Behlul Jashari – Page 146 – Dielli

Kosova, stabilitet i rajonit

February 14, 2017 by dgreca

-Kryediplomati i Norvegjisë, Børge Brende në Prishtinë: Ka jostabilitet në rajon, por ne shpresojmë se Kosova, edhe në vitet në vijim, të jetë eksportuese e stabilitetit. Kjo është shumë e rëndësishme/

-Minsitri i jashtem i Kosoves Hoxhaj pret mbështetjen e Norvegjisë për zhvillimin ekonomik të Kosoves/

unnamed -Norvegjia është shteti i 34-të që ka njohur Kosovën në 28 Mars të vitit historik 2008 të shpalljes së pavarësisë në 17 Shkurt, të njohur deri tani nga 113 shtete anëtare të OKB-së/

PRISHTINË, 14 Shkurt 2017-Behlul Jashari/ Ministri norvegjez i Punëve të Jashtme, Borge Brende, sot në Prishtinë në takim me presidentin e Republikës, Hashim Thaçi, ku u bisedua për thellimin e bashkëpunimit ndërshtetëror, tha se miqësia dhe partneriteti mes Kosovës dhe Norvegjisë është i fuqishëm, porse ai do të thellohet edhe më shumë.“Ka jostabilitet në rajon, por ne shpresojmë se Kosova, edhe në vitet në vijim, të jetë eksportuese e stabilitetit. Kjo është shumë e rëndësishme. Ne e mbështesim fuqishëm punën tuaj drejt integrimeve evropiane dhe partneritetit më të ngushtë me NATO-n. Ne jemi një ndër shtetet që kanë vazhduar partneritetin me vendin tuaj për sa i përket zhvillimit ekonomik, sepse besojmë se duhet të ketë vende pune dhe investime në Kosovë”, theksoi kryediplomati norvegjez, Borge Brende.Presidenti Thaçi e falënderoi ministrin e Jashtëm të Norvegjisë për mesazhet e tij inkurajuese për të ardhmen e Kosovës dhe për të ardhmen evropiane të rajonit, duke shprehur mirënjohje për mbështetjen që Norvegjia i ka dhënë gjithmonë Kosovës. “Kosova do të vazhdojë t’i ruaj raportet speciale me Norvegjinë, një shtet që ka mbështetur gjithmonë paqen, stabilitetin dhe pavarësinë e Kosovës. Ministrin e Jashtëm të Norvegjisë e informova për dialogun mes Kosovës dhe Serbisë, për shpresën tonë që të arrijmë marrëveshje të reja. Ky normalizim mes Kosovës dhe Serbisë nënkupton një paqe dhe stabilitet për krejt Ballkanin”, deklaroi presidenti Thaçi.Duke folur për bashkëpunimin ndërshtetëror, presidenti Thaçi tha se ky bashkëpunim me Norvegjinë do të vazhdojë në të gjitha sferat politike, ekonomike dhe të sigurisë. Presidenti Thaçi dhe kryediplomati norvegjez diskutuan edhe për bashkëpunimin e ndërsjellë në luftën kundër fundamentalizmit, kundër ekstremizmit dhe terrorizmit, që Kosova dhe rajoni të kenë sa më shumë paqe, siguri, stabilitet dhe zhvillim ekonomik.

unnamed (1) Edhe kryeministri i Republikës së Kosovës, Isa Mustafa, priti në takim ministrin e Punëve të Jashtme të Norvegjisë, Borge Brende, me të cilin kanë biseduar për bashkëpunimin ndërmjet dy shteteve si dhe zhvillimet në Kosovë dhe rajon.Duke e falënderuar për përkrahjen e madhe të Norvegjisë, kryeministri Mustafa shprehu përkushtimin e Kosovës për zgjerimin e bashkëpunimit në shumë fusha, me theks të veçantë në ekonomi. “Kosova ofron kushte të shumë të favorshme për investitorët norvegjezë të cilët mund të shfrytëzojnë edhe Ligjin për Investime Strategjike, që tashmë ka hyrë në fuqi, që të jenë sa më prezentë me investimet e tyre shumë të mirëpritura në Kosovë”, tha kryeministri, duke shtuar se Norvegjia ka qenë dhe mbetet partner i rëndësishëm i Kosovës.Më tej, kryeministri Mustafa e ka njoftuar për proceset tjera në Kosovë, për rrugën euroatlantike të Kosovës si dhe për zhvillimet në rajon dhe më gjerë.Në këtë kontekst, kryeministri Mustafa theksoi përkushtimin e qeverisë së Kosovës për fuqizimin e subjektivitet ndërkombëtar, për proceset evropiane, si dhe avancimin e marrëdhënieve të mira me të gjitha shtetet fqinje.Ministri i Punëve të Jashtme të Norvegjisë, Borge Brende, shprehu përkrahjen e mëtejme të Norvegjisë për Kosovën, në shumë fusha.Duke vlerësuar progresin e arritur deri më tani në Kosovë, ministri Brende, shprehu vullnetin e Norvegjisë për fuqizimin e bashkëpunimit dhe të shkëmbimeve ndërmjet dy shteteve.Gjatë takimit, u bisedua edhe për mundësitë e bashkëpunimit të mëtejmë në fushën e drejtësisë, ekonomisë, në fushën e barazisë gjinore si dhe në fusha të tjera.

unnamed (2) Kryetari i Kuvendit të Republikës së Kosovës, Kadri Veseli, priti poashtu sot në takim ministrin e Punëve të Jashtme të Norvegjisë, Borge Brende, me të cilin bisedoi për raportet që të dy shtetet kanë ndërtuar midis tyre, si dhe për mundësitë e zgjerimit të mëtejmë të tyre, në interes reciprok.Kryetari Veseli e njohu kryediplomatin norvegjez me zhvillimet e fundit në Kosovë dhe në veçanti me jetën parlamentare.Veseli e falënderoi Brende për mbështetjen që Norvegjia i ka dhënë Kosovës në faza të ndryshme, ndërsa theksoi nevojën që kjo përkrahje të vazhdojë edhe në të ardhmen, si në forcimin e demokracisë dhe zhvillimin ekonomik, ashtu edhe procesin euro-integrues dhe anëtarësimin e Kosovës në organizata të ndryshme ndërkombëtare.Marrëdhëniet shumë të mira dhe miqësore me Norvegjinë, Veseli i konsideroi si vlerë të veçantë për Kosovën, të cilat, sipas tij, kanë ndikim pozitiv në rrugën e Kosovës drejt integrimeve euro-atlantike.Ministri i jashtëm norvegjez, Borge Brende, nga ana e tij, shprehu kënaqësinë e veçantë që gjendet për vizitë në Kosovë dhe për zhvillimet pozitive në vendin tonë.Kreu i diplomacisë norvegjeze konfirmoi vazhdimin e mbështetjes së shtetit të tij për Kosovën dhe aspiratat e saj euro-atlantike, duke e konsideruar këtë si rrugën e vetme për të gjithë rajonin. Ministri i Punëve të Jashtme të Norvegjisë, Børge Brende, po viziton sot Kosovën, ku në takimet e zhvilluara gjatë pasditës në axhendë është edhe pritja nga ministri i Punëve të Jashtme, Enver Hoxhaj.Pas takimit, ministrat Hoxhaj dhe Brende do të mbajnë konferencë të përbashkët shtypi në ambientet qeverisë së Kosovës.Norvegjia është shteti i 34-të që ka njohur Kosovën në 28 Mars të vitit historik 2008 të shpalljes së pavarësisë në 17 Shkurt, të njohur deri tani nga 113 shtete anëtare të OKB-së.

