Featured – Page 443 – Dielli

KOSOVE: GEZUAR PERVJETORIN E 10-të TË PAVARËSISË!

February 18, 2018 by dgreca

NGA TEUTA SAHATÇIJA/*

I nderuari Keshilltar i qytetit te madh të New Yorkut Z. Mark Gjonaj/

Të respektuar kryetar të Shoqatave shqiptare që veprojnë në New York e gjetiu/

Veprimtar nga të gjitha trojet shqiptare/

Zonja dhe zotërinj/

Është privilegj i madh që sot këtu para jush, në cilësinë e Ambasadores së shtetit të Kosovës, në emër të institucioneve të Kosovës, në emër të Misionit të RKS në New York dhe në emrin tim personal, të ju uroj Përvjetorin e 10 të Pavarësisë.Ende sot kur e përmendi postin tim, Misionin Diplomatik dhe shtetin e Kosovës, kam emocione. Vetë këto fjalë kthejnë kujtimet për kohën kur nuk kishim shtet dhe shteti ku ishim ishte armiqësor ndaj nesh.

Kujtimet shkojnë më tej në dekada e shekuj kur teritoret e shqiptarëve përjetonin një pas një ekzode, zbarzje të votrave. Ekzodi i fundit i cili e përgjysmoi numrin e shqiptarëve në Kosovë ishte ai i 1999, kur 800,000 shqiptarë u përzunë nga shtëpitë dhe u shëndëruan në refugjat të cilët nuk dinin as a do të kthehen ndonjëhere në votrat e të parëve.

Kujtimet nxjerrin vitet e 80-ta dhe kohën e helmimeve massive të nxënësve shqiptarë duke e artikuluar qartë brengën më të madhe të okupatorit: shkollën dhe gjuhën shqipe.

Historia vazhdon më tej të depërtojë në kohra të errta kur djemtë tanë ktheheshin nga ushtria, të masakruar nëpër kuti të blinduara metalike, për të nxitur frigën dhe ekzodin e djemve të rinj jashtë kufinjëve të Kosovës.

1989 Millosheviqi suprimoi Institucionet e Krahinës së Kosovës, pjesë konstituive të Federates së Jugosllavisë duke e kthyer ate ne një teritor të pa vlerë. Gjuha shqipe u zëvendësua me atë serbe me alphabet cirilik në cdo emër të rrugës, dokumentit, të firmave.

Universiteti i Prishtinës si e arritur e madhe kombëtare, i mbylli dyert për shqiptarë, bashkë me shkollat e mesme. Shkollat fillore u ndane në pjesën shqipe pa ngrohje dhe me dritare te thyera dhe në pjesën sërbe me klasa të ngrohta të shtuara me tapete dhe perde. Shkolla fillore si arsim maksimal i lejuar për shqiptarë, do të prodhonte gjenerata shërbëtorësh dhe sharraxhinjësh që do tu shërbenin qytarëve të rendit të pare.

Apart’heidi në qendër të Europës lulëzonte. Shqiptarët ishin qytetar të rendit të dytë me qëllim të shëndërimit në një grumbull qenjesh pa shkollë, pa respect, pa miq ndërkombëtar, pa institucione, pa të ardhme.

Por e ardhmja e pashprese qe na e kishte përgaditur Millosheviqi me shokë, nuk u pranua nga ne.

Nën udhëheqjen e urtë të Presidentit Historik Ibrahim Rugova, populli u mblodhe nën një kulm, u bashkua dhe veproi. Shtëpitë, xhamitë e kishat u shëndëruan në shkolla e spitale. Permes QIK, bota cdo ditë informohej për krimet, dhunën, terrorin që pllakosi Kosovën. U mbajtën zgjedhjet demokratike nën presion të paparë dhe u zgjedhën Institucionet Paralele.

Diaspora në anën tjetër vepronte fuqishëm si krah i forte në mbajtjen gjallë të institucioneve, shkollës dhe shëndetsisë së Kosovës. Përmes protestave para UN, në cdo vend e shtet e qytet bënte të ditur gjendjen alarmante të shkeljes së të drejtave elementare njerëzore, të gjenocidit që po merrte krah në Kosovë.

Senatorët e Kongresistët, mediat e personalitetet e ndryshme të cilët më pare nuk e dinin se kah i bie Kosova, me punën e palodhshme të diasporës, u bënë zëdhënës të Kosovës, të së drejtës, dhe vepruan kundër terorit.

Kur kjo rezistencë paqësore nuk mundi të ndalë aparatin kriminal, UÇK me Adem Jasharin i mblodhi djemt e vajzat më të mira dhe i doli krah Kosovës që vuante.

Batalioni Atlantiku në Amerikë i mblodhi të rinjtë të cilët nuk ishin në Kosovë, i kishin punët mire në SHBA dhe çkado që ndodhte ne Kosovë, nuk i prekte drejt përdrejtë. Por mbrojtja e vendlidjes, ngritja për një çështje të drejtë nuk i la indifferent. Ata duke u përshëndetur me familjarë e lane SHBAnë dhe u nisën për Kosovë për të mos u kthyer.

