Kulture – Page 196 – Dielli

ANSAMBLI “RUGOVA” MBUSHI 70 VJET

December 2, 2017 by dgreca

-Kryeministri Haradinaj: Manifestimi në 70-vjetorin e Ansamblit “RUGOVA” i bënë nder Rugovës kreshnike dhe gjithë kombit/

-Kryeministri Haradinaj uroi 70-vjetorin e Ansamblit “RUGOVA”, i cili siç tha, koincidon me ditëlindjen e presidentit Ibrahim Rugova/

PEJË, 2 Dhjetor 2017-Gazeta DIELLI/

Kryeministri i Republikës së Kosovës, Ramush Haradinaj, mori pjesë në manifestimin artistik tradicional me rastin e 70-vjetorit të Ansamblit Folklorik Autokton “RUGOVA”, që u mbajt nën patronatin e Kryeministrit.Me këtë rast, kryeministri Haradinaj, uroi 70-vjetorin e Ansamblit “RUGOVA”, i cili siç tha, koincidon me ditëlindjen e presidentit Ibrahim Rugova.

“Ne kudo që jemi krenohemi me ju, me Ansamblin Autokton “RUGOVA”. Kjo është një festë e madhe, me shumë domethënie, dhe ky bashkim i yni e vërteton rrugëtimin 70 vjeçar të një thesari tonë, por që është mijëra vjet”, tha kryeministri Haradinaj, duke theksuar se ky manifestim i bënë nderë jo vetëm artistëve, Rugovës kreshnike, por edhe kombit.Kryeministri Haradinaj, para të pranishmëve të shumtë tha se Kosova, Qeveria, dhe të gjithë të tjerët, e kanë për nder ta rregullojnë statusin ligjor të Ansamblit Autokton “RUGOVA” si Ansambël Nacional, dhe siç tha ai, kjo do të ndodhë.“Dëshiroj të them se të gjithë e dimë se modernja është e të gjithëve, të gjithë kanë hise në të, por tradita është vetëm e atyre që e ruajnë dhe unë ju përgëzoj që e keni ruajtur për vete dhe për ne kudo që jemi”, tha kryeministri Haradinaj. Pjesëmarrës në këtë ngjarje ishin ansamblet nga e gjithë hapësira shqiptare./b.j/

BOTIM ENCIKLOPEDIK PËR SHKODRËN

November 16, 2017 by dgreca

1 Fjalori enciklope Zenepe Dibra

Zenepe Dibra, FJALOR ENCIKLOPEDIK I HAPËSIRËS SHKODRANE(I-II), Botoi: EBP”Gjergj Fishta”, Lezhë, 2015-2016/

Nail_Draga

Shkruan: Dr. Dr.Nail Draga /

Në fushën e studimeve dhe botimeve autor të ndryshëm kanë bërë emër duke u vlerësuar nga opinioni shkencor dhe kulturor, në sajë të punës së tyre shumëvjeçare. Veprat e tilla nuk janë të karakterit lokal, apo regjional, por madje janë të karakterit kombëtar. Pikërisht në këtë gamë të veprimarive janë afirmuar autor të ndryshëm, duke u bërë sinonim i mjedisit përkatës. Por, jo rrallë ndodh që individet me punën e tyre iu tejkalojnë institucioneve që financohen me buxhetin shtetëror, duke dëshmuar se kemi të bëjmë me persona më dhunti të veçantë në fushën e tyre krijuese.Me këtë rast prezantojmë dr.Zenepe Dibra, nga Shkodra, e cila kohë më parë opinionit i është paraqitur me botimin Fjalor enciklopedik i hapësirës shkodrane në dy vëllime(2015, 2016), botuar nga Shtëpia Botuese “Gjergj Fishta” në Lezhë. Fillimisht duhet të themi se kemi të bëjmë me një botim enciklopedik, i cili është gjithëpërfshirës për hapësirën shkodrane për një periudhë kohore prej 25 shekujsh. Autorja prezanton personalitete, ngjarje e dukuri të ndryshme qe kanë ndodhur në këtë regjion gjeografik, ku si ikonë qendron Shkodra, kryeqendra e Ilirisë. Eshtë kjo Shkodra e Rozafës, mbretit Genti nga koha antike e deri në ditët tona, e mbushur me plot sakrifica dhe lavdi duke qenë krenaria e botës shqiptare. Madje siç cekën edhe vet autorja ne dedikimin e saj ky botim njëherit është edhe homazh për të gjithë ata që kanë dhënë jetën për mbrojtjen e tokave të hapësirës shkodrane

