Behlul Jashari – Page 94 – Dielli

DIELLI-KUJTESA E VITIT 2017-KATEDRALJA SHEN TEREZA

January 3, 2018 by dgreca

Kosovë-Viti 2017, i Shugurimit të Katedrales Shën Nënë Tereza/

-Në 5 shtator 2017 u bë shugurimi i Katedrales-Shenjtërores Shën Nënë Tereza në Prishtinë nga i Dërguari i Posaçëm i Papa Françeskut, Kardinali shqiptar Ernest Simoni – Troshani, e me pjesëmarrje edhe vatranësh nga SHBA, të cilët edhe u vlerësuan e falënderuan për kontributet/

-Shqiptarët nga SHBA – Këshilli i Fondacionit për ndërtimin e Katedralës Nënë Tereza në Prishtinë, që vepron në Nju Jork dhe rrethinë, kanë kontribuar për mëse 9 vite me 2 milionë dollarë, që janë mbledhur dhe janë dorëzuar/

SPECIALE-Gazeta DIELLI nga korrespondenti në Kosovë Behlul JASHARI*/

PRISHTINË, 3 Janar 2018/ Në Kosovë një nga ngjarjet e rëndësishme të vitit 2017 ishte shugurimi i Katedrales-Shenjtërores Shën Nënë Tereza në Prishtinë nga i Dërguari i Posaçëm i Papa Françeskut, Kardinali shqiptar Ernest Simoni – Troshani, e me pjesëmarrje edhe vatranësh nga SHBA, të cilët edhe u vlerësuan e falënderuan për kontributet. Madje, ishte edhe pjesë e celebrimit në meshën solemne të shugurimit Marjan Cubi, anëtar i Kryesise së Vatres, njëherësh arkëtar si dhe kryetar i Komisionit për mbledhjen fondeve për ndërtimin e Katedrales, i cili kishte ardhë në Kosovë bashkë me bashkëshorten Dila.Shumë solemne dhe madhështore ishte festa.

Shugurimi i Katedralës Nënë Tereza u bë në 5 shtator 2017, në ditën që ishte e 1 vjetorit të shenjtërimit e të 20 vjetorit të kalimit në amshim të shenjëtëreshes shqiptare.

Brenda Katedralës në meshën solemne të shugurimit nga vatranët e SHBA ishte edhe Zef Balaj, anëtar i Kryesisë së Federatës Pan-Shqiptare të Amerikës Vatra, që kishte ardhë në Kosovë bashkë me bashkëshorten Lina, anëtari i Këshillit të Vatrës, Lek Përlleshi, me bashkëshorten Vera, anëtari i Komisionit për mbledhjen fondeve për ndërtimin e Katedrales, Fran Marku, si dhe Nue Balaj, nip i Zefit, Tomë Paloka që do e botonte së shpejti librin “Shqiptarët më të mirë në Amerikë që i njoha unë”…

Në 31 gusht 2017, Ipeshkvi i Ipeshkvisë së Kosovës, Imzot Dodë Gjergji, i ka pritur në takim në Ipeshkvi dhe i ka shoqëruar në vizitë Katedrales anëtarin e Kryesisë së Federatës Pan-Shqiptare të Amerikës Vatra, Zef Balajn, me bashkëshorten Lina, anëtarin e Këshillit të Vatrës, Lek Përlleshi, me bashkëshorten Vera, si dhe Nue Balajn, nip i Zefit, që ishin së bashku.

Shqiptarët nga SHBA – Këshilli i Fondacionit për ndërtimin e Katedralës Nënë Tereza në Prishtinë, që vepron në Nju Jork dhe rrethinë, kanë kontribuar për mëse 9 vite me 2 milionë dollarë, që janë mbledhur dhe janë dorëzuar.

Ipeshkvi i Ipeshkvisë së Kosovës, Imzot Dodë Gjergji në fjalën përshëndetëse në hapje të “Ditëve të Nënë Terezës”, në 26 gusht 2017, ka vlerësuar lart të gjitha kontributet.

“Dua me këtë rast të falënderoj të gjithë donatorët, që na kanë ndihmuar për ndërtimin e kësaj Kishe, ata që janë sot prezentë e ata që do të jenë në 5 shtator”, është shprehur Ipeshkvi Gjergji.

