Komente – Page 128 – Dielli

DESHMORET E GERHOTIT, DESHMORE TE KOMBIT

September 14, 2020 by dgreca

NGA EDUARD M DILO-

Eshte fatkeqesi e madhe qe ne historine tone shekullore, tradhetia per njeri-tjetrin na ka shoqeruar hap mbas hapi.

E tradhetuan Gjergj Kastriotin, tradhetuan e tradhetuan tere keto kohe te historise sone Kombetare, edhe Familjen Jashari ne ditet tona e masakroi tradhetia…

Kesaj tradhetie nuk mund ti shpetonte dhe masakra e kryer ne Gerhot te Gjirokastres ate 14 shtator 1943, ku u vra fale pabesise se komunisteve dhe Trimi i Trimave”

i pa vdekeshmi Hysni Lepenica.

“Sa here sjellim ndermend gjakun e deshmoreve te Ballit Kombetar, ku ne te eshte shkruar ideali Kombetar i Shqiperise Etnike, na del ne cdo hap nga nje fytyre Heroi,

heronj qe ngrihen te gjalle e nuk i tret dheu se akoma Shqiperia jone, nuk eshte “Shqiperi e lire, per Shqiptare te lire”.

Fale tradhetise, pabesise te se pabeseve u krye masakra ne Gerhot, ku ne balle te trimave printe Hysni Lepenica, ai Hysni shpirt ushqyer me vetetime e gjemim topash

qe nga lufta heroike e Vlores,kur ish djale i njome, ne ate kohe kur Labi i hovshem hapte brucen permbi tela si krah shqiponje.

Hysni Lepenica, ushtar i betuar dhe i vendosur per Kombin, nuk i leshoi kurre armet nga dora, por luftoi me trimeri te pa shoqe.

Ai luftoi me pas kunder roberise se brendeshme, kunder padrejtesive shoqerore dhekerkoi per popullin shqiptar kushte te reja jetese”.

Kur Balli Kombetar leshoi kushtrimin “Bini burra, per Liri”,kush valle do pergjigjej me shpejt kesaj thirrjeje se Hysni Lepenica,

kush do te ishte me i gatshem se Ai, qe i-u ndes flake nder dej kujtimi i 1920-tes?

“Ketu jam” tha “Trimi mbi trima” dhe bota Shqipetare e degjoi ne mal te Gjormit, dhe armiku e pa te Ura se kush ishte Shqipe e Lepenices.

Me nje grusht burrash qe nuk kishin e c’te vinin perpara tankeve vec eshtren e kraharorit, theu e shpartalloi kollona te motorizuara, ne Gjorm, ne Greshice, ne Ruzhdije, ne Dukat e Vajze te Vlores,

duke ngritur lart emrin e armeve Shqiptare, emrin e Ballit Kombetar.

Ishte nje stateg i lindur, nje luftetar i pa epur, nje Hero. Kudo ku udhehiqte Ai, fitorja ishte e sigurt. Komunistet e pa bese nuk mund ti afroheshin.

Ne vjeshten e 1943, e pikerisht me 14 shtator, tek sulmoi me hov ushtrine fashiste, u vra pabesisht, me 36 shoke e komandante cetash bashke me Nano Gjonin e Picarit.

Keta ishin lulja e rinise se Ballit Kombetar. Po si u vrane? Duke mos u trembur, po sulmuar si shqiponja, gjersa kercyen brenda ne oborr te kazermes, ashtu sic ish hedhur ne gryke te topave Selam Musai dikur.

Hysni Lepenica, Komandant i Pergjithshem i Ballit Kombetar eshte nje legjende e gjalle qe tregoi trimeri te pa shok, ndaj populli e perjetoi ne kenge.

Ai i tmerron te kuqte edhe aty ku prehet, ndaj Ai sebashku me gjithe Deshmoret e Ballit Kombetar, sikur nuk jane bij Shqiperie, shikohen si te huaj.

Lavdi Deshmoreve te Ballit Kombetar! Lavdi Deshmoreve te Kombit!

Shqiptarët në Luginë duhet të gëzojnë të drejtat

September 12, 2020 by dgreca

-Kryediplomatja Haradinaj i reagon Gjykatës së Vranjës për padinë ndaj Ragmi Mustafës/

Prishtinë 12 Shtator 2020-Gazeta DIELLI/ Ministrja e Punëve të Jashtme dhe Diasporës Meliza Haradinaj Stublla, i ka reaguar zyrtarisht Gjykatës së Vranjës, për padinë që ajo ka ngritur ndaj Kryetarit të Këshillit Kombëtar në Luginë, z.Ragmi Mustafa, pasi ai kishte ngritur flamurin kombëtar shqiptar në vitin 2019

Shefja e diplomacisë kosovare, ka thënë se ky veprim është puro politik dhe në kundërshtim me parimin e mbrojtjes së të drejtave të komuniteteve etnike.

