dalip greca – Page 64 – Dielli

Flet për “Diellin” Rudina Hajdari, e bija e Heroit,që “braktisi’ Amerikën për Shqipërinë

June 7, 2017 by dgreca

RUDINA HAJDARI: BABAI IM GODITI MURIN DIKTATORIAL TË KOMUNIZMIT, UNË DHE BREZI IM DO TË NXJERRIM SHQIPËRINË NGA TRANZICIONI/

Intervistë me zonjën Rudina Hajdari, e bija e heroit të Demokracisë Azem Hajdari, Kandidate për deputete e Parisë Demokratike në Tiranë dhënë Kryeredaktorit të Gazetës”Dielli” në SHBA, Dalip Greca./

Rudina Hajdari, “braktisi’ Amerikën për ti shërbyer Shqipërisë/

Çfarë do t’i japë Kuvendit, Rudina Hajdari, e bija e themeluesit të PD-së, parlamentarit më aktiv, heroit të demokracisë, Azem Hajdari? Është kjo një nga pyetjet që i drejtuam Rudina Hajdarit, kandidate për deputete e Partisë Demokratike të Shqipërisë në zgjedhjet e 25 Qershorit. Përgjigja e saj është e sigurtë:”Do të luftojë fort duke nxjerrë në pah të gjithë cilësitë më të mira të babait, por në mënyrën time”.

Rudina synon që të jetë një politikane e ndershme dhe me këtë nënkupton besimin se: të gjithë jemi të lirë, lindim të barabartë dhe se të gjithë duhet të jemi në gjendje të përparojmë bazuar në aftësitë dhe pasionet tona, dhe se do të flasë hapur dhe do mbrojë të vërtetën, edhe nëse ajo bie ndesh me më të fuqishmit e shoqërisë. Moto e saj është: Interesat e Shqipërisë para çdo interesi tjetër!

Rudina i ka të gjitha kualifikimet për të qenë një përfaqësuese e denjë e qytetarëve shqiptarë në Parlament: Ka kryer studimet universitare Bachelor në Shkencat Politike në SHBA, ka vijuar studimet e nivelit Master Shkencor në Gjeopolitikë, Territor dhe Siguri në Londër për të përfunduar me studimet e nivelit Master Shkencor në Të Drejtat e Njeriut po në SHBA. Vec kësaj ajo ka trashëgiminë dhe vizionin për të ardhmen e Shqipërisë Evropiane. Le ta ndjekim intervistën:

Gazeta Dielli:-Si ndihet Rudina në garën elektorale si kandidate për deputete e PD-së?

–Rudina Hajdari:-Ndjesia e parë nuk është thjesht kënaqësi personale. Ajo është përkatësia ime reale, realizimi i një rruge të gjatë, jo vetëm e imja, por i një rrugëtimi krenar pasi i përket forcës politike së cilës i përkas çdo orë e sekondë të jetës sime.

Nuk ka rëndësi fakti i renditjes time në listën e Tiranës dhe nuk e bën këtë betejë më të lehtë. Ajo që e bën garën e fortë, konkurrimin të vërtetë dhe real, ajo që i jep përmasën e natyrshme kësaj fushate, më të veçantës nga të gjitha të tjerat, është fakti i ndërthurjes së natyrshme të trashëgimisë, forcës, vërtetësisë së Partisë Demokratike dhe vizionit të së ardhmes, vizionit të Republikës së Re. Jam e sigurt që me vullnetin e duhur do hyjmë në një etapë të re për Shqipërinë që i ofron shqiptarëve një politikë frytdhënëse dhe një demokraci të drejtpërdrejtë dhe gjithëpërfshirëse.

–Dielli:– A ishte një surprizë për ju përfshirja në listën e kryetarit të Partisë Demokratike,z. Lulzim Basha?

–Rudina Hajdari:-Personalisht, i jam mirënjohëse Kryetarit te Partisë Demokratike z. Lulzim Basha që vlerësoi prezencën time në ekipin e tij. Për mua është një privilegj dhe një përgjegjësi e madhe të garojë si nën siglën e PD-së, të një partie që përfaqëson frymën e parë të demokracisë dhe vlerat euro-atlantike, si një prirje e natyrshme e shqiptarëve.

–Dielli:– Çfarë do t’i japë Kuvendit, Rudina, e bija e themeluesit të PD-së, parlamentarit më aktiv, heroit të demokracisë, Azem Hajdari?

–Rudina Hajdari:-Dua të nxjerr në pah të gjithë cilësitë më të mira të babait tim, por në mënyrën time. Këtu, më lejoni të veçoj disa. Dua të jem një politikane e ndershme dhe me këtë nënkuptoj besimin se të gjithë jemi të lirë, lindim të barabartë dhe se të gjithë duhet të jemi në gjendje të përparojmë bazuar në aftësitë dhe pasionet tona. Unë dua të flas hapur dhe do mbroj të vërtetën, edhe nëse kjo bien ndesh me më të fuqishmit në shoqëri. Gjithashtu, dua të vendos interesat e Shqipërisë para çdo interesi tjetër.

–Dielli:- Besoni që brezi juaj me të vërtetë do të integrojë Shqipërinë në BE, Çfarë nuk është arritur në këtë tranzicion të zgjatur?

–Rudina Hajdari:-Në këto 26 vite tranzicion Shqipëria ka pasur përparime të mëdha. Sot, Shqipëria ka një sistem politik të gjallë, është anëtare e NATO-s dhe është në rrugën e integrimit në Bashkimin Europian. Shqiptarët udhëtojnë lirisht në Europë dhe kemi në krah aleatë të fortë perëndimorë si Shtetet e Bashkuara të Amerikës dhe vende të tjera të Europës. Por s’duhet harruar që Shqipëria ka përjetuar një tirani komuniste të pashembullt në Europë dhe se tranzicioni është me i ndërlikuar sesa mund ta kemi perceptuar. Deri tani, ka qenë qeverisja e djathtë ajo që ka dhënë kontributin më të madh në plotësimin e kushteve të Bashkimit Europian, në kuadër të çeljes së negociatave të anëtarësimit. Kemi akoma shumë punë për të bërë përsa i përket zbatimit të ligjit të dekriminalizimit në Parlament dhe reformës në drejtësi, por jam e lumtur që këto hapa po ndërmerren në mënyrën e duhur, duke përfshirë kontributin e padiskutueshëm të Opozitës. Krizat politike dhe institucionet e dobëta e kanë lodhur procesin e anëtarësimit. Gjithsesi mendoj se përfshirja e të rinjve në politikë është një shenjë pozitive për sa i përket përfundimit të tranzicionit në vend dhe integrimit të Shqipërisë në strukturat Euro-Atlantike.

–Dielli:– Sipas mendimit tuaj, duke qenë se keni jetuar për një kohë të gjatë në SHBA, çfarë duhet të bëhet ndryshe në Shqipëri?

–Rudina Hajdari:-Eksperienca ime në Amerikë ka qenë e vlefshme për të fituar një kulturë perëndimore, por kjo s’do të thotë që vendi im nuk ka qenë pjesë e kultivimit të karakterit tim. Mendoj se demokracia e drejtpërdrejtë është një nga gjërat që akoma i mungon Shqipërisë si dhe gjithëpërfshirja e te gjithë faktorëve shoqërorë në vendimmarrjet publike. Gjithashtu mendoj se sipërmarrja private duhet të operojë në mënyrë më të pavarur dhe bizneset duhet të jenë më pak të ndikuara nga rrethanat politike në vend.

–Dielli:- Ju keni përfunduar studimet universitare Bachelor në Shkencat Politike në SHBA. Më tej keni vijuar studimet e nivelit Master Shkencor në Gjeopolitikë, Territor dhe Siguri në Londër për të përfunduar me studimet e nivelit Master Shkencor në Të Drejtat e Njeriut po në SHBA? Si e shikoni politikën shqiptare, nga këndvështrimi juaj me këtë background të pasur arsimor?

