Opinion – Page 695 – Dielli

“TURQIA NA NXORI NGA EUROPA…

November 27, 2014 by dgreca

ENVER HOXHA NA NXORI NGA KENJA NJERI !”…/
Ne Foto:“ARKIVI I HARRESËS”/
Nga Fritz RADOVANI/
■Këte libër me titull “ARKIVI I HARRESËS”, Ua kam kushtue Ejllorëve të Drishtit…
Atyne Paraardhësve të mij që nuk “harruen” me na lanë Formulen e Pavdeksisë së Atdheut, Fesë, Gjuhës, Historisë Kombtare, po, dhe të gjithave bashkë, të vulosuna me Gjakun e Popullit Shqiptar në luftat për Liri dhe Shqipni Europjane, nën drejtimin e Mbrojtësit të qytetnimit Europjan Gjergj Kastriotit – Skënderbeu, – nën valvitjen e Përjetëshme të Flamurit tonë, me Shqipen Dykrenare, Flamur të cilit, i këndoi për shekuj të shekujve Poeti ynë kombtar At Gjergj Fishta O.F.M., që në vitin 1913…
■Një Popull ndër ma të vjetrit n’ Europë, i sulmuem për me u shfarosë ndër shekuj…
■Një Popull i rrethuem me heshta dhe i gjuejtun me topa ndër shekuj…
■Një Popull i Pathyeshëm me mburojen e Kastriotit nga armët e anmiqëve shekullor, edhe pse pa bukë, pa ujë, dhe pa asnjë ndihmë në Botë, po me Histori Legjendare!
■Një Popull ku, që në Shekullin e Parë mbas Krishtit, Luftoi dhe Fitoi per “Atdhé e Fé”!
■Një Popull që ma shumë ka Kështjella e Kisha, të “rrethueme” dhe të mbytuna në Gjakun e Mbrojtësve të Tyne, se gjithë bota që e rrethon me mëni e pabesi…
■Një Popull që i dhuroi Botës, mija e mija Martirë që me Gjakun e Tyne të Shenjtë, vune thëmelet e Qytetnimit Botnor, në kontinentin Europjan… Lè të flasin Arkivat!
■Një Popull i robnuem nga romakët, bizantinët, turqit, bullgarët, malazezët, serbët, grekët, italianët, holandezët, austro – hungarët, kroatët, gjermanët, jugosllavët, rusët, kinezët, dhe gjithnjë në Shek. e XX, i shitun nga tradhëtarët… Po, asnjëherë i tjetërsuem!
■Të gjithë zaptuesit barbar luftuen për tjetërsimin e Fesë, gjuhës, historisë, zakoneve dhe dokeve Shqiptare, e ma shpesh se kurrë, për shkombtarizimin tonë… Ikën me faqe të zezë, ashtu si erdhën, pa mujtë me ba një “fshat”, me folë me gjuhën e tyne!
■ “Turqit, jo vetëm, na detyruen me ndrrue Fé, po ma e keqja asht se, edhe na nxorën nga Europa.”, kështu, thonte 72 vjetë përpara historiani e gjuhtari i madh Mustafa Kruja.
■Hoti e Gruda i treguen besnikinë e vet “Lidhjes së Prizrenit” me 6 Prill 1911, po, Gjaku i Atyne Burrave të vramë për Atdhé nën drejtimin e Shtatorës Pavarsisë sonë kombtare, Dedë Gjo’ Lulit, a thue brè Burra, me të vërtetë ka shkue “gjakhuptë” ?!
■U shuen Mësuesit e Parë… U shuen Shkollat e Para… U shuen qytete, fshatra, varreza, përmendore e kompanjela… U shue edhe “Lahuta” shekullore… U shue… “gjithshka” !!
■Por jo, Varri i Gjergj Kastriotit…Përkrenaria e Shpata e Tij Heroike… As Mburoja e Tij! ■Janë vllazen Shqiptarë, janë… Se Zoti, kurrë, nuk humbë Kreatyren e Vet Hyjnore!..
***
■E vetëm frika e një “Lidhjes së Ré” në Lezhën e 1468, në vitin 1941 çoi tradhëtarët tanë, në idenë antinjerzore të zhdukjes së Shqipnisë…Këte herë edhe nga harta e Ballkanit…
■Me 8 nandor 1941, tradhëtarët e Atdheut, ua shitën Shqipninë shovenistëve sllavë, bash bolshevikëve të Titos, “besnikut” të kriminelit Stalin, shfarosës i miljona njerzëve që zhduku nga harta “ndjesitë ma të nalta njerzore”, ndër gulagët e paharrueshme të Rusisë sovjetike! E Europa… shikonte me andje në foto “Takimet e Teheranit dhe të Jaltës…”
