proceseve eurointegruese, luftën kundër korrupsionit, integrimin e pakicave dhe aspekte tjera.Me këtë rast, kryeministri Mustafa shprehu mirënjohjen e qytetarëve dhe të qeverisë së Kosovës për përkrahjen e madhe të Gjermanisë.“Gjermania ka dhënë kontribut të jashtëzakonshëm për çështjet jetike në Kosovë në të gjitha fazat, duke qenë ndër përkrahësit dhe partnerët strategjik të shtetit dhe të qytetarëve të Kosovës edhe në proceset aktuale shtetndërtuese dhe europianizuese”, tha kryeministri Mustafa. Ministri Federal i Ushqimit dhe Bujqësisë i Gjermanisë, Christian Schmidt, i përcolli kryeministrit Mustafa përshëndetjet e Kancelares Federale Gjermane, Angela Merkel, duke theksuar mbështetjen e mëtejme të Gjermanisë për Kosovën në shumë drejtime.

Ministri Schmidt vlerësoi të arriturat e deritashme si dhe shfaqi interesim për shumë aspekte të zhvillimeve në vend, duke shprehur njëkohësisht përkushtimin e Gjermanisë për thellimin e bashkëpunimit me Kosovën. Ministri Schmidt foli edhe për mundësitë konkrete të zgjerimit të shkëmbimeve dhe ofrimit të përkrahjes në fushën e bujqësisë, arsimit, integrimet evropiane, investimet, si dhe në fusha të tjera të rëndësishme për zhvillimin ekonomik e social në Kosovë.Gjatë vizitës në Kosovë, pas takimit, ministri Schmidt dhe Ministri Krasniqi deklaruan për medie gjatë një konferenceje të përbashkët për shtyp.

KOSOVA DHE GJERMANIA INTENSIFIKOJNË BASHKËPUNIMIN NË BUJQËSI

Kosova dhe Gjermania do të intensifikojnë bashkëpunimin në fushën e bujqësisë, duke e zgjeruar këtë bashkëpunim tashmë edhe në sektorë të tjerë të bujqësisë. Turizmi rural, vreshtaria dhe verëtaria, konsolidimi i tokave bujqësore, si dhe mbajtja e trajnimeve dhe praktikave të ndryshme për fermerët dhe ekspertët e Kosovës, por edhe për studentët e bujqësisë, janë fushat ku të dyja vendet do të thellojnë bashkëpunimin e ardhshëm.Kështu u tha sot në takimin mes ministrit të Bujqësisë, Pylltarisë dhe Zhvillimit Rural tw Kosovws, Memli Krasniqi, dhe ministrit të Ushqimit dhe Bujqësisë të Gjermanisë, Christian Schmidt.Ministri Krasniqi, tha se gjatë takimit kanë pasur bisedime konkrete për vazhdimin e bashkëpunimit në fusha të ndryshme të bujqësisë dhe më këtë rast ai ka falënderuar ministrin për bashkëpunimin e deritanishëm, i cili sipas tij ka qenë shumë konkret përmes Ambasadës së Gjermanisë në Prishtinë dhe GIZ-it gjerman në projekte të ndryshme në fushën e verëtarisë dhe vreshtarisë.

“Po ashtu edhe në kuadër të programeve të BE-së ne kemi përfituar mbështetja nga ekspertiza gjermane për sa i përket sigurisë së ushqimit në projekte të ndryshme në AUV, ndërsa besojmë se hapësira dhe vullneti i dyanshëm ekziston për ta zgjeruar këtë bashkëpunim edhe në sektor të tjerë të bujqësisë, siç është turizmi rural, avancimi i mëtejmë në fushën e vreshtarisë dhe verëtarisë, pastaj konsolidimi i tokave bujqësore, që vazhdon të jetë një nga prioritetet tepër të rëndësishme për qeverinë e Kosovës, si dhe mbajtja e trajnimeve dhe praktikave të ndryshme për fermerët e Kosovës, për ekspertët tanë, por edhe për studentët e bujqësisë dhe fushave të përafërta në Gjermani, për të marrë përvoja nga dora e parë në një vend ku bujqësia është shumë e zhvilluar dhe prej ku Kosova ka çfarë të mësoj”, tha ministri Krasniqi. Ai ka treguar se janë pajtuar me ministrin Schmidt që vazhdojnë bashkërisht jo vetëm komunikimin, por edhe veprime konkrete në realizimin e kësaj agjende të përbashkët.

Ministri i Ushqimit dhe Bujqësisë së Gjermanisë, Christian Schmidt, ka vlerësuar punën që është bërë deri më tani dhe sipas tij tani prioritet është zhvillimi i Kosovës si një shtet evropian, i cili dëshiron të integrohet jo vetëm në tregun evropian, por edhe në bashkësinë e vlerave evropiane. “Fakti që Kosova e ka nënshkruar MSA-në është një hap shumë i rëndësishëm, megjithatë mbetet ende shumë punë për të bërë dhe për këtë unë e kam pranuar me dëshirë ftesën e ministrit të cilin kam pasur rastin ta përshëndes edhe në Berlin dhe me të cilin do të kemi mundësi që të takohemi sërish në janar ku ne do të flasim për çështje tjera të bashkëpunimit bilateral”, tha ministri gjerman.