Kur afrohet çdo pervjetor, me shokët e batalionit Atlanktiku i perkulemi varreve të Mehmeti, Agroni e Yllit që personifikojnë luftën, sakrificën, detyrën kombëtare, krenarinë mbi të cilat është ndërtuar ky shtet i ri.

Me respekt të lartë dhe perulje të thellë e kujtojmë sakrificën e vllezërve Bytyqi dhe gjithë atyre që dhanë jetën për lirine e Kosovës.

Populli i Kosovës dhe shqiptarët kudo që janë do të jenë falenderues përjetësisht.

Sot Kosova është e njohur nga 116 shtete, është një shtet në zhvillim, ku institucionet po e ndertojnë rrugën demokratike të funksionimit, ku ekonomia po përpiqet të bëhet krah i progresit duke krijuar hapsirë diasporës dhe biznesit vendor të gjejnë mënyre të bashkëpunimit e jo të ndihmës, ku investim i madh po behet ne fuqizimin e edukimit si mjet më të fuqishëm për mbajtjen e zhvillimin e kombit.

Të nderuar bashkëkombas, të dashur miq, jam e lumtur që këtu nga Neë Yorku, mund të them:Kosove e dashur urime ditëlindjen e 10të!

*Fjala përshëndetëse e mbajtur nga ambasadorja Teuta Sahatqija në darkën solemne organizuar nën drejtimin e këshilltarit Mark Gjonaj mbajtur me 17.02.2018; 6:30 ne Marina del Rei.

FESTOHET 10 VJETORI I KOSOVËS SHTET

February 17, 2018 by dgreca

-Në jubilen e 10 vjetorit të pavarësisë së Kosovës, të shpallur në 17 Shkurtin historik 2008, sot është një ditë e madhe feste e shqiptarëve kundo në trojet etnike dhe në gjithë botën/

-Vitet më të rëndësishme e më të suksesshme të Kosovës pas shpalljes së pavarësisë…/

-Presidenti i SHBA, Donald Trump: Gjatë dhjetë vjetëve të fundit, Kosova ka bërë hapa të mëdhenj në forcimin e sovranitetit dhe demokracisë shumetnike. Ndërkohë që duhet bërë edhe më shumë punë, ne përgëzojmë përparimin tuaj/

Gazeta DIELLI nga korrespondenti në Kosovë Behlul JASHARI/

PRISHTINË, 17 Shkurt 2018/ Një ditë e madhe feste është sot në Kosovë dhe për shqiptarët kudo në trojet etnike dhe në gjithë botën. Kosova 10 vjet shtet, sot feston jubileun e parë të pavarësisë së shpallur në 17 Shkurtin historik 2018, pas arritjes së lirisë në 12 Qershor 1999, kur nisën të hyjnë forcat paqeruajtëse shpëtimtare të NATO-s e të vendoset Misioni i Administratës së Përkohshme të Kombeve të Bashkuara, pas luftës me mëse 12 mijë të vrarë, 6 mijë të zhdukur e afër një milionë shqiptarë të dëbuar nga forcat serbe në fushatën e egër të spastrimit etnik, gjatë së cilës ua kishin vënë flakën mëse 400 fshatrave e qyteteve, 120 mijë shtëpive.

Simboli i Pavarësisë së Kosovës, Newborn, në Sheshin Medlin Olbrajt në kryeqytet, Prishtinë, i vendosur para 10 viteve, e i zhvendosur para festës së 10 vjetorit, është rikthyer në vendin e vet me pamje të re të festimeve të ditës së madhe të 17 Shkurtit e përgjithmonë.“Ne, udhëheqësit e popullit tonë, të zgjedhur në mënyrë demokratike, nëpërmjet kësaj Deklarate shpallim Kosovën shtet të pavarur dhe sovran”, theksonte Deklarata e Pavarësisë, e cila hartës së botës ia shtoi një shtet, e lexuar nga atëherë kryeministri Hashim Thaçi, tash president i Republikës, të dielën e 17 Shkurtit të para dhjetë viteve, në Kuvendin e Kosovës në mbledhjen e jashtëzakonshme solemne, të nisur në orën 15:00.
Pak para kësaj ore, parase 109 deputetë të pranishëm në Kuvend të votonin në unanimitet shpalljen e Pavarësisë së Kosovës, presidenti i atëhershëm Fatmir Sejdiu në zyrën e tij, në afmosferë feste e përzemërsie, në intervistën ekskluzive për Agjencinë Telegrafike Shqiptare deklaronte se “ne nuk kemi frikë nga e ardhmja” dhe se “nga kjo ditë do të jetë një Kosovë e bekuar”.
17 Shkurti 2008 i Pavarësisë së Kosovës, dita më e madhe shqiptare pas 28 Nëntorit 1912 të Pavarësisë së Shqiprisë, e vlerësuar kështu në ballinën e botimit të jashtëzakonshëm festiv të gazetës historike Rilindja, në festën e madhe të gjithë shqiptarëve u përmbyll me fishekzjarret më të shumta e më të shkëlqyera që janë parë ndonjëherë mbi Prishtinë, kryeqytetin e shtetit të ri evropian, të saposhpallur.

