Rajon – Page 128 – Dielli

Kosovë-Ministri i FSK takime në Kanada

November 23, 2015 by dgreca

-Ministrit Demolli u takua në Halifaks me Zëvendës Sekretarin e Mbrojtjes të Shteteve të Bashkuara të Amerikës, Robert Work, pastaj me Ministrin e Mbrojtjes të Kanadasë, Harjit Sajjan si dhe atë të Republikës së Shqipërisë dhe të Republikës së Maqedonisë/
Ministri për Forcën e Sigurisë së Kosovës, Haki Demolli, me ftesë të Forumit Ndërkombëtar të Halifaksit për Siguri, mori pjesë në punimet e Konferencës “Avancimi i sigurisë nga vizioni modern”, që u zhvillua në Halifaks të Kanadasë nga data 20-22 nëntor 2015.
Ministri i FSK-së, Demolli në punimet e Konferencës në Halifaks foli për perspektivën aktuale të Kosovës në sfidat më të ngutshme të sigurisë, duke bërë që tema të zgjoi interesim të madh tek audienca e gjerë pjesëmarrëse në Konferencë. Ministri Demolli ndër të tjera u fokusua edhe tek sfidat e përgjithshme që rajoni po ballafaqohet dhe rikonfirmoi se rruga e vetme për rajonin është përshpejtimi i integrimeve Euro-Atlantike të vendeve te Ballkanit.
Gjithashtu, ministri Demolli zhvilloi edhe një varg takimesh bilaterale dhe multilaterale me disa prej ministrave të Mbrojtjes të vendeve anëtare të NATO-s pjesëmarrëse në Konferencë e gjithashtu edhe me disa prej ministrave të vendeve partnere të NATO-s.
Ministrit Demolli u takua në Halifaks edhe me Zëvendës Sekretarin e Mbrojtjes të Shteteve të Bashkuara të Amerikës, Robert Work, pastaj me Ministrin e Mbrojtjes të Kanadasë, Harjit Sajjan si dhe atë të Republikës së Shqipërisë dhe të Republikës së Maqedonisë. Në takime u diskutua për sfidat dhe rreziqet që vijnë dhe nevoja që bashkërisht dhe njëzëri të unifikohen qëndrimet e botës demokratike dhe përmes bashkëpunimit gjithëpërfshirës të ballafaqohemi me rreziqet e ashtuquajtura bashkëkohore.
Ministri i FSK-së, Demolli zhvilloi një takim kokë me kokë me ministrin e Mbrojtjes së Kanadasë, Harjit Sajjan. Ministri e falënderoi me këtë rast shtetin e Kanadasë për gjithë ndihmën e dhënë për Kosovën dhe kontributin për popullin dhe shtetin e Kosovës.
Po ashtu e falënderoi ministrin Sijjan për përkrahjen e vazhdueshme që shteti i Kanadasë i ka ofruar Republikës së Kosovës në rrugën e saj të pakthyeshme Euro-Atlantike. Në takim u theksua gjithashtu kontributi i Kanadasë në KFOR dhe në ekipet këshilluese në MFSK dhe FSK deri me tani.
Ministri Demolli në takim e ngriti idenë e një Marrëveshje Bilaterale në mes MFSK-s dhe Departamentit Nacional Kanadez të Mbrojtjes në fushën e sigurisë dhe mbrojtjes. Po ashtu Ministri Demolli ftoi ministrin kanadez për një vizitë në Republikën e Kosovës.
Ministri kanadez Sajjan e rikonfirmoi edhe një herë se kontributi dhe përkrahja e Kanadasë nuk do të mungojë për Republikën e Kosovës dhe se do të shqyrtohen mundësitë dhe rrugët e bashkëpunimit dypalësh në të ardhmen e afërt.
Ministrin Demolli në Forumin e Halifaksit e shoqërojnë edhe Ambasadori i Republikës së Kosovës në Kanada, Lulzim Hiseni si dhe Sinan Geci, shef i Sektorit për bashkëpunim Euro- Atlantik në ministrinë për FSK.
Forumi Ndërkombëtarë për Siguri në Halifaks është i njohur si një vendtakim vjetor, i cili krijon hapësirë ku vendimmarrësit mund të bëjnë bashkërisht zgjidhjet e vështira. Tani në kohën kur vendet demokratike po ballafaqohen me kërcënime kjo është shumë urgjente sepse asnjë vend veç e veç nuk mund të zgjidhë probleme si i vetem, ashtu sikurse këtë mund ta bëjnë liderët e mençur së bashku.
Forumi Ndërkombëtarë për Siguri në Halifaks ngrit në nivel më të lartë bashkëpunimin strategjik midis shteteve demokratike në botë. Pjesmarrësit që mblidhen në Halifaks për çdo nëntor prezantojnë më shumë se 60 shtete, por tani kanë vënë një limit, jo më shumë se 300 pjesëmarrës./b.j/

