Behlul Jashari – Page 161 – Dielli

QEVERIA E KOSOVES TERHIQET NGA DEMARKACIONI

September 1, 2016 by dgreca

*QEVERIA E KOSOVËS E TËRHEQ NGA RENDI I DITËS DEMARKACIONIN ME MALIN E ZI, PËRFUNDON SEANCA/

*KRYEMINISTRI Mustafa: Qeveria do të vazhdojë me agjendën e saj evropiane dhe euroatlantike/

* Thaçi: Hezitimi nga njerëzit e zgjedhur rrezikon pa të drejtë interesat shtetërore/

* AAK-Seanca e sotme ishte votë kundër Demarkacionit/

Seanca plenare e Kuvendit të Kosovës e zhvilluar mes tensioneve e protestave përfundoi pas një debati. Më parë, Qeveria e Kosovës e tërheq sot nga rendi i ditës dhe procedura Kuvendore marrëveshjen e Demarkacionit me Malin e Zi, tha kryeministri Isa Mustafa.

“Si kryeministër i Kosovës konsideroj se sot nuk janë rrethanat dhe nuk është situatë ku duhet të votojmë ligjin për ratifikimin e marrëveshjes me Malin e Zi. Qeveria e tërheq sot këtë projektligj nga procedura kuvendore. Me bashkëbisedim do të provojmë të gjejmë një marrëveshje në lidhje me ligjin. Nuk është mënyra e duhur që të procedojmë me këtë ligj kur kemi presione mbi deputetët. Tërheqja e këtij ligji nuk do të thotë se do të ndryshojmë marrëveshjen mirëpo do ta procedojmë në Kuvend kur qeveria e vlerëson se është gati”, tha kryeministri kosovar Mustafa.

Në seancën e Kuvendit, në emër të grupit parlamentar të AAK, deputeti Daut Haradinaj, kërkoi sot të shqyrtohet e votohet për demarkacionin duke aluruar se koalicioni qeverisës nuk i ka votat e mjaftueshme. “Ne nuk mund të kushtëzohemi nga Lista Serbe”, tha ai lidhur me mospraninë e deputetëve serbë në seancë.

Lideri i Nismës Fatmir Limaj pyeti pse po tërhiqet ky ligj nga qeveria që shumë kohë këkronte të votohej sot. “Nuk i keni votat për ta votuar demarkacionin në variantin që është, edhe po të ishte këtu Lista Serbe që mungon”, i tha Limaj koalicionit qeverisës.

Glauk Konjufca, kryetar i Grupit Parlamentar të LVV tha se po dështon demarkacioni, kjo tërheqje e qëverisë është dështitm i demarkacionit edhe pa votim se nuk i ka votat koalicioni qeverisës.

“E konsideroj këtë votim, dhe pse dështoi demarkacioni janë pesë faktorë që dua t’i falënderoj, siç është populli i Kosovës, ekspertët e pavarur-profesorët e Universitetit të Prishtinës, pastaj aktivistët që po vuajnë në burgje, deputetët e LDK-së dhe PDK-së që e bënë të pamundur që Qeveria t’i ketë numrat, dhe në fund falënderoj opozitën… E konsideroj si një votim që është votuar e nuk ka kaluar”, tha Konjufca.

Në seancën e Kuvendit të paralajmëruar për në orën 11:30, e të nisur me dy orë vonesë, para demarkacionit në axhendë ishin dy interpelanca sipas kërkesave nga deputetetë të Lëvizjes Vetëvendosje, të kryeministrit Isa Mustafa, në lidhje me kodin telefonik shtetëror të Kosovës, si dhe në lidhje me situatën aktuale politike në pjesën veriore të Republikës së Kosovës. Por interpelancat i tërhoqi nga rendi i ditës vetë Lëvizja Vetëvendosje që të kalohej më shpejt te çështja e demarkacionit.Seanca e sotme e Kuvendit të Kosovës nis me koha për deklarime jashtë rendit të ditës dhe koha për pyetje parlamentare, ndërkohë pati edhe replika.

LVV: ARRESTOHET NËNKRYETARJA E KUVENDIT TË KOSOVËS, AIDA DËRGUTI

Lëvizja Vetëvendosje ndërkohë ka njofuar se, pos deputetes Donika Kadaj-Bujupi., Policia ka arrestuar edhe deputeten tjetër të saj, nënkryetaren e Kuvendit të Kosovës, Aida Dërguti.

Thaçi: Hezitimi nga njerëzit e zgjedhur rrezikon pa të drejtë interesat shtetërore.Presidenti i Kosovës, Hashim Thaçi, pas seancës së sotme të Kuvendit të Kosovës shkruan në ‘facebook’:

Rrethanat që po krijojnë zvarritjen e mëtutjeshme të implementimit të agjendës shtetërore të marrëveshjeve ndërkombëtare paraqesin shqetësim serioz për qytetarët e Kosovës dhe për partnerët tanë euroatlantikë.

Ky hezitim nga njerëzit e zgjedhur rrezikon pa të drejtë interesat shtetërore, që ndërlidhen me liberalizimin e vizave dhe themelimin e ushtrisë së Kosovës.

Me këto zvarritje, partnerëve tanë ndërkombëtarë po ua heqim argumentet që të na mbështesin në arritjen e qëllimeve dhe të interesave tona madhore. HTH

KRYEMINISTRI Mustafa: Qeveria do të vazhdojë me agjendën e saj evropiane dhe euroatlantike/

Kryeministri i Kosovës, Isa Mustafa, ka shkruar pas ngjarjeve në ‘facebook’:

Të nderuar qytetarë,
Ju edhe sot dëshmuat dinjitetin tuaj dhe përkushtimin për shtetin. Thirrja dhe kërcënimet Lëvizjes Vetëvendosje për përmbysje të shtetit nuk gjeti përkrahjen tuaj.
U dëshmua qartë se qytetarët u besojnë institucioneve të kryejnë punën e shtetit dhe jo rrugës dhe dhunës.
Dëshiroj, po ashtu të falënderoj Policinë e Kosovës për punën e tyre në nivelin më të lartë për të mbrojtur rendin dhe qetësinë publike dhe institucionet e shtetit. Policia sot parandaloi përdorimin e mjeteve të rrezikshme në rrugë dhe në sallën e Kuvendit të Republikës së Kosovës.
Siguria është përgjegjësi e shtetit dhe të qytetarëve. Sot u vërtetua edhe një herë përkushtimi i përbashkët për vendin.
Qeveria do të vazhdojë me agjendën e saj evropiane dhe euroatlantike. Qytetarëve do t’ua mundësojmë të udhëtojnë pa viza.

