Juncker: Merreni seriozisht Ballkanin!

October 6, 2018 by dgreca

Presidenti i Komisionit Europian, Jean-Claude Juncker e sheh perspektivën reale të anëtarësimit të vendeve të Ballkanit Perëndimor si kusht për stabilitetin e rajonit./

Në një fjalim në Parlamentin e Austrisë, kreu i Komisionit Europian, Jean-Claude Juncker u shpreh të premten (05.10) mbi perspektivën e anëtarësimit të vendeve të Ballkanit Perëndimor në BE. Sipas AFP, nëse vendet e BE-së nuk e kanë seriozisht me anëtarësimin e Shqipërisë, Bosnjes, Kosovës, Serbisë, Maqedonisë, e Malit të Zi, kjo mund të çojë në një luftë të re, tha Juncker.

„Nëse në këtë pjesë të komplikuar të Europës, krijohet përshtypja, se ne nuk e kemi seriozisht me anëtarësimin europian për Ballkanin Perëndimor, atëherë më vonë, – e ndoshta më herët- ne do të përjetojmë sërish atë që përjetuam në vitet 90-të në Ballkan”, theksoi Juncker në Hofburgun vjenez duke pasur parasysh luftërat në Jugosllavi.

„Hapësirë ekonomike”

Megjithatë Juncker pranoi se rruga e vendeve të Ballkanit drejt BE-së „është e gjatë”. Vërtet që ata kanë bërë përparime, por „jo aq sa duhet”. Presidenti i Komisionit Europian kërkoi që në këtë fazë të ndërmjetme të ofrohet një „hapësirë ekonomike”, në të cilën këto vende do të silleshin

pjesërisht, siç do të vepronin një ditë si vende anëtare.”

Që në dhjetorin e kaluar, Juncker kishte theksuar, se zgjerimi i BE-së me vendet e Ballkanit Perëndimor është vendimtar për stabilitetin e rajonit. Ndërsa në strategjinë e BE-së për Ballkanin në shkurt 2018, u përmend viti 2025 si vit i mundshëm anëtarësimi për Malin e Zi dhe Serbinë. Por në Vjenë Juncker tha se 2025-a është afati më i hershëm. Juncker u bëri thirrje vendeve të BE-së, që të „kujdesen” për Ballkanin e „të ndihmojnë aty ku është e nevojshme”. Por vetë këto vende, duhet ta dinë se duhet t’i zgjidhin konfliktet e tyre për kufijtë para anëtarësimit, tha Juncker.

Rusia po e tensionon Ballkanin

March 12, 2017 by dgreca

Nga Arbesa Ibrahimi /*

Kriza e thelluar në Ballkanin Perëndimor mund të eskalojë nëse Perëndimi nuk parandalon përpjekjet e Rusisë që ta destabilizojë rajonin. Problematika ndëretnike, qeverisja e dobët, korrupsioni si dhe një prirje në rritje drejt autokratizmit të udhëheqësve politikë të rajonit janë duke i ndihmuar eskalimit të mundshëm të situatës, shkruan sot, gazeta Zeri.

Ballkanin perëndimor pritet ta përfshijë një krizë e madhe politike ndërkohë që Rusia ka aktivizuar motorët në shtrirjen e ndikimit të saj. Tensionet në Maqedoni, provokimet e Serbisë në Kosovë dhe lëvizjet e dyshimta në Mal të Zi japin sinjale të qarta për përpjekjet e Moskës që të kyçet në Ballkan. Serbia duke besuar në mbështetjen e Putinit, e cila tashmë ka nisur edhe furnizimin me armatim, i ka dhënë përkrahje Gruevskit, duke besuar që me të mund ta bëjë rianeksimin e kufijve të Bosnjës dhe të Kosovës.

Nga ana tjetër tashmë në Prokurorinë e Malit të zi po hetohet rasti i përfshirjes së shërbimeve ruse në planifikimin e puqit. Njohës të rrethanave politike në rajon alarmojnë se Ballkani me vetëdije po futet në një situatë e cila shumë shpejt mund të marrë përmasa fatale. Ndërkohë që, sipas tyre, forcat e politikave antishqiptare janë aktivizuar haptazi.

“Jo rastësisht Sputnik në një nga numrat e fundit kishte montuar një hartë të Ballkanit, duke marrë zjarr. Eskalimi është i mundshëm nëse në Serbi do të fitojnë terren forcat antiperëndimore, që do të ndikonin egërsisht pastaj në rajon”, ka thënë për “Zërin” Ylli Pata, gazetar dhe njohës i proceseve politike në Shqipëri.

Pos interesit rus që ta shtrijë ndikimin në Ballkan, krizës i ka ndihmuar edhe problematika ndëretnike, qeverisjet e dobëta, korrupsioni si dhe një prirje në rritje drejt autokratizmit të udhëheqësve politikë të rajonit..

Ballkani, drejt krizës së thellë

Arjan Dyrmishi, ekspert i lartë i çështjeve të sigurisë pranë Institutit për Demokraci dhe Ndërmjetësim (IDM) në Tiranë, ka vlerësuar se situata në Ballkan është bërë më e brishtë kohët e fundit, porse kjo, sipas tij, është shtrirë edhe në tërë Evropën Lindore.

“Në rastin e Ballkanit, në mënyrë më specifike Ballkanit Perëndimor, kjo krizë është bërë më e ndjeshme pasi përveç faktorëve të mësipërm, në këtë rajon kanë ndikuar negativisht edhe marrëdhëniet problematike ndëretnike, qeverisja e dobët dhe korrupsioni, si dhe një prirje në rritje drejt autokratizmit të udhëheqësve politikë të rajonit, të cilët në vend të kontributit për zgjidhjen e këtyre problemeve kanë zgjedhur të përfitojnë politikisht prej tyre”, ka thënë Dyrmishi për “Zërin”.

Ai ka vlerësuar se gjasat që situata të përkeqësohet janë të mëdha dhe se përshkallëzimi mund të vijë si pasojë e thellimit të mëtejshëm të kontradiktave dhe problemeve nga vetë vendet e rajonit, nga ndikimi i aktorëve dhe faktorëve të jashtëm, përfshirë këtu krizën politike dhe atë institucionale në BE, politikën e jashtme akoma të paqartë të administratës së re në SHBA.