–Rudina Hajdari:-Partneriteti strategjik i Shqipërisë me aleatët euroatlantikë, veçanërisht me SHBA-në, është shpresa dhe rruga e vetme e së ardhmes, e cila jo vetëm shëron çdo plagë të së shkuarës, por e bën të qartë dhe të vërtetë vizionin e saj për këtë ardhmëri. Shqipëria dhe faktori shqiptar në Ballkan, pavarësisht rrethanave, sfidave dhe përpjekjeve të të gjithë atyre që nuk e duan të ardhmen e këtij kombi, kanë një aleat të natyrshëm të ngulitur thellë në ndërgjegjen e këtij kombi, vokacionin perëndimor. Të gjitha përpjekjet e politikës shqiptare duhet të jenë në koherencë të plotë me këtë vokacion. Çdo lloj deviacioni është në dëm të kombit shqiptar dhe të ardhmes së tij.

–Dielli:– A mendoni se Shqipëria mund të dalë nga gjendja e rënduar e kultivimit, trafikut të drogës dhe korrupsionit të nivelit të lartë?

–Rudina Hajdari:-Absolutisht po. E gjithë përpjekja e Partisë Demokratike, jo vetëm në 90 ditët e çadrës, por dhe në më tej ka qenë ndërgjegjësimi i këtij fenomeni të shëmtuar dhe ndalimi sa më parë i trafikut të drogës dhe kultivimit të saj në vend. Lufta e të gjithë institucioneve shqiptare të papërfshira në këtë trafik, përpjekjet e mijëra punonjësve të Policisë, të paimplikuar, të njerëzve të ndershëm, të shërbimeve të inteligjencës, në bashkëpunim me aleatët perëndimorë, sigurisht, që e bëjnë të mundur.

Është e dhimbshme që ne, një shtet me bukuritë e mrekullitë e natyrës, vendi me moshën më të re në Europë, të etiketohemi si Kolombi e Europës dhe qindra mijëra të rinj të braktisin këtë vend për të kërkuar të ardhmen diku tjetër.

–Dielli:-A e shihni përfshirjen tuaj në politikë si vazhdim të punës së atit tuaj, ose më shumë se kaq?

–Rudina Hajdari:-Im atë pati guximin, karakterin dhe inteligjencën të ngrihet kundër diktaturës. Përplasjet e tij si luftëtar i lirisë, pluralizmit dhe demokracisë i dhanë atij një rol historik. Në qoftë se im atë goditi murin diktatorial të komunizmit dhe pati rolin e tij në ardhjen e lirisë, unë kam synimin dhe vizionin të kontribuoj në mbrojtjen dhe avancimin e mëtejshëm të këtyre të drejtave.

–Dielli:– Ndërkohë, ju jeni larguar nga SHBA! A mendoni se do të pendoheni për këtë vendim që keni marrë?

–Rudina Hajdari:-S’do pendohem kurrë për këtë vendim që kam marrë. Amerika është aty dhe nuk pret për mua, kurse Shqipëria është vendi im dhe pret të rinj e të reja që gjallërojnë jetën politike, ekonomike dhe kulturore me ide inovative, bazuar në eksperiencën më të mirë Perëndimore. Për mua, largimi nga Shqipëria krahasohet me atë ndjesinë kur nëna të jep lirinë të ikësh në momentin që ti kërkon pak pavarësi, për t’u kthyer sërish tek ajo në momentin që ka nevojë për ty, për mbrojtjen tënde.

–Dielli:-Çfarë mesazhi do t’u jepnit mijëra të rinjve shqiptarë që janë arsimuar në SHBA apo Europë?

–Rudina Hajdari:-Demokracitë e zhvilluara nuk janë të përsosura. Fakti që Shqipëria është akoma duke ndryshuar, u ofron më shumë hapësirë të gjithëve për t’u bërë pjesë e këtij ndryshimi. Besoj se kjo do të ishte më e çmuar se sa një gjurmë e vogël në një vend të zhvilluar. Këtu të rinjtë dhe të rejat kanë mundësinë të japin kontributin e tyre dhe të kenë një ndikim të drejtpërdrejtë në zhvillimin e Shqipërisë. Ne nuk duhet të shohim Shqipërinë si inferiore ndaj shteteve që janë më të zhvilluara, sepse kemi shumë arsye për t’u krenuar me vendin tonë. Sa më shpejt të rinjtë të na bashkohen aq më shpejt do t’i arrijmë objektivat për një Shqipëri me një demokraci dhe ekonomi të zhvilluar, sikurse e meriton vendi ynë i mrekullueshëm.

–Dielli:-Rudina, faleminderit për Intervistën dhe urime në zgjedhje!

Rudina: Faleminderit Diellit!

REGAN: SHQIPTARET, KRYELARTE PER KONTRIBUTET QE I KANE DHENE AMERIKES

June 5, 2017 by dgreca

PRESIDENTI REGAN-VATRES:SHQIPTARET MUND TE MBURREN DHE TE NDJEHEN KRYELARTE PER KONTRIBUTET QE I KANE DHENE AMERIKES/

3regan 1 Regan 2 regan

KUR PRESIDENTI REGAN URONTE KUVENDIN E VATRES TE VITIT 1982/

Ishte në traditën e Vatrës, që kur zhvillonte kuvendet e saj, u dërgonte ftesa dhe presidentëve të SHBA. Natyrisht që presidentët ishin të zënë me axhendat e tyre, por i rëndësishëm është fakti se ata gjenin kohë ta respektonin Vatrën, duke i dërguar përshëndetje dhe urime.

Një nga vatranët e vjetër,prej më shumë se gjysëm shekulli, ish nënKryetar i Vatrës, z. Tonin Mirakaj, më dërgoi tekstin në anglisht të përshëndetjes të Presidentit, republikanit Ronald Regan, drejtuar Kuvendit të Vatrës të vitit 1982. Letra mban datën 2 shtator 1982 dhe duke shfletuar koleksionin e Diellit, gjeta të botuar në numrin 1 tetorit 1982 përshëndetjen e presidentit. Kryetar i Vatrës për atë vit ishte Dr. Andrew D.Elia, i cili u rizgjodh sërish në atë kuvend.

Kuvendi i atij viti përkoi edhe me seminarin që organizoi Vatra me rastin e 100 vjetorit të Lindjes së themeluesit të saj Fan S. Noli, me c’rast ish editori i Diellit, dr. dward Lico, botoi librin”Flamurtari i Kombit”-1882-1982-Fan S. Noli.

Në telegramin përshëndetës të Presidentit Regan shkruhej:” Jam i lumtur t’i dërgoj përshëndetjet më të nxehta Kuvendit vjetor të Federatës Panshqiptare të Amerikës-Vatra.

Ky Kuvend më jep rastin e vecantë të vë në dukje përpjekjet që bën Organizata Juaj për ruajtjen e thesarit kulturor të stërgjyshërve tuaj Shqiptarë.

Shqiptaro-Amerikanët mund të mburren dhe të ndjehen kryelartë për kontributet që i kanë dhënë Amerikës. Është e vërtetë gjithashtu se ju jeni një pjesë e pandame e kësaj shoqërie të shumëllojtë, e cila është forca më e madhe e Amerikës.

Me rastin e 100 vjetorit të Lindjes së Archibishop Theofan Nolit, unë bashkohem me Ju për të nderuar kujtimin e Tij.

Ju dërgoj urimet e mia më të mira për një Kuvend të frytshëm, për një mbledhje të gëzuar dhe për cdo sukses të ardhshëm.