AAK-Seanca e sotme ishte votë kundër Demarkacionit

Ajo që ndodhi sot në Kuvendin e Kosovës është votë kundër dhe jo tërheqje e kryeministrit për kurrfarë rrethanash. E sotmja në Kuvend, është rezultat i një pune të mundimshme njëvjecare, politike e qytetare, e një vetëdijesimi të elitave shkencore e intelektuale dhe e shumicës së deputetëve por edhe e një qendrimi krejt abuzues të liderve të tanishëm shtetëror.Nëse duhet veçuar, individualisht dike, atëherë heroi i këtij kundërshtimi, është Ramush Haradinaj! Krejt cfarë mund të ndodhë pas ditës sësotme në lidhje me këtëversion të demarkacionit, mund të jetë vetëm fabrikim i një rezultati të paqenë.

Muharrem Nitaj, anëtar i Kryesisë dhe zëdhënës i AAK-së..

Populli është më i fuqishëm se Qeveria

Qeveria ka dështuar në zotimet e veta të errëta për Kosovën. Lëvizja VETËVENDOSJE! e konsideron fitore tërheqjen e marrëveshjes së Demarkacionit me Malin e Zi. Kryetari i Lëvizjes Visar Ymeri dhe Sekretari Dardan Molliqaj kërkuar largimin e Qeverisë dhe të klanit ‘Pronto’.

“Treshja Pronto, Veseli-Mustafa-Thaçi dështuan që ta legjitimojnë aktin e tyre të tradhtisë dhe kjo është humbje e jashtëzakonshme për të gjithë ata që më të gjitha energjitë janë munduar ta cungojnë vendin”, tha kryetari i Lëvizjes VETËVENDOSJE!, Visar Ymeri.

Kryetari Ymeri, më tej shtoi për dështimin e këtij klani për atë që ata ishin zotuar më herët se Demarkacioni do të votohet me 1 shtator dhe kjo është punë e kryer. “Kjo që ndodhi sot është një gjunjëzim për personin që e ka nënshkruar këtë marrëveshje”, vazhdoi Ymeri.

“Sot u dëshmua një gjë se populli është më i fuqishëm se Qeveria. Nga sot situata ka ndryshuar dhe se kjo Qeveria duhet të bije”, përfundoi fjalën e tij Ymeri.

Sekretari i Lëvizjes VETËVENDOSJE!, Dardan Molliqaj, foli lidhur me arrestimin dhe procesin gjyqësor për 6 aktivistët e Lëvizjes lidhur me sulmin ndaj Kuvendit të Kosovës.

“Në seancën e djeshme prokurori i çështjes largoi aktakuzën për armëmabjtje pa leje ndaj aktivistëve të VETËVENDOSJE!-s dhe se gjithë ajo zhurmë që u bë për armë tash nuk kemi asnjë aktakuzë për një gjë tillë”, tha Dardan Molliqaj.

Ai gjithashtu foli për gënjeshtrat e konferencës së Policisë të cilët kishin thënë se të akuzuarit e kanë pranuar fajin dhe se një gjë të tillë e ka treguar edhe vetë prokurori, i cili ka deklaruar se nuk ka prova që t’u jepet paraburgim aktivistëve të VETËVENDOSJE!-s.

“Vendimi i sotëm që tre prej aktivistëve, Adea Batushës, Petrit Ademit dhe Frashër Krasniqit që t’u jepet masa e arrestit shtëpiak dhe aktivistëve të tjerë siç janë Astrit Dehari, Egzon Haliti dhe Atdhe Arifi t’u jepet masa e paraburgimit është vendim krejtësisht politik”, shtoi Molliqaj.

“Pas gjithë kësaj ngjarje ne kërkojmë përgjegjësi morale, politike dhe penale për të gjithë personat e mëposhtëm:

Luan Keka, zv.drejtor i antiterrorit

Abdurrahman Islami, prokuror i Prokurorisë Speciale

Fatos Makolli, drejtor i njësisë kundër terrorizmit në PK.

Shpend Maxhuni, drejtor i Përgjithshëm i Policisë.

Mentor Shala, Drejtor i RTK-së.

Ridvan Berisha, kryeredaktor i RTK 3.”

Në fund, Molliqaj kërkoi lirimin e atyre që u arrestuan para seancës dhe pas protestës së sotshme:

Deputetet Aida Dërguti dhe Donika Kadaj-Bujupi si dhe aktivistët: Sadri Ramabaja, Dardan Kadaj, Erden Atiq, Leotrim Bajrami, Qëndron Kastrati, Valton Peci, Shkëlqim Salihu, Drilon Pireva, Ermal Osmani.

SEANCES PER DEMARKACIONIN I PARAPRIU PROTESTA

September 1, 2016 by dgreca

-Protesta në sheshe rreth ndërtesës së Kuvendit të Kosovës/

–BE: Thirrje për një ambient të qetë gjatë debatit dhe votimit/

-Para protestës, Policia: Gjetëm rreth 50 çanta me koktej molotovi në një depo në Prishtinë/

-Protestë dhe reagime të Lëvizjes Vetëvendosje/

–Lista Serbe: Nuk marrim pjesë sot në seancën e Kuvendit të Kosovës/

Komunikata e Policisë: JA ARSENALI I PLOTE QE GJETEM

Gazeta DIELLI nga korrespondenti në Prishtinë Behlul JASHARI/

PRISHTINË, 1 Shtator 2016/ Kuvendi i Kosovës pritet të mblidhjet sot në një seancë plenare, ku shqyrtimi i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi, i kundërshtuar nga opozita, është pika e 6-të e axhendës 8-pikëshe.

Ky projektligj është miratuar njëzëri në 4 gusht nga qeveria e Kosovës, e cila është takuar edhe dje në mbledhjen e 107-të, të 39-tën këtë vit.

Në kundërshtim të ratifikimit të demarkaciont, subjekti më i madh opozitar kosovar, Lëvizja Vetëvendosje ka ftuar protestë para Kuvendit të Kosovës, me fillim në orën 11:00 sot në ditën e seancës plenare. LVV protestën e sotme e ka paralajmëruar si historike, ndërsa dy partitë e tjera opozitare AAK e Nisma kanë deklaruar se nuk do të marrin pjesë në protestë, por pas bojkotit disa muajsh do marrin pjesë në seancën plenare dhe edhe me votë do jenë kundër demarkacionit.

Në seancën e Kuvendit të paralajmëruar për në orën 11:30, para demarkacionit në axhendë janë dy interpelanca sipas kërkesave nga deputetetë të Lëvizjes Vetëvendosje, të kryeministrit Isa Mustafa, në lidhje me kodin telefonik shtetëror të Kosovës, si dhe

në lidhje me situatën aktuale politike në pjesën veriore të Republikës së Kosovës.

Seanca nis me koha për deklarime jashtë rendit të ditës dhe koha për pyetje parlamentare, ndërsa dy pikat e fundit në axhendë janë shqyrtimi i raportit vjetor të Autoritetit Rregullator të Komunikimeve Elektronike dhe Postare për vitin 2015, si dhe propozimi i Grupit Parlamentar të AAK-së për zëvendësimin e anëtarëve në komisionet parlamentare.

