dalip greca – Page 24 – Dielli

SHUHEN SHPRESAT MBI EFEKTIVITETIN E ILAÇIT TË MALARJES

April 25, 2020 by dgreca

FAKTI: Efektiviteti i hidroksilklorinës në trajtimin e pacientëve me COVID-19 nuk dha rezultatin e pritur në New York-/

TABLOJA 24 ORËSHE E LUFTËS KUNDËR KORONAVIRUSIT/
NGA DALIP GRECA/ Bota duket se i ka dhënë liri koronavirusit, në përpjekje të dështuara deri tani për ta frenuar. Tabloja e shifrave vazhdon e thellohet. Edhe për të Premte realiteti ishte i zymtë: u raportuan 105 mijë e 616 të infektuar të rinj, nga 78 mijë e 304 që ishin shifrat e së Enjtes, duke e çuar numrin e përgjithshëm në 2 milion e 828 mijë e 617,ndërsa numri i të vdekurve ka kapë shifrën 197 mijë 09.

Tabloja e betejës me Koronavirusin gjatë ditës së Premte në SHBA dha këto shifra: Numri i përgjithshëm i të infektuarëve shkoi në 925 mijë e 38, me rreth 37 mijë e 960 të infektuar të rinj, të përfituar nga rritja e numrit të testimeve.Deri në mbrëmjen e vonë të së Premtes u raportua se në SHBA ishin kryer 5 milion, 20 mijë e 850, testime, ku numri më i madh i takon qendrës së epidemisë, shtetit të New Yorkut me 730 mijë e 656 të testuar. Numri i viktimave në 24 orët e fundit ishte 1 mijë e 951 duke e çuar numrin e përgjithshëm në 52 mijë e 185 të vdekur.

New Yorku vazhdon t’i ulë parametrat e këqinj, duke raportuar gjatë së premtes 422 të vdekur(nga 507 të Enjten), me numër të përgjithshëm të jetëve të humbura 21 mijë e 283, duke iu afruar në total shteteve të Europës që kanë pësuar më shumë viktima: Italisë që ka 25 mijë e 969, Spanjës me 22 mijë e 524, Francës me 22 mijë e 245, dhe duke lënë pas Britaninë e Madhe me 19 mijë 505.

Shteti i New Jersy-t edhe gjatë së Premtes vazhdoi që të qëndrojë nën shifrat e javës së shkuar; u raportuan 189 të vdekur, në total 5 mijë e 617, një shifër e përafërt me Gjermaninë, e cila është shteti europian që e ka menaxhuar mjaft mirë betejën kundër koronavirusit dhe ka deri tani vetëm 5 mijë e 653 të vdekur, ndërkohë që të premten Gjermania kishte vetëm 78 viktima.

Massachustes e kaloi shifrën e 50 mijë të infektuarëve, me një shtesë prej 4 mijë e 946 të infektuarësh të rinj, që u raportuan të premten, ndërsa viktimat ditore kapën shifrën e 196 jetëve të humbura(në total 2 mijë e 556).

Michigani sërish u ngjit tek numrat treshifror për viktimat, duke e çuar shifrën e përgjithshme të viktimave në 3 mijë e 85, ndërsa numri i të infektuarëve 36 mijë e 641. Ndër shtetet e tjerë që raportuan viktima gjatë ditës së premte ishin: Connecticut me 125 të vdekur, Florida 59, Louisiana me 61, Meriland 50, Ohio 34, Indiana 35, Virginia 38, Missouri 24, Minnesota 21, Texas 25 etj. Mesatarja e dy javëve të fundit e jetëve të humbura në SHBA ka qenë rreth 2 mijë.

COVID-19 është i pranishëm në të 50 shtetet e SHBA-së, ku një pjesë i kanë dhënë fund izolimit, ndërsa të tjerët po planifikojnë hapje graduale në ditët që vijnë.

***

Shuhen shpresat mbi efektivitetin e hidroksilklorinës

Një studim i Departamentit të Shëndetit të Shtetit të Nju Jorkut mbi efektivitetin e hidroksilklorinës në trajtimin e pacientëve me COVID-19 tregoi se ilaçi kundër malaries dha pak efekte në luftimin e sëmundjes.

“Ne nuk shohim ndonjë ndryshim statistikisht domethënës midis pacientëve që morën ilaçin dhe atyre që nuk e morën,” tha David Holtgrave, Dekan i Universitetit të Shëndetit Publik në Albany. Në një studim të udhëhequr nga Holtgrave, 600 pacientë në zonën e New York City u monitoruan. Disa e morën ilaçin së bashku me antibiotikun azitromicinë, dhe disa pa të. Të enjten në CNN, Guvernatori Andrew Cuomo tha, ” hidroksilklorina nuk dha efekt pozitiv, por nuk pat as pasoja negative… në të vërtetë nuk pati një efekt të dukshëm në shkallën e rikuperimit.”

***

Të paktën 150 mjekë italianë kanë vdekur nga koronavirusi

Në Itali, të paktën 150 mjekë kanë vdekur pas infektimit nga koronavirusi, deklaroi të Premten e 24 prillit Shoqata Italiane e Mjekëve.

Profesionistët e kujdesit shëndetësor përbëjnë rreth 10% të të gjithë të infektuarëve, u theksua në deklaratë.

Një grup i veçantë italian i kujdesit shëndetësor, ANAAO, kritikoi dekretin e qeverisë, që synonte forcimin e sistemit shëndetësor, që siç thanë ata nuk është ai që duhet dhe se ishin te zhgenjyer.

ANAAO i quajti masat e përcaktuara në dekret, te pamjaftushme, po ashtu edhe shuma prej 25 miliardë euro (27 miliardë dollarë), plotësisht zhgënjyse. Dekreti u miratua nga qeveria të Premten, 24 prill 2020.

“Financimi shtesë i ofruar nuk është i mjaftueshëm për të garantuar shpërblimin e të gjitha orëve të tepërta të punës midis shkurtit dhe marsit, dhe nuk i përligj frymën e sakrificës, humanizmin, përkushtimin e mjekëve dhe personelit të gjërë mjeksor, thoshte deklarata.

Pandemia goditi ashpër sistemin e kujdesit shëndetsor në Itali, i cili nuk ishte në gjendje të përballonte stuhinë e shtrimeve massive të pcientëve të infektuar. Financimet në sistemin e shëndetsisë kanë qenë farë të pamjaftushme në Itali.

