Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

20 vjet nga masakra e Srebrenicës, përkujtohen 8 mijë viktimat. Turma përzë kryeministrin serb

by

Mijëra vetë janë mbledhur në varrezën e Bosnje Hercegovinës për të shënuar 20-vjetorin e masakrës së Srebrenicës, ku 8 mijë burra e djem myslimano-boshnjakë u vranë nga trupat paraushtarake serbe, me nisjen e shpërbërjes së Jugosllavisë.
Kryeministri serb, Aleksandar Vuçiç, vendi i të cilit mbështeti serbo-boshnjakët në kryerjen e masakrës, u largua nga ceremonia pasi u sulmua nga me gurë nga një turmë.
Këtë të shtunë janë kujtuar edhe 100 viktimat, mbetjet trupore të të cilëve u identifikuan vetëm së fundmi përmes analizave të ADN-së.
Ndërsa ditën e premte, rreth 10 mijë persona morën pjesë në një marshim të heshtur, duke përshkuar rrugën e burrave dhe djemve që u përpoqën të largoheshin nga Srebrenica, kur trupat serbe morën nën kontroll qytetin.
Duke marrë pjesë në ceremoni, Bill Clinton, president i Shteteve të Bashkuara në kohën e luftës, kërkoi ndjesë që aleatëve iu desh shumë kohë për të vendosur ndërhyrjen në Bllkan.
“Nuk dua të shoh më kurrë një masakër si kjo”, tha ai, duke vlerësuar kryeministrin Vuçiç për kurajon e treguar me ardhjen këtu.
Nga ana e tij, Vuçiç u shpreh se, “Serbia dënon qartë dhe pa ekuivok këtë krim të tmerrshëm dhe ndjen neveri ndaj të gjithë atyre që morën pjesë në të, të cilët do të vazhdojë t’i nxjerrë para drejtësisë”.
Munira Subasiç, drejtuese e shoqatës Nënat e Srebrenices, i vendosi një lule të bardhë e të gjelbër atij në xhaketë, kur kryeministri serb hodhi nënshkrimin e tij në librin e ngushëllimeve.
Megjithatë, pak më vonë ai u godit me gurë nga një turmë që bërtiste “Allahu Akbar” dhe të tjerë që klithnin “përgjegjësi” dhe “genocid”. Gjithashtu, ndaj tij u hodhën shishe me ujë dhe një këpucë.
Agjencia serbe e lajmeve “Tanjug” thotë se, ai u godit në kokë dhe se iu thyhen syzet. Një person u arrestua pas incidentit.
Në korrik të vitit 1995, mijëra boshnjako-myslimanë që kërkonin strehim në atë që mendohej se ishte enklava e siguruar nga paqeruajtësit e OKB-së u vranë barbarisht. Kjo ngjarje ishte më e rënda në Europë që nga Lufta e Dytë Botërore.
Por, më herët gjatë javës në Këshillin e Sigurimit, ambasadori rus Vitaly Churkin vendosi veton ndaj vlerësimit të masakrës si “genocid”, me pretendimin se një gjë e tillë do të ishte kunërproduktive dhe do të rriste tensionet në Ballkan.
Veprimi kënaqi pa masë presidentin serb, Tomisllav Nikoliç, i cili e quajti vendosjen e vetos “një ditë të madhe për Serbinë”.

