Klubi Flas Shqip dhe Vatra Miami organizuan mbrëmjen më të madhe festive të Diasporës Shqiptare në South Florida, me rastin e Festës Kombëtare të 28 Nëntorit. Më shumë se 180 të ftuar u mblodhën në sallën madhështore të Marriott Hotel, ku shqiptarë nga të gjitha trevat—nga Shqipëria, Kosova, Çamëria, Maqedonia —festuan së bashku këtë ditë të shenjtë të kombit. Qershia mbi tortë ishin fëmijët e Klubit Flas Shqip. Ata hynë në sallë me himnin e klubit, “Fol shqip se je shqiptar”, duke sjellë emocion të veçantë për të gjithë të pranishmit. Më pas, ata recituan dhe kënduan këngë patriotike, duke na kujtuar se ardhmëria e gjuhës dhe traditës sonë është në duart e brezave të vegjël.

Në fjalën e saj, Dr. Iris Halili, Kryetare e Vatra Miami dhe njëherësh themeluesja dhe drejtuesja e Klubit Flas Shqip, theksoi me krenari se këto dy organizata janë sot ndër më të rëndësishmet në komunitetin shqiptar të Florida-s së Jugut. Ajo nënvizoi se kontributi i tyre është i prekshëm në komunitet, pasi Klubi Flas Shqip u jep mësim falas rreth 70 nxënësve nga Miami, Broward dhe West Palm Beach, por ai është dhe kulturor e identitar —duke qenë pranë komunitetit me një mision të qartë: ruajtjen e gjuhës shqipe dhe trashëgimisë sonë kulturore.

Ajo theksoi se gjuha shqipe është kombi, është lidhja jonë e përjetshme, forca që na bashkon kudo ku jemi, arma me të cilën kemi ditur të mbijetojmë shekujsh. Prandaj ruajtja e saj në emigracion është detyrë, nder dhe amanet brezash. Një nga momentet më të bukura të mbrëmjes ishte edhe ekspozita artistike e fëmijëve të Klubit Flas Shqip. Të frymëzuar nga figurat dhe simbolet kombëtare, ata kishin përgatitur piktura ku Skënderbeu, Ismail Qemali, Shote Galica, flamuri kuq e zi dhe kostumet tradicionale shfaqeshin me një mjeshtëri të veçantë. Të pranishmit i blenë me shumë dëshirë këto punime të vogla artistike dhe të ardhurat shkuan të gjitha për mbështetjen e Klubit Flas Shqip. Ky aktivitet i bëri fëmijët të ndihen krenarë, të njohin më thellë motivet tona kombëtare dhe të përjetojnë gëzimin e kontributit për “shtëpinë” e tyre të përbashkët, Klubit Flas Shqip.

Të pranishmit patën kënaqësinë të merrnin edhe një përshëndetje nga Shqipëria, pikërisht nga miku i vogël i Klubit Flas Shqip, 6-vjeçari Sikan Salaria, nga fshati Salari në Labëri. Ai recitoi me emocion vargjet “O flamur gjak, o flamur shkabë” të themeluesit të Vatrës Imzot Fan Noli. Kënga “Mora fjalë” ngriti në këmbë çdo të ftuar, duke e shndërruar sallën në një det emocionesh. Flamuri i kuq me shqipen dykrenare u valvit nga duart e fëmijëve të vegjël dhe të të rriturve, duke rikujtuar se legjendat mbeten legjenda sepse jetojnë në këngë, në kujtesë dhe në zemrat e njerëzve—ashtu si qëndron përjetë i gjallë në këngë dhe histori heroi Adem Jashari. Pikërisht ky është modeli që duhet t’ua lëmë brezave:Ai që vdes për atdhe, jeton përjetë. Ai nderohet, përmendet dhe është i pranishëm në çdo festë kombëtare.

Festa e Flamurit është, para së gjithash, një përulje ndaj këtyre figurave të sakrificës dhe një nderim për gjithë shqiptarët e mirë që, kudo që jetojnë, e mbajnë flamurin e Skënderbeut me dinjitet, unitet dhe krenari.

Një falënderim të veçantë morën sponsorët që mbështesin misionin tonë:

Allyssa’s Bakery, me President Doug Saraci, sponsori gjeneral

Four Cousins Diner LLC.

Cucina Restaurant

dhe të gjithë miqve që qëndrojnë pranë nismave tona patriotike si mesueset e klubit flas shqip Liljana Rrumbullaku dhe Izabela Panda. Në emër të Klubit Flas Shqip dhe Vatra Miami, i përcjellim falenderime të gjithëve që dhuruan një mbrëmje të paharrueshme SHQIPTARE!