Ronald Regan

Santa Barbara, CA- White House, Sept, 2nd 1982

KRYETARI I VATRES: VATRANET DREJT KUVENDIT TE 10 QERSHORIT

June 3, 2017 by dgreca

8-5 Jacksonville

NË PRAG TË KUVENDIT, KRYETARI I VATRËS VIZITOI DEGËT NË FLORIDA, HARTFORD, MICHIGAN DHE TORONTO/

9-5Tampa 8-4 Ago agaj 8-6 Jacksonville 9-4 dega Orlando 9-6 dega Hartford 9-1 detroit ok

Gjatë muajve prill dhe maj 2017 Kryetari i Vatrës, dr. Gjon Buçaj, i shoqëruar nga arkëtari, anëtar i Kryesisë Marjan Cubi, vizituan degët e Vatrës në Florida, duke organizuar takime në Tumpa- Cleartwater, Jacksonville dhe Orlando, më pas vizituan degën në Hartford, CT, duke vazhduar me degët në Michigan dhe në Toronto, Kanada.Në këto vizita ishin edhe zonjat Nikoleta Buçaj dhe Dila Cubi. Në raportin që kryetari dha në Kryesinë e Vatrës me falenderoi drejtuesit dhe bashkëpunëtorët e tyre në këto degë për masat organizative dhe për bujarinë e treguar.Duke qenë se këto vizita u bënë në prag të Kuvendit vjetor të Vatrës, ne i kërkuam dr. Buçajt, që të jepte një intervistë informuse për Kuvendin dhe për takimet me degët.

8-2 shkolla Tampa 8-3 Abetare 8-7 gratee jackson 9-2 Kujtimi 9-3 Gani Vila 9-7 Toronto Dielli:- Dr. Buçaj, po afron data 10 qershor, datë kur do të organizohet Kuvendi i Vatrës. Si po shkojnë përgatitjet?

Dr. Buçaj – Përgatitjet po shkojnë mirë, por ma me ngadalë se sa pritej dhe se sa do të duhej.

Dielli:- Çfarë presin vatranët nga ky Kuvend?
Dr. Buçaj – Antarët kryesisht presin se kush do të zgjidhet në udhëheqësinë e re dhe cili do të jetë programi i Vatrës për të ardhmen.

Dielli:- Priten ndryshime?

Dr. Buçaj – Pikërisht priten ndryshime në organet drejtuese, pse ky asht Kuvend Zgjedhor dhe kjo udhëheqësi e ka krye mandatin e vet.

Dielli:- Në prag të Kuvendit, ju keni marrë një turn nëpër degë, me çfarë qëllimi?
Dr. Buçaj – Si dihet, Kuvendi i vitit të kaluem u shty e mandej u anulue për mungesë të shumicës së degëvet për të përgatitë me kohë listat e antarëve të rregulltë dhe të delegatëvet që do të merrnin pjesë në Kuvend. Kjo ka ndodhë deri dikund për plogështinë e udhëheqësisë së degëvet, por edhe për shkak se tek antarët kishte ra entuzjazmi i fillimit kur degët janë themelue. Ky asht nji fenomen që vërehet gjithëkund, prandej asht nevoja që herëmbashere të kontaktohen Këshillat e Degëvet edhe antarët direkt, për të frymëzue riaktivizimin. Si thotë fjala popullore, zjarmi duhet ngacmue për t’a mbajtë të ndezun.
Dielli:- Çfarë është e përbashkëta që konstatuat gjatë takimeve që organizuat në këto degë?
Dr. Bucaj – Pikësëpari bujaria karakteristike e shqiptarëvet dhe mikpritja e përzemërt si nga ana e kryetarëve me bashkëpunëtorë, ashtu edhe nga antarët, të gjithë i gëzoheshin takimit me ne dhe e çmonin vizitën.
Nji e përbashkët tjetër vërehet edhe nevoja për të shkëmbye mendime dhe, sidomos, për të sqarue qëndrimet e Vatrës që shpesh interpretohen në mënyrë të gabueme për mungesë informimi. Njerëzit kanë zakon të ndikohen nga interpretimet gojore ma shumë se sa nga shtypi i Vatrës, të cilin pothuej se nuk e lexon kush përveç vatranëve, madje edhe shumë nga ata nuk e lexojnë me vemendjen e duhun. Interesim dhe shqetësimi për gjendjen politike në vendlindje asht nji tjetër e përbashkët me randësi.
Dielli:- Nëse do të ndaleshim tek dega në Tampa Bay-Clearwater, çfarë do të veçonit nga veprimtaria e saj?
Dr. Buçaj – Në Tampa asht nji degë që funksionon mirë, por edhe atje, dukunija e ramjes së entuzjazmit ka pasë si rjedhim pakësimin e numrit fillestar të antarëvet, si gati në të gjitha degët e tjera, por ai numër që i ka ndejtë besnik Vatrës, asht solid dhe udhëhiqet nga nji grup që janë të përkushtuem dhe kanë harmoni në mes tyne. Kremtimi i Ditës së Flamurit dhe, sidomos, funksionimi i shkollës shqipe, janë dy suksese vërtetë për t’u lavdërue. Ajo asht nji ndër degët e rralla që kanë qenë gati për Kuvend edhe në vitin e kaluem. Në Tampa u shtrue nji darkë me muzikë e valle, për të festue 105 vjetorin e themelimit të Vatrës. Aty patëm kënaqsinë e veçantë se erdhi nji kolonel i ushtrisë amerikan, shqiptar, baba i të cilit ka qenë shokë i imi i fëminisë.
Dielli:- Po dega në Jecksonville, e cila ishte dega e parë që u krijua pas 100 vjetorit të Vatrës në shtetin e Floridës-Çfarë ka mbetur nga entuziazmi i fillimit?
Dr. Buçaj – Edhe Dega e Jacksonville-it ka pësue nga ramja e entuziazmit të parë, por edhe atje asht nji grup i mirë bashkatdhetarësh të cilët i kanë qëndrue besnikë Vatrës dhe udhëheqsave dinamikë të Degës. Në Jacksonville asht vrejtë rritja e numrit të antarëvet, sidomos të rinj, në pragun e këtij Kuvendi, për të cilët le të shpresojmë se në Kuvendin e ardhshëm zgjedhor do të jenë të rregullt për të rritë edhe numrin e delegatëve. Dega e Jacksonville-it asht gjithënji aktive në komunitet dhe, gjithashtu, ka shkollën shqipe me numrin e nxanësave gjithënji në rritje.
Edhe në Jacksonville, si në Tampa, u theksue 105 vjetori i Vatrës me darkë dhe kremtim me muzikë e valle. Atje ndodhi nji kangëtare nga Shqipnia, e cila argëtoi falas të pranishmit.

Dielli:- Ndërkohë dega e Orlandos duket se po jep shenja rigjallërimi? Ju bëtë një takim dhe me këtë degë, çfarë konstatuat?

Dr. Buçaj – Edhe me Degën e Orlando’s takimi ishte i përzemërt, gjatë drekës në restorantin e nji qifti shqiptar, në udhtim prej Tampa’s në Jacksonville. Aty u njoftuem me pronaren bujare dhe me disa vatranë që i takonim për herë të parë.
Edhe atje historia e entuzjazmit ishte e ngjajshme me vendet e tjera. Përveç asaj, Kryetarja e Degës, Florisiana dhe bashkshorti saj Ermal Ahmeti na treguan se dy herë kishin mbledhë shumë bashkatdhetarë për përvjetorin e pavarësisë, por financiarisht kremtimi nuk kishte përfundue me sukses. Florisana është shumë e intersuar për mbarvajtjen e deges dhe sic na tha po perpiqej me gjetë mënyra afrimi për shqiptarët e Orlando’s dhe na u lut që, kush ka miq e të njohun në atë zonë, t’i porosisin që t’i afrohen degës së Vatrës.

Dielli:- Organizuat edhe një takim me degën e Vatrës në Hartford, si shkoi takimi dhe çfarë e karakterizon këtë degë?
Dr. Buçaj – Dega në Hartford ka përballue dy probleme. Së pari, nji grup u nda për mungesë të bshkëpunimit të kryetarit të parë me bashkëpuntorët e vet dhe, së dyti, kryesia e re e Degës ka bashkëpunue me nji grup aktivistash për formimin e nji shoqate në emën të komunitetit, tue marrë pjesë në të dy formacionet. Ma vonë asht krijue njifarë distance për shkak të inconveniences me marrë pjesë si antarë në të dya. Megjithatë edhe në Hartford asht nji grup i përkushtuem për Vatrën dhe e sigurojnë funksionimin e saj, me moton “ma mirë pak e sakt se shum e për lum”.
Dielli:- Mesazhi juaj para Kuvendit të Vatrës?