Ai po ashtu tregoi se për të konkretizuar bashkëpunimin tutje ata janë pajtuar që të organizojnë së bashku edhe një forum, ku do të diskutohen hapat dhe veprimet e bashkëpunimit konkret në fusha të ndryshme të bujqësisë.

Kosovë-Qeveria miraton nismat për tre marrëveshje ndërkombëtare

November 16, 2016 by dgreca

*“Marrëveshja dypalëshe në mes të Qeverisë së Kosovës dhe Qeverisë së Shteteve të Bashkuara të Amerikës për vlefshmërinë e pasaportave të Kosovës për dhënien e vizave jo-emigruese në Shtete e Bashkuara të Amerikës”, “Marrëveshja për punën fitimprurëse të anëtarëve të familjeve të një misioni diplomatik apo posti konsullor të karrierës, ndërmjet Republikës së Kosovës dhe Kanadasë”, “Marrëveshja ndërmjet Republikës së Austrisë dhe Republikës së Kosovës për shmangien e tatimit të dyfishtë për tatimet në të ardhurat dhe parandalimin e evazionit fiskal dhe shmangies”/

-Mustafa: Në asnjë rast zgjedhjet nuk mund të lidhen me demarkacionin e kufirit me Malin e Zi, qeveria po bën një punë shumë të mirë/

PRISHTINË, 16 Nëntor 2016-Behlul Jashari/ Qeveria e Kosovës miratoi sot në parim nismat për lidhje të tre marrëveshjeve ndërkombëtare: “Marrëveshjes dypalëshe në mes të Qeverisë së Kosovës dhe Qeverisë së Shteteve të Bashkuara të Amerikës për vlefshmërinë e pasaportave të Kosovës për dhënien e vizave jo-emigruese në Shtete e Bashkuara të Amerikës”, “Marrëveshjes për punën fitimprurëse të anëtarëve të familjeve të një misioni diplomatik apo posti konsullor të karrierës, ndërmjet Republikës së Kosovës dhe Kanadasë” dhe “Marrëveshjes ndërmjet Republikës së Austrisë dhe Republikës së Kosovës për shmangien e tatimit të dyfishtë për tatimet në të ardhurat dhe parandalimin e evazionit fiskal dhe shmangies”.Gjatë mbledhjes, qeveria e Kosovës mori edhe vendimin përfundimtar për shpronësimet me interes publik të pronave që preken nga ndërtimi i ndërtesave të përhershme të menaxhimit të integruar të kufirit me Serbinë në dy vendkalime – Merdare dhe në Bërnjak. U mor edhe vendimi preliminar i shpronësimit për interes publik të pronave që prekën nga ndërtimit i autostradës nga Prishtina deri në venkalimin kufitar me Maqedoninë-Hani i Elezit.Qeveria e Republikës së Kosovës e drejtuar nga kryeministri Isa Mustafa, zhvilloi sot mbledhjen e 116-të të rregullt, të 48-ën këtë vit.

Në hapje kryeministri i Kosovës foli për zhvillimet dhe ngjarjet e rëndësishme të një jave më parë. “Ne, së bashku me komisionerin Hahn javën e kaluar kemi lansuar Axhendën e Reformave Evropiane, e cila krijon infrastrukturë të qëndrueshme për zbatimin e Marrëveshjes së Stabilizim Asociimit, si marrëveshje e parë kontraktuale me Bashkimin Evropian. Javën e kaluar, po ashtu, kemi marrë Raportin e Progresit ose Raportin e vendit në të cilin në disa fusha të rëndësishme tregon progres të Republikës së Kosovës dhe po ashtu evidenton fusha në të cilat ne duhet të bëjmë përpjekje më të mëdha për të ndryshuar gjendjen”, theksoi kryeministri Mustafa.

Qeveria e Kosovës, e koalicionit të dy partive më të madha, PDK e LDK, ku përfshihen edhe parti të vogëla dhe minoritetet, pas më pak se një muaji mbushë dy vjet të punës që nga zgjedhja në 9 dhjetor 2014 në Kuvendin kosovar të konstituuar një ditë më parë, gjashtë muaj pas zgjedhjeve të parakohëshme parlamentare të 8 qershorit.

Zërave për zgjedhje të reja të parakohëshme parlamentare në Kosovë kryeministri Mustafa u është kundërpërgjigjur edhe nga mbledhja e sotme e kabinetit qeveritar duke u shprehur se, “në asnjë rast zgjedhjet nuk mund të lidhen me demarkacionin e kufirit me Malin e Zi” dhe se, “qeveria po bën një punë shumë të mirë”.

Ministri i Punëve të Brendshme, Skender Hyseni, informoi kabinetin qeveritar për pjesëmarrjen e delegacionit të Kosovës në Asamblenë e Përgjithshme të Interpolit, në Indonezi, si dhe për përgatitjet që janë duke u bërë për të aplikuar në këtë organizatë të bashkëpunimit ndërkombëtar policor.

Kryeministri Mustafa, në emrin personal dhe të qeverisë uroi Policinë e Kosovës për vlerësimin e lartë të marrë nga raporti i Transparency International. “Kjo flet që kemi një organ i cili është krejtësisht i pavarur, që bënë punën e vet dhe që ka arritë që të ketë një vlerësim shumë të lartë nga një organizatë prestigjioze ndërkombëtare”, u shpreh ai.