Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova aplikon për UNESCO, anëtarësimi pritet në nëntor

by

Nga Behlul Jashari/ PRISHTINË, 16 Korrik 2015/- Kosova aplikon për anëtarësim në organizatën e Kombeve të Bashkuara UNESCO, anëtarësimi pritet në nëntor.
“Sapo aplikuam për anëtarësi në UNESCO, agjencionin e OKB për arsim, shkencë dhe kulturë”, bën të ditur zv/kryeministri i parë e ministri i Jashtëm i Kosovës, Hashim Thaçi.
“Ky veprim vjen pas një konsultimi me partnerë dhe pas 130 takimeve me delegacione të UNESCO-s që kemi zhvilluar vetëm këtë vit”, thekson ai.
“Është ky një hap që fuqimisht zgjëron interaksionin tonë global”, vlerëson kreu i qeverisë së Kosovës.
“Presim që në nëntor të hyjmë në këtë organizatë shumë të rëndësishme”, është paralajmërimi i kryediplomatit kosovar, Thaçi.
Ndërsa, më pas kryeministri Isa Mustafa bëri të ditur se sot ishte njoftovar nga Ministria e Punëve të Jashtme se Kosova ka aplikuar për anëtarësim në UNESCO.
“Përgëzoj ministrin e Jashtëm, ministrin e Arsimit, Shkencës dhe Teknologjisë dhe ministrin e Kulturës, Rinisë dhe Sportit për një punë të madhe dhe me përkushtim”, është shprehur ai.
“Në takime me liderë evropianë dhe botërorë kam marrë zotime se Kosova do të përkrahet fuqishëm në këtë proces. Jemi zotuar, po ashtu , se edhe ne do të përmbushim detyrimet tona ndaj bashkësisë ndërkombëtare. Ky është një zhvillim i rëndësishëm diplomatik për Kosovën”, thekson Mustafa.
Kosova, shteti më i ri evropian, me pavarësinë e shpallur para shtatë vitësh, në 17 shkurtin historik 2008, deri tash është njohur nga mëse 110 vende anëtare të OKB-së.

KRYEMINISTRI RAMA NE PRISHTINE

by

Kryeministri Rama në Prishtinë, shpreh përkrahjen e Shqipërisë për proceset në Kosovë/
Nga Behlul Jashari/
PRISHTINË, 16 Korrik 2015/-Kryeministri i Republikës së Shqipërisë, Edi Rama mbërriti sot për vizitë zyrtare në Kosovë, i pritur në kryeqytet, Prishtinë, para Kryeministrisë nga kryeministri kosovar Isa Mustafa e zv/kryeministri i parë e ministri i Jashtëm, Hashim Thaçi.
Gjatë takimit, ku ishte edhe ministri i Punëve të Jashtme i Shqipërisë, Ditmir Bushati, u bisedua për bashkëpunimin ndërmjet dy vendeve, koordinimin e projekteve dhe bashkëpunimit të dy shteteve në prag të Samitit të Vjenës si dhe zhvillimet në rajon.
Kryeministri Isa Mustafa e informoi kryeministrin Edi Rama për progresin që po arrihet në Kosovë në të gjitha fushat, me theks të veçantë për reformat dhe prioritetet e Qeverisë.
Kryeministri Mustafa po ashtu theksoi përkushtimin e Qeverisë së Kosovës për të zgjeruar bashkëpunimin dhe partneritetin strategjik me Shqipërinë.
Kryeministri i Republikës së Shqipërisë, Edi Rama, vlerësoi progresin që po arrihet në Kosovë.
Kryeministri Rama po ashtu shprehu përkrahjen e Republikës së Shqipërisë për proceset në Kosovë, duke theksuar përkushtimin e Qeverisë shqiptare për zgjerimin e mëtutjeshëm të bashkëpunimit me Kosovën.
Korrespondenti në Kosovë ishte në pritje dhe brenda takimit për një kohë, gjatë së cilës kryeministrit Rama iu shpreh e gjithë mikpritja e përzemërt dhe vëllazërore, ndërsa me kryeministrin kosovar Mustafa flisnin edhe për udhëtimin nga Tirana drejt Prishtinës, mes dy kryeqyteteve.
Takimi, pas të cilit sapo u dërgua komunikata për media e Kryeministrisë kosovare, u mbajt në ndërtesën kryesore të Qeverisë së Kosovës në Prishtinë, nga i cili mediat mundën të marrin vetëm pamje.