■Me 29 nandor 1944, Gjaku i Vllazënve të Jugut, vazhdoj rrëkajen edhe në Veri…
■Që në 21 prill 1943, komunistët jugosllavë formuen “Sigurimin e Shtetit” në Shqipni, (Sherbimi Sekret) instrumentin ma kriminal, gjakatarë, tradhëtarë, vrasës, amoral, ku torturat, policët, agjentët e Sigurimit, pushkatimet, shpifjet, terrori, huni, dhuna, krizmat e automatikëve, survejimi, mashtrim, padija, shnderim, përdhunim e poshtnim, pra një GJENOCIT, që jo vetëm sundoi për 50 vjetë një Popull, tue rrafshue përtokë gjithshka të mirë e njerzore por, shka asht ma e keqja që provoi Shqiptari në fundin e Shek.XX, até që nuk e ka njoh as provue asnjë Popull tjetër në Histori moderne kje se: Komunizmi anadollak ishte mjeti me të cilin Enver Hoxha na nxori nga kenja Njeri!
■Një Popull rreth 1 miljon banorë, i mbytun në gjak nga armët e “çlirimtarëve” tanë, me 29 nandor 1944, rreth orës 5 të mengjesit, do të pranojnë robninë komuniste të Titos, që ngriti flamurin e dhunuem me yllin e kuq bolshevik, në kompanjelin e Fretenëve në Shkoder, pikrisht, aty ku At Fishta me 13 Qershor 1913… Vuni Flamurin e Kastriotit…
■Dhe për të festue “çlirimin” e Shqipnisë, ashtu si kudo kanë vue kambën komunistët, perballë Bashkisë qytetit… Qamil Gavoqi, shprazi armët “trofe” mbi kokat e Shqiptarëve që nuk u pajtuen me okupacionin jugosllav të Shqipnisë… Gjithkah gjakderdhje!
■Vrasje e tretje kufomash në Malësi… Vritet Prek Cali e rrethohen Bjeshkët e Nêmuna, me kriminelë sllavë e malazezë…118 Burra të vramë. E poshtë mbas malit Taraboshit, presin tjerët me la në gjak Berdicë e Anën e Malit, ku qendronte ballisti Abaz Ermenji.
■Vrasje në Hot e Grudë… Vrasje në Male… Vrasje nder qytete… E rreshti i pafund i kosovarëve të premë në besë nga tradhëtarët tanë partizanë, nga Kukësi e deri në Tivar lau me gjak Veriun… Pikrisht nga “herojt e popullit” që sot kerkojnë prap gjakderdhje…
■Tradhëtohen Malësi e fusha, Dukagjin e Kosovë, Pukë e Mirditë, Mat e Elbasan… tue pritë zbarkimin e “Aleatëve”, siç thonte Populli ynë dikur: “Prit gomar sa të dal bar…” è
■Përhapet lajmi i “dorëzimit armëve” e fillon shburrnimi i Malëve, për me ua lirue rrugën pushtuesëve jugosllavë e çlirimtarë, “trima të qitun me yll në ballë!”
■Dhunohet Flamuri dhe Hymni i Tij… E kanga vazhdon bash sikur në vitin 1927…
■Dhunohen shkollat e mbi tryezat e Mësuesit hiqet Gjergj Kastrioti, me vue Titon…
■Dhunohen institucionet zyrtare shtetnore, në çdo zyrë ligjin e bajnë specialistët e Titos, ndërsa, ndër hetuesi përballë “druzhe bolshevikut e çlirimtarit”…Dhunohet Atdhetari!
■Gra, burra, fëmijë, pleq’e të rijë, karvan me nga një strajcë plaçka në shpinë nisen për mos me u kthye kurrma ndër Trojet e veta… Me 15 Maji 1945 fillojnë interrnimet…
■Fshatari “kryenaltë” që mori pushtetin, tue pritë “reformen agrare”, fillon me boshatisë kotecat me bereqetin e vet… Për me ua dergue “popujve vëllezër” të Titos, bashkë me mallin e tregëtarëve të Pazarit Vjetër të Shkodres, që ua kanë premtue per “robninë” që na sollën shegertat partizan me yllin e tyne në ballë! Napolonat ar i duhen Enverit!