MANASTIR-Shqipëria, Kosova e Maqedonia – bashkëpunim në arsim dhe shkencë

November 22, 2015 by dgreca

-Nënshkrim marrëveshje në Muzeun e Alfabetit në qytetin e Manastirit, ku para 107 viteve, gjenerata më eminente e asaj kohe e Rilindjes sonë kombëtare mbajti Kongresin dhe unifikoi apo themeloi Alfabetin e gjuhës shqipe, bëri bashkimin gjuhësor të shqiptarëve/
MANASTIR, 22 Nëntor 2015/ Në Muzeun e Alfabetit të Gjuhës Shqipe në Manastir, sot Shqipëria, Kosova dhe Maqedonia nënshkruan Programin e Bashkëpunimit për arsim dhe shkencë.
Ministria kosovare bën të ditur se ministri i Arsimit, Shkencës dhe Teknologjisë, Arsim Bajrami dhe ministri i Arsimit dhe Shkencës i Maqedonisë, Abdilaqim Ademi, kanë nënshkruar sot në Manastir “Programin e Bashkëpunimit ndërmjet Ministrisë së Arsimit, Shkencës dhe Teknologjisë së Republikës së Kosovës dhe Ministrisë së Arsimit dhe Shkencës të Republikës së Maqedonisë”.
Në ceremoninë e nënshkrimit të Programit ishte prezent edhe zëvendëskryeministri i Maqedonisë, Musa Xhaferi dhe ministrja e Arsimit dhe Sportit e Shqipërisë, Lindita Nikolla, e cila po ashtu, nënshkruajti të njëjtën marrëveshje me ministrin Ademi.
Nënshkrimi i Programit është bërë në kuadër të Marrëveshjes për Bashkëpunim në fushën e arsimit dhe shkencës, e cila është nënshkruar në korrik të këtij viti në Vlorë, mes Republikës së Kosovës dhe Republikës së Maqedonisë, me synim përforcimin e marrëdhënieve mes dy shteteve në këtë fushë.
“Programi i Bashkëpunimit ndërmjet Ministrisë së Arsimit, Shkencës dhe Teknologjisë së Republikës së Kosovës dhe Ministrisë së Arsimit dhe Shkencës të Republikës së Maqedonisë për periudhën 2015-2018 që e nënshkruam sot, është një instrument i rëndësishëm për të plotësuar detyrimet tona për realizimin e Marrëveshjes së Bashkëpunimit në arsim dhe në shkencë ndërmjet Republikës së Kosovës dhe Republikës së Maqedonisë, të 2 korrikut 2015”, tha ministri Bajrami.
Ndërsa, media shqiptare në Maqedoni bën të ditur se, zëvendës kryetari i Qeverisë së Republikës së Maqedonisë, Musa Xhaferri, sot me rastin e 22 Nëntorit Ditës së Alfabetit ka vizituar Muzeun e Alfabetit në qytetin e Manastirit. Ai në këtë rast ka marrë pjesë në takimin e përbashkët të tre ministrave të Arsimit, të Republikës së Maqedonisë, Abdilaqim Ademi, të Republikës së Shqipërisë, Lindita Nikolla dhe Republikës së Kosovës, Arsim Bajrami të cilët nënshkruan Programet Ekzekutive për bashkëpunim në sferën e arsimit dhe shkencës.
Në këtë rast zëvendëskryeministri Xhaferri të gjithë qytetarëve shqiptarë ua uroi këtë ditë, ku para 107 viteve , këtu në Manastir u themelua Alfabeti i Gjuhës Shqipe.
“Për mua është kënaqësi që me rastin e Ditës së Alfabetit të gjuhës shqipe të jenë bashkë me ne këtu tre Ministrat e Arsimit dhe Shkencës ,nga Republika e Shqipërisë, Kosovës e Maqedonisë ku patëm rastin të jemi dëshmitarë të nënshkrimit të bashkëpunimit, diçka që ka qenë domosdoshmëri. Besoj se do vazhdojë edhe në të ardhmen të pasurohet ky bashkëpunim në kuadër të arsimit, shkencës, kulturës, sportit, varësisht sesi përkufizohet.
Është rast i veçantë që na nderon neve shqiptarëve që ky nënshkrim bëhet në Muzeun e Alfabetit të Gjuhës Shqipe, ku para 107 viteve, gjenerata më eminente e asaj kohe e Rilindjes tonë kombëtare mbajti Kongresin dhe unifikoi apo themeloi Alfabetin e gjuhës shqipe, bëri bashkimin gjuhësor të shqiptarëve. Atëherë Kongresi dhe delegatët në emër të Kongresit u përcaktuan për vlerat perëndimore dhe Alfabeti ynë është me shkronja latine, që ka një domethënie për periudhën që po kalojmë dhe të jemi konsekuent të vlerave perëndimore dhe euroatlantike”, tha Xhaferri, cituar nga Tetova Sot.
Në Muzeun e Alfabetit, zëvendëskryeministri Xhaferri ka hapur Tribunën shkencore me temë: “Atdhetari i shquar Mit’hat Frashëri”.
Ndërsa, sonte me fillim në ora 19.00 në qendrën për Kulturë në Manastir, zëvendëskryeministri Xhaferri do të marrë pjesë në Akademinë solemne që organizohet me rastin e Ditës së Alfabetit./b.j/

