Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Google krijon një kompani të re

by

Google ka njoftuar për një riorganizim të kompanive të saj, duke krijuar një kompani “mëmë” të quajtur “Alphabet”. Në krye të kësaj kompanie do të jenë themeluesit e Google, Larry Page, si shef ekzekutiv dhe Sergey Brin, si president.
“Alphabet” tani do të shërbejë si një kompani “mëmë” për një numër kompanish tjera më të vogla, përfshirë Google si dhe të gjitha bizneset që kanë funksionuar nën ombrellën e saj, si Youtube, Android, aplikacionet dhe të tjera.
Gjithashtu, pjesë e “Alphabet” do të jenë edhe disa departamente të tjera të cilat kanë vepruar si të pavarura si Life Sciences, Google X, Wing, Google Ventures dhe Google Capital.
“Nuk jemi duke synuar që kjo të bëhet një markë e madhe përmes produkteve tjera, pasi kompanitë nën ‘Alphabet’ do të kenë pavarësinë dhe mundësinë për t’u zhvilluar vetë”, është shprehur Larry Page. Ndërkohë, në pozitën e Page, si shef ekzekutiv te Google, tani e tutje do të jetë Sundar Pichai. Ky i fundit është pjesë e Google që nga viti 2004, ndërsa së fundmi ka qenë në pozitën e shefit të produkteve.
Sh.K.

Kosovë-Mustafa në Gjakovë: Qeveria, bujqësisë prioritet

by

Nga Behlul Jashari/ GJAKOVË, 10 Gusht 2015/ Qeveria e Kosovës është përcaktuar që t’i jap prioritet mbi prioritetet zhvillimit të bujqësisë, tha sot kryeministri Isa Mustafa gjatë vizitës në Kompaninë Rajonale të Ujitjes “Radoniqi- Dukagjini”, në Gjakovë, ku u njoftua për punën dhe projektet.
Ai ka vizituar edhe tokat bujqësore që ujiten nga ky sistem, ku është takuar edhe me fermerët e asaj ane.
Në vizitën bashkë me ministrin e Bujqësisë dhe ministrin e Financave, duke vlerësuar punën e suksesshme sa i përket granteve dhe subvencioneve për prodhuesit e drejtpërdrejtë bujqësor, por edhe për ndërtimin e infrastrukturës e cila do të rris rendimentet në bujqësi, kryeministri Mustafa theksoi se një prej aspekteve infrastrukturore të cilës do t’i jepet përparësi e veçantë është pikërisht sistemi i ujitjes.
Kryeministri Mustafa po ashtu vlerësoi efektet e sistemit të ujitjes në rreth 5 mijë hektarë të cilat i mbulon Radoniqi, duke shprehur besimin se do të gjenden zgjidhje edhe për problemet me arkëtimet lidhur me shpenzimin e ujit.
“Orientimi ynë është që të zgjerojmë sistemin e ujitjes, së paku ta bëjmë dyfish apo trefish me atë që kemi tani, në mënyrë që të rrisim edhe numrin e kulturave që mbillen gjatë vitit në bujqësi edhe rendimentet. Të gjitha analizat tregojnë se ato rendimente mund të dyfishohen apo trefishohen, me çfarë ne do të arrijmë të ulim importin e produkteve bujqësore, të rrisim dhe ta fuqizojmë eksportin, ta rrisim industrinë përpunuese të këtyre produkteve dhe të përmirësojmë bilancin tregtar dhe punësimin, sepse kemi mundësi që të rrisim dukshëm numrin e të punësuarve në bujqësi”, theksoi kryeministri Mustafa.
Ministri i Bujqësisë, Pylltarisë dhe Zhvillimit Rural, Memli Krasniqi, theksoi se qeveria e ka prioritet qendror zhvillimin e bujqësisë, e ka dyfishuar buxhetin për bujqësi dhe ka krijuar edhe skema të reja të subvencionimit të kulturave të reja, duke përmendur edhe perimet në fushë të hapur.
Ministri i Financave Avdullah Hoti, lidhur me mundësitë e financimit të projekteve, tha se sot është diskutuar në detaje për projektin e zgjerimit të tokave bujqësore në ujitje.
Drejtori i Kompanisë “Radoniqi-Dukagjini”, Jahja Kadria, falënderoi kryeministrin Isa Mustafa për vizitën dhe mbështetjen e ofruar për avancimin e mëtutjeshëm të sistemit të ujitjes.

