Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë- Princit të Wales-it, dekorata “Dr. Ibrahim Rugova”

by

 -Presidentja e Republikës së Kosovës, Atifete Jahjaga, dekoroi Lartmadhërinë e Tij Princin e Wales-it me Urdhrin për Paqe, Demokraci dhe Humanizëm “Dr. Ibrahim Rugova”, për kontributin e tij jetësor në përkrahje të paqes, harmonisë dhe mirëkuptimit ndërmjet popullit të Kosovës dhe më gjerë/

Nga Behlul Jashari/ PRISHTINË, 19 Mars 2016/ Presidentja e Republikës së Kosovës, Atifete Jahjaga priti sot në takim Lartmadhërinë e Tyre, Princin e Wales-it dhe Dukeshën e Cornwall-it me të cilët diskutoi për zhvillimet e gjithmbarshme në Kosovë.Presidentja Jahjaga falënderoi Lartmadhërinë e Tij, Princin Charles për rolin qenësor të Britanisë së Madhe për lirinë dhe pavarësinë e Kosovës, dhe në ndërtimin e një demokracie të qëndrueshme në vendin tonë. Presidentja Jahjaga theksoi se vizita e Lartmadhërisë së Tyre në Kosovë rikonfirmon lidhjet e veçanta dhe të fuqishme ndërmjet Republikës së Kosovës dhe Mbretërisë së Bashkuar. Presidentja Jahjaga dhe Lartmadhëria e Tij Princi i Wales-it diskutuan për thellimin e bashkëpunimit ndërmjet Republikës së Kosovës dhe Britanisë së Madhe, për përparimin e Kosovës në ndërtimin e shtetit demokratik si dhe për njohjen ndërkombëtare të Kosovës. Presidentja Jahjaga theksoi se përkrahja e Britanisë së Madhe në këtë proces do të vazhdojë të jetë e rëndësishme.

Presidentja Jahjaga dhe Princi i Wales-it diskutuan edhe për angazhimin e përbashkët të Kosovës dhe Britanisë së Madhe për ruajtjen dhe promovimin e tolerancës ndërfetare dhe parandalimin e dhunës seksuale gjatë luftës. Në takim u diskutua edhe për zhvillimin ekonomik të vendit dhe vazhdimin e reformave për krijimin e mundësive të reja për të rinjtë e Kosovës. 

Presidentja Jahjaga me këtë rast, dekoroi Lartmadhërinë e Tij Princin e Wales-it me Urdhrin për Paqe, Demokraci dhe Humanizëm “Dr. Ibrahim Rugova”, për kontributin e tij jetësor në përkrahje të paqes, harmonisë dhe mirëkuptimit ndërmjet popullit të Kosovës dhe më gjerë.Sot, në axhendën e Princit  të Wales-it dhe Dukeshës së Cornwall është edhe vizita KFOR-it, si dhe në qytetin e Prizrenit, ku marrin pjesë edhe në një konferencë ndërfetare.

Presidentja e Republikës së Kosovës, Atifete Jahjaga priti mbrëmë në Aeroportin e Prishtinës Princin e Wales-it dhe Dukeshën e Cornwall, që kanë mbërritur për vizitë dyditore në Kosovë.

 Gjithashtu, Presidentja Jahjaga mori pjesë në pritjen e organizuar nga Ambasada Britanike, për nder të vizitës së Lartmadhërisë së Tyre në Kosovë, njofton Presidenca kosovare.

Ndërsa, Presidenti i zgjedhur Hashim Thaçi është shprehur mbrëmë se, “Kosova sot i dëshiroi mirëseardhje Princit Charles dhe Dukeshës së Cornwall, në një vizitë historike të çiftit mbretëror vendit tonë. Rikujtuam me Princin Charles vizitën e tij të parë më 1999 dhe rolin e Mbretërisë së Bashkuar në çlirimin e Kosovës”.

Kosovë, statusi i të të mbijetuarit të dhunës seksuale gjatë luftës

by

*Presidentja Jahjaga pranoi aplikacionet e para për njohjen e statusit të të mbijetuarit të dhunës seksuale gjatë luftës/

*President Jahjaga received the first applications for the recognition of the status of survivor of sexual violence during the war/

Presidentja e Republikës së Kosovës zonja Atifete Jahjaga pranoi sot aplikacionet e para për njohjen e statusit të të mbijetuarit të dhunës seksuale gjatë luftës në Kosovë e cila shënon edhe zyrtarisht fillimin e këtij procesi, 17 vite pas përfundimit të luftës.