Rusia po e shtrin ndikimin në Ballkan

“Që nga ardhja në pushtet e Putinit si president i Rusisë, ky ndikim ka ardhur në rritje. Përveç ndikimit të madh në Serbi, atij në Bosnjë-Hezegovinë nëpërmjet Republikës Srpska, në Mal të Zi dhe në Kosovë nëpërmjet minoritetit pro-rus, së fundmi Rusia është duke përdorur me efikasitet krizën politike që ka mbërthyer në dy vjetët e fundit Maqedoninë për ta shtuar ndikimin e saj atje, duke vënë në pikëpyetje progresin e deritanishëm në procesin e anëtarësimit të këtij vendi në NATO”, ka shtuar Dyrmishi. Edhe Ylli Pata, gazetar dhe njohës i proceseve politike në Shqipëri, ka vlerësuar se situata në Ballkan është e rrezikshme për arsye se, sipas tij, Rusia po synon ndryshimin e ekuilibrave në Bosnjë. “Ish-presidenti serb, Boris Tadiq, me të drejtë 2 muaj përpara tha se situata në Ballkan është aq e rrezikshme si në vitet ’90-a. Kjo pasi ka një ofensivë ruse për t’i ndryshuar ekuilibrat në Bosnjë, ku marrja e Srebrenicës nga serbët me dhunë në zgjedhje ishte sinjali më i frikshëm. Kjo valë po vjen poshtë deri në zemrën e trevave shqiptare”, ka deklaruar ai.

Sipas Patës një gjë e tillë është duke u hasur nga të gjitha anët, në të gjitha shtetet e Ballkanit. Porse, konsideron se Maqedonia është më e rrezikshmja sa i përket eskalimit të situatës.

“Maqedonia është më e rrezikshmja, ku Gruevski po ndërmerr një eskalim të rrezikshëm për ta moslejuar një qeverisje demokratike duke ofruar një agjendë vetëm maqedonase”, ka shtuar ai.

Andaj, Pata ka konsideruar se tërë këto rrezikojnë të mblidhen dhe të shpërthejnë një ditë.

“Lëmshi po mblidhet dhe nëse ai lëmsh do të rrotullohet kah gremina rrezikon që të marrë zjarr dhe të djegë ç’ka para. Jo rastësisht Sputnik në një nga numrat e fundit kishte montuar një hartë të Ballkanit duke marrë zjarr. Eskalimi është i mundshëm nëse në Serbi do të fitojnë terren forcat antiperëndimore, që do të ndikonin egërsisht pastaj në rajon”, ka potencuar ai.

Ndërkaq, Bashkim Selmani, njohës i çështjeve të sigurisë në Maqedoni, njëherësh profesor në universitetin e Tetovës, ka vlerësuar se kohët e fundit po vërehen probleme të shumta në gjithë Ballkanin.

“Është fakt real që kohëve të fundit po vërehen probleme thuajse në të gjitha vendet e Gadishullit Ballkanik, nga njëra anë po jepen indikacione të disa shteteve në mënyrë të hapur, ndërsa në shtete të tjera në mënyrë të heshtur në këtë rast siç është Bullgaria dhe Greqia, por, të gjitha palët në Ballkan po bëjnë përpjekje për një komplikim të situatës së përgjithshme në Ballkan”, ka deklaruar ai në një prononcim për “Zërin”.

Sipas tij, aktualisht në Ballkan ekziston një situatë aq e brishtë sa që bën që edhe qytetarët të jenë të shqetësuar.

Selmani tutje ka thënë se Ballkani është futur në një situatë që nuk do të ishte aspak në interes të çështjes shqiptare.

Ai më tej ka konsideruar se pjesa e këtij gadishulli shumë shpejt mund të shkojë deri te përmasat fatale.

“Duke analizuar në këtë pikëpamje mund të shprehemi se Ballkani me vetëdije po futet në një situatë e cila shumë shpejt mund të marrë përmasa fatale në rast se Evropa nuk do të jetë më energjike ndaj këtyre politikave antishqiptare që po përmbys gjithçka që është arritur në Ballkan”, ka theksuar Selmani.

Ndërkohë, ka konsideruar se Rusia tashmë është bërë jo vetëm kërcënim për Ballkanin, por edhe për të gjithë njerëzimin.

Ramadani: Ballkani Perëndimor i është kthyer gjuhës së urrejtjes

Eksperti i sigurisë në Kosovë, Burim Ramadani, ka vlerësuar se Ballkani tashmë i është kthyer gjuhës së urrejtjes.

“Ballkani Perëndimor i është rikthyer gjuhës së urrejtjes dhe përçarjes ndëretnike dhe midis popujve. Kjo është krejtësisht e qartë, duke u bazuar në rikthimin e retorikës politike të ashpër, agresive të elitave politike në vende të ndryshme në Ballkan”, ka deklaruar ai.

Sipas Ramadanit, kjo është paraprirë nga ringjallja direkte e ambicieve të Serbisë për pretendime territoriale ndaj shteteve fqinje, duke përfshirë këtu Kosovën dhe Bosnjën e Hercegovinën, por pa përjashtuar edhe Maqedoninë dhe Malin e Zi. Kurse hyrja e Malit të Zi në NATO për Serbinë dhe Rusinë, sipas tij, është një goditje jashtëzakonisht e fuqishme mbi planet dhe mbi idetë e tyre territoriale.

Ramadani më tej ka konsideruar se gjasat që Ballkani të përfshihet në konflikt janë të pakta, porse, sipas tij, nuk përjashtohet mundësia që gjendja të keqësohet më tej.

“Mundësitë që Ballkani të përfshihet sërish në konflikte të armatosura janë të pakta, porse ekzistojnë mundësitë që të ketë incidente të cilat mund ta përkeqësojnë situatën”, ka shtuar ai.

Kurse, ka thënë se roli dhe ndikimi i Rusisë në Ballkanin Perëndimor është rikthyer si një pengesë serioze në raporte të vendeve të Ballkanit me BE-në dhe NATO-n.

Mehmeti: Destabilizimi i raporteve BE-SHBA e ka thelluar krizën në rajon

Nga ana tjetër, njohësi i çështjeve politike në Maqedoni, Ibrahim Mehmeti, ka vlerësuar se destabilizimi i marrëdhënieve ndërmjet BE-së e SHBA-së e ka thelluar krizën në rajon.

“Ajo që posaçërisht e rëndon krizën aktuale politike në rajon është destabilizimi i raporteve ndërmjet SHBA-së dhe BE-së, gjë që ia hapi rrugën Rusisë e cila në çdo mënyrë e shfrytëzon situatën e krijuar për t’i realizuar planet e veta për pengimin e proceseve eurointegruese të shteteve ballkanike, por edhe për instalimin e strukturave lojale ndaj qëllimeve të këtilla”, ka deklaruar ai.