Dr. Buçaj – Të shkojmë në Kuvend me frymzimin e idealizmit atdhedashës, të bisedojmë vllaznisht dhe të hartojmë programe pune për të ardhmen. Të zgjedhim përsona të përshtatshëm, të cilët do ti përkrahim që bashkarisht të realizojmë premtimet e Kuvendit.

Dielli: Ju shkuat edhe në Michigan, me cfarë mbresash u larguat që andej?

Dr. Gjon Buçaj:- Gjendja në Michigan është e mirë. Ata e kanë ruajtë numrin prej më shumë se 70 anëtarë. Janë të rergullt edhe me listat e anëtarësisë dhe pagesat. U ndjemë mirë se me ne ishte edhe vatrani i kahershëm dhe anëtar i Këshillit të Vatrës z. Kujtim Qafa. Biseduam lirshëm, madje shfrytëzuam edhe ftesën e z. Gani Vila për të dhënë intervistë në Televizionin e tij e për të sq1aruar opinion rreth Vatrës dhe qëndrimeve të saj.

Dielli: Po dega e Vatrës në Toronte si e kishet gjendjen?

Dr. Buçaj: Edhe në Toronto, si kudo e duan Vatrën.Takimi u organizua në shtëpinë bujare të zv/kryetarit të Vatrës, z. Qamil Saliu. Ne patëm një takim atje me kryesinë e Vatrës. Kryetari i degës z. Toni Sufaj bëri një raport për veprimtaritë e degës, ndërsa unë fola për Kuvendin dhe qëndrimet e Vatrës. Duke qenë se është përgatitë një raport me shkrim për këtë takim, që Dielli besoj se do ta botojë numrine ardhshëm, nuk po shtoj gjë tjetër.

Dielli: Faleminderit për intervistën!

Dr. Gjon: Bucaj: Unë ju falenderoj!

(Intevistoi:Dalip Greca)

YLBER DAUTI, NË ELITËN E AVOKATËVE AMERIKANË

June 3, 2017 by dgreca

* AVOKATI SHQIPTAR ËSHTË PËRZGJEDHUR NDËR 100 AVOKATËT MË TË SUKSESSHËM NË SHBA/

* DY NGA FITORET MË TË FUNDIT TË BETEJËS LIGJORE:PËRBALLJA ME QEVERINË AMERIKANE …DHE…SHPËTOI BIZNESMENIN SHQIPTAR NGA HUMBJA E 30 MILIONË DOLLARËVE…/

* AVOKATI DAUTI, I PREFERUAR NGA MEDIAT AMERIKANE, PORTALET PËR OPINIONE, PARASHIKIME, INTERVISTA, RRETH ÇËSHTJEVE TË BUJSHME, MADJE DHE CESHTJEVE”TRUMP”….POR EDHE SI LIGJËRUES NË UNIVERSITETET TE NDRYSHME BOTËRORE PËR TË DHËNË LEKSIONE…

NGA DALIP GRECA/

Avokati shqiptar Ylber Dauti, vazhdon të jetë një model i veçantë për aspiratat e të rinjëve nga e gjithë Bota, që vijnë në Amerikë plot ëndrra. Në 14 vite karrierë ai është ngjitur lart si yll, që shkëlqen, duke u radhitur në elitën e avokatëve amerikanë. Ai është i pari avokat shqiptar në Amerikë që është anëtar i përjetshëm i MULTI- MILLION DOLLAR ADVOCATES FORUM”. Këtë vit avokati Dauti është përzgjedhur në “TOP 100 TRIAL LAWYERS IN AMERICA”. Zyra e tij ligjjore ka regjistruar më shumë se 10 çështje milionëshe të fituara, – më e larta 8,2 Milionë dollarë, e më e ulta 1,2 milionë dollarë….

2017, I FTUAR NGA UNIVERSITET NË HOLLANDË, JAPONI, SHBA dhe KOLUMBI

Nuk është aq e lehtë që ta gjesh një moment të lirë avokatin Ylber Dauti, qoftë edhe për ta intervistuar. Krahas ngarkesës me çështjet gjyqësore që ndjek, ai është i angazhuar edhe si leksiondhënës nëpër universitete të Europës, Azisë dhe Amerikës, dhe jo rrallë, i zënë me median, që kërkojnë opinione e intervista prej tij. Pyetjet për këtë shkrim”u gatuan” që në prill, por avokati ishte larg që këndej, dhe përgjigjet u vonuan pak. Ai ishte i ftuar nga Universiteti i Tilburgut, per te tretin vit radhazi, për të dhënë leksione për studentët e Fakultetit të Drejtësisë, Dega Master në Ligjet Ndërkombëtare të Biznesit. Lënda, ku i kërkohet kontribut avokati titullohet “Negociata Ligjore” (Legal Negotiations). Fokusi i leksioneve që avokat Dauti u përcjell studentëve përqëndrohet kryesisht në negociatat ndërkombëtare në përgjithësi dhe ato të biznesit në veçanti.

Pas kthimit, ai tregon se ishte një përvojë intersante; grupi i studentëve ishte i larmishëm dhe shumë të intersuar për të çështjet që referoheshin. 100 studentët, të cilëve u përcolli ligjërata, vinin nga 50 vende të ndryshme të Botës dhe sillni kultura të larmishme.

Avokati ndjehet mirë nga kontakti me grupe te tillë divergjente, pasi negociatat ndërkombëtare kanë të bëjnë jo vetëm me aspektet ligjore dhe tregtare por edhe me personalitetet, zakonet dhe traditat kulturore të atyre që negociojnë…dhe duke qenë se stundentët vijnë nga shumë vende të ndryshme me zakone, tradita dhe kultura të ndryshme- kjo i bën diskutimet dhe debatet në klasë shumë më interesante.

Muajin që vjen (Qeshor 2017), avokati është i ftuar që të japë leksione për 10 ditë në Kyushu University në Japoni. Është viti i dytë radhazi që ftohet për të dhënë leksione nga ky Universitet. Fokusi i leksioneve që do të përcjell në këtë universitet janë Negociatat dhe Gjyqet Ndërkombëtare. Edhe ky, tregon avokati është një grup i larmishëm studentësh, mes të cilëve ka qenë dhe herë tjetër. Studentët janë kryesisht Japonezë, por ka ndër ta pothuajse nga të gjitha shtetet aziatike, madje edhe nga disa vende arabe e afrikane.

Ndërsa në fund të muajit Qershor, ai është i ftuar për të dhënë një ligjëratë para një grupi studentësh nga mbi 100 vende të botës, në Lehigh University, këtu në Amerikë dhe në muajin Korrik është i ftuar për të dhënë leksione në Bogota, Kolumbi në Universidad Externado de Colombia.

PËRBALLË QEVERISË AMERIKANE

I propozoj avokatit: Le të kthehemi tek Zyra juaj juridike”DAUTI LAË FIRM,P.C”, që ndodhet në një nga zonat më të lakmuara të Manhattanit, në Wall Street(45 Broadway). Jemi mësuar që të përcjellim rekorde të kësaj zyre juridike, ku klientët tuaj kanë siguruar shuma milionëshe. Kemi ndonjë rekord të ri apo ndonjë çështje interesante për ta ndarë me lexuesit tanë?