Njohjet e para Kosovës iu bënë në orët e para – ditën e parë pas shpalljes së pavarësisë, nga Mbretëria e Bashkuar, Franca, Shtetet e Bashkuara të Amerikës, Turqia, Shqipëria, Afganistani dhe Kostarika. Kosova në prag të ditës së 10 vjetorit të pavarësisë mori edhe njohjen e 116-të nga shtetet anëtare të OKB-së, nga Barbadosi.

Dy ditë para se të mbusheshin katër muaj pas 17 Shkurtit të shpalljes së Pavarësisë, në 15 Qershor 2008 hyri në fuqi Kushtetuta e Republikës së Kosovës, e cila ishte miratuar në Kuvend në 9 Prill, dhe që në nenin 1 përcaktonte se,“Republika e Kosovës është shtet i pavarur, sovran, demokratik, unik, dhe i pandashëm”.

Flamuri shtetëror i Kosovës ishte shpalosur që në ditën e shpalljes së Pavarësisë në seancën solemne të Kuvendit, i cili në një seancë të veçantë në 11 Qershor 2008 miratoi edhe Himnin Shtetëror.

Gjatë 10 viteve, Republika e Kosova ka vendosur marrëdhënie diplomatike me 88 shtete, është anëtarësuar në më shumë se 60 organizata rajonale, evropiane dhe ndërkombëtare, ka hapur gati 40 misione diplomatike dhe poste konsullore dhe ka të akredituar ambasadorë jo-rezidentë në rreth 60 shtete.

Në këto 10 vite të pavarësisë Kosova ka mbajtur edhe gjashtë palë zgjedhje të lira e demokratike, tre parlamentare dhe tre lokale.

Ndërsa, vitet më të rëndësishme e më të suksesshme të Kosovës pas shpalljes së pavarësisë ishin 2010-ta, 2012-ta dhe së bashku 2015-ta e 2016-ta.

Në vitin 2010 ishin dy ngjarje shumë të rëndësishme drejt njohjes së plotë ndërkombëtare të shtetit më të ri evropian: Legjitimimi i pavarësisë së Kosovës nga Gjykata Ndërkombëtare e Drejtësisë në 22 Korrik dhe Rezoluta e 9 Shtatorit e Asamblesë së Përgjithshme të OKB-së, e cila me respekt e merr në konsideratë opinionin e Gjykatës Ndërkombëtare të Drejtësisë.

Kuvendi i Republikës së Kosoves në seancën e veçantë të datës 23 Korrik 2010 ka miratuar solemnisht një deklaratë ku shprehte kënaqësinë dhe aprovimin për opinionin e Gjykatës Ndërkombëtare të Drejtësisë për legalitetin ndërkombëtar të shpalljes së pavarësisë së Kosovës dhe zotohej për respektimin e tij.

Gjykata Ndërkombëtare e Drejtësisë kishte filluar të shqyrtojë legalitetin e shpalljes së pavarësisë së Kosovës pasi Asambleja e Përgjithshme e OKB-së kishte miratuar një kërkesë të Serbisë në tetor të vitit 2008.

Menjëherë pas këtij zhvillimi me rëndësi historike, në një deklaratë të anëtarëve të Grupit Drejtues Ndërkombëtar për mendimin këshillues të Gjykatës Ndërkombëtare të Drejtësisë rikonfirmohej mbështetjetja e palëkundur për pavarësinë e pakthyeshme të Kosovës dhe bëhej thirrje për njohje.

“Grupi Drejtues Ndërkombëtar rikonfirmon mbështetjen e palëkundur të tij për pavarësinë e pakthyeshme të Kosovës demokratike dhe shumetnike në kufijtë e saj të tanishëm dhe i bën thirrje shteteve tjera që të njohin Kosovën. Ai po ashtu përshëndet përkushtimin e vazhdueshëm të Kosovës dhe progresin e konsiderueshëm në zbatimin e Propozimit Gjithëpërfshirës për Statusin dhe do të vazhdojë të mbështesë Kosovën në punën për realizimin e perspektivës së saj evropiane”, theksohej në deklaratë.Grupi Drejtues Ndërkombëtar (ISG) për Kosovën, i cili përbëhej nga vendet që e kanë njohur Pavarësinë, ishte formuar më 28 Shkurt të vitit 2008 dhe synonte të orientojë dhe mbikëqyrë zhvillimin demokratik të Kosovës, të nxisë qeverisjen e mirë dhe shumetnicitetin, bazuar në Propozimin Gjithëpërfshirës të emisarit të posaçëm të OKB-së, kryenegociatorit për statusin, Martti Ahtisaari.Në vitin 2012 Kosova përmbylli fazën e Pavarësisë së Mbikëqyrur Ndërkombëtare dhe hyri në një fazë te re të perspektivës euroatlantike.Në 7 Shtator Kuvendi kosovar miratoi amendamentet në Kushtetutën e që kishin të bëjnë me përfundimin e mbikëqyrjes ndërkombëtare të pavarësisë së Kosovës, të propozuara nga qeveria.