Edhe pse në të kaluarën ka pasur emigrim të banorëve në veçanti duhet cekur ekzodin e madh në shek.XV, duke emigruar në Venedik e gjetiu në bregdetin e Adriatikut, në kohën kur Shkodra pushtohet nga Perandoria Osmane. Por, Shkodra përseri rilindi, sepse ajo u mbush me popullsi të re të ardhur nga rrethinat e saj. Madje sipas disa të dhënave cekët se ne Shkodër nga ajo kohë e më pas ekzistojnë hiç me pak se 400 patronime familjare, qe lidhen me toponimet e vendbanimeve nga kanë ardhur banorët e vendosur në Shkodër. Në sajë të te dhënave historike në shek.XIX në Siujdhesën Ilirike në kuadër të Perandorisë Osmane, njihen dy qytete me peshë të veçantë, e ata janë në bregdet Selaniku dhe në brendësi Shkodra. Ishte pra ky qyteti i mijëra dyqaneve e zejeve të ndryshme si rrallë kush në atë kohë. Ajo ishte qendra kryesore e Veriut shqiptar, siç ishte dikur kryeqendra e Ilirisë, duke qenë dëshmitare e shumë ngjarje gjatë shekujve. Ndërsa me pas në sajë të rrethanave të reja shoqërore Shkodra humbi imazhin e vet, e kjo ka të bëj sidomos me kohën e diktaturës pas Luftës së Dytë Botërore.

Në këtë botim janë përfshi edhe personalitete e ngjarje nga hapësira e viseve shqiptare qe sot janë në kuadër të Malit të Zi. Një veprim i tillë ka qenë i arsyeshëm, sepse edhe këto vise shqiptare Shkodrën e kanë pasur qendren e tyre gravituese tregtare, kulturore e kombëtare. Dhe s’ka si të jetë ndryshe, sepse në sajë të ngjarjeve të zhvilluara në shek.XIX-XX, në sajë të dekompozimit territorial të hapësirës shqiptare dhe të luftërave pushtuese të malazezeve ndaj viseve shqiptare, popullsia shqiptare e Tivarit, Ulqinit, Krajës, Anës së Malit, Malësisë e Plavës e Gucisë, strehimin e shpëtimin e ka gjetur pikërisht në Shkodër. Dhe nga ato vite një pjesë e popullsisë së tyre viseve, kanë mbetur këtu duke u bërë banorë të këtij qyteti, duke mbajtur kujtimin për vendin e origjinës së tyre.

Instalimi i diktaturës komuniste në Shqipëri dhe izolimi i vendit nga viti 1945-1990, ku u ndërpre komunikimi ndërshqiptarë, pati pasoja për të gjithë ku as Shkodra nuk ishte përjashtim.Në këtë aspekt shqiptarët në Mal të Zi si pakicë numërike, u izoluan nga shteti amë me pasoja etnosociologjike, që janë të pranishme edhe në ditët tona. Por, edhe në këto kushte u mbijetua, duke sfiduar rrethanat e kohës, duke krijuar vlera në shumë veprimtari shoqërore. Emrat e personave dhe veprimtaritë e ndryshme të cilat prezentohen në këtë botim, e dëshmojnë më së miri një konstatim të tillë.

Nuk ka dilemë se një punë e tillë nuk ka qenë aspak e lehtë, sepse kemi të bëjmë me një lëndë voluminoze, me përmbajtje shumëdimensionale, ku në këto dy vëllime prezantohen 1170 personalitete dhe rreth 2100 zëra me gjithsej 1658 faqe.