Por megjithëkëtë, Mehmeti është shprehur optimist se SHBA-ja e BE-ja do ta gjejnë një zgjidhje.

“Unë megjithatë shpresoj se fuqitë e mëdha, SHBA-ja dhe BE-ja do të gjejnë mënyrë për ta ruajtur atë që është arritur në demokratizimin e shteteve të rajonit dhe se do të gjendet mënyra që këto shtete të integrohen në BE, me çka do të parandalohet kthimi prapa i cili do të kishte pasoja shkatërruese për të gjithë rajonin”, ka shtuar Mehmeti.

Kurse, ka vlerësuar se Rusia është faktori kryesor i tërë këtij ngërthimi.

Rugova: Rreziku më i madh i kanoset Maqedonisë

Gazetari Arben Rugova ka vlerësuar se Ballkani vazhdon të mbetet një shesh lojërash për rivalitet ndërmjet disa fuqive të mëdha rajonale e botërore.

Sipas tij, kriza financiare, emigracioni i pakontrollueshëm dhe dalja e Britanisë së Madhe nga Bashkimi Evropian e kanë larguar vëmendjen e Brukselit zyrtar nga kjo pjesë e Evropës.

E kjo, sipas tij, u ka dhënë mundësi Rusisë e Turqisë për rivendosjen e interesave të tyre në këtë pjesë.

“Ky vakum, i cili është krijuar edhe për shkak të zbehjes së ndikimit amerikan në rajon pas pavarësimit të Kosovës, i ka dhënë Rusisë, e deri diku edhe Turqisë, hapësirë ndikimi dhe mundësi për t’i rivendosur interesat e veta përmes lidhjeve historike e fetare. Ky ndikim lindor ka ringjallur ultranacionalizmin serb, por edhe ekstremizmin fetar, gjë që e ka rikthyer Ballkanin në një vullkan aktiv ku shpërthimi i llavës është i paparashikueshëm”, ka deklaruar ai.

Ndërkohë, duke marrë parasysh rrethanat aktuale, ai ka thënë se situata në Ballkan mund të eskalojë.

“Po, derisa vazhdon dobësimi i Bashkimit Evropian, derisa administrata e presidentit Trump vazhdon ta lërë Ballkanin në duar të burokratëve të Brukselit, ashtu sikurse bëri Presidenti Obama, sidomos në mandatin e dytë të tij, Serbia me mbështetjen e Rusisë do të vazhdojë të nxisë konflikte të reja në Ballkan, me shpresë që në një të ardhme, jo shumë të largët, t’i rivendosë kufijtë e Serbisë së Madhe”, ka shtuar Rugova.

Ndërkohë, ka vlerësuar se rreziku më i madh aktualisht i kanoset Maqedonisë, për shkak të bazës së brishtë që ka si shtet dhe tensioneve të vazhdueshme ndëretnike brenda tij. Por, sipas tij, tensionim të situatës mund të ketë edhe në shtete të tjera, Bosnje dhe Hercegovinë, Mali të Zi dhe Kosovë.

Hyda: Situata e shqiptarëve në Ballkan, e brishtë si asnjëherë tjetër

Kurse, Hajredin Hyda, pjesë e PD-së në asamblenë komunale të Bujanocit, njohës i zhvillimeve politike atje, ka vlerësuar se situata e shqiptarëve në Ballkan është e brishtë si kurrë më parë.

“Asnjëherë më parë situata e shqiptarëve në Ballkan nuk ka qenë më e brishtë. Arsyet janë shumëdimensionale, por kryesorja është se ne si popull nuk kemi arritur ta menaxhojmë mirë këtë periudhë të tranzicionit, qoftë në Shqipëri, në Kosovë, në Maqedoni apo në Luginë të Preshevës”, ka deklaruar ai për “Zërin”.

Ndërkaq, sipas Hydës, rreziku për eskalim të situatës ekziston, mirëpo jo në nivel aq të lartë, sa në vitet e ’90-ta.

“Përkundër alarmimit nga të gjitha instancat për mundësinë e eskalimit të krizës, edhe pse ekziston rreziku potencial i ndonjë konflikti, për dallim nga vitet e ’90-ta kur edhe popullata serbe si gjeneratore e këtij konflikti ishte e favorshme për luftë, tash kur njerëzit ende i kanë të freskëta tmerret e luftës, tash ata janë kategorikë kundër dhe me probabilitetin e një konflikti eventual më shumë manipulojnë kastat politike, për ta larguar vëmendjen nga problemet reale, si papunësia, korrupsioni, nepotizmi, mosperspektiva, ikja nga vendlindja e të rinjve”, është shprehur Hyda.

Rusia po e shtrin ndikimin në Ballkan

Andaj, Pata ka konsideruar se tërë këto rrezikojnë të mblidhen dhe të shpërthejnë një ditë.

Sipas tij, aktualisht në Ballkan ekziston një situatë aq e brishtë sa që bën që edhe qytetarët të jenë të shqetësuar.

Selmani tutje ka thënë se Ballkani është futur në një situatë që nuk do të ishte aspak në interes të çështjes shqiptare.

Ai më tej ka konsideruar se pjesa e këtij gadishulli shumë shpejt mund të shkojë deri te përmasat fatale.

Ndërkohë, ka konsideruar se Rusia tashmë është bërë jo vetëm kërcënim për Ballkanin, por edhe për të gjithë njerëzimin./Kortezi: Zeri/.

Zbehja e BE-së e kthen Ballkanin nën shënjestrën e Rusisë

January 29, 2017 by dgreca

Zbehja e rolit të Bashkimit Evropian në Ballkan, ka sjellë si kundër-efekt rritjen e ndikimit të Rusisë, thonë njohësit e zhvillimeve politike.I ballafaquar me sfidat e zgjerimit dhe sidomos me referendumin për daljen e Britanisë së Madhe nga Bashkimi Evropian, ky union, sipas analistëve, ka lënë anash rajonin e Ballkanit, i cili është vënë tani në shënjestër të interesave të Rusisë.

Politologu Ramush Tahiri mendon se vonesat në proceset integruese evropiane, paraqesin rrezik për Ballkanin Perëndimor.I lënë si një terren pa perspektivë të qartë evropiane, Ballkani, sipas Tahirit po shihet sërish nga Rusia si mundësi për ta shtrirë ndikimin.Ndërkaq, sa i përket Kosovës dhe ndikimeve nga shtrirja e politikës ruse, vetëm një marrëveshje ndërkombëtare për njohjen e saj nga Serbia, do të relaksonte situatën, mendon ai.