Në 10 shtator Grupi Drejtues Ndërkombëtar deklaroi përfundimin e mbikëqyrjes së Kosovës. “Përmbyllja e mbikëqyrjes është vlerësimi më i lartë ndërkombëtar, që i është bërë shtetit të Kosovës pas shpalljes së Pavarësisë”, u vlerësua atëherë.Më herët, në 2 Korrik 2012 është mbajtur në Vjenë takimi i pesëmbëdhjetë i Grupit Drejtues Ndërkombëtar për Kosovën, i cili “ka konstatuar se Propozimi Gjithëpërfshirës për Zgjidhjen e Statusit është zbatuar në mënyrë substanciale dhe me këtë autorizohen hapat përfundimtar për përmbyllje të pavarësisë së mbikëqyrur dhe mbyllje të Zyrës Civile Ndërkombëtare (ICO)”.

Në vitin 2016, në 1 Prill, nisi zbatimi i Marrëveshjes së Stabilizim Asociimit në mes të Kosovës dhe Bashkimit Evropian, e nënshkruar në 27 Tetor 2015 në Strasburg dhe e ratifikuar në Parlamentin kosovar pas pak ditësh, në 2 Nëntor.

Marrëveshja për Stabilizim Asociim, e cila krijon për herë të parë marrëdhënie kontraktuale me BE-në, është vlerësuar ngjarja më e rëndësishme e Kosovës që nga shpallja e pavarësisë.

Programi Kombëtar për zbatimin e Marrëveshjes së Stabilizim Asociimit me Bashkimin Evropian është miratuar në 10 Mars 2016 nga Kuvendi i Republikës së Kosovës.

Komisioni Parlamentar për Stabilizim Asociim BE-Kosovë për herë të parë është mbledhur në Prishtinë në 16-17 Maj 2016, ndërsa së fundi takimin e katërt e zhvilloi në Strasburg në 17-18 Janar 2018.

Arritjet historike të Kosovës shtet janë vlerësuar edhe në urimet e shumta nga gjithë bota për 10 vjetorin.

“Gjatë dhjetë vjetëve të fundit, Kosova ka bërë hapa të mëdhenj në forcimin e sovranitetit dhe demokracisë shumetnike. Ndërkohë që duhet bërë edhe më shumë punë, ne përgëzojmë përparimin tuaj”, ka shkruar presidenti i SHBA-së, Donald Trump, në letrën e urimit dërguar presidentit Thaçi

“Ndërsa vendi juaj po hyn në dekadën e dytë të shtetësisë, Shtetet e Bashkuara janë të përkushtuara për të ndihmuar Kosovën që të ndërtojë themele të forta të parimeve të përbashkëta demokratike, bashkëpunimit rajonal dhe sundimit të së drejtës. Duke vepruar kështu, Kosova do të ndërmarrë hapa të mëtejshëm drejt integrimit në Komunitetin Perëndimor të Kombeve.

Ne e shikojmë Kosovën si një partnere të rëndësishme të Shteteve të Bashkuara. Në këtë rast historik i uroj gjithë të mirat qytetarëve të Kosovës”, theksohet në letrën e presidentit të SHBA-ve.

Edhe në urimet e personaliteteve tjera nga bota vijnë fuqishëm vlerësimet dhe mbështetjet për Kosovën në 10 vjetorin e pavarësisë, i cili do festohet edhe me Seancën solemne të Kuvendit, që do mbahet të dielën, me pesëmarrje edhe të personaliteteve kombëtare e ndërkombëtare. Pjesë e festimeve 10 ditëshe do jetë edhe parakalimi i Forcës së Sigurisë së Kosovës dhe Policisë së Kosovës sheshet “Nëna Terezë” dhe “Zahir Pajaziti”.Në mbrëmjen e djeshme u njoftua se Presidenti i Republikës, Thaçi ka dekoruar me Medaljen Presidenciale në 10-vjetorin e Pavarësisë të gjithë deputetët që më 17 shkurt 2008 votuan dhe nënshkruan Deklaratën e Pavarësisë së Kosovës, si dhe personalitete kombëtare dhe ndërkombëtare, mes të cilëve kryeministrin e Shqipërisë, Edi Rama, pjesëmarrës në festime.

Në 10 vjetor të Republikës u bëhen nderimet më të larta të gjithë kombit heronjëve e dëshmorëve të lirisë dhe pavarësisë, si dhe presidentit historik Ibrahim Rugova, i cili që para më shumë se dy dekadave hapur përcaktonte pozicionin gjeopolitik kosovar dhe shpallte idenë për shtet, duke theksuar se zgjidhja më e mirë është Kosova e pavarur. “I vetmi kompromis për Kosovën është pavarësia, dhe ky është optimumi i gjithë shqiptarëve në rajon”, theksonte shumë prerë Rugova edhe në 6 tetor 2005, në takimin e parë me Grupin Negociator, formimi i të cilit me përfaqësim nga maxhoranca e opozita dhe shoqëria civile ishte një moment me shumë rëndësi për unitetin në vend si dhe për bisedimet për statusin e Kosovës të udhëhequra nga i dërguari i posaçëm i Sekretarit të Përgjithshëm të OKB-së, Presidenti Martti Ahtisaari, e pastaj edhe nga Treshja SHBA-BE-Rusi në angazhimet shtesë.