***

Prishtinë, 22 nëntor 2015

Komunikatë

Ministrat Bajrami dhe Ademi nënshkruan Programin e Bashkëpunimit për arsim dhe shkencë mes dy vendeve

Ministri i Arsimit, Shkencës dhe Teknologjisë, z. Arsim Bajrami dhe ministri i Arsimit dhe Shkencës i Maqedonisë, z. Abdilaqim Ademi, kanë nënshkruar sot në Manastir “Programin e Bashkëpunimit ndërmjet Ministrisë së Arsimit, Shkencës dhe Teknologjisë së Republikës së Kosovës dhe Ministrisë së Arsimit dhe Shkencës të Republikës së Maqedonisë”.
Nënshkrimi i Programit është bërë në kuadër të Marrëveshjes për Bashkëpunim në fushën e arsimit dhe shkencës, e cila është nënshkruar në korrik të këtij viti në Vlorë, mes Republikës së Kosovës dhe Republikës së Maqedonisë, me synim përforcimin e marrëdhënieve mes dy shteteve në këtë fushë.
“Programi i Bashkëpunimit ndërmjet Ministrisë së Arsimit, Shkencës dhe Teknologjisë së Republikës së Kosovës dhe Ministrisë së Arsimit dhe Shkencës të Republikës së Maqedonisë për periudhën 2015-2018 që e nënshkruam sot, është një instrument i rëndësishëm për të plotësuar detyrimet tona për realizimin e Marrëveshjes së Bashkëpunimit në arsim dhe në shkencë ndërmjet Republikës së Kosovës dhe Republikës së Maqedonisë, të 2 korrikut 2015”, tha ministri, z. Arsim Bajrami.
Në ceremoninë e nënshkrimit të Programit, ishte prezent edhe zëvendëskryeministri i Maqedonisë, z. Musa Xhaferi dhe ministrja e Arsimit dhe Sportit e Shqipërisë, znj. Lindita Nikolla, e cila po ashtu, nënshkruajti të njëjtën marrëveshje me ministrin Ademi.

