Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Tre udhëheqësit fetarë të qytetit bregdetar nderohen me titullin“Nderi i qytetit të Durrësit”

by

Durrësi i bashkëjetesës, fetare, ashtu si dhe e gjithë Shqipëria, me këtë akt ka nderuar me titujt “Nderi i qytetit të Durrësit” 3 klerikët prifti katolik famullisë, don Gjergj Meta, myftiu i xhamisë, Redin Quku, dhe famullitarit ortodoks, atit Gjerasin Çakalli./
DURRËS : Në faqen e saj të rrejtit social “Facebook” portali SIR – Servicio Internationale Religiosa njofton se në 25 vjetorin e themelimit të shoqatës qytetare “Durrësi” – me këtë rast, ajo ka nderuar 3 klerikët e tre besimeve kryesore fetare në qytetin e bregdetar të Durrësit
Durrësi i bashkëjetesës, fetare, ashtu si dhe e gjithë Shqipëria, me këtë akt ka nderuar me titujt “Nderi i qytetit të Durrësit” 3 klerikët prifti katolik famullisë, don Gjergj Meta, myftiu i xhamisë, Redin Quku, dhe famullitarit ortodoks, Atit Gjerasin Çakallli.-
Ngjarja është zhvilluar mbrëmjen e djeshme, teksa në qytetin bregdetar është festuar 25-vjetori i krijimit të shoqatës “Durrësi”, një ceremoni e zhvilluar në një mjedis festiv në skenën e teatrit “Aleksandër Moisiu”, ku pati pjesëmarrje të madhe me themelues të kësaj shoqate 25 vite me parë si dhe të familjarëve dhe anëtarëve më të rinj të saj.
Titujt “Nderi i qytetit të Durrësit” iu dhanë dje nga kryetari bashkisë së Durrësit, Vangjush Dako, për këtë arsye: “Për kontributin e tyre në promovimin e bashkëjetesës dhe harmonisë në mesin e qytetarëve. Për mbështetjen e tyre shpirtërore për qytetarët e Durrësit. Për kontributin e tyre bashkëjetesën dhe harmonisë ndërfetare “.
Duke marrë tituj e nderit të tre klerikët, e të tre besimeve fetare, katolik, musliman, dhe ortodoks, mbasi ata morën titujt e nderit, falënderuan organizatorët për një njohje të tillë.
“Durrësi – citohet të ketë thenë prifti katolik i këtij qyteti don Meta – në marrjen e këtij titulli, është vendlindja e tre martirëve të besimit katolik: peshkopi Vinçenc Prennushit dhe priftërinjve të famullisë don Anton Zogaj dhe Mgr. Jul Bonati. Të tre janë në listën e 40 martirëve, të cilat tani po kalojnë në Kongregatën për Shenjtorët. Ata kishin marrëdhënie të mira me udhëheqës të tjerë fetarë të kohës. Si shërbyes fetar të dioqezës aktuale Tiranë-Durrës, ata mund të jenë krenarë për bashkëjetesën paqësore, e cila e tillë ende vazhdon në Durrës dhe gjithë Shqipërinë “.
Famullitari Dom Gjergj Meta në Kishën Konkatedrale të Shën Luçisë në Durrës ka vlerësuar gjithashtu edhe atë se gjatë 25 viteve të fundit, ata kanë dhënë një kontribut të madh në rilindjen e Kishës dhe të shoqërisë “.
Bashkëjetesa në paqe e besimeve fetare në Durrës, dhe në të gjithë Shqipërinë, na bën gjithnjë një vend që merremi në konsideratë si shembull edhe për vendet e tjera. Harmonia fetare e trashëguar si një dhuratë e çmuar brez pas brezi, mbetet një nga vlerat historike, kulturore dhe civilizuese, me të cilën krenohemi dhe kemi ç’t’u ofrojmë popujve të tjerë, thuhet në njoftim.
Takimin e ka përshëndetur edhe kryetari i bashkisë Vangjush Dako, i cili ka vlerësuar kontributin e kësaj shoqate për mbështetjen dhe zhvillimin e qytetit të Durrësit.(Pergatiti:Beqir Sina)