Mbrëmjen e 4 shtatorit 2017, pas meshës Lutja e Mbrëmësores me Lutjet e Nënë Terezës në Kishën e Shën Ndout në kryeqytet, Ipeshkvia e Kosovës ftoi edhe në darkën e falënderimit për donatorët e ndërtimit të Katedrales Nënë Tereza në Prishtinë.

Edhe në ditën e 16 gushtit 2016 një delegacion i Federatës Pan-Shqiptare të Amerikës Vatra në Ipeshkvinë e Kosovës dhe në Katedralen Nëna Terezë në Prishtinë u prit plot përzemërsi, repekt e vlerësim nga Ipeshkvi Imzot Dodë Gjergji.

Në delegacionin e shqiptarëve të ardhur nga SHBA ishin Agim Rexhaj, zv/kryetar i Vatrës, Marjan Cubi – arkëtar i Vatrës dhe kryetar i Komisionit për mbledhjen e fondeve për ndërtimin e Katedrales Nënë Tereza në Prishtinë, si dhe Laura Rexhaj, Dila Cubi, Fran Marku, Mhill Gjuraj, Pashk Maksuti, Mëhill Velaj. Gjatë gjithë kohës isha edhe unë – korrespondent në Kosovë i Gazetës Dielli – organ i Vatrës.

Ipeshkvi i Ipeshkvisë së Kosovës, Imzot Gjergji falënderoi dhe vlerësoi lart të gjitha kontributet dhe njoftoi delegacionin e Vatrës me të gjitha punët e kryera në Katedralen Nënë Tereza.

Ipeshkvi Imzot Dodë Gjergji vlerësoi lart organizimin dhe kontributet e Federatës Pan-Shqiptare të Amerikës Vatra, të gjithë vatranëve.

“E vlerësoj veçantë mënyrën e organizimit tuaj, të Vatrës, nga të gjitha trojet shqiptare së bashku…Vatra është edhe vatër e të mirave dhe kontributeve të mëdha për kombin”, u shpreh Ipeshkvi i Kosovës.

Gurthemeli i Katedrales në Prishtinë është vënë në 26 gusht 2005 për nder të 95 vjetorit të lindjes së Nënës Terezë nga ana e Presidentit historik të Kosovës Dr. Ibrahim Rugova, Ipeshkvit të Ipeshkvisë së Kosovës Imzot Mark Sopi dhe Kardinalit të Uashingtonit Teodor Mekkerik.

“Sot është një ditë e madhe për kryeqytetin dhe për gjithë Kosovën, sepse po e bekojmë gurin e themelit të një tempulli të shenjtë, që i kushtohet Nënës së dashur shqiptaro-kosovare dhe Nënës së Njerëzimit – të lumturës Nëna Tereze – asaj që lartësoi nderin e Kosovës dhe të shqiptarëve në gjithë planetin duke i afirmuar vlerat tona dhe duke ndihmuar gjithë njerëzimin”, shprehej gjatë ceremonisë Presidenti Rugova.

“Papa Gjon Pali i Dytë e ka përkrahur personalisht ndërtimin e kësaj katedraleje”, theksonte Presidenti Rugova.

Katedralja në Prishtinë nisi të ndërtohej ndërkohë që ishte festuar 6 vjetori i Kosovës së lirë nga qershori 1999. Në 2005-tën shënohej dhe 600 vjetori i lindjes së kryeheroit kombëtar shqiptar Gjergj Kastrioti-Skënderbeu.

Korrespondenti i tashëm në Kosovë i Gazeta DIELLI me raportimet është edhe kronikë e historisë së ndërtimit të Katedrales Nëna Terezë në Prishtinë që nga vënia e gurthemelit. Ishte edhe i akredituar në Ipeshkvinë e Kosovës nga Këshilli për Media i Shugurimit të Shenjtërores Shën Nënë Tereza.

“Kosovë – Në Katedralen ‘Nëna Tereza’ Janë Ngritur Flamujt e Festës”, është titulli i reportazhit që kam shkruar e botuar në Agjenicinë shtetërore-zyrtare të lajmeve të Shqipërisë në 100 vjetorin e Nënës Terezë, në 1 Korrik 2010.

Ndërtimi i Katedralës është bërë i mundur nga donatorët e diasporës shqiptare nëpër botë. Rezultati është një Katedrale madhështore në qendër të kryeqytetit të Kosovës, e lartë 32,50 metra, e gjerë 42,30 metra dhe e gjatë 77,40 metra.

