Politike – Page 147 – Dielli

ZGJEDHJET E 14 MAJIT, “BASHKË FITOJMË” E VETMJA SHPRESË PËR SHQIPËRINË DHE SHQIPTARËT

May 10, 2023 by s p

Sokol Paja/

Zgjedhjet Vendore të 14 Majit janë zgjedhje historike për faktin politik, ekonomik e social në të cilën gjendet sot Shqipëria dhe shqiptarët. Zgjedhjet Vendore të 14 Majit janë shans për Shqipërinë pasi opozita e përfaqësuar nga koalicioni më i madh i shqiptarëve patriotë “Bashkë Fitojmë” ka një plan konkret për rigjallërimin e qyteteve, jetës sociale, artistike, ekonomike e kulturore të vendit. Zgjedhjet Vendore të 14 Majit janë të një rëndësie të veçantë për demokracinë dhe plularizmin pasi opozita do të çlirojë pushtetet dhe institucionet e kapura prej kryeministrit Rama dhe rrethit të tij të ngushtë të oligarkëve. Zgjedhjet Vendore të 14 Majit janë një bllokadë e fuqishme kundër shpopullimit të Shqipërisë, mundësi e artë për çdo shqiptar që e do atdheun e tij, që ta shohë veten të realizuar në tokën e tij.

Opozita ka plan dhe projekt konkret që ofron një Atdhe që i do të gjithë dhe Shqipëria të behet një vend i aksesueshëm dhe i jetueshëm njësoj për të gjithë qytetarët e saj. Zgjedhjet Vendore të 14 Majit janë një grusht i fuqishëm opozitar kundër varfërisë e mjerimit pasi kandidatët e koalicionit opozitar “Bashkë Fitojmë” kanë ofruar zgjidhje reale dhe paketa sociale për shtresat në nevojë që të mos ndjehen kurrë më të pa përkrahur, të përjashtuar, të pa mbrojtur dhe të menjanuar.

Çdo shqiptar duhet ta refuzojë dhe ndëshkojë me forcën e votës talljen, banalitetin, tallavanë, gjuhën fyese, denigruese e kërcënuese, të kryeministrit Rama, mungesën e programit e projekteve që përmirësojnë jetën e shqiptarëve. Shqiptarët nuk duan cirk, propagandë dhe tallava. Shqiptarët kanë nevojë për shtet.

Opozita në Shqipëri sot përfaqëson të vetmen shpresë për Shqipërinë dhe shqiptarët përballë qeverisjes më të shëmtuar e më të dëmshme që pas rënies së komunizmit në Shqipëri. Fitorja e opozitës shpëton Shqipërinë nga neodiktatura 10 vjeçare e kryeministrit Rama dhe mëkëmbësve të tij që kontrollon, orkestron, shantazhon e ndërsen gjithçka në Shqipëri.

Çdo shqiptar duhet ta përkrahë koalicionit opozitar “Bashkë Fitojmë” pasi është e vetmja mënyrë që të ndëshkohen rilindasit e Ramës për korrupsionin qeveritar, nepotizmin, krimin shtetëror, babëzinë, vjedhjet e hajdutërinë, monizmin institucional, monizmin mediatik, uzurpimin e kontrollin e të gjitha qelizave shtetërore prej neodiktatorit Edi Rama dhe sektit të tij rilindas.

