Presidentja Atifete Jahjaga në javën e përfundimit të mandatit
-Në Kosovën lirë, tashmë afër 17 vite, Atifete Jahjaga pasoi tre presidentë para saj: Presidentin historik Ibrahim Rugova, pas tij Fatmir Sejdiun, pastaj Behgjet Pacollin që qëndroi vetëm rreth një muaj në këtë post. Hashim Thaçi – Presidenti i pestë i Kosovës/
Nga Behlul JASHARI/
PRISHTINË, 2 Prill 2016/ Këtë të shtunë të fundjavës së fundit si Presidente e Republikës, Atifete Jahjaga vazhdon me axhendën aktive, pret në takim drejtuesit e Odës Ekonomike të Kosovës dhe disa përfaqësues të bizneseve.Jahjaga, e zgjedhur në krye të shtetit të Kosovës në 7 prill 2011, e para Presidente Republike në Kosovë e në vendet fqinje, përfundon mandatin pesëvjeçar javën e ardhëshme, ndërsa Presidenti i ri i zgjedhur, Hashim Thaçi, do të marrë detyrën gjatë një ceremonie që do të organizohet në Sheshin Skënderbeu në Prishtinë, në 8 prill, pas betimit në në Kuvend, ku u votua nga deputetët në 26 shkurt 2016.
“Marsi hiperaktiv i Jahjagës”, është një kryetitull sot në shtypin e Prishtinës, ku theksohet se, Presidentja ka shumëfishuar aktivitetet në fund të mandatit dhe se gjatë muajit që shkoi shefja e shtetit ka takuar personalitete të larta ndërkombëtare. Ka marrë vendime të rëndësishme dhe ka bërë një sërë vizitash. Një numër i madh i veprimeve të saj ndërlidhen me çështje gjinore.Ceremonia e lansimit të doracakut për gjyqtarë dhe prokurorë për trajtimin e rasteve të dhunës në familje, ishte dje një nga aktivitetet e Presidentes Jahjaga, sipas njoftimeve zyrtare të dërguara nga Presidenca e Kosovës.
“E drejta për jetë me dinjitet dhe pa dhunë garantohet me Kushtetutën Kosovës dhe me ligjet përkatëse dhe duke u bazuar në këto garanci, institucionet e Kosovës kanë ndërmarrë një varg aktivitetesh me te cilat është shprehur përkushtimi ynë që, me zbatimin e praktikave më të mira ndërkombëtare, të bëhemi model për parandalimin dhe trajtimin e dhunës në familje”, ka theksuar Presidentja Jahjaga.
Në Kosovën lirë, tashmë afër 17 vite, Atifete Jahjaga pasoi tre presidentë para saj: Presidentin historik Ibrahim Rugova, pas tij Fatmir Sejdiun, pastaj Behgjet Pacollin që qëndroi vetëm rreth një muaj në këtë post.
Atifete Jahjaga u zgjodh Presidente e Republikës së Kosovës më 7 prill 2011, pasi Behgjet Pacolli në fundin e marsit la postin e presidentit kur Gjykta Kushtetuese e vlerësoi jokushtetuese zgjedhjen e tij më 22 shkurt pa kundërkandidat dhe pa praninë e së paku dy të tretave të deputetëve në seancën e Kuvendit të Kosovës, nga e cila ishte larguar opozita.
Me atë rast Kuvendi miratoi një Rezolutë në mbështetje të Memorandumit të Marrëveshjes në mes të Behgjet Pacollit, Isa Mustafës (LDK) dhe Hashim Thaçit (PDK), të nënshkruar më 6 prill 2011. Marrëveshja ishte lehtësuar nga ambasadori amerikan në Prishtinë në atë kohë, Christopher Dell.