“PROMOVIMI” I PRESIDENTIT TRUMP

Presidenti Donald Trump i habiti të gjithë tek promovoi të enjten me 23 prill, idetë e tij për trajtimin e koronavirusit me anë të injektimit në trup të lëndëve të rrezikshme dezinfektuse. Në daljet e përditshme para gazetarëve ai u sugjeroi shkenctarëve të fokusohen në efektet e bombardimit të trupit të pacientëve me rreze ultravioletë, duke shtuar, të shihet mundësia e injektimit të lëndëve helmuese si dezifektantët apo alkooli në gjakun e tyre.-“Kam parë se si dezinfektantët e shkatërrojnë virusin brenda një minute, dhe nuk e di a ka ndonjë mënyrë që kjo të realizohet me injektim të brendshëm, si një lloj pastrimi, pasi virusi futet në mushkëri dhe shumohet, tha Presidenti.

Koordinatorja e taskforcës për Covid-19, Debora Bërks, natyrisht nuk e duartrokiti këtë promovim idesh të presidentit.

MEMORIAL PËR 83 PUNONJËSIT E MTA QË HUMBËN JETËN NGA KORONAVIRUSI

April 22, 2020 by dgreca

24 ORË NGA BETEJA ME COVID-19/

MEMORIAL PËR 83 PUNONJËSIT E MTA QË HUMBËN JETËN NGA KORONAVIRUSI/
CUOMO: PROGRAM GJURMIMI TRESHTETËSH, SPONSËR MICHAEL BLOOMBERG/
NEW YORKU DO T’I NGRIJË KUFOMAT E VIKTIMAVE/
DE BLASION:NEW YORKU DO TA FESTOJË 4 KORRIKUN…EDHE ME FISHEKZJARRE, POR NDRYSHE NGA VITET E TJERË…/

Nga Dalip Greca

Pandemia globale e koronavirusit ka marrë deri tani më shumë se 183 mijë e 723 jetë njerëzore në të gjithë botën.Rreth 2 milion e 630 mijë njerëz në të gjithë globin janë diagnostikuar me COVID-19, sëmundje e shkaktuar nga virusi i ri që prek frymëmarrjen, sipas të dhënave nga Qendra Shkencore në Universitetin Johns Hopkins.Shifrat e vërteta besohet të jenë shumë më të larta për shkak të mungesës së testimit. Dyshohet se disa qeveri po fshehin të dhënat.

Që nga rastet e para që u zbuluan në Kinë (dhe që u raportuan shumë vonë), Shtetet e Bashkuara të Amerikës janë bërë vendi me prekjen më të lartë, me më shumë se 845 mijë raste të diagnostikuara pozitive dhe të paktën 47 mijë e 430 të vdekur.

Gjermania është shteti europian që e ka menaxhuar më së miri këtë pandemi, duke patur vetëm 150 mijë të infektuar, rreth 112 mijë më pak se shteti i New Yorkut, ndërkohë që ka regjistruar vetëm 5 mijë e 250 jetë të humbura, me një rritje ditore prej 164 vdekje.

Italia që ka koston më të lartë nga shtetet e Bashkimit Europian për jetët e humbura, me mbi 25 mijë vdekje, ditët e fundit po tregon shenjat e ringritjes me vetëm 3 mijë e 370 të infektuar të rinj, ndërsa numri i viktimave ditore ka rënë nën 450. E njëjta situatë po shfaqet edhe në Spanjë, e cila ka regjistruar 208 mijë e 389 të infektuar dhe ka humbur 21 mijë 717 jetë njerëzore, rreth 370 pacientë më shumë se shteti i New Yorkut.

Mbretëria e Bashkuar ende nuk po e merr veten me më shumë se 760 vdekje ditore, me mbi 18 mijë viktima në total ndër 133 mijë të infektuar.

Në Shtetet e Bashuara të Amerikës analizat studimore shifrore tregojnë se prania e sëmundjeve të tjera përbëjnë shkaqet kryesore të humbjes së jetës. Në shifra gjendja sipas studimi të botuar të Mërkurën në “The Journal of the American Medical Association” paraqitet kështu: 57 për qind kanë vuajtë nga Hipertensioni,41 për qind nga Mbipesha, dhe 34 për qind nga Diabeti Tip 2.

Studiuesit zbuluan gjithashtu se shkalla e vdekshmërisë tek meshkujt ishte më e lartë se te femrat dhe pacientët me diabet kishin më shumë gjasa të kishin marrë ventilim mekanik invaziv gjatë trajtimit në ICU ose të kishin sëmundje akute të veshkave.

Të dhënat u mblodhën nga studiuesit në Institutin për Kërkime Mjekësore në Feinstein dhe përfshinin analizën e 5.700 pacientëve të shtruar në spital ndërmjet 1 Marsit 2020 dhe 4 Prillit 2020, në Northwell Health, sistemi më i madh shëndetësor në shtetin e Nju Jork-ut.

Shumica e pacientëve në studim ishin meshkuj dhe mosha mesatare e të gjithë pacientëve të trajtuar ishte 63 vjeç. Rreth një e treta e të gjithë pacientëve (1.734) shfaqën ethe, 986 kishin një ritëm të lartë të frymëmarrjes dhe 1.584 pacientë morën oksigjen plotësues, sipas studimit.

MEMORIAL PËR 83 PUNONJËSIT E MTA QË HUMBËN JETËN NGA COVID-19

Do të ngrihet një memorial për punonjësit e tranzitit në New York City, të cilët kanë vdekur gjatë pandemisë së koronavirusit, tha Kryetari i Autoritetit të Transportit Metropolitan (MTA) dhe CEO Pat Foye.Në mbledhjen e bordit MTA, në mëngjesin e së së mërkurës, u raportua nga Foye se 83 punonjës kishin vdekur.Viktimat janë kryesisht meshkuj dhe shumë prej tyre kishin edhe probleme thelbsore me shëndetin.

“Kjo është një nga kohërat më sfiduese për MTA,” tha Foye.

Në të njëjtin mbledhje të bordit, Presidentja e Autoritetit të Tranzitit, Sarah Feinberg i kërkoi qytetit “të ndërmarrë hapa më agresivë” drejt ndihmës ndaj popullatës së pastrehë, të cilët kanë përdorur trenat për të fjetur.

“Ne jemi të irrituar nga çështja e rritjes së numrit të popullsisë së pastrehë në sistemin e MTA- tha Feinberg.

Fjala ishte për homeless-ët të cilët i kthejnë trenat dhe stacionet e Metros në vend-fjetje, duke u bërë shpërndarës të virusit.

Feinberg nuk detajoi se çfarë hapash duhet të ndërmarrë qyteti, por tha se veprimet duhet të jenë “më agresive”.

“Unë mendoj se të gjithë po humbasin durimin me këtë situatë,” tha Feinberg.

