Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Ambasadori Amerikan Kosnett: Kosova të ruajë fokusin…

by

-Kryetari i rizgjedhur i Lidhjes Demokratike të Kosovës Isa Mustafa takim me Ambasadorin e Shteteve të Bashkuara të Amerikës në Prishtinë, Philip Kosnett/ 

PRISHTINË, 5 Gusht 2019-Gazeta DIELLI/ Kryetari i LDK-së, Isa Mustafa ka nisur mandatin e tretë sot, me një takim me Ambasadorin e SHBA-së në Kosovë, Philip Kosnett.

Në takimin me Ambasadorin Kosnett u diskutuan tema të rëndësishme për vendin, me theks të veçantë zgjedhjet e brendshme të LDK-së dhe situata aktuale politike.

Kryetari Mustafa e njoftoi Ambasadorin Kosnett për ecurinë e procesit zgjedhor të LDK-së dhe theksoi se Lidhja Demokratike e Kosovës vlerëson që vendi duhet të shkojë në zgjedhje të përgjithshme sa më parë. LDK-ja ka përgatitur programin qeverisës për qeverinë e re ku prioritet do të jenë luftimi i korrupsionit dhe krimit të organizuar, përmbyllja e dialogut me Serbinë, përshpejtimi i proceseve integruese në strukturat euroatlantike, zhbllokimi i potencialit ekonomik përmes përkrahjes së sektorit privat, etj.

Ndërsa, Ambasadori Kosnett theksoi se është e rëndësishme që Kosova të ruajë fokusin e vet në fuqizimin e sundimit të ligjit, kthimit në tryezën e bisedimeve me Serbinë, për të arritur normalizim dhe për të krijuar mundësi të cilat lejojnë qytetarëve të Kosovës të kontribuojnë në prosperitetin e Kosovës.

Të pranishëm në këtë takim ishin edhe Agim Veliu, Lutfi Haziri, Vjosa Osmani, Vlora Dumoshi dhe Besian Mustafa, bën të ditur njoftimi i dërguar nga LDK.

Në 3 Gusht 2019 Isa Mustafa është rizgjedhur me aklamacion kryetar i Lidhjes Demokratike të Kosovës. Në Kuvendin e nëntë zgjedhor mori shumicën e votave nga 355 delegatë të zgjedhur në kuvendet e degëve të LDK.Lidhja Demoratike e Kosovës, e themeluar në 23 Dhjetor 1989 nga Ibrahim Rugova derisa ishte kryetar i Shoqatës së Shkrimtarëve të Kosovës i zgjedhur edhe në krye të partisë dhe nga intelektualë të tjerë shqiptarë, në 23 Dhjetor 2019 e shënon 30  vjetorin. Më shumë se parti, LDK në fillimet e saj lindi si një lëvizje gjithëpopullore për liri, pavarësi e demokraci, në rrethana të rënda okupimi e të dhunës së egër. Që në atë kohë Rugova dhe LDK hapur përcaktonin pozicionin gjeopolitik – shpallnin idenë për shtetin e Kosovës./b.j/

Kosova, në tavolinën e shteteve që janë si Amerika

by

-Kryeministri në detyrë, Haradinaj në 21 vjetorin e Betejës së Markalleshëve: Nuk ka lindje më të vështirë se sa lindja e një shteti, t’i kryejmë punët qind për qind…Jemi nisur që t’i takojmë familjes se shteteve sepse jemi bërë shtet, e kemi shpallur veten shtet, dhe duam të jemi në tavolinën e shteteve që janë si Amerika dhe të tjerët veç e veç/

GJAKOVË, 4 Gusht 2019-Gazeta DIELLI/ Kryeministri në detyrë i Republikës së Kosovës, Ramush Haradinaj, mori pjesë në tubimin përkujtimor, kushtuar 21- vjetorit të Betejës së Markalleshëve dhe dëshmorëve Mark Lleshi, Prend Lleshi, Kolë Lleshi dhe Memë Lleshi.

Fillimisht kryeministri në detyrë Haradinaj bëri homazhe te memoriali i dëshmorëve Mark, Prend, Kolë dhe Memë Lleshi.

Para të pranishmëve, kryeministri në detyrë, Haradinaj, tha se po ndihet jashtëzakonisht mirë që sot ka pasur nderin të kalojë pak momente te Markalleshët, familje kjo që ka një histori të vetën të gjatë, edhe në luftëra të tjera, kohëra të tjera sikurse edhe në kohën e Luftës së Dytë Botërore, ku nga kjo familje ranë dëshmorë njerëz të shquar.