Madje e them pa hezitim se ate çka nuk e kanë bërë institucionet me buxhet shtetëror ka arritur ta realizojë zonja Dibra. Ajo për realizimin e një projekti të tillë ka sakrifikuar kohën e saj të çmuar, por ka pasur durim dhe pasion për t’ia arritur qellimit.

Ajo mund të jetë e kënaqur, sepse i ka ofruar opinionit të gjerë shkencor e kulturor një botim enciklopedik, që do t’ia kanë zili edhe qytetet më popullsi disamilionëshe. Por, kur para vetës vendosen objektiva dhe punohet me seriozitet e plot pasion rezultati nuk do të mungojë.

Autorja ka bashkëpunuar me një numër të konsideruar autorësh të ndryshëm të cilët kanë dhënë kontribut me vlerë, që dëshmohet edhe më emrat e tyre të vendosur në fund të zërave përkatëse. Në lidhje me këtë botim enciklopedik, autorja po ashtu ka konsultuar një literaturë të gjërë, që na është prezantuar në fund të njësive të prezantuara. Lënda e prezantuar përfshin shumë fotografi personalitetesh, objektesh apo ngjarjesh të ndryshme, duke dëshmuar në mënyrë faktografike anën tekstuale të lëndës së trajtuar

Dhe pikërisht, për Shkodrën, thënien më brilante e ka thënë ma mirë së askush tjetër poeti Migjeni, duke e cilësuar ate ”dashnorja e shekujve”. Eshtë kjo një thënie emblematike, e cila e personifikon Shkodrën si asnjë qytet tjetër në hapësirën etnogjeografike shqiptare. Dhe nuk ka si të jetë ndryshe, sepse Shkodra në historinë e saj të lavdishme 2500 vjeçare, edhe sot rrezaton dhe shkelqen në arealin shqiptar, duke mbetur krenaria jonë kombëtare. Madje nuk thuhet kot se pa Shkodër nuk ka Shqipni!

Edhe botimi me titull Fjalori enciklopedik i hapësirës shkodrane i autorës Zenepe Dibra, është në favor të këtij konstatimi të kryeqytetit të Ilirisë.

Dhe nuk ka pasur mundësi të jetë ndryshe, sepse Shkodra me te kaluarën e saj të lavdishme, ajo nuk të le të qetë, por inspiron dhe motivon, krijues të profileve të ndryshme shkencore e kulturore.

Urojmë dhe shpresojmë që këtë punë me vlerë sa profesionale e kombëtare në të ardhmën të vazhdojnë të tjerët, ku ky botim mund të shërbëjë si model edhe për qytetet dhe viset e ndryshme në hapësirën etnogjeografike shqiptare.

*(Lexuar më rastin e përurimit të librit në Ulqin më 4 nëntor 2017)

Dije më pak të heshtura

November 12, 2017 by dgreca

NGA ASTRIT LULUSHI/

Janë vende e ngjarje të vogla që shpesh luajnë rol të madh në zhvillime epokash historike – Jezu Krishti u kryqëzua sepse u kallzua nga shoku i vet. Por shpëtimi i besimtarëve të krishterë nuk do të ndodhte nëse Jezusi nuk do të ishte gozhduar në kryq, vdekur dhe ringjallur. Kallzimi i tij për 30 aspra ishte i domosdoshëm që plani i Perëndisë të zbatohej.

Historia nuk harron rastin e i plakut të urtë vlonjat Ismail Qemali; pritja e ulët, parespekt, padinjitet nga deputetët osmanë në parlament, shkaktoi zemërimin e tij dhe ikjen nga kryeqyteti i perandorisë për t’iu përkushtuar përpjekjeve për pavarësi të plotë të Shqipërisë nga perandoria.

Edhe Shekspiri do të kishte mbetur tregtar i vogël leshi, nëse nuk do të kishte ikur nga qyteti i lindjes për në Londër, ku u bë shkrimtar i madh. Ndersa Blase Paskal thoshte se sikur hunda e Kleopatrës të kishte qenë pak më e shkurtër, fytyra e botës sot do të ishte ndryshe.