Me respekt,
Divizioni per Komunikim Publik
Tel: 038 213 065

Kosova në “Avancimi i sigurisë nga vizioni modern”

November 21, 2015 by dgreca

-Ministri Haki Demolli në Forumin Ndërkombëtar të Sigurisë në Halifaks-Kanada/

Halifaks – Kanada, 21 Nëntor 2015/ Ministri për Forcën e Sigurisë së Kosovës, Haki Demolli me ftesë të Forumit Ndërkombëtare të Halifaksit për Siguri, po merr pjesë në punimet e Konferencës “Avancimi i sigurisë nga vizioni modern”, që po mbahet në Halifaks – Kanada. Konferenca do të zgjasë deri në 22 nëntor 2015.
Ministri i FSK-së, Demolli në Konferencën në Halifaks do të flasë për perspektivën aktuale të Kosovës në sfidat më të ngutshme të sigurisë.
Forumi Ndërkombëtarë për Siguri në Halifaks është i njohur si një vendtakim vjetor, i cili krijon hapësirë që vendimmarrësit të gjejnë bashkërisht zgjidhje për çështje të vështira.
Tani në kohën kur vendet demokratike po ballafaqohen me kërcënime, kjo kërkesë është bërë shumë urgjente, sepse asnjë vend veç e veç nuk mund të zgjidhë problemet ashtu sikurse mund ta bëjnë së bashku liderët e mençur, thekson njoftimi dërguar nga Ministria e FSK-së.
Forumi Ndërkombëtarë për Siguri në Halifaks ngrit në nivel më të lartë bashkëpunimin strategjik midis shteteve demokratike në botë. Pjesëmarrësit që mblidhen në Halifaks për çdo nëntor prezantojnë më shumë se 60 shtete.
Ministrin Demolli në Forumin e Halifaksit e shoqërojnë edhe Ambasadori i Republikës së Kosovës në Kanada, Lulëzim Hiseni si dhe Sinan Geci, shef i Sektorit për Bashkëpunim Euro- Atlantik në Ministrinë për FSK-në./b.j/

Lugina e Preshevës: Liri për librin shqip

November 20, 2015 by dgreca

Rrugët e qytetit të Preshevës sot ishin të mbushura me nxënës shqiptarë, të cilët kërkonin plotësimin e të drejtës së tyre elementare, që të mësojnë me abetare e libra shqip, e drejtë e cila u është mohuar nga institucionet e Serbisë.
Autoritetet serbe kanë bllokuar në terminalin doganor tekstet shkollore shqip të dhuruara nga Ministria e Arsimit të Kosovës, për nxënësit shqiptarë, shkruan Koha.net.
Protesta paqësore e mbajtur në Preshevë ka bashkuar nxënësit shqiptarë, të cilët protestonin nën moton “Dua abetaren time, duam librin shqip”, duke kërkuar kështu që t’iu lejohej të mësonin me tekste të botuara nga Ministria e Arsimit të Kosovës.
Nxënësit gjithashtu mbanin në duar edhe parulla me mbishkrimet, “Gjuha jonë nuk është bombë, tirania juaj po”, “Serbi, ndal etnocidin në Luginë të Preshevës”, “Liri për librin shqip” etj.
Kryeministri i Serbisë, Aleksandar Vuçiq, ditë më parë duke i reaguar kryetarit të Këshillit Kombëtar të Luginës, Januz Muslit, tha se në librat që flasin për Adem Jasharin dhe UÇK-në nuk mund të mësojnë nxënësit në Serbi.