■E në darkë ndër sofra… përplasen gotat e rakisë: “Të na rrojë Tito, Stalini e Enveri!”
■Stajanicat e shkreta, a me ua çue një strajcë bukë e pak duhan Burrave ndër shpella, apo me ngopë me mish e pije vagabondat e ndjekjes, që përshndetën për vrasjet e Burrave të Tyne në pabesi, vetëm për me ua ba qejfin sllavit vrasës shekullor.
■Çohen gotat me raki e venë: “Tradhëtarëve plumbin ballit”!.. E në ballin e vet, secili rregullon kapelën partizane “Ushtarët e Stalinit jemi né!”…
■Tek Ura e Bregut të Lumit… Partizani “hero” Xhemal Selimi, vazhdon me thye arrat mbi kokat e Burrave të pushkatuem të Maleve të Dukagjinit…
■Ku janë Emnat e Atyne Burrave që tue pritë ndër shpella Aleatët… U vranë!? Ku janë gropat e herojve Prek Cali, e 118 Burra të Kelmendit, Gjergj Vata, Ndoc Jakova, Gjelosh Luli, Ymer Berisha, Marije Shllaku, Gjergj Martini, Kol Parubi, Kolec Deda, Pjeter e Marije Deda, Cin Serreqi, Dulo Kali, Caf Dragusha, Mark e Llesh Gjomarkaj, Rasim Gjyrezi, Fahri Rusi, Pjeter Pali, Bilbil Hajmi, Gaspër Simon Gaspri, Simon Darragjati, Murat Haxhija, Guljelm Suma, Qemal Dreçini, Kol Prela, Paulin Pali, Muzafer Pipa, Zef Kol Prela, Fisi Mirakaj, Alush Leshanaku, Hamid Matjani, e mija të tjerë…të humbun?
■Po, me Nanat, gratë e fëmijët e Tyne shka u ba?
■Po, me sternipat kur u rritën ndër kampe interrnimi si veproi Partia e Enverit?
■Sa vetë u pushkatuen atëherë ndër Male, e prap mbas 20 apo 30 vjetësh ndër hetuesi e burgje, apo reparte ushtarake deri mbas vitit 1988 me akuza fallco…deri në shfarosje fisesh, tue u vazhdue “lufta e kllasave” edhe “me fëmijët në barkun e Nënës, që do ti bejmë me u drillur, kur të dëgjojnë fjalën komunist!”, ka thanë në 1946, në hetuesinë e Kishës së Fretënve kryexhelati i sigurimit Shkodres, krimineli Zoj Thëmeli…
■Po, sa u zhdukën me gjyq e pa gjyq ndër prroska, zallishta e brigje lumejsh… që edhe sot nuk u dihet Varri as vendi i groposjes vetëm, se ishte Atdhetarë?
■Ku janë Varret e të vdekunve ndër burgjet e Burrelit, Gjinokastrës apo Permetit?
Flisni, o vrasës flisni! Flisni o kriminelët e Vllazënve tuej të Pafaj!
■Veglat e komunistëve gjakatarë të mbledhun “grusht çeliku rreth PPSh” pranë Akademisë së Shkencave, me titujt “dr. prof. akademikë…” vazhdojnë porosinë sekrete të “mësuesit tyne” Enver Hoxhës e pasuesit Ramiz Alia, me arkivue dokumenta në Arkivin e Harresës. Sejcili, në mënyren e vet, VETEM punon me zhdukë të Vertetën!
■Vetëm të vramë, të mbytun ndër tortura, të zhdukun, të humbun ndër interrnime…
SOT, NË SHQIPNI, NGA RREGJIMI KOMUNIST I ENVER HOXHËS, SHIFRA ASHT MBI 50.000 VIKTIMA, NDËRSA, SHIFRA E TË BURGOSUNVE DHE TË INTERRNUEMËVE I KALON MBI 500.000 VETË… NJË GJYSË MILJONI… SHQIPTARË… SOT, PRESIN “RILINDJEN” E KOMUNIZMIT !
■Mos e harroni fjalën e vjetër: “Më thuej se i kujt jé, se po të tregoj kush jé!”
***
■I VETMI VEND I KOMUNIZMIT BARBAR NË EUROPË: SHQIPNIA MARTIRE, NUK KA ASNJË KRIMINEL PËR ME DËNUE TASH 70 VJETË KRIME, VRASJE DHE KORRUPSION, NJË VAZHDIMËSI E TURPËSHME DHE KRIMINALE !
■Këta bisha me fëtyrë “njeriu”, me 29 nandor 2014, “festojnë” 70 vjetorin e turpit të TRADHËTISË NDAJ POPULLIT SHQIPTAR DHE ATDHEUT.