“U pushkatuan padrejtësisht. Andaj më lejoni sot të ju falënderoj të gjithëve për prezencë në nderim të betejës së Markalleshëve të 7 gushtit por edhe të heronjve të Kosovës të rënë edhe më vonë. Dua të them disa fjalë për ditën e sotme pse është me rëndësi kujtesa jonë për të kaluar nëpër momente të vështira sepse janë bërë 20 vjet nga kjo betejë por edhe është kaluar një kohë”, theksoi kryeministri në detyrë, Haradinaj, duke shtuar se më së miri ndoshta kjo shpjegohet me faktin se nuk dihet që ka lindje më të vështirë se sa lindja e shtetit,  një lindje e këtillë kaq e vështirë është jashtëzakonisht e veçantë dhe ne jemi nisur që t’i takojmë familjes se shteteve sepse jemi bërë shtet, e kemi shpallur veten shtet, dhe duam të jemi në tavolinën e shteteve që janë si Amerika dhe të tjerët veç e veç.

Ndër tjera, kryeminitri në detyrë, Haradinaj shtoi se e dimë se për këtë Kosovë ka pasur shumë flijime, përndjekje, masakra e gjenocid, tmerre që i ka përjetuar populli ynë për të ardhur deri të dita e qershorit të ’99-ës.

Në këtë familje të Markalleshëve, sipas kryeministrit në detyrë, Haradinaj, ndër breza ruhet kjo sakrificë dhe e dinë se si ka qenë rruga jonë deri këtu dhe është në interesin tonë që ta përfundojmë Kosovën si shtet qind për qind, t’i kryejmë punët qind për qind, të bashkojmë shtetin tonë me kombin kudo që janë shqiptarët por edhe t’i bashkohemi familjes euroatlantike sepse aty është vendi ynë, aty takojnë vlerat tona, aty është nderi ynë.

“Nëse shërbehemi me shembullin e kësaj familjeje rruga jonë do të jetë e lehtë, pa asnjë dilemë dhe do të arrijmë së bashku dhe uroj që në këtë shembull, në këtë sakrificë të Markalleshëve, të të gjithë dëshmorëve, të shërbehemi si komb”, tha kryeministri në detyrë, Haradinaj.

Nga një fjalë parë të pranishmëve mbajti Dervish Tahiri nga Kuvendi Komunal i Gjakovës, Don Alberti famullitar, ndërsa në emër të familjes foli Gegë Lleshi./b.j/

Kuvendi i Kosovës hap dyert për bashkatdhetarët

by

Më 24 dhe 25 korrik, Kuvendi i Republikës së Kosovës hap dyert për bashkatdhetarët/

PRISHTINË, 23 Korrik 2019-Gazeta DIELLI/ Të mërkurën dhe të enjten, përkatësisht më 24 dhe 25 korrik 2019, Kuvendi i Republikës së Kosovës organizon aktivitetin tradicional, “Bashkatdhetarët në Kuvend” dhe hap dyert për të gjithë bashkatdhetarët.

Të gjithë bashkatdhetarët të cilët dëshirojnë ta vizitojnë Kuvendin e Kosovës dhe të takohen me deputetë, janë të mirëpritur dhe ftohen t’i bashkëngjiten këtij aktiviteti, thekson njoftimi dërguar Gazetës DIELLI.

Kosova me parimet që drejtohen nga SHBA

by

-Kryeministri Haradinaj takim me studentë nga 28 shtete: Bota duhet ta njohë realitetin e Kosovës dhe atë se kush jemi ne/

-Kosova në kufijt ekzistues, marrëveshja me Serbinë për njohjen reciproke/

PRISHTINË, 19 Korrik 2019-Gazeta DIELLI/ Kryeministri i Republikës së Kosovës, Ramush Haradinaj, ka pritur sot në takim një grup prej 55 studentëve të programit Akademia Verore, nga 28 shtete të ndryshme të botës.Fillimisht kryeministri Haradinaj iu uroi mirëseardhje studentëve dhe i përgëzoi organizatorët për këtë vizitë, duke thënë se sjellja e studentëve dhe të rinjve nga kombe të ndryshme në Kosovë është një gjë e mirë.Kjo, sepse siç theksoi kryeministri Haradinaj, është shumë e rëndësishme që shumë njerëz të botës të na njohin se kush jemi ne, ta njohin realitetin tonë.“Kosova është një komb i ri dhe jemi shtet i pavarur që 11 vite. Jemi shtet multientik, dhe po ky është shteti ynë dhe ne ndajmë besimin në vlerat e përbashkëta europiane. Kemi shumë sfida si një komb i ri dhe shoqëri dhe sfida kryesore për ne ishte ekonomia e shkatërruar gjatë luftës 20 vjet më parë, dhe për shkak të saj ka ende mungesë të vendeve të punës për rininë tonë”, tha kryeministri Haradinaj, duke thënë se sundimi i ligjit ka përmirësuar dhe është duke e përmirësuar luftimin e korrupsionit.