Në 2016-tën, shenjtërimit të Shën Nënë Terezës i parapriu Koncerti i Filharmonisë së Kosovës “Valsi Hyjnor” në Bazilikën Shën Pali Jashtë Mureve, në 3 shtator, me një përfaqësi mbarëshqiptare. Meshën e Shenjtërimit e udhëhoqi Papa Françesku në Sheshin e Shën Pjetrit në Vatikan në 4 shtator. Mesha e falënderimit është udhëhequr nga Sekretari i Shtetit të Vatikanit, Kardinali Pietro Parolin, në 5 shtator.

Në 26 gusht 2017, kur nisën “Ditët e Nënës Terezë” në mbrëmje feste e programi kulturor me këngë klasike dhe recitim të poezive dhe uratave të Nënë Terezës në Katedrale u hap edhe një ekspozitë e autorit Sakip Imeri e fotografive dokumentare që nga vënia e gurthemelit të Katedrales në Prishtinë.

Pjesë e veprimtarive ishte edhe ekspozita me fotografi e dokumente “Shenjtorja shqiptare nga Shkupi – korrespondenca”, e cila është hapur në Bibliotekën Kombëtare në kryeqytetin e Kosovës, me bashkëorganizim të Institutit të Historisë “Ali Hadri” në Prishtinë, Institutit të Trashëgimisë Shpirtërore e Kulturore të Shqiptarëve në Shkup dhe Ipeshkvisë së Kosovës.

Nën një nga fotografitë e ekspozitës shkruante: “Gonxhe Bojaxhiu nxënëse në shkollën fillore shqiptare të Shkupit, në vitin shkollor 1922/1923”.

Shqiptarja Gonxhe Bojaxhiu, e lindur në 26 gusht të vitit 1910 në Shkup, u bë Motra Tereze e Loretos (1929); Nënë Tereza – “Misionare e Dashurisë” (1950); Nobelistja e Paqes (1979), e Lumja Nënë Tereza (2003); Shën Nënë Tereza (2016).

Në 10 dhjetor 1979, sipas raportimit në atë kohë të gazetës tradiconale të Kosovës Rilindja, Nëna Terezë, pasi kishte pranuar Çmimin Nobël për Paqe në Oslo ka deklaruar: “Përsa i përket prejardhjes, unë jam shqiptare, indiane përkah nënshtetësia, motër murgeshë katolike, përkah thirrja, që i përkas tërë botës…”

Biografi i Nënë Terezës, Don Lush Gjergji, Vikar Gjaneral i Ipeshkvisë së Kosovës, ka shkruar: “Kush ishte Gonxhe Bojaxhiu? Bija e Kolë Bojaxhiut, me prejardhje nga Prizreni, dhe Drane lindur Bernaj – Bojaxhiu, nga Novosella e Gjakovës, por edhe më tepër bija e krishterimit tonë dymijëvjeçar, e traditës, kulturës dhe martirizimit të popullit shqiptar….

Kush ishin prindërit e saj? Kolë Bojaxhiu (1872-1919) ishte tregtar i njohur, ndërtimtar, muzikant, poliglot, patriot i shquar, por mbi të gjitha bamirës dhe babë i shumë të varfërve të Shkupit dhe të rrethinës. Angazhimin e tij për drejtësi dhe barazi e pagoi edhe me jetë, si duket qe helmuar në Beograd, sepse i mbronte të drejtat themelore të njerëzve të pambrojtur, sidomos të shqiptarëve.

Drane Bojaxhiu (1889-1972) ishte grua e mirë, shtëpiake e kujdesshme, nënë e zellshme dhe shumë e përshpirtshme, shpirt dhe zemër për çdo nevojtar, edukatorja e parë e Gonxhe Bojaxhiut.