Sekretari Kerry, tre mesazhe, takime vetëm me Ramën dhe Bashën

by

Sekretari amerikan i Shtetit, John Kerry nuk do të qëndrojë shumë gjatë në Tiranë të dielën, por mesazhet e tij do të jenë shumë të rëndësishme. Zyrtarisht, shefi i diplomacisë amerikane vjen në Tiranë për të shënuar 25-vjetorin e rivendosjes së marrëdhënieve diplomatike mes dy vendeve. Dhe si në çdo festë, një falenderim nuk ka për të munguar nga aleati më i madh strategjik i Shqipërisë, i cili, si në rastin e ujgurëve, i është gjendur amerikanëve për të zgjidhur edhe një tjetër problem delikat të saj, strehimin e anëtarëve të opozitës iraniane, që gjenden nën mbrojtjen amerikane në kampin “Liria”, në Irak. Çështja e muxhahedinëve iranianë është pika e parë e axhendës së sekretarit amerikan të Shtetit dhe mësohet se ai do të falenderojë qeveritë e Shqipërisë që, në të kaluarën dhe tani, kanë marrë përsipër të strehojnë anëtarët e opozitës iraniane. Disa vjet më parë, qeveria e kryeministrit Berisha mori përsipër të strehojë mbi 200 muxhahedinë, ndërsa tani qeveria e kryeministrit Rama ka rënë dakord të marrë përsipër strehimin edhe të 1 mijë iranianëve të tjerë, nga rreth 2.800 që janë aktualisht në kampin “Liria” në Irak. Kjo është një çështje që ka marrë paraprakisht edhe dakordësinë e opozitës në Shqipëri. Dhe jo rastësisht, në axhendën e takimeve të sekretarit amerikan të Shtetit, të paktën deri tani, janë përfshirë vetëm dy persona, kryeministri Edi Rama dhe ish-ministri i Brendshëm Lulzim Basha. Por këta dy persona janë gjithashtu edhe dy personat më të lartë politikë në vend, ndaj me ta, John Kerry ka në axhendë të diskutojë edhe rëndësinë e reformës në drjetësi. Kjo është pika e dytë e rëndësishme e axhendës së Kerryt në Tiranë. Burime diplomatike dhe politike konfirmuan se kjo pjesë e mesazheve që prek drejtpërsëdrejti politikën e brendshme në Tiranë është e detajuar dhe e mirëmenduar për mënyrën sesi do të artikulohen mesazhet. Por Kerry ka edhe një pikë të tretë shumë të rëndësishme. Kosova do të jetë një nga temat që ai do të diskutojë me kryeministrin Edi Rama, duke i kërkuar një rol më aktiv të Shqipërisë, veçanërisht pas zhvillimeve shqetësuese në Kosovë, në prag të protestës së paralajmëruar të opozitës, në përvjetorin e tetë të pavarësisë dhe të zgjedhjes së presidentit të ri të vendit. Burime të qeverisë thone se me këtë ka lidhje edhe darka e së premtes në Tiranë mes kryeministrit Rama dhe ministrit të Jashtëm kosovar, Hashim Thaçi. Edi Rama e përmendi këtë fakt në një postim në Twitter po atë natë, gjatë darkës së mbajtur larg vëmendjes së mediave. Por, megjithëse disa ditë larg, efekti i vizitës së sekretarit Kerry u ndje që të mërkurën, kur me një shpejtësi të rrufeshme, projektligji i Byrosë së Hetimit, nga një mister, u kthye në një realitet konkret.