BE: THIRRJE PËR NJË AMBIENT TË QETË GJATË DEBATIT DHE VOTIMIT

-Deklaratë e Zyres së BE-së në Kosovë/Përfaqësuesit të Posaçëm të BE-së/

Bashkimi Evropian, përmes një deklarate të Zyrës dhe të Përfaqësuesit të Posaçëm në Kosovë, bën thirrje për ambient të qetë gjatë debatit dhe votimit, ndërkohë që pritet sot seanca plenare e Kuvendit, ku ë axhendë është shqyrtimi i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi, i kundërshtuar nga opozita edhe me protestë të Lëvizjes Vetëvendosje.

“Në prag të debatit dhe votimit të sotëm në Kuvendin e Kosovës për ratifikim të marrëveshjes për kufirin me Malin e Zi, BE-ja në Kosovë ju bën thirrje të gjithë pjesëmarrësve të angazhohen për një ambient të qetë gjatë debatit dhe votimit. BE-ja në Kosovë, po ashtu rikujton se e drejta për të protestuar është një e drejtë demokratike, me kusht që ajo të jetë e shprehur në mënyrë paqësore dhe në pajtim me ligjet e Kosovës”, theksohet në Deklaratën e sapodërguar të Zyres së BE-së në Kosovë/Përfaqësuesit të Posaçëm të BE-së.

Në një njoftim tjetër dërguar më parë bëhej e ditur se, Shefja e re e Zyrës së BE-së në Kosovë dhe Përfaqësuesja e Posaçme e BE-së, Nataliya Apostolova, me kombësi bullgare, mori pozitat e saj sot, më 1 shtator 2016.Në të dy pozitat Apostolova e pason diplomatin slloven, Samuel Zhbogar.

PRISHTINË-PARA PROTESTËS, POLICIA: GJETËM RRETH 50 ÇANTA ME KOKTEJ MOLOTOVI

Policia e Kosovës deklaroi pak më parë se, “në funksion të realizimit të detyrave dhe autorizimeve ligjore duke përfshirë edhe angazhimet e saj në garantimin e rendit, sigurisë dhe qetësisë publike edhe gjatë zhvillimeve të parapara për sot, rreth orës 10:00, gjatë një operacioni për parandalim të veprimeve të kunderligjshme, gjatë një bastisje me urdhër edhe të organeve kompetente, brenda në një depo në Prishtinë ka arrit të gjej rreth pesëdhjetë (50) çanta me koktej Molotovi, ku një pjesë e madhe e tyre është e perpunuar, vaj i zi, dhe benzinë të përpunuar”.

Policia ka dërguar edhe disa foto të këtyre dëshmive nga vendim i ngjarjes.

Më parë është njoftuar se, “lidhur me protestën e paraparë të mbahet sot në Prishtinë gjatë zhvillimeve në Kuvendin e Republikës së Kosovës, protestë e cila megjithatë nuk është e lajmëruar ashtu siç parashihet me procedurat dhe Ligjin mbi tubimet publike, Policia e Kosovës me kohë ka bërë të gjitha përgatitjet e nevojshme, duke hartuar planin operativ për menaxhimin e situates së sigurisë, para, gjatë dhe pas këtyre zhvillimeve”.

LISTA SERBE NUK MERR PJESË NË SEANCËN E KUVENDIT PËR DEMARKACIONIN

Lista Serbe nuk do marrë pjesë në seancën e sotme të Kuvendit të Kosovës, ka konfirmuar deputeti i saj Nenad Rashiç, pa dashur të japë hollësi se pse. “Është e vërtet se Lista Serbe nuk do të marrë pjesë në seancën e sotme. Nuk dëshirojmë të komentojmë më shumë në këto momente mirëpo është zyrtare se nuk do të marrim pjesë”, citohet ai nga media, e cila ka njoftuar edhe për konsultime të Listës Serbe me Beogradin.Kuvendi i Kosovës prtiet të mblidhjet sot në një seancë plenare, ku shqyrtimi i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi, i kundërshtuar nga opozita edhe me protestë të Lëvizjes Vetëvendosje, është pika e 6-të e axhendës 8-pikëshe, por që sipas zhvillimeve të fundit ka mundësi të shtyhet sepse koalicioni qeverisës pa Listën Serbe që ka 11 deputetë nuk ka vota të mjatueshme, së paku 80 të Kuvendit 120 anëtarësh. Sipas disa paralajmërimeve e deklaratave, edhe po të votonin serbët, vështirë do kishte vota të mjaftueshme.

KOSOVË-KDI: VOTIMI DHE PROTESTAT PËR DEMARKACIONIN, KONFORM VLERAVE TË DEMOKRACISË

Instituti Demokratik i Kosovës (KDI) pret që seanca e sotme parlamentare e Kuvendit të Kosovës, ku parashihet ratifikimi i marrëveshjes për demarkacionin e kufirit me Malin e Zi të zhvillohet në frymën e një debati të hapur dhe konstruktiv duke respektuar faktet e paraqitura dhe pikëpamjet e ndryshme politike.
“Pavarësisht epilogut, marrëveshja për shënjimin e vijës kufitare me Malin e Zi nuk duhet të prolongohet më tej, por duhet t’i nënshtrohet procesit të votimit për t’i hapur rrugë zhbllokimit të jetës politike e institucionale”, thekson deklarata e dërguar.
Më tej KDI shprehet se, deputetët si përfaqësues të zgjedhur të qytetarëve, sot më shumë se të tjerët kanë përgjegjësinë që të marrin vendime për tema që kanë kaluar nëpërmjet polarizimeve të mëdha shoqërore, ndërsa vota e tyre të bazohet në vullnetin e tyre dhe të mos jetë e ndikuar nga presione apo shantazhe
“Vendimet e dala nga vota e deputetëve, cilat do qofshin ato, duhet të jenë të pranueshme nga të gjitha institucionet, partitë politike dhe qytetarët të cilët përmes votës së tyre i kanë zgjedhur ata”, thekson deklarata.
Në anën tjetër, vijon KDI, protestat si një e drejtë qytetare duhet të zhvillohet në mënyrë të qetë dhe paqësore, pa cenuar të drejtat e qytetarëve të tjerë dhe pa cenuar institucionet e shtetit, ndërsa autoritetet shtetërore duhet të garantojnë shprehjen e kësaj të drejte dhe të krijojnë kushte të mjaftueshme për të protestuar.

AGK, SHQETËSIM PËR ARRESTIMIN E GAZETARIT

Asociacioni i Gazetarëve të Kosvës -AGK deklaroi sot se me shqetësim ka pranuar lajmin se është arrestuar gazetari i KlanKosova, Dibran Istrefi, gjatë kryerjes së detyrës së tij. “Nga informatat e para që i kemi nga terreni mësojmë se gazetari është arrestuar përkundër mbajtjes së akreditimit në vend të dukshëm”, thuhet në reagim.

Gjithashtu, vijohet më tej, nga burime tjera dhe të pakonfirmuara jemi informuar se gazetari tashmë është liruar.