Në fjalën e tij para studentëve, kryeministri Haradinaj deklaroi se është sfidë për Kosovën themelimi i besimit brenda komuniteteve, por theksoi se është bërë progres në këtë drejtim por ende duhet punë për t’u bërë.

“Po ashtu presim edhe një marrëveshje më Serbinë për njohjen reciproke në kufijt ekzistues dhe shpresojmë se dialogu do ta sjellë këtë dhe se përmes kësaj do të mund të bashkoheshim më BE-në, NATO-n, në një botë ku rreshtohemi me parimet që drejtohen nga SHBA-ja dhe të gjithë aleatët tanë që na kanë ndihmuar”, tha kryeministri Haradinaj.

Pas fjalës së tij kryeministri Haradinaj zhvilloi një bashkëbisedim me studentët dhe u përgjigj në shumë pyetje rreth punës së tij si kryeministër, sfidat e qeverisjes dhe drejtimin që ka marrë Kosova./b.j/

VESELI, TAKIM ME NANCY PELOSI DHE ELIOT ENGEL

by

Kryetarja e Kongresit Amerikan ia konfirmon Veselit përkrahjen për Kosovën në të gjitha proceset/

Kryetari i Kuvendit të Kosovës, Kadri Veseli, gjatë vizitës që po zhvillon në SHBA, ka pasur një takim të veçantë me Kryetaren e Kongresit Amerikan, Nancy Pelosi.Në këtë takim miqësor, Kryetarja e Kongresit Amerikan i ka konfirmuar Kryeparlamentarit Veseli përkrahjen e palëkundur amerikane për Kosovën.Ajo u zotua se do të jetë gjithmonë në përkrahje të Kosovës dhe theksoi se Kosova mund të llogaris në ndihmën e saj dhe të Kongresit Amerikan. “Amerika do të jetë përkrah Kosovës dhe do të ju mbështes gjithmonë”, i tha Zonja Pelosi Kryeparlamentarit Veseli.Nga ana e tij, kreu i Kuvendit të Kosovës e ka falënderuar kryetaren e Kongresit Amerikan për mbështetjen e parezervë që ajo, Kongresi Amerikan dhe SHBA-të i kanë dhënë Kosovës historikisht.Kryeparlamentari Veseli ka kërkuar nga kryetarja e Kongresit Amerikan që SHBA-ja të ketë involvim edhe më të madh dhe më të drejtpërdrejtë në proceset që po kalon Kosova.Gjatë këtij takimi, Veseli po ashtu ka kërkuar nga Zonja Pelosi përkrahje të Kongresit dhe institucioneve të SHBA-së për ushtrinë e Kosovës si dhe për iniciativën për dënimin e gjenocidit serb dhe krimeve e dhunimeve gjatë luftës në Kosovë.Kryeparlamentari Veseli e ka ftuar zonjën Pelosi që së shpejti ta vizitojë Kosovën.​

***

Veseli takon kongresmenin Engel: Serbia duhet ta njoh shtetin e Kosovës ​

Kryetari i Kuvendit të Kosovës, Kadri Veseli, në vazhdën e takimeve me personalitete të njohura të politikës amerikane, është pritur sot në një takim të veçantë nga kongresmeni Eliot Engel.

Gjatë këtij takimi të ngrohtë e miqësor, u diskutua për bashkëpunimin e ngushtë Kosovë – SHBA, për zhvillimet politike në vendin tonë, forcimin e subjektivitetit ndërkombëtar të shtetit të Kosovës, mbështetjen amerikane në këtë proces dhe perspektivën euro-atlantike të shtetit të Kosovës.

Kryeparlamentari Veseli falënderoi kongresmenin Engel për angazhimin e tij të gjatë prej disa dekadash në mbështetje të Kosovës dhe nëpërmjet tij, shtetin dhe popullin amerikan.

Kongresmeni Engel, nga ana e tij, tha se Shtetet e Bashkuara të Amerikës do të vazhdojnë të jenë përkrah Kosovës në të gjitha proceset që ajo ka para vetes.

Engel tha se Bashkimi Evropian duhet të ndërmarrë hapa të shpejtë për liberalizimin e vizave për qytetarët e Kosovës dhe të punojë bashkë me Kosovën në proceset euro-integruese.

Ai po ashtu tha se Serbia duhet ta njoh shtetin e pavarur dhe sovran të Kosovës.

Në këtë takim, Kryeparlamentari Veseli dhe kongresmeni Engel folën edhe për nismën e kryeparlamentarit kosovar për dënimin e gjenocidit dhe krimeve që Serbia ka kryer në Kosovë.

Engel tha se kriminelët duhet të përgjigjen para drejtësisë për të gjitha krimet që kanë kryer ndaj popullatës civile gjatë luftës në Kosovë.