“Çështja mes Kosovës dhe Serbisë mbeti pa e përfunduar, qoftë me një rezolutë të Këshillit të Sigurimit apo me një marrëveshje ndërkombëtare ku përfundimisht pranohet pavarësia e Kosovës, kështu që Serbia mbetet terren i përshtatshëm për ndikimin rus”.

“Gjithashtu, për shkak të problemeve që kanë Turqia dhe Greqia, qofshin ato tradicionale, problemeve të ujdhesave, por edhe çështjes së Qipros dhe ndarjes së saj, atëherë politika ruse gjen një terren më të përshtatshëm të ndikimit në këto vende”, thekson Tahiri.

Po ashtu, edhe nëpërmjet lidhjeve të vjetra ruse, të cilat sipas Ramush Tahirit janë riafirmuar së fundit te disa vende të Evropës Lindore apo Juglindore, po tentohet të arrihet një shtrirje e re ruse, ndonëse jo më nën firmën e real-socializmit, por nën kupolën e një politike mbrojtëse.

Rrethanat aktuale, sipas Tahirit, po tregojnë se Ballkani mund të kthehet sërish në vatër krize, nëse nuk përshpejtohen proceset euro-atlantike në njërën anë dhe nëse nuk përmbyllen çështjet e brendshme, siç është rasti me Kosovën e Maqedoninë, të cilat mbeten shtete ende jo stabile.

“Ballkani mund të përfshihet në një vatër krize nëse nuk përshpejtohet hyrja në NATO e Malit të Zi dhe të themi ashtu, të arrihet mbyllja e rrethit si dhe nëse Maqedonia dhe Kosova nuk stabilizohen, por hapen tema, çështje”, vlerëson Tahiri.

Ndërkohë, analisti Arben Qirezi thotë se Rusia po përpiqet të kthejë ndikimin e saj në disa vende të Evropës Lindore, të cilat tradicionalisht kanë qenë të lidhura me Rusinë, përkatësisht ish-Bashkimin Sovjetik.

Në Bullgari e Moldavi, thotë ai, tashmë ka lidershipe të orientuara kah Rusia. Kurse në Ballkan, Serbia mbetet aleati më i afërt i Rusisë.

Një tendencë e Rusisë për t’u përfshi në Ballkan, sipas tij, u vërejt me zgjedhjet e fundit edhe në Mal të Zi, ku autoritetet e Podgoricës patën akuzuar Moskën dhe Beogradin për përgatitjen e atentatit kundër ish-kryeministrit Milo Gjukanoviq.

“Për shkak të problemeve të brendshme në BE, të shkaktuara edhe nga BREXIT-i por edhe nga një lodhje e zgjerimit të Bashkimit Evropian, si dhe nga kriza e refugjatëve dhe konflikti në Lindjen e Mesme, BE-ja sikur e ka lënë anash rajonin e Ballkanit, vendet ballkanike, duke i lëshuar rrugën Rusisë”, konsideron Qirezi.

Roli dhe ndikimi i Rusisë në Ballkan, sipas Arben Qirezit mund të jetë ndikuar së fundit edhe nga zgjedhjet në Shtetet e Bashkuara të Amerikës. Ai mendon se të gjitha këto zhvillime, mund të jenë kuptuar nga Rusia si sinjale për të vepruar në Ballkan.

“Po ashtu, edhe viti zgjedhor në Shtetet e Bashkuara të Amerikës dhe paqartësitë që kanë lindur me zgjedhjen e presidentit Trump në krye të Shteteve të Bashkuara, kanë shkaktuar një lloj pasigurie dhe në njëfarë mënyrë mbase i kanë dhënë sinjale Rusisë se ajo i ka duart e lira që të veprojë në rajonin e Ballkanit”, shprehet Qirezi.

Sa i përket Kosovës, njohësit e zhvillimeve politike thonë se shtrirja e ndikimit rus vjen nga Serbia, si aleate tradicionale e Rusisë, e cila shtrinë më pas politikat e saj përmes serbëve lokalë, kryesisht në veri të vendit ku popullata serbe përbën shumicën.

Sidoqoftë, orientimi politik i proklamuar i institucioneve dhe politikës zyrtare në Kosovë, është për një vend demokratik, të orientuar kah integrimet euro-atlantike dhe bota perëndimore.

Kështu që Kosova, sipas analistëve, mund të atakohet nga interesat ruse, por besohet se ka një mbështetje të fuqishme nga Shtete e Bashkuara të Amerikës dhe një pjesë e vendeve evropiane, që ta ndalin këtë ndikim. (Zijadin Gashi REL)

FJALIMI QË PO TRONDITË BALLKANIN: NA MBYTI KORRUPSIONI!

March 22, 2016 by dgreca

Nga Frank Shkreli/

Ne Foto:Seherzada Deliq, arsimtarja boshnjake që ua tha “të gjitha” në sesionin e hapur palamentar./

Korrupsioni dhe Ballkani janë dy fjalë sinonime. Korrupsioni në të gjitha nivelet e jetës shoqërore anë e mbanë Ballkanit ka krijuar një atmosferë ku interesat e qytetarëve po injorohen e shpesh shtypen nga interesat e atyre që, Sekretari Amerikan i Shtetit, John Kerry ka cilësuar si, “oligarkë të korrutuar”. Është kjo një tendencë shqetësuese që, pas shëmbjes së komunizmit dhe pas luftërave në ish-Jugosllavi, është përhapur dhe ka lëshuar rrënjë të thella në shumë shoqëri të vendeve ballkanike. Zyrtarët e korruptuar përdorin pasurinë dhe influencëne tyre politike për tu mbyllur gojën dhe për të frikësuar kundërshtarët dhe këdo tjetër që merr guximin të kritikojë korrupcionin që ka kaplluar vendet e Ballkanit. Arsimtarja boshnjake Seherzade Deliqe cila punon në sektorin shtetëror, pikërisht si arsimtare në një shkollë boshnjake, gjatë një seance të Kuvendit, ka mbajtë një fjalim kritik kundër qeveritarëve dhe veprave korruptive të tyre duke thënë se “unë nuk kam frikë, pasi ka shumë që mendojnë si unë” – fjalim i cili është përhapur në internet, përfshirë edhe disa portale në shqip.Për nga përmbajtja, ky është një fjalim që mund të ishte mbajtur në cilindo sesion parlamentar të Ballkanit.Ja fjalimi i plotë – me plotë zemërim e sinqeritet – marrë nga youtube i arsimtares boshnjake Seherzada Deliq, përkthyer nga autori.