“I bëjmë thirrje Policisë së Kosovës dhe të gjitha institucioneve përkatëse që ta lirojnë sa më shpejt nëse deri tashmë nuk e kanë liruar, dhe gjithashtu i ftojmë që të kenë kujdes të veçantë në trajtimin e gazetarëve.

Ndalja e gazetarëve në çfarëdo forme paraqet trysni ndaj punës së tyre dhe ndaj lirisë së shprehjes, por është edhe në kundërshtim të drejtpërdrejt me aktet më të larta juridike të vendit tonë si dhe me konventat ndërkombëtare për të drejtat e njeriut”, thuhet në reagimin e AGK derisa shumë gazetarë po raportojnë nga zhvillimet në Kuvendin e Kosovës ku ende nuk ka filluar seanca dhe në protestën e LVV rreth tij.

LVV: POLICIA E GRUPE ANONIME JANË ANGAZHUAR JASHTËLIGJSHËM KUNDËR VETËVENDOSJE!-s

Lëvizja Vetëvendosje ka dërguar këtë komunikatë: Gjatë gjithë natës policia dhe grupacione të panjohura janë angazhuar në një fushatë pa precedent bastisjesh dhe shpifjesh, kundër VETËVENDOSJE!-s.

Arsyeja e vetme për këto gjeste diktatoriale, është dëshira e Thaçit, Veselit e Mustafës për t’ia dhuruar 8200 hektarë Malit të Zi, kundër ligjit, kundër vullnetit qytetar e kundër dëshirës së deputetëve.

Gjatë natës janë bastisur e vazhdojnë të mbahen në kontroll e presion ambientet komerciale dhe magazinat e kompanisë që kanë marrë përsipër zërimin dhe ekranin LED për protestën. Këto ambiente janë bllokuar prej orës 1 pas mesnate dhe policia po i mban të bllokuara ende.

Po ashtu policia ka bllokuar edhe magazinat e Lëvizjes VETËVENDOSJE!, ku ndodheshin materialet dhe parrullat për protestën e sotme.

Gjatë natës, kur policia ka qenë e angazhuar maksimalisht për sabotimin e protestës, grupe të panjohura kanë shpërndarë fletushka me përmbajtje urrejtëse dhe ofenduese kundër VETËVENDOSJE!-s. Ato vende të botës ku nxitet dhuna e urrejtja ndaj opozitës, të gjitha kanë përfunduar keq, në konflikt apo në regjim fashist.

Këto aksione prej regjimit shtypës policor kanë si autor direkt Thaçin, Veselin e Mustafën. Ata janë gati ta çojnë vendin në shkatërrim, janë gati të përdhosin demokracinë, të bëhen si Sadami, Asadi apo Gadafi, vetëm e vetëm që të realizojnë projektet e tyre rrënuese për vendin, siç është Demarkacioni e Zajednica. Këto projekte janë çmimi i qëndrimit të tyre në pushtet.

I bëjmë thirrje qytetarëve të mos lejojnë pushtetin e frikës të bëhet pushtet i terrorit. Masivisht autobusët po nisen nga çdo vend i Kosovës për të ardhur në protestën e sotme. Bashkangjitu dhe ti, për demokracinë, për atdheun tënd.

***

POLICIA E KOSOVËS: NË KUFI ME MALIN E ZI NUK KA ASNJË INCIDENT

Policia e Kosovës deklaroi pak më parë se, “pas shkrimeve të publikuar sot nëpër disa portale dhe media lidhur me gjoja një incident të armatosur në brezin kufitar Kosovë-Mali i Zi, informon opinionin dhe mediat se raportime të tilla janë të pabazuar dhe të pavërteta”.

“Zyrtarët kompetent të Policisë së Republikës së Kosovës janë në nivel të kryerjes së detyrave dhe autorizimeve edhe në brezin kufitar shtetror dhe deri në këto qaste nuk ka të raportuar apo të konfirmuar asnjë incident të tillë”, thekson njoftimi i dërguar.Ndërkohë, Kuvendi i Kosovës nisi sot me vonesë rreth dyorëshe një seancë plenare, ku shqyrtimi i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi, i kundërshtuar nga opozita edhe me protesta të Lëvizjes Vetëvendosje, është pika e 6-të e axhendës 8-pikëshe. Pritjet janë që kjo pikë të hiqet nga rendi i ditës.

Partia opozitare, Aleanca për Ardhmërinë e Kosovës deklaroi pak më parë se, “beson se marrëveshja e Demarkacionit me Malin e zi, merr epilog me votimin në Kuvend, prandaj edhe beteja për rrëzimin e kësaj marrëveshjeje, sot, duhet të zhvillohet aty”.

“Demarkacioni duhet të rrëzohet me votën e të gjithë deputetëve, pa dallim partie politike, rajoni, apo etnie. Vota kundër është votë për Kosovën si një dhe e pandashme”, shprehet AAK.

Komunikatë për media

Informacion shtesë lidhur me angazhimet dhe veprimet e Policisë së Kosovës në garantimin e rendit dhe sigurisë së përgjithëshme

Prishtinë, 1 shtator 2016

Policia e Kosovës gjatë të realizimit të detyrave dhe autorizimeve ligjore për mbajtjen e rendit, sigurisë dhe qetësisë publike, mbrojtjen e pronës private dhe shtetrore si dhe në funksion të menaxhimit të situatës së sigurisë së përgjithshme dhe parandalimit të aktiviteteve të kunderligjshme në vend, ka ndermarr veprime hetimore dhe operacionale permes të cilave janë identifikuar dhe sekuestruar disa pajisje të dyshimta të cilat mund të paraqesin rrezik për jeten e qytetarëve, si dhe shkaktojnë dëme materiale në qoftë se arrihet deri te posedimi dhe perdorimi i tyre.

Disa persona të dyshuar, poashtu janë shoqruar nga Policia e Kosovës, për intervistim lidhur me dyshimet e bazuar për veprime të kunderligjshme.

Me datë, 01.09.2016, në rrugën “28 Nëntori” në Prishtinë në një depo të një objekti, gjatë bastisjes së realizuar nga Policia me urdhër të organeve kompetente janë gjetur dhe sekuestruar dëshmitë si në vijim:

25 Canta me shishe të vogla nga qelqi te mbushura me materie të lëngshme
Gjashtë pako të ndryshme me shishe të mbushura me materie te lëngshme
Shtatë plastike të improvizuara për hedhjen e mjeteve te ndryshme
Pesë shishe plastike 10 litërshe të mbushura me materie te lëngshme
Dy hinka ngjyre të kuqe
Tri qese me gur të madhësive të ndryshme
Një qese me maska vizatimore
25 Canta me shishe te vogla nga qelqi te mbushura me materie te lëngshme
Shtate Canta me kavanoz me materie të lëngshme
Një qantë me 31 shishe të vogla ngjyre vjollce me materie të lëngshme
Shtate megafonë
Një paketë me ID të personave me emra dhe mbiemra të tyre.
21 sprej me ngjyrë.