Në këtë ditë jubileut të 10 vjetorit të Pavarësisë, Kosova është e mbushur me plot flamuj dhe mes valimit të tyre njerzit në festën e madhe mbushin me defilime rrugët e sheshet. Një nga veprimtaritë në sheshet e kryeqytetit, Prishtinës, është edhe ekspozita “Rrënjët e Shtetit”, e cila paraqet 50 vjet të rrugëtimit të Kosovës, nga demonstratat e vitit 1968 me kërkesën “Kosova Republikë” deri në shpalljen e pavarësisë në 2008, përmes ballinave e faqeve të gazetave botërore që raportonin për zhvillimet në Kosovë.

Festimet për e 10 vjetorit të shpalljes së pavarësisë mbahen nën patronatin e presidentit të Republikës së Kosovës, Hashim Thaçi, i cili për jubileun e parë të shtetit iu adresua qeverisë, ku bëri tre propozime: Për ndërtimin e një Kompleksi rezidencial të institucioneve shtetërore, të Muzeut të Pavarësisë dhe Obeliskut të Lirisë në Prishtinë.Në axhendën e festimeve sot është edhe mbledhja solemne e qeverisë së Republikës së Kosovës, e drejtuar nga kryeministri Ramush Haradinaj, janë edhe aktiviteti sportiv i fëmijëve, koncerti i Rita Orës në sheshin “Skënderbeu” në Prishtinë në mbrëmje e gjatë ditës nëpër sheshe defilimi e koncerti i Ansamblit “Shota”, festivali me rreth 500 fëmijë dhe 105 animatorë dhe Koncerti i Xixëllonjave, si ekspozita “Kosova – nga historia në shtetësi” në Biblotekën Kombëtare të Kosovës.Nga shtetet fqinje vetëm Serbia ende nuk e ka njohur Kosovën, ndërkohë që në Bruksel zhvillohet procesi drejt normalizimit të marrëdhënieve mes dy shteteve, kryesuar nga Bashkimi Evropian e mbështetur nga Shtetet e Bashkuara të Amerikës. Edhe kjo njohje do të ndodhë…

NË FÖRSLÖV TË SUEDISË – EDHE FESTË EDHE KONTRIBUT

February 17, 2018 by dgreca

Nga Hysen IBRAHIMI/ Mbrëmë më 16 shkurt 2018 (e premte) në Förslöv të Suedisë në një atmosferë festive nën përkujdesjen e Shoqatës Kulturore Shqiptare ”Nëna Terezë” në Ängelholm të Suedisë, u organizua manifestim kulturor me rastin e 550 vjetorit të vdekjes së Gjergj Kastriotit Skënderbeut, 140 vjetorin e Lidhjes së Prizrenit dhe dhjetëvjetorin e Pavarësisë së Republikës së Kosovës.

Kolorit të shkëlqyer i dhaneë rinia me veshë kombëtare të prirë nga Ahmet Ahmeti (koreograf), me këngët dhe vallët e tyre. Kurse nga Kosova kishte ardhur këngëtari z. Ylli Demaj si dhe këngëtari në Suedi z. Gazmend Kelmendi dhe Robert Hoti (të gjithë pa pagës).

Për këtë ngjarje historike, mbajtën fjalë Rrahman Rrahmani kryetar i Shoqatës Kulturore Shqiptare ”Nëna Terezë” në Ängelholm dhe Hysen Ibrahimi, kryetar i Shoqatës së Shkrimtarëve dhe Artistëve Shqiptarë ”Papa Klementi XI Albani”, Suedi. Këshilli organizativ i udhëqur me shumë sukses nga kryetari z. Robert Hoti, i cili gjatë fjalës së tij ngriti atmosferë të jashtëzakonshme, para bashkatdhetarëve kur tha: ”Të gjitha shpenzimet e këtij koncerti të cilat janë grumbulluar deri në këto momente e që pritet që aksioni të vazhdoj edhe më tutje, do të dedikohen për ndërtimin e shtëpisë së z. Qaush Musaj nga Peja, ish ushtar i Ushtrisë Çlrimitare të Kosovës, i cili ka luftuar për pavarësinë e Republikës së Kosovës”.

Shuma deri në këto momente është grumbulluar 69.636 korona suedeze (në vlerë prej rreth 7.000€) dhe 100 € (mjete këto nga Kosova). Aksioni mbetet i hapur edhe më tutje deri në arritjen e grumbullimit të shumës së nevojshme për ndërtimin e shtëpisë në fjalë.

Mesazhi kryesor nga ky tubim doli:

”Ta duam kombin Shqiptar duke i kontribuar në të gjitha sferat e jetës, kudo që jemi dhe kudo që ndodhemi”.

Për kontribuesit si: Ylli Demaj, Gazmend Kelmendi, Viola Sylaj Rexhaj, Gazmend Shabani, Sylejman Dushica dhe Haradin Osmanaj u ndanë ”MIRËNJOHJE”, nga Shoqata e Shkrimtarëve dhe Artistëve Shqiptarë ”Papa Klementi XI Albani”, Suedi, Shoqatës Kulturore Shqiptare ”Nëna Terezë” në Ängelholm dhe Këshilli Organizativ.

Manifestimi zgjati deri në orët e vona pas mesnate.