Hoxhaj pret mbështetjen e Norvegjisë për zhvillimin ekonomik të Kosoves/

Enver-Hoxhaj-e-Børge- Brende-Prishtine-14shkurt2017

Prishtinë, 14 shkurt 2017/ Ministri i Punëve të Jashtme i Republikës Kosovës, Enver Hoxhaj ka takuar homologun e tij norvegjez, Børge Brende. Duke e falenderuar për përkrahjen e vazhdueshme që Norvegjia ia ka ofruar Kosovës në shtetndërtimin e saj, ministri Hoxhaj ka theksuar se shteti norvegjez vazhdon të mbetet një partner i rëndësishëm i Republikës së Kosovës, të cilën po vazhdon ta përkrah edhe më tej në konsolidimin e shtetësisë dhe të subjektivitetit ndërkombëtar.Me këtë rast Hoxhaj ka bërë me dije se me ministrin Brende, kanë disktuar për mundësitë e thellimit të bashkëpunimit ndërmjet dy shteteve në fusha të ndryshme si në ekonomi, në çështjen e sigurisë si dhe në procesin e njohjes ndërkombëtare të pavarësisë së Kosovës dhe anëtarësimin e saj në organizata ndërkombëtare. “Kemi biseduar si të rrisim mundësitë e bashkëpunimit ekonomik dhe si të kemi investitorë nga ky shtet. Për këtë në një të ardhme do të organizojmë një forum të përbashkët ekonomik me qëllim të tërheqjes së investimeve nga Norvegjia”, ka deklaruar ministri Hoxhaj.

Hoxhaj ka theksuar se falë përkrahjes së vazhdueshme nga ky shtet, Kosova vazhdon të mbetet faktor stabilieti, i sigurisë dhe i paqes në rajon. Ndërsa ka shtuar se ka kërkuar ndihmë nga homologu i tij edhe për ndërtimin e marrëveshjeve kontraktuale ndëmjet Kosovës dhe NATO-së.Hoxhaj është shprehur se Republika e Kosovës pret që ky shtet të vazhoj ta përkrah Kosovën edhe më tej gjatë procesit të aplikimit në organizatat ndërkombëtare si dhe të përfitoj nga përvoja norvegjeze për shtrirje të sovranititeti përmes anëtarësimit.Nga ana tjetër ministri, Brende derisa ka kujtuar se shteti i tij ka përkrahur në vazhdimësi Republikën e Kosvës, ka theksuar se Norvegjia është mbështetëse e madhe e agjendës së Kosovës. Si shtet anëtar i NATO-së, ai ka deklaruar se Norvegjia brengoset për Ballkanin Perendimor dhe siç ka shtuar ai ky shtet dëshiron të jetë partner në rritjen e stabilitetit në këtë pjesë të rajonit.Ndërsa, sa i përket dialogut ndërmjet Kosovës dhe Serbisë, ministri Brende ka vlerësuar se është një proces shumë i rëndësishëm dhe se Norvegjia e mbështet plotësisht këtë proces.

‘HOME’ FITON BAFTA, ARRITJE HISTORIKE PËR KOSOVËN

February 13, 2017 by dgreca

-Ceremonia e edicionit të 70-të të BAFTA u mbajt në Royal Albert Hall në Londër/

Kosova fiton BAFTA

-Festivali Ndërkombëtar i Filmit Dokumentar dhe të Shkurtër DOKUFEST nga Prizreni ka dërguar njoftimin/ PRIZREN, 13 Shkurt 2017-Gazeta DIELLI-B.Jashari/ Filmi i shkurtër ‘Home’ është produksioni i parë kosovar që fiton çmimin prestigjioz BAFTA në kategorinë e filmave të shkurtë. Ceremonia e edicionit të 70-të të BAFTA u mbajt në Royal Albert Hall në Londër ndërsa të pranishëm ishin regjisori dhe skenaristi i ‘Home’ Daniel Mulloy, producentët Shpat Deda, Shpend Qamili, Scott O’Donnell, Afolabi Kuti, Chriss Wattling dhe producentët ekzekutiv Arta Dobroshi, Nora Sahatçiu, Tim Nash dhe Anthony Austin.“Kosova ishte prapa produksionit në çdo mënyrë. Talenti i ekipës së re e bënë ‘Home’ atë që është. Lidhja e thellë mes mesazhit të filmit dhe humanitetit dhe fuqisë së popullit Kosovar janë të thurrura në secilin kuadër të filmit.” tha regjisori Daniel Mulloy. Filmat e Mulloy kanë fituar me qindra çmime në festivale ndërkombëtare përfshirë Bafra, Bifa si dhe dy nominime për Akademinë Evropiane të Filmit. Daniel e shkroi skenarin e ‘Home’ në Kosovë dhe ai deshi që filmi të jetë një bashkë-produksion mes Kosovës dhe Britanisë së Madhe. Duke qenë se Daniel ka kaluar shumë kohë në Kosovë dhe për shkak të dashurisë së tij për këtë vend, ai e kupton potencialin që ka Kosova në aspektin artistik, në kulturë dhe në tregimin e storjeve.‘Home’ është bashkë-produksion i DokuFest, Somesuch dhe Black Sheep Studios me aktorë Jack O’Connel dhe Holliday Grainger në rolet kryesore. Filmi 20 minutësh është xhiruar në Kosovë dhe Britani të Madhe dhe e thekson gjendjen e refugjatëve dhe dhunës me të cilën përballen qindra mijëra njerëz në të gjithë globin.”Vlerësimi që HOME e morri në BAFTA është një nder i hatashëm dhe dëshmi e asaj që mund të arrihet kur njerëzit bëhen bashkë për një kauzë humane, në këtë rast për refugjatët. Mbi të gjitha, suksesi i filmit HOME i jep frymë të re mesazhit të bashkndjesisë që ne synojmë ta ndezim tek njerëzit dhe na e mundëson të arrijmë tek një audiencë edhe më e gjerë botërore, gjë që ishte qëllimi ynë që nga fillimi. Une ndjehem i nderuar dhe i privilegjuar që pata rastin të punoj me një grup njerëzish kaq inspirues gjatë realizimit të këtij filmi.”, tha producenti i filmit Shpat Deda.“Ky është moment historik për industrinë e filmit të Kosovës. Ne në DokuFest jemi jashtëzakonisht krenarë që kemi qenë pjesë e këtij projekti të udhëhequr nga filmëbërësi jashtëzakonisht i talentuar dhe bashkëpunëtori i DokuFest, Daniel Mulloy. Shpresojmë që filmi ynë do të rezonojë me politikëbërësit në marrjen e veprimeve si dhe në ndjenjën e empatisë me gjendjen e miliona refugjatëve në të gjithë botën.” tha producenti ekzekutiv i ‘Home’ dhe Drejtori Ekzekutiv i DokuFest, Eroll Bilibani.Ekipi i filmit ‘Home’ u përgëzua edhe nga kreu i Kombeve të Bashkuara në Kosovë, të cilët ishin mbështetësit kryesor të filmit. ‘Home është për shumë gjëra. Për Kombet e Bashkuara në Kosovë filmi përfaqëson përkushtimin e kosovarëve për t’u angazhuar në dialogun global për migrim dhe refugjatë , dhe tregon se Kosova mund të bëhet shtëpi e klasit botëror të filmave.” tha Andrew Russel.Ambasadori i Kosovës në Britaninë e Madhe, Lirim Greiçevci, poashtu uroj ekipën e filmit me një deklaratë: “Jam me të vërtetë i gëzuar që bashkëproduksioni mes Britanisë së Madhe dhe Kosovës ‘Home’ u shpërblye me Bafta sot. Uroj regjisorin Daniel Mulloy si dhe ekipën e tij të shkëlqyer të producentëve dhe aktorëve që e arritën këtë sukses të jashtëzakonshëm. Ata janë frymëzim për filmëbërësit dhe aktorët e ri të Kosovës që të ndjekin ëndrrat dhe aspiratat e tyre. Ata e meritojnë gjithë admirimin dhe mbështetjen tonë.”