Deri më tani të gjitha këto janë të konfirmuara, përderisa evidentimi është ne proces.

Gjatë zhvillimeve sot, sipas procedurave ligjore nga Policia janë shoqëruar për intervistim dhjetë (10) përsona të dyshuar, nga ta, dy (2) deputetë të kuvendit të RKS-së, dhe të gjitha veprimet tjera janë ndermarr në koordinim me prokurorinë kompetente.

Njëri nga të ndaluarit e dyshuar me iniciale E. A. (1983), në ora 11:25 është kapur afër ndërtesës se Qeverisë së RKS-së, duke tentuar të ndërhyjë në kabllotë e sistemit të transmetimit televiziv, ku ka hap njërën prej kutive të sinjalit të televizionit dhe ka tentuar ta këpus, ai në krah kishte qantën në të cilën kishte edhe gjësendet e dyshuara.
Është konsultuar Prokurori kompetent, ku për të dyshuarin e lartcekur me iniciale E.A. ka urdhëruar që të hapet rast “Hyrje në sistemin kompjuterik”, të intervistohet dhe të lirohet në procedure të rregullt.

Policia është duke realizuar me kompetence detyrat dhe përgjegjësit e saj ligjore dhe falënderon të gjithë për mirkuptimin dhe bashkëpunimin e treguar në funksion të identifikimit të aktiviteteve ilegale të cilat për rrjedhojë mund të krijojnë rrezik dhe pasiguri për qytetarët tanë dhe institucionet e vendit.

Me respekt

Zyra për Informim e PK-së

DPP-Prishtinë

Kosova 1.666 të zhdukur

August 29, 2016 by dgreca

-U mbajt tryeza “Dita Ndërkombëtare e Personave të Zhdukur – rasti i Kosovës”/

-Tryeza u organizua me qëllim të sensibilizimit, ndërgjegjësimit dhe informimit të drejtë të opinionit vendor dhe ndërkombëtar, për procesin e ndriçimit të fatit të personave të zhdukur gjatë luftës në Kosovë/

PRISHTINË, 29 Gusht 2016-Gazeta DIELLI/Në Kuvendin e Republikës së Kosovës, është mbajtur sot tryeza me temën: Dita Ndërkombëtare e Personave të Zhdukur – rasti i Kosovës”, për shënimin e 30- gushtit, Ditës Ndërkombëtare për Persona të Zhdukur.

Tryeza u organizua nga Komisioni Parlamentar për të Drejtat e Njeriut, Barazi Gjinore, Persona të Pagjetur dhe Peticione i Kuvendit të Republikës së Kosovës, si dhe Komisioni Qeveritar për Persona të Zhdukur dhe Këshilli Koordinues të Asociacioneve Familjare të të Zhdukurve të Kosovës, me qëllim të sensibilizimit, ndërgjegjësimit dhe informimit të drejtë të opinionit vendor dhe ndërkombëtar, për procesin e ndriçimit të fatit të personave të zhdukur gjatë luftës në Kosovë.

Gjatë kësaj tryeze u tha se Kosova akoma pret zbardhjen e 1.666 personave të zhdukur, si pasojë e luftës së vitit 1998-1999.

Kryetarja e Komisionit për të Drejtat e Njeriut, Barazi Gjinore, persona të pagjetur dhe Peticione, Lirije Kajtazi, në fjalën e saj, tha se Kuvendi i Kosovës, në vitin 2011 ka miratuar Ligjin për persona të zhdukur, si dhe ligje tjera që kanë të bëjnë me kujdesin për kategoritë e prekura nga zhdukja e familjarëve, duke sqaruar se për këtë çështje Kuvendi pati nxjerrë rekomandime. Ajo tha se kryesit e këtyre krimeve duhet të nxirren para drejtësisë. Sa i përket procesit të dialogut mes Kosovës dhe Serbisë, ajo tha se duhet të insistohet më tutje dhe të ushtrohet trysni më e madhe në këtë drejtim.

Kryetari i delegacionit të Kosovës, grupi i punës për persona të zhdukur, Ibrahim Makolli, ndërkaq, tha se çështja e fatit të të zhdukurve nuk ka zënë vend meritor në agjendat e institucioneve vendore dhe as atyre ndërkombëtare.

“Apelojmë te bashkësia ndërkombëtare që ta shtojë trysninë mbi Beogradin, për të hapur arkivat e ushtrisë, të policisë dhe të administratës shtetërore, sepse besojmë se aty fshihen të dhënat e plota për fatin e të zhdukurve”, tha Makolli, duke shtuar se po të kishte vullnet më të madh të faktorit ndërkombëtar, kjo çështje do të merrte një kah pozitiv.

Ndërsa, Thomas Gnocchi, përfaqësues i Zyrës së Bashkimit Evropian në Kosovë, mes tjerash tha se duhet të punohet më shumë në drejtim të informatave për të zbuluar fatin e personave të zhdukur. Ai shtoi se BE-ja përpiqet të ofrojë fonde dhe mbështetje për zbardhjen e fatit të pagjeturve.

Ndërkaq, Bajram Qerkini, përfaqësues i familjeve të të zhdukurve, tha se edhe pas 17 vjetësh, ata kanë të njëjtat shqetësime, dhimbje e pritje, dhe se edhe ky gusht po i gjen në të njëjtën gjendje.

“Të sillen para drejtësisë të gjithë ata që kanë marrë pjesë në zhdukjen e familjarëve tanë. Adresa për zbardhjen e fatit të tyre është Beogradi. Përfaqësuesit ndërkombëtarë duhet t’i bëjnë presion Serbisë dhe ta detyrojnë atë t’i hapë arkivat”, tha ai.Më pas, fjalën e morën edhe përfaqësues të tjerë të shoqatave dhe familjeve të të pagjeturve, të cilët shprehën shqetësimet e tyre që edhe 17 vjet pas luftës, fati i personave të zhdukur vazhdon të jetë i pazgjidhur, ndërsa kërkuan angazhim më të madh institucional, vendor e ndërkombëtar, që kjo çështje të zgjidhet sa më parë.

Pas diskutimeve, u lexuan konkluzionet, të hartuara nga grupi i caktuar për këtë çështje, me mundësinë që ato të plotësohen.Në konkluzionet e lexuara, kërkohej adresimi i një shkrese Komisionit për të Drejtat e Njeriut të Kombeve të Bashkuara, me seli në Gjenevë, nga ana e Komisionit përkatës parlamentar të Kosovës, nëpërmjet të cilës të pasqyrohet çështja e fatit të të pagjeturve. U kërkua gjithashtu, që shënimi i 30-gushtit, në të ardhmen, të bëhet në formate të tjera,si dhe zbatimi i rezolutave të miratuara nga Kuvendi. Në konkluzionet e lexuara, u kërkua, po ashtu, inicimi i plotësim-ndryshimi i Ligjit për persona të zhdukur dhe bartja e përgjegjësive nga ndërkombëtarët te vendorët, lidhur me çështjen e të pagjeturve.