***

CUOMO: PROGRAM GJURMIMI TRESHTETËSH, SPONSËR MICHAEL BLOOMBERG

Guvernatori i New York, Andrew Cuomo, gjatë takimit të përditshëm, tha se përkundër një takimi “produktiv” që ai pati të martën me 21 Prill në Shtëpinë e Bardhë me Presidentin Donald Trump, si dhe një plani që po shkon përpara në shtetin që drejton, njujorkezët sërish janë larg fundit të betejës.

Ai komentoi se koha e përfundimit të betejës nuk do të jetë e shpejtë dhe nuk e fshehu faktin se “më shumë njerëz do të vdesin nëse ne nuk do të jemi të kujdesshëm”.

Cuomo u fokusua tek testimi dhe gjurmimi. Ai u zotua se me kapacitetin maksimal të shtetit dhe me mbështetjen e qeverisë Federale, ritmi i testimit do të rritet dhe në vend të 20 mijë testimeve që bëheshin në javë, tash do të bëhen 40 mijë. Patjetër duhet të arrijmë maksimumin, tha ai.

Sa i përket gjurmimit, guvernatori tha se shtetit do t’i duhej një “ushtri gjurmuese” për të ndjekur në mënyrë efektive kush ka qenë në kontakt të afërt me persona që janë testuar pozitivisht për virusin. Cuomo informoi se ai është duke punuar me Guvernatorin e Connecticut Ned Lamont dhe Guvernatorin e New Jersey, Phil Murphy për të zhvilluar një program gjurmimi tre-shtetesh.

Ish-kryetari i Bashkisë së Nju Jorkut Michael Bloomberg ka shprehur vullnetin për të ndihmuar në zhvillimin e këtij programi, duke kontribuar me një fond prej $ 10 milion, sipas Cuomos. Programi është duke u punuar në partneritet me Johns Hopkins, shtoi ai.

Cuomo tha gjithashtu se qeveria vendore ende kanë nevojë për fonde shtetërore nga Uashingtoni. Ai komentoi faktin se Presidenti Trump pranoi të hiqte dorë nga ajo që quhet ndeshja shtetërore për FEMA. Cuomo tha se për shkak se Nju Jorku ka shumicën e rasteve të infeksionit dhe vdekjeve në SH.B.A, gjithashtu ka dhe koston më të lartë për FEMA dhe normalisht do të duhet të paguante çmimin më të lartë. Megjithatë Trump ka hequr dorë nga përplasja me shtetet dhe ka premtuar bashkëpunim.

Kryetari i bashkisë së NYC përshkruan planin për testimin dhe gjurmimin

Kryetari i Bashkisë së New York-ut Bill de Blasio përvijoi planin e tij për të sjellë qytetin në një fazë të re në përballjen me pandeminë.

Kryebashkiaku komentoi planin e testimit në mënyrë të tillë që të gjithë banorët të mund të testohen. Mudnësisht të realizojmë qindra, mijëra testime në ditë, tha ai.

De Blasio komentoi se së bashku me testimin, rëndësi merr gjurmimi, që do të pasojë testimin. Duhet të gjurmohen të gjithë individët që janë takuar me personin mbartës të koronavirusit.

Ai tha se një plan i tillë, do të marrë qindra mijëra njerëz, që do të punojnë në të, do të përfshijë më shumë testime, do të duhen më shumë pajisje mbrojtëse personale për personelin mjekësor dhe më shumë vendndodhjeje për testimet.

Natyrisht që për të realizuar këtë plan të De Blasios, do të duhet kohë. Ai tha se në muaji tjetër ky plan do të jetë funksional.

Kur u pyet se sa do të funksiononte një program si ky, de Blasio u përgjigj: “Ne duhet ta bëjmë atë. Ne duhet të gjejmë një mënyrë për ta bërë atë.”

Kryebashkiaku tha se qyteti që ai drejton po shënon përparime në betejën kund COVID-19.

Numri i pacientëve të pranuar në ICU në spitale zbriti nga 857 në 821 dhe përqindja e njerëzve që testuan pozitivë në të gjithë qytetin ra nga 35% në 33%.

Sidoqoftë, ai pranoi se numri i pacientëve të pranuar në spital, të dyshuar të COVID-19, u rrit nga 204 në 252.

Të martën, de Blasio njoftoi se shumë ngjarje kryesore në qytet, të planifikuara gjatë muajit qershor, përfshirë “Pride Parade” dhe “Puerto Rican Day Parade”, do të anullohen, por ai tha të mërkurën se New Yorku do ta festojë Ditën e 4 Korrikut, megjithëse do të duket ndryshe nga vitet e kaluara…..”Patjetër që do të ketë edhe fishekzjarrë”, tha ai.

NEW YORKU DO T’I NGRIJË KUFOMAT E VIKTIMAVE

Neë York City do t’i ngrijë kufomat e viktimave të COVID-19 në vend që t’i varrosë në ishullin Hart, që prej kohësh është përdorur si një vend varrosjeje për trupat e padeklaruar.

Masa e përkohshme për ngrirjen e trupave ka për qëllim do të zvogëlojë barrën për spitalet dhe shtëpitë e Funerale, të cilave po u mbarojnë hapësirat për shkak të numrit të madh të vdekjeve në qytet, ka deklaruar Zyra qendrore e Mjekësisë në New York City.

Ngrirja e kufomave nënkupton faktin se nuk do të ketë varrosje të përkohshme në ishullin Hart. Ngrirja e përkohshme u lejon familjeve më shumë kohë për përgatitjen e funeralit. Sidoqoftë, trupat që nuk mund të identifikohen ose nuk u del për zot një i afërt,do vazhdojnë të varrosen ende në ishullin Hart.

Zyra e Ekzaminimeve Kryesore Mjekësore, me ndihmën e Zyrës së Morgut të Forcave Ajrore, do të transferojë trupa nga pesë morgje të përkohshëm dhe 200 rimorkio frigoriferike që tani janë të parkuara jashtë spitaleve të qytetit, me kamionë frigoriferikë, do të vendosen në Brooklyn.

OBSH mbron veten në trajtimin e pandemisë

Dr. Tedros Adhanom Ghebreyesus, drejtori i përgjithshëm i Organizatës Botërore të Shëndetit, mbrojti trajtimin e pandemisë së agjencisë që drejton, duke thënë se Agjensia paralajmëroi në kohën e duhur për Pandeminë.

Ghebreyesus është pyetur nëse OBSH duhej ta kishte deklaruar më parë pandeminë?. Ai u përgjigj se ditën kur OBSH-ja shpalli COVID-19 një Urgjencë të Shëndetit Publik në rang ndërkombëtar më 30 Janar – kishte vetëm 82 raste të diagnostikuara jashtë Kinës.