Marrëveshja përfshinte edhe pajtimin për ndryshimin e Kushtetutës dhe reformimin e sistemit zgjedhor, me çka Presidenti në të ardhmen do të zgjidhej me vota të drejtpërdrejta, dhe sipas saj zgjedhjet presidenciale, por edhe ato parlamentare do mbaheshin më herët se që ishte e përcaktuar me Kushtetutë. Por, ndryshime kushtetuse për zgjedhjen e Presidentit të Republikës nuk u bënë dhe zgjedhja vazhdoi të bëhet nga Kuvendi i Kosovës.
Komisioni për ndryshime kushtetuese kishte dërguar që në pranverën e hershme 2012 njëmbëdhjetë amendamente për ndryshimin e Kushtetutës në Parlament dhe prej andej ato ishin dërguar në Gjykatën Kushtetuese të Kosovës. Kushtetuesja kishte kërkuar një opinion të Presidentes lidhur me këto ndryshime. Presidentja Jahjaga në përgjigjen e saj ka theksuar se propozimi për shkurtimin e mandatit të saj nuk ishte në pajtim me Kushtetutën.
Presidentja e Republikës së Kosovës Atifete Jahjaga ka mandatin e plotë meqë ndërprerja e mandatit do ishte jokushtetues, sipas vendimit që Gjykata Kushtetuese mori në 6 korrik 2012 në lidhje me vlerësimin e kushtetutshmërisë së amendamenteve të propozuara të Kushtetutës së Kosovës.
Para përfundimit të mandatit të Presidentes, gjatë një vizite në SHBA, në një intervistë të fundit në 24 mars 2016 në Zëri i Amerikës, e pyetur se çfarë planesh ka për të ardhmen, Jahjaga është përgjigjur: “Patjetër që kam plane të cilat besoj që do t’i shpalos gjatë javëve apo muajve të ardhëshëm. Por planet e menjëhershme janë, pak pushim në mesin e familjes time”.
“A ju ka mbetur diçka peng, e parealizuar gjatë këtyre pesë viteve?”, ishte pyetja përmbyllëse e intervistës, në të cilën Presidentja Jahjaga është përgjigjur: “Gjithmonë është bilanci se çfarë mund të kishe bërë më shumë dhe çfarë ke dashur të bësh më shumë për një fushë që me të vërtetë ka nevojë që t’i kushtohet një përqëndrim i veçantë dhe është zhvillimi ekonomik, tërheqja e investimeve të huaja dhe krijimi i vendeve të punës dhe hapja e perspektivës për 60% të popullatës së Kosovës që është rinia e vendit. Kjo mbetet e vetmja brengë e imja. Duhet të punohet më intensivisht, por këto kanë qënë kompetencat e Presidentit”.
Një nga intervistat e para ekskluzive të Presidentes së Republikës së Kosovës, Atifete Jahjaga, ishte ajo që kam zhvilluar për Agjencinë Telegrafike Shqiptare, në prag të festës së 28 Nëntorit 2011, kur e pyetur edhe për pushimet e para si Presidente të kaluara në Shqipëri ajo u përgjigj: “Ishte dëshirë dhe njëkohësisht edhe simbolikë. Nxitje që ta duam, ta respektojmë dhe ta shfrytëzojmë gjithë këtë begati, pasuri dhe mirëqenie tonën, gjithë këto resurse që i ka natyra jonë”.
Ndërsa, e pyetur se, si e vlerësonte dhe si e shihte të tashmen dhe të ardhmen e bashkëpunimeve të dy shteteve, Shqipërisë dhe Kosovës, Presidentja Jahjaga përgjigjej: “Është kënaqësi të konstatojmë se sot nuk ka asnjë pengesë në bashkëpunimin ndërmjet Republikës së Shqipërisë dhe Republikës së Kosovës. Mbetet çështje e ideve dhe projekteve konkrete përjetësimi i marrëdhënieve çfarë i ka dëshiruar gjithmonë populli. Axhenda e integrimeve evropiane na ndihmon shumë në konkretizimin e shfrytëzimit të të gjitha resurseve dhe potencialeve tona…”.
Presidentja Atifete Jahjaga lindi në 20 prill 1975 në Rashkoc – Gjakovë.