SHIU HARRON DURRESIN

by

Vazhdon vapa, reshjet e shiut “harrojnë” Durrësin tonë/
Durrësi është mbërthyer si asnjë herë tjetër në darën e vapës.
Që prej një muaji temperaturat ditore shënojnë mbi 34 gradë celsius, ndërsa reshjet e shiut e “kanë harruar” prej kohësh qytetin bregdetar. Javën e kaluar shira të rrëmbyeshëm prekën një pjesë të qyteteve tona kryesore, madje reshje shiu u regjistruan të shtunën edhe në zonën e Sukth-Maminas, vetëm 11 km larg Durrësit. Meteorologët parashikojnë ndryshimin e kushteve të motit vetëm në fundjavë, megjithëse duhet pranuar se vapa dhe zagushia kanë krijuar probleme edhe në saktësinë e këtyre parashikimeve. Po lus zotin të hedhë një pikë shi në Durrës.
SH.K.

Certifikohet rezultati i zgjedhjeve të 21 Qershorit

by

* Luzi: Zgjedhje transparente me disa risi teknologjike/
*15 parti përfitojnë fonde shtesë, 46 duhet t’i kthejnë parate/
TIRANË, 10 Gusht/Nga Arbi Fortuzi/-Komisioni Qendror i Zgjedhjeve çertifikoi sot rezultatin final të zgjedhjeve lokale të 21 Qershorit.
Kryetarja e Komisionit Qendror të Zgjedhjeve, Lefterie Luzi në një konferencë për shtyp pas mbledhjes, lidhur me zgjedhjet e 21 Qershorit u shpreh se ato ishin të lira, me standarde dhe gjithëpërfshirëse. Në deklaratën e saj për shtyp, Luzi vuri në dukje punën e bërë nga KQZ për të realizuar një proces të suksesshëm zgjedhor.
Sipas saj, puna e KQZ-së ka nisur shumë më herët se Presidenti i Republikës, Bujar Nishani të dekretonte datën e zgjedhjeve. Kryetarja e KQZ-së, Luzi tha se zgjedhjet vendore u realizuan me hartën e re territoriale dhe me ndryshimet në Kodin Zgjedhor vetëm pak ditë përpara datës së zgjedhjeve, megjithatë KQZ arriti të krijonte infrastrukturën e nevojshme zgjedhore, përgatitore dhe funksionale, për garantimin e integritetit të procesit të lirë, të ndershëm dhe të pavarur zgjedhor.
Ajo bëri të ditur se u prodhuan materiale edukuese, informuese dhe sensibilizuese, në gjuhët e pesë komuniteteve e të pakicave kombëtare.“Shpërndarja e këtyre materialeve u realizua përveç të tjerash edhe në takimet e drejtpërdrejta që unë si Kryetare e KQZ-së kam zhvilluar me përfaqësues të këtyre komuniteteve në qytetet ku ka përqëndrimin më të madh të tyre”, tha Luzi.
“Për sensibilizimin dhe informimin e zgjedhësve PAK, të gjithë spotet televizive, edukues, informues, sensibilizues, ishin të përshtatur në gjuhën e shenjave. Për fushatën e edukimit zgjedhor, KQZ bashkëpunoi sukseshëm edhe me OJF përfaqësuese, si IRCA (Instituti i Kulturës Rome në Shqipëri), përfaqësuesit e Komitetit Shtetëror për Pakicat Kombëtare në Shqipëri, etj. KQZ, bëri pjesë të administratës zgjedhore 12 persona me aftësi të kufizuar pranë zyrave rajonale zgjedhore në 12 qarqet e vendit dhe pranë pikave të informimit të zgjedhësve, që u ngritën në 12 qytete, 1 person PAK dhe 1 person nga komuniteti rom në KQZ, me bindjen se puna e gjithsecilit prej tyre do të jetë kontribut dhe ndihmë e madhe për zgjedhësit me aftësi të kufizuar. Për herë të parë, theksoi Luzi, KQZ prodhoi maska me shkrimin brail, “shablloni”, mjetet ndihmëse për zgjedhësit e verbër që votuan vetë pa ndihmësit e tyre, duke garantuar fshehtësinë e votës së tyre”.
Kryetarja e KQZ-se Lefterie Lleshi Foto Agim Dobi (1)Sipas saj, KQZ përgatiti në kohë bazën nënligjore, u miratuan 5 akte me karakter normativ rregullues dhe 964 akte të tjera nënligjore.
Gjithashtu, Luzi vlerësoi punën e bërë për KZAZ-të. “U konstituuan në kohë rekord (brenda një dite) të 90 Komisionet e Zonave të Administrimit Zgjedhor dhe në përputhje të plotë me Kodin Zgjedhor. KQZ me procedura korreke, me transparencë dhe brenda afateve kohore ligjore regjistroi si subjekte zgjedhore 63 parti politike, nga të cilat 9 parti politike konkuruan më vete jashtë 2 koalicioneve zgjedhore të regjistruara për këto zgjedhje.
Po ashtu, sipas saj, u regjistruan kandidatët për kryetar bashkie për çdo zonë zgjedhore, dhe listat shumemërore për anëtarë në Këshillat Bashkiak, të paraqitura nga subjektet zgjedhore (parti politike) apo kandidat të mbështetur nga zgjedhësit për për 61 bashkitë. Në funksion të zgjedhjeve të 21 qershorit Komisioni Qendror i Zgjedhjeve, realizoi me sukses 4 projektet elektronike, duke rritur informacionin dhe transparencën për publikun, median dhe subjekteve zgjedhore, që garuan në zgjedhjet vendore”, tha Luzi, duke përmendur këtu, kamerat në ambientet ku përpunohej baza logjistike, monitorët për publikimin në kohë reale të rezultatit etj.
Nga përgatitjet, Luzi sqaroi punën e KQZ-së edhe gjatë proçesit zgjedhor, ku në veçanti, Kryetarja e KQZ-së vlerësoi qytetarinë e votuesve, ndërsa pasqyroi suksesin e punës së KQZ-së përmes deklaratave të vëzhguesve ndërkombëtare.
Sa i takon pjesës së numërimit, Luzi tha se risi për këto zgjedhje ishte që në rezultatin paraprak të dhënë nga KQZ, njëherazi jepej dhe shpërndarja e mandateve për çdo zonë zgjedhore, mbi bazën e rezultateve të nxjerra nga çdo qendër votimi e përfshirë në juridiksionin e KZAZ-ve përkatëse.
Në fund, Luzi u shpreh se në KQZ u paraqitën gjithsej 115 kërkesa ankimore, nga këto 23 parazgjedhore dhe 92 kërkesa ankimore paszgjedhore. Ajo bëri të ditur se kundër vendimeve të KQZ-së, janë bërë në Kolegjin Zgjedhor 20 ankime parazgjedhore dhe 20 ankime pas datës së zgjedhjeve. Kolegji Zgjedhor, tha Luzi, ka pranuar 9 kërkesa ankimore dhe ka vendosur ndryshimin e vendimit të KQZ-së, ka rrëzuar 25 kërkesa ankimore dhe ka lënë në fuqi vendimin e KQZ-së, si dhe ka pushuar 6 ankimime.
15 parti përfitojnë fonde shtesë, 46 duhet t’i kthejnë ato/
Komisioni Qendror i Zgjedhjeve miratoi sot me 7 vota pro rezultatin final të zgjedhjeve lokale të 21 qershorit.
Gjatë mbledhjes që po zhvillohet në ambientet e KQZ-së, anëtarët e saj dekretuan rezultatin final të zgjedhjeve me 7 vota, teksa diskutuan dhe për shpërndarjen e fondeve për partitë fituese të këtyre zgjedhjeve. Kështu në bazë të vendimit të marrë nga KQZ u vendos që 15 parti politike do të përfitojnë fonde shtesë, teksa 46 parti duhet të kthejnë fondet e përfituara nga KQZ.
Komisioni Qendror i Zgjedhjeve Foto Agim Dobi (2)Pas një diskutimi të shkurtër, u vendos që data maksimale e kthimit të fondit do të jetë 30 shtatori.
Ndërkaq, u hodh edhe shorti për ekspertët kontabël, ku në short marrin pjesë 22 kandidatë.