“Sigurisht që në Kinë kemi pasur më shumë raste, por jashtë Kinës kemi pasur vetëm 82 raste dhe shumica e këtyre rasteve ishin të kufizuara”, tha ai.

OBSH e shpalli shpërthimin e pandemisë në 11 mars, kur kishte 37,362 raste të konfirmuara jashtë Kinës, sipas Raportit të Situatës së WHO # 51.

Rreth dy javë para kësaj – kur rastet e konfirmuara jashtë Kinës ishin në 2,069 – Ghebreyesus u pyet nëse COVID-19 do të klasifikohej si një pandemi.

Atëherë ai u përgjigj: “Nga vlerësimi ynë, jo akoma!” Ai shtoi se ekzistonte mundësia që ai të arrinte një nivel të tillë, por “për momentin nuk jemi dëshmitarë të përhapjes globale të pakontrolluar të virusit”.

Në përgjigje të thirrjeve që ai duhet të jepte dorëheqjen, Ghebreyesus duket se nuk ka në plan ta bëjë këtë. “Ne punojmë ditë e natë dhe do të vazhdojmë të punojmë ditë e natë. Unë do të vazhdoj të punoj ditë e natë,” tha Ghebreyesus.

4 TIGRA DHE 3 LUANË JANË INFEKTUAR NË KOPSHTIN ZOOLOGJIK TË BRONKSIT

-Kujdes- Edhe macet kanë rezultuar Pozitive. Njëri prej punonjësve të stafit besohet se ka infektuar Gjashtë mace.-

Katër tigra të tjerë dhe tre luanë kanë testuar pozitivë për COVID-19 në kopshtin zoologjik Bronx në New York City, sipas një deklarate nga kopshti zoologjik.

Në fillim të prillit, kopshti zoologjik raportoi që një tigër me emrin Nadia ishte testuar pozitiv, duke e bërë atë kafshën e parë në kopshtin zoologjik që do të diagnostikohej. Në atë kohë, tre tigra dhe tre luanë kishin shfaqë simptoma, thanë nga kopshtit zoologjik.

Testimi pasues konfirmoi gjashtë mace, plus një tigër tjetër, që ishte kollitur,dhe se kishin rezultuar pozitivë për virusin.

Deklarata theksonte se asnjë prej leopardëve të kopshtit zoologjik, asnjë prej majmunëve, leopardve, puma dhe kafshëve të tjera nuk tregojnë shenja sëmundjeje. Besohet se macet ishin infektuar nga një anëtar i stafit, i cili ishte asimptomatik me virusin ose infektimi ka ndodhë përpara se ai të kishte simptoma.

Kopshti zoologjik njoftoi se, të gjitha macet që janë testuar pozitive, janë duke u përmirësuar dhe kollitja e tyre ka rënë.

DY MACE SHTEPIAKE KKANE REZULTUAR POZITIV

Dy mace në New York janë bërë kafshët e para shtëpiake në Shtetet e Bashkuara që u testuan pozitive për virusin, sipas dy agjencive qeveritare.

Qendrat për Kontrollin dhe Parandalimin e Sëmundjeve dhe Laboratori Kombëtar i Shërbimeve Veterinare të Departamentit të Bujqësisë e bëri njoftimin të Mërkurën.

Agjencitë thanë që macet jetonin në dy zona të ndara të shtetit.Të dy rastet u raportua të kenë sëmundje të lehta të frymëmarrjes dhe pritet të kenë një shërim të shpejtë dhe të plotë.

Njëra nga macet nuk jetonte në një familje të infektuar me COVID-19, kështu që virusi mund të jetë transmetuar nga një anëtar i familjes asimptomatik ose përmes kontaktit me një person të infektuar jashtë shtëpisë së tij, sipas agjencitë.

Pronari i maces së dytë rezultoi pozitiv për virusin, megjithatë një mace e dytë në po atë shtëpi nuk ka treguar shenja të sëmundjes.

CDC dhe USDA thanë që testimi rutinë i kafshëve nuk rekomandohet në këtë kohë. Agjensitë vunë re gjithashtu se nuk ka prova që kafshët shtëpiake të luajnë një rol në përhapjen e virusit në SH.B.A.

LAMTUMIRË IDAET (EDWARD) BUSHKA, FRYMA ATDHETARE E KOMUNITETIT SHQIPTAR NË WATERBURY

April 21, 2020 by dgreca

-Historia e Nacionalistit(Legalistit), vatranit, që për katër vjet bashkëpunoi me anglo-amerikanët për rrëzimin e diktaturës komuniste në Shqipëri…/

– Si arriti që të rikthehej në vendlindje dhe të shpëtonte familjen në vitin 1952…./

– Biznesmeni që bëri epokë në Amerikë …./

Përgatiti: Dalip Greca/

Idaet (Edward) Bushka ndërroi jetë në moshën 89 vjeçare me 17 Prill 2020, në Saint Mary’s Hospital –Waterbury, Connecticutt. Familja dhe miqtë humbën njeriun e dashur,Komuniteti shqiptar në Waterbury humbi njeriun që më së shumti i dha frymë atdhetar dhe mbolli farën e bashkimit, Komuniteti musliman humbi një ndër themeluesit dhe kontribuesin bujar, biznesi amerikan humbi një ndër biznesmenët më të sukesshëm, Legalistët humbën një nga ”mbretërorët” besnik. Pushoftë në Paqë shpirti i fisnikut Idaet Bushka.
Për shkak të pandemisë së virusit COVID-19, të gjitha shërbimet e nderimit dhe varrimit për zotin Bushka ishin private. Një ceremoni përkujtimore do të organizohet në një kohë të përshtatshme. Shërbimet funerale iu besuan Shtëpisë mortore: The Albini Family Funeral Home, 430 Chase Parkëay, Waterbury.
Në njoftimin mortor shkruhej: Në vend të luleve, kontributet përkujtimore mund të bëhen në kujtesën e Z. Bushka për: Boys & Girls Club of Waterbury.
….. ***