KUSH E BËRI FILMIN?

Në rolet kryesore të filmit luajë Jack O’Connell, Holliday Grainger, Thaliya Lowles dhe Zaki Ramadani.

Ky film u mbështet bujarisht financiarisht dhe me logjistikë nga United Nations Kosovo Team: Zyra e koordinatorit për zhvillim (UNDCO), the United Nations Development Programme (UNDP), the Organizata Ndërkombëtare për Migrim (IOM), the Agjencia për Refugjatë (UNHCR), the Fondi i OKB-së për Aktivitete të Popullatës (UNFPA), UN Women, the Volluntaret e OKB-së (UNV) dhe zyra e OKB-së për shërbime të projekteve (UNOPS). Shumë partnerë të dedikuar kanë qenë të gatshëm ta mbështesin temën e refugjatëve dhe të migrimit të shtjelluar në film përfshirë UNKT, USAID, Fondacionet për Shoqëri të Hapur nga MB, dhe përfshin kontributin e Komunës së Prishtinës dhe Ministrisë së Punëve të Jashtme të Kosovës, Freud Communications, Forcat e Sigurisë së Kosovës, Bartle Bogle Hegarty, DCM, Policia e Kosovës, Kodak, Kryqi i Kuq Kosovë, Kubestudios dhe shumë përkrahësëve të tjerë.‘Home’ përfshiu bashkëpuntorë muzikor si ColdPlay, Dizzy Rascal dhe Wiley të cilët e dhuruan muzikën e tyre për filmin.’Home’ është një bashkëproduksion mes DokuFest, Somesuch dhe Black Sheep Studios.Producentët e ‘Home’ janë Shpat Deda, Afolabi Kuti, Tim Nash, Chris Watling dhe Scott O’Donnell.Producentët Ekzekutiv të ‘Home’ janë Arta Dobroshi, Eroll Bilibani, Anthony Austin, Sally Campbell, Andre Des Rochers dhe Davud Karbassioun.Ekipi i ‘Home’ në Kosovë përfshin Nita Deda, Renea Behluli, Mrine Godanca, Elmedine Morina, Blerta Ismaili, Blerta Basholli, Valter Lucaj, Gezim Ramizi, Ardi Mehmeti, Lorik Kocani, Drilon Potera, Besnik Selimi, Elsen Hasani, Bilbil Shabani, Armend Nimani, Leart Shehu,Fatlum Idrizi, Besart Mehmetii, Enver Konushevci, Dardan Menxhiqi, Gazmend Bajri, Legjenda Banushi, Leonora Mehmeti, Vita Beqiri, Andra Dauti, Agan Asllani dhe Visar Bikliqi.Ekipi i aktorëve të ‘Home’ nga Kosova përfshinë Zaki Ramadani, Mevlyd Osmani, Adriana Matoshi, Andi Bajgora, Shkelqim Islami, Armend Ismajli, Rebeka Qena, Afrim Mucaj, Fatmire Sahiti, Edison Dabiqaj, Rifat Smani, Armend Zeqiri, Arianit Hoti, Kreshnik Malushai, Leonit Maloku, Allmir Suhodolli, Alban Rexhaj, Fatlum Berisha, Granit Uka, Agnes Nokshiqi, Jan Nokshiqi, Mejreme Berisha, Kreshnik Berisha, Fatlum Hasani, Ermal Sadiku, Mentor Morina, Melihate Qena, Bujar Ahmeti dhe Leon Bicaku.

GAZETA RILINDJA NË 72 VJETOR, 15 VJET DËBIM E MBYLLJE – DEKLARATË PROTESTE

February 12, 2017 by dgreca

Speciale-Gazeta DIELLI në SHBA në përkrahje të Gazetës RILINDJA në Kosovë/

-Gazeta tradicionale e Kosovës Rilindja ka nisë të dalë në Prizren para 72 vitesh, në 12 shkurt 1945, në frymën e Konferencës së Bujanit e me angazhimin e intelektualëve më të shquar të asaj kohe, me shkronja plumbi që u sollën me arka nga Tirana/Në një vend normal, të lirë e demokratik, të sundimit të ligjit e të drejtësisë, gazeta tradicionale e Kosovës Rilindja në këtë 12 shkurt 2017 do të festonte 72 vjetorin.

Por, në këtë Kosovë, në këtë muaj mbushen plot 15 vjet nga 21 shkurti 2002, ditës së dëbimit prej shtëpisë së saj, të kundërligjshëm dhe të dhunëshëm, nga administrata e UNMIK dhe detyrimisht mbylljes së gazetës historike Rilindja, e cila kërkoi të drejtën e saj edhe me padi në gjykatë e edhe duke nxjerrë rreth 40 numra protestues të jashtëzakonshëm të kohëpaskohëshëm.

Qeveria e Kosovës në mbledhjen e 15 shkurtit 2005 mori vendim për ndërprerjen e punimeve që po zhvilloheshin – anulimin e kontratës për renovim të Pallatit të Rilindjes të uzurpuar, “për shkak të paqartësive juridike në lidhje me pronësinë dhe menaxhimin e objektit”, ndërsa për ta shndërruar në ndërtesë qeveritare i rifillloi në 7 nëntor 2008 duke siguruar për zgjidhjen e ligjshme që do bëhet edhe për gazetën Rilindja edhe për punëtorët e saj, por që ende nuk u bë.Gazeta Rilindja, kronikë e zhvillimeve historike të Kosovës, me punën e gazetarëve e punonjësve tjerë të saj nëpër shtëpa si në kohën e luftës, pasi doli me botime speciale edhe për ngjarjen historike të shpalljes së pavarësisë në 17 shkurt 2008 dhe për njohjet ndërkombëtare që pasuan, ka përmbyllë daljet e kohëpaskohëshme në 30 dhjetor 2008, me paralajmërimin në ballinë: “Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë”.

Zgjidhja për Rilindjen, që ka statusin e ndërmarrjes shoqërore, pritet e kërkohet nga Agjencia Kosovare e Privatizimit. Për privatizimin e gazetës tradicionale të Kosovës, pa u ndërlidhur me objektin e saj të shpronësuar, që tash është ndërtesë qeveritare, është edhe shembulli i gazetave në rajon dhe në botë, që kishin statusin si të Rilindjes, e që janë privatizuar dhe kanë vazhduar të dalin.

Në arsyetimin e kërkesës për privatizim theksohet edhe se emri dhe tradita e gazetës Rilindja është një vlerë shumë e madhe, e krijuar gjatë mëse shtatë dekadave, është pasuri me vlerë më të madhe se e çdo pallati, dhe kjo duhet të vlerësohet edhe në procesin e privatizimit.

“Dhe, ai që do ta blejë gazetën Rilindja dhe natyrisht do e nxjerrë këtë të përditshme historike dhe tradicionale të Kosovës do jetë pronar i një pasurie të madhe mediale kombëtare, do të jetë trashëgimtar i ligjshëm i firmës-emrit, traditës. Rilindja ishte, është dhe mbetet edhe si një shenjë identiteti”, theksohet në kërkesën drejtuar Agjencisë Kosovare të Privatizimit në 12 shkurt 2014.

“Kompensimi i punëtorëve në procesin e likuidimit të Ndërmarrjes Shoqërore Gazetare Rilindja, për dëbimin kolektiv nga puna dhe dëmet”, është kërkesa tjetër drejtuar Agjencisë Kosovare të Privatizimit në shkresën e 21 shkurt 2014.