KOSOVË-THAÇI: TË PAGJETURIT JANË PLAGË QË DUHET TË MBYLLET SA MË PARË

-Axhenda e aktiviteteve për shënimin e Ditës Ndërkombëtare për Persona të Zhdukur-

Të pagjeturit mbesin një nga plagët më të rënda që ka lënë lufta në Kosovë, ndërsa zgjidhja e fatit të të pagjeturve një nga detyrat më urgjente dhe më të rëndësishme për të gjithë, është shprehur sot Presidenti i Republikës, Hashim Thaçi, në vigjilje të Ditës Ndërkombëtare të të Personave të Zhdukur, 30 gushtit.

“Lufta ka lënë shumë plagë, por ajo e të pagjeturve është ndër më të rëndat”, ka thënë presidenti Thaçi, i cili shtoi se kjo çështje “rëndon familjet e të të pagjeturve por edhe tërë shoqërinë, marrëdhëniet mes komuniteteve por edhe gjasat për një të ardhme më të mirë”.

“Është nevojë urgjente, detyrë humanitare, obligim i të gjithëve që sa më parë të zbardhet fati i të gjithë të pagjeturve, pa marrë parasysh përkatësinë e tyre etnike”, tha presidenti Thaçi.

Presidenti i Kosovës theksoi se nuk kalon ditë që nuk i kujtojmë të pagjeturit. “Na shikojnë nga fotot e varura në rrethojën e Kuvendit të Kosovës. Na thërrasin familjet. Na i kujtojnë memorialët që i shohim rrugëve të Kosovës. Ndërsa, në ditët si 30 gushti, zotohemi që gjithmonë, pandërprerë, do të kërkojmë dhe do të këmbëngulim që sa më parë të zbardhet fati i secilit qytetar të Kosovës, në mënyrë që familjet e të pagjeturve të gjejnë paqen e tyre”, tha ai.

Presidenti i Republikës së Kosovës, Hashim Thaçi, përfundoi se, “janë mu këto dhimbje që i ka shkaktuar lufta motivi ynë që të punojmë që të mos lejojmë që të përsëritet lufta por gjithmonë të ketë paqe, pajtim dhe bashkëpunim mes të gjitha komuniteteve”.

Në Kosovë, 17 vjet pas luftës, janë ende mbi 1660 të zhdukur të pagjetur.

Ndërkohë, Këshilli Organizativ për shënimin e 30 Gushtit – Ditës Ndërkombëtare për Persona të Zhdukur, i përbërë nga përfaqësues të Komisionit Parlamentar për të Drejtat e Njeriut, Barazi Gjinore, Persona të Pagjetur dhe Peticione, Komisionit Qeveritar për Persona të Zhdukur dhe Këshillit Koordinues të Asociacioneve Familjare të të Zhdukurve të Kosovës, njoftuan sot axhendën e aktiviteteve për shënimin e Ditës Ndërkombëtare për Persona të Zhdukur.Aktivitetet e planifikuara për shënimin e 30 Gushtit–Ditës Ndërkombëtare të Personave të Zhdukur, janë të përshkruara në vijim:

– 29.08.2016, ora 11:55, organizimi i Tryezës me temën: ‘Dita Ndërkombëtare për Persona të Zhdukur – rasti i Kosovës’ (Tryeza do të mbahet në Kuvendin e Republikës së Kosovës).

– 30.08.2016, ora 09:30, vendosja e luleve te ‘Përmendorja dedikuar personave të zhdukur’ (përballë Kuvendit të Republikës së Kosovës).

– 30.08.2016, ora 11:00, Tubimi Qendror, në Merdar (lokalitet i vendkalimit kufitar të Kosovës me Serbinë), Komuna e Podujevës./b.j/

FITUESJA E ÇMIMIT NOBEL: UNË JAM SHQIPTARE

August 28, 2016 by dgreca

Speciale-NËNA TEREZË, FITUESE E ÇMIMIT NOBEL: UNË JAM SHQIPTARE/

-“Përsa i përket prejardhjes, unë jam shqiptare, indiane përkah nënshtetësia, motër murgeshë katolike, përkah thirrja, që i përkas tërë botës…” Këto fjalë të Gonxhe Bojaxhiut – Nënës Terezë, të shënuara në “Rilindja”, mbushën gëzim e krenari gjithë kombin/

-“Edhe të mitë janë nga këto vende, diku”, ishin fjalët e Nënës Terezë në Prishtinë në vizitën në Kosovë…/

-Reportazh i 3 Shtatorit 2010: Kosova pret festë në Katedralen “Nëna Terezë”/

Gazeta DIELLI nga korrespondenti në Kosovë Behlul JASHARI/

PRISHTINË, 28 Gusht 2016/ Më 10 dhjetor 1979 Nana Terezë, pasi kishte pranuar Çmimin Nobël për Paqe në Oslo ka deklaruar: “Përsa i përket prejardhjes, unë jam shqiptare, indiane përkah nënshtetësia, motër murgeshë katolike, përkah thirrja, që i përkas tërë botës…” Këto fjalë të Gonxhe Bojaxhiut – Nënës Terezë, të shënuara në “Rilindja”, mbushën gëzim e krenari gjithë kombin.

Kështu kam shkruar në RILINDJA 60 VJET MONOGRAFI, botuar shtojcë speciale e gazetës tradicionale të Kosovës për ditwn e jubileut -12 shkurtit 2005, ku kam cituar fjalët e nobelistes shqiptare Nëna Terezë në ditën e pranimit të Çmimit Nobël.

Nën foton në monografi shkruan: Nënë Tereza në bisedë me dr. Mehmet Begracën dhe redaktorin e gazetës sonë (Rilindja) Nehat Islamin (qershor, 1980).

“U dha Çmimi Nobel për Paqe NËNË TEREZA – LAUREATE”, ishin mbititulli e titulli i gazetës Rilindja më 18 tetor 1978, ku në nëntitull theksohej: “Fituesja, që përndryshe është shqiptare, deklaroi se të hollat prapë do t’i shpenzojë për qëllime bëmirësie”. Gazeta tradicionale e Kosovës Rilindja raportonte për ngjarjen e madhe në Oslo të një dite më parë.

Arkiv-3 Shtator 2010: KOSOVA PRET FESTË NË KATEDRALEN “NËNA TEREZË”

-“Papa Gjon Pali i Dytë e ka përkrahur personalisht ndërtimin e kësaj katedraleje”, theksonte Presidenti Rugova, i cili së bashku me Ipeshkvin e atëhershëm të Kosovës, Mark Sopin dhe arqiepeshkvin e Uashingtonit, Teodor Mek-Keret vunë gurthemelin e katedrales “Nëna Terezë” në Prishtinë/

PRISHTINË, 3 Shtator 2010-Behlul Jashari/ “Edhe të mitë janë nga këto vende, diku”, ishin fjalët e Nënës Terezë në Prishtinë në vizitën e para rreth tridhjetë vjetëve, të kujtuara sot nga akademik Pajazit Nushi, i cili atëherë i kishte organizuar pritjen si një nga drejtuesit e lartë të Kosovës.