IDAET(EDWARD) BUSHKA, HISTORIA E BIZNESMENIT DHE ATDHETARIT

Idaet (Edward) lindi në Shqipëri më 5 korrik 1930. Ishte djali i të ndjerit Halil dhe Haxhire (Fazo) Bushka. U lind në Pilur të rrethit të Korçës, në Shqipërinë Jug-Lindore, rreth 22 Km larg
nga kufiri me Greqinë.Në vitin 1950, pesë vjet pas ardhjes në pushtet të diktaturës komuniste të Enver Hoxhës, Idaet(Edward) Bushka, asokohe 19 vjeç, dhe babai i tij Halili, të privuar nga liria, të kërcënuar nga burgosja, u detyruan të arratiseshin në këmbë përmes maleve të Pindit në Greqi.Familja Bushka ashtu si familjet Kulla ishin shpallë armiq të diktaturës, si mbështetës të Mbretit Zog. Ftamirsisht të dyja familjet u sinjalizuan në kohë për rrezikun e arrestimit dhe ata arritën që të arartiseshn. Grupi me të cilin u arratisën Idaeti me babanë Halilin përbëhej prej 25 vetash. Natyrisht që familjet Kulla dhe Bushka lanë “peng”njerëzit e tyre të dashur, në pamundësi për t’i marrë me vete, por që një ditë Idaeti do të kthehej dhe do ta shpëtonte pjesën më të madhe të familjes së mbetur.
Idaeti me babanë Halilin u detyruan të linin në shtëpi nënën dhe motrat e vëllanë, Skënderin. Ky ishte pengu që e mundoi dhe e shqetësoi shumë Idaetin. Kur mbërritën në Greqi, babë e bir, nuk i lanë bashkë, por i dërguan në kampe të ndryshme. Idaeti u intervistua nga shërbimet inteligjente amerikane-angleze dhe u pyet nëse ishte i gatshëm që të luftonte komunizmin, nëse mund të guxonte të hynte në Shqipëri në mënyrë ilegale.
Agjensia e shërbimeve sekrete interesohej që të merrte sa më shumë të dhëna nga Shqipëria, përfshirë informacionin mbi forcën dhe lëvizjet e trupave ushtarake, vendndodhjen e rrugëve të furnizimit dhe listat e azhurnuara të shqiptarëve të burgosur ose të vrarë. Duke qenë i ri në moshë, i mbushur me mllef kundër diktaturës komuniste, Idaeti, dhe një pjesë prej grupit pranuan të aktivizoheshin. Shpesh herë ata kapërcyen kufirin duke udhëtuar natën, fshehtasi mes malesh dhe legalisht lëviznin nëpër Shqipëri për të grumbulluar të dhëna, duke rrezikuar jetën. Në një nga aksionet ai rrezikoi veten duke vendosë një bombë me rastin e një mitingu të udhëheqësve të lartë komuniste në Korçë, por që nuk shpërtheu. Idaet Bushka realizoi rreth 15 misione në Shqipëri për rreth katër vjet. Tre nga dhjetë pjestarët e grupit të tij u vranë duke tentuar të merrnin informacione nga Shqipëria. Vetë Idaet Bushka u qëllua disa here në aksionet e tij, por arriti të mbijetonte, duke marrë thjesht disa gjurmë kujtimi, vrimat e plumbave që shpuan pallton që mbante veshur. Misioni i tij më i rëndësishëm u bë në vitin 1952, kur ai drejtoi një grup illegal, që kishte si qëllim hyrjen në Pilur për të marrë motra e vëllezër të mbetur ”peng”. Pë vëllanë e vogël 5 vjeçar, i cili së bashku me një motër 8 vjecare, nuk mund ta përballonin udhëtimin e vështirë ndër male,gjeti një gomar dhe i vuri mbi të dhe i shpëtoi nga kthetrat e diktaturës. Por sërish i mbeti dhe një peng. Mjerisht ai nuk mundi të merrte nënën e tij Haxhire dhe vëllain Skënder, të cilët komunistët i kishin lëvizur larg Pilurit.
Idaeti dhe pjesa tjetër e familjes së tij nuk u ribashkuan me nënën dhe vëllanë e tyre deri në vitin 1991, kur regjimi u shemb përfundimisht. Idaeti dhe babai i tij Halil ishin ndarë menjëherë pasi mbërritën në Greqi, kur Halili u transferua në një kamp tjetër refugjatësh. Të dy nuk e kishin parë njëri-tjetrin për dy vjet, dhe Halili nuk e kishte idenë se djali i tij po kryente misione të inteligjencës sekrete. Babai nuk kishte informacion se i biri e kishte shpëtuar pjesën më të madhe të familjes. Babai i tij nuk mund të besonte kur bashkatdhetarët në kampin e refugjatëve i thanë që familja e tij kishte mbërritur në Greqi. Ai nuk mund të besonte se ata do të ribashkoheshin dhe se të gjithë ata ishin sjellë përtej kufirit përmes maleve.
Idaeti dhe pjesa e familjes së shpëtuar erdhën në Shtetet e Bashkuara në 1954 dhe u vendosën në Waterbury, ku jetonin disa prej të afërmve të tyre.
Idajeti u martua me Margarita Priftin në vitin 1959 dhe lindën e rritën pesë fëmijë, katër prej të cilëve punojnë në biznesin familjar dhe nëntë nipër e mbesa.
Ai ishte njëri prej biznesmenëve më të suksesshëm në Waterbury për më shumë se 40 vjet. E nisi biznesin e moblijeve dhe pajisjeve të kuzhinës me 2 javë mësim dhe me 10 mijë dollarë të huazuara nga xhaxhai i tij, duke shfrytëzuar bodrumin e shtëpisë së tij në William Street, ku jetonte, dhe për 40 vjet me radhë e rriti biznesin dhe u bë numri 1 në rajon.
Idaeti dhe katër vëllezërit e tij më të vegjël hapën Mobilerinë “ Bushka” në Fairfield Avenue, një biznes që të katër vëllezërit e administruan së bashku për 40 vite. Në vitin 1994, familja Bushka kuptoi se kishte ardhur koha që biznesi të zgjerohej e të riorganizohej. Kështu, vëllai i tij Stiven qëndroi në “Bushka Lumber”, vëllai tjetër Jimmy hapi një kompani të lëndëve të drurit në Naugatuck, dhe Edward, djali i Idaetit dhe vajzat e tij hapën një tjetër – Millwork Amerikan në Wolcott Street në Waterbury.
Edward drejtoi biznesin e tij të rrethuar nga familja e tij siç bëri që nga momenti kur vuri këmbën në Amerikë. Ai ishte një baba krenar, një biznesmen i suksesshëm dhe një shtyllë e komunitetit të tij. Ai ishte një njeri i shquar. Edward ishte pjesë e bordit të drejtorëve të Bankës Mattatuck në Waterbury, ishte pjesë e bordit të Stoppers Crimeb Waterbury për disa vjet. Ai është nderuar me shumë çmime, si person i vitit nga Shoqata e Tregtarëve të Përpunimit të Drurit të Connecticut në 2012.
Idaeti ishte krenaria e Komunitetit Shqiptar. Ai është përzgjedhur Kryetar Nderi i Ditës i Bashkisë në Waterbury në Ditën Shqiptare të Pavarësisë, me 28 Nëntor, në nder të tij u ngrit Flamuri kuq e zi i kombit të Tij. Idaet (Edward) Bushka është vlerësuar me çmimin e arritjes së jetës nga komuniteti Mysliman Shqiptaro Amerikan në vlerësim të shërbimit dhe përkushtimit të tij për shumë vite.Duke qenë një biznesmen i suksesshëm, z.Bushka ndërtoi disa projekte tregtare dhe banesore në të gjithë qytetin e Waterbury. Ai ishte besnik i qytetit në të gjitha përpjekjet e biznesit të tij.
Idaeti ishte i dashuruar me qytetin dhe lagjen e tij, e cila e priti me respekt e krah hapur që kur hodhi këmbët aty si një emigrant 20-vjeçar me arsimim minimal. Ajo lagje i besoi atij dhe e lejoi të hynte në shtëpitë e tyre duke e ndihmuar të ndërtonte biznesin e tij gjatë 40 viteve. Dhe ai nuk u kursye, bëri gjithçka që të ndihmonte njerëzit. Ai sponsorizoi shumë herë bashkëqytetarët, i ndihmoi për ngritjen e bizneseve. Mirëpriti bashkatdhetarët e shumtë.Kjo buronte nga shpirti i tij, ishte trashëgimia e tij dhe e familjes. Ai iku nga kjo jetë si një njeri i madh, vetëmohues. Do t’u mungojë të gjithëve.
Pushoftë në Paqë shpirti i Tij!
Ngushëllime Familjeve Bushka dhe Kulla!

