Kulture – Page 477 – Dielli

Nderohet vepra krijuese e studiuesit Ibrahim D. Hoxha

April 17, 2013 by dgreca

Me rastin e 90-vjetorit të lindjes së studiuesit Ibrahim D. Hoxha, mbahet një konference shkencore e posaçme mbi vlerat e veprës së tij shumëdimensionale, veçanërisht për kontributin në fushën e folklorit dhe të historisë së Çamërisë./

Në mjediset e Akademisë së Shkencave u zhvillua dje konferenca shkencore “Një jetë kushtuar shkencës dhe atdhetarisë”, me rastin e 90-vjetorit të lindjes së studiuesit Ibrahim D. Hoxha, i cili njëherësh është edhe drejtor i Shoqatës Kulturore shqiptaro–turke “Hasan Tahsini”. Qëllimi i kësaj veprimtarie lidhej me nxjerrjen në pah të vlerave të veprës së studiuesit Ibrahim Hoxha, veçanërisht për risitë dhe kontributin që ka dhënë në përndritjen e historisë dhe të figurave krijuese të komunitetit çam. Në fokus të analizave dhe vlerësimeve nga ana e ligjëruesve ishin disa nga veprat e tij, si: “Enciklopedi Jug-shqiptare” (në dy vëllime), “Hoxhë Hasan Tahsini”, “Bilbila dhe thëllëza çame”, “Vjershëtarë të hershëm çamër”, “Viset kombëtare shqiptare në shtetin grek”, etj.

Të pranishëm në këtë aktivitet ishin miq, kolegë, studiues të fushave të ndryshme, përfaqësues të institucioneve të rëndësishme në vend, si dhe pjesëtarë të trupit diplomatik të akredituar në Tiranë.

Veprimtarinë e çeli Dr. Ramiz Zekaj, drejtor i Institutit Shqiptar të Mendimit dhe të Qytetërimit Islam (AIITC), i cili foli për disa nga tiparet identifikuese të veprës së Ibrahim D. Hoxha, ku veçanërisht u ndal në punën kërkimore të autorit në fushën e transkriptimit të vargjeve me alfabet arab, të krijuara prej autorëve çamë. Ai e konsideroi studiuesin në fjalë, si një “bletë çame” që ka mbledhur nektarin më të vyer të gurrës popullore, e të kulturës së trojeve çame dhe ia ka ofruar publikut shqiptar, që të përfitojë prej saj, por edhe ta ketë si një trashëgimi të çmuar kulturore.

Ndërsa, më tej fjalën e mori zv. Ministri i Kulturës, Rinisë dhe Sporteve, z. Ardian Tana, i cili tha se ndihej krenar me pjesëmarrjen e tij në këtë ditë, kur kujtohet një personalitet që ka dhënë një kontribut të veçantë për çështjen kombëtare në përgjithësi. Z. Tana konstatoi se: “Tek Ibrahim D. Hoxha unë gjej shembullin e një njeriu të palodhur, pavarësisht 90 vjetëve që mban mbi supe. Për mua ai është një model frymëzimi, dhe unë e konsideroj atë një enciklopedi të gjallë”. Ai bëri të ditur për të pranishmit se i është dërguar një kërkesë Presidentit të Shqipërisë për ta dekoruar Ibrahim D. Hoxhën, në shenjë mirënjohjeje dhe vlerësimi për kontributin e madh dhe të vyer që ka dhënë për çështjen e atdheut dhe kombit shqiptar.

Veprimtaria vijoi me të tjera kumtesa e ligjërata nga studiues e miq të autorit, si: Prof.dr. Seit Mancaku dhe studiuesit Enver Kushi, Bedri Telegrafi, Ahmet Ahmeti, Shefqet Domi etj.

Fjalën përmbyllëse e mbajti vetë autori Ibrahim D. Hoxha, i cili falënderoi të gjithë të pranishmit, të cilët e kishin nderuar dhe respektuar me prezencën e tyre në këtë ditë të veçantë për të. Ai theksoi mes emocionesh: “Sot është një ndër ditët më të lumtura për mua. Edhe pse parafolësit më vlerësuan shumë, unë them se nuk kam bërë ndonjë gjë të madhe, përveçse i kam shërbyer kombit dhe atdheut tim dhe është një detyrë që duhet ta kryejë çdo shqiptar që e do vendin e vet”.

Kush është Ibrahim D. Hoxha?

Lindi më 15 prill 1923. Për shpëtimin nga zgjedha greke të vatrës atërore-stërgjyshore tw Çamërisë, mori pjesë në luftën italo-greke, si dhe në Luftën Nacional-çlirimtare. I renditur në çetën, batalionin e grupin IV “Çamëria” dhe në Brig. VI. të Ushtrisë Nacional-çlirimtare, vazhdoi luftimet nëpër tërë vendin dhe jashtë tij, gjer në Bosnjën Jugore. Gjatë viteve të Luftës iu besuan detyra të ndryshme ushtarake, politike dhe ekonomike, deri në: anëtar i shtabit të Brigadës, oficer reparte-komandues, shef shtabesh e mësimdhënës në shkolla ushtarake. Më 1955 dëbohet nga ushtria me motivacionin “Antisovjetik”. I mbikëqyrur rreptësisht si “antiparti”, “irredent bir irredenti”, “mosdashje për pjesëmarrje në votime” etj., më 1959 e burgosën. Pas daljes nga burgu u la pa punë për 23 vjet, por edhe në kushte kaq të vështira vazhdoi kërkimet nëpër arkivat e bibliotekat, si dhe për të dhëna gojore në të gjithë vendin.

Ka mbaruar Kursin e Lartë 2-vjeçar special të oficerëve madhorë, Fakultetin Histori-Filologji (degën Histori-Gjeografi) të Universitetit të Tiranës dhe dy vitet e para të Institutit të Lartë Bujqësor, nga ku e përjashtuan për “biografi të keqe”. Mban librezën e të përndjekurit politik.

Është autori i parë i këngëve popullore dhe i valleve çame, i gjetjes dhe vënies në përdorim të grupeve folklorike, veshjeve krahinore kombëtare çame, mbledhës, arkivues dhe botues i shumë kujtimeve e shkrimeve për Çamërinë. Shkroi mjaft libra, disa prej të cilëve u botuan, por drejtoria e shtypit dhe propagandës pranë K.Q. të PPSH urdhëroi ndalimin e tyre për shkaqe “politike, ideologjike dhe shkencore”. Pas disa viteve ecejakesh nëpër dyer institucionesh, u lejua të qarkullonin vetëm dy, po tepër të gjymtuara prej censurës: “Fabula dhe Vjersha” dhe “Këngë popullore çame”.