Kujtimi i tij për Nënë Terezën dhe vizitën e saj në Kosovë vjen në prag të veprimtarive të 100-vjetorit të lindjes së humanistes së madhe e nobelistes shqiptare, të cilat do mbahen në Katedralën me emrin e saj në kryeqytetin e shtetit më të ri evropian.

Për “vendet e të sajëve”, për të cilat ka folur në kryeqytetin Prishtinë para 30 vjetësh Nënë Tereza, tregon aty shumë pranë Katedralës i vendosur një shenjim në shesh që orienton për degëzimet e rrugëve: Tiranë, Shkup, Mitrovicë, Pejë…

Ajo rruga e autostradës shqiptare drejt Tiranës shpie në qytetin e prindëve të Nënë Terezës, në Prizren, ku brenda këtij viti pritet përurimi i shtëpisë muze “Nëna Tereze”.

“Unë jam prej Prizreni, prindërit e mi kanë lindur në Prizren”, kujtonte fjalët e Nënë Terezes, nga takimi në vitin 1975, Don Shan Zefi, derisa bisedonim në këtë verë në Katedralën në ndërtim, ku udhëheqte punimet.

“Isha në gjimnazin klasik në Suboticë (qytet në Krahinën e Vojvodinës në federatën e atëhershme jugosllave), ku ishim rreth 40 seminaristë kosovarë… Kur i tham se jemi nga Kosova, Nëna Tereze menjëherë u shpreh shqip, duke treguar se është nga Prizreni. Me një emocion të jashtëzakoshëm filloi të flasë shqip me ne shqiptarët…”, tregon Zefi, i cili ka pasur edhe takime të tjera.

“Edhe recitonte, lutej në shqip. ‘Punën e pendimit’ e thoshte shqip gjithmonë…E ka dashur shumë Prizrenin. Shkupin. Është një figurë padyshim që lidhë botën shqiptare”.

Kështu na tregonte Kancelari i Ipeshkvisë së Kosovës Don Shan Zefi, derisa bisedonim në Katedralën në ndërtim në Prishtinë, e cila sot është gati për festën.

“Deri më 5 shtator 2010, kur kremtohet 100-vjetori i lindjes së Nënës Terezë, padyshim, ndërtesa e Katedralës do hyjë nën kulm”, thoshte ai.

Dhe, tashm kjo është e realizuar. Edhe të gjitha organizimet e përgatitjet tjera janë bërë gati për veprimtaritë kulmore të festës në Kosovë, që fillojnë nesër në Katedralën “Nëna Terezë”.

Sonte në Prishtinë mbërrin i deleguari i posaçëm i Papa Benediktit XVI për Kremtimin në Kosovë të Jubileut të 100- vjetorit të lindjes së Nenës Terezë në katedralen në ndërtim “Nëna Terezë”. Pritja e të Deleguarit të posaçëm të Vatikanit, Imzot Zef Gashi, bëhet në selinë e re të Ipeshkvisë së Kosovës, e cila është në një obrorr me Katedralen.

Nesër nga mëngjesi në Selinë e Ipeshkvisë do të priten udhëheqës të lartë të institucioneve të Republikës së Kosovës e mysafirë të tjerë të shumtë, ndërsa rreth mesditës mbahet koncert solemn i Filharmonisë së Kosovës (“Requiem Mass’ Wolfgang Amadeus Mozart) në Katedralen “Nëna Terezë”.

Presidenti i Republikės, Fatmir Sejdiu do ta vizitojė Ipeshkvinė e Kosovės, si dhe do tė mbajė njė fjalė rasti nė ceremoninė solemne me rastin e 100-vjetorit tė lindjes sė Nėnės Terezė.

Në program nesër është edhe Vigjilia e Nënë Terezës në Kishën “Shën Ndou”, në Prishtinë.

Të dielën, më 5 shtator, mbahet Mesha solemne me rastin e Jubileut të 100 vjetorit të lindjes së Nenës Terezë, në Katedralen me emrin e saj.

Ipeshkvi i Kosovës, Imzot Dodë Gjergji sot ka kujtuar: “Paraardhësi im, Imzot Mark Sopi, me rastin e bekimit të gurthemelit të Katedrales pat thënë: ‘Shpresojmë që në vitin 2010 do të festojmë 100 vjetorin në Katedrale”.

Më 26 gusht 2005, në 95 vjetorin e lindjes së Lumes Nëna Terezë dhe në 600 vjetorin e lindjes së Gjergj Kastriotit Skënderbeu, në Prishtinë është vënë solemnisht gurthemeli i katedrales “Nëna Terezë”.
Ceremonia e vënies së gurthemelit të Katedrales u zhvillua nën patronatin e Presidentit historik të Kosovës, Ibrahim Rugova. “Papa Gjon Pali i Dytë e ka përkrahur personalisht ndërtimin e kësaj katedraleje”, theksonte Presidenti Rugova, i cili së bashku me Ipeshkvin e atëhershëm të Kosovës, Mark Sopin dhe arqiepeshkvin e Uashingtonit, Teodor Mek-Keret vunë gurthemelin e katedrales “Nëna Terezë” në Prishtinë.

“Merita e përhershme për këtë objekt sigurisht i mbetet Presidentit Rugova, i cili gjithmonë do të jetë i pranishëm në katedrale nëpërmjet lutjes e falënderimit e të gjithë njerëzve që do të hyjnë në të, në kujtimin historik të kishës dhe të kombit, si dhe në gurin e themelit të kësaj katedrale të cilën e bekoi me dorën e vet”, është shprehur sot Ipeshkvi Gjergji për median në Prishtinë.

Në Kosovë, shënimi i 100 vjetorit të lindjes së Nënë Terezës, i filluar me një akademi solemne për 30-vjetorin e laurimit të saj me çmimin Nobel për Paqe, vazhdon gjatë gjithë 2010-tës, të shpallur nga Presidenti i Republikës “Vit i Nënës Terezë”.

Në akademi Presidenti i Kosovës, Fatmir Sejdiu, përkujtonte: “Tridhjetë vjet më parë, Nëna Terezë teksa po dilte nga manifestimi solemn i pranimit të Çmimit Nobel, duke ia nënshkruar Dom Lush Gjergjit një foto-portret të sajin, i shkroi këto fjalë: ‘Une gjithmon e kam në zemër popullin tem Shqiptar. Shum luti Zotin që paqja e Tij të vijn në zemrat tona, në gjitha familjet tona, në gjithë botën. Lutnu shum për fukarat e mij – dhe për mua dhe motrat e mija. Une lutem për juve’.”

