Komente – Page 214 – Dielli

Departamenti Amerikan i Shtetit mbështet ambasadorin Lu

February 9, 2017 by dgreca

Konfirmohet mbështetja e DASH për ambasadorin LU/

Departamenti Amerikan i Shtetit ka besim të plotë tek ambasada dhe ambasadori amerikan në Shqipëri.
Këto janë fjalët zyrtare ekskluzive për Top Channel, i cili iu drejtua Departamentit Amerikan të Shteti pas artikullit të Huffington Post, ku Luke Cofey drejtor i politikave të jashtme në Heritage Fondation, kritikon politikat e SHBA-ve në Ballkan dhe konkretisht për Shqipërinë, ndërhyrjen e ambasadorit Donald Lu në politikat e brendshme.
Top Channel kontaktoi DASH dhe zyra e shtypit atje, në emër të zëdhënësit Mark Toner, thekson se qellimi madhor amerikan në Shqipëri është mbështetja e reformave me qëllim anëtarësimin e vendit në BE.
“Politikat e SHBA kanë si qëllim të mbështesin anëtarësimin e vendit tuaj në BE dhe reformat e nevojshme për të arritur këtë qëllim. Këtu përfshihen mbështetja ndaj reformës në drejtësi, lufta ndaj korrupsionit dhe krimit të organizuar dhe gjithashtu lufta ndaj ekstremizmit të dhunshm. Ambasadori LU dhe ekipi i tij kanë punuar në partneritet me autoritetet shqiptare ashtu si dhe me shoqërinë civile për të cuar përpara politikat dhe qëllimet e Amerikes. Departamenti i Shtetit, ka besim të plotë tek ambasada jonë dhe vetë Ambasadori në Shqipëri. Si miq dhe aleatë të Shqipërisë në Nato, SHBA-të nxisin fuqimisht të gjitha palët të respektojnë fuqinë e ligjit dhe proceseve demokratike. Ne duam të shohim një Shqipëri të fortë dhe të integruar në familjen euro-atlantike”,- thuhet në reagimin zyrtar të Departamentit Amerikan të Shtetit.

Vendimi për Haradinajn më 2 mars

February 9, 2017 by dgreca

Një gjykatë franceze në Colmar ka shtyrë vendimin për lirimin ose ekstradimin në Serbi të ish-kryeministrit të Kosovës, Ramush Haradinaj, deri më 2 mars. .Pas përfundimit të seancës Haradinaj tha se ‘Serbia po provon ta pengojë rrugën e Kosovës”. “Shpresoj se vendimi mos po merret me herët se 2 marsi është shumë gjatë. Është humbur shumë kohë në një kërkim ekstradimi që është abuziv nga ana e Serbisë që është pa bazuar”.

“Kjo nuk është asgjë e re që nuk e di Franca dhe e gjithë bota. Kryeministri i Serbisë Vuçiq ka qenë ndihmës i Sheshelit dhe kanë udhëhequr formacione paraushtarake, dhe atëherë kanë pasur edhe ushtri. Presidenti Nikoliq gjithashtu ka udhëhequr formacionet paraushtarake, ndërsa ministri i punëve të jashtme të Serbisë Daçiq ka qenë ndihmës i Milosheviqit”.

“Prandaj atyre nuk iu interesojnë viktimat, nuk iu interesojnë ligjet, ata keqpërdorin këtë përparësi që janë pjesë e Interpolit dhe provojnë ta pengojnë rrugën e Kosovës”, tha Haradinaj para Gjykatës në Colmar. .

Gjatë seancës, kryetari i trupit gjykues e ka pyetur Haradinajn nëse pranon të ekstradohet në Serbi në bazë të kërkesës që ka parashtruar Serbia.

Mirëpo, përgjigja e Haradinajt ishte kundër, duke ia rikujtuar gjykatësit se “ky rast është krejtësisht politik”.

Ish-komandanti i Ushtrisë Çlirimtare të Kosovës, njëherësh ish-kryeministri dhe aktualisht kryetari i Aleancës për Ardhmërinë e Kosovës, Ramush Haradinaj në vitin 2012 ishte shpallur i pafajshëm për të gjitha akuzat për krime lufte nga një Gjykatë Ndërkombëtare për Krime Lufte në Ish Jugosllavi.Rigjykimi në vitin 2012, u bë katër vjet pas një vendimi të së njëjtës Gjykatë e cila më 2008 e nxori të pafajshëm nga të gjitha akuzat që e ngarkonin për shkelje të ligjeve të luftës.