24 ORE NGA BETEJA KUNDER KORONAVIRUSIT NE SHBA

April 19, 2020 by dgreca

PRESIDENTI TRUMP E SHEH ME OPTIMIZËM RIHAPJEN E EKONOMISE, GUVERNATORËT KËRKOJNË FONDE FEDERALE /

NGA DALIP GRECA/

Presidenti Trump edhe në daljen e së Dielës(19 Prill 2020) u shfaq optimist për mposhtjen e koronavirusit, i cili siç tha ai, e arriti kulmin dhe tash një pjesë e shteteve do të nisin rihapjen.Betejën e Amerikës me COVID-19 presidenti e cilësoi pozitivisht të kontrolluar, duke e krahasuar SHBA-në me Gjermaninë.

Duke filluar nga e hëna Teksasi dhe Vermont do të nisn rihapjen e bizneseve, ndërkohë që bashkia e Jaksonville në Florida e nisi rihapjen me hapjen e plazheve. Presidenti porositi se nuk duhet të hiqet dorë nga distancimi. Lidhur me protestat e së dielës në Teksas, Indiana etj, apo edhe ato në Michigan, Ohio, Utah, etj. gjatë ditës së dielë, presidenti tha se ata kanë të drejtën e tyre që të kërkojnë heqjen dorë nga mbyllja dhe hapjen e bizneseve për ringritjen e ekonomisë.

Mirëpo jo të gjithë shtetet mendojnë si presidenti. Governatorët në të dy krahët politik thanë të Dielën se qeveria federale duhet të rritë mbështetjen e saj për shtetet që përpiqen të fillojnë testimin masiv të koronavirusit për të krijuar siguri në rihapjen e ekonomisë. Ata kërkuan fonde federale dhe testime masive.I ashpër ishte në reagimin e tij Guvernatori Nga Virginia, Ralph Northam (Demokrat), i cili i quajti pretendimet e administratës Trump për burime të mjaftueshme”mashtruese”. Gjithësesi shenjë pozitive është fakti se administrata e presidentit Trump dhe drejtuesit e kongresit janë afër arritjes së një marrëveshje për të siguruar edhe 400 miliardë dollarë plus për të rinovuar fondet për një program kredie për biznesin e vogël.

Me gjithë këmbënguljen e presidentit për hapjen e ekonomisë, rreth 60 përqind e votuesve në Sh.B.A janë shumë të shqetësuar për rihapjen e menjëhershme të ekonomisë, sipas një anketimi të NBC News dhe Wall Street Journal.

Edhe New Yorku, qendra e pandemisë, është një ndër ata shtete që e kundërshtojnë hapjen e menjëhershme si në nivel qyteti ashtu edhe në nivel shteti.

Edhe pse Shteti ka një ulje graduale të përditshme të numrit të vdekjeve, si guvernatori Cuomo ashtu edhe kryebashkiaku Bill De Blasio nuk e shohin të afërt rihapjen, edhe pse kanë caktuar 15 majin si kufi të mundshëm.

Zyrtarët në Albany dhe në Manhatatn ende paralajmërojnë se New York City dhe pjesa tjetër e shtetit nuk janë të gatshëm të rihapin bizneset, shkollat apo të lejojnë grumbullimet.

Kryetari i bashkisë Bill de Blasio paralajmëroi të Dielën se me ardhjen e motit të pranverës, qyteti do të kërkojë më shumë zbatimin e rregullave të distancës sociale.

Po si është tabloja e betejës kundër COVID-19 në New York? Të Shtunën, numri i vdekjeve prej koronavirusit në shtetin e New York-ut ra nën 550 për herë të parë në mbi dy javë, të Dielën me 19 prill shifra u ngrit pak dhe shkoi në 627(numri i përgjithshëm i të vdekurëve 18 mijë e 298, ndërkohë që numri i të vdekurve të rinj për SHBA të Dielën u raportu në shifrat 1 mijë e 539, dhe në total 40 mijë e 533), ndërsa numri i të infektuarëve të rinj për New York ishte rreth 1 mijë më pak se një ditë më parë,por kriza nuk ka përfunduar, spitalet ende raportojnë rreth 2,000 pacientë të rinj COVID-19 në ditë.

De Blasio tha se joshja nga moti i ngrohtë i pranverës i njujorkezëve do të jetë një sfidë e vështirë, por ai paralajmëroi se nuk do të ketë lëshime. Ai kujtoi se rregulli, distancimi, do të mbrohen nga policia dhe shkelsit e rregullit do të përballen me gjoba deri në 1 mijë dollar. Kryebashkiaku nxiti qytetarët që nëse shohin grumbullime të fotografojnë dhe të njoftojnë autoritetet.

Në bashkitë e qytetit kanë humbur jetën nga beteja me COVID-19 rreth 13,000 njujorkezë, që nga 1 marsi, kur u raportua rasti i parë i koronavirusit. Shteti i New Yorkut ende ka problem me shifrat e vdekjeve për shkak se më shumë se 4,000 vdekje në New York City, që u raportuan se vdiqën nga virusi në çertifikatat e vdekjes, por që nuk u konfirmuan nga një test laboratori. Më shumë se 2,700 persona kanë vdekur në shtëpitë e pleqve në New York, shifër kjo më e lartë se në çdo shtet tjetër.