“Padia e djeshme e Gjykatës së Vranjës ndaj Kryetarit të Këshillit Kombëtar në Luginë, z.Ragmi Mustafa, veç se ai ka ngritur flamurin kombëtar shqiptar në vitin 2019, është qartazi e motivuar politikisht dhe në kundërshtim me parimin e mosdiskriminimit dhe mbrojtjes të të drejtave të komuniteteve etnike.”, është shprehur Haradinaj Stublla në reagimin e saj.

Kryediplomatja ka shtuar se Serbia në vend që të zotohet për njohje dhe avancim të të drejtave të komunitetit shqiptar, sidomos tani që ka një dialog aktiv për njohje reciproke nën lehtësimin e aleatëve, ajo po vazhdon avazin e vjetër me politikë dhe institucione shqiptarofobike.

Ministrja Haradinaj ka thënë se shqiptarët e Luginës duhet të gëzojnë të drejtat e tyre dhe se kjo sjellje nuk është rruga drejt çmimit Nobel.

“Shqiptarët në Luginë duhet të gëzojnë të drejtat e tyre të garantuara, njësoj sikurse janë të garantuara të drejtat e zgjeruara të serbëve në Kosovë.Kjo NUK është rruga e Çmimit Nobel për Paqe.”, ka përfunduar ministrja Haradinaj.

Kryeministri Hoti në Washington:Kosova përherë mirënjohëse Amerikes

September 2, 2020 by dgreca

Kryeministri Hoti në Washington: Përherë mirënjohës për ndihmën që SHBA-të kanë dhënë për Kosovën

Washington, 2 Shtator 2020-Gazeta DIELLI/

Kryeministri i Qeverisë së Republikës së Kosovës, Avdullah Hoti, në kuadër të vizitës zyrtare në Washington, ka takuar sot Drejtorin Ekzekutiv të Koorporatës Sfidat e Mijëvjeçarit (Millennium Challenge Corporation- MCC), Sean Cairncross me të cilin ka biseduar për bashkëpunimin dhe realizimin e projekteve të përbashkëta ndërmjet Qeverisë së Kosovës dhe MCC-së nga programet Kompakt dhe Threshold.
Me këtë rast, kryeministri Hoti ka shprehur gatishmërinë e Qeverisë së Kosovës për përmbushjen e të gjitha kushteve, të cilat mundësojnë arritjen e synimeve të përbashkëta dhe jetësimin e këtyre projekteve.
“Populli i Kosovës do të jetë përherë mirënjohës për ndihmën që Shtetet e Bashkuara të Amerikës kanë dhënë për Kosovën, veçanërisht edhe nëpërmjet programit të MCC-së që mbështet përpjekjet e qeverisë për reforma në fusha të ndryshme”, pohoi kryeministri Hoti.
Kryeministri Hoti tha, po ashtu, se Qeveria e Kosovës e vlerëson shumë angazhimin e MCC-së në procesin e përfundimit të Programit Kompakt për Kosovën dhe se është shumë e rëndësishme të theksohet se projektet e përfshira në zhvillimin e programeve “Kompakt” dhe “Threshold” identifikohen bashkërisht nga stafi i MCC-së dhe Qeveria e Kosovës dhe si të tilla, këto programe mbështeten plotësisht nga Qeveria.

Duke falënderuar SHBA-të dhe MCC-në për mbështetje të vazhdueshme, kryeministri Hoti tha se Qeveria e Kosovës, duke ditur rëndësinë që kanë projektet e MCC-së për zhvillimin ekonomik të vendit, përmbushjen e nevojave afatgjate dhe përmirësimin e infrastrukturës energjetike, përmirësimin e ndotjes së ajrit dhe çështje të tjera, do të jetë e përkushtuar për plotësimin e kushteve dhe realizimin sa më të shpejtë të projekteve.