■“ARKIVI I HARRESËS” VAZHDON ARSHIVIMIN E DOKUMENTAVE …
■Edhe pse “harresa” po vazhdon me shkatrrue kujtesen e Rinisë Shqiptare…
SOT, në pragun e Festës së Flamurit Kombtar të mbarë Shqiptarëve kudo që janë…
U kujtoj, thanjen e Trimit Hero të Selcës Don Dedë MALAJ, me datën 27 Prill 1959,
para terroristëve komunistë të Enver Hoxhës, në kinema “Republika” në Shkodër:
“E PREMTJA E ZEZË NË SHQIPNI KA FILLUE ME 29 NANDOR 1944,
DHE KA ME VAZHDUE DERISA… TË MBAROJË KOMUNIZMI !”
* Pjesa e V nga cikli:Në 70 vjetorin e përmbytjes së Shqipnisë…/
Melbourne Nandor 2014.

Pa kthye pronën tek i zoti, lufta kundër korrupsionit ashtë vetëm slogan politik

November 25, 2014 by dgreca

Nga Loro Stajka/
Kujtesë, drejtu Kryeministrit z. Rama, deputetëve, gazetarëve, analistëve të politikës dhe shqiptarëve patriotë: Kontribuoni për vendosjen e shtetit ligjor dhe të drejtësisë në Shqipëri
Shqetësimi im për këtë kërkesë publike fokusohet tek politikat negative ndaj pronarëve që ka realizu PD/PS, pas vitit 1991 e deri sot. Kjo politikë që shkatërron themelet e demokracisë dhe të ardhmen e popullit shqiptar, po vazhdon prej 23 vjetësh për shkak të mungesës së vullnetit politik për kthimin e pronës tek i zoti, duke mos zbatue Kushtetutën e vendit. Kur popullit i mohohet prona e trashigueme, ai zhytet në mizerje, në konflikte dhe kjo ashtë skllavëri e maskueme. Burimi i të keqes është anarkia e pronës dhe sistemi në Shqipni nuk ashtë demokratik, por pseudodemokratik…
Unë, nuk mund ta paragjykoj se çka do mund të thotë ambasadori i SHBA-së në Tiranë, zoti Aleksandër Arvizu, për këtë problem, por damet e kësaj politike, me mbi 8000 të vramë, konflikte pa fund dhe korrupsion në sistemin e drejtësisë, tejkaloi ato të çdo pushtimi që ka kalue Shqipnia dhe ato të periudhës së randë sllavo-komuniste që kaloi populli shqiptar. Pronarët u mashtruen nga Berisha/Nano, por shumica druhen të shprehen publikisht, pasi do të përballen në konflikte me mafien që u ka grabit pronat dhe po ashtu edhe me pushtetin që mund t’i largojë nga puna. Duke shkrue me sinqeritet këtë letër publike për problemin e pazgjidhun të anarkisë së pronës, ndjej se realizoj një detyrim moral dhe patriotik ndaj atdheut tim. Theksoj se për këtë problem themelor të të drejtave të njeriut, shumë nga bashkëpatriotët e mi që jetojnë në Shqipni e kanë humbun besimin tek politika, tek drejtësia dhe presin
nga ndërkombëtarët, por problemet duhet t’i zgjidhin politikanët shqiptarë.
Nuk vlen “fitorja” e Beogradit nëse nuk zbaton Kushtetutën në vendin tand
Më datën 15/2/2014 gazeta “Telegraf” ka botuar një letër që unë ju kam adresue publikisht ju dhe zotit Lulzim Basha, po për këtë problem, për të cilën ju me siguri jeni në dijeni. Ju drejtohem përsëri për të njëjtin problem pasi janë momentet decizive që të reflektoni dhe të veproni për të mos u zhytur më tej në rrugën e politikave antishqiptare. Unë personalisht, si një nga shqiptarët, që prej dekadash kam emigrue dhe jetoj në SHBA, por me dashurinë për atdheu tem, u ndjeva shumë i kënaqun për qëndrimin tuaj objektiv në takimin me Daçiç në Beograd. Por, sa para bën kur në Shqipni, edhe pas 23 vjetësh demokraci e shpallur me Kushtetutë, pronat akoma nuk u janë kthye pronarëve, por mbizotënon kleptokracia. Në këto 23 vjet në administratën shtetënore dhe në sistemin e drejtësisë, nuk zbatohet ligji në përputhje me Kushtetutën, por korrupsioni dhe interesat vulgare. Ndërkombëtarët relatojnë
se në Shqipni, janë të shumta rastet kur nuk zbatohen vendimet e gjykatave të vendit dhe ato të Gjykatës së Strasburgut, por si mund të deklarohet nga ju, apo dhe nga ndërkombëtarët se funksionon shteti ligjor dhe sistemi i drejtësisë? A ka pasun probleme të tilla shqiptari në kohën e pushtimit otoman, pas Pavarësisë në 1912, apo edhe në kohën më të keqe të diktaturës? Në këtë 23 vjet nga klanet PD/PS ashtë lejue pandëshkueshmëria, edhe në rastet kur shkelja e ligjeve dhe përvetësimi e pronës së tjetrit ashtë i qartë, prandaj dhe korrupsioni dhe e keqja ashtë zhvillue nga lart poshtë. ashtë klasa politike e pas vitit 1991 ajo që ka lejue këtë situatë që ka shkaktue mbajtjen peng të pronave të pronarëve të ligjshëm, të grabitun nga diktatura sllavo-komuniste, për të pronësue në ato prona pronarë, të fabrikuem nga klanet e politikës dhe të korrupsionit dhe po kultivon vëllavrasje. Pa kthim të
pronës tek i zoti, fjala demokraci është politikë antishqiptare ose në rastin me të mirë iluzion. Prandaj, pa kthye pronën tek i zoti, deklarimi se në luftën kundër korrupsionit nuk ka kthim prapa, është vetëm slogan politik.
Anarkia e pronës dhe djalli sllavo-komunist