Jahjaga ishte Zëvendësdrejtoreshë e Përgjithshme e Policisë së Kosovës prej shkurtit të vitit 2009 deri në zgjedhjen e saj Presidente e Republikës së Kosovës, më 7 prill 2011. Që nga themelimi i Policisë së Kosovës, në fillim të vitit 2000, fillimisht shërbeu si police, duke përparuar në nivel rajonal dhe në atë të Shtabit të Përgjithshëm. Gjatë karrierës së saj të mëhershme, Presidentja Jahjaga ka shërbyer në pozita të rëndësishme në zbatim të rendit dhe ligjit në Njësinë e Standardeve Profesionale, pastaj Ndihmëse e Zëvendësdrejtorit të Policisë së Kosovës, Ndihmëse e Shefit të Burimeve Njerëzore, Ndihmëse Ekzekutive Speciale e Zëvendëskomisarit për Administratën e Policisë së Kosovës, Zëvendëskomandante për Polici Kufitare të Policisë së Kosovës, Kryesuese e Departamentit të Trajnimeve, Ndihmëse e Zëvendëskomisarit të Policisë së Kosovës për Polici Kufitare, Ndihmëse e Zëvendëskomisarit të Policisë së Kosovës për Personel dhe Trajnim.
Shkollën fillore dhe gjimnazin i kreu në Prishtinë, ku gjithashtu i përfundoi studimet në Fakultetin Juridik të Universitetit të Prishtinës, në vitin 2000. Ka përfunduar Certifikimin Postdiplomik në Menaxhimin Policor dhe të Drejtën Penale në Universitetin e Leicester-it në Mbretërinë e Bashkuar në vitet 2006-2007, Certifikimin Postdiplomik në Shkenca Kriminalistike në Universitetin e Virginia-s në SHBA, në vitin 2007. Aktualisht vazhdon studimet e Magjistraturës në drejtimin e Marrëdhënieve Ndërkombëtare në Fakultetin Juridik të Universitetit të Prishtinës. Si shtesë e këtyre studimeve, vlen të theksohen programet profesionale dhe studimore që ka ndjekur në Qendrën Evropiane për Studime të Sigurisë “George C. Marshall” Gjermani, në Akademinë Nacionale të FBI-së në SHBA dhe në Departamentin e Drejtësisë në SHBA.
Përveç gjuhës shqipe (amtare), Presidentja Atifete Jahjaga zotëron edhe gjuhët angleze dhe serbe. Është e martuar me Astrit Kuçin dhe jeton në Prishtinë.
Ne Foto: Korrespondenti i Diellit Behlul Jashari me Presidenten Jahjaga
Mustafa: Kosova as s’i ka marrë e s’i ka dhënë Malit të Zi asnjë metër tokë
-Lëvizja për Bashkim: T’i hapim rrugë dërgimit të çështjes së demarkacionit në arbitrazh ndërkombëtar/
Nga Behlul Jashari/ PRISHTINË, 31 Mars 2016/ Kosova as nuk i ka marrë e nuk i ka dhënë Malit të Zi asnjë metër tokë, tha sot kryeministri kosovar, Isa Mustafa, gjatë një vizite në Pejë. Kreu i qeverisë së Kosovës, pas një takimi me kryetarin e komunës, Gazmend Muhaxheri, duke iu përgjigjur interesimit të gazetarëve për demarkacionin me Malin e Zi tha se kjo çështje nuk është diskutuar sot, por se është biseduar në takimet e mëparshme dhe se dje komisioni ndërkombëtar i ekspertëve ka dhënë një vlerësim të pavarur. “Tash është vërtetuar se as nuk kemi marrë nga malazezët e as nuk ju kemi dhënë malazezëve asnjë metër tokë. Pse njerëzit dalin dhe operojnë me 8 mijë ose 10 mijë hektarë është çështje e tyre. Por, në asnjë rast nuk është vërtetuar se një metër katror është këmbyer me Malin e Zi”, tha kryeministri Mustafa. I pyetur se a duhet demarkacioni të shkoj për ratifikim në Kuvendin e Kosovës, kryeministri kosovar tha se tani kjo duhet të procedohet. “Kur do të procedohet prapë do ta shohim, konsideroj se duhet të arrijmë një pajtueshmëri, sepse territori i Kosovës nuk është vetëm i pozitës, është i qytetarëve të Republikë së Kosovës, territor për të cilin kanë përgjegjësi të gjithë deputetët e Kuvendit të Kosovës”, u shpreh kryeministri Mustafa.