Familja Bojaxhiu pati edhe dy fëmijë të tjerë: Lazër Bojaxhiu (1905-1981) dhe Age Bojaxhiu (1908-1973)”.“Unë jam prej Prizreni, prindërit e mi kanë lindur në Prizren”, kujtonte fjalët e Nënë Terezes, Don Shan Zefi, Kancelar i Ipeshkvisë së Kosovës, nga takimi i parë në vitin 1975, në një bisedë ekskluzive që kam zhvilluar në 100 vjetorin e lindjes së Nënë Terezës, në qershor 2010

“Isha në gjimnazin klasik në Suboticë (qytet në Krahinën e Vojvodinës në federatën e atëhershme jugosllave), ku ishim rreth 40 seminaristë kosovarë… Kur i tham se jemi nga Kosova, Nëna Tereze menjëherë u shpreh shqip, duke treguar se është nga Prizreni. Me një emocion të jashtëzakoshëm filloi të flasë shqip me ne shqiptarët…”, tregonte Zefi.

Ai tregonte se me Nënën Tereze është takuar edhe në Shkup, në vitin 1986. “Thoshte edhe atje se ishte e lindur në Shkup, se kishte prindërit nga Kosova”.

Po ashtu, Zefi tregonte se me Nënën Terezë ka pasur 3-4 takime edhe në Romë.

“Edhe recitonte, lutej në shqip. ‘Punën e pendimit’ e thoshte shqip gjithmonë…”, shprehej Zefi, derisa bisedonim në Selinë e re të Ipeshkvisë së Kosovës dhe në Katedralën në ndërtim në Prishtinë…

Në vitin 2017 Kosova ka festuar gëzuar Krishtlindjen me urimet edhe për 2018-tën e 10-vjetorit të Pavarësisë së njohur deri tani nga 115 shtete anëtare të Organizatës së Kombëve të Bashkuara, të shprehura edhe gjatë meshës së Krishtlindjes – të parën në Katedralen e shuguruar Shën Nënë Tereza në Prishtinë. “Vërtetë jemi të lumtur që sot po kremtojmë për të parën herë Krishtlindjen në këtë kishë të shuguruar, me emrin e shenjtëreshës sonë Nënës Terezë”, tha Ipeshkvi i Kosovës, Imzot DodëGjergji, i cili në porosinë për Krishtlindjen 2017 është shprehur me vlerësime e urime edhe për Vitin Mbarëkombëtar të Gjergj Kastriotit – Skënderbeut…

Per me shame fotografi shine ne facebook(dielli vatra)

Kosova në ngjarje kulturore ndërkombëtare

January 2, 2018 by dgreca

-Kosova në 2017-tën pjesëmarrëse në ngjarje të rëndësishme kulturore me renome ndërkombëtare/

1 Minist Kult.JPG 1 Kosova Kultu 2017.JPG

-Ministri Kujtim Gashi: Për herë të parë Ministria e Kulturës, Rinisë dhe Sportit e Kosovës ka ndarë Çmimin ndërkombëtar “Letërsia shqipe”, i cili i është dhënë shkrimtarit të madh Ismail Kadare/

PRISHTINË, 2 Janar 2018-Gazeta DIELLI-Behlul Jashari/ Në vitin 2017 Kosova ka qenë pjesëmarrëse në shumë ngjarje të rëndësishme kulturore me renome ndërkombëtare.

“Në 2017-tën Kosova mori pjesë në edicionin e 57-të të Bienales së Venedikut, në Edicionin e 8-të të Lojërave të Frankofonisë në Abixhan të Bregut të Fildishtë, në programin Evropa Kreative, ndërsa është anëtarësuar në Federatën Ndërkombëtare të Këshillave të Artit dhe Agjencive të Kulturës, e cila është një rrjet global i këshillave të artit dhe ministrive të kulturës”, tha ministri i Kulturës, Rinisë dhe Sportit, Kujtim Gashi, në konferenën për shtyp të fundvitit 2017 e në prag të 2018-tës.

Ministri theksoi edhe ndarjen e çmimeve vjetore në fusha të ndryshme të kulturës – për dramë origjinale shqipe, për letërsi, për teatër dhe për muzikë, si dhe promovimin kulturor të Kosovës.

“Në kuadër të politikës së promovimit kulturor është përkrahur krijimtaria kulturore në vend, duke përfshirë aktivitetet e institucioneve publike kulturore: Teatri Kombëtar i Kosovës, Filarmonia-Opera e Kosovës, Baleti Kombëtar i Kosovës, Ansambli Shota, Galeria Kombëtare e Kosovës, Qendra Kinematografike e Kosovës, Kosovafilmi dhe Biblioteka Kombëtare e Kosovës”, tha Gashi.

