Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Shkup, Tirane, Diber- Protesta kundër devijimit të lumit Radika

by

Në Shkup do të mbahet sot një protestë kundër ndërtimit të projektit hidroenergjetik “Fusha e Lukovës” dhe devijimit të lumit Radika.Protesta mbahet në mesditë në afërsi të sheshit “Skenderbeu” , në organizim të shoqatave qytetare të rajonit të Dibrës, diasporës dibrane, shoqatave ekologjike të Shqipërisë dhe shoqatave të tjera.

Protestuesit theksuan se do të kërkojnë ndërprerjen e këtyre projekteve që dëmtojnë rajonin e Dibrës.

“Të jemi bashkë dhe të vazhdojmë atë që nisën mërgata jonë. Radika ju bënë thirrje për protestë masive në Shkup. Të tregojmë se Radika nuk është as e Qeverisë së Maqedonisë, as e ndërmarrjes ELEM,  por Radika është e banorëve dibran dhe të Rekës dhe do të jetë ashtu siç është”, theksohet në thirrjen e protestës.Në mbështjetje të protestës këtyre ditëve u deklaruan disa shoqata shqiptare në Maqedoni.

Edhe Tirana, protesta kundër devijimit të lumit Radika

Paralelisht me protestat në Shkup për mos devijimin e lumit Radika edhe në Shqipëri, aleanca “Beslidhja kundër devijimti të lumenjëve” ka protestuar.Kjo është protesta e 7 megjithëse me një numër më të pakët aktivishtësh i është bërë edhe një herë thirrje qeverisë të heqin dorë nga ky projekt i devijimit të Radikës.

Aktivistët paralajmëruan edhe një herë që protestat do të vazhdojnë, do të përshkallëzohen më tej, kudo ku ka shqiptar të cilët janë të sensibilizuar për të mos lejuar shkatërrimin e këtij lumi. Protesta ka pase edhe ne Diber.

 

Hoxhaj në Senegal, koordinim për fushatën e njohjes së Kosovës në Afrikë

by

Ne Foto: Ministri i Jashtëm i Kosovës, Enver Hoxhaj u prit ne takim nga presidenti i Senegalit, Macky Sall/

Nga B.Jashari/.-Ministri i Jashtëm i Kosovës, Enver Hoxhaj, po vazhdon turneun lobues në kontinentin e Afrikës. Pas qëndrimit në Zambia, Hoxhaj ka vizituar Senegalin, bëhet e ditur nga Dakari në njoftimin e dërguar të MPJ-së së Kosovës. Në takimin me presidentin e Senegalit, Macky Sall, ministri Hoxhaj e falënderoi për vendimin e shtetit të tij që e njohu Kosovën në vitin 2008, si vendi i parë i kontinentit afrikan, ndërsa kërkoi ta vazhdojë edhe më tej mbështetjen në fushatën e njohjes ndërkombëtare të Kosovës. Në takim të veçantë, Hoxhaj u prit edhe nga homologu i tij, Mankeur Ndiaye, me të cilin bisedoi për kapitullin e ri të marrëdhënieve ndërmjet Kosovës dhe Senegalit. Hoxhaj i bëri thirrje nga Senegali të gjitha vendeve afrikane që ta njohin Kosovën. “Deri më tani 106 vende e kanë njohur Kosovën dhe kjo tregon që njohja e Kosovës është globale dhe ka një shtrirje ndërkombëtare. Jemi anëtarësuar në shumë organizata ndërkombëtare, por edhe në të ardhmen do ta kemi mbështetjen e Senegalit. Nga këtu, në Dakar shfrytëzoj rastin t’u bëj thirrje vendeve afrikane ta njohin Kosovën, duke ndjekur shembullin e Senegalit”, tha Hoxhaj. Ndërkaq, ministri i Jashtëm i Senegalit, Ndiaye, siguroi Hoxhajn se vendi i tij do të vazhdojë ta mbështesë Kosovën në të gjitha drejtimet. “Ministri shprehu falënderimin e tij për vendimin historik të njohjes së Kosovës nga Senegali si shteti i parë afrikan që e ka njohur Kosovën. Ne kemi vendosur ta vazhdojmë mbështetjen e Kosovës në fushatën e njohjes ndërkombëtare, ashtu edhe siç ka kërkuar Kosova nga ne dhe në këtë drejtim do të vazhdojmë të punojmë së bashku në një strategji të veçantë”, ka thënë ai. Më pas, të dy ministrat kanë nënshkruar vendosjen e marrëdhënieve diplomatike ndërmjet dy vendeve, duke e cuar në 65 numrin e shteteve me të cilat Kosova ka nënshkruar deri tani marrëdhënie diplomatike. Pas njohjes së Lesotos këtë javë, Hoxhaj po viziton Afrikën për të shtyrë përpara axhendën e njohjes së Kosovës, duke paralajmëruar njëkohësisht se edhe 5 shtete të tjera do ta njohin pavarësinë së shpejti./