Qeveria Rama është fajtor i përjetshëm për dëbimin e rreth 1 milion shqiptarëve nga Shqipëria. Genocid i organizuar shtetëror, fatal për kombin shqiptar. Për 10 vjet përzuri dhe zhduku 1/3 e popullsisë së Shqipërisë dhe çdo votë për kandidatët e majtë më 14 Maj 2023, përkthehet në shpopullim dhe shfarosje të shqiptarëve të mbetur në Shqipëri. Opozita ofron vlera, qeverisja ofron konsumizmin e një dekade. Opozita ofron zhvillim, qeverisja ofron dështim. Opozita ka shanse dhe alternativa reale për qyetarët, ndërsa qeverisja ofron trenë elektrikë imagjinarë.
Kandidatët e opozitës “Bashkë Fitojmë” përfaqësojnë vlera të larta morale, profesionale, shoqërore e qytetare, intelektualë e profesionistë të shkëlqyer. Çdo shqiptar i ndershëm dhe patriot, çdo mërgimtar, çdo shqiptar kudo që ndodhet dhe i dhëmb zemra për Shqipërinë, duhet të bashkohet sot me opozitën për të çliruar Shqipërinë e shqiptarët prej zullumqarëve që vjedhin e rrjepin Shqipërinë prej 10 vitesh.

Ekspozita “Shën Nënë Tereza” në Uashington

May 10, 2023 by s p

Sokol Paja/

Zois Shuttiè, artisti i shquar shqiptar do të hapë një ekspozitë kushtuar shenjtores shqiptare Shën Nënë Tereza në Uashington në Sallën Rotunda të Kongresit Amerikan. Së bashku me organizatorët po punohet që kjo ekspozitë të hapet në vjeshtë. Patrioti Anton Raja do të jetë udhëheqësi i këtij organizmi patriotik, artistik e kulturor, kaq të rëndësishëm për komunitetin shqiptar dhe kombin tonë. Nëpërmjet kësaj ekspozite institucionet amerikane i japin shoqërisë dhe artdashësve mundësinë të njihen me krijime artistike autentike të piktorit të shquar Zois Shuttiè, portrete të arrira artistikisht të Shën Nënë Terezës humanistes së famshme shqiptare që lartëson vlerat më të çmuara të kombit shqiptar. 32 vite më parë artisti Zois Shuttiè e hapi një tjetër ekspozitë artistike kushtuar Nënë Terezës në Sallën Rotunda të Kongresit Amerikan. Ekspozita e sivjetshme do të përmbajë 20 piktura. Zois Shuttiè u arratis nga Shqipëria komuniste në vitin 1964 dhe mbërriti në Philadelphia 1965. Ai ka studiuar në Akademinë e Arteve të Pensilvanisë. Që në vitin e parë si student hapi ekspozitën e parë të pikturës në “shtëpinë e miqësisë” në Philadelphia. Gjatë gjithë jetës së tij dhe krijimtarisë artistike ka realizuar mbi 3 mijë piktura dhe 200 ekspozita. Sot është 85 vjeç dhe vazhdon akoma të krijojë vepra artistike dhe shkrime të ndryshme letrare në gjuhën angleze. E gjithë shtëpia e tij është e mbushur në çdo hapësirë me piktura të realizuara ndër vitet e jetës së tij të gjallë artistike. Shtëpia e Zois Shuttiè në Bronx, New York është shtëpia më artistike shqiptare me piktura të motiveve, teknikave, profileve e gjinive të ndryshme artistike.

GJERGJ KASTRIOTI – SKENDERBEU VAZHDON TË “PUSHTOJË” AMERIKËN

May 9, 2023 by s p

Nga Frank Shkreli

Gjergj Kastrioti – Skenderbeu, trim i trimave, i përgjithëmonshmi i Kombit — shqiptar i përmasave botërore, në Ditëlindjen e tij, 6 Maj. Por, a është i tillë, Gjergj Kastrioti -Skenderbe për të gjithë shqiptarët?!