Qoftë i bekuar shteti i Kosovës përjetë dhe mot!

February 16, 2018 by dgreca

Jubileu i parë i shtetit të Kosovës/

1 Newborn Prishtina

Shteti i Kosovës është një rrëfim i suksesshëm dhe krenar i gjithë kosovarëve. Këtë kurrë nuk duhet ta harrojmë të gjithë ne që kemi privilegjin, nderin dhe përgjegjësinë për të qenë në shërbim të këtij shteti dhe të qytetarëve të tij.

Kryeministri-i-Kosoves-Hashim-Thaçi-ARKIV1-525x350

Editorial i Hashim Thaçit, Presidentit të Kosovës/

Dita më e rëndësishme në historinë e Kosovës është 17 shkurti i vitit 2008. Në këtë ditë u lind shteti i Kosovës dhe kështu të gjithë ne-qytetarët e lirë të këtij vendi, u bëmë me shtëpinë tonë të përbashkët shtetërore, u bëmë shtetas të Kosovës.

Secili prej nesh e kemi një rrëfim tonin individual dhe familjar se çka bëmë atë ditë shumë të ftohtë të dimrit, si i kaluam ato orët para se të mblidhej Kuvendi i Kosovës, në seancën e paharrueshme të tij, si iu gëzuam çastit kur me Deklaratën e miratuar në Kuvend, ne vendosëm për fatin tonë, një herë e përgjithmonë, duke e shpallur Kosovën shtet të pavarur.

Ishte ai çasti më i lumtur për të gjithë ne si popull, çast i përjetësisë për qytetarët e këtij vendi që, si rrallë ndonjë vend tjetër në këto anë të Evropës, e ka të mbushur historinë me tragjedi, me vuajtje, me heroizma dhe me dashuri për atdheun.

Me pak fjalë, ju, qytetarët e Kosovës, shfaqët mendimin më të sinqertë, më të bukur, më të dashur, atë 17 shkurt, kur thatë një herë: ‘Bac u kry’, duke iu referuar Komandantit legjendar ,Adem Jasharit, dhe pastaj, ‘Edhe unë kam shtet’, që i rrinte mirë trashëgimisë së Presidentit historik të Kosovës, Dr.Ibrahim Rugovës.

Dhjetë vjet në jetën e një individi, të një familje janë shumë, gjithsesi shumë, ndërsa në jetën e përbashkët të një populli, të një shteti, ato mund të kenë peshën vendimtare për fatin e tij, ato mund të paralajmërojnë saktësisht të ardhmen e tij, siç është rasti me ne në Kosovë.

Kam pasur nderin më të madh në jetën time, që të dielen e 17 shkurtit të vitit 2008, në emër të deputetëve të Kuvendit të Kosovës, në emër të të gjithë qytetarëve të Kosovës, në respektim të një historie të lavdishme të këtij populli, në paralajmërim të ardhmënisë së ndritshme të këtij vendi, të shpall shtetin e Kosovës.

E di mirë që pa qytetarët e Kosovës, pa atë vullnetin e paparë të tyre për të flijuar gjithçka për lirinë e këtij vendi, mbi të gjitha, jetën e tyre, ne kurrë nuk do të mbërrinim te krijimi i shtetit të Kosovës.

Ky shtet është një rrëfim i suksesshëm dhe krenar i të gjithë neve. Secili prej qytetarëve të tij ka hise në bërjen e këtij shteti.

Këtë kurrë nuk duhet ta harrojmë të gjithë ne, që jemi në ballë të institucioneve të Republikës së Kosovës, që kemi fatin, privilegjin, nderin dhe përgjegjësinë për të qenë në shërbim të këtij shteti dhe të qytetarëve të tij.

E di mirë, po ashtu, që ne të gjithë, kurrë nuk do të mbërrinim ta përcaktonim fatin tonë, të bëheshim të lirë dhe ta krijonim shtetin e Kosovës pa ndihmën e madhe politike, ushtarake, ekonomike e, mbi të gjitha, njerëzore dhe miqësore të SHBA-së dhe të shteteve të tjera kryesore perëndimore.

U bëmë bashkë një herë në të gjithë në Kosovë, e pastaj, edhe me SHBA-në, me Evropën, me botën e lirë dhe demokratike, për ta bërë këtë popull, këtë vend, këtë Kosovë, këtë shtet të lirë dhe demokratik.

Liria dhe shteti i Kosovës janë në realitet vlera supreme të qytetërimit evropian dhe perëndimor.

Kosova dhe populli i saj, sot e kësaj dite, janë qytetarët dhe shteti më pro-amerikan, më pro-evropian, më pro-perëndimor në këtë anë të botës.

E për këtë fakt jemi krenarë.

Këto dhjetë vitet e para të ekzistencës së shtetit të Kosovës, mund t’i matim gjithqysh apo mund të ketë shumë njësi matëse për këtë dekadën e parë të shtetit të Kosovës.

Pavarësinë e Kosovës e kanë pranuar 114 shtete, në mesin e tyre edhe shtetet më të rëndësishme të Perëndimit dhe të Evropës.