Sekretarët që jul Cezari punësonte gjatë fushatave ushtarake, ishin ata që mbanin shënime rreth vendeve ku shkelnin. Ata shpesh e gjenin veten të pa-familjarizuar me emrat e qyteteve e fshatrave që Cezari pushtonte. Malet e Vetëtimave, Akrokeraune ose Ceraunian , ata i quajtën “Geminiourum”. Dhe ishin pikërisht këto vargmale të bregdetit që Jul Cezari nuk mundi t’i kalonte gjatë marshimit kundër forcave të Pompeit.

Sipas autorit T. J. Winnifrith, Cezari zbarkoi në brigjet shkëmborë të Himarës, paksa në jug të Palasë që shkruesit e tij e quajtën “Palaeste”. Prej andej, Cezari kaloi përgjatë brigjeve drejt Orikumit. Atje ngriti bazën e tij detare, dhe pastaj u nis për marrjen e Durrësit. Në librin “Badlands ~ Borderlands”, Winnifrith e quan Jul Cezarin personalitetin më të njohur që ka zbarkuar me sukses në brigjet shqiptare, pavarësisht nga fushata e dështuar për marrjen e Durrësit. Por Cezari arriti të fitonte betejën e Farsalus, ku e ndesh me forcat Pompeit, duke ndryshuar plotesisht rrjedhën e historisë. Beteja, e cila ndodhi në vitin 48 pes, pranë Farsalës, Thesali, në Greqinë veriore, përfundoi me shpartallimin e ushtrisë së Pompeit. Ka studiues që thonë se ushtarët e Pompeit, që humbën në “Farsalë”, u shpërndanë dhe disa prej tyre u vendosën përfundimisht në atë që sot quhet “Frashër” (vendlindja e vëllezërve te njohur Frashëriot, Abdyl, Sami e Naim). Të tjerë thonë se “Frashër” vjen nga emri i drurit me të njëjtin emër që gjendet pranë, ose vetë emri i pyjeve me Frashër rrjedh nga një “Farsalus”.

Megjithatë, nëse zbarkimi i Cezarit në Palasë nuk do të kishte qenë i suksesshëm, atëherë nuk do të kishte patur as Perandori Romake, dhe as muaj Gusht < August – August Oktaviani, perandori i parë romak. Kjo ndodhi pas vrasjes së Cezarit më 44 pes. Kështu, mund të thuhet se Shqipëria është vendi ku historia e botës ndryshoi.

The Pride” – Krenaria e shqiptarëve në Chicago / SHBA

November 12, 2017 by dgreca

Nga Niko Papa / Chicago – SHBA/

I dallur për urtësinë dhe talentin e tij në aktrim, ai vjen kësaj radhe për të na suprizuar të gjithëve. Edi Mehana ,(Eagle Mehana) shqiptari i cili jeton prej disa vitesh në Chicago, duket i vendosur për të “pushtuar” ekranet botërore. Fjalë pak dhe punë shumë, ai herë pas here na bën krenarë me projektet e tij kinematografike. Kësaj radhe, përveç aktor, ai vjen si rregjizor dhe producent i filmit “The Pride”.

Filmi “The Pride” bashkon temat e luftës, fesë dhe çështjeve LGBTQ duke i mbyllur ato në vlerat dhe emocionet e një familje komplekse. Gjenerali Truman, i cili qëndron në karrocë invalidi për shkak të luftës, mburret me krenari për shërbimin e tij ushtarak në të kaluarën. Ai është një i ve dhe babai i tre fëmijëve të rritur – , Chrstian, Ray dhe Jessica. Kur ushtria klasifikon të krishterët si MIA (të humbur në veprim) gjatë një turneu në detyrë në Lindjen e Mesme, gjeneralët nuk janë kurrë në gjendje ta pranojnë këtë fakt. Në një akt të mohimit dhe mashtrimit, Gjenerali shkruan letra fiktive dhe i paraqet tek miqtë dhe të afërmit sikur të jenë të shkruara nga një i krishterë i gjallë dhe i mirë.