Situata e anarkisë së pronës ashtë tregues i mbijetesës së sllavo-komunizmit që ashtë përshtatun në kushtet e pluralizmit. Djalli i sllavo-komunizmit nuk ashtë çrrënjosun, por ashtë përshtatun dhe po mbijeton dhe gabimet vazhdojnë të thellohen, për vetë faktin se pavarësisht nga fjalët dhe premtimet, maxhoranca gjatë këtij viti ka ecun në të njëjtin drejtim antikushtetues siç eci Sali Berisha, Fatos Nano dhe kryeministrat e tjerë pas vitit 1991. Për rrugën e gabueme me pronat, në periudhën e pas vitit 1991, mjafton fakti që z. Sali Berisha, ish President dhe ish Kryeministër, e ka pranue publikisht, prandaj nuk ka pse përsërit më të njëjtat gjana. Kjo është korniza e Katovicës dhe e Ramiz Alisë. Shqiptarët tradicionalisht e kanë respektue pronën e tjetrit, kurse tani ligjet i justifikojnë të përvetësojnë ose të vjedhin pronat e njëri-tjetrit. Kushdo e ka të qartë se kjo politikë favorizon
helenizimin e Shqipërisë së Jugut, fut konfliktin permanent midis shqiptarëve, i mban larg investimet e huaja. Unë kam qenë dhe jam me bindje të djathta, sepse ishte diktatura komuniste që më bani jetën të padurueshme dhe më detyroi të rrezikoj jetën, të kaloj kufinin dhe të largohesha nga vendi im. Nëse pronën që Enver Hoxha e konfiskoi, ju do vazhdoni ta konsideroni pronë të shtetit, ose më saktë të maxhorancës në pushtet siç e ka trajtue oligarkia politike e derisotme PD/PS, unë jua them shqip dhe me sinqeritetin ma të madh se: Me apo pa koshiencë, edhe ju jeni vazhdimësi e sllavo-komunizmit të maskuem me frazeologjinë demokratike. Nëse ju, si kryetar i maxhorancës, i konsideroni pronat e konfiskueme nga diktatura si pronë që duhet t’ju kthehet të zotëve, konform detyrimeve kushtetuese të vitit 1991 dhe Kushtetutës aktuale, atëherë për këtë problem unë jam me të njëjtën mendje me ju. Heshtja e
pajustifikueshme e kryetarit të PD z. Lulzim Basha, për të drejtën e pronës së trashëgueme më deziluzionon, pasi tregon mungesën e opozitës konstruktive.
Z. Rama, zgjidhja ashtë në dorën tuaj!
Megjithatë, zgjidhja apo moszgjidhja e këtij problemi themelor sot ashtë ne vullnetin tuaj, pasi jeni kryetar i maxhorancës. Ju i keni të gjitha mundësitë, ta impononi pushtetin të zbatojë Kushtetutën, ose të miratoni me ligj detyrimin e Shtetit për të zbatue Kushtetutën. Kjo kërkesë këtu në SHBA tingëllon qesharake ose pa kuptim. Pronat e konfiskueme nga sllavo-komunizmi nuk janë prona të pushtetit dhe as të shtetit dhe nëse doni sukses dhe demokraci, lufta kudër korrupsionit duhet të fillojë pa humbun kohë me kthimin fizik të pronës tek i zoti dhe korrigjimin e veprimeve të gabueme të bame pas vitit 1991. Meqenëse gabimi ka marrë përmasa të mëdha dhe ashtë sistematik, me ligj të Parlamentit duhet të korrigjohen ato akte, ku shteti pronën nuk ia ktheu familjes së shpronësueme, por bani ligje që ato prona t’i përvetësojë oligarkia politike. Berisha u kufizua vetëm me legalizimet. Legalizimi mund të bahet
vetëm në prona që juridikisht i përkasin qeverisë apo shtetit, por jo mbi tokat dhe pronat e konfiskueme nga diktatura. Një vendim të ndryshëm nuk mund ta marrë askush, as edhe me ligj Parlamenti, përveç rastit kur toka është për nevojë publike dhe pronari i tokës zhdëmtohet paraprakisht e jo me mashtrime, duke kompensue vetëm për 200 metër katrorë. Nëse ju nuk do të veproni me efektivitet për të korrigjue gabimet Berisha/Nano me prona, por do vazhdoni po nё atë rrugë, korrupsioni do të prevalojë, degradimi moral i politikanëve do të thellohet dhe zgjerohet. Oligarkia politike do fitojë para ma shumë, por Shqipnia dhe demokracia do dëmtohen. Ky ashtë problem i ndërgjegjes tuaj kombëtare, detyrim i çdo politikani, deputeti, gazetari apo analisti të politikës. Kjo thirrje është për çdo njeri të ndershëm që të kontribuojë për vendosjen e shtetit ligjor dhe të drejtësisë, pasi “de fakto” për
popullin shqiptar nuk ka demokraci për sa kohë shteti shkel Kushtetutën. Prandaj, ju lutem, në radhë të parë Ju, zoti Kryeministër, të shprehni në media qëndrimin tuaj ndaj këtij problemi, që i intereson jo vetëm shqiptarve e Shqipnisё, por edhe mijëra të tjerëve që kanë emigrue dhe nuk jetojnë në Shqipni.
Situata e anarkisë së pronës ashtë tregues i mbijetesës së sllavo-komunizmit që ashtë përshtatun në kushtet e pluralizmit. Djalli i sllavo-komunizmit nuk ashtë çrrënjosun, por ashtë përshtatun dhe po mbijeton dhe gabimet vazhdojnë të thellohen, për vetë faktin se pavarësisht nga fjalët dhe premtimet, maxhoranca gjatë këtij viti ka ecun në të njëjtin drejtim antikushtetues siç eci Sali Berisha, Fatos Nano dhe kryeministrat e tjerë pas vitit 1991