Muftiu Tërnava uron besimtarët me rastin e Fiter Bajramit

by

PRISHTINË, 16 Korrik/- Me rastin e ditës së Fiter Bajramit, myftiu Naim Tërnava në emër të Bashkësisë Islame të Kosovës (BIK), ka përgëzuar të gjithë besimtarët myslimanë për përmbushjen e njërit prej detyrimeve kryesore të fesë islame.
Myftiu Tërnava ka lutur Zotin që të ketë pranuar agjërimin, lutjet dhe punët e mira që janë bërë gjatë këtij muaji.
“Ky Bajram le të mbetet Bajrami i atyre të cilët thyen murin e egoizmit, përmes ndihmave, i atyre që bënë nderë dhe ndanë kafshatën e bukës për ata që kanë nevojë, treguan qetësinë shpirtërore, vëllazërinë dhe miqësinë dhe i atyre që ua hapën derën e shpirtit vëllezërve dhe motrave të tyre”, u shpreh myftiu Tërnava në mesazhi e tij për festën e Fiter Bajramit, që do të festohet nesër ditën e premte./Kosovapress/

Njoftim i Këndit Amerikan në Tiranë-Kërkohen vullnetarë

by

Këndi Amerikan në Tiranë kërkon të rinj vullnetarë për të ndihmuar me programet tona të përditshme. Kjo është një mundësi shumë e mirë për të marrë eksperiencë dhe referenca të vlefshme, ndërsa punoni me fëmijë, studentë dhe grupe të ndryshëm. Vullnetarët duhet të kenë aftësi të mira komunikimi dhe organizuese, njohuri shumë të mirë të gjuhës angleze, si edhe një qëndrim pozitiv dhe shpirt skuadre. Nëse mendoni se i keni këto aftësi, dërgoni një letër aplikimi me kualifikimet tuaja, si edhe një paragraf të shkurtër se përse do të donit të punoni tek Këndi Amerikan në Tiranë si vullnetar/e. Dërgoni aplikimin tuaj në adresën actirana@gmail.com
Afati për pranimin e aplikimeve është 19 korrik, 2015.
American Corner Tirana is seeking young volunteers to assist with our daily programs. This is a great opportunity to gain valuable field experience and references, while working with children, students, and various audiences. Volunteers need to have excellent communication and organizational skills, a very good knowledge of the English language, as well as devoted team spirit and a positive attitude.
If you believe that you have the skills, send an application letter with your qualifications, as well as a short paragraph on why you would want to work at the American Corner Tirana as a volunteer. Send your application to actirana@gmail.com The deadline for receiving applications is July 19th 2015.

Ambasadori gjerman Ischinger vlerëson progresin e Kosovës

by

Nga Behlul Jashari/ PRISHTINË, 15 Korrik 2015/ Kryeministri i Republikës së Kosovës, Isa Mustafa, priti sot pasdite në takim ambasadorin gjerman Wolfgang Ischinger.
Gjatë takimit u bisedua për proceset aktuale në Kosovë, për progresin që po arrihet në shumë fusha si dhe për bashkëpunimin e Kosovës me Gjermaninë.
Kryeministri Mustafa shprehu mirënjohjen e popullit dhe të Qeverisë së Kosovës për përkrahjen e vazhdueshme që Gjermania po jep për Kosovën, duke theksuar përkushtimin e Kosovës për zgjerimin e mëtejshëm të marrëdhënieve bilaterale me Gjermaninë.
Kryeministri Mustafa po ashtu e falënderoi ambasadorin Ischinger për përkrahjen e tij personale për Kosovën në proceset shtetformuese dhe për mbështetjen që po vazhdon ta jap në përfaqësimin e Kosovës në arenën ndërkombëtare, duke përfshirë pjesëmarrjen në Konferencën e Munihut për Siguri.
Me këtë rast, kryeministri Mustafa vlerësoi lart konferencën e Munihut për Siguri, si një prej ngjarjeve vjetore më të rëndësishme globale që synon promovimin e zgjidhjes paqësore të konflikteve, bashkëpunimin ndërkombëtar dhe të dialogut në trajtimin e sfidave të sigurisë, ku marrin pjesë liderë të shteteve anekënd botës.
Kryeministri Mustafa e informoi edhe për progresin që po arrihet në Kosovë, për reformat që po ndërmerr Qeveria e Kosovës në shumë fusha, duke filluar nga zhvillimi ekonomik, hapja e vendeve të punës, forcimi i shtetit ligjor dhe sigurisë dhe proceset integruese evropiane.
Ambasadori Wolfgang Ischinger vlerësoi lartë progresin që po arrihet në Republikën e Kosovës, duke shprehur përkrahje të mëtejshme për proceset në Kosovë.
Ambasadori Ischinger u interesua edhe për zhvillimet tjera në Kosovë dhe e ftoi kryeministrin Mustafa që të marr pjesë sërish në konferencën e radhës të Munihut për Siguri, që do të mbahet në fillim të vitit të ardhshëm.
Gjatë takimit u bisedua edhe për proceset tjera aktuale në Kosovë dhe në rajon.