Prej 1990-s e këndej ka botuar:

1. Nëpër udhën e penës shqiptare, viti 1986 (u ribotua më 1991).

2. Jusufi e Zulejhaja, viti 1992.

3. Turqit dhe shqiptarët, viti 1994.

4. Kështu luftuam ne, viti 1996.

5. Çamëria dhe Janina në vitet 1912-1922, viti 1996.

6. Hoxhë Hasan-Tahsin Efendiu, viti 1998.

7. Viset kombëtare shqiptare në shtetin grek, viti 2000.

8. Daut Hoxha, viti 2000.

9. Enciklopedi Jugshqiptare I, viti 2006.

10. Bilbila dhe thëllëza çame, viti 2007.

11. Shqipëri moj dritë ylli, viti 2007.

12. Enciklopedi Jugshqiptare II (I-ZH), viti 2009.

13. Vjershëtarë të hershëm çamër, viti 2011.

Është bashkautor në 3 vepra:

1. Fjalori Enciklopedik Shqiptar

2. Historia e Shqipërisë dhe e Shqiptarëve, Prizren, viti 2001.

3. Një komb, një shkollë, një kulturë, viti 2012.

Brenda e jashtë shtetit ka mbajtur mbi 35 kumtesa, mbi 60 emisione radiofonike e televizive dhe ka botuar mbi 200 shkrime historike.

Ka përfunduar edhe 8 vepra të karakterit historik, të cilat janë në proces botimi dhe një pjesë tjetër janë ende në dorëshkrim.(Informacionin e dergoi per Gazeten “Dielli” Jolanda Lila)

Pëllumb Kulla, me rrëfenja nga ambasada, rikthehet Leka Bungo

April 16, 2013 by dgreca

Drama satirike “Shshsh…ule zërin”, me regji të Leka Bungos, i ka rrënjët gjatë kohës që dramaturgu ishte pjesë e shërbimit diplomatik shqiptar/

Emri i dramaturgut Pëllumb Kulla lidhet në mënyrë të pandashme me skenën e “Bylisit”, por këto tri vitet e fundit vepra e tij ka rikthyer në skenë emra të njohur të skenës që prej vitesh i mungonin publikut. Me komedinë “Milioneri” e shfaqur në fund të vitit 2010, Pëllumb Kulla riktheu në skenën e teatrit një emër të njohur si Luftar Paja, po ashtu dhe Arqile Lipen. “Milioneri”, një komedi që trajtonte përmes satirës problemet e brezit të tretë, të lënë në harresë nga shteti dhe fëmijët e tyre. Komedia u prit me duartrokitje në Fier dhe më pas në Tiranë, ndërsa në Festivalin e Dramës Shqipe që u zhvillua në fillim të 2011-ës, kjo vepër e Kullës rrëmbeu trofe të rëndësishme; çmimin “Drama më e mirë e festivalit” dhe Luftar Paja mori trofeun e “Aktorit më të mirë”. Pas suksesit të “Milionerit”, Kulla rivjen sërish në skenën e “Bylisit” me një tjetër dramë satirë, kësaj radhe edhe si regjisor me pjesën “Dikush duhet të vdesë”. Sërish rikthen në skenë një emër të njohur të skenës së humorit, si Koço Devole. Së fundmi suksesi i Kullës në skenën e “Bylisit” vazhdon me “Shshsh…ule zërin”, me regji të Leka Bungos. “Pas suksesit në teatrin e ‘Bylisit’, kjo dramë do të vihet edhe në Tiranë në skenën e Teatrit Kombëtar të Komedisë javën që vjen”, – konfirmoi dramaturgu Pëllumb Kulla. Kjo dramë satirë, e cilësuar si ndër më të mirat e krijimtarisë së Pëllumb Kullës edhe nga vetë regjisori Bunga, e çon publikun pak vite larg, diku nga ’91, në mjediset e një ambasade. Sapo është përmbysur sistemi komunist dhe një staf me ide “të reja” vjen në ambasadë. Ambasadori i ri në fakt është idealist, beson se mes së mirës dhe së keqes fiton gjithmonë e mira, beson tek e vërteta dhe se gjithmonë drejtësia zë vend. Por kur ai e gjen veten të ngatërruar keqazi në vorbullën e intrigave të zëvendësit të tij (një mbeturinë e së kaluarës), e humb betejën për të ndryshuar gjërat. E djeshmja duket se nuk është shkëputur ende nga e sotmja, aty mes të dyjave përplasen bindjet politike, korrupsioni, mashtrimi, luhet loja e “bërrylave” mes një diplomati që luan gjithmonë ndershëm dhe një zëvendësi që bën gjithçka për ta zëvendësuar derisa ia arrin.

Ambasadori idealist largohet i zhgënjyer. Të gjitha këto të ndërthurura mes tyre shkaktojnë humor situatë pas situate. Vepra përcjell mesazhe të forta në realitetin shqiptar. Të mëson ta kuptosh gjuhën e ligësisë, kur e flasin të tjerët…

Kjo vepër siç thotë Kulla, i ka rrënjët gjatë kohës që ai vetë ishte pjesë e shërbimit diplomatik shqiptar. Por nuk është një histori personale, ajo është historia e të gjithëve.

Me një kastë aktorësh të shkëlqyer, skenari i Pëllumb Kullës dhe regjia e Leka Bungos, janë kombinuar bindshëm për të sjellë në skenë një vepër të realizuar në të gjithë komponentët e saj, rezultat i bashkëpunimit të më të mirëve të skenës. Për të realizuar në skenë dramën satirike “Shshsh…ule zërin”, regjisori Bunga ka zgjedhur gjithaq aktorë të dy brezave; Robert Ndrenikën (Nderi i Kombit), Viktor Zhustin, Astrit Hasanin, Todi Llupin, Arqile Lipen, Fatmir Xhelilin, Shpëtim Shehu,, Miola Sitaj dhe më të rinjtë Klajdi Marku, Julia Ilirjani, Dafina Llupo etj. Robert Ndrenika në këtë ka rolin e një ish-komandanti burgu, ndërsa Viktor Zhusti, të zëvendësambasadorit shqiptar dhe Astrit Hasani, të ambasadorit. Skenografia është realizuar nga Ilir Martini dhe muzika Robert Hoxha.