Kryetari i komunës së Pejës, Muhaxheri, tha se është mbajtur një seancë e Kuvendit Komunal, ku me 30 vota pro është votuar rezoluta që i është drejtuar Komisionit kosovar për demarkacion.
“Ne si komunë, për dallim nga komunat tjera posedojmë kadastrin origjinal. Me kadastrin tonë kjo i bie se është ashtu. Është e dhimbshme sepse qytetarët tanë e mendojnë se edhe ajo pjesë e territorit i takon Republikës së Kosovës, por me dokumente nuk kemi fakte që i takon. Ana emocionale te qytetarët dhe te unë si kryetar i tyre mbetet se Çakorrin gjithmonë e kemi konsideruar kufi. Tash dokumentet nuk e aprovojnë këtë çfarë po pretendojmë ne”, tha kryetari i komunës së Pejës.
Ekspertët ndërkombëtarë nuk kanë gjetur shkelje në procesin e demarkacionit mes Kosovës dhe Malit të Zi dhe kanë vlerësuar se nga ky pikëvështrim procesi u është përmbajtur standardeve ndërkombëtare.
Kjo u bë e ditur dje pasdite në një konferencë shtypi në Prishtinë, pasi anëtarët e komisionit ad-hoc të ekspertëve ndërkombëtarë për vlerësimin e procesit të demarkacionit ndërmjet Republikës së Kosovës dhe Republikës së Malit të Zi, pas një pune dyjavore, ia dorëzuan Presidentes kosovare, Atifete Jahjaga, raportin me vlerësimet për procesin e përcaktimit të vijës kufitare mes Republikës së Kosovës dhe Republikës së Malit të Zi.
“Nga aspekti ligjor dhe teknik, ekspertët ndërkombëtarë nuk kanë gjetur shkelje në procesin e demarkacionit mes Kosovës dhe Malit të Zi dhe kanë vlerësuar se nga ky pikëvështrim procesi u është përmbajtur standardeve ndërkombëtare”, deklaroi Jahjaga pas takimit.
Qeveria e Kosovës në një komunikatë mbrëmë është shprehur e kënaqur me faktin se ekspertët e Komisionit ndërkombëtar nuk kanë gjetur shkelje në demarkacionin me Malin e Zi.
Komisioni vlerësues është themeluar me iniciativën dhe vendimin e nënshkruar në 15 mars 2016 të Presidentes së Republikës, pas shqetësimeve të ngritura nga opozita rreth marrëveshjes së nënshkruar vitin e kaluar ndërmjet Kosovës dhe Malit të Zi për vendosjen e kufirit shtetëror.
Tre anëtarët e Komisionit janë: Fletcher M. Burton, diplomat i lartë amerikan në pension, i cili në vitin 2009 ka mbikëqyrur përpjekjet për përcaktimin e kufirit midis Kosovës dhe Maqedonisë, dhe Herbert Wilmes, shtetas gjerman, i cili ka diplomë dhe doktoraturë në gjeodezi nga Universiteti i Bonit dhe është vlerësues i hartave topografike, si dhe Fred Newton, i cili ka shërbyer për 25 vjet në policinë e porteve dhe të kufijve tokësorë të Mbretërisë së Bashkuar dhe vendeve të tjera të botës.
Para se të dorëzojnë raportin, ekspertët nga SHBA-ja, Britania dhe Gjermania pasi kanë dëgjuar palët në Kosovë ishin edhe në Mal të Zi.