Presidentja e Republikës së Kosovës, Vjosa Osmani ka kujtuar ditëlindjen e Heroit tonë kombëtar Gjergj Kastrioti – Skënderbeu — Presidentja Osmani ka kujtuar ditëlindjen e heroit tonë kombëtar Gjergj Kastrioti – Skënderbeu – Lajme – Presidente e Republikës së Kosovës – DR. VJOSA OSMANI – SADRIU (president-ksgov.net)

Edhe Kryeministri i Republikës së Kosovës, Albin Kurti e kujtoi Gjergj Kastriotin Skenderbe në ditëlindjen e tij me një deklaratë, fund javën që kaloi — Albin Kurti | Facebook, duke e cilësuar Heroin Kombëtar me këto fjalë: “Luftëtar i guximshëm e patriot i madh, prijës i shquar dhe strateg ushtarak, politikan vizionar dhe diplomat i shkathët, Gjergj Kastrioti – Skënderbeu është personaliteti më i rëndësishëm në historinë e shqiptarëve, kurse figura e tij prej heroi, nga koha e tij te rimarrja prej rilindasve dhe deri te ne sot, ka mbetur qendror në identitetin shqiptar. Lavdi heroit të kombit Gjergj Kastriotit – Skënderbeut për jetë e mot!”, është shprehur Kryeministri i Kosovës Albin Kurti në Ditën e lindjes së Skenderbeut.

Ndërsa në Shqipëri nuk pashë të jetë kujtuar kjo ditë. U vendosën kurora me lule pranë monumentit të Dëshmorve të Kombit – Një akt shumë me vend!

Por, pranë Monumentit të Gjergj Kastriotit -Skenderbe, në Sheshin me të njëjtin emër në Tiranë, nuk lexova të jetë vendosur, asnjë buqetë me lule për të kujtuar, zyrtarisht, “kryendërtuesin e atdheut të shqiptarëve” – Qofsha i gabuar për këtë, dhe nëse jam i gabuar, kërkoj ndjesë, paraprakisht! Nejse, duket sikur pozita dhe opozita politike në Shqipëri janë kacafyt në një fushatë për pushtet – “për jetë e vdekje” – dhe nuk kanë kohë as të mendojnë për Skenderbeun, as për historinë e Kombit dhe as për rolin e këtij vigani në historinë e shqiptarëve dhe dhe në ruajtjen e identitetit historik të Kombit shqiptar. Sidoqoftë, kjo është puna e tyre dhe e votuesve shqiptarë që tolerojnë shkelje të tilla të historisë së kombit dhe të heronjve të saj, si Gjergj Kastrioti -Skenderbe, por të jenë të sigurt, të dy palët e politikës shqiptare, se pa Skenderbeun – nuk shkohet “përpara”, as nuk fitoni të “bashkuar”.

Kam drojë se në këtë fushatë politike në Shqipëri, por jo vetëm, pasi ka ndodhur edhe në të kaluarën, kur përvjetore të jetës dhe veprimtarisë së Skenderbut kanë kaluar pa u përmendur fare nga disa qarqe të caktuara – duket se edhe sivjet aktivitetet dhe brohoritjet politike në Shqipëri, me qëllim ose pa qëllim, vazhdojnë të jenë pjesë e një harrese që çon drejt shuarjes së kujtimit të tij dhe të veprave të lavdishme të Krye-Heroit Kombëtar Gjergj Kastriotit-Skenderbe.

NDËRKAQ dhe për fat të mirë, shqiptarët këtu në Shtetet e Bashkuara të Amerikës, mundohen që çdo vit ta kujtojnë Skenderbeun, në data të caktuara, për vetën e tyre dhe të brezave këtu, por edhe për amerikanët që edhe ata të dinë e të mësojnë se kush ishte Gjergj Kastrioti-Skenderbeu i Kombit shqiptar dhe kush në të vërtetë janë shqiptarët!?

