Dr. Lulzim Nika/

Sot në Drenicën fisnike, e të krenarisë, trimërisë e patriotizmit, në Prekaz këtë kala të pamposhtur të lirisë që e ka shkruar historinë e lavdishme të kombit shqiptar me gjakun e bijëve dhe bijave të saj më të mirë, historinë e lirisë së Kosovës.

U përula me nderim e respekt para jetës dhe veprës të Adem e Hamëz Jasharit.

Në mëngjesin e 5 marsit të vitit 1998, shteti kriminal serb do të sulmojë kullën e Komandantit Historik të UÇK-së Adem Jashari dhe gjithë familjen e tij. Lufta e ushtrisë çlirimtare në fillim hasi në vështirësi nga faktori ndërkombëtar që dhanë deklarata kundër veprimtarisë çlirimtare te UÇK-së.

Në 27 vjetorin e Epopesë së Jasharëve, përkulemi me respekt para sakrificës sublime

në këtë ditë të shënuar të Epopesë së UÇK-së, kujtojmë me nderim qëndresën heroike të Familjes Jashari.

Vendimi që u mor në zyrën e kriminelit S.Millosheviq, kryetar i Serbisë, dhe me përkrahjen e shumicës se këshilltarëve të tij, që të zhduket familja e Komandantit Adem Jashari, dhe që me ketë të shuhet ideja për një luftë çlirimtare e shqiptarëve të Kosovës, doli e dështuar. Kjo llogaritje ishte e gabuar, që duke u përdorur makineria ushtarake serbe ndaj një familje embleatike, siç ishte familja e Adem Jasharit, të shuhet ideja e lirisë së Kosovës.

Pas rënies së Komandantit Adem Jashari dhe familjes së tij, shqiptarët e Kosovës mundën frikën ndaj regjimit serb dhe filluan të rreshtohen masivisht në radhët e UÇK-së.

Beteja treditore, më 5, 6 dhe 7 mars 1998 nga familja Jashari në Prekaz të Skënderajit vuri themelet e lirisë së Kosovës.

Sot, në këtë ditë të shënuar, kujtojmë sulmin mbi familjen Jashari. Sakrifica e tyre u bë dritë e lirisë së Kosovës. Kjo betejë ndryshoi historinë, sepse u bë frymëzim për çdo shqiptar që t’i merrte armët e të luftonte për liri.

Ato ditë të kësaj beteje epike, edhe ata më skeptikët, më pesimistët, e panë se rruga e vetme që çonte drejt lirisë, ishte lufta çlirimtare. Kjo betejë, pra u bë frymëzim për shumë të rinj e të reja që u rreshtuan në radhët e UÇK-së dhe kështu kombi shqiptar anekënd trojeve të veta, u bashkua në këtë rrugë të fitores së madhe historike.

Përjetësisht, do t’u jemi mirënjohës ndaj atyre grave dhe burrave, që u flijuan dhe u bënë gurthemel i lirisë së Kosovës.

I përjetshëm qoftë kujtimi, respekti e vlerësimi për ta!

Lavdi

Më 2 mars 1925, në Bari të Italisë, u vra Luigj Gurakuqi, një nga personalitetet më të rëndësishme të historisë shqiptare, figurë kyçe e Pavarësisë dhe shtetformimit të Shqipërisë. Në kuadër të 100-vjetorit të kësaj ngjarjeje, Instituti i Trashëgimisë Shpirtërore e Kulturore të Shqiptarëve – Shkup, në bashkëpunim me Postat e Maqedonisë së Veriut, ka emetuar një pullë postare me portretin e Gurakuqit, si një shenjë nderimi për kontributin e tij të jashtëzakonshëm në çështjen kombëtare shqiptare.
Drejtori i Institutit, Skender Asani, në fjalën e tij tha se Luigj Gurakuqi ishte një ndër nismëtarët e unifikimit të alfabetit shqip në Kongresin e Manastirit dhe një nga hartuesit dhe firmëtarët e Aktit të Pavarësisë së Shqipërisë më 1912. Përmes veprimtarisë së tij si ministër, politikan dhe drejtues i Normalës së Elbasanit, ai e pa arsimin si rrugën kryesore për emancipimin kombëtar.
“Dokumente të reja mbi vrasjen e Gurakuqit, që hedhin dritë mbi organizimin dhe prapaskenat e këtij akti, do të shpalosen së shpejti në Tiranë, duke ndihmuar në ndriçimin e kësaj ngjarjeje historike. Vepra dhe trashëgimia e Luigj Gurakuqit mbeten një burim frymëzimi për të gjithë ata që besojnë në fuqinë e dijes dhe edukatës për përparimin e shoqërisë”, u shpreh Asani.
Në ceremoninë e përurimit të kësaj pulle postare morën pjesë dhe mbajtën fjalime drejtoresha e Institutit të Historisë “Ali Hadri” të Kosovës, Teuta Shala Peli, drejtori i Postave të Maqedonisë së Veriut, Orhan Kurtishi, drejtori i Shtëpisë Botuese “Drita”, Fatmir Koliqi, kryetari i Shoqatës “Lëvizja”, Xhevat Bislimi, si dhe përfaqësuesja e Ambasadës së Republikës së Shqipërisë në Shkup.