Rikthimi i Leka Bungos

I rikthehet skenës pas shume viteve mungesë. Aktori dhe regjisori Leka Bungo i është përgjigjur pozitivisht ftesës së kryetarit të Bashkisë së Fierit, Baftjar Zeqo, për t’iu bashkuar stafit realizues të projektit të radhës në skenën e Teatrit “Bylis”. Lidhja e regjisorit me këtë teatër është e hershme. Ai është një ndër themeluesit. Shfaqja e parë “Hijet e natës” me regji të Leka Bungos hapi skenën e ‘Bylisit’, por dhe shumë shfaqje të tjera që pasuan do të mbanin firmën regjisoriale të Bungos, i cili për shumë kohë ishte dhe në krye të Teatrit të Fierit. Leka Bungo rikthehet pas 10 vjetësh në skenën e teatrit që themeloi, me një vepër të mikut të tij Pëllumb Kulla. Të dy jetojnë mes Amerikës dhe Shqipërisë dhe ky është bashkëpunimi i parë mes dy miqve të vjetër, që është pritur ngrohtë nga publiku fierak e që shumë shpejt do t’i prezantohet edhe publikut kryeqytetas.(Kortezi Gazeta “MAPO”)

KONTRIBUTI LETRARO – HISTORIK I DR. SELIM BEQIRIT

April 16, 2013 by dgreca

Nga Albert HABAZAJ/*

Selim Beqiri është një figurë e njohur në botën e shkrimit. Mendimin e tij të shkruar bujarisht dhe me dinjitet shkencor e ka blatuar në Tempullin e Shenjtëruar të Fjalës, ku është pranuar me fisnikëri, sepse e ka merituar. Studiues, doktor i shkencave albanologjike, tash’ e 40 vjet më parë, pjesëmarrës me ligjërata e kumtesa në veprimtari shkencore kombëtare e rajonale, me objekt kryesisht vlerat etnokulturore e atdhetare të Labërisë; me kontribute të vyera për njohjen e vendlindjes, të personaliteteve të ndryshme historikë e socialë, për vlerat morale, vetitë e virtytet e bashkëkrahinorëve të tij; veprimtar i njohur shoqëror, i cili, shfrytëzimin e dobishëm të kohës e ka një nga gjërat më të çmuara – ky telegrafisht ëshët portreti i studiuesit skrupuloz Selim Beqir Beqiri 77 vjeçar, me banim në Tiranë dhe me origjinë nga Tërbaçi i Vlorës, i lindur më 15 maj 1936. Kontributi i tij letraro – historik ravijëzohet në faktin se, me botimet e realizuara është shfaqur si një studiues konsekuent në dy plane: në zbatimin e parimeve të historizmit dhe në respektim të parimeve estetike të letërsisë, duke e gjetur çelësin e suksesit tek ura harmonike që i lidh tezat e tij themelore historike – etnologjike dhe letrare. Paradigma e veprës së tij të botuar është vërtetësia logjike në funksion të qartësisë kombëtare, në trajtë të lokalizuar, si studiues i mirë, si mësues model, si frymëdhënës i arkivave, si atdhetar i vlefshëm.

Konferenca Kombëtare e Studimeve Etnografike / 28 – 30 qershor 1976, organizuar nga Akademia e Shkencave, Instituti i Historisë, Sektori i Etnografisë ishte kuvendi i mendimtarëve të etnokulturës shqiptare. U ligjëruan 53 referate dhe 10 diskutime për kulturën shoqërore dhe kulturën materiale dhe artistike. Krahas korifejve shqiptarë të mendimit me përmasa europiane Aleks Buda e Eqrem Çabej, krahas Mark Krasniqit e Hivzi Islamit nga Prishtina, krahas kualiteteve shkencore shqiptare Stefanaq Pollo, Zija Xholi, Alfred Uçi, Jup Kastrati, Rrok Zojzi, Qemal Haxhihasani, Zihni Sako, Ismet Elezi, Kristo Frashëri, Aleks Luarasi, Spiro Shkurti, Mark Tirtja, Skënder Anamali, Ramazan Bogdani, Viron Koka, Abaz Dojaka, Gjovalin Shkurtaj, Andromaqi Gjergji, Afërdita Onuzi, Yllka Selimaj, Ikbal Bihiku, Llambrini Mitrushi, Beniamin Kruta, Emin Riza, Liviu P. Marcu nga Rumania, Ligor Mile, Jorgji Gjinari, Selami Pulaha, Agron Fico, Koço Nova, Pandi Geço, Fiqiri Haxhiu, Bajram Mejdiaj, Shyqyri Ballvora, Nexhmedin Luari, Hulusi Hako, Zija Shkodra, Riza Drishti, Piro Thomo, Koço Zheku, Vasilika Cicko, Kristaq Angjeli, Edmond Luçi, Naum Guxho, Nimete Qarri, Dhorka Dhamo, Andon Kuqali, Tefik Caushi, Aleksandër Dhima, Nikollë Gjoni, Sami Ferizi, Haxhi Goci, Kahreman Ulqini, Iljaz Kaçaj, Fadil Mehmeti, Henrik Mikopli, Riza Drishti e Dilaver Kurti, tërhoqi vëmendjen e studiesve shqiptarë dhe të huaj dhe referati shkencor i Dr. Selim Beqiri për BESËN, i cili është botuar në vëllimin me materialet nga Konferenca Kombëtare e Studimeve Etnografike, Tiranë, 1977, f.275 – 280.