Komuniteti shqiptaro-amerikan, nën drejtimin e aktivistit të dalluar të komunitetit tonë këtu, Z. Mark Gjonaj, i cili me ndihmën e shumë organizatave shqiptaro-amerikane, organizuan edhe sivjet — në pervjetorin e dytë të shpalljes me emrin “Rruga Gjergj Kastrioti Skënderbeu” në Bronks të Nju Jorkut — Frank Shkreli: Gjergj Kastrioti – Skënderbeu me një rrugë të tijën në Nju Jork | Gazeta Telegraf — u organizua festimi dhe panairi i rrugës. Të Dielën me 7 Maj, për nja 6 orë me mijëra pjesëtarë të komuniteti shqiptaro-amerikan morën pjesë dhe u argëtuan me programe të ndryshme, nga dhjetëra këngëtarë e këngëtare të ardhur nga të gjitha trojet shqiptare në Nju Jork për këët qëllim. Ata me kreanri kombëtare, me fjalë, këngë e valle shpalosën traditën dhe kulturën, muzikën, vallet popullore, ushqimet dhe aktivitete të tjera, jo vetëm për komunitetin, por edhe për amerikanët vendas. Ishte kjo një ditë gëzimi e festimi, në kujtim të Heroit të madh të Kombit shqiptar – aty në hapësirën e rrugës që mban emrin Gjergj Kastrioti -Skenderbeu – këtu në Amerikën e largët u mblodhën shqiptarët nga të gjitha trojet dhe pa dallim — duke shpalosur krenarinë dhe Bashkimin e tyre rreth Kryeheroit Kombëtar.

Ndërsa në një komunitet tjetër shqiptaro-amerikan – që cilësohet si më i vjetri këtu në Shtetet e Bashkuara – në Uster të shtetit Masaçusets, jo larg Bostonit – një kryeqenër tjetër e madhe e shqiptaro-amerikanëve, me 21 të Marsit që kaloi, mësuam se Këshilli Bashkiak i atij qyteti miratoi, në parim, kërkesën e përfaqsuesve të komunitetit shqiptaro-amerikan atje për të emëruar një rrugë të atij qyteti me emrin Gjergj Kastrioti- Skenderbe. Kronika e gazetarit Ardian Murraj në Youtube: VOAL Gjergj Kastrioti Scanderbeg Way, Public Works Committee, 04 /24 /2023 – YouTube. Sipas këtij informacioni, Komiteti i Punëve Publike të Bashkisë së qytetit të Usterit miratoi, përfundimisht dhe zyrtarisht, me 25 Prill, 2023 vendimin për nderimin me emrin Gjergj Kastrioti Skënderbeu (Way). Ceremonia zyrtare festive e nderimit me emrin Gjergj Kastrioti Skënderbeu do të mbahet në prag të Festivalit Shqiptar të Usterit, që pritet të bëhet gjatë fundjavës së parë të muajit Qershor, 2023.

Shpesh media shqiptare në përgjithësi ia “ben me hile” këtij komunitetit në Uester, duke e qitur në harresë pa të drejtë, pasi edhe sot ashtu si, historikisht, ky komunitet ka luajtur dhe luan një rol të rëndësishëm në historinë e shqiptarëve në Amerikë që kanë emigruar heret, por që është ringjallur si të thuash me emigrantë të ardhur dekadat e fundit nga të gjitha trojet shqiptare, por sidomos nga Shqipëria, prandaj vendimi për të emruar një rrugë në emër të Skenderbeut është domethënse për shqiptaro-amerikanët, duke u kujtuar atyre Heroin dhe Atdheun.

“Kjo shënoi me të vërtetë një ngjarje historike pasi lidhet me disa vite jubilarë përkujtimorë së bashku dhe po kaq festive për shqiptarët e Usterit të cilët kanë treguar në vazhdimësi përpjekjet e mërgimtarëve të vendosur këtu gati 150 vite më parë. Prania e bashkëatdhetarëve shqiptarë dhe të Kosovës (në seancën e Bashkisë) me flamuj dhe kostume popullore ishte e gëzueshme dhe solemne pasi ata bashkohen rreth Heroit të tyre Kombëtar, figurës shumë të dashur për ta, Gjergj Kastrioti Skënderbeut”, ka shkruar me këtë rast gazetari Ardian Murraj në kronikën e tij mbi këtë ngjarje historike për komunitetin shqiptaro-amerikan në Uester dhe për shqiptaro-amerikanët, në përgjithësi.