Bushati takon presidentin Papulias

by

Të trajtohen çështjet e mbartura në përputhje me realitetin e ri në rajon/

Ne kuadër të vizitës që po zhvillon në Athinë, Ministri i Punëve të Jashtme, Ditmir Bushati, u prit sot në një takim të veçantë nga Presidenti i Republikës së Greqisë, Karolos Papoulias.

Duke theksuar vëmendjen e posaçme që Qeveria e Shqipërisë i kushton marrëdhënieve të gjithanshme me Greqinë, Ministri Bushati shprehu vlerësimin se Greqia ka qenë dhe mbetet partner strategjik i Shqipërisë. Ministri Bushati u shpreh besimplotë në progresin e marrëdhënieve shqiptaro-greke, në interes të dy vendeve dhe popujve tanë, të paqes, sigurisë dhe zhvillimit të të gjithë rajonit.

Ai vlerësoi rolin dhe kontributin e çmuar të Presidentit Papoulias në zhvillimin e marrëdhënieve miqësore dhe të fqinjësisë së mirë mes dy vendeve, jo vetëm gjatë ushtrimit të detyrës së Presidentit të Republikës së Greqisë, por në vijimësi, gjatë gjithë karrierës së tij, kur ka shërbyer në poste të ndryshme të larta të shtetetore.

Gjate takimit u shpreh vullneti i qartë mes palëve për të ecur përpara në raportet dypalëshe. Presidenti Papulias u shpreh se “Marrëdhëniet dypalëshe shqiptaro-greke janë të një rëndësie ekzistenciale për rajonin”. Njëkohësisht, Presidenti Papulias shprehu mbështetjen e Greqisë në rrugën e Shqipërisë drejt anëtarësimit në BE.

Ministri Bushati kërkoi që, si vende anëtare të NATO-s, të trajtohen çështjet e mbartura në përputhje me realitetin e ri në rajon, në kuadër të fqinjësisë së mirë dhe përkatësisë evropiane të të dy vendeve tona.

Ministri Bushati u shpreh se: “Ne jemi të gatshëm të bisedojmë për gjetjen e zgjidhjeve konkrete për çështjet e pa adresuara, të cilat kanë ndikim të drejtpërdrejtë në jetën e qytetarëve dhe janë me interes të ndërsjellë për dy vendet tona”.

Në një vit të veçantë, ku vendet fqinje e partnere strategjike si Greqia e më pas Italia, kanë kryesimin e BE-së, Ministri Bushati vlerësoi angazhimin e Greqisë për përshpejtimin e integrimit evropian të vendeve të Ballkanit Perëndimor.

Ministri Bushati ndodhet në Greqi në kuadër të aktiviteteve të rëndësishme shumëpalëshe, Takimit të XVI të Këshillit të Ministrave të Punëve të Jashtme të Nismës Adriatiko-Joniane dhe Konferencës së Strategjisë së BE-së për Rajonin e Adriatikut e Jonit (EUSAIR).

Gjatë ditës së nesërme Ministri Bushati do të ketë takime me Kryeministrin grek, Andonis Samaras, dhe Zëvendëskryeministrin dhe Ministrin e Punëve të Jashtme, Evangjelos Venizelos.

 