Shqiptarët në Philadelphia organizuan ceremoninë e ngritjes solemne të flamurit të Kosovës në bashkia e qytetit.

Nga dr. Sadik Elshani

Gjatë shekujve Kosova kaloi një rrugëtim të gjatë me plot vuajtje, sakrifica, përpjekje mbinjerëzore, luftëra të pandërprera e të përgjakshme për liri e pavarësi. Prandaj, shpallja e Kosovës shtet i lirë e i pavarur, i njohur nga fuqitë e mëdha e demokracitë më të përparuara të botës, është një ngjarje madhështore, shumë e gëzueshme që vështirë mund të përshkruhet me fjalë. Shkurt, në Kosovë ka ndodhur nje mrekulli, një ringjallje. Një Feniks i vërtetë, është ringjallur Dardania e lashtë në një shtet të ri.

Shoqata jonë, “Bijtë e shqipes”, i kushton një rëndësi të madhe kësaj ngjarje madhështore të kombit tonë. Ajo vazhdimisht me shumë veprimtari e ka shënuar çdo përvjtor të pavarëisë së saj. Nga viti 2023, në përvjetorin e 15-të të pavarësisë së saj, kemi filluar edhe me organizimin e ngritjes së flamurit të Kosovës në bashkinë e qytetit të Philadelphias. Nuk ka vend më solemn për ta festuar pavarësinë e një vendi sesa në Philadelphia, vendlindjen e Shteteve të Bashkuara të Amerikës, ku lindi një shtet i ri dhe një epokë e re për njerëzimin. është ky një nder i jashtëzakonshëm për komunitetin tonë, Kosovën, kombin tonë – është afirmim i vlerave të përbashkëta për liri, pavarësi, paqe, drejtësi e përparim.

Edhe pse ishte një ditë e ftohtë, në sheshin e bashkisë ishin mbledhur bashkatdhetarët e gëzuar e të qeshur për të festuar këtë Ditë të Madhe për Kosovën e kombin tonë. Mbretëronte atmosferë festive, ngazëllyese: valonin flamujt e Kosovës, dhe ata kuqezi e amerikanë; jehonte kënga e vallja shqiptare, ku mbizotëronin ato me motive nga Kosova dhe ngjarjet e lavdishme të historisë së saj: jehonte kënga “Mora fjalë”, kushtuar komandantit legjendar, Adem Jasharit, mishërimit të lirisë së Kosovës. Në këtë ceremoni merrnin pjesë edhe këshilltarët e Këshillit Bashkiak të qytetit të Philadelphias, zotërinjtë: Michael Driscol e Mark Squilla. Nga Zyra për Çështjet e Emigrantëve merrte pjesë z. Alain Joinville, drejtor për Komunikime Strategjike e Programe. Ishte e pranishme edhe zonja Krista Bard, Konsulle e Përgjithshme e Nderit e Lituanisë, njëherësh edhe kryetare e Organizatës së Konsujve të Nderit në Philadelphia.

Pas një blloku me këngë e valle shqiptare filloi ceremonia e ngritjes së flamurit të Kosovës, u kënduan himnet kombëtare të Amerikës dhe Kosovës. Gjatë këndimit të himnit të Kosovës ngritej në shtizë edhe flamuri i saj. Flamuri u ngrit nga z.Imer Dedja, një biznismen i sukseshëm dhe zonjusha Diarta Kabashi, studente e mjekësisë. është ky një nderim që shoqata u ben anëtarëve të saj të dalluar. Për shkak të kohës shumë të ftohtë, pas ngritjes së flamurit ceremonia vazhdoi në mjediset e brendshme të bashkisë, në Caucus Room.