Përgjigja e avokatit vonohet pak:- Asnjëherë nuk më ka pëlqyer të diskutoj shifra, por fatkeqësisht në profesionin tim suksesi shpesh matet me shifra dhe kjo nuk është e drejtë por unë nuk do futem në një analizë filozofike rreth kësaj dukurie. Përsa u përket shifrave do të veçoja 3 çështje që janë mbyllur gjatë vitit të fundit për shuma milioneshe/ disamilionëshe. Njëra nga këto çështje ishte disi e veçante pasi padia ishte kundër qeverisë Amerikane dhe unë përfaqësoja një klient shqiptar. Ishte një betejë e gjatë dhe e vështirë ligjore. Por në fund arrita që ta kënaq klientin tim shqiptar. Shuma përfundimtare e dëmshpërblimit që qeveria Amerikane ra dakord që të paguaj në prag të Gjyqit, ishte shuma e dytë më e lartë që ata kanë paguar ndonjëherë në shtetin e Nju-Jork-ut për një çështje gjyqësore të rregulluar nga Federal Tort Claims Act (Ligji për Paditë e Dëmshpërblimit Civil kundra Qeverisë Amerikane).

Për ta bërë më të kuptushme për lexuesin këtë çështje ligjore, që tingëllon disi ndryshe, i kërkova avokatit, që të sillte më shumë spjegime, detaje, si funksionojnë këto çështje dhe sa të vështira janë këto përballje ligjore?

Avokati spjegoi se këto çështje janë disi unike pasi gjyqi bëhet me një gjykatës dhe jo me Juri. Veç kësaj duhet të pëballesh me Departamentin e Drejtësisë së Amerikës dhe jo me një zyrë avokatie. Në çeshtjen në diskutim, gjërat u komplikuan edhe më tepër pasi në prag të gjyqit, u arrit marrëvëshja në një kohë jo të zakontë. Marrëveshja u arrit me Administratën e Presidentit Obama, por per shkak te shumes se madhe te demshperblimit, kerkohej qe marreveshja te miratohej nga disa hallka te burokracise shteterore amerikane perfshire ketu edhe Attorney General (Ministren e Drejtesise se SHBA). Edhe pse marreveshja ishte arritur ne parim, ish-ministrja e Drejtësisë (Loreta Lynch), për fat të keq, nuk arriti të firmoste dokumentat para se ti mbaronte mandati më 20 Janar, 2017. Kështu që procesi gjyqësor duhej të vazhdonte në rast se Administrata e Trumpit nuk do biente në dakortësi me marrëveshjen që kishim arritur ne parim por jo zyrtarizuar me Administratën e Obamës. Klienti ishte shumë i kënqur me marrvëshjen që e kishte bërë atë milioner por çeku nuk po vinte, tregon avokati dhe shton se e kishte të vështirë t’i spjegonte klientit situatën e paprecedentë që sillnin rrethanat e ndryshimit të administratës, pasi gjithçka mund të përmbysej në rast se Administrata e Trumpit nuk binte në dakortsi të firmoste marrëveshjen e arritur me Adminsitratën e Obamës. Nga njëra anë ishte Klienti, që priste me padurim Çekun, pasi me të drejtë e konsideronte çështjen të mbyllur dhe ndoshta kishte bërë plane si ta jetonte jetën si milioner. Kurse nga ana tjetër, avokati Dauti, po merrej me avokatët e shtetit Amerikan, që i thoshin se marrëveshja ishte vërtetë në rrezik të mos aprovohej nga Administrata e re pasi shuma e dëmshpërblimit ishte shumë e lartë dhe e paprecedent për një çështje të kësaj natyre. Në fund të fundit, filozofia e Trumpit ishte të rinegocohet gjithçka. Pas shumë peripecish, më në fund marrëveshja u miratua nga Attorney General (Ministrja e Drejtësisë) Sally Yates gjatë ditës së 30 Janar 2017.

Por edhe këtu, ishim më fat, thotë avokati. Rastësitë nuk kanë fund:Si për koincidencë, Paradite u firmos marrëveshja, ndërsa Ministrja e Drejtësisë, në mbrëmjen e 30 Janarit, u shkarkua nga Presidenti Trump!

Natyrisht, që shkarkimi i saj nuk kishte fare të bënte me çështjen e klientit shqiptar dhe avokatit Dauti, por ai,e përmend këtë rastësi, si tregues të mrekullise dhe ironisë së fatit.

SHQIPTARËT E AMERIKËS DHE “DAUTI LAW FIRM,P.C”

Është një pyetje që më pëlqen t’ua përsëris avokatëve shqiptarë: Si janë raportet mes zyrës tuaj dhe shqiptarëve. Sa të pranishëm janë çështjet e tyre ligjore në zyrën tuaj?

Avokati më tregon se ndjehet i kënaqur që vazhdon të përfaqësojë shqiptarët në çështje të ndryshme ligjore. Në dy nga tre çështjet multimilion dollarëshe që zyra e tij ka arritur të fitojë kohët e fundit, klientet ishin shqiptar. Para pak kohësh avokati ka përfaqesuar edhe një biznesmen shqiptar, i cili po përballej me një padi 30 milion dollarëshe dhe kompania e tij e sigurimeve mbulonte vetëm për shumën 1 milionë dollarë. Avokatët e tij Amerikanë e kishin njoftuar se pasuria e tij personale dhe familjare, që ai e kishte ndërtuar me shumë mund dhe djersë, ishte në rrezik të vërtetë dhe se ai do të duhej të paguante një shumë të madhe parash nga xhepi i tij për të mbyllur këtë padi. Biznesmeni shkoi tek zyra e Avokatit Dauti për ndihmë. Avokati, iu fut betejës ligjore, siç di ai, me profesionalizëm dhe me përkushtim. Pas një Odiseje të gjatë, që kërkoi shumë mund, arriti që ta mbyllte me sukses çështjen dhe biznesmeni shqiptar u çlirua nga pesha e madhe e humbjes. Ai nuk pagoi asgjë nga xhepi i tij.

E pyes avokatin: Cila ka qenë çështja gjyqsore më e vështirë e kohëve të fundit?

Ai tregon se më e vështira mbetet çështja e Norës nga Kosova. “Vështirësia buronte jo vetëm nga fakti se çështje ishte vërtet komplekse dhe se avokatët e saj të mëparshëm e kishin vështirësuar edhe më tepër me mënyrën e tyre të mbrojtjes – por sepse pasojat e humbjes do të ishin vërtet të dhimbshme për Norën për shkak të kushteve në të cilat ajo jetonte. Dhe në rast dështimi, jam i sigurtë që brengosja e humbjes do të qendronte me mua për shumë e shumë kohë pasi Nora do të vazhdonte të jetonte e zhytur në mjerim të vërtetë. Unë vërtet trishtohesha kur e imagjinoja. Jam shumë i lehtësuar që ajo çështje u mbyll me sukses dhe si pasojë kushtet e jetesës së Norës janë përmirësuar dramatikisht”, thotë Dauti.

Një pyetje për dyfishtë për avokatin: Si ndjeheni kur fitoni një betejë ligjore në favor të klientit, dhe e kundërta, si ndjeheni gjatë një beteje të humbur?

Edhe përgjigja ka dy anë: Natyrisht ndjehem i gëzuar dhe mbi të gjitha i çliruar, kur fitoj. Puna e avokatit është të merret me hallet dhe problemet e të tjerëve. Kur je avokat i dikujt, problemi i tyre bëhet edhe i yti. Si avokat, ku arrin të zgjidhësh problemin e klientit ndjehesh jo vetëm i gëzuar, por edhe i çliruar psikologjikisht pasi ke justifikuar besimin e klientit dhe nuk ke nevojë të jetosh më me hallin e tyre.