ELBASAN-MESHË DHE LUTJE PËR HERONJTË E ATDHEUT NË LUFTËN E DYTË BOTËRORE KUNDËR NAZIFASHIZMIT

November 23, 2014 by dgreca

Kush nuk respekton heronjtë e kombit të tij nuk mund të ketë moral për një jetë dinjitoze në liri e demokraci. Askush nuik mund të gëzojë në paqë dhe harmoni jetën në liri kur ajo ka në themel gjakun dhe sakrificën e bijve e bijave apo burrave të shtetit që u sakrifikuan për një të ardhme të paqtë dhe të lumtur në rast se ne nuk i respektojmë ata.
Thellësisht lutemi për shpirtin e tyre dhe familjet që lanë pas, me një dhimbje por dhe krenari hyjnore.
Si prift ose klerik, lutem për shpirtin e tyre duke shmangur cdo spekullim politik apo fetar. Sakrifikimi i jetës për një të ardhme të paqtë dhe në harmoni për familjen dhe kombin tend kurrsesi nuk duhet të pronesohet nga politika apo pushtetet e ndryshme.
Kush ndrron jetë për lirinë e atdheut dhe kombit të tij meriton respekt dhe lutje të përjetshme, panvarsisht se kur derdhet gjaku i pafajshëm dhe i sakrifikuar në dobi të të gjithëve.
E ndjej si obligim dhe detyrim ndaj kombit tim të respektoj dhe ti lutem Perëndisë ose Zotit për qetësi të përjetshme për cdo shqiptar që sakrifikon jetën për një ideal të mirë dhe të pastër për brezat që vijnë pas.
Vendosëm që ditën e diel datë 23 nëntor 2014 , në meshën që mbahet në kishën Shën Maria në Elbasan ti lutemi Zotit me një përshpirtje për heronjtë e luftës dytë botërore pa dallime politike djathtas apo majtas.
Eshtë hera e parë që një institucion besimi i drejtohet Zotit për njerëz të sakrificës deri në humbje të jetës. Për ne si kishë nuk ka rëndësi se kush besonte dhe kush nuk besonte sepse Zoti është i padiskutushëm në ekzistencën e tijë dhe në mëshirën e pafund që ka.
Shpesh herë e verteta ka folur dhe me fakte se luftën e nisin idealistët, e mbarojnë trimat dhe fitoren e gëzojnë horrat.
Ky 70 vjetor i lirise se atdheut, duhet te na gjeje te bashkuar se bashku ne respekt dhe lutje per sakrificen e deshmoreve. Ne duhet te pranojme pa asnje hezitim, brenda shpirtit dhe vetedijes sone se heronj ka nga cdo krah politik i asaj periudhe.
Une si kerik, nuk bej dallime per qellime pushteti apo perfitime te vazhdushme, qe fatkeqsisht ndodhin dhe sot. Per mua si klerik , ne lutjen time ne meshe jane bije dhe bija te kombit tim. Kush keqperdor sakrificen e jetes se tyre per nje Shqiperi demokratike dhe ne liri te prones, arsimit, zhvillimit, do te mbetet, gjithmone nje spekullant i rrezikshem per shoqerine shqiptare.
I ndrite shpirti deshmoreve te kombit tone dhe Zoti meshirofte ata qe krijuan pushte kriminal duke u fshehur pas gjakut te heronjve.
Sakrifica per kombin tend, nuk behet per privilegj apo diktature kunder po kombit tend. Sakrifica eshte e paster si uje i kristalte dhe e dobishme si nje ilac mbrojtes per kombin tend .
Bekuar qofshin ata qe luftojne me vdekjen qe familjaret dhe pasardhesit e tyre se bashku me teresine kombetare te vazhdojne nje jete dinjitoze ne dashuri per njeri tjetrin dhe vllazerim te perhershem.

ATE NIKOLLA MARKU
KISHA SHEN MARIA ELBASAN
KESHILLI I KISHES
KOMITETI PER MBROJTJE E PAVARSISE KISHES ORTODOKSE KOMBETARE SHQIPTARE