Ceremoninë e hapi z. Dritan Matraku, kryetar i Shoqatës Mbarëshqiptare “Bijtë e shqipes”, i cili i përshëndet të pranishmit, duke ua uruar Festën e Pavarësisë së Kosovës. Gjithashtu ai i përshëndeti dhe u dëshiroi mirëseardhjen mysafirëve të cekur më lart. Ndër të tjera z. Matraku u shpreh se Pavarësia e Kosovës është një ngjarje e madhe jo vetëm për Kosovën, por për të gjithë shqiptarët.

Në emër të shoqatës “Bijtë e shqipes” përshëndeti zonjusha Erona Shurdhiqi, ish-nxënës e e dalluar e shkollës sonë shqipe – tani ajo është Clinical Research Coordinator, The Children’s Hospital of Philadelphia. Në fjalën e saj të përgatitur bukur zonjusha Shurdhiqi foli për rëndësinë e kësaj ngjarje të shënuar të historisë sonë, përpjekjet e sakrificat e shqiptarëve ndër vite për liri e pavarësi: “Kjo ditë është një moment reflektimi për sakrificën, përpjekjet, dhe ëndrrën e brezave që luftuan për një Kosovë të lirë dhe të pavarur.Flamuri i Kosovës nuk është thjesht një simbol shtetëror, por një dëshmi e rrugëtimit të gjatë dhe të mundimshëm të popullit tonë drejt lirisë dhe demokracisë. Sot, ai valëvitet me krenari jo vetëm në trojet tona, por edhe këtu, në Shtetet e Bashkuara të Amerikës – një vend që ka qenë dhe mbetet një aleat i palëkundur i Kosovës dhe shqiptarëve. Sot ky Flamur valvitet këtu i lire falë Presidentit te saj historik, Ibrahim Rugova, i cili me largpamësinë dhe urtësinë e tij udhëhoqi rrugën drejt pavarësisë. Ky Flamur valvitet i lire falë Ushtrise Çlirimtare të Kosovës, me në krye Komandantin Legjendar Adem Jasharin, duke flijuar tërë familjen e tij prej 59 anëtarësh. Ky flamur valvitet i lirë falë dëshmorëve që ranë gjatë luftës dhe gjithë popullit që sakrifikoi gjithçka për këtë liri e pavarësi” – u shpreh zonjusha Shurdhiqi. Ajo shprehu e dhe mirënjohjen e falenderimin për Shtetet e Bashkuara të Amerikës, për ndihmën e pakursyer që i kanë dhënë popullit tonë ndër vite: “Mirënjohja jonë ndaj Shteteve të Bashkuara të Amerikës është e pamatshme. Pa mbështetjen e tyre vendimtare, sakrifica e popullit tonë do të kishte qenë edhe më e rëndë, dhe rruga drejt lirisë shumë më e vështirë. Ndërhyrja e SHBA-ve në vitin 1999 ishte një akt historik që i hapi rrugën lirisë dhe pavarësisë së Kosovës.Në momentet më të errëta të historisë tonë Shtetet e Bashkuara te Amerikes dhe aleatët e tyre qëndruan përkrah Ushtrisë Çlirimtare të Kosovës dhe popullit tonë, duke mbrojtur të drejtën tonë për të jetuar të lirë”. Mirënjohje të veçantë zonjusha Shurdhiqi i shprehu edhe shoqatës “Bijtë e shqipes”, e cila ruan e promovon gjuhën, kulturën e traditat tona kombëtare, duke shërbyer si një urë që lidh diasporën me atdheun, si dhe një shembull i shkëlqyer i bashkimit e organizimit të shqipatrëve në mërgim. Gjithashtu, ajo u shprehu mirënjohje edhe Bashkisë e qytetit të Philadelphias që ndër vite e kanë mbështetur dhe mirëpritur komunitetin tonë: “Kjo dëshmon vlerat e mëdha të këtij qyteti dhe respektin për diversitetin e tij. Miqësia mes popullit shqiptar dhe atij amerikan është një lidhje e fortë, e pathyeshme, dhe e përjetshme” – u shpreh zonjusha Shurdhiqi,

Këshilltari Michael Driscol, miku i madh i shqiptarëve të Philadelphias u uroi të pranishmëve Ditën e Pavarësisë së Kosovës, duke theksuar përpjekjet dhe synimet e popujve për liri e pavarësi. Zoti Driscol theksoi se lidhja e thellë me Philadelphian, Kosovën e Shqipërinë është dëshira për të jetuar të lirë. Ai ceku edhe 250 Vjetorin e Shpalljes së Pavarësisë së ShBA-ve që do të festohet në vitin 2026, duke theksuar se kjo do të jetë një festë e të gjitha demokracive të botës. Ai foli edhe për rolin e emigrantëve në zhvillimin e Philadelphias, duke vlerësuar posacërisht emigrantët shqiptarë që në këtë qytet dhe anëmbanë Amerikës kanë sjellur talentet e tyre, vlerat familjare e njerëzore, etikën e lartë të punës e ndershmërisë. Nuk mungoi as porosia e tij për ta ruajtur gjuhën, kulturën e traditat tona kombëtare. Ai vuri në pah edhe vëllazërinë që Kosova, Shqipëria e Amerika ndajnë së bashku.