Ndërsa, vijoi ai, me qëllim të promovimit kulturor janë përkrahur edhe aktivitetet e kulturës së pavarur, përfshirë ato të asociacioneve dhe organizatave të pavarura kulturore, artistëve, etj. “Gjatë vitit 2017 janë përkrahur më shumë se 400 projekte me shumën totale mbi 1.200,000 euro”, tha ministri kosovar i Kulturës, Rinisë dhe Sportit.

Ai theksoi edhe aktivitetet me qëllim të përkrahjes së autorëve dhe botueseve dhe përmes tyre të afrohet sa më shumë libri pranë lexuesve, mes të cilave përkrahjen 33 shtëpive botuese.

“Për herë të parë Ministria e Kulturës, Rinisë dhe Sportit e Kosovës në vitin 2017 ka ndarë Çmimin ndërkombëtar ‘Letërsia shqipe’, i cili i është dhënë shkrimtarit të madh Ismail Kadare”, tha ministri.

Ministria e Kulturës, Rinisë dhe Sportit organizoi konferencën për shtyp të fundit për vitin 2017, ku ministri Kujtim Gashi prezantoi të arriturat, sukseset dhe sfidat nëpër të cilat ka kaluar Ministria.

“Edhe pse mandatin si ministër e kam marrë pak më shumë se tash e 100 ditë, gjatë kësaj periudhe kam qenë i përkushtuar që të zbatojë planin e punës së Ministrisë, të vazhdojë zbatimin e projekteve që kanë qenë në proces, por edhe kam shtyrë përpara politika dhe projekte që i kam propozuar bashkë me kabinetin tim”, tha ministri.

Ai bëri të ditur se, Ministria e Kulturës në 2017-tën ka pasë një buxhet prej 25,146.301 eurosh.

Foli edhe për ligjet që janë miratuar gjatë vitit 2017 – Ligjin për parandalimin dhe sanksionimin e dhunës dhe dukurive negative në ngjarjet sportive dhe Ligjin për sponsorizime në fushën e kulturës, rinisë dhe sportit.

“Aktet nënligjore të miratuara gjatë vitit 2017 janë 9-të. Gjatë kësaj periudhe kohore Ministria e Kulturës, Rinisë dhe Sportit ka harmonizuar edhe 7 ligje me Ligjin për Kundërvajtjet”, tha ministri Gashi.

GEZUAR VITI I RI 2018 NGA PRISHTINA

December 31, 2017 by dgreca

Kosova në 2018-tën, 10 vjet pavarësi/

1 behlul 31 dhjetor 17.JPG

-Kosova pret 2018-tën me festimet edhe për 10 vjetorin e pavarësisë së shpallur në 17 Shkurtin historik 2008, të njohur deri tani nga 115 shtete anëtare të Organizatës së Kombeve të Bashkuara/

1 Prishtine.JPG

Gazeta DIELLI nga korrespondenti në Kosovë Behlul JASHARI/

2 edhe Skenderbeu.JPG

PRISHTINË, 31 Dhjetor 2017/ Kosova pret Vitin e Ri 2018 me organizime edhe për festimet e jubileut të 10 vjetorit të pavarësisë së shpallur në 17 Shkurtin historik 2008, të njohur deri tani nga 115 shtete anëtare të Organizatës së Kombeve të Bashkuara.

Deri në këtë fundvit Kosova shtet ka vendosur marrëdhënie diplomatike me 88 shtete, është anëtarësuar në më shumë se 60 organizata rajonale, evropiane dhe ndërkombëtare, ka hapur gati 40 misione diplomatike dhe poste konsullore dhe ka të akredituar ambasadorë jorezidentë në rreth 60 shtete.

Në 2018-ën festohet edhe 19 vjetori i Kosovës së lirë nga qershori 1999, kur hynë forcat paqeruajtëse e shpëtimtare të NATO-s.

Në Kosovën vend lirë dhe i pavarur ndërrimi i moteve pritet tradicionalisht nëpër sheshet e stolisura edhe me bredhe, ku organizohen edhe koncerte, mes shkëlqimit të dritave e fishekzjarreve.