Një e drejtë tjetër e garantuar me ligj për punëtorët e gazetës Rilindja, por që ende nuk u realizua, është pagesa e 20 përqindëshit të vlerës së çdo prone, përfshirë Arkivin e Rilindjes, pasuri e madhe e gazetës tradicionale dhe kombëtare, për dërgimin e të cilit në Arkivin e Kosovës kemi nënshkruar marrëveshjen në 29 janar 2007 bashkë me Agjencinë Kosovare të Mirëbesimit – tash Privatizimit, duke pasur për këtë edhe vendimin me shkrim të Kryeministrit të Kosovës.

Gazeta tradicionale e Kosovës Rilindja ka nisë të dalë në Prizren para 72 vitesh, në 12 shkurt 1945, në frymën e Konferencës së Bujanit e me angazhimin e intelektualëve më të shquar të asaj kohe, me shkronja plumbi që u sollën me arka nga Tirana.

Behlul Jashari/

Kryeradaktor i gazetës Rilindja deri në numrin e fundit dhe në kohën e dëbimit nga Pallati i Rilindjes (Ndërmarrja Shoqërore Gazetare Rilindja sipas Statutit nuk ka drejtor, por vetëm kryeredaktor i cili e menaxhon dhe përfaqëson)

Prishtinë, 12 Shkurt 2017

***
PRESIDENTI HISTORIK I KOSOVËS, DR. IBRAHIM RUGOVA PER RILINDJEN-“BUJKUN”:

“‘Me emrin ‘Bujku’, këtu dhjetë vite ka mbajur të gjallë informimin e brendshëm në Kosovë”, vlerësonte Presidenti historik i Kosovës, Ibrahim Rugova, në funddhjetorin 2002, në Rezidencën Presidenciale në Prishtinë në pritjen që i bëri kryeredaktorit të gazetës Rilindja, Behlul Jashari, që ishte edhe kryeredaktor i parë-themelues i gazetës së rezistencës “Bujku”, tash edhe korrespondent në Prishtinë i Gazetës Dielli, me ç’rast i dha një intervistë ekskluzive, duke i dhënë kështu edhe mbështetjen e fuqishme institucionale krijimit të mundësive dhe kushteve për rifillimin e botimit të gazetës simbol i traditës së informimit në Kosovë, të cilën administrata e UNMIK e kishte dëbuar kundërligjshëm e padrejtësisht nga Pallati Rilindja në 21 shkurt 2002, pak ditë pasi kishte festuar 57 vjetorin në 12 shkurt.

AMBASADORI I SHBA NË GAZETËN RILINDJA NË 12 SHKURT 2002: “SUNDIMI I LIGJIT” APO “SUNDIMI I BANDAVE”? KOSOVA DUHET TË VENDOSË

“‘Sundimi i Ligjit’ apo ‘Sundimi i Bandave’? Kosova Duhet të Vendosë”. Me këtë titull, Ambasadori Xhon Menzis, Shef i Misionit, Zyra e SHBA-ve në Prishtinë, shkruante ekskluzivisht për gazetën tradicionale të Kosovës në numrin e 12 shkurtit 2002, botuar në ballinë, ku fillimisht theksonte: “Sot shënohet 57-vjetori i gazetës ditore ‘Rilindja’, gazetës më të vjetër në gjuhën shqipe në Kosovë”.

Shkrimi i plotë:

“Sundimi i Ligjit” apo “Sundimi i Bandave”? Kosova Duhet të Vendosë

Nga Ambasadori Xhon Menzis/

Shef i Misionit, Zyra e SHBA-ve në Prishtinë/

Sot shënohet 57-vjetori i gazetës ditore “Rilindja”, gazetës më të vjetër në gjuhën shqipe në Kosovë. Kur filloi botimin në vitin 1945, Lufta e Dytë Botërore zhvillohej fuqishëm ende, bombat atomike ende nuk ishin hedhur, dhe Jugosllavia e Dytë ishte në formim e sipër. Shkurt, bota në të cilën u lind “Rilindja” ishte rrënjësisht e ndryshme nga bota në të cilën ajo jeton sot. Në këtë pjesë të botës, ndryshimet ndodhin shpejt dhe shpesh, dhe kurrë nuk dihet se kur do të jenë këto ndryshime për të mirë apo për të keq.Si shef i misionit të Zyrës së SHBA-ve në Prishtinë, unë e di mirë rolin që e ka “Rilindja” në shoqërinë demokratike që është duke u krijuar në Kosovë. Me këtë rast të veçantë dëshiroj të flas lidhur me këtë rol të cilin duhet ta kenë mediumet në shoqëri.

Kosova e sotme është shumë më ndryshe se Kosova kohës kur u lind “Rilindja”. Kosova e sotme është shumë më e lirë, shumë më demokratike, thellë e futur në rrugën e formimit të institucioneve demokratike të vetëqeverisjes. Por poashtu, Kosova e sotme është një vend i ndarë keqësisht mes dy opcioneve – dhe mbetet të shihet se nëpër cilën rrugë do të shkojë ajo.Çështja është se a do të gëzojë Kosova sundimin e ligjit apo do të bie nën sundimin e bandave.Të premten e kaluar, bandat e demonstrantëve të padisiplinuar, me sa duket nën drejtimin e elementeve kriminale të vendosura që të shkatërrojnë sundimin e ligjit, janë turrur me tërbim nëpër rrugët e Prishtinës duke thyer dritaret, duke sulmuar policët ndërkombëtarë dhe ata kosovarë, dhe duke sulmuar kosovarët e tjerë të cilët nuk pajtoheshin me mendimet e tyre arrogante lidhur me kauzën e tyre të “drejtë”. Në vend se të mbronin tre të burgosurit, ish-anëtarët e UÇK-së, me anë të argumenteve, fakteve dhe me anë të mjeteve ligjore, ata do të përdornin vetëm forcën dhe taktikën e rrugës sepse me sa duket e dijnë se drejtësia nuk është në anën e tyre. Këta demonstrues zgjodhën grushtin, gurin dhe shufrën metalike për të argumentuar, e jo arsyen, debatin dhe institucionet e gjyqit.