Ramush Haradinaj pati dhënë dorëheqje nga posti i kryeministrit të Kosovës më 8 mars të vitit 2005, vetëm disa muaj pas marrjes së detyrës. Ai u dorëzua vullnetarisht në Gjykatën e Hagës, pasi Prokuroria e akuzoi atë dhe dy bashkë luftëtarët e tij, Idriz Balaj e Lahi Brahimaj, për krime lufte.

Ndalimi i Ramush Haradinajt nga policia franceze nuk është veprimi i vetëm, pasi që ndalime të tilla të personave të kërkuar nga Serbia përmes INTERPOL-it, ka pasur edhe në të kaluarën.

Autoritet e Kosovës kanë thënë se kanë adresuar te faktori ndërkombëtar çështjen e fletë-arresteve të lëshuara nga Serbia ndaj qytetarëve të saj, por ka mundur të bëjë pak në këtë drejtim, ngase Kosova nuk është anëtare e INTERPOL-it dhe organizatave tjera ndërkombëtare të sigurisë.

Kosova e cila ka shpallur pavarësinë në shkurt të vitit 2008, kishte aplikuar për anëtarësim në INTERPOL në prill të vitit 2015, por që vitin e kaluar kjo organizatë suspendoi aplikacionin e Kosovës për anëtarësim në këtë organizatë ndërkombëtare.

KUR NJERIU ASHT VETEM SHIFER..!

February 9, 2017 by dgreca

Nga Fritz RADOVANI/*

KY ISHTE FUNDI I ATYNE QË KERKONIN VETEM LIRI !/

PAPA GJON PALI II ka thanë: “Ajo që ka ngja në Shqipni, të dashtun Vëllazën dhe Motra, nuk asht pa kurrë në historinë e njerëzimit…”

■“UJË TUE SHTERRË, NA TUE U MBYTË…”, thonte Populli ynë rrezikzi.

Prej ditës së parë që gjarpni i komunizmit lëshoi vezen e vet në Token Shqiptare, kurrma nuk pau ai vend një ditë të mirë veç plumba, pushkatime, kufoma, vrasje, hetuesi, hunjë, dajak, korrente elektrike, zhgulje dhambësh, burgje, kampe shfarosje, polic barbar, hetues terroristë, thyemje kockash e interrnime.., të gjitha këta shemtime si e si me shfarosë një rini t’etëshme per dije e kulturë, një brez të papersëritshem intelektual të formuem në një Europë të perparueme, një Popull “Besnik, Burrnor e Bujar” me të gjitha virtytet e tiparet fisnike, ku sulltan Mehmeti i dytë vetem plasi nga dishprimi, se nuk pat pranë vetes një zog turku si tiranët Enver Hoxha e Ramiz Alia, thimcat e të cilëve villnin vetem helm, vllavrasje, shkatrrim, zhdukje e mjerim në Shqipninë e Atyne Burrave, që me sakrifica e vuejtje Ringjallën mbas 500 vjetësh Atdheun e Kastriotit!

■Në çdo hap ku Shqiptari ven kamben, aty ka një “gropë pa Emen”!

Po më thuej, bre Burrë, i kujt asht Ai shatrivan Gjaku’ të kulluem që skuq edhe Qiellin ?

E pra, Një Zot besuen ata Male të pashkeluna nga zaptuesi, ata Qytete ku Kështjellat u mbuluen me “ruba të zeza” e ata Fusha, ku dikur… “Balta ishte ma e ambel se mjalta”!?

Nuk kanë ma Emna!..

■Rinia di me lexue sllavisht, rusisht, turqisht, greqisht, italisht, frengjisht, po, po, di me lexue kinezëshe e arabqe… Po, pasha një fjalë nga Gjuha e At Fishtës me shkronjat e Manastirit, e një rresht nga vjerrshat e Don Ndre Mjedjes… Qe pra, o Luigj Gurakuqi, ku vojti “Shkolla Yte Normale e Elbasanit” ku, dikur Pishtarët e dijes s’ Ate Shqipninë e patne ndriçue me Veprat e Vigajve të Rilindjes, Naimit e Kristoforidhit të Pavdekshem!

Bash per At Shqipni që Ti o Luigj, ke dhanë edhe jeten… Ndonse, jo i vetem… Ishe me të Madhin Dedë Gjo’ Luli, Bajram Curri, Isa Boletini, Hasan Prishtina, Avni Rustemi…

Po, që në gjurmët e Françeskanëve tanë… Dritë e Dije na dhanë e trashigim na lanë!

■Ata na mësuen se njeriu ka Një Babë dhe Një Nanë… E na i besuem !

Po, mbas 1944 ne, na u desht me besue se “njeriu ka dy e tre baba e disa nana…”

Mbas 1967 na doli edhe “një babë e nanë…” dikund kah Tibeti… E kush nuk e besoi…

E hypen tek stoli…

■Nuk mund ta harroj kurrë Mësuesin e Madh Atdhetar që n’ Kukës e vari Ramiz Alia !..