Për kontributet atdhetare e shkencore dhe për virtytet shembullore si njeri, që edukon me veprim e me shembull vetiak në jetë, Selim Beqiri u vlerësua nga Shoqata Atdhetare Mbarëkombëtare “Labëria” me dekoratën më të lartë që kjo shoqatë jep “Personalitet i shquar i Labërisë”. Mësuesi veteran dhe studiuesi koherent S. Beqiri, ashtu i thjeshtë, si e vërteta, shumë korrekt, i pashfaqshëm, i pabujshëm, larg mburrklave e tullumbaceve të fryra me lavdi inekzistente, me një disiplinë shembullore në punën e tij kërkimore – shkencore po i bën një shërbim të madh kulturës së vendlindjes, të Lumit të Vlorës e Labërisë dhe mbarë etnokulturës shqiptare. Selim Beqiri: me librin më të ri “Humor dhe mençuri, Legjenda e Simbole Trimërie Tërbaçiote”- pjesa mbi ujë e ajsbergut: “Krijimtaria popullore tërbaçiote” fantazi, humor, fragmente simbolesh nga këngë epiko – historike po nxjerr në dritë thesare nga miniera e pasur e krijimtarisë dhe trashëgimisë shpirtërore të popullit tone në rrjedhat e kohës. Nuk kam ndërmend të shkruaj për monografitë e tij aq të mirëpritura: për “Gjeneralin fisnik”, as për atë në nderim të bujarit – Resul Veliu,- që ka përmasat e një heroi vërtet vigan të Lirisë, as për “Banën” – kushtuar njërës nga trimëreshat e Tërbaçit, nënë Rabihanës së bardhë e të rrallë, as edhe për të veçantin libër – “Trashëgimia”, ku përfshihen dy pjesë: “Besa dhe besëlidhjet” dhe “Tërbaçi – Fjalorth historiko-gjeografik”, as për traktatin historik, edhe pse vetëm me 113 faqe kërkimore – shkencore-“Si u krijua e si mbijetoi Tërbaçi”, as për monografinë “Luftëtar brez pas brezi – Merkoselimajt”, të cilat autori i quan punime modeste edhe pse ato kanë sinqerisht vlera të çmuara kulturore e në respekt të zakoneve më të mira e të traditës së vyer që kemi trashëguar deri më sot. Është një botim i ri dhe pikërisht libri: “Humor dhe mençuri, Fantazi e Simbole Trimërie tërbaçiote” që të thotë: NDERO VETEN! Sipas Fjalorit Enciklopedik Letrar me krijimtari popullore ose folklor kuptojmë veprat poetike e tregimtare të krijuara nga autorë popullor anonimë, që kanë kaluar gojë më gojë. Mund të përkufizohet shkurtazi letërsi gojore e popullit…Të krijuara që në kohërat e lashta, ato kalojnë me anë të rapsodëve, bardëve dhe secili prej tyre i plotëson ose i ndryshon. Vetvetiu buron një krijimtari e motivuar tek autori, sepse gjeografia e krijimtarisë është pikërisht treva jonë e dashur tërbaçiote, libri është një “dritësi flake”, në qoftë se mundem të përdor një shprehje nderimi burimore të poetit të njohur lab Agim Shehu.Do të mjaftonte ky libër që Selim Beqiri të quhet një gjurmues, vjelës e studiues cilësor i kësaj veprimtarie krijuese, që e ka mbajtur të gjallë, të freskët e të shëndetshme shpirti i artë popullor.Jam munduar të jem sa më pak, mundësisht, por e pamundur aspak subjektiv, në vlerësimin tim për profilin e autorit. Ky botim është një gur qosheli në ndërtesën e historiografisë shkencore, gjuhësore, letrare e historike të Tërbaçit, sepse plotëson një zbrazëtirë të ndjeshme në kulturën e shkruar. Autori nuk është një regjistrues emocional i materialit argumentiv kulturor, por edhe vlerësues objektiv e kritik i tyre dhe model për t’u ndjekur nga disa shkrues hapaçelë, që edhe në malore i fusin të pestin me botimet e tyre. Me botimin e dhjetë legjendave të dëgjuara e me jehonë, me ato relikte të çmuara mbijetese, shpalosen vlera me interes për fushën etnofolklorike-tërbaçiote…Humori miqësor që ka përzgjedhur autori në këtë libër është si sherbet për bakllava, ndërsa ato pakëz këngë të zgjedhura popullore, me motive trimërie, janë tamam si ato hojet e mjaltit nga kosherja e gurrës popullore, aq gjëmimtare sa vetë emrat lavdimëdhej të bijve viganë të Tërbaçit tonë me nderim sa dielli. Punimet dhe botimet e Selim Beqirit pasurojnë antologjinë e poezisë gojore shqiptare; kopështit të lulëzuar të prozës popullore i shtojnë fidanë të gjelbër dhe të shëndetshëm dhe i ndrisin si gjerdan I bukur për gushe Etnologjisë së Vendit të Shqipeve.

*) Ne Foto: Albert Habazaj. Drejtor i Bibliotekës “ Nermin Vlora Falaschi”,

Universiteti “Ismail Qemali” Vlorë, ALBANIA

SHKOLLAT SHQIPE ME MËSIM PLOTSUES NË GJUHËN SHQIPE NË GJERMANI

April 15, 2013 by dgreca

NGA SHABAN CAKOLLI/

NE FOTO: NJË GRUP MËSUESISH SHQIPTARË NË GJERMANI/

Shkollat shqipe me mësim plotësues përfshijnë në gjirin e vet fëmijët e familjeve të mërgimtarëve shqiptarë,që nga mosha 6-16 vjeç dhe i arsimon dhe edukon ata në frymëne patriotizmit shqiptar,me njohje kulturore e shkencore dhe bukurive estetike. Shkollat shqipe në Gjermani kanë për qëllim që fëmijët shqiptarë të zotrojnë mirë gjuhën e shkruar amtare shqipe,të kultivojnë atë dhe letërsinë shqiptare,të njohin historinë dhe gjeografinë etnike të vendit të të parëve të tyre,njohurinë rreth dokeve e zakoneve shqiptare,arteve popullore të trashëguara brez pas brezi si karakteristikë e lashtë dhe e begatshme,dalluese e kombit tonë.

Shkolla shqipe e mësimit plotësues i edukon nxënësit për respektin dhe mirënjohëjen ndaj vendit mikpritës që i strehoi në gjirin e vet,u hapi vend në integrimin e shoqërisë gjermane,duke i pajisur menjohuri shkencore e kulturore dhe i pregaditi të aftësohen të pavarur edhe në gjuhën e tyre.Shkollat shqipe në Gjermani kanë për qëllim t’i përfshijnë të gjithë fëmijët shqiptarë,në çdo land ku ndodhen duke përfshirë fëmijët e të gjitha trojeve etnike shqiptare.Struktura e arsimimit ndahet në tre cikle: Cikli i ulët,i mesëm dhe i lartë. Mësimi vendevende zhvillohet me klasë të kombinuara. Shkollat shqipe në Gjermani mësojnë sipas plan-programeve mësimore të Ministrisë së Arsimit të Kosovës,dhe teksteve mësimore të miratuara nga ajo.:Mësuesit që punojnë në këto shkolla kanë kualifikime përkatëse pedagogjike.