Raportimet nga Kosova që bëja për Agjencinë shtetërore-zyrtare të lajmeve të Shqipërsië në ndërrim të moteve në kohën e paraluftës e luftës ishin “shpresë se s’ndërrojnë veç vitet” dhe theksonin se “në robëri pritet veç festa e lirisë”, ndërsa në vitin e parë të lirisë lajmi ishte se nga mbrëmja e 31 dhjetorit 1999 e deri pas mesnatës mëse 100 mijë njerëz për herë të parë të lirë ishin në sheshet kryesore të Prishtinës në pritjen e Vitit të Ri 2000, ndërsa festime të mëdha në sheshe kishte edhe në qytetet e tjera kosovare.

“Kryeqyteti i Kosovës, që festoi Vitin e Ri për herë të parë në liri, ishte një nga pesë qytetet e botës prej nga qendrat më të mëdha televizive bënë transmetime të drejtpërdrejta”, theksonte lajmi që e raportoja nga Prishtina në 1 janar 2000.

Bënte të ditur edhe se, “një mesazh solidariteti, me kërkesën për lirimin sa më të shpejtë të 7 000 djemve dhe vajzave kosovare, që vazhdojnë të mbahen peng në burgjet e
Serbisë, u lexua në sheshin kryesor ‘Nënë Tereza’ të Prishtinës”.

Në Kosovë, mëse 18 vjet pas luftës me më shumë se 12 mijë shqiptarë të vrarë e masakruar nga forcat serbe, janë ende mbi 1600 të zhdukur të pagjetur. “Atyre që na mungojnë”, me këtë emërtim, u është ngritur Memoriali në sheshin kryesor të Prishtinës, para ndërtesës së Kuvendit të Kosovës, ku ka lot e dhembje edhe në këtë fundviti, derisa përkujtohen, u bëhen nderime dhe kërkohet zbardhja e fatit të tyre.

Agjencia Kosovare e Privatizimit: 2017-ta, vit me rekorde

December 27, 2017 by dgreca

1 AKP.JPG

-Dinamika e rritur e punës do vazhdojë edhe në vitin e ri 2018, për të cilin Agjencia Kosovare e Privatizimit ka 5 objektiva, të parin 12 valë të shitjeve të aseteve përmes likuidimit/

-Projektligji për ndryshimin dhe plotësimin e Ligjit për Agjencinë Kosovare të Privatizimit, i miratuar nga Qeveria e Kosovës në 10 nëntor 2017, pritet të miratohet edhe në Kuvend në fillim të 2018-tës/

-Drejtuesit e Agjencisë Kosovare të Privatizimit janë përgjigjur edhe në interesimet e korrespondentit në Kosovë të gazetës DIELLI, e që kishin të bënin edhe me gazetën historike e të parën të përditëshme shqiptare të Kosovës RILINDJA/

1 Hajdari & Jashari.JPG

Gazeta DIELLI nga korrespondenti në Kosovë Behlul JASHARI

PRISHTINË, 27 Dhjetor 2017/ Agjencia Kosovare e Privatizimit 2017-tën e punës së saj e vlerëson shumë të sukseshme dhe pret të vazhdojë dinamikën e rritur edhe në vitin e ri 2018, për të cilin ka 5 objektiva, të parin 12 valë të shitjeve të aseteve përmes likuidimit.

“Ajo që e bën këtë vit shumë të sukseshëm është fakti që ne përfundimisht kemi arritur të kthejmë besimin e investitorëve potencialë dhe kjo u dëshmu përgjtë 11 valëve të shitjes që i kemi mbajtur këtë vit”, tha sot drejtori menaxhues i Agjencisë Kosovare të Privatizimit, Ekrem Hajdari, në konferencën për shtyp të fundvitit.

Ai bëri të ditur se gjatë këtij viti ishin mëse 1.000 asete të ofruara për shitje, për të cilat Agjencia Kosovare e Privatizimit ka marrë më shumë se 2.000 oferta, numër ky rekord.

“Edhe vlera totale e aseteve të ofruara për shitje në vitin 2017 ka arritur shumë rekorde prej 61 milionë eurosh”, theksoi Hajdari.

Ai tha se me dinamikën e rritur procesi i privatizimit në Kosovë pritet të finalizohet brenda 7 viteve të ardhëshme.

“Derisa për 15 vite janë privatizuar rreth 45 për qind të të gjitha asteve të ndërmarrjeve shoqrore mbetja tjetër me rreth 55 për qind me këtë dinamikë të shtuar presim të finalizohet për 7 vitet e ardhëshme”, tha drejtori menaxhues i Agjencisë, Ekrem Hajdari.