*****

President Jahjaga received the first applications for the recognition of the status of survivor of sexual violence during the war

 President of the Republic of Kosovo, Mrs .Atifete Jahjaga, received today first applications for the recognition of the status of the survivor of sexual violence during the war in Kosovo  which marks the official commencement of this process, 17 years after the end of the war.

Marrëdhëniet SHBA-Shqipëri

by

I Ngarkuari me Punë i Ambasadës së SHBA, zoti David Muniz, flet për mardhëniet 25 vjecare SHBA- Shqipëri ne Universitetin Marlin Barleti/

Më 15 mars, i Ngarkuari me Punë i Ambasadës së Shteteve të Bashkuara të Amerikës, Z. David Muniz vizitoi Universitetin Marin Barleti ku pati një disktumin tejet interesant rreth 25 vjetorit të rivendosjes së marrëdhënieve diplomatike midis Shteteve të Bashkuara dhe Shqipërisë me studentë të Juridikut, Ekonomikut dhe Shkencave Politike. I Ngarkuari me Punë Muniz diskutoi se si marrëdhëniet midis dy vendeve janë zhvilluar në mënyrë graduale, përsa i përket atyre midis qeverive, por më së shumti atyre midis njerëzve. Ai shtoi se Shtetet e Bashkuara dhe Shqipëria ulen në të njëjtin tavolinë të Këshillit Atlantik të Veriut, si aleatë dhe partnerë të cilët ndajnë të njëjtat vlera, por edhe sfida. I ngarkuari me Punë i Ambasadës Z. Muniz foli edhe për prioritetet kryesore të Qeverisë së SH.B.A në Shqipëri, përfshirë këtu adoptimin dhe fuqizimin e reformave kyçe, promovimin e sigurisë së përbashkët, forcimin e institucioneve demokratike si edhe zhvillimin dhe bashkëpunimin ekonomik. I ngarkuari me Punë i Ambasadës Z. Muniz në mbyllje të fjalës së tij, citoi Sekretarin Amerikan të Shtetit Z. John Kerry gjatë vizitës së tij në Shqipëri më pak se një muaj më parë: “Unë ndodhem sot këtu se ne jemi miq. Dua ta theksoj këtë. Ne jemi aleatë. Shqipëria ka bërë zhvillim të rëndësishëm dhe është e angazhuar – kjo pa më të voglën dyshim – për të arritur edhe më tepër. Dhe duke bërë këtë, Shqipëria mund të mbështetet në miqësinë dhe besimin e popullit Amerikan dhe të qeverisë tonë. Unë ju premtoj që: Shtetet e Bashkuara të Amerikës dhe Shqipëria do ta rrisin dhe forcojnë këtë marrëdhënie kaq të veçantë që ne kemi sot.” {Sh.K}

Maqedonia liron zyrtarin e Ministrisë së FSK të Kosovës

by

-Gafurr Dugolli, drejtor i Zyrës së Protokollit të MFSK-së  ka qenë i arrestuar  në 11 mars në mesditë nga policia kufitare e Maqedonisë/

 PRISHTINË, 19 Mars 2016/ Sot në orën 01:30, nga qendra e paraburgimit në Shkup,  është liruar Gafurr Dugolli,  drejtor i Zyrës së Protokollit të Ministrisë së Forcës së Sigurisë së Kosovës.Ai ka qenë i arrestuar  para një jave nga policia kufitare e Maqedonisë në pikën kufitare në Bllacë, deri sa po shkonte me detyrë zyrtare për rregullim të vizave  në ambasadën e SHBA-ve në Shkup, njofton zyra e shtypit e Ministrisë së FSK.

Arrestimi ishte  bërë me urdhër të Interpol-it sipas kërkesës së Policisë së Serbisë, me akuzë se “është i kërkuar për krime lufte”, gjatë kohës kur Dugolli ka qenë pjesëtar i UÇK-së.