Në kuadër të saj funksionon biblioteka e shkollave e cila pajiset me literaturë shqipe dhe ate të vendit.Zanafilla e shkollave shqipe në Gjermani është tridhjetë vjeqare,ne shkurtimisht po flasim nga koha kur shkolla jonë shqipe në Gjermani shkëputet nga varësia e organeve Jugosllave. Meformimin e Qeverisë së Kosovës, në mërgim formohet edhe Ministria e Arsimit,Shkencës dhe Kulturës paralel me te edhe KASH”NaimFrashëri”.

Këto dy hallka kanë krijuar kushte për organizimin e rrjetit të shkollave shqipe të mësimit plotësues në Gjermani. Përndjekjet e viteve të 90-ta,si dhe Lufta e Kosovës që u shoqërua me dramën e madhetë ekzodit biblik të shqiptarëve, preku Gjermaninë me një numër të madh strehimkërkuesish shqiptarë,ku shënime gjysmëzyrtare flisnin për 400.000 shqiptarë të strehuar këtu,andaj nevoja e zgjërimit të shkollave shqipe ishte domosdoshmëri në çdo Land gjerman. Në të gjitha këto drejtime shkolla shqipe fitoi një përvojë të madhe. Shkollat shqipe në

synimin e tyre që nxënësit shqiptarë të ruajnë,mësojnë dhe përsosin gjuhën shqipe,të aftësohen për shfrytëzimin e gjitha formave të komunikimit me të folur e shkruar,të njihen me atdheun dhe shtrirjen gjeografike të tij ,me historinë,dhe aspiratat e përpjekjet e popullit shqiptarë për liri,pavarësi dhe përparim.,të kultivohen dhe zhvillohen aftësitë në fushat e artit,letërsisë,muzikës dhe formave tjera të krijimit artistik.Ata shfrytëzojnë kohen e lirë për aktivitetet krijuese dhe shënojnë festat kombëtare me manifestimet etyre krijuese e artistike,po ashtu kanë gatishmërinë për arritjen e sukseseve edhe në shkollën e rregulltë gjermane.Përvoja ka treguar se nxënësit që kanë ndjekur mësimin plotësues shqip,janë treguar më të zellshëm edhe në shkollën e rregullt gjermane, sot prej tyre kanë dalur edhe kuadro të forta. Nxënësit shqiptarë që shkollohen në shkollën e rregulltë gjermane dhe vijojnë mësimin shqip, janë një faktor shumë me rëndësi i integrimit të shqiptarëve në Evropën e Bashkuar. Këta nxënës nga gjitha Landet gjermane,nganjëherë në vit organizojnë kampionatin e diturisë,ku bëhet garë njohurishë cila nga shkollat shqipe në Landet gjermane zë vend të rëndësishëm në dituritë e gjitha lëmive mësimore,etj…

Të rrëfesh për shkollat shqipe në Gjermani,nuk do mund të e përmbyllësh me një shkrim gazetash: Për te mësuesit e vyeshëm kanë shkruar monografi,si: Sejdi Gashi, Rifat Hamiti, Sami Thaqi, Bejtullah Sadiku, Hamzë Halabaku,Nysret Dërguti,e shumë të tjerë. Shkolla shqipe në diasporë është faktor i pa zëvendësueshëm në arsimin dhe edukimin kombëtar të nxënësve mërgimtarë.

Mospërdorimi i gjuhës amtare nga kjo masë e madhe rinore në mërgim, mosnjohëja e historisë kombëtare, mosvijimi i shkollës shqipe patjetër i hap rrugën asimilimit.

KANUNORJA FEDERATES PANSHQIPTARE TE AMERIKES “VATRA”

April 14, 2013 by dgreca

NE NDIHME TE VATRANEVE NE PRAG TE KUVENDIT/

QËLLIMET E FEDERATES/

Shenim: Eshte ngritur nje komision pune qe po studion mundesine e aktualizimit te kesaj Kanunoreje, pa prekur frymen dhe parimet e saj. Jane disa juriste, anetare te Vatres, qe po terheqin edhe mendimete vatraneve dhe te degeve, me qellim qe ne Kuvend te diskutohet dhe te miratohen me votim. Kush ka mendime, propozime, vrejtje te lidhet me drejtuesin e ketij Komisioni, z. Bashkim Musabelliu dhe t’ia percjelle me shkrim mendimet. Emaili I z. Musabelliu: musabeu@yahoo.com/

***

Kjo Federatë u themelua dhe u vendos për këto qëllime dhe me këtë
program:
Nyje 1. Të rritë në mes Shqiptarëve të Amerikës dhe me anë të tyre në
mes Shqiptarëve të Shqipërisë shpirtin e ndihmës në mes tyre dhe të
dashurisë për kombësinë e tyre me konferenca popullore dhe botimesh.

Nyje2. Të rritë mes tyre nderimin dhe dashurinë për kanunet dhe
institutat e SHBA edhe të forcojë marrëveshjet e miqësisë mes qytëtareve
amerikanë dhe Shqiptarëve.

Nyje 3. Te përkrahë mësimin e gjuhëve inglishte dhe shqipe dhe të
përhape në mes Shqiptarëve të Amerikës stërvitjen dhe doktrinat morale.

Nyje 4. Të ndihë moralisht për përmisimin e anëtarëve të Federatës edhe
të mprojë sa të mundë immigrantët dhe punëtorët shqiptarë.

FRYMA E FEDERATES

Nyje 5. VATRA nuk duhet të merret me politikë.

ANETARET

Nyje 6. Cdo Shqiptar prej soji që rron në SHBA, që është 18 vjec e
lart, që ka sjellje të mirë dhe që është normal nga mendja munt të
kërkojë të bëhet anëtar i VATRES.

Nyje7. Një njeri që beson në përmbysien e Qëverisë Amerikane me mjetë
revolucionare ose kriminale, ose të pakanunëshme në cdo mënyrë që të
jetë nuk pranohet si anetar i VATRES dhe ne qoftëse ka qëne pranuar nga
lajthtia or mosdija e zyrtarit emeri i tij do të shuhet nga lista e
anëtarve.

Nyje 8. Nje njeri që ka marredhenie me revolucionare, që i përkrah keta
me para ose me artikuj ose me me konferenca ose me cdo menyre tjetër nuk
pranohet si anetar i VATRES edhe sikur të jetë nje njeri i ndershem e i
urtë dhe faji i tij të jetë vetëm nje faj moskuptimi. Neqoftëse nje
njeri i tille u pranua me pare si anetar i VATRES do shuhet nga lista e
anetareve.