Një problem i rëndë për New York-un ka qenë dhe mbetet numri i lartë i oficerëve të Departamentit të Policisë të infektuar me COVID-19, por që fatmirësisht këtë javë ka filluar të bjerë ndjeshëm. Sipas Associated Press, departamenti më i madh i policisë ka raportuar se rreth 5,324 mbrojtës të rendit me uniformë të policisë ishin të sëmurë deri të shtunën, shifër kjo që përbën rreth 15% të forcës policore, por kjo shifër është më e ulët se ç’ishte që nga 9 prilli.Deri më tani, më shumë se 2,000 pjestarë të NYPD të testuar pozitivë janë rikthyer në punë, pasi kaluan karantinën dhe u shëruan.

Problemi më i madh për New Yorkun është përballja me deficitetet e mëdha në buxhet. Kryebashkiaku De Blasio tha gjatë të Dielës se nuk po bëhet sa duhet nga Qeveria Federale për të ndihmuar financat e zonave të goditura nga pandemia. Ai i është drejtuar Presidentit Trump dhe adminsitratës së tij me pyetjen: A doni ta shpëtoni New York City apo po i thoni New York-ut të bjerë i vdekur?

Gjuha dramatike e De Blasio erdhi gjatë konferencës së tij për shtyp të Dielën, pasi ai paralajmëroi javën e kaluar se planifikoi të shkurtojë 2 miliardë dollarë të tjerë nga buxheti i shërbimeve komunale të qytetit për shkak të rënies ekonomike. Ai tha se qyteti ka të ngjarë të humbasë të paktën $ 7.4bn në të ardhura tatimore gjatë vitit fiskal aktual dhe atë të ardhshëm.

De Blasio ka kritikuar paketën e lehtësimit të koronavirusit që Trump nënshkroi muajin e kaluar, duke thënë se New York-u mori vetëm 1.4 miliardë dollarë nga stimuli, krahasuar me rreth 58bn dollarë për industrinë e linjave ajrore. De Blasio i dërgoi një mesazh të hapur administrates, dhe i bëri jehonë një titull të gazetës Daily News në New York gjatë krizës së falimentimit të qytetit të viteve ’70, pasi Gerald Ford aso kohe ka mbajtë një fjalim në 1975, duke thënë se ai do të vinte veton ndaj një projekt-ligji federal që do të ndihmonte në shpëtimin e New York City nga falimentimet.De Blasio përdori shkrimin e Daily News që kishte në ballinë atë kohë titullin :

“Ford to City: Drop Dead “! De Blasio: “Pra, pyetja ime është, Z. Trump, Z. President, do të shpëtoni Nju Jork City apo po i thoni Nju Jork-ut që të bjerë i vdekur?

4 KËSHILLTARË BASHKIAKË (EDHE MARK GJONAJ) KËRKOJNË MBYLLJEN E PËRKOHSHME TË METROS

April 18, 2020 by dgreca

PAS DY JAVËSH BETEJE ME COVID-19 NEW YORKU PREK SHIFRËN MË TË ULËT TË VIKTIMAVE -540/

TRAGJEDIA NË SHTËPITË E PLEQVE…

Nga Dalip Greca/

Vetëm 540 të vdekur në 24 orët e fundit. Lajmin e ka dhënë vetë Guvernatori Cuomo gjatë komunikimit të përditshëm përmes Konferencës së Shtypit, të shtunën me 18 prill. Ai pohoi se dhe sinjalet e tjera të kësaj beteje flasin për ulje të goditjes nga koronavirusi. Cuomo përmendi shifrën e shtrimeve të reja në spitale, që nuk shkon më shumë se 2 mijë në të gjithë shtetin.

New Yorku vazhdon që të ketë shifrat më të larta, jo vetëm në tregusit total të viktimave, por edhe në ato ditore, si për të vdekurit ashtu edhe për të infektuarit me virusin e padukshëm. Me shifrën e sotme të viktimave, shifra totale shkon në 17 mijë e 571 të vdekur. Gjatë 24 orëshit të fundit, New Yorku raportoi se ishin zbuluar 7 mijë e 90 të infektuar, duke e çuar shifrën e përgjithshme të të infektuarëve në rang shteti në 241 mijë 041.

New Jersey, të dy treguesit kryesorë të betejës me koronavirusin, si atë të viktimave ditore edhe atë të infektuarëve të rinj i ka në ulje; ka raportuar 100 vdekej ditore më pak se dje dhe rreth 200 të infektuar të rinj më pak se një ditë më parë.

Ndër shtete e tjerë, Michigani, që ka nisë protesta që kërkojnë dhënien fund të izolimit, raportoi të shtunën 2 mijë e 227 të infektuar të rinj dhe 81 të vdekur, Massachusetts regjistroi 156 të vdekur dhe rreth 2 mijë të infektuar të rinj, Pannsylavania 145 të vdekur dhe dhe 1,810 të infektuar të rinj, Ilionosi shënoi 125 të vdekur dhe 1 mijë e 585 të infektuar të rinj, Kalifornia 99 të vdekur dhe 1,294 të infektuar të rinj, Louisiana raportoi të shtunën 54 të vdekur, Connecticut 50, Ohio 33, Florida 22, Meriland 38 etj. Në rang Unioni, SHBA-ës regjistruan një shifër prej 1 mijë e 766 të vdekur për 24 orë, duke e çuar numrin e përgjithshëm në 39 mijë 014, ndërsa të infektuarit e rinj ishin 27 mijë 034, duke e çuar numrin e përgjithshëm të të infektuarëve deri në mbrëmjen e së shtunës, 18 Prill, në 738 mijë e 830, ndërkohë që në gjendje kritike janë 55 mijë e 265.

Kjo është gjendja në shifra, ndërkohë që po bëhen përpjekje për të rihapur ekonominë e bllokuar nga Koronavirusi.

KËSHILLTARËT BASHKIAKË (EDHE MARK GJONAJ) KËRKOJNË MBYLLJEN E PËRKOHSHME TË METROS

Guvernatori Cuomo duhet të jape urdhër për mbylljen e përkohësisht të metros në NYC për të ndihmuar ndalimin e përhapjes së Koronavirusit. Kështu mendojnë katër këshilltarë bashkiakë që i kanë kanë shkruar letër guvernatorit Cuomo.