Nga Keze Kozeta Zylo/

Ndonëse është një javë pas Ditës së Flamurit, nxënësit e Shkollës Shqipe “Alba Life” Ambasador i Kombit në Bronx, në një nga 7 kështjellat e saj që i qëndrojnë mburojë Gjuhës Shqipe për 19 vjet me radhë, valëvitën Flamurin kuq e zi gjer në kupë të qiellit në Bronx.

Për shkak se shkollat publike amerikane e kishin pushim për Ditën e Falënderimeve kjo shkollë e festoi sot të shtunën në Librarinë e Shkollës së mesme në Kristofer Colombous.

Përmbi skenë ishte varur Flamuri Kombëtar dhe para banderolës qëndronin tullumbacet me ngjyrat kuq e zi, simboli i Flamurit Kombëtar, përgatitur plot hijeshi nga dy mësueset profesioniste të shkollës Helena dhe Migena. Është krenari kur shikon ekipin e punës në krye të detyrës ardhur gati 2 orë para për të përgatitur mjedisin për koncertin si: Anisa, Albert dhe Lili, Dardani, Mërgimi dhe Mehrija pas koncertit.

Me fytyrat e gëzuara dhe sytë që iu reflektonin vetëm dritë e bënin këtë të shtunë dhe më të shndritshme dhe më entuziaste. Megjithëse ishte një ditë e ftohtë herë herë një fllad veror vinte si valë muzike mbi fletët e librave që qëndronin hijerëndë para prindërve, gjyshërve, nxënësve dhe mësueseve në këtë shkollë kaq mikpritëse për Alba Life.

Shkollat Shqipe “Alba Life” e festuan në të gjithë Nju Jorkun me madhështi Ditën e Flamurit si dhe në Albany në kryeqytet, ndërsa këtë të shtunë u festua nga nxënësit e Bronxit.

Natyrisht ne si shkollë udhëhiqemi nga Rilindasit e mëdhenj dhe burrat e ndritur të Kombit që e ngritën Gjuhën Shqipe aq lart, e shenjtëruan me fjalën e epërme si Gjergj Fishta kur shkruan si:

Npër gjuhë shqype bota mbarë/ ka me ju njohtë se ç’fis ju kini/ ka me ju njohtë për shqyptarë/ trimi n’za, sikurse jini/ Prandaj, pra, n’e doni fisin/ mali, bregu edhe Malcija/ prej njaj goje sod t’brohrisim/ Me gjuhë t’veten rrnoftë Shqypnia!

Gjyshërve iu ndrinin sytë dhe ndonjë nuk mbante dot lotët nga emocionet kur dëgjonte nipin ose mbesën duke kënduar, recituar dhe vallëzuar në skenë. Janë disa nxënës që u rritën në bangat e kësaj shkolle, por sot janë studentë apo dhe në punë, por ka shume që na vizitojnë me dashuri, respekt dhe mirënjohje si Eliana Shala një studente e shkëlqyer në Baruc College. Ajo u ngrit vallëzoi bashkë me fëmijët dhe herë pas here na afronte ndihmën e saj.

Këta nxënës tashmë kanë dhe nje mundësi të artë për 12 kredite kolegji për nxënësit shqiptarë të shkollave të mesme në New York, në se kalojnë testin për Gjuhën Shqipe.

Koncertet që zhvillojmë gjatë festave nxisin dhe promovojnë punën edukative përmes intepretimeve, muzikës, dramave dhe përjetimit artistik. Duke i përfshirë gjithë nxënësit në skenë i bëjmë më konfident dhe i nxisim ata të jenë pjesëmarrës aktivë në aktivitete artistike.

Programi i koncertit artistik në Ditën e shenjtë të Flamurit

Programin artistik e hapi klasa e më të vegjëlve të mësuese Migena Lelaj.

Ajsela Zefi interpretoi poezinë “Nëntori, Shqiponja: Dior Belliu, Flamurin e Shqipërisë: Alby Belliu. Kjo klasë e mbylli programin me këngët aq të njohura për publikun si: Moj Bubrrec, Moj Bubrrec dhe Alfabeti Shqip.

Nxënësit e grupmoshës nga 8-11 vjec me mësuesen Helena Lubonja Ujkaj interpretuan para publikut si: Emili Krashi dhe Lorena Përgjegjaj, poezi

Ata luajtën dramën “Lirinë e gjeta mes jush” plot talent si Glauk Ujkaj, Ersi Cenaj, Frenki Lelaj, Hana Osmani, Gloria Ndoci, Isabel Celaj, Emma Pllumaj, Emma Vuktilaj, Elina Osmani, Dion Duraku, Leonis Pergjegjaj, Guliana Stefa dhe Lira Sinanovic

Pas dramës u interpretua: Trim mbi trimat kënga e Gjergj Kastritotit kënduar nga Eliona Shala një vajzë që premton shumë në skenë.