Nyje 9. Nje njeri sado i ndershëm të jetë, ne qoftë se ka zakon të
kundershtojë kurdoherë, të grindet e të shaje zyrtaret e Federatës dhe
me sjelljen dhe fjalen e tij të ftohtë e të largoje njerzit nga VATRA
dhe t’a kllase shoqërine ne harxhe duke shumëzuar e duke zgjatur
mbledhjet , nje njeri i këtille nuk pranohet si anetar; ose në qoftëse u
pranua do të shuhet nga lista antareve.

TE ARDHURAT

Nyje 10. Te ardhurat e VATRES jane : a) Nga këstet e përmotcme , numeri
dhe shuma e kësteve duke u caktuar cdo mot nga Kuvendi i VATRA , atëhere
kur Kuvendi nuk i ka caktuar vazhdohet sistëmi i motit që dolli.

b) Nga botime (libra dhe gazeta)të VATRES.

c) Nga dhurata vullnetare prej anetaresh ose miqsh të jashtëm të VATRES.

ZYRTARET

Nyje11. Zyrtare e VATRES jane; Nje Kryetar, nje Sekretar, nje Arketar,
edhe katër Kontrollore. Keta zyrtare të bashkuar dhe formojnë një
Komission të Qëndres dhe zgjidhen për nje mot nga Kuvndi i VATRES ,
kuvënt i cili eshtë nje mbledhje e përmotëhsme e mbajtur nga Delegatët e
Degeve të VATRES.

DETYRAT DHE TE DREJTAT E KOMiSiONiT.

Nyje12. Komissioni organizon Deget, i pranon ne Federatë, ose i heq nga
lista e Federatës ne qoftë se nuk i binden Kanunores dhe regulores se
VATRA ose porosive të Kuvendit ose vendime të Komisionit.

Nyje 13 . Komissioni emëron dhe pushon nga puna axhentë , konferencierë,
dhe të tjere përfaqësojnes ose delegatë të Vatrës, si pas nevojes, me
rroge ose pa rroge.

Nyje14. Komisioni kqyr hesapet e Federatës, cdo katër muaj dhe me ane të
Kryetarit e të Arketarit boton ne Bulletin zyrtar të Federatës e të
hyrat ne Arkën qëndrore të shoqërise.

Nyje 15 Komisioni me ane të Kryetarit ve ne veprim vendimet të votuara
ne Kuvent dhe përkrah Kryetarin për të mbaruar detyrat e tij ne kufi të
Kanunores dhe Rregullores.

Nyje 16. Komisioni mblidhet të paktën 6 here ne mot; Ne qoftëse se
Kryetari e gjykon të nevojshme , Komisioni mund të mblidhet dhe me
dendur.

Nyje 17. Thirrje për mbledhjen të Komisionit i ben Kryetarit i cili
cakton ditën dhe oren e mbledhjes.

Nyje18. Katër Anetare të Komisionit po ta shohin të nevojshme , mund ti
kerkojen Kryetarit të therrese ne nje mbledhje ekstraordinare të
Komisionit. Kerkimi duhet të behet me të shkruar dhe duhet të cfaqë
ckoqur arsyet për cilat desherohet mbledhja ekstraordinare.

KRYETARi i Vatrës

Nyje19. Komisionin dhe kryesisht tëre Vatrën e kryeson Kryetari i
Vatrës.

Nyje 20. Kryetarin e Vatrës e zgjedh Kuvendi i Vatrës dhe vetëm nje
Kuvend i Vatrës mund ta nxjerre.

Nyje21. Kryetari gati dhe shtron përpara Komisionit cdo pune me
rendesi, vecan ben harxhe dhe për ndodhjen e Degeve.

Nyje22. Kryetari ne fund të motit me ndihmen e Komissionit i jep
Kuvendit hesap për harxhet dhe për veprimet e Komisionit.

SEKRETARi

Nyje 23. Sekretari i Qëndres eshtë i dyti zyrtar i Vatrës , ze vendin e
Kryetarit kur ky eshtë i larguar, mban deftëre e qënderes dhe
korrespondencen me Deget dhe me anetaret dhe përsonat e jashtme, mban
rekordet e mbledhjeve të Komisionit, mban Arshivat, kycet e zyrave dhe
të Arkes.

ARKETARi

Nyje 24. Arketari iVatrës mban fondet e Federatës, për të cilat eshtë
përgjegjes. Te gjitha sa suma merr duhet ti depozitoje që atë të ditë
ne Banken e zakonshme të shoqërise. S’ka të drejtë të mbaje me tëpër se
qint dollare.

Nyje 25. Arketari ben pagesat e vendosura nga Kuvendi ose Komisisoni.
Cdo pagese behet me ceke të cilat vertëtohen me nenshkrimin e Kryetarit
dhe të Arketarit bashke.

Nyje26. Arketari gati hesapet e katërmuajshme për Komissionin dhe
hesapet e përmotshme për Kuvendin.

KONTROLLORET

Nyje27. Kontrolloret duhet të ndodhen ne cdo mbledhje të Komissionit,
vec në qoftë se ndalohen nga semundja ose nonje shkak të papritur.

KUVENDi

Nyje 28 Kuvendi i Vatrës mblidhet nje here ne mot dhe përbehet nga
delegatët e cdo Dege të njohur të rregullushme nga Komissioni dhe e cila
të ketë numrin e duhur anetaresh.

Nyje 29 Vendin dhe Kohen e Kuvendit e cakton Kuvendi i meparshem, ose
neqoftë nje nevoje e shtërnguar e cakton nje votë e kerkuar dhe e
derguar me postë nga Pleqësia e Degeve. Në qoftë se se as Kuvendi i
shkuar ka caktuar gjesendi as Deget kane dhene leje për nje caktim,
kuptohet se Kuvendi do të mbahet ne Boston ne javen e pare të korrikut.

Nyje 30 Delegatët ne Kuvend s’mund të pranohet vec se nje njeri që ka
qëne anetare i rregullt të paktën dy vjet dhe ka paguar të paktën
gjashtë kestët e fundit.

Nyje 31. Prova, ne eshtë Delegati nje anetar i rregullshëm ne dy vjetët
e fundit, do ti kerkohet ne Arshivat e Vatrës.

Nyje 32 Nje anetar i rregullshëm për me tëpër se dy vjet , në qoftë se u
largua nga Amerika fiton të drejtat e nje anetari të vjetër posa paguan
dhe shkruhet përseri anetar që muajin e pare që kthehet ne Amerike.