Kur e humb betejën? E kundërta ndodh kur humb, pergjigjet avokati. Ndjehesh i mërzitur dhe tepër i rënduar. Rëndohesh nga fakti se fillon të mendosh po sikur të kisha ndjek një strategji tjetër? Ndoshta rezultati do të ishte ndryshe. Futesh në një analizë pa fund për të gjetur shkakun e humbjes dhe fillon ta rijetosh çdo detaj të çështjes përsëri….ndryshimi më i madh mes fitores dhe humbjes është se humbjen nuk e harron dot dhe ndoshta për këtë arsye njeriu mëson shumë më tepër nga humbja sesa nga fitorja. Unë kam humbur vetëm gjyqin e parë të nisjes së karrierës time. Ajo ka qenë humbja e vetme deri tani në jetën time dhe, akoma mbaj mend çdo detaj të atij gjyqi të largët që i takon një kohë para 14 vitesh, por unë kam harruar shumë detaje nga çështjet që kam fituar qoftë edhe vitin e kaluar.

Sa mbeten miq me avokatin klientët?-, është pyetja tjetër që i drejtoj avokatit.

Përgjigja e tij: Shumë nga klientët më shkruajnë dhe më urojnë për festat e ndryshme dhe unë bëj të njëjtën gjë. Disa më dërgojnë kartolina dhe mesazhe felenderimi dhe mirënjohje edhe pse çështja e tyre është mbyllur vite më parë. Madje, Nora, klientja për të cilën folëm më sipër, vazhdimisht më shkruan mesazhe që mbarojnë me fjalët “të kam vëlla dhe kurrë nuk harroj çfarë ke ba për mua.” Një kliente tjetër, amerikane, më shkruan çdo vit një kartolinë ku më falenderon dhe shpreh mirënjohje se si mbyllja e çështjes me sukses i ka dhënë asaj një shans të dytë në jetë…

DAUTI, NJË OPINIONIST I PREFERUAR PËR GAZETAT, REVISTAT, PORTALET

Shpesh, avokatit Dauti i kërkohen opinione, parashikime, vlerësime për çështje të bujshme që zënë faqet e para të medias.Për çështjen shumë të përfolur të marrdhënieve të Ish Shefit të FBI, James Comey me presidentin Donald Trump, me 12 Maj 2017, Revista Hollywood Life, e intervistoi avokatin Ylber Dauti, lidhur me me ligjshmërinë e veprimeve dhe insinuatave të Presidentit Trump pasi ai kishte regjistruar bisedat telefonike me Drejtorin e FBI, James Comey, si dhe lidhur me mundësinë e fillimit, nga Kongresi, të procesit të shkarkimit të Presidentit. Opinioni i avokatit është botuar nga revista në portalin e saj online Hollywoodlife.com.

I kërkova avokatit, që të spjegonte për lexuesit thelbin e opinionit që i dha shtypit Amerikan lidhur me këtë çështje, që ënde është e dnjeshme dhe shumë delikate.

Përgjigja e tij: Siç dihet, Presidenti Trump shkarkoi Drejtorin e FBI. Ligji ia njeh këtë të drejtë Presidentit. Por ky shkarkim bëri shumë bujë pasi shefi i FBI, James Comey, po hetonte disa prej bashkëpunëtorve më të ngushtë të Trumpit. Arsyeja e këtij hetimi është dyshimi se disa nga këta individë, gjatë fushatës elektorale, kanë bashkëpunuar me agjentë dhe përfaqësues të qeverisë Ruse me qëllim që të sabotojnë fushatën e Hillary Clinton dhe të ndihmojnë Donald Trump të zgjidhet president. Shumë njerëz e akuzuan Trumpin se arsyeja e shkarkimit ishte frika që Trump kishte nga ky hetim. Presidenti Trump iu kundërpërgjigj akuzave me pretendimin se ai nuk kishte frikë nga ky hetim sepse vetë shefi i FBI e kishte garantuar Trumpin se ai nuk po hetohej. Në të njëjtën kohë Presidenti Trump bëri disa deklarata, që u intepretuan si kërcënime indirekte ndaj shefit të shkarkuar të FBI- së, në rast se ky i fundit do të mohonte pretendimet e Trumpit, atëherë Trumpi mund të publikonte kaseta, që do provonin se ai po tregonte të vërtetën dhe Comey po gënjente.

Këto deklarata të Trumpit lidhur me mundësinë e egzistencës së kasetave shërbyen si benzinë për gazin që ishte ndezur që nga momenti që Comey u shkarkua. Shtypi u vërsul të merrte opinionin e juristëve se nëse kaseta të tilla vërtet ekzistonin, ateherë a ishin të ligjshme këto regjistrime që Trumpi kishte bërë? Si dhe cilat ishin shanset që Kongresi të niste procesin e shkarkimit të Trumpit?

Shkurtimisht, opininoni që avokati Ylber Dauti i dha gazetares së Hollywood Life ishte se është e ligjshme për Trump të regjistrojë bisedën telefonike me shefin e FBI nga Shtëpia e Bardhë ose nga shtëpia e Trumpit në Manhattan – pasi si Washingtoni edhe Nju-Jork-u e konsiderojnë të ligjshëm regjistrimin e bisedës telefonike nga njëra palë edhe pse pala tjetër nuk është në dijeni të faktit se po i regjistrohet biseda. Por në rast se Trumpi,i ka regjistruar bisedat nga shtëpia e tij në Florida, atëherë regjistrimi është i paligjshëm pasi shteti i Floridës kërkon që të dyja palët të jenë në dijeni të faktit se biseda po regjistrohet, përndryshe regjistrimi konsiderohet i paligjshëm.Ndërsa për pyetjen: Nëse egziston mundësia e nisjes së procedurave nga Kongresi për shkarkimin e Presidentit Trump, avokati Dauti i tha gazetares se ai mendon se shanset nuk janë aspak realiste në këto momente. Vetëm në qofte se do të zbulohet evidence e vërtetë që Trumpi ka bashkëpunuar me Rusët për tu zgjedhur president ose ka evidencë se Trumpi shkarkoi shefin e FBI për të sabotuar hetimin FBI po i bënte Shtëpisë së Bardhë – atëherë ekziston mundësia e hapjes, nga Kongresi, të procesit për shkarkimin e Presidentit Trump. Këshilla e avokatit Dauti është kjo: Njerëzit duhet të jenë realistë, se për sa kohë Republikanët në Kongresin dhe Senatin Amerikan i qëndrojnë besnik Trumpit atëherë shanset për shkarkimin e Trumpit janë zero pasi Kongresi dhe Senati kontrollohen nga Republikanët dhe pa votat e një numri të konsiderueshëm kongresmenësh dhe senatorësh republikanë është e pamundur të shakarkohet Presidenti Trump edhe sikur të gjithë kongresistët dhe senatorët demokratë të votojnë për shkarkimin e tij.

Avokati Dauti është intervistuar nga kjo revistë edhe më parë,ku i është kërkuar të jepte opinione dhe të bënte parashikime për çështje që janë pasqyruar gjërësisht në shtypin Amerikan dhe ndërkombëtar. Kështu psh ishte rasti gjatë Lojrave Olimpike në Brazil, ku notari olimpik Amerikan me fame boterore Ryan Lochte dhe 3 pjestarët e tjerë të skuadrës u përfshinë në incidentin e natës së 14 gushtit 2016.

E pyes avokatin:- Sa i qëndroi kohës interpretimi dhe parashikimi juaj – se atletët olimpik Amerikan do të përballen vetëm me akuzën e “kallzimit të rreme te një krimi dhe nuk do të akuzoheshin për kryerjen e ndonjë krimi tjetër.”?

Përgjigja: Parashikimi u bë realitet pas një jave. Unë u intervistova me 18 Gusht dhe me datën 25 Gusht autoritetet Braziliane zyrtarisht shpallën aktakuzën e “kallzimit te rreme të një krimi” ndaj Lochte dhe shokëve të tij.

Një pyetje tjetër për një tjetër intervistë që ai ka dhënë për mediat amerikane dhe aziatike:- Avokat, i qëndroni ende mendimit që keni dhënë për portalin Chinatimes.com lidhur me çështjen e pasagjerit që u tërhoq zvarrë dhe u dëbua forcërisht nga avioni i kompanisë United Airlines? Ju jeni cituar të keni thënë se e kaluara e tij nuk duhet të ketë ndikim në procesin gjyqësor dhe të drejtën e tij për tu kompensuar. Madje ju keni parashikuar se kompania ajrore “United” nuk do ta çonte çështjen në gjyq por të dyja palët do të arrinin një marrëveshje me pajtim.