PROTESTA E PD – DEKLARIMI I EDI RAMËS PËR HAPJEN E DOSJEVE DHE PREMTIMI QË AI I KA BËRË ANGELA MERKELIT

November 23, 2014 by dgreca

*Edi Rama dhe Lulzim Basha duhet të shqetësohen për faktin se Shqipëria ka siguri zero për investitorët e huaj. Dhe kjo gjendje nuk u krijua as sot, as kur erdhi Edi Rama në pushtet, por që në kohën e PD të Sali Berishës!
*Shqipëria është një vend kuazi mafioz dhe investitorët e huaj nuk vijnë në Shqipëri, sepse aty nuk kanë siguri. Nuk e them unë, por Angela Merkel!/
Opinion nga ELIDA BUÇPAPAJ/
Ndërsa përballë kryeministrisë dje konsumohej protesta e rradhës këtë çerek shekulli, nga periferia e Tiranës, kryeministri i Shqipërisë konsumonte edhe ai një deklaratë të rradhës, siç ishte hapja e Dosjeve.
Lulzim Basha thërriste në shesh për plagët e shoqërisë shqiptare, kur partia që sot drejton ai ka qeverisur vendin për 8 vjet rradhazi prej 2005-20013, duke i lënë të pamjekuara ato plagë. Në atë kohë Edi Rama si lider i opozitës organizonte protesta dhe bojkote.
Duke ricikluar njëri-tjetrin.
Sot Lulzim Basha shqetësohet për papunësinë, pensionet e ulta, bile shqetësohet edhe për fatin e të përndjekurve, kur ne e kemi parasysh se si u vetëdogjën të persekutuarit politikë mu në zemër të Tiranës dhe Lulzim Basha, nuk mori as mundimin që t’i takonte ata njerëz të mjerë, dhe i la në mëshirën e fatit.
Ndërsa vetë kur bëjnë greva – i keni parë se si i ngrejnë çadrat e bardha – me salltanet sulltanësh!
Në protestën e Lulzim Bashës morën pjesë ata që janë pushuar nga puna me ardhjen në pushtet të PS. Nga ana e saj PS punësoi ata që kishte pushuar nga puna PD kur kjo forcë politike kishte dalë në opozitë. Pra protestojnë punëmarrës që kanë humbur vendin e punës nga punëdhënësi i ri, dhe prandaj duan punëdhënësin e vjetër.
Ky është trafikim i pastër dhe turpi i kësaj klase politike mizerabël! I barabartë me trafikimin e qenieve njerëzore. Sepse ua ble votën në shkëmbim të një vendi pune!
Këtu konsiston thelbi i pseudoqeverisjes, që sa here vijnë në pushtet iu bëjnë shërbim klientelist votuesve, që marrin trajtën e klaneve tribale!
Edi Rama ka premtuar 300 mijë vende pune, premtim që nuk e paska mbajtur, sipas Lulzim Bashës. Domethënë që Edi Rama ka gjetur një papunësi drastike prej qeverisjes tetëvjeçare të PD. Natyrisht që po.
Prandaj që të rifitojë kredibilitetin e humbur, Lulzim Basha duhet të shajë veten dhe partinë e tij, të paktën të bëjë autokritikë.
Edi Rama ka gjetur papunësi drastike dhe 10 miliardë Euro në vit sipas Guardia di Finanza të Italisë, prodhim hashashi nga tregu mafioz.
Prodhim, të cilin kërkon që ta kthejë nga një produkt të mafies, në një produkt të shtetit mafioz deputeti i PS Koço Kokëdhima, sepse, sipas tij, për marihuanën e prodhuar në Shqipëri ka kërkesa të mëdha në Europë, pasi është e cilësisë më të mirë!
Cilësia e hashashit po, ndërsa gjendja e shtetit të së drejtës është përtokë.
Edi Rama dhe Lulzim Basha duhet t’i tregojnë elektoratit se vendet e punës nuk i krijon partia ku ata votojnë, por shteti ligjor i cili siguron lirinë e tregut për investitorët e huaj.
Po si mund të flitet për liri të tregut, kur shteti shqiptar ende nuk i ka zbuluar vrasësit e Artan Santos dhe nuk i ka shkuar deri në fund vjedhjes dhe sistemit klientelisto-nepotik të Bankës të Shtetit. Sepse Ardian Fullani ishte vetëm shërbëtor i bindur i politikës.
Edi Rama dhe Lulzim Basha duhet të shqetësohen për faktin se Shqipëria ka siguri zero për investitorët e huaj. Dhe kjo gjendje nuk u krijua as sot, as kur erdhi Edi Rama në pushtet, por që në kohën e PD të Sali Berishës!
Shqipëria është një vend kuazi mafioz dhe investitorët e huaj nuk vijnë në Shqipëri, sepse aty nuk kanë siguri. Nuk e them unë, por Angela Merkel!
Shqipëria, një perlë e Mesdheut, duhej të ishte tregu i parë për turizmin europian. Aty do të duhej të zbarkonin me miliona turistë gjermanë, suedezë, finlandezë, zviceranë, polakë, hungarezë. Nuk vjen asnjë prej tyre. Preferojnë të shkojnë në plazhet e Turqisë.
Sepse në Shqipëri nuk kanë siguri, nuk ndjehen të sigurt.
Kjo është e vërteta. Prej këtu nis edhe shtetbërja, edhe opozita.
Edi Rama nuk ka se përse të shqetësohet me protestat. Janë një riciklim. Ai e di mirë se si organizohen. Se si sillen njerëzit me autobusë nga rrethet, se si autobusët i paguan partia, ua paguan edhe drekën për orët e humbura.
Edi Rama, nëse i hap Dosjet, do të mbetet në histori, por do të bëjë vetëm detyrën.
Por atij i duhet së pari të mbajë premtimet që i ka dhënë kancelares Angela Merkel, për të çuar përpara drejtësisë peshkaqenët e politikës shqiptare atje ku e kanë vendin.
Këtyre ditëve në TV e Tiranës u intervistua zonja Monica Luisa Macovei, sot anëtare e Parlamentit Europian, e cila ishte Ministre e Drejtësisë e Rumanisë nga 2004-2007. Ajo tha për audiencën shqiptare se rruga e vetme e Shqipërisë për të hyrë në BE është përmes reformave në drejtësi. Pastaj ajo tregoi se si, kur kishte qenë Ministre e Drejtësisë, kishte drejtuar reformën anti-korrupsion. Me këtë rast ajo kishte krijuar Direktoratin Kombëtar të Antikorrupsionit dhe kishte filluar të hetonte dhe të fuste brenda si kolegë të saj, deputetë e ministra nga krahu politik që përfaqësonte, ashtu edhe nga krahu tjetër.
Gjë që Edi Rama nuk e ka bërë dot prej 15 muajsh që ka marrë në dorë frenat e shtetit.
Për këtë gjë duhet të shqetësohet!