Nyje 33. Nje anetar i rregullut i semur ne nje spital vazhdon se qëni
anetar i Vatrës pa paguar sa ndodhet ne spital, po e humbet anetarsine
posa del nga spitali në qoftë se s’ paguan kestin se afërm.

Nyje 34 Kredencialet e Delegatëve të Kuvendit i kqyr Kryetari me
Komisionin ne Zyrat e Vatrës para se të hapet Kuvendi dhe i vertëton
sit e rregullshme ose të pafuqishme.

Delegati , ne mos u pranoftë duhet t’i bindit ketij vendimi të paktën si
mase provizore dhe ka të drejtë ti kerkoje Kuvendit i cili munt të
përmbus vendimin e Komisionit.

Ankimi mund t’i behet Kuvendit me të shkruar dhe Delegati i papranuar
mund të thirret nga Kuvendi që të shtroje shpjengimet e tij; po nuk
mund të hyje ne Kuvend i pautorizuar, dhe cdo hyrje me pahir nga ana e
tij do të denohet heqjen e anetarsise si nje turbullonjes dhe shkeles
i rregullave dhe si nje njeri i paqytëtëruar.

Nyje 35 Chairman i përkohshem i Kuvendit eshtë Kryetari i Vatrës, i cili
e hap Kuvendin me nje fjalim ku përmbledh veprimet e Federatës. Pastaj
me vota te hapura zgjidhet Chairman-i i regullt i Kuvendit dhe pas
ketij Sekretari dhe Reportëri i Kuvendit.

Nyje 36 Ne Kuvend merr pjese dhe Komisioni i Vatrës i cili s’ ka votë
dhe mund të marre pjese ne bisedime vetëm për të dhene shpjegime.

Nyje 37 Kuvendi shikon hesapet dhe veprimet e vitit të shkuar , ben
hetime, pyet Kryetarin dhe anetaret e tjere të Komisionit dhe pastaj
voton pelqimin dhe mospelqimin e hesapeve dhe të veprimeve.

Nyje 38 Kuvendi pasi ben vendime ose ndryshime për vitn e ardhshem ,
zgjedh Komisisonin e ri , i cili shtron nje buxhet për bisedim dhe
miratim përpara Kuvendit.

DEGET

Nyje 39 Vatra përbehet nga Dege të ndryshme të cilat nuk quhen pjese të
Federatës ne qoftë se nuk i ka njohur ose nuk i njeh Komissioni.

Nyje 40 Deget duhet të jene plotësisht të bindura të Komissioni; kane të
drejtë të kundershtojne Komisionin përpara Kuvendit me ane të Delegatit
të tyre dhe asnje me menyre tjetër.

Nyje 41 Nje dege përbehet prej nje Kryetari, nje Sekretari , nje
nen-sekretari, nje arketari dhe tre kontrollorësh.

Nyje 42 Cdo Dege , posa njihet nga Komisioni i Vatrës , merr nje vule ,
dy deftëre ( njerin për rekordet , tjetrin për për listën e anetarve),
dhe forma deftësash. Duhet kuptuar mire që të gjitha keto gjera të cilat
Dega i merr pa paguar, jane malli i Federatës, dhe duhet t’i kthehen pa
bisedim Komisionit të Vatrës kur Komisioni i kerkon prape qoftë sepse e
përjashtoi Degen nga Federata, qoftse sepse deshiron t’i inspektoje.
Dega pastaj mund të ankohet Kuvendit dhe t’i marre të drejtat e saj në
qoftë se jane shkelur nga Komisioni. Po për të kthyerit e mallit të
Federatës s’mund të ketë bisedim.

Nyje 43. Deget mbajne dy mbledhje ne vit, njeren për të bere hesapet e
për të zgjedhur pleqësine, tjetren për të zgjedhur nje Delegat ne
Kuvend.

Mbledhje të tjera mund të behen ne qoftë se pleqësia ose nje shumice
anetaresh deshirojne. Mbledhja duhet të parelajmerohet të “Dielli” të
paktën nje jave me pare , dhe ka fuqi që heren e pare sado pake anetare
që ne qofshin.

BOTiMET E Vatrës.

Nyje 44 Vatra boton “Diellin” nje gazetë qëllimi i se ciles eshtë t’ju
jape anetarve lajme dhe ti informoje përgjithesisht.

Nyje 45 Fryma e gazatës do jetë përparimtare por antirevolucionare.

Nyje 46 Editori dhe ndihmesit e tij zgjidhen nga Komisioni. Neqoftëse do
të jetë e nevojshme nje zyrtar i Vatrës mund të jetë edhe Editori i
“Diellit”.

Nyje 47 Reklamat për gazetën , pranohen sipas kufirit të vendit me
pagese të caktuar nga Komisioni. Pelqimi a refuzimi i reklamave lihet
ne doren e manaxherit.

RROGAT, PAGESAT DHE TE ARDHURAT

Nyje 48 Cilët zyrtarë, delegatë, konferencierë, ose punetore të Vatrës
do të marrin rroge ose shpërblim, dhe sa do të jetë rroga ose
shpërblimi , e voton me imtësi Kuvendi ne buxhetin e zakonshem.

Nyje 49 Komisioni ka fuqi për të harxhuar shuma të vogla të pavotuara
ne buxhet , Neqoftëse Komisioni vendos me zera të përgjithshem.

Nyje 50 Cdo pagese e bere nga Vatra behet me cek të firmosur nga
Kryetari dhe Arketari..

Nyje 51 Cdo deftëse e dhene nga Vatra për para të marra shenohet nga
Sekretari dhe nga Arketari.

MARREDHENiET E QËNDRES ME DEGET

Nyje 52 Cdo Dege duhet ti bindet Qëndrës gjer ne Kuvendin e ardhshem.

Nje Dege s’ka të drejtë të kritikoje ose të friksoje ne mes të motit
Kryetarin ose Komisionin me artikuj, mbledhje, rezoluta ose qarkore.

Nyje 53 Cdo dege mund të keshilloj dhe ti ankohet Komisionit, pos ka të
drejtë të kerkoje botimin e cdo gjeje që dergon ne Qëndër.

Nyje 54 Raportët e mbledhjeve të Degeve botohen ne organet Vatrës , po
raportët s’duhen të kene fryme polemike, as duhet të kene qëllim të
goditin tëthori vendimet e Kuvendit.

Nyje 55 Qëndra e mabn kontaktin me Deget me ane të Bulletinit zyrtar të
botuar të “Dielli”dhe me ane qarkoresh.