Ray, djali i dytë i gjeneralit, është homoseksual dhe ndodh të jetë i dashuruar me të dashurin (Kevin) e motrës së tij (Jessica). Problemet fillojnë për Ray kur ai rrëfen homoseksualitetin.

Tematika e filmit është disi e veçantë nëse mendojmë për shoqërinë shqiptare por pikërisht ky duhet të jetë dhe qëllimi i dy tekstshkruesëve shqiptarë Virtyt Kelmendi & Edi Mehana. Të sjellin për shikuesit një realitet që ende nuk pranohet lehtë. Urojmë që The Pride, të vlerësohet nga publiku amerikan dhe të arrijë në majat më të larta të kinemasë botërore. Ne e kemi vërtetuar, se shqiptarët jemi talentë në fusha të ndryshme dhe padyshim që arti shqiptar ka shumë për ti dhënë artit botëror.

NE BROOKLYN, ME PIKTORIN E TALENTUAR ARTUR HASANI

November 11, 2017 by dgreca

Nga Qatip Mara/New York/

Pas disa viteve të vështira të jetës sime nëpër spitalet Tiranë,Torinio,Milano,Nju Jork, këto ditë u takova në Brooklyn Nju Jork me mikun ,intelektualin e piktorin e talentuar Atur Hasani, i cili me shqetësim vinte çdo ditë në spitalin gjerman ku isha kërcënuar nga vdekja. Më jepte kurajo e optimizëm se do të jetoja. U ndamë me përmallim në 17 qershor 2013 kur u largova nga Tirana për të udhëtuar drejt Nju Jorkut. Vazhdimisht në largësi interesohej për ecurinë e operacionve të trasplantit të zemrës dhe më dërgonte mesazhe duke shprehur gëzimin që po jetoja jetë të dytë. Me intelktualin e piktorin e talentuar Artur Hasani isha njohur si koleg pune në shkollat e Tiranës, në të cilat ishte drejtor shkolle dhe më vonë zvëndës drejtor i Liceut Artistik “ Jordan Misja”. Në vitin 2006, kur punoja në inspektim në drejtorinë arsimore rajonale të qytetit Tiranë, e njoha në shkollën “Androkli Kostallari” të kryeqytetit si drejtore shkolle.. Që në momentet e para të komunikimit rrezatonte kulturë qytetare, me përkushtim menaxhonte me suksesë ndër shkollat më të mëdha te qytetit Tiranë që ishte vendosur në godinat e ish-uzinës së taktorave, me një komunitet banorësh të vështirë e me probleme sociale nga prurjet e reja demografike . Në të gjitha inspektimet që kryenim gjenim një mjedis të mirëmbajtur me kujdes e pasion nga drejtori Artur Hasani.

Në vitin 2008 në drejtorinë arsimore rajonale të qytetit Tiranë ishte shpallur konkursi për zvëndës drejtor në Liceun Artistik Kombëtar “Jordan Misja”. Në dosjet e konkursit lexova kërkesën e Artur Hasani e cila ishe shoqëruar me dokumenta që ishin listuar në zyrën e kuadrit nga ministria e arsimit, e cila e kishte në vartësi Liceun Artistik Kombëtar “Jordan Misja”. Duke shfletuar dokumentat e Artur Hasani u befasova nga përmbajtja e tyre cilësore me nota të shkëlqyera ku kishin vetëm nota 10. Ajo që më befasoi më tepër ishte larmia e diplomave të Artur Hasanit, i cili me modesti nuk më kishte treguar se kishte tre diploma që i kishte marrë me aftësitë e tij të talentuara. Me vullnetë e ambicje pozitive për jetën Artur Hasani kishte studjuar duke përfunduar me rezultate të shkëlyera Liceun Artistik Kombëtar “Jordan Misja”, Akademinë e Lartë të Arteve, Universitetin në degën Histori-Gjeografi dhe shkollën e lartë ushtarake në Tiranë. Artur Hasani fitoi konkursin e shpallur nga drejtoria arsimore e qytetit Tiranë për pozicionin drejtues nëndrejtor i Liceut Artistik Kombëtar “Jordan Misja”, dhe ministri arsimit e shkencës e emëroi nëndrejtor të Liceut Artistik Kombëtar Jordan Misja dhe më vonë pedagog i artit figurative.Me pasion e përkushtim Artur Hasani filloi punën në Liceun Artistik duke ngritur më lartë treguesit e kalueshmërisë e cilësisë së liceistëve. Si pedadog i artit figurativ shquhet si një metodist inovativ me cilësi të larta në përgatitjen e talenteve të reja.