NJË DITË E BUKUR PËR AMBASADËN E KOSOVËS NË LONDËR

by

Në mesditën e datës 10 Korrik 2015, Ambasada e Republikës së Kosovës, e sapo vendosur në një rrugë të bukur në qendër të Londrës, priti musafirë shumë të shquar. Ndër ta ishin Presidentja, zonja Atifete Jahjaga, ish kryeministri britanik Toni Blair me zonjën e tij Cherie Blair, ish Sekretari i Përgjithshëm i NATO – s, Lordi Robertson, ish komandanti i Forcave ushtarake britanike në Kosovë, gjen. Michael Jackson, ambasadorët e Japonisë, Turqisë, Latvias, Malit të Zi, Finlandës, Sllovenisë, Maqedonisë, Nuncio Apostolic, Ambasadori i Britanise ne Kosove dhe ai ne Keshillin e Sigurimit ne New York, Marshalli i Mbreterise, Sir Noel Malcolm, diplomatë , shumë përfaqësues të mediave diplomatike, krerë të shoqatave shqiptaro – britanike, shqiptarë me banim në Londër, etj ,
Ambasadori i Kosovës z Lirim Greiçevci duhet ta këtë patur ditën dhe momentin më të bukur të karrjerës së tij diplomatike deri më sot, kur mikëpriti aq shumë miq të nderuar dhe i prezantoi njëri pas tjetrit me tërë bukurinë dhe çarmin që protokolli diplomatik i një vendi si Britania e Madhe kërkon, në raste të tilla.
Presidentja e Kosovës mbajti një fjalim shumë të bukur dhe po ashtu shpalli këngëtaren e njohur britanike të lindur në Kosovë RITA ORA, Ambasadore Nderi të Kosovës e cila e priti atë me shumë kënaqësi. Më pas ish Kryeministri Toni Blair foli me pasionin e tij të njohur për Kosovën, duke theksuar se prania e Ambasadës së Kosovës në qendër të Londrës, është diçka që dikur mund të ishte vetëm një ëndërr.
Urimë Ambasadorit Greiçevci i mbështetur tanimë edhe nga Ambasadorja më e re Rita Ora e cila i ka dhënë kaq shumë emër Kosovës dhe mbarësi për Kosovën tonë të dashur.
Proud to be Albanian!(Marre nga Fb nga faqa e ambasadorit Mal Berisha)

Ekeplozivi nga Beogradi në Prishtinë, aktakuzë për vepër penale që ndërlidhet me terrorizmin

by

-Në Beograd është furnizuar më njëzet e pesë pajisje eksplozive, me peshë totale 12,219/kg, në Prishtinë në lagjen Arbëria është ndaluar nga Policia e Kosovës/
Nga Behlul Jashari/ PRISHTINË, 10 Korrik 2015- Prokuroria Speciale e Republikës së Kosovës ka ngritur sot aktakuzë pranë Gjykatës Themelore në Prishtinë, kundër të pandehurit S.G. për veprën penale të përgatitjes së terrorizmit.
Sipas aktakuzës i pandehuri S.G., me qëllim që seriozisht ta frikësojë popullatën dhe të destabilizojë dhe të shkatërrojë strukturat më të rëndësishme politike, kushtetuese, ekonomike dhe sociale të Republikës së Kosovës, ka përgatitur kryerjen e veprës penale të terrorizmit.
I pandehuri S.G. gjatë muajit dhjetor të vitit 2014, në Beograd është furnizuar më njëzet e pesë pajisje eksplozive, me peshë totale 12,219/kg, të cilat përmbajnë eksploziv të fuqishëm “Pentaerythritol Tetranitrate“ (PETN), i kombinuar me fragmente metali, bulona dhe gozhda, të cilat shërbejnë për rritjen e fuqisë shkatërruese dhe shkaktimin sa më të madh të viktimave në njerëz dhe dëme materiale, të cilat pastaj me veturën e tij, më 25 dhjetor 2014, i ka transportuar nga Beogradi për në Prishtinë, ku në lagjen Arbëria është ndaluar nga Policia e Kosovës dhe pas kontrollit të kryer, në bagazhin e veturës së tij është gjetur eksplozivi.
Me këtë i pandehuri S.G. ka kryer veprën penale: “Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës”, nga neni 144 par.3 lidhur me par.1 dhe nga neni 135 par.1, pika 1.9 të Kodit Penal të Republikës së Kosovës.
Ekspertiza e eksplozivit është kryer nga Byroja Federale e Hetimeve (FBI) dhe Agjencia Kosovare e Forenzikës.
Për veprën penale me të cilën i pandehuri ngarkohet sipas aktakuzës, prokurorja e rastit, nga radhët e prokurorëve vendës të Prokurorisë Speciale të Republikës së Kosovës, ka kërkuar nga gjykata që të pandehurit t’ia vazhdojë masën e paraburgimit, si dhe pas shqyrtimit gjyqësor ta shpallë fajtorë dhe ta dënojë sipas ligjit.
Në 26 dhjetor 2014, bëhej e ditur se Prokurori kujdestar nga Prokuroria Speciale e Republikës së Kosovës, në mbrëmjen e një dite më parë rreth orës 21:00 ka urdhëruar ndalimin policor për 48 orë ndaj personit S.G., shtetas i Republikës së Serbisë, për shkak të dyshimit se ky person ka kryer veprën penale: “Përgatitja e veprës terroriste ose veprave penale kundër rendit kushtetues dhe sigurisë së Republikës së Kosovës”, nga neni 144 i Kodit Penal të Republikës së Kosovës.
Prokuroria Speciale e Republikës së Kosovës njoftonte se, në veturën e personit të dyshuar është gjetur sasi e madhe e eksplozivit, që dyshohet se ka qenë e planifikuar të përdoret për kryerjen e aktiviteteve terroriste.
“Rasti është në fazën fillestare të hetimeve nga një prokuror vendës i Prokurorisë Speciale, i cili do t’i kërkoj gjykatës që ta caktoj masën e paraburgimit për të dyshuarin”, theksonte njoftimi.
Media kosovare sot zbulon edhe emrin, duke njoftuar se, “Prokuroria Speciale e Republikës së Kosovës ka ngritur sot aktakuzë pranë Gjykatës Themelore në Prishtinë, kundër të pandehurit S.G. (Slobodan Gavriq) për veprën penale të përgatitjes së terrorizmit”.