Shpërthim te “Don Bosko”- Bombolat e gazit shkatërrojnë një lokal, 26 të plagosur

by

Si pasojë e një rrjedhje gazi disa bombola gazi në një ëmbëltore në zonën e “Don Boskos” kanë shpërthyer pasditen e së dielës.
Për pasojë, siç është raportuar deri në orën 20:20, 26 persona kanë kërkuar ndihmë në Spitalin e Traumës, ndërsa shtatë prej tyre janë në gjendje të rëndë.
Dy prej punonjësve të ëmbëltores, të cilët kanë qenë brenda në momentin e shpërthimit, dhe një i tretë thuhet se janë në rrezik për jetën dhe të njëjtit gjenden në QSUT.
Shpërthimi ka qenë aq i fuqishëm, sa ka lënduar edhe persona në rreze prej 100 metra, duke përfshirë këtu edhe ata përballë rrugës.
Gjithashtu, tre biznese në katin e parë dhe disa pallate në katin e dytë dhe të tretë të kësaj ndërtese kanë pësuar dëme të mëdha materiale.
Sipas dëshmitarëve, policia dhe zjarrfikësit menjëherë kanë mbërritur në vendngjarje, ndërsa për të njëjtën nuk thuhet edhe për ambulancën, pasi këta të fundit janë vonuar. Shkak i kësaj tragjedie mendohet të jetë mos zbatimi i kushteve teknike për mbajtjen e kësaj bomobole 80 kg. Dëmet do ishin shumë më ëe mëdha nqs bombola do ishte plot, thotë një nga punonjësit e këtij lokali.