Ai dhe zëvendësdrejtori Menaxhues për Likuidim, Avni Jashari, presin edhe më shumë mundësi për punë e rezultate me miratimin vitin e ardhëshëm në Kuvendin e Kosovës të Projektligjit për ndryshimin dhe plotësimin e Ligjit për Agjencinë Kosovare të Privatizimit, të miratuar nga qeveria në 10 nëntor 2017.

“Projektligji me ndryshimet e ofruara ka për qëllim lejimin e investimeve të mjeteve të fondit të privatizimit në letrat me vlerë të emetuara nga qeveria e Republikës së Kosovës”, ka theksuar qeveria. Ndryshimi dhe plotësimi iLigjit për Agjencinë Kosovare të Privatizimit është i rëndësishëm edhe për pagesën e 20 përqindëshit edhe për ish-punëtorët e ndërmarrjeve shoqërore, asetet e të cilave janë shpronësuar nga qeveria.

Që nga viti 2008, qeveria e Kosovës ende nuk ka paguar asnjë shpronësim për pronat shoqërore, ndërsa ka marrë më shumë se 700 vendime për shpronësime, mes të cilave të Pallatit 18 katësh ku ishte gazeta tradicionale e Kosovës Rilindja, e cili është shëndrruar në objekt qeveritar.

Ndërmarrja Shoqërore Gazeta Rilindja në vitin 2017 ka hyrë në procesin e likuidimit, ndërsa ish-punëtorët e saj kanë bërë kërkesa për kompensime në Agjencinë Kosovare të Privatizimit, e cila i ka mbështetur në vazhdimësi për të drejtat e tyre të ligjëshme, si dhe në Dhomën e Posaçme të Gjykatës Supreme të Kosovës.

Në Agjencinë Kosovare të Privatizimit ritheksuan edhe sot se për asnjë ndërmarrje shoqërore nuk mund të mbyllet procesi i likuidimit pa i paguar fondet e shpronësimit, prej të cilave poashtu pritet të paguhet 20 përqindëshi për punëtorët e ndërmarrjeve shoqërore.

Drejtori menaxhues i Agjencisë Kosovare të Privatizimit, Ekrem Hajdari, në konferencën për shtyp, mes tjerash ka theksuar edhe këto shifra e fakte: Në vitin 2017 numri i ndërmarrjeve shoqërore të vendosura në likuidim arrin në 50, numri i kërkesave kreditore të parashtruara është 997 e të shqyrtuara 987. Kanë mbetur vetëm 5 lokale-asete të uzurpuara në veri të Kosovës dhe para përfundimit të vitit bëhet lirimi i tyre. Vetëm në vitin 2017 Agjencia Kosovare e Privatizimit ka identifikuar dhe vënë nën administrim edhe 36 asete të reja që më herët nuk i kishte në regjistrara.

Drejtuesit e Agjencisë Kosovare të Privatizimit janë përgjigjur edhe në interesimet e korrespondentit në Kosovë të gazetës DIELLI, të parës gazetë shqiptare në botë – organ i Federatës Pan-Shqiptare të Amerikës VATRA, e që kishin të bënin edhe me gazetën historike e të parën të përditëshme shqiptare të Kosovës RILINDJA, kryeredaktor i së cilës ishte nga fillimi i vitit 2002 e deri në numrin e fundit.

Gazeta e përditëshme tradicionale të Kosovës Rilindja ka nisë të dalë në Prizren para më shumë se 72 vitesh, në 12 shkurt 1945. Gazeta historike e Kosovës Rilindja, e cila ka filluar të dalë në frymën e Konferencës së Bujanit e me anagzhimin e intelektualëve më të shquar të asaj kohe, me shkronja plumbi që u sollën me arka nga Tirana, është mbyllur detyrimisht para gati 16 vitesh me dëbim të kundërligjshëm e të padrejtë nga Pallati i saj në Prishtinë nga administrata e UNMIK në 21 shkurt 2002. Pas kësaj date gazeta Rilindja ka dalë me numra protestues të jashtëzakonshëm, të kohëpaskohshëm.