***

Arsimtarja Seherzada Deliq:“Mirëmbrëma! Unë jam Seherzada Deliq, jam para “pranverës Boshnjake” për ndryshe përpiqem të ndihmoj dhe të edukoj të rinjtë e të rejat, të mençurit, ata me perspektivë dhe inteligjentë të këtij vendi.

Nuk jam këtu të flas në emër të gjeneratës time, sepse ju jeni ata që e keni shkatërruar gjeneratën time, gjë për të cilën turpërohem kudo që shkoj.

Ju duhet të më falni që unë po flas me kaq emocione. Unë jam kështu plot emocione sepse ky është vokacioni im. Këjo është puna ime. Ndonëse mu dha rasti t’u drejtohem ju, jo për veprat dhe veprimet e juaja. Jo të flaspër veprat e mira, por veprat dhe veprimet e juaja të këqia.Kur mjeku shkon të operojë një të sëmur ai mund edhe të gabojë gjatë operimit dhe si rrjedhim, mjeku mund të shkaktoj vdekjen e një njeriu. Ndërsa ju me deklaratat tuaja, me veprimet që bëni gjatë zgjedhjeve dhe votimeve, duke blerë e shitë votat, me lobimin tuaj, vetëm për një herë në një moment me një vendim, ju vrisni 1000 njerëz, pasi ju nuk i përfaqësoni interesat e tyre, ose i shisni e bleni interesat e tyre, pasi edhe turpi ijuaj ka një qëllim. Dihet mirë se cili është çmimi i turpit tuaj. Kur tradhëtoni edhe vet popullin tuaj, para të cilit jeni betuar ta mbroni, ta mbështesni dhe ta drejtoni në rrugën e duhur. Herë në njerën parti e herë në tjetrën parti, tani në njërën parti, tani në partinë tjetër. Shitblerje votash! Dihet shumë mirë për këtë fenomen. Dihet sakt shuma e të hollave që i është paguar një personi nga një parti me qëllim që të votojë për një parti tjetër.

Këtë gjë populli e di mirë! Mos mendoni se ne jemi si ulurima e çakallit në hënë — siç thotë fjala popullore –dhe mos mendoni se ju jeni të paprekshëm për veprimet tuaja dhe të pa-arritshëm si hëna, sepse as ne nuk jemi dele dhe çakaj që uluritin në hënë.

Siç deklaroheni ju shpesh, lere popullin, populli s’di gjë, vetëm flet, thoni ju. Ne, populli, në këtë rast jemi tampon zonë, gjegjësisht një tamponë, si tampona që përdorë mjeku për të ndaluar gjakderdhjen e mëtejshme të një plage – një zonë midis ju politikanëve dhe masës së popullit që don t’ju gëlltitë. Dhe ju, urdhëroni, nëse nuk keni frikë. Nuk është vetëm partia SDP që është fajtore. Çfarë ka bërë partia SDA për 15 vjetë në pushtet. Partia SDP po zhdukë, po e shterrë edhe atë pak durim që na kishte mbetur. Siç kam thënë më parë, po na pini gjakun për 20 vite.

Populli thotë mjaft! Ju duhet të jeni të vetdijshëm të kësaj situate të krijuar, por për fat të keq ju nuk jeni të aftë të vlerësoni se sa e rëndë është situata. (Ndërhynë një deputet duke kërkuar fjalën dhe ajo i përgjigjet). Më fal, më vjen keqë që nuk më ndëgjove. Përsëris, Partia SDA na ka pirë gjakun për 15 vite dhe partia SDP gjatë këtyre katër viteve të fundit.

Presidentin e kam dëgjuar të ketë thënë me një rast (si përçmim) se ai është president i atyre që kanë tetë vjetë shkollë fillore dhe atyre me tre vjetë shkollë të mesme. Nuk e di se për çfarë arsyeje intelektualët e këtij qyteti nuk kanë dalur nepër rrugët e këtij qyteti për të protestuar. Ose nuk duan ose mendojnë se as me protesta nuk arrihet gjë dhe se nuk mund të ndryshohet asgjë as tani,ashtu siç ka ndodhur gjatë gjithë këtyre viteve.

Në këtë vend ka shumë njerëz të mençur dhe ju mund të thoni tani, ku ka më të mençur se ne? Ka shumë!Ka të mençur, por të papunësuar, të cilët ju nuk i leni të vijnë në ndonjë pozitë. Ata janë të aftëtë bëjnë punën dhjetë mijë herë më mirë se ju. Ka zotërinjë, ka njerëz të mençur dhe intelektualë ky vend. Më pyesni mua. Si arsimtare, unë të tillë njerëzish përgatis çdo ditë. Shkoni ju në shkollë dhe shihni se cfarë edukimi kanë të rinjtë, cfarë të rinjshë briliantë që kemi. Ka një mori të rinjshë, të mençur, të talentuar, intelektualë, shkencëtarë, për të cilët dihet se nuk kanë mundur të punësohen nëqeveri, nuk kanë mundur të shprehin idetë e tyre, pasi ju keni zhvilluar falangat dhe spiunët tuaj nga të cilët vareni. Ju nuk i keni mundësuar intelektualët që të marrin detyra në qeverisje, pikërisht nuk i keni mundësuar as qëtë shprehin mendimet e tyre mbi çështjet e ditës.

Seria televizive, “Do të bëhet, do të bëhet”, nuk është një program komik vetëm për tu qeshur, por është një parodi drejtuar juve, politikanëve.Pse, ju nuk dëgjoni dot, nuk kuptoni?! Kjo seri televizive është një kritikë ndaj qeverisjes tonë. Si mund të ndodhë që nuk e shihni dhe nuk e njihni vetëveten në atë emision. Ju duhet të qani me lotë kur shikoni atë program. Turp të kini! Ka një numër të madh intelektualësh të rinjë dhe akademikë të zotët, për të cilët dihet mirë se nuk janë përfshirë në qeveri sepse në vend të tyre ju kini punësuar njerëzit tuaj dhe përkrahsit politikë. Diku është humbur njeriu, nuk ekzistojnë më vlerat njerëzore.Haxhi Pashiqi fletë për interesin kombëtar, duke thënë se kjo është një çështje jetike e sigurimit kombëtar. O njerëz!Ai thotë se e ka një detyrë të rëndë e të vështirë pasi tani ai thotë se përfaqëson serbët, kroatët e myslimanët, jevrejtë dhe komunitetin roma si dhe të gjithë tëtjerët që jetojnë këtu.