Konsullja e Nderit, zonja Krista Bard përshëndeti në gjuhën shqipe: Urime Kosovë! Ajo shprehu kënaqësinë që po merrte pjesë në këtë manifestim. “Faleminderit që festoni lirinë, demokracinë” – u shpreh zonja Bard. Ajo theksoi se edhe Lituania ka kaluar një rrugëtim të gjatë për ta fituar lirinë. Gjithashtu, ajo përcolli edhe urimet e Këshillit të Konsujve të Nderit në Philadelphia. Zoti Alain Joinville përshëndeti në emër të Zyrës për Çështjet e Emigrantëve (Office for Emigrant Affairs). Ai i njoftoi të pranishmit për punën që bën kjo zyrë për t’i ndihmuar emigrantët e rinj për t’u përshtatur në jetën e qytetit të Philadelphias, ndihmon në promovimin e vlerave, programeve, zhvillimin e komuniteteve. Po ashtu, ai e ceku se Philadelphia është qytet që i mirëpret zemërhapur emigrantët dhe ku emigrantët ndihen mire: të mirëpritur e të vlerësuar. Pastaj zoti Joinville lexoi pjesë nga Proklamata përmes së cilës kryebashkiakja, Cherelle Parker, e shpallte 14 shkurtin e vitit 2025, Ditën e Pavarësisë së Kosovës në Philadelphia. Një nder i madh ky për Kosovën, të gjithë shqiptarët dhe miqtë e tyre. (Kjo ceremoni ishte planifikuar për datën 14 shkurt, por meqenëse atë ditë zhvillohej parada për ekipin e futbollit, “Eagles”, fitues të Kupën së Super Boël, atëherë ceremonia u shty për datën 18 shkurt).

Kështu edhe këtë vit shoqata “Bijtë e shqipes” përmbylli me plot sukses manifestimet e Ditës së Pavarësisë së Kosovës. Të gjithë të pranishmit uruan: Gëzuar Ditën e Pavarësisë Kosova jonë e dashur!

Philadelphia, më 18 shkurt 2025

Anila Kadija/

Me një ceremoni madhështore të mbajtur në ambientet e shkollës “Ardhmëria Westminster, St. Augustine’s”, komuniteti shqiptar në Londër festoi 17-vjetorin e Pavarësisë së Kosovës. Ky organizim, i udhëhequr nga një staf profesionistësh në bashkëpunim me të gjitha shkollat e Ardhmërisë dhe këshillin pedagogjik, mblodhi së bashku personalitete të rëndësishme nga Shqipëria, Kosova dhe Mbretëria e Bashkuar.

Në mesin e të ftuarve nderi ishin Ambasadori i Republikës së Shqipërisë në Mbretërinë e Bashkuar, Sh.T. Z. Uran Ferizi, Deputeti i Parlamentit Shqiptar dhe Kryetar i Bordit të Ardhmërisë, Z. Lavdrim Krashi, si dhe përfaqësues të lartë të institucioneve britanike, përfshirë Kryebashkiakun e Westminsterit, Këshilltarin Robert Rigby, dhe Kryetarin e Bashkisë Brent, Këshilltarin Tariq Dar.

Kryetari i Shoqatës Ardhmëria, z. Lutfi Vata, në fjalën e tij përshëndetëse falënderoi të gjithë të pranishmit për mbështetjen dhe uroi popullin e Kosovës me rastin e kësaj dite të shënuar.

Koncerti festiv: Një shfaqje mbresëlënëse e trashëgimisë shqiptare

Programi artistik nisi me një sfilatë unike të nxënësve të shkollave shqipe “Ardhmëria”, të cilët parakaluan me kostume tradicionale nga të gjitha trevat shqiptare, një iniciativë e parë e këtij lloji në Mbretërinë e Bashkuar. Atmosfera u elektrizua me interpretimin e këngës “Mora fjalë” dhe kërcimin energjik “Xhamadani vija-vija”, për t’i lënë vendin poezive dhe këngëve të tjera kushtuar Kosovës, të realizuara me pasion nga nxënësit.