Sidoqoftë, gjëja më e tmerrshme është se në rrahjen e shkaktuar nga demonstruesit u sulmuan dhe u lënduan dy policë amerikanë dhe pesë policë të tjerë ndërkombëtarë. Si mundi të ndodhë kjo? A harruan përnjëherë këta kosovarë gjithë atë që bashkësia ndërkombëtare – e veçanërisht amerikanët – ka bërë për ta që nga marsi i vitit 1999? A kanë harruar këta vagabondë të paktë, këta kriminelë, se amerikanët ishin të PARËT që erdhën në Kosovë në vitin 1996, dhe se përkushtimi i ynë ndaj paqës, drejtësisë dhe sigurisë në Kosovë është i thellë dhe afatgjatë? Ky numër i vogël i kosovarëve – të cilët është e qartë se nuk i shprehin pikëpamjet e shumicës dërrmuese të popullit të Kosovës – a i kanë harruar ata pamjet dhe zhurmat e forcave ushtarake amerikane dhe të NATO-s duke e çliruar Kosovën nga shtypja? A kanë harruar ata se çfarë domethënie kishte këtu pamja e flamurit amerikan në vitet 1996, 1999, dhe përsëri tani gjersa ai valon mbi kulmet e shtëpive, në dritaret e dyqaneve të panumërta, madje edhe në veturat dhe veshjet e kosovarëve paqedashës dhe zbatues të ligjit? Kur këta banditë ngritën dorë të godasin një bashkëqytetar timin me gur, a nuk e panë ata flamurin në mëngën e tij dhe a nuk menduan ata se nuk po e sulmojnë vetëm një polic por vetë Shtetet e Bashkuara dhe gjithë njerëzit liridashës ? A kanë harruar ata se sa siguruese është për shumë kosovarë fakti se e shohin atë flamur në mëngët e qindra policëve dhe policeve që punojnë në Kosovë? Mua me duket se po, ata kanë harruar.Tre të arrestuarit do të ballafaqohen në gjyq me akuzat, me ç’rast procesi gjyqësor do të përcaktojë fajësinë apo pafajësinë e tyre. Çdo kosovar duhet të jetë i lumtur që njerëzit e akuzuar në këtë mënyrë nuk do të merren më në “biseda informative” dhe se ata nuk do të torturohen, por do të kenë mbrojtje juridike, proces të rregullt, dhe përfaqësim të drejtë dhe kompetent në gjykata. Nëse kanë faj, ata duhet të dënohen, ashtu si do të dëshironte çdo njeri i denjë. Prap, nëse janë të pafajshëm, atëherë gjyqi do ta vendosë këtë dhe ata duhet të lirohen – ashtu siç dëshiroj unë dhe çdo njeri tjetër që beson në sundimin e ligjit.Çka ka të bëjë e gjithë kjo me ditëlindjen e 57-të të “Rilindjes”? Shumë. Në një shoqëri që zhvillohet dhe transformohet në një shoqëri demokratike dhe shoqëri civile me sundim të ligjit dhe me institucione të vërteta të vetëqeverisjes, mediumet janë një ndër shtyllat mbështetëse të asaj shoqërie. Mediumet duhet të qëndrojnë gjithnjë si “roje” mbi institucionet e qeverisë, të veprojnë për interesa të popullit dhe të mbrojnë të drejtën e tyre për të ditur se çka ndodh në qeveri, se si punojnë udhëheqësit e tyre të zgjedhur, se çfarë vendimesh marrin ata në emër të popullit, dhe që të parashtrojnë vizionin lidhur me atë se ku shoqëria dëshiron të shkojë, dhe ta mbajnë atë vizion ashtu që të gjithë të mund ta shohin dhe ta diskutojnë.

Kur bandat dëshirojnë të kontrollojnë debatin, kur ato dëshirojnë të përdorin rrugaçërinë dhe dhunën për të shprehur vullnetin e tyre, kur ato dëshirojnë të mbysin zërin e kundërshtarëve dhe të frikësojnë të tjerët kur argumentet e tyre nuk qëndrojnë, atëherë mediumet duhet të jenë të parat që do t’i dënojnë dhe kritikojnë këto banda dhe kështu të mbrojnë sundimin e ligjit dhe ata të cilët e mbështesin sundimin e ligjit. Javën e kaluar e pamë sulmin e huliganëve kosovarë mbi forcën e re dhe trime policore të Kosovës. Ne kemi parë arrestimin e anëtarëve të TMK-së lidhur me veprat për të cilat është e qartë se nuk e kanë përkrahjen e TMK-së dhe të organizatës si tërësi, vepra këto të cilat shkojnë kundër po atyre vlerave mbi të cilat është ndërtuar TMK-ja. Në kohëra të tilla mediumet – TË GJITHA mediumet – duhet të marrin qëndrim dhe të apelojnë në të gjithë kosovarët që të dënojnë dhunën dhe të mbështesin sundimin e ligjit dhe të punojnë nga e para për të arritur krijimin e shoqërisë civile, gjë të cilën edhe ne edhe ju e dëshirojmë për Kosovën. Kjo vlen qoftë kur është fjala për trazira dhe sulme mbi policinë dhe njerëzit e pafajshëm, për frikësimin dhe madje vrasjen e figurave politike (madje edhe vrasjen e disa ish-komandantëve të UÇK-së) ose pjesëtarëve të grupeve tjera etnike, apo kur kjo ka të bëjë me çfarëdo forme tjetër të dhunës së përdorur si mjet i të shprehurit politik.Në këtë përvjetor të 57-të të gazetës “Rilindja”, e uroj Z.Behlul Jashari, Z. Ramush Tahiri dhe gjithë kolektivin për punën e mirë që e bëjnë me shkrimet mbi çështjet e ndërlikuara politike në Kosovë, shkrime këto të drejta dhe të balancuara. Nuk është punë e vogël të botohet një gazetë për 57 vite me radhë dhe ju mund të jeni krenarë që e keni arritur këtë. Ne duhet të punojmë së bashku duke përdorur fuqinë e penës, fuqinë e diplomacisë dhe fuqinë e opinionit publik në mënyrë që të sigurojmë mosndryshimin e vazhdimësisë së përparimit demokratik të Kosovës, dhe që sundimi i ligjit do të mbizotërojë gjithnjë mbi sundimin e bandave.

***

Nga arkivi – gazeta Rilindja: Shkrim ekskluziv para 15 viteve nga Ambasadori Xhon Menzis Shef i Misionit, Zyra e SHBA-ve në Prishtinë, në numrin-botimin festiv të 12 Shkurtit 2002 të 57 vjetorit të gazetës tradicionale të Kosovës, Rilindja.

Në 12 Shkurt 2017 – ditën e 71 vjetorit të Gazetës Rilindja, foto e korrespondentit në Kosovë të Gazetës Dielli – Behlul Jashari: Ballina e gazetës Rilindja me shkrimin e Ambasadorit Amerikan, Menzis.

Prizren-Zhvillohet Forumi i parë Ekonomik Kosovë-Shqipëri

February 10, 2017 by dgreca

-Me vepra përkrahet, fuqizohet dhe thellohet bashkepunimi ekonomik/

-Ministri i Financave Avdullah Hoti:Jemi duke punuar drejt unifikimit të plotë ekonomik ndërshqiptar/

MF-01

PRIZREN, 10 Shkurt 2017-Gazeta DIELLI-B.Jashari/ Me vepra konkrete duhet dhe mund të perkrahet, fuqizohet dhe thellohet bashkepunimi ekonomik ne mes te Kosoves dhe Shqiperise, u konstatua në Forumin e parë Ekonomik Kosovë-Shqipëri, i cili po mbahet sot në Prizren, organizuar nga Oda Ekonomike e Kosovës dhe Dhoma e Tregtisë dhe Industrisë në Tiranë.

Ministri i Financave në qeverinë e Kosovës, Avdullah Hoti duke folur në Forumin e parë Ekonomik Kosovë-Shqipëri, theksoi se integrimi ndërshqiptar bëhet edhe përmes kësaj forme të bashkëpunimit.

“Dy ekonomitë po unifikohen çdo ditë, po shfrytëzojnë komplementaritetet në turizëm, bujqësi, energjetike dhe sektorë të tjerë. Jemi duke punuar drejt unifikimit të plotë ekonomik ndërshqiptar”,tha ministri Hoti.Ai gjithashtu bëri të ditur se diskutimet e të dy krerëve të përfaqësuesve të bizneseve dhanë mesazhet e tyre të qarta sa i përket bashkëpunimit ndërmjet dy vendeve, sidomos bashkëpunimit ndërinstitucional.“Unë kam gjetur një gjuhë shumë të mirë me homologët e mi në Shqipëri dhe shumë prej çështjeve janë zgjidhur dhe brenda dy ose tre viteve ne mund të flasim për unifikim të ekonomive tona. Për, aq sa kam njohuri për bizneset ka shumë fusha ku janë komplementare. Jam maksimalisht nacionalist në promovimin ekonomik”, u shpreh ministri i Financave të Kosovës, Hoti.Ai më tej shtoi se shtoi se, “jemi duke shikuar në çfarë mase marrëveshja e CEFTA-së është duke i mbrojtur bizneset, sepse shumë vende fqinje nuk po i respektojnë të drejtat që dalim nga kjo marrëveshje. “Kemi bërë progres relativisht të mirë te njohja e certifikatave të ndryshme me Shqipërinë, ku janë mbi 20 që janë pranuar në mënyrë reciproke”, theksoi ministri kosovar, Hoti.