Dua tu them se unë për veten, përfaqësoj xhepat e mi bosh megjithëse punoj për 20 vite tani. Unë jam larguar nga lufta me dy fëmijë dhe tani jam duke u kujdesur për tre fëmijt e mi dhe edukoj çdo vit mbi 200 studentë të tjerë. Ju mund ta shihni zotërinjë se jam tepër e emocionuar. Më thotë hoxha që të mos jem aq e emocionuar duke folur për këto çështje, pasi popullit nuk i pëlqejnë shprehje të tilla emocionuese dhe mund të reagojë. Populli duhet të hapë sytë e të shikojë se midis nesh ka njerëz të ndershëm dhe të sinqertë, të cilët ia duan të mirën Bosnjës. Njerëz të cilët dinë ta udhëheqin Bosnjën. Bosnjën ne nuk e kemi shitur. (Pas një zhurme në audiencë ajo shprehet) Tregohuni të respektueshëm, pasi unë u kam dëgjuar ju. Ky është komision parlamentar, a po jo?

Nuk është e vështirë për të gjetur individë të kualifikuar. Ka njerëz, por atyre u duhet dhënë mundësia. Dhe ata duhet të dinë se si të përfshihen në qeverisje. Unë u them studentëve çdo ditë: luftoni kundër njerëzve të këqi. Çdo ditë, fëmijve u flas keq për ju, sepse nuk më kini dhënë mundësinë të flasë para jushë siç duhet. Po si të luftohen njerëzit e ligshtë e të korruptuar? Me dituri! Le t’u skuqen ju veshët tani. Por siç kam thënë me heret, ju e kini çmimin edhe për turpin.

Populli me të vërtetë është lodhur. Mjaft më! Ne i kemi shterrur të gjitha energjitë dhe mënyrat demokratike të protestave, duke filluar nga uria, peticionet, deklaratat televizive, shkrimet, filmat që përhapen nepër botë, ndërkohë që nepërmjet të gjitha këtyre botimeve, bota po informohet se çfarë qeverie kemi ne sot. Por ju nuk u djeg fare, nuk çani kokën hiç. Sepse diplomat tuaja ju i kini blerë masovisht andaj nuk dini as të lexoni dhe as për çfarë shkruhet. Ju nuk jeni në dijeni të vuajtjeve të popullit. Populli po qanë e vajton dhe dëshiron që të mos qajë më, ti ndalojë lotët.

Të rinjtë për të cilët po flas unë nuk janë kurrfarë huliganësh. Këta janë të zemëruar dhe janë të frikësuar dhe të shqetësuar se sot ka një markë dhe nesër ose pasnesër nuk do të kenë as një gjysëm markë. Ata janë të shqetësuar dhe të hidhëruar se prindërit e tyre nuk mund të gjejnë punë, megjithse si të gjithë ju këtu kanë deri në 30-vjetër stazh, por nuk kanë rrogë mujore prej 15.000 markash, sikurë ju. Ishim marrë vesh më parë që gjatë këtij sesjoni, secili prej nesh do të zbulonte se cilat janë të ardhurat tona. Ja, rroga ime është 899 marka me 20-vjetë punë. Sa janë të ardhurat tuaja mujore? (Heshtje në sallë). Më thoni kur të dalim jashtë nëqoftse ju vjen turp të thoni tani publikisht.

Mjaftë më! Unë nuk jam e vetmja që shprehem kështu. Unë kam dalë para jush si përfaqsuese e atyre që mendojnë si unë, pasi nuk kam frikë, ndonëse punoj në sektorin qeveritar. Unë punoj në shkollë. Le të më ndëshkojnë. Ju kini hequr nga detyra personin që ka ngritur me një përqindje të lartë nivelin e shkollës ku jepte mësim. Juve nuk u pëlqejnë ata që punojnë. Ju doni nga ata që nuk punojnë. Nëqoftse mendoni se partia SDA do të shkatërrojë partinë SDP ose cilëndo parti tjetër, jeni të gabuar pasi ne nuk do të lejojmë që mbi shpinën tonë ju të siguroni karrigët tuaja. Kët nuk do të mund ta bëni. Asnjë prej jush nuk meriton më të flasë nga ky podium. Dhe presidenti i kantonit, i cili thotë se nuk dëshiron të japë dorëheqjen, ne nuk i kërkojmë atij të japë dorëheqjen. Ne ia marrim atij mandatin, pasi ishim ne ata që ia dhamë atij mandatin. Ne nuk e duam atë, populli nuk e do.

I thashë të gjitha. U falemnderit!

Seherzada Deliq në fjalimin e saj, shprehu zemërimin e bashkqytetarëve të saj por edhe më gjërë se korrupsioni ka uzurpuar jetën politike dhe ekonomike të vendit. Se kjo atmosferë e padurueshme korrupsioni, sipas arsimtares boshnjake, i ka zënë frymën shoqërisë dhe zhvillimit të saj ekonomik dhe demokratik, një atmosferë kjo që falë oligrakëve të korruptuar politikë, kanë helmuar jo vetëm politikën por edhe median e kontrolluar prej tyre. Kjo gjëndje korruptive, për të cilën flet Zonja Deliq, përkeqsohet edhe më shumë kur të merret parasyshë se sipas ekspertëve ballkanikë dhe medias së huaj, oligarkët e korruptuar vendas, kanë marrëdhënje të ngushta bashkpunimi me oligarkët e korruptuar të ardhur aty nga shtete të tjera, veçanërisht ata nga Rusia, Turqia dhe nga Lindja e Mesme. Shtypi i huaj shkruan shpesh për këta oligarkë të korruptuar të Ballkanit dhe për influencën e tyre negative në zhvillimet demokratike të vendeve ballkanike.Por jo vetëm shtypi perëndimor, por edhe udhëheqës dhe zyrtarë të lartë amerikanë dhe europianë janë shprehur se për derisa nuk përmirësohet kjo situatë korruptive që i ka zënë frymën politikës, zhvillimeve ekonomike dhe demokratike anë e mbanë Ballkanit – nuk do të ketë një partneritet serioz politik, ekonomik dhe ushtarak, por as zhvillim të mirëfilltë në vendet e Ballkanit të vlerave përendimore dhe universaletë dinjitetit njerëzor dhe të drejtave të njeriut, lirisë, demokracisë, barazisë dhe shtetit të ligjit.