Në vitin 2010, Gjykata Ndërkombëtare e Drejtësisë në Hagë konfirmoi të drejtën tonë për të qenë shtet. Në vitin 2012 përfunduam periudhën e mbikëqyrjes së pavarësisë.

Në vitin 2013 kemi nënshkruar Marrëveshjen e parë për normalizimin e marrëdhënieve në mes të Kosovës dhe Serbisë, duke hapur kështu udhë për integrimin e plotë të veriut të vendit në sistemin politik dhe juridik të Kosovës.

Në vitin 2015 nënshkruam Marrëveshjën e Stabilizim Asociimit (MSA-në) me Bashkimin Evropian.

Demokracia në Kosovë ka lëshuar rrënjë të thella dhe ne tani jemi në gjendje t’i mbajmë zgjedhjet e lira vetë, si ato për pushtetin qendror, ashtu edhe ato për pushtetin lokal, të cilat janë shembull për rajonin.

Kemi krijuar institucione të qëndrueshme në të gjitha nivelet. Kemi shërbimin intelegjent, policinë dhe doganën më të mira në këto anë të Evropës. Kemi një FSK të shkëlqyeshme që së shpejti do të marrë detyrat dhe misionin e një ushtrie të mirëfilltë moderne.

Kemi shënuar në vazhdimësi një zhvillim ekonomik që është më i larti në këtë pjesë të Evropës. Kemi avancuar shumë marrëdhëniet ndëretnike në shtetin e Kosovës. Kemi ruajtur të pacenuar trashëgiminë e tolerancës ndërfetare në Kosovë.

Kosova merr pjesë në të gjitha garat sportive në botë. Sportistët valëvisin me krenari flamurin e Kosovës në të katër anët e rruzullit tokësor. Majlinda Kelmendi fitoi medalen e parë të artë olimpike dy vjet më parë në Olimpiadën e Rios.

Kosova i ka dhënë Evropës dhe botës këngëtare të famshme, ka bërë filma të çmuar në gjithë botën. Lista e arritjeve dhe e sukseseve në shtetin e Kosovës dhe të shtetit të Kosovës, është shumë e gjatë. Kjo na bën të gjithëve krenarë.

Por, edhe kur shënojmë jubileun e parë të shtetit të Kosovës, ne duhet të jemi të sinqertë ndaj njëri-tjetrit dhe të themi që duhet për të bërë edhe më shumë që në Kosovë të fuqizohet rendi dhe ligji, që të sigurohet mirëqenia sociale për të gjithë qytetarët e Kosovës, që shteti i Kosovës të jetë konkurrent në të gjitha aspektet e mundshme ekonomike në Ballkan dhe në Evropë.

Të gjithë ne e dimë mirë që kemi merituar të ecim më shpejt kah Bashkimi Evropian, që tashmë do duhej të ishim anëtarë të OKB-së dhe të gjitha organizatave të tjera ndërkombëtare, të nënshkruhej Marrëveshja finale për normalizimin e marrëdhënieve të Kosovës dhe Serbisë, si dy shtete të pavarura.

Sidoqoftë, e dimë kah do të ecim në javët, muajt dhe vitet e ardhshme. Kemi vullnetin, vendosmërinë, sigurinë, besimin dhe shpresën që na bashkon të gjithëve në synimet tona.

Jam i sigurt që dhjetë vitet e kaluara kanë qenë vitet më të rënda, më sfiduese, më të vështira për shtetin e Kosovës, por njëlloj kanë qenë vitet e krenarisë sonë të përbashkët.

Jam edhe më i sigurt që ata që jetojnë këtu, në atdheun tonë që është shtet prej 17 shkurtit të vitit 2008, pas dhjetë vitesh apo në shkurtin e vitit 2028, kur ta festojnë ditëlindjen e njëzet të Republikës së Kosovës, do të shohin që Kosova ka ecur para me hapa të mëdhenj, që është bërë anëtare e OKB-së, e BE-së, e Paktit NATO, që ka një demokraci të qëndrueshme, që është bërë një shtet me stabilitet afatgjatë ekonomik dhe social, i cili, mbi të gjitha, ofron dinjitet dhe krenari për qytetarët e vet.

Gëzuar ditëlindjen e dhjetë të shtetit të Kosovës!

Qoftë i bekuar shteti i Kosovës përjetë dhe mot!

Joseph Biden: SHBA, mik i vërtetë i popullit të Kosovës

February 15, 2018 by dgreca

1 Biden Thaci 1 Biden femijet 001 002 1 ecje 1 biden turme -Presidenti Thaçi pranoi letër urimi nga ish-zëvendëspresidenti i SHBA-së, Joseph Biden: Kosova është një shtet i ri, por jo shumë i ri për të ditur se për çfarë kanë nevojë dhe çka meritojnë qytetarët e saj. Kam besim se qytetarët e këtij vendi të madh do të vazhdojnë të ndërtojnë një Kosovë të qëndrueshme, të lirë, demokratike dhe të begatë – një Kosovë që manifeston shpresat dhe ëndrrat shumëvjeçare. Dhe unë besoj se me një Kosovë të tillë edhe vetë bota do të jetë më e mirë. Sot, ndërsa po festoni sukseset tuaja të shumta, e dini se Shtetet e Bashkuara janë, kanë qenë dhe gjithmonë do të jenë një mik i vërtetë i popullit të Kosovës/