SHBA, të angazhuara për integrimin evropian të Ballkanit

by

Nga Keida KOSTRECI/ VOA/

Pas vitesh investimi dhe angazhimi nga Perëndimi, Ballkani Perëndimor ka arritur sukses të konsiderueshëm. Por disa sfida mbeten ende të pazgjidhura. Në një diskutim në Fakultetin për Studime të Avancuara Ndërkombëtare të Universitetit Johns Hopkins në Uashington, pjesëmarrërist shprehën mbështetje për integrimin Euro-Atlantik të rajonit, ndërkohë që u bënë thirrje vendeve të Ballkanit Perëndimor që të vazhdojnë reformat, dhe të lënë pas tensionet ndëretnike.
Pikëpamja zyrtare e Shteteve të Bashkuara është se vendet e Ballkanit Perendimor kanë arsye të jenë krenare – me anëtarësimin e Kroacisë në Bashkimin Evropian, marrëveshjet mes Kosovës dhe Serbisë dhe tranzicionin paqësor të pushtetit në Shqipëri.  Jonathan Moore është drejtor i Marrëdhënieve për Evropën Qëndrore dhe Jugore në Departamentin amerikan të Shtetit.
“Objektivi kryesor i Shteteve të Bashkuara për rajonin është integrimi i tij Euro-Atlantik. Siç kanë thënë shumë administrata  amerikane qofshin – demokrate apo republikane – ne duam një Evropë të bashkuar, të lirë dhe në paqe – ky është fokusi ynë.”
Por zoti Moore tha gjithashtu se vendet e rajonit duhet të përpiqen të zbusin tensionet etnike dhe kombëtare, të luftojnë korrupsionin dhe të përpiqen për reforma ekonomike, të shtojnë sigurinë dhe sundimin e ligjit.
Korrupsioni dhe konsolidimi i shtetit ligjor ishin çështje që u përmendën edhe nga Sekretari amerikan i Shtetit John Kerry në konferencën për sigurinë në Mynih të Gjermanisë javën e kaluar, ndërsa ai foli për “një prirje shqetësuese në shumë pjesë të Evropën Qendrore dhe Lindore, si edhe në Ballkan.
“Aspiratat e qytetarëve po merren nëpër këmbë nga korrupsioni, interesat oligarkike, interesat që përdorin para për të shtypur opozitën politike dhe zërat ndryshe, për të blerë politikanët dhe organet e medias dhe për të dobësuar pavarësinë e gjyqësorit dhe të drejtat e organizatave joqeveritare”, tha zoti Kerry.
Ai theksoi rëndësinë e lidhjeve të Shteteve të Bashkuara dhe Evropës dhe tha se këto lidhje janë forcuar që nga rënia e Murit të Berlinit, kur filloi zgjerimi i NATO-s dhe në 10 vjetët, kur BE-ja filloi të zgjerohej përsëri. Dhe zoti Moore thotë se Amerika është e angazhuar që rajoni të jetë pjesë e këtyre organizatave.
“Ne jemi të angazhuar, të vendosur dhe të interesuar në një të ardhme në BE për të gjitha këto vende, dhe nëse duan edhe në NATO. Ky ka qenë qëndrimi i Shteteve të Bashkuara për vite dhe ky vazhdon të jetë qëndrimi ynë.”
Angazhimi nga jashtë është shumë i rëndësishëm thotë Edward Joseph,  me Qendrën për Marrëdhëniet Transatlantike.
“Nuk ka pasur shumë raste në rajon ku problemet e vështira janë zgjidhur natyrshëm përmes shoqërisë civile apo procesit politik. Në pëgjithësi është dadhur ndërhyrja nga jashtë, një katalizator nga jashtë, që do të thotë Shtetet e Bashkuara dhe aleatët tanë evropianë.”
Zoti Joseph thotë se angazhimi i jashtëm pothuajse gjithmonë ka ardhur kur ka pasur kriza – duke cituar si shembull suksesin e bisedimeve që krijuan rrugën për normalizimin e marrëdhënieve mes Kosovës dhe Serbisë – një rezultat i diplomacisë intensive nga ana e Shteteve të Bashkuara dhe BE-së.
Të dy panelistët, Moore dhe Joseph ishin të një mendjeje se Maqedonia dhe Bosnja janë dy përjashtime përsa i përket arritjeve. Maqedonia ka pengesë për anëtarësim në NATO mosmarrëveshjet me Greqinë për emrin. Dhe Bosnja vazhdon të ketë fërkime etnike.
Zoti Joseph tha se magneti tërheqës i BE-së nuk ka funksionuar për Bosnjen për shkak se Marrëveshja e Paqes e Dejtonit, e cila i tha fund luftës, nuk po funksionon.
“Sipas mendimit tim është një patologji, një problem strukturor dhe ne e dimë se origjina e tij është tek formulimi i marrëveshjes së Dejtonit. Prandaj në librin e Richard Holbrook-ut (“To End a War”) flitej për përfundimin  e luftës dhe jo për ndërtimin e një shteti.”
Zyrtari Moore i Departamentit të Shtetit është dakort se Bosnja është shumë e komplikuar për shkak të marrëshjes së Dejtonit e cila i dha fund luftës por e la Bosnjen të ndarë etnikisht. “Pyetja e vërtetë është: a mund ta shpërbësh strukturën e Dejtonit dhe përgjigja jonë e prerë është Jo, nuk mundesh.”
Shumë nga vendet e Ballkanit mbajnë zgjedhje në vitin 2014. Por ende nuk është e qartë se çfarë përparimi do të shënojnë ato drejt demokracisë së plotë dhe integrimit në BE.