Gazeta Rilindja, kronikë e zhvillimeve historike të Kosovës, pasi doli me botime speciale edhe për ngjarjen historike të shpalljes së pavarësisë në 17 Shkurt 2008 dhe për njohjet ndërkombëtare që pasuan, ka përmbyllë daljet e mëse 40 numrave protestues para 9 viteve, në 30 dhjetor 2008, me numrin e festës së Vitit të Ri 2009, me paralajmërimin në ballinë: “Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë”.

Për privatizimin e gazetës tradicionale të Kosovës është edhe shembulli i gazetave në rajon dhe në botë, që kishin statusin si të Rilindjes, e që janë privatizuar dhe kanë vazhduar të dalin, madje pa asnjë ndërprerje dhe në objektet ku kanë qenë.

Shënjim i gabuar i vijës kufitare me Malin e Zi

December 26, 2017 by dgreca

Kosovë-Komisioni Qeveritar: Shënjim i gabuar i vijës kufitare me Malin e Zi/

2 Kufiri

-Në mbledhjen e Komisionit për Punë të Jashtme, Diasporë dhe Investime Strategjike të Kuvendit të Kosovës ka raportuar Komisioni Qeveritar për çështjen e kufirit me Malin e Zi/

-Komisioni paraprak gjatë punës së tij ka tejkaluar autorizimet e precizuara në vendimin Qeveritar, vlerësoi krytari i Kmisionit të ri/

PRISHTINË, 26 Dhjetor 2017-Gazeta DIELLI/ Në Kuvendin e Kosovës, në mbledhjen e sotme të Komisionit për Punë të Jashtme, Diasporë dhe Investime Strategjike, kryesuar nga Vjosa Osmani, kryetare e këtij Komisioni, ka raportuar Komisioni Qeveritar për çështjen e kufirit me Malin e Zi, i emëruar nga nga kryeministri Ramush Haradinaj.
Në njoftimin zyrtar të Kuvendit bëhet e ditur edhe se: Vlerësimi i punës së komisionit paraprak për çështjen e Kufirit me Malin e zi, ka qenë mandati dhe autorizimi ynë nga Qeveria, tha në fillim të fjalës së tij para anëtarëve të Komisionit, Shpejtim Bulliqi, kryetar i Komisionit Qeveritar.
Duke folur për të gjeturat, përkatësisht mangësitë e punës së Komisionit të mëhershëm, ai vlerësoi se Komisioni paraprak gjatë punës së tij, ka tejkaluar autorizimet e precizuara në vendimin Qeveritar. Për më shumë, vijoi Bulliqi, Komisioni paraprak ka bërë interpretim të gabuar të fakteve hartografike, dhe si rrjedhojë, një shënjim të gabuar të vijës kufitare më Malin e Zi.
Duke folur për të gjeturat që ata kanë evidentuar gjatë punës së tyre, Bulliqi më pas vuri në spikamë se, Komisioni që ai ka udhëhequr është bazuar në: analizën e dokumenteve hartografike, të gjeturat hartografike, dokumentet që paraqesin kontrollonin efektiv të kufirit me Malin e Zi, si dhe një vendim të Kuvendit të ish Krahinës Socialiste Autonome të Kosovës (KSAK).
Në vijim, Bulliqi dhe bashkëpunëtorët e tij, kanë paraqitur një mori faktesh, siç janë: investimet infrastrukturore në zonën e kontestuar, si dhe harta të ndryshme.
Komisioni Qeveritar, (duke e cilësuar fakt të ri në raportin e punës së tyre), paraqitën edhe një rast të një aksidenti automobilistik në zonën e kontestuar kufitare ndërmjet Kosovës dhe Malit të Zi.
Lidhur me këtë, përfaqësuesi i Komisionit qeveritar tha: “Autobusi i aksidentuar, (më 09.11.1981), në Çakorr, ashtu edhe kompania e sigurimeve ishte nga Mali i Zi. Të gjitha procedurat janë kryer nga organet e KSAK-së dhe asnjë institucion i Malit të Zi nuk është përfshirë në këtë rast”.
Pas kësaj përfaqësuesit e këtij Komisioni, u shprehën se raporti i paraqitur sot është preliminar dhe sqaruan më pas se, në mungesë së kohës së mjaftueshme nuk kanë arritur që ta përfundojnë atë.
Në vijim, ata u janë përgjigjur pyetjeve të anëtarëve të Komisionit, të cilët vendosën që vendimin lidhur me raportin ta marrin nga mesi i këtij muaji.