Ndërsa, Ipeshkvi i Kosovës Imzot Dodë Gjergji theksonte se “Nënë Tereza ishte dhe mbetet simbol i përkryer i ushtrimit të dashurisë ndaj të afërmit, dashuri kjo që tejkalon kufijtë njerëzorë e mund të shpjegohet dhe të kuptohet vetëm me dimensionin hyjnor”.

Për Nënë Terezën Kuvendi i Kosovës dje ka mbajtur një seancë solemne, ku u theksuar se “populli ynë ndjehet i privilegjuar dhe krenar për bijën e tij humaniste të këtyre përmasave, që ishte gruaja më e madhërishme e botës së shekullit XX”.

Në ambientet e Kuvendit të Republikës së Kosovës ditë më parë është hapur ekspozita e piktorit nga Shqipëria Xhovalin Paci, me piktura portretesh të humanistes së madhe dhe nobelistes shqiptare. Një ditë më pas, më 26 gusht, në Prishtinë u përurua pulla postare “100 vjetori i lindjes së Nënës Terezë (Gonxhe Bojaxhiu)”.

Një nga veprimtaritë e rëndësishme në Kosovë ishte edhe tryeza kushtuar Nënës Terezë në seminarin e 29-të ndërkombëtar për gjuhën, letërsinë dhe kulturën shqiptare, i cili u mbajt në dy javëve të fundgushtit në Prishtinë.

Në këtë tryezë u tha se origjina, vendi e koha ku u lind, karakteri, orientimi e vepra dhe kontributi për njerëzimin e historinë shqiptare janë tre faktorët kryesorë që e determinojnë figurën e Nënë Terezës.

Don Lush Gjergji tha se Gonxhe Bojaxhiu, e njohur me emrin si Nënë Tereza, e lindur më 1910, në Shkup, gjithë jetën e saj ia përkushtoi jo vetëm Zotit, por edhe njerëzimit.
“Prijësja e parë e Nënë Terezës është universalizmi në çdo kuptim dhe drejtim, në çdo kohë dhe hapësirë. Ajo nuk kishte për qëllim asgjë tjetër, përpos të jetë rrezja e dashurisë së Zotit”, theksoi Don Lushi, njohës i madh i jetës dhe veprës së Nënë Terezës.

“Gjëja me e bukur: dashuria”, është porosi e urti e Nënës Terezë, e përkujtuar dhe theksuar në veprtimtariitë e 100 vjetorit të lindjes së Saj.

Edhe në pritje të ditës së nesërme, dhe të së dielës, të festës në Katedralen “Nëna Terezë”. Në kryeqytetin e Kosovës që Nënën Terezë e ka edhe monument-shtatrore në sheshin kryesor me emrin e Saj.

Kosovë-Në Vatikan “Himni i Nënë Terezës”

August 28, 2016 by dgreca

-Përgatitet koncerti në vigjilje të Shenjtërimit të Nënës Terezë në Vatikan/

-Koncerti do të mbahet në Bazilikën papale të Shën Palit në Romë me pjesëmarrjen e disa prej emrave më të shquar të muzikës lirike shqiptare nën përcjelljen e Korit dhe Orkestrës së Filharmonisë së Kosovës/

PRISHTINË, 28 Gusht 2016-B.Jashari/ Në Kosovë zhvillohen përgatitjet përfundimtare të koncertit “Himni i Nënë Terezës” të paralajmëruar për 3 shtator në Vatikan, në vigjilje të Shenjtërimit të Nënës Terezë.

Koncerti do të mbahet në Bazilikën papale të Shën Palit në Romë me pjesëmarrjen e disa prej emrave më të shquar të muzikës lirike shqiptare nën përcjelljen e Korit dhe Orkestrës së Filharmonisë së Kosovës, e cila dërgoi këtë njoftim dhe për nesër ka ftuar një konferencë shtypi lidhur me përgatitjet.

E njohur në botë si Nënë Tereza, si edhe laureate e Çmimit Nobel për Paqe, për ndihmën të varfërve, shqiptarja Gonxhe Bojaxhiu e lindur në 26 gusht 1910 në Shkup, do të shpallet e shenjtë nga Papa Françesku në 4 shtator 2016, në Vatikan.

“Kisha katolike do të shtegtojë në Vatikan me një numër të konsiderueshëm, për të marrë pjesë në këtë ngjarje të rëndësishme për ne. Do të mbahet Koncerti për Nënë Terezën në Vatikan, në 3 shtator 2016”, ka deklaruar Don Fatmir Koliqi, zëdhënës i Ipeshkvisë së Kosovës, në një konfrencë shtypi në fillim të këtij muaji.

Duke folur për idenë e koncertit në Vatikan në vigjiljen e shenjtërimit të Nënë Terezës, ai tha se në vitin 2015, në 5 shtator, në Katedralen në Prishtinë është mbajtur Koncerti për Nënë Terezën, i ideuar nga producenjta Diana Toska, i realizuar nga artistë të mirënjohur shqiptarë nga Kosova, Shqipëria dhe Maqedonia, i cili ishte një realizim i mrekullueshëm.

“Nga këtu lindi ideja që i njëjti koncert të ekzekutohet në ambientet e Vatikanit. Ipeshkvi i Kosovës, Imzot Dodë Gjergji, ia ngarkoi vetës detyrën për të kërkuar nga Selia e Shenjtë që të na mirëpret me këtë koncert, pikërisht në vigjiljen e Shenjtërimit të Nënë Terezës, me idenë për të falënderuar Zotin bashkë me Kishën Katolike universale për këtë Nënë të madhe të botës, që ka dhënë Kisha jonë.Pas kërkesës së Ipeshkvit të Kosovë, Selia e Shenjtë me kënaqësi e ka pranuar dhe është bërë mikpritëse e kësaj ngjarje kulturore dhe artistike”, është shprehur Don Koliqi.

Ai ka theksuar se, këtij organizimi të Kishës Katolike në Kosovë i është bashkangjitur edhe Konferenca Ipeshkvore e Shqipërisë, Argjipeshkvia e Tivarit dhe Ipeshkvia e Shkupit.

“Vendi ku ka përcaktuar Selia e Shenjtë, që të na pret për ta mbajtur këtë koncert, është njëra ndër Bazilikat madhështore Papnore: Bazilika Papnore e Shën Palit”, ka shtuar zëdhënësi.

Është paralajmëruar se në koncert do marrin pjesë artistë të mirënjohur, Inva Mula, Ermonela Jaho, Rita Ora, Shkelzen Doli, Saimir Pirgu, Ramë Laja, Gëzim Mushketa etj, ndërsa recituesit e vjershave/uratave të Nënë Terezës do jenë Don Lush Gjergji, Lorik Cana, Majlinda Kelmendi dhe dy artistët e rinj të filmit “Shok” Andi dhe Lumi.

Për koncertin hyrja do të jetë falas, porse nevojitet të sigurohen biletat e rezervimit të vendeve.