Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Vështrim pas- Në Uashington flamuri amerikan u ngrit për publicistin shqiptar Engjëll Musai

by

Nga Ermira Babamusta/
 Në ndërtesën e Kongresit Amerikan në Uashington DC u valëvit flamuri amerikan për nder të z. Engjëll Musai dhe kontributit të tij në lidhjet dypalëshe shqiptaro-amerikane. Ngritja e flamurit në ndërtesën e famshme të Kongresit amerikan i rezervohet banorëve të distriktit përfaqësues të kongresistit ose senatorit, dhe në raste të veçanta nderimi i një personaliteti të shquar i një vendi tjetër që ka dhënë kontribut të jashtëzakonshëm ose për të kujtuar ngjarje historike. 
 Me kërkesë nga kongresisti amerikan Eliot Engel nga New Yorku në ndërtesën e Kapitol Hill me datën 7 mars 2016 u valëvit flamuri amerikan për nder të personalitetit të shquar të kombit shqiptar Engjëll Musai. Vlerësimi i kontributit të jashtëzakonshëm për z. Engjëll Musai nga Kongresi Amerikan tregon miqësinë e fortë tradicionale dhe historike që egziston midis Shqipërisë dhe Amerikës.
Flamuri u ngrit për nder të z. Engjëll Musai “për përkushtimin e tij në forcimin e marrëdhënieve  shqiptaro-amerikane dhe zhvillimit demokratik të Shqipërisë. Nëpërmjet punës së gazetës Telegraf z. Musai shërben si zëri i arsyes dhe drejtësisë, në mbështetje të vlerave amerikane për demokraci, drejtësi, liri dhe barazi.”  
Publicisti i njohur z. Engjël Musai ia ka kushtuar jetën e tij me plot pasion dhe devotshmëri kauzës së shenjtë të miqësisë dhe bashkëpunimit Shqipëri-Sh.B.A. Si një mendimtar i natyrës prej diplomati me analizat e tij ai reflekton inteligjencë, mirëkuptim, dialog dhe tolerancë për shoqërinë shqiptare. Një zë tepër i fuqishëm që e vërteta të triumfojë. 
    Çdo ditë në editorialet e gazetës Telegraf publiku shqiptar njihet me politikën paqësore aktuale amerikane, me vlerat demokratike, me përkushtimin e qeverisë së Shteteve të Bashkuara te Amerikës për të përhapur vlerat demokratike kudo në botë dhe për një paqe të qëndrueshme. Vazhdimisht pasqyrohet interesi i Sh.B.A-së për zhvillimin e Shqipërisë dhe Kosovës dhe për shqiptarët e Maqedonisë. Si dhe pasqyrohen vlerësimet dhe sygjerimet që japin udhëheqësit e politikës amerikane për Shqipërinë, dhe veçanërisht interesin e jashtëzakonshëm që tregon lidershipi amerikan si Presidenti Obama, Familja Klinton dhe Familja Bush. 
      Shtetet e Bashkuara të Amerikës kanë ndërrmarë angazhime të veçanta në botë për ruajtjen e paqes, parimeve demokratike, drejtave njerëzore, vlerave të lirisë dhe drejtësisë. Lidershipi amerikan ka përkrahur shtetet aleate si Shqipëria dhe Kosova në proçeset demokratike të vendit dhe reformën në drejtësi. Shtetet e Bashkuara të Amerikës janë miku dhe aleati më i madh i kombit shqiptar. 
   Kongresisti amerikan Eliot Engel nga New Yorku vlerëson kontributin e komunitetit shqiptar në Amerikë dhe është një nga figurat e shquara politike në shërbim të forcimit të lidhjeve shqiptaro-amerikane. Kongresisti Eliot Engel shërben në Komitetin për Punë të Jashtme në Dhomën e Përfaqësuesve si dhe është krytar i grupit drejtues për çështjet shqiptare.