Takimi me ambasadoret, zgjedhje e presidentit te Kosoves

by

-Kryetari i Kuvendit të Republikës së Kosovës, Kadri Veseli, priti sot në takim Ambasadorin e SHBA-së në Kosovë, Greg Delawie, Ambasadorin e Britanisë së Madhe, Ruairi O’Connell, si dhe Ambasadorin e Norvegjisë, Jan Braathu/
Nga Behlul Jashari/ PRISHTINË, 11 Shkurt 2016/ Zgjedhja e presidentit të Kosovës do të jetë proces plotësisht kushtetues, demokratik, transparent dhe inkluziv. Kështu tha sot kryetari i Kuvendit, Kadri Veseli, cituar në njoftimin e dërguar nga takimet e veçanta me Ambasadorin e SHBA-ve në Kosovë, Greg Delawie, Ambasadorin e Britanisë së Madhe, Ruairi O’Connell, si dhe Ambasadorin e Norvegjisë, Jan Braathu
Kryetari i Kuvendit të Republikës së Kosovës, Kadri Veseli, priti sot në takim Ambasadorin e SHBA-së në Kosovë, Greg Delawie, Ambasadorin e Britanisë së Madhe, Ruairi O’Connell, si dhe Ambasadorin e Norvegjisë, Jan Braathu.
Në këto takime u bisedua për proceset aktuale politike në vend, krizën nëpër të cilën po kalojnë raportet në mes pozitës dhe opozitës, me theks të veçantë reflektimin e tyre në punë e Kuvendit të Republikës së Kosovës.
Ambasadorët theksuan domosdoshmërinë që të hiqet dorë nga përpjekjet që përmes dhunës të diktohen vendimet politike, duke përfshirë këtu edhe zgjedhjet, sepse kjo bie në kundërshtim me parimet demokratike. Përpjekje të tilla janë duke e dëmtuar shumë imazhin e vendit dhe përparimin e Kosovës në zhvillimin ekonomik dhe fuqizimin demokratik të shtetit, thekson njoftimi dërguar nga Kuvendi.
Kryetari Veseli nga ana e tij theksoi se vazhdon të besojë dhe angazhohet që fryma e dialogut dhe komunikimit në fund do të dominojë mbi të gjitha tendencat destruktive politike.
Në këto takime u bisedua edhe rreth procesit të zgjedhjes së presidentit të ri të Republikës së Kosovës. Ambasadorët kërkuan që ky proces të jetë në përputhje me Kushtetutën dhe ligjet e Kosovës, ndërsa Kryetari Veseli theksoi se procesi i zgjedhjes së Presidentit të Kosovës do të jetë plotësisht kushtetues, demokratik, transparent dhe inkluziv, përfundon njoftimi.
Kuvendi i Kosovës ende nuk ka mbajtur asnjë seancë plenare në sesionin pranveror, duket në pritje të një zgjidhje për krizën politike, që po vazhdon nga fundvera e vitit të kaluar.
Në 22 janar 2016, Kryesia e Kuvendit të Kosovës mbajti mbledhjen e parë për sesionin pranveror, në të cilën ishin prezentë edhe kryetarët e grupeve parlamentare, por nuk u përcaktua ndonjë datë për seancë plenare.
Opozita, e cila ka kërkesë edhe shpërndarjen e Kuvendit e shpalljen e zgjedhjeve të parakohëshme, ka ritheksuar se “thirrja eventuale e seancave plenare nuk i kontribuon zgjidhjes së krizës politike”, ndërsa ka paralajmëruar protestën e ardhëshme për në ditën e festës së 8 vjetorit të shpalljes së Pavarësisë së Kosovës -17 shkurt, në Prishtinë.
Ndërkohë, Kuvendin e Kosovës e presin shumë punë, përfshirë zgjedhjen e Presidentit të Republikës, pasi Presidentes aktuale i kalon mandati pas më pak se dy muajsh, në 6 prill. Sipas Kushtetutës “zgjedhja e Presidentit të Republikës së Kosovës duhet të bëhet jo më vonë se tridhjetë (30) ditë para përfundimit të mandatit të Presidentit aktual”. Kushtetuta përakton edhe se, “nëse në votimin e tretë, asnjëri kandidat nuk zgjidhet President i Republikës së Kosovës, shpërndahet Kuvendi dhe shpallen zgjedhjet e reja, të cilat duhet të mbahen brenda dyzet e pesë (45) ditësh”.
Në 8 shkurt 2016, nuk kishte ndonjë marrëveshje, liderët ritheksuan qëndrimet e mbajtura deri tash, edhe pasi Presidentja e Republikës së Kosovës, Atifete Jahjaga zhvilloi një takim të përbashkët me drejtuesit e subjekteve politike parlamentare, për të diskutuar tejkalimin e gjendjes së krijuar në vend. Në tryezën e përbashkët të dialogut ishin liderët e dy partive më të mëdha të maxhorancës së koalicionit qeverisës, i LDK – kryeministri Isa Mustafa dhe i PDK – zëvendëskryeministri Hashim Thaçi, dhe në këtë përpjekje të tretë të Presidentes që nga fundvera 2015, për herë të parë ishte edhe një nga tre liderët e opozitës, kryetari AAK-së, Ramush Haradinaj.
Derisa nuk ishin së bashku në tryezën te Presidentja Jahjaga, tre subjektet opozitare kanë bërë një deklaratë të përbashkët, ku theksojnë se “më 17 shkurt edhe një herë qytetarët e Kosovës do të bashkohen në një protestë mbarëqytetare” dhe se “zgjidhja janë zgjedhjet”.
Në kundërshtim të katër marrëveshjeve të 25 gushtit 2015 me Serbinë, veçmas asaj për asociacionin e komunave me shumicë serbe në Kosovë, si dhe të marrëveshjes për demarkacionin e kufirit me Malin e Zi, tre subjektet opozitare, Lëvizja Vetëvendosje, Aleanca për Ardhmërinë dhe Nisma, me gjithësej 31 deputetë në parlamentin 120 anëtarësh, kanë organizuar protesta, aksione simbolike e manifestime, si dhe kanë bllokur Kuvendin e Kosovës edhe me hedhje gazi lotsjellës në sallën e seancave plenare e jashtë saj, ndërsa në këto zhvillime kishte edhe të arrestuar, përfshirë 13 deputetë opozitarë, të cilët ndërkohë janë liruar.