E varën Havzi Nelen se i mësoi Rinisë vjerrshen e Një Babës e vetem Një Nanës, per të cilen Ai jeten fali, e Flija e Atdheut të vet u ba se: “Na mësoi që Njeriu nuk asht shifer!”

E Bjeshkët e Nêmuna mêjtën… E sot, prap mendoj: “Si varet një Mësues Poet!”…

Kur Ai, nder Ata Bjeshkë dha kushtrimin: “Shqiptarë, varri i t’ huejve asht këtu!” …

■Çoni bre, sytë nalt e shikoni… Ata sot janë vetem “shifra”!.. Një… Tre… Shtatë…

Janë Burrat që vdiqën per Nanen Shqipni e Flamurin e Gjergj Kastriotit tanë!

Shqipnia ka vetem Një Flamur me Një Shqipe… E Ata falën jetën e vdiqën per Té!

E ka vetem Një Popull që me Gjakun e Martirëve të Saj, Até e ka ngjyrosë Kuq’ e Zi…

Prej Hotit, Grudës, Dardanisë, Maqedonisë, Çamërisë e Vorio Epirit ku flitet Një Gjuhë, e vetem e Një Nanës, Nanës sonë Shqipni… E Kjo asht e Asaj Nanës së dhunueme që:

■At Gjergj Fishta Pagëzoi: GJUHA SHQIPE

Porsi kanga e zogut t’ verës,

Qi vallzon n’ blerim të Prillit;

Porsi i ambli flladi i erës,

Që lmon gjijt’ e drandofillit:

Porsi vala e bregut t’ detit,

Porsi gjama e rrfés zgjetare,

Porsi ushtima e një termeti,

Ashtu asht gjuha e jonë Shqiptare.

Nesër në Colmar: Shqiptarët janë me ty gjeneral!

February 8, 2017 by dgreca

Shqiptarët janë me ty gjeneral!/

Ramush Haradinaj do t’i sjell fitore të madhe Kosovës dhe luftës së saj çlirimtare/

Të nderuar shqiptarë,Nesër në Colmar të Francës Ramush Haradinaj do të mishërojë drejtësinë përballë proceseve të montuara gjyqësore dhe të motivuara politikisht nga regjimi i Serbisë. Kam bindjen e fortë se edhe kësaj radhe Ramush Haradinaj do t’i sjell fitore të madhe Kosovës dhe luftës së saj çlirimtare.

Themelet e lirisë së Kosovës janë ndërtuar edhe mbi gjakun e plagëve të shumta të Ramush, Daut dhe Veton Haradinajt, themelet e lirisë së Kosovës janë ndërtuar mbi gjakun e heronjve Luan, Shkëlzen dhe Enver Haradinajt, themelet e lirisë së Kosovës janë ndërtuar edhe mbi gjakun e Lokes së Madhe të Kosovës, Aze Brahimajt (gjyshes së Ramushit) nga duar e së cilës kanë ngrënë bukë shumë luftëtarë të lirisë…

Gjeneral Ramushin e pret Kosova që të kthehet ngadhënjimtarë edhe nga kjo betejë!

Shqiptarët janë me ty gjeneral!

Me respekt të thellë

Bardhyl Mahmuti

Kompania “Apple” së shpejti me kampus madhështor

February 8, 2017 by dgreca

Është pothuajse gati kampusi i ri dhe madhështor i gjigantit kompjuterik “Apple”. Fotot e para flasin për një vëmendje shumë të lartë, të treguar ndaj çdo detaji inxhinjerik të ndërtesës në formë kampusi.
Kjo ndërtesë është projektuar nga themeluesi i kompanisë, njeriu dhe shkencëtari i madh, Steve Jobs, përpara se të vdiste më 2011-ën, dhe është ndërtuar në qytetin e vogël e të bukur, Cupertino, California. {Sqarojmë lexuesit se pranë këtij qyteti të vogël, janë dhe kampuset qëndrore të kompanive të tjera të rëndësishme kompjuterike si Google, etj.}
Ndërtesa e re e kompanisë “Apple”, ka harkun më të madh të qelqtë, të ndërtuar ndonjëherë dhe do të jetë e rrethuar nga mijëra pemë. Kampusi ka kushtuar 5 bilionë dollarë dhe pritet të përfundojë në pranverë të këtij viti.
Fotot e mara me dron janë vërtetë mahnitëse, të tjera do vijojnë.

Jam me fat që e vizitova këtë kampus dhe atë të Google, korrikun e vitit të kaluar. {SH.K}.