Ndërsa, Nikolin Jaka, kryetar i Dhomës së Tregtisë dhe Industrisë në Tiranë tha se ky aktivitet ka një rëndësi për të ofruar një të ardhme për zhvillimin ekonomik të të dyja vendeve.“Sot është një aktivitet jashtëzakonisht i rëndësishëm dhe kjo vuloset nga prezenca e madhe këtu. Sot jemi këtu për të ofruar një të ardhme tjetër dhe lëvizje tjetër për zhvillimin ekonomik të të dyja vendeve dhe këtë nuk do ta bëjmë me fjalë dhe deklarata të nacionalizmit, por me veprime”, tha Jaka.

“Ne mblidhemi shpesh dhe diskutojmë për problemet dhe hallet që kemi, por qeveritë tona duhet të na krijojnë mekanizmin se si të suportohen produktet tona. Do të bëja një thirrje qeverive se nuk mjafton vetëm mbështetja, heqja e burokracive, por që tani duhet të mendojmë për një strategji afatgjate, në mënyrë që qeveritë tona të krenohen me sipërmarrësit tanë”, tha ai.

Kryetari i Odës Ekonomike të Kosovës, Safet Gërxhaliu, tha se pjesëmarrja e të gjithë aktorëve në këtë takim dëshmon për forcimin e urave të bashkëpunimit në mes dy shteteve dhe të një populli të ndarë.

“E veçanta e krejt kësaj në këtë takim është se kemi një preminencë të aktoreve që janë të rëndësishëm për ekonominë e dy shteteve. Hapja e perspektive për bashkëpunim dhe avancim është hapja e rrugës për të hequr sfidat që kanë dy shtetet. Jeni të atakuar nga një konkurrencë agresive, i njollosin produktet e Kosovës dhe të Shqipërisë për të bllokuar bashkëpunimin ekonomik”, tha Gërxhaliu.

Kosovë janë edhe katër komunat e veriut

February 9, 2017 by dgreca

–Kuvendi i Kosovës solidarizim me Ramush Haradinajn, ndërpret seancën për ta vazhduar të marten/

–Lexojeni të plotë në fund të kronikës fjalimin e kryeministrit Mustafa në interpelancën e Kuvendit të Kosovës/Foto Gazeta DIELLI-Behlul Jashari: Kuvendi i Kosovës/

-Situata në Mitrovicë, interpelancë e kryeministrit Isa Mustafa në seancën e Kuvendit të Kosovës me 23 pika në axhendë/

PRISHTINË, 9 Shkurt 2017-Gazeta DIELLI-Behlul Jashari/ Kuvendi i Kosovës nisi sot seancën plenare, ku në axhendën 23 pikëshe është edhe interpelanca e kryeministrit Isa Mustafa në lidhje me situatën e krijuar në Mitrovicë. Interpelanca me shumë debate do vazhdojë pas pushimit që u dha pasdite.“Veriu është pjesë e Republikës së Kosovës dhe qytetarë të saj janë edhe ata të katër komunave atje, si të gjitha të tjerave”, tha fillimisht Mustafa.Kryeministri u shpreh se, problemet në veri të vendit si edhe në çdo pjesë të Kosovës duhet t’i zgjidhim mbi bazë ligjore me mirëkuptim dhe në komunikim me qytetarët.“Qeveria e Republikës së Kosovës mbetet e përkushtuar për ruajtjen dhe mbrojtjen e pavarësisë, sovranitëtit dhe integritetit territorial të shtetit tonë. Ky është obligim kushtetues për të gjithë ne ashtu siç është sigurimi i të drejtave dhe mundësive të barabarta për të gjithë qytetarët pa marrë parasysh përkatësinë e tyre”, theksoi kryeministri Mustafa.Ai në lidhje me situatën e krijuar në Mitrovicë ka folur edhe dje në mbledhjen e qeverisë duke njoftuar për marrëveshjen e arritur për rrënimin e murit afër urës në pjesën veriore të qytetit dhe planin për ndërtimin e sheshit atje.“Është një marrëveshje ligjore, është zgjidhë një problem në mënyrën më të mirë, në saj të mirëkuptimit. Edhe veprimin e mënjanimit të atij muri e ka bërë vetë komuna e Mitrovicës Veriore, e cila ka zbatuar me përpikëri marrëveshjen që kemi lidh”, tha kryeministri Mustafa.Ai bëri të ditur edhe se, tash për ndërtimin e sheshit ka kërkesë nga vetë komuna e Mitrovicës së Veriut që të bashkëpunojnë ngushtë me Ministrinë e Mjedisit dhe Planifikimit Hapësinor të qeverisë së Kosovës në procesin e mbikëqyrjes së punimeve, në mënyrë që çdo gjë të bëhet sipas marrëveshjes dhe projektit për revitalizimin e sheshit, që janë nënshkruar.Në seancën e sotme të Kuvendit kryeminsitri Mustafa ka edhe një interpelancë tjetër në lidhje me përgjegjësinë mbi Ligjin e sigurimeve shëndetësore në Republikën e Kosovës, të dyja të kërkuara nga subjekti opozitar Lëvizja Vetëvendosje.Fillimisht, Kuvendi i Kosovës miratoi sot me shumicë rezolutën në lidhje me organizimin e arsimit parashkollor, parafillor dhe parauniversitar në Kosovë, ndërsa pasi votuan vetëm 23 deputetë të parlamentit 120 anëtarësh nuk kaloi propozim-rezoluta në lidhje me arrestimet e aktivistëve të Lëvizjes Vetëvendosje, pika këto për të cilat debati është shterur në seancën e kaluar. Votimi u zhvillua pas deklarimeve jashtë rendit të ditës dhe pyetjeve parlamentare.Në axhendën e seancës së sotme janë edhe debati për të ardhëmen e Forcës së Sigurisë së Kosovës, shqyrtimi i Axhendës për Reforma Evropiane, si dhe disa preojektligje, mes të cilëve ai për ratifikimin e Marrëveshjes për themelimin e Zyrës rajonale për bashkëpunim rinor në mes Kosovës, Shqipërisë, Bosnjës dhe Hercegovinës, Malit të Zi, Maqedonisë dhe Serbisë, si dhe Projektligji për plotësimin e Ligjit për Dhomën e Posaçme të Gjykatës Supreme të Kosovës për çështjet në lidhje me Agjencinë Kosovare të Privatizimit.

Në axhendë është edhe votimi i Projektligjit për ndryshimin dhe plotësimin e Ligjit për Lirinë Fetare në Kosovë, por nuk do mund të kalonte në votimin në seancë plenare nëse vazhdon “ngrirja” e pjesëmarrjes në Kuvend e grupit parlamentar prej 11 deputetësh e Listës Serbe, pasi duhen edhe më shumë se gjysma e votave të deputetëve të komuniteteve pakicë – së paku 11 nga gjithësej 20 në parlemantin 120 anëtarësh.Prej gati katër muajësh, nga 9 tetori 2016, Lista Serbe ka deklaruar “ngrirjen” e pjesëmarrjes në qeverinë e Kosovës dhe në Kuvend, në kundërshtim të Ligjit për Trepçën, lidhur me të cilin iu drejtua edhe Gjykatës Kushtetuese, e cila në 31 tetor shpalli vendimin se ky ligj është kushtetues. Kryesia e Kuvendit të Kosovës, në mbledhjen e përbashkët me kryetarët e grupeve parlamentare, të kryesuar nga Kadri Veseli, kryetar, ka paralajmëruar se për shkak numrit të madh të pikave të rendit të ditës, seanca e nisur sot pritet të vazhdojë të martën dhe të mërkurën e javës së ardhshme.