Gazetari Murraj me të drejtë lavdëron rolin historik të komunitetit shqiptaro-amerikan në Uester të shtetit Massachusetts, “Si një bashkësi që vlerëson dhe shkëmben vlerat e historisë, kulturës dhe traditave të shumë kombësive Usteri u bë qyteti parë në Masaçusets që nderon një figurë legjendare të historisë botërore të lidhur ngushtë me krenarinë e një populli, një histori që bashkatdhetarët shqiptaro-amerikanë kanë filluar ta shkruajnë pasi ata shquhen gjerësisht dhe janë pjesëmarrës në zhvillimet e jetës së këtij qyteti”, është shprehur ai.

Përkujtimi i Gjergj Kastriotit – Skenderbeu, sidomos në Shqipëri e Kosovë, por edhe anë e mbanë trojeve shqiptare, pa përjashtuar edhe diasporën shqiptare qoftë në Amerikë, qoftë në Evropën Perëndimore – ka shumë rëndësi, sepse siç është shprehur me një rast Ernest Koliqi: “Pak janë ata të huaj që na përfillin. Dikush na urren, shumica harron se ka një komb shqiptar. Kemi nevojë për kuptim e mbështetje sepse shumë paragjykime ushqejnë përgjithësisht të huajt mbi ne dhe çeshtjet tona…”. Duke shënuar përvjetorë të Gjergj Kastriotit -Skenderbe, ka shkruar Koliqi, i kujtojmë vetes dhe botës, njëkohësisht, ekzistencën tonë dhe vuajtjet e padrejta që na kanë mbuluar, por njëkohësisht, një përkujtim i tillë i Skenderbeut, sjellë një shërbim të pashoq, Shqipërisë dhe shqiptarëve, kudo. Është obligim moral dhe atdhetar që Skenderbeu të kujtohet dhe të mos harrohet nga diaspora shqiptare në Amerikë, por as nga Shqipëria dhe Kosova. Përkujtimi i Gjergj Kastriotit -Skenderbeut është një përgjegjësi numër një e udhëheqësve aktualë të Kombit – në të njëjtin nivel siç është përgjegjësia e tyre për mbrojtjen e sigurisë, të territorit shqiptar dhe identitetit kombëtar të shqiptarëve.

Frank Shkreli

Foto Gazeta Dielli

Foto: Gazeta Dielli

Nga akitiviteti nl Bashkinë e qytetit Uester në shtetin Masaçusets

“GJERGJ KASTRIOTI SKENDERBEU”

May 8, 2023 by s p

“GJERGJ KASTRIOTI SKENDERBEU” – HERO KOMBËTAR, HISTORI SHQIPTARE, KRENARI IDENTITARE, TRASHËGIMI SHPIRTËRORE E MATERIALE, MISION E VIZION, VAZHDIMËSI NË SHEKUJ, TRADITË E PASTËR E KOMBIT DHE MËRGATËS NË SHTETET E BASHKUARA, MUZIKË AUTENTIKE SHQIPTARE, VALLE TRADICIONALE, USHQIM TRADICIONAL, STIL, VESHJE SHQIPTARE, ZEMRA PLOT, SHPIRTI NË FLAKË. TË GJITHË SHQIPTARËT E AMERIKËS FESTOJNË NË BRONX, NEW YORK, TË BASHKUAR NË NJË FESTIVAL NË NDERIM TË HEROIT E HISTORISË SË LAVDISHME TË KOMBIT SHQIPTAR.