Piktori talentuar Artur Hasani, kishte mbaruar me diplomë të artë Akademinë e Arteve Tiranë dhe ka kryer me rezultate shkëlqyeshëm magjistraturën për artin figurativ.Talenti Arturit për pikturë u zbulua që në klasën e tretë të fillores, ku mësuesi i vlerësonte vizatimet duke ja reklamuar para klasës. Edhe babai Arturit , Hasani,shihte me kënaqësi vizatimet e djalit të tij, i cili së bashku me motrën e Arturit mësuese, me përkushtim ndihmuan dhe motivuan për ta çuar talentin më përpara. Megjithëse jetonin në Memaliaj Tepelenë, larg Tiranës përcaktuan objektiv të qartë për të ndjekur mësimet në Liceun Artistik. Pasi mbaron shkollën 8-vjeçare në Memaliaj Tepelenë fiton konkursin për pikturë dhe vazhdon Liceun Artistik “Jordan Misja “ në Tiranë., të cilën e përfundon me rezultate të shkëlqyera. Kërkoi me këmbëngulje të vazhdonte Akademinë e Arteve Tiranë, por sistemi diktaturës së proletariatit me luftën e klasave e pengoi duke i ndërprerë ëndërrën e bukur për artin e pikturës.

Dashuria e Arturit për dije, e motivon për të ndjekur studimet në degën e mësuesisë për histori-gjeografi në universitetin “Eqrem Çabej” në Gjirokstër. Punon disa vite mësues në arsim, kulturë, pikturë në rrethin e Tepelenës, dhe asnjëherë nuk u shua pasioni tij për artin e pikturës. Piktori talenuar Artur Hasani duke ushtruar profesionin e pikturës u paraqit në disa ekspozita të përbashkëta e personale në qytetin e Tepelenës.

Me pasionin e tij për pikturën duke mos e hequr penelën nga dora, në fund të viteve ’90 mori pjesë aktive në përmbysjen e sistemit diktatorial Fiton konkursin dhe vazhdon Akademinë e Arteve në Tiranë, të cilën e përfundon vetëm me nota 10. Një vit para përfundimit të akademisë hap ekspozitë në galerinë e kësaj Akademie, e cila u vlerësua nga qindra artdashës kryeqytetas. Në vazhdimësi merr pjesë në disa ekspozita të tjera të përbashkëta me tematikë “Hapsirë dhe liri”, “Bliç 1”, “Bliç 2” në Qëndrën Ndërkombëtare të Kulturës në Tiranë, të cilat u ndoqën me shumë interesim për prurjet e tyre bashkëkohore. Njëkohsisht jashtë vendit ka hapur ekspozita të përbashkëta në Greqi, Itali, Maqedoni, Kosovë, Mal i Zi etj.

Duke vazhduar krijmarinë e tij të pikturës, piktori Artur Hasani është edhe autor i dy teksteve mësimore për artin viziv, të cilat janë vlerësuar për nivelin e lart cilësor duke u përzgjedhur nga shkollat për mësim. Ai është bashkautorë edhe në dy libra arti për gjimnazet dhe shkollat e mesme profesionale.