Fjala e kryeministrit Mustafa në interpelancën e Kuvendit të Kosovës

Prishtinë, 9 shkurt 2017- Fjala e kryeministrit të Republikës së Kosovës, Isa Mustafa në interpelancën e Kuvendit të Kosovës lidhur me situatën në Mitrovicë.

Faleminderit z. Kryesues,

Të nderuar deputetë të Kuvendit,

Të nderuar anëtarë të kabinetit qeveritar, qytetarë të nderuar,

Prolongimi i kësaj interpelance mund të them se nuk është çështje e kërkesës time. Ajo çfarë është kërkuar në Kryesi është vetëm të prolongohet për një seancë të Kuvendit, sepse nuk kam qenë këtu dhe unë në asnjë rast nuk kam bërë vërejtje që të mos mbahet interpelanca dhe të mos përgjigjem në këtë interpelancë.Dëshiroj vetëm të ripërsërisë se veriu i vendit të Kosovës është pjesë e Republikës së Kosovës, se qytetarët e katër komunave në veri, ashtu sikurse edhe qytetarët e gjitha komunave tjera, janë qytetarë të Republikës së Kosovës. Prandaj, gjendjen në veri të vendit mund ta kuptojmë dhe ta trajtojmë më lehtë dhe pa ngarkesa, kur vetës ia sigurojmë dhe ia sqarojmë se po flasim për territorin tonë dhe po flasim për qytetarët tanë, pa marrë parasysh problemet e trashëguara dhe pa marrë parasysh problemet që sot po lindin.

Problemet në veri të vendit sikurse edhe në çdo pjesë të Republikës Kosovës duhet t’i zgjidhim mbi bazë ligjore me mirëkuptim dhe me komunikim me qytetarët.Qeveria e Republikës së Kosovës mbetet e përkushtuar për ruajtjen dhe mbrojtjen e pavarësisë, sovranitetit dhe integritetit territorial të shtetit tonë.Ky është obligim kushtetues për të gjithë ne, ashtu siç është sigurimi i të drejtave dhe mundësive të barabarta për të gjithë qytetarët, pa marrë parasysh përkatësinë e tyre.Qeveria e Kosovës dhe gjitha institucionet e vendit arritën që ta mbrojnë sovranitetin e shtetit, ta ruajnë stabilitetin e brendshëm përballë provokimeve destabilizuese që erdhën nga sjelljet provokuese të Serbisë. Me sjellje dhe me përgjegjësi shtetërore u ndal treni me parulla provokuese i nisur nga Beogradi. Në marrëveshje me kryetarin e Komunës së Mitrovicës së Veriut, dhe me përfaqësuesit serbë nga radhët e deputetëve dhe ministrave në institucionet e Kosovës, si dhe me përkrahjen ndërkombëtare arritëm marrëveshjen për rrënimin e murit ndarës dhe për ndërtimin e një sheshi sipas ligjeve dhe standardeve të përcaktuara.Po ashtu, kemi bërë të gjitha përpjekjet për të dëshmuar se fletarresti i lëshuar ndaj kryetarit të AAK-së dhe ish kryeministrit të vendit, Ramush Haradinaj, është politik, është joligjor dhe është i pavlefshëm jo vetëm për Kosovën, por duhet të jetë i pavlefshëm edhe për të gjithë komunitetin ndërkombëtar. Në të gjitha rastet, përgjigja jonë ishte institucionale dhe e vendosur në koordinim të plotë me të gjitha institucionet shtetërore, me presidentin e vendit dhe me kryetarin e Kuvendit. Në përballimin e sfidave gjatë kësaj periudhe, ne patëm përkrahjen e qytetarëve të Republikës së Kosovës, pa marrë parasysh përkatësinë e tyre etnike. U dëshmua se ata kanë besim në institucionet e Republikës së Kosovës.

Këtë të diel, më 5 shkurt e hoqëm murin në Mitrovicë, në dobi të lëvizjes së lirë të qytetarëve, me një angazhim institucional dhe me një proces të brendshëm të bisedimeve mes Qeverisë dhe autoriteteve komunale të pjesës veriore të Mitrovicës.

Tashmë ka filluar realizimi i planit për shëtitoren në rrugën kryesore të qytetit sipas ligjeve të Kosovës, në bashkëpunim të ngushtë për herë të parë ndërmjet Komunës së pjesës veriore të Mitrovicës, Ministrisë së Mjedisit dhe Planifikimit Hapësinor dhe Ministrisë së Administrimit të Pushtetit Lokal.

Të nderuar deputetë,

Janë dy probleme të cilat e ngarkojnë jo situatën në veri të vendit, por edhe në tërë vendin. Është shtrirja akoma e gjerë e strukturave paralele serbe në shumë komuna jo vetëm me shumicë serbe, por formalisht edhe në ato me shumicë shqiptare, në institucione shëndetësore dhe kompani publike dhe është ndikimi i drejtpërdrejt i Qeverisë së Serbisë në deputetët e Kuvendit dhe anëtarët e Qeverisë nga radhët e Listës Serbe. Prandaj, mendoj se kjo çështje duhet të shtrohet në mënyrë integrale, dhe jo vetëm si çështje e komunave të veriut, asaj të Leposaviqit, Zubin Potokut, Zveçanit dhe pjesës veriore të Mitrovicës, por si problem i tendencave që Serbia akoma mundohet të ushtrojë ndikim në Kosovë. Përfundimisht, normalizimi i marrëdhënieve me Serbinë ndërlidhet me shuarjen e plotë të strukturave paralele dhe me ndërprerjen e ndikimit të strukturave të Serbisë tek përfaqësuesit serbë në institucionet e Kosovës dhe me pranimin e pavarësisë së Kosovës nga ana e Serbisë.

Sa i përket veriut, Qeveria e Kosovës do të vazhdoj angazhimet për të konsoliduar më tej sovranitetin shtetëror në pjesën e veriore të vendit. Gjendja në veri ka ndryshuar pozitivisht, dhe këto ndryshime janë rezultat i drejtpërdrejt i dialogut në Bruksel. Zhvillimet negative kohëve të fundit nuk kanë mundur të zbehin këto rezultate dhe ne nuk kemi lejuar që ajo të ndodh. Me Marrëveshjen për Kufirin, është arritur që autoritetet shtetërore të Kosovës të vendosen në dy pika kufitare në veri, të cilat ishin sulmuar dhe djegur kur Kosova shpalli pavarësinë në vitin 2008. Këto pika gjenden aty ku është kufiri shtetëror i Kosovës me Serbinë. Kosova ka arritur të shtrijë sovranitetin e saj në veri të vendit në këto fusha: në fushën e sigurisë ku Policia e Kosovës vepron nga viti 2014; në fushën e doganave nga viti 2012; në fushën e administratës tatimore. Kosova ka vendosur të gjitha ministritë dhe agjencitë shtetërore që kanë veprimtari lokale në këtë pjesë të vendit, kemi shuar strukturën ilegale me premisa paramilitare e ashtuquajtur “Mbrojtje Civile”, ndërsa ish-pjesëtarët e saj janë bërë shërbyes civilë të punësuar në sistemin e Kosovës.