Qeveria e Kosovës, 18 vendime për Parkun Kombëtar të Sharrit

by

-Qeveria e Kosovës miratoi nismat për lidhje të bashkëpunimit policor në luftimin e krimit me qeveritë e Italisë, Belgjikës, Lituanisë dhe Estonisë, si dhe nismën për lidhjen e marrëveshjes në fushën e zbatimit të ligjit për parandalim dhe luftim të krimeve të rënda me qeverinë e Danimarkës/
PRISHTINË, 10 Shkurt 2016-B.Jashari/ Qeveria e Kosovës sapo mbajti sot një mbledhje me 26 pika në axhendë, 18 prej të cilave ishin vendime për “vënie në mbrojtje strikte” të zonave të ndryshme malore në Parkun Kombëtar të Sharrit.
Qeveria e Kosovës miratoi nismat për lidhje të bashkëpunimit policor në luftimin e krimit me qeveritë e Italisë, Belgjikës, Lituanisë dhe Estonisë, si dhe nismën për lidhjen e marrëveshjes në fushën e zbatimit të ligjit për parandalim dhe luftim të krimeve të rënda me qeverinë e Danimarkës.
Qeveria e Kosovës, e drejtuar nga kryeministri Isa Mustafa, zhvilloi sot mbledhjen e 74-të, të shtatën në vitin 2016, të cilin e nisi me dy mbledhje brenda ditës së 8 janarit.
Në mbledhjen e 29 janarit, qeveria ka themeluar Këshillin Organizativ për shënimin e tetë vjetorit të Pavarësisë së Republikës së Kosovës, në 17 shkurt, ndërsa tashmë aktivitetet festive kanë nisur.
Qeveria e Kosovës, e koalicionit të dy partive më të mëdha PDK e LDK, ku përfshihen edhe minoritetet, vazhdon punën në vitin e saj të dytë që nga zgjedhja në 9 dhjetor 2014, në Kuvendin kosovar të konstituuar një ditë më parë, gjashtë muaj pas zgjedhjeve të parakohëshme parlamentare të 8 qershorit.
QEVERIA E KOSOVËS MBAN ANKANDIN E BONOVE TË THESARIT
PRISHTINË, 10 Shkurt 2016/ Qeveria e Republikës së Kosovës ka mbajtur Ankandin e Bonove të Thesarit KV003-16, ku u ofertuan Bono Thesari 12-mujore në vlerë nominale prej 25 milionë euro. Shuma e ofertuar do të shërbej për ri-financimin e instrumentit të emetuar në shkurt 2015.
Njoftimi dërguar sot nga Ministria e Financave thekson se, në ankandin e Bonove të Thesarit, tregu ka shfaqur kërkesë për blerje në vlerë 72.2 milionë euro. Kjo është shuma më e lartë që ndonjëherë ka ardhur si kërkesë e tregut të Bonove të Thesarit. Ndërsa, është pranuar vetëm shuma e shpallur paraprakisht e cila është 25 milionë Euro. Norma e interesit për këtë ankand ishte 0.97% vjetore, gjë që paraqet një dallim prej 56 pikësh bazë krahasuar me normën e interesit të ankandit të kaluar të bonove 12-mujore, e cila ishte 1.53%.
Blerësit e Bonove të Thesarit sipas kategorive janë Bankat private me 24.75 milionë euro si dhe Kompanitë e sigurimeve me 0.25 milion euro dhe si rezultat i normës më të ulët të ri-financimit do të ketë edhe të hyra buxhetore prej 138,036.59 euro.
Ankandi i Bonove të Thesarit i mbajtur dje është edhe një tjetër vlerësim pozitiv që kanë institucionet financiare në vend për stabilitetin financiar të qeverisë së Kosovës, duke shprehur kështu interesimin e tyre të lartë dhe gatishmërinë për Bonot e Thesarit. Por, njëherit është edhe përkushtim i qeverisë së Kosovës për transparencë dhe treg të pastër të bonove të thesarit, thekson deklarata./b.j/
*Foto Gazeta Dielli-Behlul Jashari: Qeveria e Kosovës në mbledhje, 10 shkurt 2016