Nga subjekti më i madh opozitar kosovar, Lëvizja Vetëvendosje, sot u deklarua se, “ne nuk do të pranojmë në asnjë mënyrë dhe nga çfarëdo komisioni, vendor a ndërkombëtar, që Kosova të humbë qoftë edhe një centimetër të territorit të saj”. Këtë e deklaroi sekretari organizativ i Lëvizjes Vetëvendosje, Dardan Molliqaj.
Ndërsa, Lëvizja për Bashkim, parti e koalicionit qeverisës që udhëheqë Ministrinë e Diasporës, me ministrin Valon Murati, deklaroi sot se, “për shkak të paqartësive të mëdha që ka sjellë procesi i demarkacionit, e si rrjedhojë ka ngjallur mosbesim të madh te një pjesë e konsiderueshme e qytetarëve të Kosovës lidhur me këtë proces, kërkon nga të gjithë deputetët e Kuvendit të Kosovës që duke votuar kundër, t’i hapim rrugë dërgimit të kësaj çështjeje në arbitrazh ndërkombëtar”.
Kosova, inaugurim ceremonial presidentit të ri
– Hashim Thaçi merr detyrën si Presidenti i pestë i Kosovës me inaugurim ceremonial të organizuar në Sheshin Skënderbeu në Prishtinë, në 8 prill, pas betimit një ditë më parë në seancën solemne në Kuvend, ku u votua nga deputetët në 26 shkurt 2016/
Nga Behlul Jashari/ PRISHTINË, 31 Mars 2016/ Presidenti i zgjedhur i Republikës së Kosovës, Hashim Thaçi, do marrë detyrën me inaugurim ceremonial të organizuar në Sheshin Skënderbeu në Prishtinë, në 8 prill, pas betimit një ditë më parë në seancën solemne në Kuvend, ku u votua nga deputetët në 26 shkurt 2016 në një seancë të jashtëzakonshme.“Në këtë ceremoni do të marrin pjesë presidentë shtetesh, kryeministra, ministra e zyrtarë të tjerë të shteteve dhe institucioneve të ndryshme ndërkombëtare. Gjithashtu, do të marrin pjesë kori diplomatik i akredituar në vendin tonë, përfaqësues të institucioneve të Republikës së Kosovës, përfaqësues të institucioneve ndërkombëtare në vendin tonë, përfaqësues të organizatave të ndryshme ndërkombëtare e vendore dhe miq të shumtë të Kosovës”, thekson njoftimi nga Presidenca dërguar për mediat, të cilat janë ftuar të bëjnë akreditime të veçanta për këtë ngjarje.Në ceremoninë solemne ku janë ftuar mëse 500 mysafirë vendorë dhe ndërkombëtarë, mes të cilëve presidentët e shteteve të rajonit, Presidentja në përfundim të mandatit pesëvjeçar, Atifete Jahjaga, do t’ia dorëzojë simbolikisht detyrën Presidentit të ri të zgjedhur Hashim Thaçi. Simbolika është një kopjeje solemne e Kushtetutës së Republikës së Kosovës, dokumentit themeltar të shtetit, që i dorëzohet Presidentit të ri.
Presidenti i zgjedhur i Kosovës, Hashim Thaçi, ishte lideri i PDK-së që nga themelimi dhe më i votuari në tre nga pesë proceset zgjedhore që janë zhvilluar në Kosovën e lirë.
Në dokumentin e marrëveshjes së 8 dhjetorit 2014, të gjashtë muaj pas zdhedhjeve të parakohëshme parlamentare, të dy partive më të mëdha kosovare, sipas së cilës postin e kryeministrit e mori kryetari i LDK-së, Isa Mustafa, theksohej se, “për pozitën e Presidentit të Republikës së Kosovës do të votohet kandidati i propozuar nga PDK-ja, pas përfundimit të mandatit aktual në përputhje me Kushtetutën – z.Hashim Thaçi”.
Deri në zgjedhjen President Thaçi do ta udhëheqë politikën e jashtme për më shumë se një vit, duke qenë zv/kryeministër i parë dhe ministër i Punëve të Jashtme i Republikës së Kosovës.