Programi u mbyll nga nxënësit e klasës sëmë të rriturve nga mësuese Erinda Isufaj

Poezia: Skënderbeu u intepretua nga nxënësit plot zell si: Gulianna Stefa, Lira Sinanovic

Sara Vushaj, Loena Vushaj.

Poezia: O Flamur i dashur, Lirion Sinanovic

Poezia: Sa të dua o Atdhe nga Franko Toni, Eliona Shala

Programi u mbyll me Vallen e famshme të Tropojës dhe natyrisht e kemi krenari që “K’cimi i Tropojës” është zyrtarisht pjesë e Listës Përfaqësuese të Trashëgimisë Kulturore Jomateriale të Njerëzimit në UNESCO.

Mësuesit dhe nxënësit e Shkollave Shqipe “Alba””Life” kanë 19 vjet që për cdo vit e performojnë këtë valle në klasa dhe në skenat e Nju Jorkut dhe natyrisht nuk kishte lajm më të bukur!

Pas mbarimit të koncertit artitistik z. Qemal Zylo themelues dhe drejtues i Shkollave Shqipe përkujtoi me nderim dhe respekt artistin e shquar Shpat Kasapi me vallen Kosovare, një nga hitet më të njohura të tij duke e kërcyer nxënësit e Alba Life.

Në fund nxënës, mësuese kërcyen vallen pogonishte dhe vallen e pipëzave.

Urime të dashur shqiptarë, nxënës, mësues dhe prindër të Shkollës Shqipe “Alba Life” Ambasador i Kombit dhe kudo në botë ku mësohet shqip!

Autorja e shkrimit mban titullin e lartë: Kalorës i Urdhrit të Flamurit nga Presidenti i Republikës së Shqipërisë, Medaljen e Meritës Presidenciale dhënë nga Presidentja e Kosovës Vjosa Osmani. Është publiciste, shkrimtare, autore e tetë librave, Mjellmat po të vijnë u shpall libri më i mirë i vitit në Panairin e librit në New York, 2008, mësuese dhe bashkëthemeluese e Shkollave Shqipe “Alba Life” në New York, Ambasador i Kombit, Gruaja e Vitit 2022, NY dhënë nga Motrat “Qiriazi”.

Federata Pan-Shqiptare e Amerikës Vatra po mbështet fuqishëm kandidatin republikan Robert Lulgjuraj i cili po kandidon për Kongresin Amerikan, si përfaqësues i Distriktit 10 në Michigan. Kryetari i Vatrës Dr. Elmi Berisha dhuroi 2 mijë dollarë në emër të Vatrës dhe u bëri thirrje të gjithë vatranëve e shqiptaro-amerikanëve që ta mbështesin me çdo kusht kandidatin shqiptar për Kongresin Amerikan. Kryetari Berisha në këtë takim elektoral e patriotik shoqërohej nga anëtari i kryesisë z.Ilir Cubi e vatranë të tjerë. Gjatë bisedës së ngushtë Dr. Berisha e ka përgëzuar kandidatin Lulgjuraj për fushatën, profilin profesional, mesazhet e forta dhe platformën elektorale fituese. Dr. Berisha u shpreh për Diellin se “Z. Lulgjuraj ka një shans të artë për të shënuar një arritje historike për të gjithë shqiptarët në Shtetet e Bashkuara të Amerikës”. Vatra do ta shoqërojë dhe mbështesë Robert Lulgjurajn në të gjitha takimet e New York-ut.

Të nderuar miq,

Me kënaqësi ju prezantojmë përbërjen e re të kryesisë së VATRËS në Boston, e cila do të punojë me përkushtim për të forcuar dhe zhvilluar aktivitetet e degës sonë.

Nënkryetar: z. Kastriot Fetahu

Arkëtare: znj. Dorjana Dhima

Sekretar: z. Flamur Vezaj

Anëtarë të bordit:

z. Jorid Çelaj

z. Andrea Pani

z. Klajdi Haruni

Gjatë gati dy viteve me shumë aktivitetet dhe ringritjen e VATRËS në Boston, do të vazhdoj punën me ekipin e ri të kryesisë, duke sjellë energji dhe përkushtim të ri.

Një falënderim i veçantë shkon edhe për anëtarët e mëparshëm të kryesisë për punën dhe kontributin e tyre në ngritjen dhe zhvillimin e VATRËS në Boston.

Faleminderit për besimin dhe mbështetjen tuaj. Bashkë do të vazhdojmë të punojmë për të sjellë ide dhe iniciativa të reja në VATRËN e Bostonit.

Me respekt

Mentor Maksutaj

Kryetari i Fedetates Pan Shqiptare Vatra

Dega Boston – SHBA