Kosova drejt aderimit në Konventën e Apostiles dhe në Gjykatën e Përhershme të Arbitrazhit

November 19, 2015 by dgreca

Republika e Kosovës ka pranuar prej Ministrisë së Jashtme të Holandës konfirmimin formal të pranimit për depozitim të akteve të aderimit në Konventën për heqjen e kërkesës për legalizim të dokumenteve publike të jashtme, që njihet ndryshe edhe si Konventa Apostile, si dhe Konventën për aderim në Gjykatën e Përhershme të Arbitrazhit apo Konventa e vitit 1907 për zgjidhjen paqësore të mosmarrëveshjeve ndërkombëtare. Konfirmimi i MPJ-së së Holandës njofton se në përputhje me nenin 12-të të saj, Konventa e Apostilës pritet të hyj në fuqi në 14 korrik 2016, ndërsa Konventa e Hagës për anëtarësim në Gjykatën e Përhershme të Arbitrazhit sikurse parashikohet nga neni 95-të i saj do të hyjë në fuqi më 5 janar 2016.
Aktet e aderimit janë dorëzuar prej Republikës së Kosovës në një ceremoni të organizuar nga Ministria e Punëve të Jashtme e Mbretërisë së Holandës, më 6 nëntor 2015. Në emër të Republikës së Kosovës, nënshkrimet i ka bërë zëvendëskryeministri i parë, Hashim Thaçi, njëherësh ministër i Jashtëm, kurse depozitimin tek shteti pritës – i autorizuar për pranimin e depozitimit të kërkesave, e ka bërë ambasadorja Vjosa Dobruna. Ndërsa, në emër të Mbretërisë së Holandës, pranimin e akteve të aderimit e ka bërë Joseph Damoiseaux, Shef i Divizionit të Traktateve në MPJ të Holandës, në prani edhe të Sekretarit Gjeneral të Byrosë së Përhershme të Konferencës së Hagës, Christophe Bernasconi.Konventa e Apostilës ka si palë kontraktuese 109 shtete dhe aderimin e fundit e ka bërë Taxhikistani, ku kjo konventë ka hyrë në fuqi në 31 tetor 2015. Kjo konventë përcakton heqjen e legalizimit të akteve publike të huaja mes të cilave bëjnë pjesë dokumentet që lëshon një autoritet apo një funksionar i administratës së shtetit (përfshirë prokurorinë, gjykatën), dokumentet administrative, aktet noteriale, deklaratat zyrtare që dëshmojnë një regjistrim, një verifikim firme mbi një akt privat, etj. Pra, parashikon që ndërmjet shteteve që kanë aderuar në këtë konventë të mos kërkohet më legalizimi i çertifikatave pranë autoriteteve konsullore, por të njihen si të vlefshme të gjitha ato çertifikata që kanë të ashtuquajturën vulë apostile të vënë nga autoritetet e vendit që kanë lëshuar dokumentin. Vula apostile është një vulë e standardizuar në përmasa e përmbajtje nga vetë konventa, që duke u vendosur në një dokument nga autoriteti kompetent i një shteti e bën atë të vlefshëm edhe për shtetet e tjera që kanë nënshkruar konventën. Kjo u heq shtetasve të Kosovës dhe diasporës mundimin e deritanishëm të legalizimit pranë përfaqësive konsullore të dokumenteve tona shtetërore apo akteve të tjera publike kosovare.
Nëpërmjet anëtarësimit në Gjykatën e Përhershme të Arbitrazhit në Hagë, Kosova bëhet pjesë njërës prej organizatave më të vjetra ndërshtetërore, e cila është themeluar që në vitin 1899 dhe deri sot ka 117 shtete anëtare. Ky institucion ndihmon në arbitrim dhe ndërmjetësim për të zgjidhur konfliktet ndërmjet shteteve, institucioneve shtetërore, organizatave ndërshtetërore dhe palëve private. Gjykata e Përhershme është kompetente për të gjitha rastet e arbitrazhit, me përjashtim të rasteve kur palët bien dakord t’i drejtohen një gjykate të posaçme.
Anëtarësimi në këtë organizatë përveçse konsolidon më tej subjektivitetin ndërkombëtar të Kosovës, e pajis shtetin tonë edhe me një mjet të rëndësishëm për të trajtuar e zgjidhur mosmarrëveshje të ndryshme ndërkombëtare me shtete apo palë të tjera publike e private. Mundësia e adresimit të çështjeve në këtë gjykatë është veçanërisht e favorshme për të përmirësuar klimën e biznesit dhe për të inkurajuar investitorët e huaj dhe vendor.