Por në fund të fundit, deklaratat e perëndimorve dhe shqetësimi i tyre mbi korrupsionin në Ballkan mund të kenë ndonjë influencë pozitive të përkohshme në ato shoqëri por ato nuk do sjellin ndryshimet e nevojshme rrënjësore politike dhe ekonomike në ato vende. Është zemërimi i qytetarve të thjeshtë ndaj korrupsionit të përhapur në të gjitha nivelet e shoqërive ballkanike, siç është reagimi i arsimtares boshnjake Deliq ai i cili shpresojmë se do të sjellë eventualisht ndryshime themelore dhe afatgjatë — reagimi dhe angazhimi serioz i qytetarëve si Zonja Deliq të cilët më në fund duket se kanë humbur durimin dhe të cilët kanë filluar t’i thonë mjaft këtij fenomeni korruptiv shkatërrues në të cilin është zhytur kjo klasë politike anë e mbanë Ballkanit Perendimor.

SHEFI I PENTAGONIT, ISH SENATORI HAGEL: AMERIKA NUK E HARRON BALLKANIN

February 13, 2013 by dgreca

NGA BEQIR SINA/

PENTAGON – WASHINGTON : Prej se kur Presidenti Obama mori mandatin e dytë , si rëndomtë në politikën amerikane pati nisur i ashtuquajturi “Sesioni” i spekulimeve’ . Spekulime, këto për “ndërtimin” e kabinetit të ri ku sipas “traditës” së çdo Presidenti kur merr mandadatin e dytë dy postet më të rëndësishme, historikisht marrin ndryshime; ato janë ai i Sekretarit të Shtetit dhe Sekretarit të Mbrojtjes.

Presidenti i Shteteve të Bashkuara, Barack Obama, duket i se e kaloi të ashtuquajturën “sifidë me emrimet” e reja të kabinetiti të fundit të tijë teksa emërojë dy veteranë të luftës në Vietnam në kabinetin e tij – senatorin demokrat, John Kerry, në postin e sekretarit të shtetit, dhe ish-senatorin republikan, Chuck Hagel, si Shfei i Pentagonit.

Nderkohë qe John Kerry e mori detyren javën e kaluar pritet që këtë jave edhe ish senatori Chuk Hagel te emërohet në një post me te vërtetë te rendesishem ne Administraten amerikane dhe kjo doshta vjen nga qe te dy kan përvojen e tyre në luftë dhe pritet të ketë ndikim në politikat që do të ndjekë Amerika në katër vjetët e ardhshëm,thone analistete e ketyre ceshtejeve ne SHBA.

Këtë la të kuptoi dje një paneli i ndarë i Senatit, kur ka aprovuar të nominiuarin e presidentit Barack Obama Chuck Hagel që të bëhet Sekretar i Mbrojtjes së SHBA-ve.

Votimi i Komitetit për Shërbime Armëve të Senatit do të përcaktojë bazat për një votim mbi emërimin të plotë nga Senati, ndoshta gjatë fundi i kësaj jave.Votimi i komitetit ishte 14-11, më një senator nga Partia Republikane, nga radhët e së cilës vije edhe Hgel, që ka votuar kundër tij.

Anëtarët e Partisë Demokratike të Obamës, të cilët përbëjnë shumicën në Senat, ishin në gjendje që të çojnë përpara emërimin e presidentit.

Hagel, ish senator i Nebraskas dhe veteran i luftës në Vietnam, është ballafaquar me një kundërshtim të fortë të republikanëve, të cilët kanë ngritur pyetje se a është ai i fuqishëm mjaftueshëm që të përkrahë aleatin amerikan – Izraelin dhe se a ka vizion të qartë se si të kundërshtoj programin nuklear të Iranit.

Kerry, veteran gati 30-vjeçar në Senat dhe kryetar i Komitetit të Senatit për Marrëdhënie me Jashtë, ishte i pari nga ata që avancoi në krye të listës së Shtëpisë së Bardhë, pasi zgjedhja e preferuar e Obamas, ambasadorja e Shteteve të Bashkuara në OKB, Susan Rice, ishte larguar vet nga gara.

Hagel ka lënë Senatin në vitin 2008, pasi ka shërbyer 12 vjet. Si anëtar me mendje të pavarur i Partisë Republikane, ai është armiqësuar me disa kolegë për shkak të kritikave që u ka bërë politikave të presidentit George W. Bush në Afganistan dhe Irak.

Axhensia e lajmeve njujorkeze Bloomberg ofroi e para në SHBA supozimet të saj të qelluara, sipas nga burime të sigurta se kush ishte favorite për të zëvendësuar Sekretarin e Mbrojtjes Leon Paneta si kreun e Pentagonit:

Sipas, Bloomberg por edhe shtypit më prestigjoz në SHBA, ish senatori i njohur i Nebraskës, republikani Chuck Hagel i cili ishte kandidat kryesor për t’u bërë sekretari i ardhshëm i Ministrisë së Mbrojtjes së SHBA, në Administratën e Obamës dhe ai tani emërohet sa më shpejt këtë fundjavë, në bazë të vendimit të senatiti amerikan.
Hagel, i cili shërbeu si një ushtarë i këmbësorisë në Vietnam, ka kaluar më parë se të vinte në senat procesin e verifikimit në zyrën e avokatit të Shtëpisë së Bardhë.Ish senatori Nebraskas

Emri Hagel ka qenë qysh më parë i cili qarkulloi për një postë të rëndësishëm në Pentagon – DOD, kështu që raporti nuk është për t’u marrë si ndonjë surprizë, shkruante New York times. Megjithatë, Administrata Obama thkeson NYT, Chuck Hagel deri në emrim nuk ka ka pasur ndonjë “rival” ai ishte favoriti i dukshëm për këtë post.

Hagel është i njohur për të pasur mjaft dell të pavarur, diçka që do të ishte një parakusht për kalimin në këtë post të rëndësishëm , pra për t’u bashkuar me një administratë Demokratike. Megjithatë, ai do të shtojë një postë të dytë të GOP-së në ekipin e presidentit Obama. Aktualisht, Sekretari i Transportit Ray LaHood është i katërti anëtar republikan që po shërben në kabinetin Obamës, prej kur ai erdhi në Shtëpinë e Bardhë në vitin 2008.