Një moment i veçantë i mbrëmjes ishte interpretimi i këngës “Moj e bukura More” nga Stina Gerbeshi, ndërsa kulmi i programit erdhi me vallen e Tropojës, një simbol krenarie i trashëgimisë kulturore shqiptare të mbrojtur nga UNESCO.

Pjesa e dytë: Muzikë e lartë cilësie dhe interpretim artistik

Në vijim, publiku u magjeps nga interpretimet e dy artisteve të kalibrit ndërkombëtar, pianistes Mariela Cingo dhe solistes Sofia Kola, të cilat sollën një repertor të përzgjedhur, mes të cilave spikati kënga ikonike “Baresha” e Nexhmije Pagarushës.

Aktori i njohur Sokol Cahani përshëndeti të pranishmit me një interpretim poetik, ndërsa programi u moderua në mënyrë të shkëlqyer nga Ilira Mucaj, e cila, megjithëse e lindur dhe rritur në Kanada, dëshmoi një zotërim të përkryer të gjuhës shqipe.

Drejtuese artistike e manifestimit znj. Anila Kadija

Ky aktivitet i jashtëzakonshëm tregoi edhe një herë përkushtimin e komunitetit shqiptar në Londër për të ruajtur dhe promovuar gjuhën, kulturën dhe identitetin kombëtar, duke e përcjellë atë te brezat e rinj me krenari dhe dashuri.

Rafaela Prifti/

“Në ditën e rëndësishme të përvjetorit të 17 të pavarësisë së Kosovës, ju urojmë juve që ishit ambasadorë të saj kur Kosova nuk kishte ambasadë, ju që e mbajtët kurdoherë aktuale dhe në vëmendje çështjen e Kosovës në Nju Jork e Uashington ,” tha në fjalën e tij përshëndetëse Ambasadori Blerim Reka në pritjen diplomatike të Konsullatës së Përgjithshme të Republikës së Kosovës që u dha me këtë rast në restorantin Empire Steakhouse në Manhattan, mbrëmjen e ditës së hënë.

“Para së gjithash, lavdi dëshmorëve që çliruan Kosovën, Ushtrisë Çlirimtare të Kosovës me në krye komandantin Adem Jashari, dhe mirënjohje të përjetshme Shteteve të Bashkuara të Amerikës dhe NATO-s,” deklaroi drejtuesi i Konsullatës së Përgjithshme të Kosovës në Nju Jork.

“Festimet janë të shoqëruara gjithmonë edhe me evokim e reflektim për rrugën e gjatë të përpjekjeve që e sollën këtë ditë,” tha në bisedë Dr. Pashko Camaj, Sekretari i Federatës Pan-Shqiptare të Amerikës VATRA.

“Po mendoja sesa e re është një demokraci 17 vjeçare,” përsiati Harry Bajraktari, themeluesi i gazetës Illyria dhe aktivist i respektuar në bashkësinë shqiptare, “është si të jemi në vitin 1929 pas shpalljes së pavarësisë së Shqipërisë dhe në fund të viteve 1700 për Amerikën.”

Diplmati John Kelley ushtrues detyre i Misionit te Përhershëm të Amerikës në OKB përshëndeti festimin duke cilësuar se “rrugëtimi i Kosovës është shquar për nga vendosmëria dhe qëndrueshmëria. “Lidhjet midis dy popujve tanë janë të forta,” tha Kelley, dhe duke parashtruar perspektivat përfshirë ato ekonomike shprehu sigurinë se këto lidhje do të forcohen edhe më tej.

Organizatorët thanë se në pritjen diplomatike ishin rreth dyqind mysafirë prej të cilëve pesëdhjetë ambasadorë dhe diplomatë të shteteve anëtare të OKB-së, midis tyre edhe shtete që ende nuk e njohin pavarësinë e Kosovës.

Midis pjesëmarrësve ishin veprimtarë të njohur dhe përfaqësues të shoqatave patriotike shqiptare dhe kulturore, anëtarë të trupit diplomatik, sipërmarrës shqiptarë-amerikanë, avokatë, profesorë dhe akademikë, artistë, publicistë etj.

E ardhur për herë të parë në një kremtim të tillë, Maya, duke qëndruar pranë gjyshes së saj Fadilja Çunmulaj tha se ishte e gëzuar që mori pjesë në festimin e 17 vjetorit të pavarësisë së Kosovës.