Më parë, gjatë karrierës politike, Hashim Thaçi ishte i zgjedhur tre herë kryeministër i Kosovës. Thaçi u zgjodh kryeministër i Kosovës në 9 janar 2008, pas fitores së PDK-së në zgjedhjet parlamentare të 17 nëntorit 2007, dhe u rizgjodh pas fitores së dytë në zgjedhjet e 12 dhjetorit 2010, të cilat ishin të parat pas shpalljes së pavarësisë në 17 shkurt 2008, të njohur deri tani nga 111 shtete anëtare të OKB-së.
Nga marsi 1999 deri në janar të vitit 2000, Thaçi ishte kryeministër i qeverisë së përkohshme të Kosovës (Qeverisë së Unitetit).
Në 12 dhjetor 2014, kryeministri Hashim Thaçi i dorëzoi detyrën kryeministrit të sapozgjedhur, Isa Mustafa, me të cilin nënshkruan marrëveshjen për bashkëqeverisje të Kosovës, duke dhënë kështu edhe mesazhin si dy liderë të partive më të mëdha kosovare se, rivaliteti politik edhe kur është më i madhi i mundshëm nuk është armiqësi dhe përtej interesave partiake edhe mund t’i bëjë bashkë për interesat madhore të shtetit, kombit e të ardhmes zhvillimore dhe euroatlantike.Edhe pse zgjedhjet parlamentare të 8 qershorit 2014 ishin të parakohshme, kryeministri Hashim Thaçi përmbushi të plotë mandatin e dytë, që është katërvjeçar, pasi zgjedhjet e jashtëzakonshme ishin mbajtur pikërisht para katër viteve, në 12 dhjetor 2010.
Në Kosovën e lirë nga qershori 1999, PDK, tre herë fituese e zgjedhjeve, para koalicionit të tanishëm me LDK ishte edhe dy herë të tjera në koalicion-bashkëqeverisje me këtë parti që ka themelues Presidentin historik Ibrahim Rugova, si dhe me AKR-në e Behgjet Pacollit, por asnjëherë nuk e kishte Presidentin në ndarjen e posteve.
Hashim Thaçi, Presidenti i parë i Kosovës që vjen nga PDK-ja, partia që e themeloi në tetor të vitit të parë të lirisë 1999, dhe e udhëheqte deri në shkurt 2016, tash si simbol i unitetit, shef i shtetit, nuk është më në krye të saj.
“Pas zgjedhjes, Presidenti nuk mund të ushtrojë asnjë funksion në parti politike”, përcakton Kushtetuta e Republikës së Kosovës.Hashim Thaçi merr detyrën si Presidenti i pestë i Kosovës. Edhe të katër presidentët tjerë të Kosovës në 17 vitet e lirisë, duke nisur nga Presidenti historik Ibrahim Rugova, pas tij Fatmir Sejdiu, pastaj Behgjet Pacolli që qëndroi vetëm një muaj në këtë post, si dhe Presidentja drejt përfundimit të mandatit Atifete Jahjaga, janë zgjedhur me marrëveshje politike, koalicionesh, apo edhe me ndërhyrje ndërkombëtare
Shqipëri-Kosovë, treg të përbashkët të energjisë elektrike
-Ministrat Gjiknuri e Stavileci, nesër në Tiranë, nënshkruajnë Deklaratën e përbashkët/
Nga Behlul Jashari/ PRISHTINË, 29 Mars 2016/ Shqipëria dhe Kosova do nënshkruajnë nesër Deklaratën e përbashkët që rrjedh nga takimi i fundit i Komitetit Drejtues për krijimin e tregut të përbashkët të energjisë elektrike.Deklaratën e nënshkruajnë, në ora 10:00, në Ministrinë e Energjisë dhe Industrisë ministri shqiptar Damian Gjiknuri dhe ministri kosovar i Zhvillimit Ekonomik, Blerand Stavileci, i cili udhëton drejt Tiranës.“Deklarata e përbashkët është rezultat i punës së Komitetit Drejtues, ku diskutohen zhvillimet e fundit në kuadër të krijimit të tregut të përbashkët të energjisë”, thekson Ministria kosovare.Në 18 mars 2016, qeveria kosovare ka miratuar vendimin për t’i rekomanduar Presidentes së Republikës dhënien e autorizimit ministrit të Zhvillimit Ekonomik për nënshkrimin e Marrëveshjes së bashkëpunimit ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për shkëmbimin dhe\ose ndarjen e rezervës rregulluese ndërmjet Operatorit të Sistemit të Transmetimit OST Sh.A. dhe Operatorit të Sistemit të Transmisionit dhe Tregut – KOSST Sh. A.