Presidentja Atifete Jahjaga u takua me z. Tony Blair

by

Ne Foto:Presidentja Jahjaga, takimi me ish Kryeministrin Balir dhe zonjen Blair ne ambasaden e Kosoves ne Londer/
Presidentja e Republikës së Kosovës, zonja Atifete Jahjaga, u takua sot në Londër, në ambasadën e Kosovës, me ish-kryeministrin e Britanisë së Madhe, zotëri Tony Blair dhe bashkëshorten e tij, zonjën Cherrie Blair.
Presidentja Jahjaga e vlerësoi lart angazhimin e ish-kryeministrit Blair për Kosovën, në mbrojtjen e popullit të Kosovës gjatë kohës së luftës, me vendimin për fushatën ajrore të NATO-s që parandaloi katastrofën humanitare dhe më vonë përmes ndihmës në rindërtimin e vendit dhe procesin e shtetndërtimit te tij. Ajo gjithashtu e falënderoi për mbështetjen që i ka dhënë Kosovës në ruajtjen dhe kultivimin e vazhdueshëm të tolerancës ndërfetare, një vlerë e veçantë e shtetit të Kosovës.
Presidentja Jahjaga dhe ish-kryeministri Blair vlerësuan të arriturat e Kosovës, ndërtimin demokratik e gjithëpërfshirës të vendit, sfidat në procesin e integrimeve evropiane, dialogun me Republikën e Serbisë dhe marrëveshjet e arritura që duhet të zbatohen, ndërtimin e shtetit të së drejtës si dhe sfidat në fushën e sigurisë në luftën kundër ekstremizmit.
Presidentja Jahjaga theksoi se Kosova si dhe gjithë rajoni i Ballkanit duhet të ketë perspektivën e qartë evropiane dhe të përfshihet në të gjitha nismat dhe projektet e BE-së për rajonin dhe të ruhet momenti i klimës së bashkëpunimit ndërmjet vendeve në rajon.
Ish-kryeministri Blair tha se Kosova ka arritur shumë në proceset e shtetndërtimit dhe ajo duhet të vazhdojë të forcojë demokracinë e saj të brendshme dhe konsolidimin e saj ndërkombëtar.

Presidentja Jahjaga mori pjesë në diskutimin publik me rastin e shënimit të 800-vjetorit të hartimit të Magna Carta-s

by

Presidentja e Republikës së Kosovës, zonja Atifete Jahjaga, gjatë qëndrimit në Britani të Madhe, mori pjesë në një diskutim publik me rastin e shënimit të 800-vjetorit të hartimit të Magna Carta, të organizuar në Bibliotekën Britanike (British Library) në Londër.
Në panelin e organizuar me temën “Ligji i një vendi – Si të krijohet një shtet” (The law of the land -How to create a country), së bashku me Presidenten Jahjaga, morën pjesë Sir Jeremy Greenstock, ish-ambasador i Britanisë së Madhe në OKB, Albie Sachs, ish-gjykatës i Gjykatës Kushtetuese të Afrikës së Jugut dhe u drejtua nga profesoresha Ngaire Woods, dekane e Shkollës Blavatnik të Universitetit të Oxfordit.
Presidentja Jahjaga në prezantimin e saj foli për rezistencën paqësore në Kosovë dhe periudhën e luftës për çlirimin e saj si dhe përpjekjet për rindërtimin e vendit me ndihmën ndërkombëtare. Ajo gjithashtu foli edhe për procesin e shtetndërtimit të Kosovës, nga aspekti i kushtetutshmërisë. Presidentja Jahjaga gjatë prezantimit u pyet edhe për ndërtimin e institucioneve të vendit në veçanti për institucionet e sigurisë.