DIALOGU MES KOSOVËS DHE SERBISË TË JETË NËN PATRONAZHIN E PRESIDENTIT JOE BAIDEN

May 6, 2023 by s p

Ph.D. Elmi Berisha/

Në cilësinë e kryetarit të Federatës Pan-Shqiptare të Amerikës “Vatra” dhe si aktor i proceseve për lirinë dhe pavarësinë e Kosovës, jam duke përcjellur me vëmendje të veçantë procesin e dialogut mes Republikës së Kosovës dhe Serbisë. Pas zotimit të palëve me 27 shkurt dhe Marrëveshjes për Normalizimin e Marrëdhënieve me 18 mars të këtij viti, jo vetëm si “Vatër” por edhe si komunitet shqiptar në SHBA, kemi vërejtje substanciale dhe shqetësime serioze në raport me agjendën, konceptin e udhëheqjes së negociatave e në veçanti me përpjekjet në heshtje që të barazohet viktima me xhelatin. Në veçanti jemi të shqetësuar me presionin e madh që po i bëhët delegacionit të Kosovës që të bëjë koncesione dhe kompromise të cilat kam drojë se do e dobësojnë rendin kushtetues, rregullimin e brendshëm shtetëror dhe funksionalitetin e shtetit të Kosovës.

Se kush është Serbia dhe lidershipi i saj, tanimë e din e gjithë bota demokratike dhe opinioni i gjerë ndërkombëtar. Se sa është Serbia “demokratike” dhe sa i respekton ajo marrëveshjet dhe zotimet ndërkombëtare po ashtu është e njohur për të gjithë opinionin ndërkombëtar. Se Serbia është ledhatuar dhe i janë bërë koncensione dhe vazhdojnë t’i bëhën ende nga disa vende evropiane, kjo nuk është gjë e re. Që nga 18 marsi kur është zotuar dhe obliguar që ta respektojë plotësisht Marrëveshjen për Normalizimin e Marrëdhënieve, Serbia ka bërë dhjetëra shkelje të kësaj marrëveshjeje, qoftë me deklarata nga presidenti (ish funksionar i partisë së kryeçetnikut Sheshel dhe ministër i Millosheviqit), qoftë nga ministri i jashtëm serb (ish zëdhënës i partisë së Millosheviqit dhe tani kryetar i partisë së tij), ndërkohë që nuk kemi dëgjuar asnjë reagim të vetëm nga “ndërmjetësit” dhe garantuesit e kësaj marrëveshje. Shqetësuese është se vetëm një veprim minor ose një deklarim publik i zyrtarëve të qeverisë së Kosovës, të cilët veprojnë konform kushtetutës së shtetit sovran të Kosovës lidhur me këtë proces, vijnë reagime dhe presione të mënjehershme nga “ndërmjetësit kujdestarë” dhe garantuesit e marrëveshjes.

Kosova është e lirë dhe e pavarur falë angazhimit maksimal të shtetit dhe popullit amerikan, për çka ju jemi përjetësisht mirënjohës. Sipas vlerësimit tim, në muajt e fundit ka një diskurs tjetër të diplomatëve të SHBA-ve të angazhuar në Ballkanin Perëndimor sa i takon procesit të dialogut mes Kosovës dhe Serbisë. Qasja dhe deklarimet e tyre shpeshherë bien ndesh me parimet themelore demokratike dhe në shumë raste duke mbajtur anë në favor të Serbisë. Konkretisht jam ndjerë i befasuar me disa deklarata të ambasadorit të SHBA-ve në Beograd z. Chris Hill, një diplomat me përvojë të madhe në rajon dhe njohës i shkëlqyeshëm i raporteve Kosovë – Serbi. Deklarimet e tij publike kohëve të fundit janë pa sens diplomatik dhe në mbështetje të “diktatorit të vogël” Vuçiq, për profilin e të cilit këto ditë ka shkruar gazeta prestigjioze amerikane New York Times, e cila pasqyron krimin e organizuar dhe krimet e tjera të viteve të fundit në Serbi si dhe nëntokën e këtij shteti që e lidh drejtpërdrejt me Vuçiq, i cili kohëve të fundit është bërë “partner i besueshëm” i diplomatëve amerikan. Në të njëjtin diskurs politik po vepron edhe i deleguari i Stejt Departamentit për Ballkaninin Perëndimor z. Eskobar, i cili muajt e fundit po bën një presion të paparë ndaj delegacionit kosovar dhe ka pasur deklarata jo të balancuara dhe aspak diplomatike duke aluduar në përgjegjësi të palës kosovare sa i takon zbatimit të marrëveshjes së Ohrit. Vlerësoj se qeveria e Kosovës ka qenë tejet konstruktive dhe kooperative në këtë proces, kurse Serbia në secilin rast ka tentuar të minojë dhe t’i eskivojë obligimeve për jetësimin e marrëveshjes. “Shuttle diplomacia” e Eskobar nuk mund të llogaritet as në përmbajtje e as në veprime me atë të ambasadorit të ndjerë Riçard Holbruk. Ambasadori Holbruk vepronte konkretisht, me vendosmëri dhe nuk bënte balance mes xhelatit dhe viktimës.