Kryeministri Hoti, me këtë rast, tha se përkundër situatës së rënduar nga pandemia COVID-19, Qeveria ka ndërmarrë hapat konkretë për përmbushjen e reformave të nevojshme dhe për programin e rimëkëmbjes ekonomike ka paraparë ndarjen e 10 milionë eurove si garanci kreditore për sektorin privat dhe energjinë e ripërtëritshme, si dhe përkrahjen e projekteve për gratë ndërmarrëse.Ndërsa, Drejtori Ekzekutiv i MCC-së, z. Cairncross shprehu gatishmërinë e tij për bashkëpunim të mëtutjeshëm me Qeverinë e Kosovës në implementimin e projekteve prioritare, të cilat do ta ndihmojnë zhvillimin ekonomik të vendit dhe mundësojnë realizimin e granteve të MCC-së për shoqërinë civile në projektet e ndryshme.

Takime në Washington: Kosova, partneritet të ngushtë

September 2, 2020 by dgreca

-Ministri Selimi: Për fuqizimin e sistemit të drejtësisë mbetet e pazëvendësueshme përkrahja e miqve amerikan/

Washington, 2 Shtator 2020-Gazeta DIELLI/ Ministri i Drejtësisë, Selimi Selimi, sot me Ministren e Punëve të Jashtme dhe Diasporë, Meliza Haradinaj-Stublla, ka zhvilluar një takim me Bruce Swartz, nga Departamenti i Drejtësisë i ShBA-së, përgjegjës për Zyrën për Çështje Ndërkombëtar, si dhe për OPDAT dhe ICITAP, me të cilat Kosova ka partneritet të ngushtë prej shumë vitesh.

Në takim me z. Swartz, ministri Selimi ka folur për progresin që është arritur në drejtësi, si dhe reformat e ndërmarra në funksion të fuqizimit të sundimit të ligjit. Për këtë, si shumë të rëndësishme e ka cilësuar mundësinë e zgjerimit të bashkëpunimit në ngritjen e kapaciteteve të gjyqësorit dhe prokurorisë në Kosovë, duke sjellë përvojën direkte të gjyqtarëve dhe prokurorëve amerikanë tek ata kosovarë.

Ministri Selimi ka vlerësuar asistencën e Shteteve të Bashkuara të Amerikës dhe veçanërisht mbështetjen e pakursyer për reformat e ndërmarra me qëllim të konsolidimit të sistemit të drejtësisë në vendin tonë. Selimi ka veçuar përkrahjen e USAID, programeve OPDAT dhe ICITAP me të cilat Ministria e Drejtësisë ka realizuar plane konkrete të veprimit nga fusha e drejtësisë, duke shtuar se i gjithë investimi amerikan në këtë proces, ka rezultuar shumë i suksesshëm.

Nga ana tjetër z. Swartz ka vlerësuar marrëdhënien e shkëlqyeshme që SHBA ka me Kosovën dhe ka theksuar se çdo projekt i cili kontribuon në fuqizimin e sundimit të ligjit do të ketë përkrahjen nga shteti i tij.

Duke e falënderuar për këtë takim, ministri Selimi tha se Republika e Kosovës, miqësinë me Shtetet e Bashkuara të Amerikës do ta kultivojë si vlerën më të çmuar të saj.

KRIJUESIT E MORALSHËM NDËSHKOJNË KRIMET E KOMUNIZMIT

August 15, 2020 by dgreca

Nga Thanas L. Gjika-Disa ditë më parë, më 10 gusht, e nderuara Zonja Lavdie Nela, me rastin e 32-vjetorit të varjes së bashkëshortit të saj, poetit disident Havzi Nela, bëri një thirrje të re për hapjen e dosjeve dhe dënimin e atyre që e dënuan poetin, pra dënimin e kriminelëve që janë ende me detyra në pushtet. Fakti që kjo thirrje e përsëritur nuk ka marrë përgjigje, tregon se shoqëria jonë ka mbetur ende e inkriminuar dhe nuk ka ndërmend të dënojë krimet e kohës së diktaturës komuniste.

Kokëfortësia e qeverisë shqiptare në mbrojtje të bëmave të diktaturës komuniste u shfaq hapur dhe në deklaratën që dha Kryeministri, Z. Edi Rama pak muaj më parë: “Shqipëria komuniste ishte në krahun e duhur të historisë”. Po ashtu kjo kokëfortësi është shfaqur dhe në përpjekjet që bëhen për mbushjen e SPAK-ut me bijtë e njerëzve të inkriminuar të kohës së diktaturës, bij të cilët nuk kanë shprehur në shtyp qëndrimin e tyre kritik ndaj krimeve të etërve të tyre.