“Marrëveshja synon t’i kontribuojë stabilizimit rajonal të tregut të energjisë elektrike”, u theksua në mbledhjen e qeverisë së Kosovës, e cila, më parë, në 2 mars, shqyrtoi dhe miratoi nismën për lidhjen e Marrëveshjes. “Me Shqipërinë ne kemi zhvilluar një bashkëpunim të shkëlqyer sa i përket edhe infrastrukturës së energjisë elektrike”, ka vlerësuar kryeministri i Kosovës, Isa Mustafa, në 1 mars në Forumin e Nivelit të Lartë me temë “Siguria e Furnizimit me Energji Elektrike në Kosovë”, i zhvilluar në Prishtinë, organizuar nga Ministria e Zhvillimit Ekonomik dhe mbështetur nga USAID-i.
“Mbesim edhe më tutje të përkushtuar që ne të bëjmë këmbime të energjisë elektrike me Shqipërinë nga burime të ndryshme të energjisë, dhe konsiderojmë se ky do të ishte një rezultat edhe një punë shumë e efektshme për neve në të ardhshmen”, është shprehur Mustafa.Në forum morën pjesë përfaqësuesit institucionalë të Kosovës, Shqipërisë dhe të komunitetit ndërkombëtar, si dhe të industrisë, organizatave joqeveritare, akademisë, biznesit dhe mediave.
Pjesëmarrësit u pajtuan se një komponentë shumë e rëndësishme për stabilitetin e furnizimit dhe operimit të sistemit është tregu i përbashkët i energjisë elektrike me Shqipërinë. “Plotësimi i gjenerimit të energjisë elektrike të Shqipërisë – i bazuar kryesisht në hidro dhe i gjenerimit të Kosovës – i bazuar kryesisht në thëngjill, është konsideruar si alternativa më e lirë dhe e sigurt për furnizim të përbashkët të dyja vendeve, duke eliminuar kështu mungesën sezonale”, u theksua në përfundime të Forumit të Nivelit të Lartë.
Në dhjetor 2015, në Kosovë u bë inaugurimi i Projektit “Rregullimi Sekondar Frekuencë-Fuqi Kosovë-Shqipëri” dhe përfundimi i punimeve në linjën interkonektive 400 kV deri në kufirin me Shqipërinë. Inaugurimi u bë pasi në “autrstradën” energjetike të Kosovës drejt Shqipërisë u bë edhe energjizimi testues. Në pjesën e Shqipërisë punimet përfundojnë këtë vit dhe bëhet inaugurimi i plotë.
Që para fillimit të punimeve, në fazat e përgatitjeve, burimet në Prishtinë kanë njoftuar se projekti për ndërtimin e linjës interkonektive 400 kV Kosovë-Shqipëri konsiston në ndërtimin e një linje te tensionit të lartë me gjatësi rreth 238 km, prej së ciles 85.5 km në territorin e Kosovës dhe 153.5 km në territorin e Republikës së Shqipërisë.
Foto: 17 dhjetor 2015: Kosova inauguroi “autostradën” energjetike drejt Shqipërisë
- « Previous Page
- 1
- …
- 181
- 182
- 183
- 184
- 185
- …
- 245
- Next Page »