REGULLiME TE NDRYSHME

Nyje 56 Cdo delegat i regullshëm i derguar ne Kuvend ka 1 votë për 15
gjer ne 30 anetare që përfaqëson; ka 2 vota për 41 gjer 70 anetare
qëpërfaqëson; ka 3 vota për 71 gjer 100 ; ka 4 vota për 101 gjer 130
anetar dhe 1 votë me tëpër për cdo 30 anetare me shume se 131 e lart.

Nyje 57 Numëri i anëtarve për të caktuar delegatët zgjidhet duke marre
numrin mesatar të tri kestëve të fundit sipas pageses që eshtë bere ne
Arken e Qëndres . Per shembull, Neqoftëse nje Dege pati 15 anetarë ne
këstin e Qërshorit, 25 anetarë ne këstin e Tetorin, dhe 110 anetarë në
këstin e shkurtit, që bejne tëresisht 150 vota në vit, duke ndare numrin
150 me 3 gjejme 50, dhe pas ketin numeri të mesme Dega ka aq vota sa i
jep numeri 50.

Nyje 58 Anetaret e Vatrës mbajne kopsen të caktuar që ne fillim të
pranimit si anetarë. Kur s’janë anëtarë nuk kanë të drejtë ta mbajnë
kopsën.

Nyje 59 Nje anetar që shkel rregullat e shoqërise ose punon kunder
frymes se saj ose me sjelljen e tij pakeson rendesine e shoqërise, dega
e tij e heq anetarsinë pasi i kërkon shpjegime ne një mbledhje të Deges.
Anetari munt të qahet te Komissioni, dhe vendimi i Komisionit do jetë
përfundimtar.

Nyje 60 Nje anetar i padesherushem për arsyet e numeruara ne artikullin
59 mund të shtyhet nga Komisioni i Federatës Neqoftëse Dega ka vonuar të
beje detyren e saj ose nuk ka patur mjaft informata për ta shkarkuar
anetarin si pjesetar të shoqërise. Ky vendim i komunikohet Deges nga
Qëndra me ane të të Organit të VATRA. Anetari ka të drejtë të qahet me
ane të nje delegatë të ankohet ne Kuvend për masen e Komisionit.

Nyje 61 Komisioni ka të drejtë të pakufizuar të pezulloje cdo Dege që
shkel nje ose me tëpër nyja të Kanunores.

Nyje 62 Cdo anetar i Vatrës eshtë i detyruar të rregjistrohet ne Degen e
qytëtit ku eshtë vendosur me përjashtim të caktuar ne Nyjet 63 dhe 64.

Nyje 63 nje anetar që rron ne nje qytët ku s’ka Dege mund të shkruhet
anetar ne Degen e të përndareve

Nyje 64 Zyrtarët dhe punetorët e Qëndres mund të shkruhen nese kane
deshirë anetarë ne Degen e të Perndareve , që të shpetojne nga
influencat locale. Kur dalin mga puna mund të vazhdojne të jene anetare
të Deges se të Perndareve.

Nyje 65 Dega e të Përndarve ka për pleqësi Komissionin e Vatrës dhe ka
Arshiva dhe vule si deget e tjera.

Nyje 66 Dega e të Përndarve dergon si Degët e tjera Delegatë ne Kuvend.
Delegati zgjidhet nga Komisioni i Vatrës.

Nyje 67 Ne mbledhjen e Kuvendit, Komisionit e të Degëve, vazhdohen
rregullat e zankoshme të mbledhjeve ne Amerike si për zgjedhje e nje
Chairmain, për të drejtat e Chairmanit të jape dhe prese fjalen dhe të
përzere për ca kohe ose përgjithnje nje trubollonjes të mbledhjes, për
rendimin e votës nga shumica e të tjera. Po në qoftë se nje nyje e
Kanunores dhe Rregullores të caktojne ndonje pike ndryshe, Kanunorja dhe
Rregullorja ka fjalen e fundit.

Nyje 68 Nje anëtar që eshtë denuar për sjellje të liga prej Qëndres ose
prej Degeve mund të pranohet si anëtar me dy të tretat e votave., por
nuk ka të drejtë si zyrtar i Deges, zyrtare i Qëndres ose Delegatë
Kuvendesh për dy vjet të paktën.

Nyje 69 Vatra duhet të ketë nje liber nderi net e cilin shenohen emrat e
zyrtareve të Degeve dhe emrat e gjithe atyre që sherbejne moralisht.
Kohe pas kohe ose ne cdo kest të botoje veprimet e zyrtareve të cdo
Dege, shtimin ose pakesimin e anëtarve dhe shkakun e shtimit ose
pakesimit të anëtarve.

Nyje 70 Te gjitha raportët e Degëve dhe zedheniet duhet ti drejtohen
Sekretariatit të Qëndres dhe botimi i tyre të jetë ne përgjegjesine e
Sekretarit dhe jot e Editorit.

Nyje 71 Cdo botim që i përket Degeve duhet të botohet me marreveshjen e
Sekretarit dhe Editorit.

Nyje 72 Neqoftëse se Sekretari me editorin nuk zgjedhin dot botimin e
ndonje raporti ose ndonje artikulli kjo do ti shtrohet Komisionit, me
kusht që kur bisedohet duhet të marre pjese editori.

Nyje 73 Cdo njeri që pranon të jetë anetar i Vatrës zotohet ti bindet
Kanunores dhe Rregullores pa asnje diskutim

Nyje 74 Nje Delegatë mund të përfaqësoje gjer tri Dege, duke bashkuar
votat. Po votat e mbledhura s’duhet të kapërcejne 3 vota.

Nyje 75 Gratë shqiptare mund të pranohen anetare të Vatrës me të gjitha
të drejtat që kane anetarët e tjere.

Nyje 76 Studentët e vërtetë(“ bona fide students”) paguajne gjysmen e
cdo kesti

Nyje 77 Cdo ndryshim i bere ne Kanunore dhe Rregullore prej nje Kuvendi
mund të behet vetëm me pelqimin e dy të tretave të votave të
përfaqësuara ne Kuvend.
Nyje 78 Kjo Kanunore dhe Rregullore u votua nga Deget e Vatrës ne
Vjeshtën e Dytë 1926
Nyje 79 kjo Kanunore dhe Rregullore do të përkthehet e do shtypet edhe
ne gjuhen inglisht dhe nje kopje do ti depozitohet ne autoritetet e
Shtetit të Massachusetts.