“Ne besojmë se duhet të merren masa drastike për të ndaluar përhapjen e COVID-19 në sistemin tonë të tranzitit,”, janë shprehur ligjvënësit – Robert Holden, Eric Ulrich, Mark Gonaj dhe Peter Koo, në letrën dërguar guvernatorit të shtetit Andrew Cuomo.

Punonjësit e MTA ende nuk kanë veshje mbrojtëse, trenat janë të mbushur plot me pasagjerë për shkak të shërbimit të reduktuar dhe personave të pastrehë.

Këshilltarët evidentojnë kushtet e vështira për punonjësit e MTA, të cilët punojnë pa mjete mbrojtëse të sigurta. Atyre u jepet një maskë dhe një palë doreza për një javë të tërë, thonë ata në letër.

Si rezultat i këtyre kushteve punonjësit e MTA po vdesin në një ritëm më të shpejtë se çdo punëtor tjetër i vijës së parë”, tërheqin vëmendjen këshilltarët.

COVID-19 u ka marrë jetën 68 punonjësve deri më sot, citohet të ketë thënë të shtunën zëdhënësja Abbey Collins. Gjithsej 2.496 punëtorë janë testuar pozitivë, dhe 4,365 aktualisht janë në karantinë për shkak të sëmundjes ose ekspozimit. 4127 të tjerë janë rikthyer në punë pas karantinës.

Problem më vehte është qëndrimi dhe strehimi i të pastrehëve në mjediset e stacioneve të metros, në vagonët e trenave dhe autobuzë.

Duke marrë parasysh të gjitha këto të dhëna, këshillatrët bashkiakë, besojnë se sistemi i tranzitit i qytetit të Nju Jorkut është një kontribues kryesor në përhapjen e COVID-19, dhe ata rekomandojmë një mbyllje të përkohshme të sistemit për të paktën një javë për pastrim të thellë të metros, trenave, autobusëve dhe stacioneve.

Këshilltarët propozojnë që qyteti dhe shteti i New Yorkut, mund të aktivizojnë shërbime me qira të taksive për punëtorët thelbsorë, duke u krijuar kompanive lehtësira për parkime.

Kur shërbimi të rifillojë, thonë këshilltarët, sistemi duhet të mbyllet çdo ditë nga mesnata në 5 në mëngjes për pastrim të thellë, punëtorët duhet të pajisen me mjete mbrojtëse.

Këshilltarët e mbyllin letrën me mendimin se është koha për një qasje të drejtpërdrejtë dhe të koordinuar nga qyteti dhe shteti për t’i dhënë fund krizës së pandemisë.

TRAGJEDIA NË SHTËPITË E PLEQËVE

Media amerikane po shkruan e po flet dhimbshëm për tragjedinë në shtëpitë e pleqëve. Agjensia Associated Press ishte e para që dha alarmin përmes një raporti të detajuar, që tregonte se virsui i padukshëm po shkatërron shtëpitë e pleqëve. Sipas një studimi shtetëror informoi abc News janë identifikuar shtëpitë e pleqëve në New York, ku shumë pacientë kanë vdekur nga virusi.

Edhe në daljen e përditshme në Albany Guvernatori Cuomo dha detaje dhe me dhimbje e përcolli gjendjen tragjike, që Koronavirusi ka shkaktuar në shtëpitë e pleqëve.

Njëra nga këto shtëpi, ku janë zbuluar 55 pacientë të vdekur ndodhet në Brooklyn dhe katër të tjera me më shumë se nga 40 të vdekur në bashkitë e tjera, njëra prej të cilave në Bronx.

Me shumë dhimbje e ka përcjellë gjendjen Dr. Roy Goldberg, drejtor mjekësor në Kings Harbour Multicare Center, një shtëpi pleqësh me 720 shtretër në Bronx, ku u raportuan 45 viktima. Kohë surrealiste i ka cilësuar doktori këto kohë që po marrin jetë njerëzish.

Raporti i publikuar, që paraqet gjendjen në 68 shtëpi pleqësh, është konsideruar jo i plotë nga media. Kjo ishte hera e parë që shteti dha një informacion të detajuar në lidhje me shtëpitë e pleqëve. Sipas raportit të Associated Press, viktimat në to përbëjnë gati 40% të vdekjeve kombëtare në 9,912 objekte të tilla. Në krye të listës me 55 vdekje renditet Cobble Hill, një shtëpi pleqësh me 300 shtretër në Brooklyn.

Tabloja u përshkrua me nota të trishta: Katër ambulanca mbërritën brenda një ore në shtëpinë e pleqëve të Premten. Policia u shfaq aty për të ndihmuar në heqjen e kufomave.

Shtëpia e Cobble Hill sqaroi përmes një deklarate se vdekjet e raportuara ishin të bazuara në mundësinë se COVID-19 mund të jetë faktor.

“Megjithëse kemi pasur një rritje të vdekjeve gjatë javëve të fundit, ne nuk kemi qenë në gjendje të konfirmojmë se vdekjet lidhen me COVID-19,” thuhej në deklaratë.

Lëshimi i sondazhit erdhi një ditë pasi administrata e guvernatorit të New York-ut Andrew Cuomo ndryshoi kursin dhe premtoi transparence.

Cuomo nuk u përgjigj drejtpërdrejt kur u pyet në konferencën e përditshme të koronavirusit pse administrata e tij nuk e kishte paralajmëruar publikun më herët.

“Ne kemi folur për shtëpitë e pleqve çdo ditë, për 30 ditët e fundit,” tha Cuomo. “Ne kemi thënë 157 herë më të prekur nga popullata janë të moshuarit, vendet më të rrezikuara janë shtëpitë e pleqve. … Unë mendoj se kemi biseduar për të gjithë së bashku. “

Connecticut lëshoi një listë të ngjashme me New Yorkun të enjten. Në Connecticut kanë vdekur 375 banorët të shtëpive të pleqve, nga 1086 vdekje që ka ky shtet prej COVID-19.

Zyrtarët në disa nga shtëpitë e pleqve kanë thënë se ata po bënin më të mirën e mundshme. Ata e spjeguan numrin e madh të vdekjeve me brishtësinë e pacientëve të tyre.

Nuk është hera e përa që flitet për vdekjet në masë në shtepitë e pleqëve. Në një shtëpi të tillë në Uashington humbën jetën 43 banorë në fillim të përhapjes së virusit në SHBA.

Italia, e cila u godit para SH.B.A.-së nga COVID-19, ka informua për krizën e thellë në shtëpitë e pleqëve, ku mijëra pacienët kanë humbur jetën nga virusi. Po ashtu në Spanjë, ku ka filluar dhe proces hetimor nga prokuroria vendase.