Përgjigja e avokatit:-E vërteta është se parashikimi im tashmë është vërtetuar. United Airlines ra në dakortësi ta zgjidhë çështjen me pajtim dhe pa proces gjyqesor. Unë u intervistova, 2-3 ditë pas incidentit, që u pasqyrua gjërësisht nga mediat amerikane dhe ato të huaja, sidomos ato aziatike për shkak të origjinës etnike të pasagjerit, David Dao. Në atë kohë disa gazeta dhe portale kishin filluar të përhapnin informacione për të kaluarën kriminale të pasagjerit që ishte tërheqë zvarrë nga avioni dhe njerëzit po hidhnin baltë mbi të kaluarën e tij, që padrejtësisht dhe barbarisht, ishte dëbuar nga avioni edhe pse kishte paguar biletën dhe nuk kishte thyer asnjë rregull. Unë isha i sigurtë që kjo mund të ishte një strategji për të frikësuar pasagjerin që të pranonte një shumë sa më të vogël dëmshpërblimi dhe se pavarësisht se ai ishte dënuar më parë – një fakt i tillë nuk do të influenconte mendimin e jurisë në gjyq pasi videoregjistrimi pasqyronte një skenë barabare dhe të pa tolerushme për shoqërinë moderne amerikane. Prandaj pavarësisht prej presionit dhe zhurmës, kompania ajrore United Airlines gjithësesi ra dakort ti ofroji atij një shumë të madhe parash dhe ta mbyllë çështjen pa gjyq. Unë isha i sigurtë që një gjë e tillë do të ndodhte pasi sa më gjatë që çështja të vazhdonte të ekzistonte, aq më shumë do të diskutohej në publik për të dhe aq më i madh do ishte dëmi që do vuante United Airlines për shkak të publicitetit të keq. Siç e kemi parë të gjithë në televizor, videoklipi i pasagjerit duke u tërhequr zvarrë nga avioni ishte tepër i shëmtur për tu shfaqur para jurisë dhe jam i sigurtë se do ta emociononte dhe nxiste jurinë që ta ndëshkonte United Airlines shumë rëndë. Prandaj, më vjen mirë që parashikimi im i bërë në Muajin Prill – 2017, dhe i pasqyruar gjërësisht në gazetat,portalet amerikane, kineze dhe vietnameze – u bë realitet në muajin Maj, pra brenda një muaji.

New York, Maj 2017

KUVENDET, SHPREHJE E DEMOKRACISË NË VATËR

June 1, 2017 by dgreca

Në Foto:Nga Kuvendi i vitit 2015 ne Jacksonville, Florida/

Ne Foto:Kengetari Frederik Ndoci duke percjelle Hymnet Kombetar te SHBA dhe Shqiptar/

NGA DALIP GRECA/ Ne Foto:Kuvendi i vitit 2015 ne Jacksdonville, Florida/

Me 10 Qershor 2017 do të nisë punimet Kuvendi vjetor i Vatrës, i cili krahas analizës së punës mes dy kuvendeve do të ketë edhe karakter zgjedhor.

Ne Foto:Kuvendi i vitit 2014, Yonkers-New York/

Kryetari i Vatrës, dr. Gjon Buçaj, i cili e mori drejtimin e Vatrës më 2010, do të paraqesë raportin në emër të Kryesisë, ndërkohë që do të ketë raporte edhe nga arkëtari Marjan Cubi, presidenti i Fondit të Studentëve Mithat Gashi, Presidenti i Vatra Fondation INC dr. Nexhat Kaliqi, editori i Diellit Dalip Greca, do të ketë raportime nga kryetarët e degëve dhe diskutime të lira. Pjesa e fundit do t’i kushtohet zgjedhjeve të reja.

Kuvendi do të japë një shtysë të re dhe do ta gjallërojë organizatën më të vjetër të Botës Shqiptare dhe do të vendosë piketa të reja për të ardhmen e federatës, kontributi historik i së cilës, është të i pakrahasueshëm me asnjë organizatë tjetër. E krijuar shtatë muaj para shtetit të pavarur shqiptar, Vatra, i parapriu pavarësisë dhe e kreu më së miri edhe rolin e shtetit të vdekur shqiptar.Kontributi i Vatres është vlerësuar nga Presidenti i Shqipërisë Bujar Nishani me dekoratën më të lartë të Republikës së Shqipërisë”Urdhëri i Flamurit”, ndërkohë që më parë ishte dekoruar nga Presidenti Bamir Topi me Urdhërin”Nderi i Kombit”.

Përmes Kuvendeve, Vatra, ka përsosur demokracinë e saj të brendshme. Që nga Kuvendi themelues i 28 prillit 1912 (mbledhja themeltare) e në vijim, Vatra i është bindur parimeve demokratike, që burojnë nga demokracia amerikane.

Përvoja tregon se problemet e mëdha Kombëtare dhe ato të brendshme Vatra i ka zgjidhur përmes Kuvendeve. Ka pasur raste, kur brenda vitit janë zhvilluar më shumë se një Kuvend. Në rekordet historike të federatës, janë regjistruar tre kuvende në një vit pas themelimit të saj, më 1913. Madje brenda muajit janë organizuar dy Kuvende, njëri më 4 korrik, tjetri më 20 korrik 1913.Kuvendi i dytë vendosi që Vatra të kishte Kryetar, pasi gjer atëhere nuk kishte Kryetar, detyrën e kryente sekretari i përgjithshëm. Mirëpo me ikjen e sekretarit të përgjithshëm, Faik Konicës në Europë, ky vend kishte mbetur vakant.

Në kuvendin e 20 Korrikut u zgjodh Kryetari Kristo Dako, i cili kryente edhe detyrën e Editorit të gazetës”Dielli”. Mirëpo problemet nuk shkuan mbarë. Kishin lindë mosmarrveshje mes kryetarit Dako me sekretari Loni Kristo e radhitësin e gazetës Efthim Natsi. Problemet dhe mosmarrëveshjet nuk u zgjidhën as në mbledhjen që thirri kryetari 10 ditë pas Kuvendit të dytë, me 30 korrik, edhe pse sekretari u hoq përkohësisht nga detyra.

Me 24 gusht 1913 u thirr sërish një Kuvend tjetër, i treti në dy muaj. Në kuvend, kryetari Dako nuk gjeti rrugë tjetër që të shmangeshin moskuptimet dhe në këto rrethana e dha dorëheqjen edhe si kryetar Vatre edhe si editor i Diellit. Me pjekuri u zgjidhën mosmarrveshjet dhe u kthye normaliteti. Kryetar i ri u zgjodh Vangjel Gjika, ndërsa Editor i gazetës”Dielli, u zgjodh Dennis Kambury. Loni Kristo u rikthye sërish si sekretar i Vatrës.

Siç ka konstatuar historishkruesi i Vatrës, ish editori Refat Gurrazezi, Kuvende të shpeshta janë bërë si për të shuar konfliktet,për të zgjidhur problemet kombtare, ashtu edhe për shkak të gjetjes së një editori të aftë sepse pas ikjes Konicës, Nolit dhe dorëheqjes të Kristo Dakos, nuk po gjendej një editor i aftë. Kjo i diktoi Vatrës që të thërriste një Kuvend tjetër ende pa u mbushë viti nga tre kuvendet e 1913-tës. Ky Kuvend u thirr me 10 Janar 1914 dhe pati si ceirman Kostaq Lepçishtin. Në Kuvend u vendos që t’u shkruheshin letra për të ardhë në krye të gazetës njerëz të njohur të penës si: Faik Konitza, që aso kohe ishte në Durrës, Milo Duçi në Vlorë, Aleksandër Xhuvani, Midhat Frashëri, Simon Shuteriqi, Abdyl Ypi etj. Faik Konitza nuk u gjet në Durrës pasi ishte larguar, ndërsa personat e tjerë që morën ftesat, u përgjigjën se nuk mundnin të vinin pasi ishin të zënë me punë të tjera.