Flamuri amerikan do të valëvitet mbi Kongres për shkrimtarin Kadare

by

Me kërkesën dhe mbështetjen e Vehbi Bajramit, botuesit të gazetës “Illyria” në New York dhe ndërhyrjes së kongresistit Engel, shkrimtari i shquar shqiptar do të nderohet në Washington/
Nga Ruben Avxhiu*/
Ka mbetur tashmë të caktohet vetëm data, kur mbi Capitol Hill, ndërtesën e famshme të Kongresit amerikan në Washington, të valëvitet një flamur për nder të shkrimtarit shqiptar, Ismail Kadare.
Gjesti i bukur simbolik është siguruar nga kongresisti Eliot Engel me nismën dhe propozimin e Vehbi Bajramit, botues i gazetës “Illyria” në New York.
Engel është prej një çerekshekulli tashmë një nga mbështetësit më të vendosur të shqiptarëve në Kongres dhe bashkëpunimi i tij me zotin Bajrami është i gjatë.
Me propozimin dhe mbështetjen e botuesit Bajrami, kongresisti Engel bëri edhe një përshëndetje publike dhe zyrtare në Kongresin Amerikan për shkrimtarin Kadare si dhe për vlerësimin e tij të fundit me Çmimin prestigjioz të Jeruzalemit 2015 në Letërsi.
Ndonëse ngritja e flamurit është një praktikë e rregullt për kongresistë dhe senatorë për të vlerësuar dhe përmendur njerëzit e distrikteve të tyre përkatëse, kësaj here ceremonia do të jetë e veçantë për shkak se do të nderohet një personalitet i një vendi tjetër.
“Më vjen shumë mirë për këtë nderim që po i bën Kongresi shkrimtarit më të madh shqiptar të të gjitha kohërave”, tha Vehbi Bajrami.
“Kadareja është sot letërnjoftimi i shqiptarëve në botë, më i madhi personalitet i gjallë i botës shqiptare, një fakt ky që shpesh shqiptarët vetë e harrojnë”.
“I nderuar zoti kryetar, ngrihem sot për të nderuar Ismail Kadarenë!” /
Kongresisti Engel e nderoi këto ditë shkrimtarin e njohur edhe nga salla e Dhomës së Përfaqësuesve të Kongresit Amerikan.
“Zoti Kryetar, ngrihem sot për të nderuar Ismail Kadarenë”, e filloi kongresisti fjalën e tij, e cila tashmë është futur në analet e Kongresit, fjalë e cila e vlerëson Kadarenë si “një romancier dhe poet që ka shkruar për historinë dhe popullin shqiptar, por duke depërtuar në thellësi të temave universale të lirisë dhe të të drejtave të njeriut”.
Kongresisti citon Jurinë e Çmimit të Izraelit që e përshkruan shkrimtarin Kadare si “tregimtar i historive mbresëlënëse, të shkruara me nënkuptime dhe në mënyrë të tërthortë. Ai shkruan për ndjenjën kolektive të fajit dhe veçanërisht për përpjekjet e dështuara të së vërtetës për të depërtuar në të.
Ndërsa fsheh gjurmët nëpër shtresa mitesh dhe metaforash, ai njëkohësisht përpiqet të nxjerrë në pah pyetje për të cilat nuk ka përgjigje dhe krime për të cilat nuk mund të ketë falje.
Ndonëse subjektet dhe protagonistët e veprave të tij janë lokalë, kuptimi dhe rëndësia e tyre janë pa asnjë dyshim, universalë”.
Kongresisti Engel citoi me radhë disa nga nderimet e mëdha që i janë bërë shkrimtarit Kadare për krijimtarinë e tij letrare, si anëtarësimi i përjetshëm në Akademinë e Shkencave Morale dhe Politike Franceze, Çmimi botëror “Cino Del Duca” në 1992, “Man Booker International” në 2005, Çmimi i Princit të Asturias për Letërsi si dhe Grada Shkencore e Nderit në Komunikimin Social dhe Institucional nga Universiteti i Palermos në 2009.
“Si dëshmi e pranimit universal të letërsisë së tij, romanet e zotit Kadare janë përkthyer në shumë gjuhë dhe kanë lexueshmëri që shtrihet në të gjithë globin”, tha Engel në Kongresin Amerikan. “Kadare jo vetëm që i meriton këto vlerësime dhe nderime, po figura e tij është shumë më e thellë kur mendon përkushtimin e tij të admirueshëm ndaj vlerave të shenjta të demokracisë, pavarësisht nga rrethanat ku është ndodhur”.
“Në mbarë veprat e tij letrare, z. Kadare ka zgjedhur me kujdes protagonistët dhe narrativën figurative si një mjet komunikues dhe frymëzues për ata që ndodhen në mënyrë të ngjashme nën zgjedhën e regjimeve shtypëse”, tha kongresisti amerikan.”Në këtë mënyrë, përkushtimi i z. Kadare për t’u ngritur mbi presionin qeveritar për të frymëzuar shprehjen në harmoni të lirive të individit është me të vërtetë i admirueshëm”.
“Dua t’i shpreh pra urimet më të përzemërta Ismail Kadaresë [për çmimin e fundit] si dhe kënaqësinë time personale që kam rastin ta nderoj këtu, sot një individ të tillë”, mbylli fjalën e tij kongresisti Engel.
Botuesi Bajrami që i përcolli zyrës së kongresistit lajmin e dhënies së çmimit dhe sugjerimin për ta nderuar mbeti shumë i kënaqur nga fjala e kongresistit dhe nderimit vijues me valëvitjen e flamurit.
“Do të ishte bukur që nderime të tilla t’ia bëjmë edhe në atdhe shkrimtarit tonë”, tha ai. “Nganjëherë duket sikur harrojmë se çfarë vlere e jashtëzakonshme është ai për kombin tonë. E kur e nderon bota, nderohemi të gjithë ne bashkë me të”.(Botoi:Gazeta Illyria)