Faktorët që nuk u faktorizuan dot!

November 20, 2014 by dgreca

Nga Marjana Bulku/
Gjithmonë i kam drejtuar sytë nga rinia,jo vetëm sytë por edhe shpresat. Arsyjet janë shumë , brenda dhe jasht meje ,për shkak të profesionit (duke qenë mësuese për shumë vjet kryesisht me maturantë), duke qenë prind që gjithmonë te fëmija sheh tejkalimin e vetvetes, duke qenë qytetare që beson se e reja është ajo që triumfon përherë pavarësisht barrierave. E meqënëse kjo ndodh , ridimensionohet rëndësia që ka modeli që implantohet te ky brez, tek statura që ndërtohet aty, tek shembulli që përcohet dhe reminishencat që e kaluara ngulit aty.
Kemi një rini aktive, që vrapon drejt dijes me shpejtësinë që teknologjia bashkëkohore ofron, një rini që tenton të ketë edhe reputacionin, edhe paranë , që ka frikë të flasë për politikën edhe pse shpesh është preja e saj ,një rini që pret shumë ,sheh shumë,shpreson , zhgënjehet .E cfarë mbetet në një rast të tillë??? Që DIKUSH t’ju krijojë kushte që keta të veprojnë.
Tashmë në të gjitha territoret shqiptare duket se ndërveprojnë disa faktorë : – Klasa politike , -Diaspora, -Brezi i ri që po edukohet globalisht, brenda territoreve shqiptare dhe jasht tyre .
Po ti analizosh vec e vec ,cka do të ishte dhe duhet të jetë objekt i tryezave të vecanta, do të rendisje pafundësisht epërsi, dobësi , resurse …
Nuk dua të ndalem tek Klasa politike , atë e kemi ushqimin dhe helmimin tonë të përditshëm.
Dua të cikloj dicka që më bën ta shoh me mirënjohje diasporën si një faktor që padyshim hijeshon shqiptarinë me modelin e punës, ruajtjes së traditës, lidhjeve të forta me trojet amë dhe patriotizmin e natyrshëm ,aspak formal apo sezonal por të përhershëm dhe inspirues. Mjafton të ndjekësh veprimtaritë e tyre ku duket se malli , dashuria dhe distanca shkrihen duke ”ndërtuar” një mini atdhe në mjediset e tyre familjare,shoqërore, të festës dhe më gjere, që edhe pse mund të duken patetike, mbartin vlera të trashëguara, të ruajtura,të ripërtërira , vlera që dëshmojnë se te e djeshmja jonë e ndritëshme ka shkëlqime shprese, ashtu sic po atje gjen edhe histori e persekutime të padrejta që nuk duhet të përsëriten kurrë më.
Diaspora është jo vetëm një faktor por edhe një thesar nga ku historia merr kuptim , shkëlqim dhe pasurohet duke ofruar shpresat e alternativës.
Faktorizimi i rinisë do ishte tejkalimi i ngërceve, dilemave por edhe i padijes si trashëgim, mallkim apo solidarizim. Në 25 vjetët e post komunizmit ka mundur të rritet një brez tjetër , një brez ndryshe , që dijnë të tejkalojnë prindërit e tyre mëkatarë ose jo ,sigurisht përmes dijes, studimit dhe eksperiencave më të mira. Ky brez frymëzon tre breza duke bërë bashkë ato :bashkëmoshatarët , prindërit dhe gjyshërit e zhgënjyer apo shpresëëndërrimtar.
Dikur shkruaja një draft me titull ”Profile adoleshence” ku me emra ,portrete dhe arritje kisha ndërtuar një ”familje ” me nxënës që sot në fakt, shumë prej tyre shkëlqejnë ,emrat e tyre më rrijnë në mendje po aq sa progresi nëpërmjet të cilit ato rriteshin e maturoheshin…Unë mbaja shënime,,,Erda, Selmani, Orgesta,,,,janë me dhjetra e dhjetra , brenda dhe jasht Shqipërisë ,por me qindra janë idetë e tyre , arritjet, ëndrat ku ka mbidoza të dashurive tona me të cilat ato u mëkuan. Profileve të tyre të adoleshencës mund të shohësh mjekun e ardhshëm , diplomaten , sociologen,,,po aty mund të shohësh edhe karakterin e dubluar dhe frikacak,,, atë që heziton , tenton , trembet nga përballja me jetën, atë që guxon.
Jetës nuk i thuren plane(ndoshta) ,por me siguri asaj i rrihet pranë me kujdesin e mendjes , shpirtit dhe materiales.