PRISHTINË,15 SHKURT 2018-Gazeta DIELLI/ Presidenti i Republikës së Kosovës, Hashim Thaçi, në prag të shënimit të dhjetëvjetorit të pavarësisë, ka pranuar një letër urimi nga ish-zëvendëspresidenti i SHBA-së, Joseph Biden.
Letra e plotë:/
I nderuar z. President,
Me krenari dhe kënaqësi të jashtëzakonshme ju ofroj urimet më të thella për ju dhe popullin e Kosovës në përvjetorin e dhjetë të pavarësisë suaj. Siç e dini, gjithmonë kam besuar në premtimin e popullit të Kosovës për të ndërtuar një shtet të rrënjosur në vlerat themelore të drejtësisë dhe barazisë.
Në një dekadë të shkurtër, ju me vendosmëri keni zhvilluar një betejë për pavarësi, jeni mirëpritur në bashkësinë e kombeve, keni ndërtuar një demokraci përfaqësuese, ku zgjedhjet e lira dhe të drejta janë shndërruar në normë dhe kodifikimi i të drejtave të njeriut është bërë ligj. Ju tani keni vendosur themelet e forta të një shtetit demokratik. Organizatat joqeveritare janë aktive, qytetarët lirshëm debatojnë për çështjet ditore dhe veprimet e tolerancës dhe pajtimit e pikëzojnë peizazhin.
Një nga udhëtimet e para që kam bërë si zëvendëspresident ishte ta vizitoja Kosovën më 2009. Vizita që i bëra vendit disa vjet më vonë ishte gjithashtu një nga vizitat e mia të fundit zyrtare si zëvendëspresident. Isha shumë i impresionuar për të parë nga afër progresin e shënuar në atë kohë të shkurtër falë guximit të patrembur dhe këmbënguljes së palëkundur të popullit të Kosovës. Ndërsa, atje ka ende shumë punë që duhet bërë, ju po lëvizni me shpejtësi për t’u bërë një demokraci plotësisht e integruar evropiane – një demokraci në paqe me fqinjët e saj në të cilën të gjithë qytetarët trajtohen me dinjitet.
Kosova dhe qytetarët e saj janë të vendosur thellë në zemrat e tërë familjes Biden. Kam rënë në dashuri me vendin tuaj në vizitën time të parë si një senator i ri i Shteteve të Bashkuara në mesin e viteve ‘70. E njëjta vlen edhe për djalin tim, Beau, i cili në pjesën më të mirë të një viti jetoi dhe punoi në Kosovë, më 2001, për të ndihmuar në avancimin e sundimit të së drejtës – një nga qëllimet më të rëndësishme të çdo shteti të ri të pavarur. Dhe çdo pjesëtar i ardhshëm i familjes Biden që do të bëjë pelegrinazh për të vizituar autostradën e emëruar në nder të Beau-t, jashtë kampit Bondsteel, sigurisht do të ndjehet aq thellësisht pjesë e suksesit tuaj të vazhdueshëm, ashtu siç ndjehem unë.
Beau erdhi në Kosovë si një këshilltar në Departamentin amerikan të drejtësisë për të ndihmuar institucionet të luftojnë korrupsionin dhe të krijojnë një shoqëri të barabartë për të gjithë qytetarët. Ai vazhdoi betejën për po këto qëllime në vendlindjen time, në shtetin amerikan Delaware, ku ai shërbeu si Prokuror i Përgjithshëm. Beau, ashtu si edhe patriotë të shumtë amerikanë, e dinte fare mirë se puna e demokracisë nuk kryhet kurrë. Edhe në Shtetet e Bashkuara ne duhet të vazhdojmë të punojmë çdo ditë. Beau, ashtu si shumë amerikanë patriotë, e dinte mirë se puna e demokracisë nuk është bërë kurrë. Ne duhet të vazhdojmë të punojmë çdo ditë në Shtetet e Bashkuara.
Kosova është një shtet i ri, por jo shumë i ri për të ditur se për çfarë kanë nevojë dhe çka meritojnë qytetarët e saj. Kam besim se qytetarët e këtij vendi të madh do të vazhdojnë të ndërtojnë një Kosovë të qëndrueshme, të lirë, demokratike dhe të begatë – një Kosovë që manifeston shpresat dhe ëndrrat shumëvjeçare. Dhe unë besoj se me një Kosovë të tillë edhe vetë bota do të jetë më e mirë.
Sot, ndërsa po festoni sukseset tuaja të shumta, e dini se Shtetet e Bashkuara janë, kanë qenë dhe gjithmonë do të jenë një mik i vërtetë i popullit të Kosovës. Ne i gëzohemi sukseseve tuaja dhe do të punojmë për t’ju ndihmuar që t’i tejkaloni sfidat me të cilat përballen të gjitha demokracitë. Dhe e di se edhe personalisht vazhdoj të qëndroj me popullin e Kosovën. Shpirti i juaj është i lirë, i palodhshëm dhe e ardhmja juaj është e ndritshme. Po pres me padurim se çfarë do të sjellin dhjetë vitet e ardhshme.