New York Times: Kthesa e gabuar e Turqisë

by

Kryeministri i Turqisë, Recep Tayyip Erdogan, ishte javën e kaluar në Bruksel, duke synuar ripërtëritjen e marrëdhënieve me Evropën, por në radhë të parë, për gjetjen e zgjidhjes, ai duhet ta kërkoj atë brenda vetvetes, shkruan në fillim të editorialit të vet, e përditshmja New York Times.

Ajo konstaton se, dikur Erdogan, i lavdëruar si lider i modelit të demokracisë myslimane, e ka krijuar një katastrofë politike në shtëpi, duke e transformuar Turqinë në një shtet autoritar, që paraqet rrezik jo vetëm për vetveten, por edhe për aleatët e saj në NATO, përfshirë Shtetet e Bashkuara.
Trazira e fundit i ka rrënjët në luftën politike ndërmjet Partisë së Drejtësisë dhe Zhvillimit të zotit Erdogan, dhe ish-aleatëve të tij të afërt, të cilët janë mbështetës të intelektualit të moderuar islamik, Fethullah Gulen, i cili jeton në Pensilavni, të Shteteve të Bashkuara.
Tensionet kanë shpërthyer në konflikt të hapur, muajin e kaluar, me hetimet për korrupsion, që çuan në dorëheqjen e katër ministrave të qeverisë dhe kërcënuan që ta fusin në grackë familjen e zotit Erdogan, shkruan New York Times.
Këtë hetim, kryeministri e ka quajtur “përpjekje për grushtshtet” dhe e ka fajësuar një “organizatë sekrete” brenda sistemit të drejtësisë dhe policisë, të udhëhequr nga lëvizja Gulen dhe duke u shërbyer “fuqive të jashtme”, siç janë Shtetet e Bashkuara dhe Izraeli.
Prej atëherë, qeveria i ka spastruar qindra zyrtarë të policisë dhe prokurorë dhe ka synuar të krijoj kontroll ndaj sistemit të drejtësisë.
Po ashtu, e ka propozuar legjislacion për zgjerimin e autoritetit të qeverisë, për t’i nominuar gjyqtarët dhe prokurorët, duke e cenuar më tutje pavarësinë e sistemit të drejtësisë, dhe i ka parandaluar gazetarët që të raportojnë lirisht.
Hetimi dhe reagimi i zotit Erdoganmund të jetë i motivuar politikisht, shkruan New York Times, duke i përmendur zgjedhjet e rëndësishme lokale në muajin mars.
Por, zoti Erdogan do të duhej të insistonte që hetimi të jetë korrekt dhe transparent, e jo të përpiqej ta pengonte.
Mënyrat e tij të pamëshirshme dhe përpjekja e tij për t’i goditur ata që mendojnë ndryshe, nuk janë gjëra të reja, siç ka treguar edhe goditja kundër demonstruesve gjatë protestave të qershorit të kaluar.
Aksionet e tilla i shkelin reformat demokratike, që kërkohen nga Bashkimi Evropian, në kuadër të synimit të Turqisë për anëtarësim, që mund të jetë në rrezik më tepër se kurrë më parë, dhe veprimet e tij janë gjithnjë e më tepër në kundërshtim me parimet themelore të anëtarëve të NATO-s, shkruan New York Times.
Ministri i jashtëm gjerman, Frank-Walter Steinmeier, kishte të drejtë kur tha në Bruksel se evropianët duhet të kërkojnë që Turqia t’i kthehet sundimit të ligjit.
Administrata e presidentit Obama, po ashtu, duhet të dërgoj mesazh të fuqishëm për kursin dëmtues të cilin po e mbanë zoti Erdogan.
Nëse Turqia kujdeset për demokracinë e fituar me vështirësi, që ka kontribuar në rritjen impresive ekonomike, ose do të kthehet në regjim autoritar, është po aq kritike për stabilitetin rajonal dhe për aleatët e NATO-s, sa është edhe për turqit, shkruan në fund të editorialit të vet, e përditshmja New York Times.
Përgatiti: Fatmir Bujupi