“SHBA duhet t’i rikthehet angazhimit në Ballkan”
Ish Senatori Chuck Hagel, ish -kryetar i Komisionit të Mbrojtjes në Senat ka qenë dalluar për lidhjet e forta me çështjen shqiptare, sidomos në mbështjetjen e dhënë në Kartën e Adriatikut për anëtarësimin e Shqipërisë në NATO, dhe shkatërrimin e armëve, për aq sa shërbeu në Senatin amerikan. Ai ishte një ndër senatorët e Shteteve të Bashkuara, që shpreh shqetësimin se vitet e fundit vëmendja amerikane ndaj Ballkanit ka rënë dhe theksoi se ka ardhur koha që angazhimi për këtë rajon të rikthehet.
Ka qenë pikërishtë Senatori Chuck Hagel, anëtar i Komisionit të Jashtëm të Senatit që në Mars 2005, duke iu përgjigj pyetjeve për rolin amerikan në Ballkan dhe në Kosovë, gjatë një takimi në Fakultetin e Studimeve Ndërkombëtare të Universitetit Johns Hopkins në Washington ka thënë se “Ballkani ka rënë në radhën e përparësive dhe nuk është më në qendër të vëmendjes së mediave, por ai shtoi se një gjë e tillë nuk duhet të ndryshojë përparësitë e Amerikës në atë pjesë të botës”.
Duke iu referuar asaj kohe ai ka thënë se; “Ajo zonë është ende e paqëndrueshme, ende e rrezikshme dhe ne mbetemi të angazhuar atje në nivel diplomatik dhe ushtarak”. Ai ka shrehur atëhere edhe shqetësimin për rënien e vëmendjes së Shteteve të Bashkuara në Ballkan. “Megjithatë unë nuk mendoj që qeveria amerikane e ka lënë thjesht mënjanë këtë çështje, por është e vërtetë që Lindja e Mesme ka mbizotëruar gjithçka. Ndoshta vitet e fundit nuk i kemi kushtuar aq shumë vëmendje rajonit të Ballkanit. Do të na duhet që të riangazhohemi përsëri”citohet të ketë thënë ish Senatori Hagel i cili më pasë ka vlerësuar faktin që europianët, kanë marrë përsipër shumë nga përgjegjësitë për rajonin e Ballkanit.
“Kjo është diçka pozitive, por një fakt i tillë nuk është një justifikim që Shtetet e Bashkuara të mos jenë pjesë e këtij angazhimi. Ishte një përpjekje që filloi me NATO-n, të gjithë aleatët tanë europianë ishin të përfshirë dhe ne duhet të vazhdojmë të jemi të angazhuar” ka pohuar 7 vjetë më parë ish Senatori republikan i Nebraskës Chuk Hagel, emër i cili po spekulohet deri tani se do të marrë muajin e ardhëshëm postine Sekretarit të Mbrojtjes së Shteteve të Bashkuara , me rikonfigurimin e ri të Administratës Obama.
Ish senatori Hagel, është ai që ka folur edhe për rëndësinë e mbajtjes së lidhjeve me Kosovën dhe Ballkanin në përgjithësi, në mënyrë që atje të konsolidohet demokracia.
“Kosova është shumë e rëndësishme dhe ne duhet të mbajmë lidhjet me popullin e Kosovës dhe të Ballkanit, pasi është një rajon i Europës ku për shekuj me radhë ka patur konflikte dhe njerëzit atje meritojnë demokraci, liri individuale dhe mundësi” ka pohuar ish Senatori Hagel duke shtuar se Shtetet e Bashkuara do të bashkëpunojnë me aleatët europianë për të garantuar këto liri dhe për të ndihmuar vendet e rajonit në drejtim të integrimit euro-atlantik.”
Ish senatorin Chuck Hagel, i cili në pension u “punësua” si shef i këshillit për inteligjencën e huaj pranë Presidentit Obama. Zoti Hagel është njëkohësisht professor në Shkollën e Shërbimit Diplomatik në Uashington. Ai në një takim më 10 qershor 2010,me Ministrin e Mbrojtjes i Shqipërisë Arben Imami në Shtetet e Bashkuara, dy vjet më parë në Komandën e Aleancës në Norfolk të shtetit Virginia, e cila ndjek njëkohësisht transformimin e forcave të armatosura të Shqipërisë, ka biseduar në Washington me Ministrin Imamai mbi çështje që kanë të bëjnë me transformimin e NATO-s.

Ata të dy kan folur mbi pjesmarrjen e Shqipërisë në NATO duke vlersuar kontributin e Shqipërisë në përpjekjet për të garantuar siguri dhe qendrueshmë në njërin prej rajoneve historikisht të paqendrueshëm të botës:
“Mendoj se të gjitha vendet e anëtare të NATO-s janë shumë të kënaqura që Shqipëria është në aleancë ashtu si edhe vendet e tjera anëtare që janë anëtarësuar vitet e fundit sepse kjo vërtet përfaqëson një stabilitet dhe siguri të cilën nuk e kemi parë më përpara. Shqipëria do të luajë një rol shumë të rëndësishëm ndërkohë që gjen vendin e saj në NATO. Aftësitë e saja do të rriten. Ajo do të gjejë rrugë të reja të sofistikuara për të marrë pjesë. Ajo po merr pjesë tani në një sërë detyrash bashkë me Shtetet e Bashkuara dhe Afganistani është vetëm një prej tyre,” citohet të ketë thë në atë takim zoti Hagel.
Ish-senatori dhe kryesuesi aktual i Këshillit të Atlantikut për Shtetet e Bashkuara të Amerikës, Chuck Hagel duke komentuar vizitën e zëvendëspresidentit amerikan Joe Biden në Bosnje, Serbi dhe Kosovë, në vitin 2009 theksoi se ajo paraqet një konfirmim se SHBA nuk e ka harruar Ballkanin. Në një deklaratë ekskluzive Hagel ka thënë se me Bidenin kishte biseduar para nisjes në turneun ballkanik. ”Ky rajon në aspektin gjeostrategjik është shumë i rëndësishëm jo vetëm për Evropën, por edhe për Shtetet e Bashkuara të Amerikës”, është shprehur Hagel duke vlerësuar se ky rajon “paraqet një udhëkryq të besimeve, popujve dhe fenomeneve të ndryshme”. “Por, megjithë përparimet e bëra, ky rajon ende nuk ka arritur gjithçka që i nevojitet”, ka theksuar Hagel.