Piktori Artur Hasani ka një përgatitje të lartë ideoartistike, është vizionar në fushën e pikturës. Pyetjes : “Ç’farë e bën interesante një pikturë dhe ku shfaqet ajo tek ju ?” ,ai thotë

: “ Të flasësh me gjuhën e artit për të analizuar se ç’farë e bën interesante një pikturë(vepër arti) të diskutosh elementët dhe parimet e saj nuk është e thjeshtë. Por e gjitha kjo thjeshtëzohet kur autori i njeh mirë këto elemente dhe parime si : linjat, ngjyrat, kompozimin, format, sipërfaqe, peshë, unitet, lëvizje, kontrast, harmoni etj. Duhet të kuptosh nëse vepra shprehet përmes simboleve dhe alegorive, qoftë me subjekt fetar apo laik, ku disa nga figurat marrin rol të veçantë. Duke njohur këtë simbolikë të subjektit gjejmë çelësin e interpretimit dhe fshehtësinë e domethënies së saj. Shumë piktorë modern si. p.sh. Pol Kle, besojnë në natyrën krijuese dhe mendojnë se veprës i duhët lënë dorë e lirë “të rritet” sipas ligjeve të veta të brendshme. Pikërisht në punimet e mia në përgjithësi gjejnë vend për analizë elementet dhe parimet e artit dhe pjesa më interesante ç’ka më tërheq edhe më shumë mua është lëvizja si një element që simbolizon veprën pa përjashtuar ato plotësues dhe raportet përmes tyre”

Piktori talentuar Atrur Hasani nuk u vetkënaq me rezultate në studime, prandaj ai filloi studimet për master duke e kryer vetëm me rezultate të shkëlqyera. Sapo përfundoi studimet për master shkencorë në specialitetin e pikturës, kërkoi që të vazhdonte studimet për doktoraturë në Akademinë e Lartë të Arteve Tiranë. Pengesat burokratike të mpleksura me korrupsion e penguan që Artur Hasani të fillonte studimet e doktoraturës. Artur Hasani nuk u tërhoq nga kërkesa e tij për studimin e doktoraturës, por me këmbngulje në mënyrë të vazhdueshme kërkoi që ti jepej e drejta e studimit për doktoraturë dhe buzëqeshja e fitores së tij të ligjshme erdhi. Artur Hasani filloi studimet e dokotoraturës në Akademinë e Lartë të Arteve Tiranë, të cilën ka përfunduar të gjitha provimet dhe likuidimet financiare, tani ka për të mbrojtur temëm para komisjonit,por fitoi llotarinë amerikane dhe kur të kthehet në Tiranë do të realizojë me suksese mbrojtjen e temës.

Piktori talentuar Artur Hasani jeton familjarisht në Brooklyn Nju Jork dhe është integruar denjësisht me jetën amerikane duke kapërxyer vështirësitë me punë të përkushtuar. Ai vazhdon të punojë privatisht në rrugët e artit figurative,paralel me angazhimet dhe prekupimet e tjera familjare. Ka disa projekte në proces për ti finalizuar me ekspozimin e tyre në vazhdimësi.

Ai është një prindë shëmbëllor, babai i dy djemve që shkëlqejnë në shkollë .Djali madh Jurgen Artur Hasani ,vazhdon vitin e dytë në degën Financë- Compjuter në universitetin e Nju Jorkut. Djali vogël Elio Artur Hasani, vazhdon vitin e parë në shkollën e mesme,për Art në “FIORELLO H. LA GUARDIA HIGH SCHOOL” Manhattan . duke ecur në gjurmët e piktorit të talentuar Artur Hasani. E gjithë familja Artur Hasani jeton në harmoni e lumturi duke u integruar me punë e dije në ekonominë e madhe amerikane.

Duke biseduar me piktorin e talentuar Artur Hasani shprehet me mirënjohje ndaj bashkshortes Anila Hasani, e cila përveç angazhimeve të saj në familje, është një faktorët më të rëndësishëm në jetën e artit të bashkshortit Artur Hasani si dhe në mbarëvajtjen e fëmijëve në jetën amerikane

Në këtë takim të shkurtër pak orë e ndjeva veten sikur isha në Tepelenë,Vlorë e Tiranë.dhe e falënderoj për mikëpritjen vëllazërore,duke i uruar shëndetë me lumturi në familje.I uroj suksese në krijimtarin e talentuar të artit figurative.

Qatip Mara

Nju Jork 10.11.2017