Ky Kuvend, shënoi edhe një ngjarje që ka mbetur në rekordet e Vatrës:Kryetari Vangjel Gjika dha dorëheqjen dhe Vatra mbeti në dorë të sekretarit Loni Kristo. Në këto kushte krize për Vatrën hapet një dritë shprese:Fan S Noli i shkruan një letër Vatrës dhe shfaq dëshirën që të marrë drejtimin e Diellit. Vatra i pranoi kushtet që vuri Noli dhe i shkroi që të vinte menjëherë, por ai nuk u përgjigj për shumë kohë. Atëherë iu bë një ftesë Kostë Çekrezit, i cili atë kohe ishte me Komisionin Ndërkombëtar të Kufijëve në Shkodër. Çekrezi e pranoi ftesën dhe me 8 nëntor 1914 mbërriti në Boston dhe mori drejtimin e Diellit, duke e kthyer atë në një gazetë të përditshme. Gazeta gjeti ustanë për një kohë, por kuvendet e Vatrës nuk u normalizuan në ciklin kohor, nuk u kthyen të përvitshëm.

Kuvendi i radhës u mblodh me 4 korrik 1915, ku Noli, që tashmë kishte mbërritur në Boston, vuri kandidaturën për kryetar të Vatrës. Edhe ky Kuvend e gjeti Vatrën pa kryetar.Cairman i këtij kuvendi u zgjodh Lambi Kreshpani dhe sekretar Kolë Rodhja. Kuvendi vendosi me shumicë votash që të ndalohej hyrja e dy kandidatëve për kryetar Vatre, Fan S Nolit dhe Kostë Çekrezit. Për mosprishje qejfi mes dy kandidatëve, kuvendi nuk mori vendim për asnjërin për kryetar, dhe e la gjendjen siç ishte, pa kryetar. Natyrisht nuk mund të vazhdohej gjatë me këtë gjendje.U thirr një Kuvend tjetër me 17 korrik. Sërish kemi dy kuvende brenda muajit. Ky Kuvend i dytë pati për cairman të komisionit të qendrës Hasan Bitinckën, ndërsa si cairman të Kuvendit Dennis Kambury. Kuvendi i vijoi punimet për dy ditë. Pas debateve u zgjodh kryetar Fan S Noli, ndërsa zyrtarë: Kristo Kirka, Kol Rodhe, Hasan Bitincka, Kostë Çekrezi(Editor i Diellit),Kol Tromara, dhe Kostë Racka. Ky Komision që drejtoi Vatrën pas atij Kuvendi, diskutoi edhe një pikë delikate: A mund të kthehej programi i Vatrës në politik? Konsultimi me një avokat të njohur ktheu përgjigje negative:JO!

Kuvendet e Vatrës përshkoheshin nga fryma e debatit, por jo rrallë ngriheshin tonet. Gjithësesi parimet demokratike nuk shkeleshin. Kryetari i Kuvendit mbante rregull, madje duke shfrytëzuar votën e delegatëve, kalonte deri në përjashtimin nga kuvendi të ngatrrestarëve; dhe nuk lejontë që të shkeleshin rregullat e përcaktuara. Kur nxeheshin gjakrat merreshin masa ekstreme, madje deri në thirrjen e policise për të nxjerrë jasht shkaktarët. Kështu psh në kuvendin e 2 Korrikut 1916, që u drejtua nga cairman Kostë Issaku dhe Ndreko Stavro sekretar, në sesionin e katër, u ashpërsuan bisedimet dhe delegatët kërkuan që të nxirrej jashtë Kuvendit Kristo Dako dhe të gjithë zyrtarët e Vatrës, me qëllim që të vazhdonte Kuvendi. Tonet e ashpra kishin si burim Nolin dhe Dakon. I nxorën jashtë edhe Dakon e Nolin edhe zyrtarët e Vatrës. Kryetari i Kuvendit vazhdoi punimet e Kuvendit. Më pas i thirrën që të hynin prapë. Pyetën Nolin se çfarë mendonte ai për rregullimin e punëve të Vatrës. Noli tha se nuk kishte nevojë fare për kryetar, që të mos i mbetej qejfi askujt për të qenë në krye dhe se ai mund ta drejtonte Vatrën duke bashkëpunonte me një komision me atdhetarë të njohur.

Pyetën Dakon se çfarë mendonte ai.Dako tha se Vatra duhej të kishte një kryetar të paanshëm dhe vetë ai propozoi Kostë Hotovën, ndërsa për vete tha se do të qëndronte jasht komisionit. Madje ai shtoi që Vatrës t’i shkonin punët mirë, ishte e mira si ai, ashtu dhe Noli, të rrinin jashtë Komisionit drejtues. Mirëpo të nesërmen në sesionin e pestë gjithçka ndryshoi si me magji, Dako propozoi Nolin për zyrtar të Vatrës, ndërsa Noli propozoi Dakon. Kuvendit nuk i mbeti gjë tjetër veçse t’i duartrokiste. Për kryetar konkuruan Kolë Tromara dhe Kostë Hotova. Tromara mori 29 vota, nga 25 që mori Hotova. Editor u zgjodh Bahri Omari, që nuk pati kundërshtar, pasi Rauf Fico që ishte ftuar nuk mundi të vinte nga Elbasani. Ky Kuvend mbahet mend për një vendim të rëndësishëm: Zgjodhi një person që do të paguhej me rrogë nga Vatra për t’u kujdesur për emigrantët që vinin në Ellis Island, të cilët kishin nevojë për ndihmë pasi s’njihnin gjuhën. Për këtë qëllim u zgjodh Kostë Hotova.

U duke se punët do të shkonin mirë, por pesë muaj më pas debatet u ashpërsuan dhe nisi çarja, që shkëputi një pjesë të madhe të vatranëve, që shkuan pas Kristo Dakos që krijoi Partinë Politike.

Kuvendet e Vatrës merrnin vendime të rëndësishme që kishin të bënin me fatet e Shqipërisë. Kështu psh Kuvendi i 1916, mbahet mend se emëroi Mehmet Konicën delegat të Vatrës në Londër, ndërsa ai i Majit 1917 mbahet mend për fushatën e madhe të 3 qershorit, që shpëtoi Shqipërinë, Kuvendi i 1919, që dërgoi delegatë në Konferencën e Paqës e Paqës në Paris, ose Kuvendi i 1920, organizoi huanë Kombëtare, që përmirësoi financat e qeverisë së Kongresit të Lushnjës.

Kuvendi më i gjatë që shënon rekord në historikun e Vatrës është ai 1 Korrikut 1917, i cili ka vazhduar për 12 ditë. Vendimi më i rëndësishëm i atij Kuvendi ishte Memorandumi për Greqinë që të ndaltë shpërnguljen e çamëve nga trojet e tyre, por ky mbahet mend edhe si Kuvendi i përçarjes së parë të Vatrës, që çoi me 27 gusht 1917, lindjen e Partisë politike të Dakos, me qendër në Worcester dhe nisjen e publikimit të gazetës”Albania”, kundërshtare e Diellit.Pas kësaj çarje ndodhën edhe dy çarje të tjera të mëdha të Vatrës, më 1925 dhe 1936.Bashkimi erdhi në kohën e pushtimit të Shqiëprisë prej Italisë fashiste.

Kuvendet ia kanë rritur jetëgjatësinë Vatrës dhe kanë forcuar frymën kombëtare të saj. Nga viti 2013 u rikthyen sërish kuvendet vjetore të Vatrës, ndërkohë që Kuvendi i fundit u organizua më 2015 në Jacksonville , Florida.

Le t’i urojmë punime të mbara kuvendit të 10 qershorit 2017!