KRYEMINISTRI MUSTAFA DHE AMBASADORI DELAWIE, NE UNIVERSITETIN AMERIKAN TE KOSOVES

by

-Në Universitetin Amerikan në Kosovë (AUK) është zhvilluar sot pasdite ceremonia e dorëzimit të certifikatave grupit të parë të pjesëmarrësve në trajnimin për zhvillimin e politikave publike dhe udhëheqje/
PRISHTINË, 9 Shkurt 2016-B.Jashari/ Në Prishtinë, në Auditoriumin e Universitetit Amerikan në Kosovë (AUK) është zhvilluar sot pasdite ceremonia e dorëzimit të certifikatave grupit të parë të pjesëmarrësve në trajnimin për zhvillimin e politikave publike dhe udhëheqje, ku morën pjesë edhe kryeministri kosovar Isa Mustafa dhe ambasadori i SHBA, Greg Delawie.
Njoftimi dërguar nga Ambasada e SHBA në Prishtinë bën të ditur se, Zhvillimi i Politikave Publike dhe Trajnimi për Udhëheqje është pjesë e programit Lidershipi Transformues (TLP) – Trajnimet Intensive dhe Kurset e Shërbimit Publik. Ky është një program intensiv i cili ofron trajnime të specializuara për udhëheqje, analizë të politikave publike, vendimmarrje të bazuar në dëshmi dhe vlerësim të programit.
Grupi i dytë i vijuesve të trajnimit të TLP-së Zhvillimi i Politikave Publike dhe Trajnimi për Udhëheqje është planifikuar të fillojë kah fundi i shkurtit me më shumë se 180 pjesëmarrës.
Universiteti Amerikan në Kosovë implementon komponentën TLP – Trajnimet Intensive dhe Kurset e Shërbimit Publik, në mbështetje të programit më të gjërë të Lidershipit Transformues të USAID-it.
Në ceremoni, sipas njoftimit dërguar nga Kryeministria kosovare, kryeministri Isa Mustafa vlerësoi rolin e USAID-it dhe të Universitetit Amerikan në programin e lidershipit transformues, duke theksuar nevojën për përgatitje të kuadrit.
Ambasadori i Shteteve të Bashkuara të Amerikës, Greg Delawie ka folur për rëndësinë që shërbyesit civilë kanë në përparimin e një vendi.
Presidenti i Universitetit Amerikan në Kosovë, Winfred Thompson, ka falënderuar kryeministrin Mustafa dhe USAID-in që i dhanë mundësi këtij institucioni të bëhet pjesë e këtij projekti të rëndësishëm.