Është implementuar Marrëveshja për Kodin Telefonik dhe shteti i Kosovës ka marrë kodin e vet telefonik +383 i cili ka filluar edhe të implementohet. Është arritur marrëveshja për drejtësi, e cila marrëveshje do të filloj së shpejti të implementohet. Kemi hapur zyrat e regjistrimit civil në komunat veriore për t’i pajisur ata qytetarë me dokumente shtetërore të Kosovës. Kemi shuar strukturat paralele të Serbisë në fushat ku janë arritur marrëveshjet. Integrimi i komunitetit serb të asaj pjese në sistemin shtetëror të Kosovës është gjithnjë në rritje. Interesimi i tyre për jetë normale dhe prosperuese është fakt që shprehet nga vetë ata. Dialogu i Brukselit ka mundësuar që të hiqen të gjitha barrikadat në veri, të cilat ishin vendosur si reaksion ndaj shpalljes së pavarësisë së Kosovës, dhe po ashtu është hequr edhe barrikada nga ura e Mitrovicës e cila do të lëshohet së shpejti dhe do të hapet së shpejti qarkullimi automobilistik dhe qarkullimi tjetër ndërmjet pjesës jugore dhe veriore të Mitrovicës.

Këto zhvillime pozitive në veri të vendit krijuan mundësi për përmirësimin e jetës së qytetarëve, të bashkëpunimit dhe komunikimit në mes të qytetarëve dhe komuniteteve. Qeveria e Kosovës vlerëson kontributin e dhënë nga Bashkimi Evropian dhe nga Shtetet e Bashkuara të Amerikës për tejkalimin e tensioneve të krijuara dhe ndaljen e provokimeve destabilizuese nga ana e Serbisë dhe mund t’ju them se dy takimet e fundit në Bruksel, sa kanë qenë të rënda, aq edhe kanë dhënë rezultate në këtë fushë.Delegacioni jonë e ka bërë të qartë se mbesim të përkushtuar për paqe dhe për fqinjësi të mirë, por gjithnjë në kushte të respektimit të sovranitetit shtetëror dhe të mos ndërhyrjes në punët e brendshme.Kosova tani ka hyrë në rrugën zyrtare të integrimit evropian përmes Marrëveshjes për Stabilizim dhe Asociim me Bashkimin Evropian.

Të nderuar deputetë,

Kosova do të vazhdoj forcimin e shtetit përmes zhvillimit ekonomik, mirëqenies së qytetarëve dhe komunitetit, integrimit, sigurisë dhe prosperitetit. Ashtu siç e dëshmuam në këtë periudhë, Qeveria e Kosovës, të gjitha institucionet shtetërore kanë zotësinë për të përgjigjur çfarëdo sfide në të cilën ne do të ballafaqohemi. Kosova mbetet e përkushtuar në zbatimin e marrëveshjeve që janë në pritje të zbatimit, siç është marrëveshja për drejtësi dhe marrëveshjet tjera. Në këtë rast, dëshiroj të falënderoj veçmas Shtetet e Bashkuara të Amerikës, Bashkimin Evropian, Gjermaninë, Britaninë e Madhe, dhe vendet tjera për vendosmërinë e tyre që të përkrahin proceset euro integruese të Kosovës.

Të nderuar deputetë,

Nga të gjitha interpelancat por edhe debatet që u iniciuan në Kuvend, tani kanë një emërues të përbashkët. Ky emërues është ndërprerja e dialogut, kushtëzimi i dialogut, ngrirja e dialogut. Dialogu me Serbinë në mbështetje nga Bashkimi Evropian dhe Shteteve të Bashkuara të Amerikës, zhvillohet në interes të Republikës së Kosovës, sepse Kosova po ballafaqohet me probleme që nga përfundimi i luftës, të cilat nuk kanë alternativë tjetër të zgjidhjes përpos dialogut. Me dialog ne nuk po zgjedhim problemet e Serbisë, sepse ne nuk po e cenojmë sovranitetin e Serbisë.

Por është e kundërta.

Si kryeministër i vendit konsideroj se dialogu nuk ka alternativë, konsideroj se politika e dialogut me fqinjët, edhe me Serbinë, është orientim strategjik i Republikës së Kosovës, ashtu siç është orientim i yni strategjik rruga eurointegruese dhe partneriteti i përhershëm me Shtetet e Bashkuara të Amerikës.

E kam thënë publikisht se asnjë nga ju, nga opozita, që sot po e kundërshtoni dialogun nuk do ta kundërshtonit këtë po të ishit në pozitë dhe po t’i kishit përgjegjësitë që ne i kemi.Ne njihemi dhe nuk harrojmë se si jemi betuar të gjithë ne që jemi këtu pa marrë parasysh në cilën anë jemi sot këtu, se si do ta vazhdojmë dialogun dhe kemi konkurruar dhe kemi bërë gara se kush është ai që do ta marrë dhe ta udhëheq dialogun. Edhe rezoluta si e tillë nuk meriton të përkrahet ndryshe ajo nuk shprehë asnjë interes të Kosovës përveç të një mllefi opozitar ose të një mllefi i cili nganjëherë lind edhe si pasojë e veprimtarive të papërgjegjshme dhe sjelljes së papërgjegjshme të Serbisë.

Prandaj, do të ishte mirë që energjitë tona që po i shpenzojmë për të bllokuar dialogun, ose për të kundërshtuar bllokimin e dialogut t’i orientojmë pozitivisht në orientimin tonë për zhvillim ekonomik, për zhvillim social, për integrimin e serbëve në të gjitha institucionet e vendit tonë, për krijimin e mirëkuptimit dhe mirëbesimit reciprok dhe për rrugën tonë euroatlantike.Faleminderit!

-Kuvendi i Kosovës solidarizim me Ramush Haradinajn, ndërpret seancën për ta vazhduar të marten/

Seanca plenare e Kuvendit të Kosovës e nisur sot me axhendën 23 pikëshe do vazhdojë të marten e javës së ardhshme pasi ndërpreu punimet para votimit të një projektrezolute pas debatit në interpelancën e kryeministrit Isa Mustafa në lidhje me situatën e krijuar në Mitrovicë.Pas diskutimeve, në cilësi të iniciuesit të kësaj interpelance, deputeti Rexhep Selimi na Lëvizja Vetëvendosje prezantoi tekstin e projektrezolutës, nëpërmjet të cilës i kërkohej qeverisë që të zbatojë pa vonesë ligjet në fuqi për ndërtimet e paligjshme në veri, të heq çdo lloj pengese për lëvizjen e lirë në Mitrovicë, jo më larg se 30 ditë nga miratimi i kësaj rezolute, të hartojë planin dhe kalendarin e kthimit të qytetarëve shqiptarë dhe rindërtimin e shtëpive të tyre në veri të qytetarit, qeveria të tërhiqet nga marrëveshjet e 25 gushtit 2015 të nënshkruara në Bruksel, si dhe në vend të negociatave me Serbinë në Bruksel, Kuvendi të angazhohet që të fillojë dialogun me qytetarë të Kosovës të nacionalitetit serbë, për integrimin e tyre.

Para hedhjes në votim të projekt-rezolutës, fjalën e mori kryetari i grupit parlamentar të AAK-së, Pal Lekaj, i cili kërkoi që në shenjtë proteste me vendimin për zgjatjen e ndalimit në Francë të Ramush Haradinajt, Kuvendi të ndërpresë punimet.

Kryeparlamentari Kadri Veseli njoftoi se ky është qëndrim edhe i grupeve të tjera parlamentare dhe në shenjë solidarizimi me Haradinajn, ndërpreu seancën, duke paralajmëruar vazhdimin të martën, në orën 10:00.

Kryetari i Kuvendit të Kosovës, Veseli ka bërë edhe një postim në ‘facebook’, ku shkruan: “Me keqardhje mësova për zvarritjen e marrjes së vendimit nga gjykata franceze për bashkëluftëtarin Ramush Haradinaj. Akuzat nga Beogradi kundër Haradinajt janë të papranueshme. Me këtë rast, solidarizohem me Ramushin, familjarët dhe bashkëpunëtorët e tij, duke i siguruar se të gjithë jemi pranë tij dhe Institucionet e Republikës së Kosovës do të angazhohen për lirimin e tij”.