Gazetrari i mirënjohur Frank Gj, Shkreli me artikullin “Poeti Havzi Nela si zgjim i ndërgjegjes morale kombëtare dhe ndërkombëtare në Shqipëri” kritikoi ashpër si Kryeministrin për deklaratën e tij dhe ndërkombëtarët që po e zvarrisin plotësimin e SPAK-ut me elementë të denjë për të filluar sa më parë nga puna. Shkreli solli dhe pjesë nga poezia e Nelës dhe nga një artikull i Ismail Kadaresë shkruar vitin e kaluar për këtë poet të martirizuar. Ajo që u dhemb artikullshkruesve është fakti se shoqëria jonë noton në plogështi, asaj i mungon ndërgjegja dhe morali demokratik. Ndërkohë poeti Visar Zhiti ripublikoi në faqen e tij “Miqtë e Visarit” poezinë kushtuar bashkëvuajtsit Nela…

Në Shqipërinë e sotme ka shumë krijues, të cilët përpiqen t’u japin veprave të tyre artistike një formë moderne me figura tërheqse, por me një përmbajtje ideore larg zbulimit dhe vlerësimit të Njeriut të viktimizuar prej regjimit diktatorial, larg prej dënimit të sistemit komunist si sistem kriminal, që deformoi të vërtetën historike për hir të propagandës së tij.

Havzi Nela ishte një Njeri, një Poet që u viktimizua prej regjimit komunist sepse dënoi në poezinë e tij propagandën e shtetit diktarorial për durim e shpresës për një jetë më të mirë që do të vinte mbas ndërtimit të komunizmit. Durim e shpresë për një shoqëri imagjinare, që nuk do të vinte kurrë:

“Pse t’ më dhimbset jeta, pse u dashka kursye?

Veç me përtyp bukën, me u rropatë si kalë?

Pa nji fjalë ngushllimi, pa nji ditë lumnie.

Unë skllav i bindun, tash kur s’jam as djalë?

“Deri kur durim, deri kur me shpresa?

Jo, jo, mos më thoni, këto fjalë nuk i due.

Me durim e shpresë nuk due të vdes.

Si jeta dhe vdekja duhen meritue!”

(“O liri, o vdekje!”)

Kjo poezi ishte dhe mbetet kushtrim për zgjimin e ndërgjegjeve tona, të cilin qeveria e Ramiz Alisë e ndëshkoi me varje. Më 9 gusht 1988 u lajmërua populli i qytetit dhe i fshatrave të Kuksit që të mblidhej të nesërmen në ora 10:00 e mëngjezit te sheshi kryesor i qytetit për të marrë pjesë në dënimin shembullor që do t’i jepej “armikut të popullit Havzi Nela”. Populli u mblodh në orën e caktuar te sheshi i qytetit, por dënimi i poetit, varja e tij ishte kryer që në orën 2:00 të natës. Në prani të popullit, ekzekutorët e prenë litarin dhe e lidhën pas karrocerisë së një kamioni, të cilin filluan ta shëtisnin nëpër qytet duke hequr zvarrë kufomën e poetit për të ngjallur frikë e tmerr në prag të kapitullimit të sistemit diktatorial.

Që atëhere deri sot asnjë nga ish-kryesia e Lidhjes së Shkrimtarëve dhe Artistëve të Shqipërisë nuk e ngriti zërin kundër këtij krimi të shëmtuar, asnjë prej tyre nuk mori një tufë me lule e të shkonte te varri i poetit për të kërkuar të falur ndaj gojëkyçjes së atëhershme…

Në Shqipëri më 2019 u rikrijuar Lidhja e Shkrimtarëve dhe Artistëve, organizatë së cilës qeveria nuk i ka dhënë ende asnjë fond, asnjë zyrë e asnjë ambjent ku mund të kryejë aktivitete për promovim librash, përkujtim shkrimtarësh dhe artistësh, në një kohë që parti inegzistente me katër a pesë anëtarë vijojnë të kenë zyra e të marrin fonde prej qeverisë Rama.

Shpresoj që Lidhja e re e Shkrimtarëve dhe Artistëve të Shqipërisë të organizojë ceremoni homazhesh te busti i Havzi Neslës në Kukës dhe te memoriali i poetëve Vilson Blloshmi e Genc Leka në Librazhd, ku të flasin anëtarë të kësaj lidhjeje për të kritikuar krimet makabre të regjimit komunist ndaj këtyre “Pishtarëve të Demokracisë”. Me të tilla veprimtari që do të ngrenë moralin e shqiptarëve kjo organizatë krijuesish do të justifikojë ekzistencën e saj dhe do t’i imponohet qeverisë dhe mbarë opinionit shqiptar në krejt Ballkanin Perëndimor dhe në diasporë që të njihet dhe përkrahet.