Ne si komunitet shqiptaro-amerikan që ishim dhe vazhdojmë të jemi tejet aktiv në këto procese, në të cilat, personalisht, kam qenë pjesë e disa takimeve me Holbruk në periudhën 1998-1999 dhe me ambasadorin Frank Vizner 2005-2008, shpeshherë me kërkesë të tyre, ku na njoftonin në detaje me ecurinë e proceseve në të dy periudhat e veprimtarisë së tyre në emrin e popullit dhe të qeverisë së SHBA-ve. Z. Eskobar nuk e ka parë të arsyeshme të takohet asnjëherë me përfaqësuesit e komunitetit shqiptaro-amerikan. Mbase mendon që po vepron dhe ka potencën politike të ambasadorit Holbruk! Rezultatet flasin të kundërtën! Këpucët e Holbruk janë të mëdha dhe nuk i bien taman as z. Eskobar e as z.Hill! Por është një diplomat amerikan në rajon që është shëmbull i ambasadorit me kredibilitet të lartë dhe me qasje racionale të balancuar dhe të paanshme. Ky është ambasadori i SHBA-ve në Prishtinë z. Hovenier. Angazhimet e tij për Kosovën dhe sidomos asistimi dhe këshillat e tij në menaxhimin e krizave të vitit të fundit, të provokuara dhe dirigjuara nga Beogradi zyrtar në veri të vendit, janë për tu admiruar. Qasja dhe veprimet e tilla diplomatike janë në funksion të paqes, stabilitetit dhe sundimit të rendit dhe ligjit për të gjithë qytetarët e Kosovës, si shtet demokratik, me përbërje multietnike.

Shteti i Kosovës është “fëmijë” i mikut tonë dhe partnerit strategjik të kombit tonë SHBA-ve, prandaj roli i SHBA-ve në përfundimin e procesit të normalizimit në mes Kosovës dhe Serbisë duhet të jetë shumë më proaktiv, më dinamik, i panshëm dhe të bazohet në realitetin e ri. Kjo qasje e kohëve të fundit nga këta diplomatë të SHBA-ve që janë të kyçur në këtë proces lë shumë për të dëshiruar.

Konsideroj se është momenti i fundit që Presidenti Baiden të monitorojë personalisht këtë proces tejet të rëndësishëm për paqen dhe stabilitetin në rajonin e Ballkanit Perëndimor. Duke qenë njohës i mirë i raporteve në rajon, dhe duke qenë se është marrë me dekada me këtë çështje, duke ditur orientimin strategjik të Kosovës pro integrimeve euro-atlantike, është momenti i fundit që Presidenti Baiden, me autoritetin e tij, ti japë kahje të duhur dhe dinamikë më proaktive përmbylljes së këtij procesi në mënyrë reale dhe konform realitetit të ri, që është meritë edhe e kujdesit të SHBA-ve për paqe dhe stabilitet në këto hapësira.