Dugolli është arrestuar në 11 mars në mesditë. Qeveria e Republikës së Kosovës ka shpreh shqetësim për ndalimin nga ana e autoriteteve maqedonase, duke kërkuar lirimin e menjëhershëm të tij.

Qeveria e Kosovës ka ftuar Republikën e Maqedonisë dhe të gjitha shtetet fqinje e më gjerë, që të mos ndërmarrin veprime policore ndaj shtetasve të Republikës së Kosovës duke u bazuar në listat e Serbisë, të cilat janë të hartuara në shpërputhje të plotë me aktet juridike dhe praktikat ndërkombëtare në këtë fushë.

 Qeveria e Republikës së Kosovës, po ashtu, ka deklaruar se do të kërkojë me insistim nga autoritetet e Bashkimit Evropian si dhe partnerët strategjikë të Republikës së Kosovës që të përdorin ndikimin e tyre te Serbia për t’i dhënë fund përndjekjeve të karakterit të tillë ndaj qytetarëve të Kosovës.

 Qeveria e Kosovës është informuar se Serbia para pak ditësh, duke shkelur çdo praktikë ndërkombëtare, ka përditësuar listën e re, ku sërish janë përfshirë qytetarë dhe personalitete të Republikës së Kosovës, me ç’rast i konsideron ato akte krejtësisht të pavlera dhe të cilat duhet të injorohen e të mos merren fare parasysh nga shtetet fqinje dhe me gjerë./b.j/

TRE VJETORI I PETICIONIT PËR RRUGËN E ARBËRIT

by

Nga Gezim ALPION/ Birmingham, Angli/

Përshëndetje Përkrahës të Peticionit,/

Sot tre vjet më parë filluam peticionin online për Rrugën e Arbërit.

Nuk kemi asgjë për tu gëzuar në këtë përvjetor. Ëndrra dibrane për rrugën është binjake me ëndrrën shqiptare për demokraci. Në çerek shekullin e fundit kaotik është e admirueshme që dibranët akoma kanë forcë të ëndrrojnë. Dhe mirë bëjnë.

Rruga e Arbërit është me rëndësi kombëtare dhe ndërkombëtare. Kur të bëhet! Tani për tani, kjo rrugë në ndërgjegjen e shqiptarëve është treguesi më domethënës i nivelit të seriozitetit të shtetit, i mënyrës se si qeveris partia në pushtet, dhe i shkallës së efektshmërisë së opozitës.

Ja bilanci i rrugës, që filloi zyrtarisht në vitin 2005, edhe pse për të nuk kishte dhe akoma nuk ka një projekt serioz: Edhe ato segmente që quhen të përfunduara nuk përmbushin standardet ndërkombëtare. Në tre vitet e fundit qeveria aktuale ka arritur të përfundojë vetëm 464 metra. Fondet e rrugës nuk janë gjëkundi.

Siç premtuam në fillim, ne e kemi mbajtur dhe do ta mbajmë peticionin jashtë politikës. Për ne nuk ka rëndësi se cila parti apo aleancë politike është në pushtet.

Ne kemi kërkuar dhe do të vazhdojmë të kërkojmë të takohemi me Kryeministrin. Dhe kjo jo thjesht për të dorëzuar peticionin, një akt formal që përbën obligim si për ne ashtu edhe për z. Edi Rama ndaj më shumë se 10,000 nënshkruesve online dhe në formularë. Takimi do të mundësoj edhe fillimin e një dialogu konstruktiv.

Ne do të kthehemi së shpejti në Shqipëri për të vazhduar dialogun që filluam në Maj 2014 me përfaqësues të pushtetit lokal, deputetë të Dibrës dhe drejtues të shtetit dhe politikës në Tiranë. Shpresojmë që një nga takimet të jetë edhe me Kryeministrin me të cilin jemi të gatshëm të dialogojmë në çdo kohë brenda këtij mandati.

Duke ju falenderuar për përkrahjen tuaj të vazhdueshme, ne ju sigurojmë edhe një herë se nuk do të pushojmë së lobuari për këtë vepër deri sa të përfundohet.

Me respekt,

Gëzim Alpion

Në emër të Grupit të Lobimit

Birmingham, Angli, 18 Mars 2016

_____________

Peticionin mund ta nënshkruani këtu: http://chn.ge/1NZeyGu