Kremtohet Kurban Bajrami në Tiranë

September 12, 2016 by dgreca

Pavarësisht reshjeve të shiut, mijëra besimtarë myslimanë u mblodhën në bulevardin “Dëshmorët e Kombit” për të falur namazin e Kurban Bajramit, festa e dytë më e madhe kjo në fenë islame. Pasi i uroi të gjithë shqiptarët dhe myslimanët anembanë botës, gjatë ligjeratës së tij, kreu i Komunitetit Mysliman Shqiptar, Skënder Bruçaj, theksoi se kjo ditë dhe festimet që lidhen me të shënojnë flijimin dhe sakrificën e njeriut në emër të besimit ndaj Zotit dhe në emër të dashurisë për njeriun. Ndërkohë, myftiu i Tiranës Ylli Gurra dhe teologu Elvis Naçi theksuan se besimi në Zot nuk duhet të mbetet i kufizuar vetëm në ditë festash fetare. Sipas tyre, vendi ynë dhe e gjithë bota ka nevojë për mirësinë e njerëzve, gjë e cila vjen vetëm nëpërmjet fesë.

Në këtë ditë të shënuar për fenë islame, mijëra besimtarë shqiptarë i janë bashkuar milionave të tjerë nga e gjithë bota në Mekë për të kryer Haxhin, një nga 5 shtyllat e fesë islame.

***

Presidenti Nishani u uron besimtarëve myslimanë Festën e Kurban Bajramit

Presidenti i Republikës, Sh. T. Z. Bujar Nishani u uroi sot Festën e Kurban Bajramit besimtarëve myslimanë duke vizituar Selinë e Komunitetit Mysliman Shqiptar, ku u prit nga Kryetari i Komunitetit Mysliman Shqiptar Haxhi Skënder Bruçaj.

Në prani të përfaqësuesve të mediave, Kreu i Shtetit u shpreh: “Urimi në këtë ditë është shumë i thjeshtë, sepse është një urim që vjen nga zemra, vjen nga shpirti dhe është për të gjithë njerëzit, kështu që ne e kemi përshëndetjen dhe urimin me një fjalë shumë domethënëse siç është fjala: Gëzuar, përshumëvjet!

Dita e Kurban Bajramit përfaqëson dy dimensione: atë të Sakrificës dhe të ndarjes së të mirës me të tjerët. Të dyja këto vlera që Dita e Kurban Bajramit i përfaqëson dhe i promovon koinçidojnë si vlera shekullore edhe të shqiptarëve. Ne si popull dhe si komb kemi qenë një popull dhe një komb që në lidhje me Sakrificën kemi bërë shumë sakrifica në të shkuarën. Por nga tjetër, pavarësisht vështirësive dhe situatave që kemi kaluar, gjithmonë kemi qenë të gatshëm që atë të mirë, aq sa e kemi pasur, kemi qenë të gatshëm ta ndajmë me të tjerët dhe e kemi ndarë me të tjerët, të cilët kanë qenë në nevojë dhe në kërkim të ndihmës.

Kështu që këto janë parime gjithëshqiptare dhe sot gjej rastin të vlerësoj lart këto parime të mëdha që feja islame i përçon në mbarë njerëzimin dhe në mënyrë të veçantë dua t’u shpreh mirënjohjen time si qytetar, por edhe si President i Republikës, Komunitetit Mysliman Shqiptar, klerikëve myslimanë shqiptarë për punën e shkëlqyer që bëjnë çdo ditë për të përhapur këto vlera të mirësisë, të vëllazërimit, të respektit dhe të gatishmërisë që edhe përmes sakrificës të ndihmojmë atë që është më i pamundur, më i varfër, më pak i ndihmuar ndoshta nga fati në momente të caktuara. Kështu që edhe njëherë gëzuar këtë ditë të bekuar, këtë ditë të veçantë! Mbarësi gjithë Komunitetit Mysliman, të gjithë shqiptarëve! Zoti e bekoftë Shqipërinë dhe shqiptarët kudo ku janë!”

URIMI I KRYEPARLAMENTARIT META

Kryetari i Kuvendit Ilir Meta ka uruar besimtarët myslimanë me rastin e Festës së Kurban Bajramit. Në mesazhin e tij Meta ka shprehur urimet më të mira për vlerat e kësaj dite, që na nxisin për më shumë tolerancë, mirësi dhe për të pasur solidaritet më të madh sidomos me ata qytetarë që kanë nevojë për solidaritet.

“Me rastin e festës së Kurban Bajramit dua të shpreh urimet më të mira për mesazhet dhe vlerat e kësaj dite, që na nxisin për më shumë falje dhe tolerancë, për më shumë mirëkuptim, për të bërë mirësi dhe për të zhvilluar një solidaritet më të madh me njëri tjetrin dhe sidomos me ata qytetarë që kanë nevojë për te”,- tha Kryetari i Kuvendit.

Gjithashtu, Ilir Meta, ka shprehur sërish vlerësimin e tij për këtë bashkëjetesë dhe harmoni të mrekullueshme fetare që ekziston në vendin tonë.

“Më lejoni të shpreh krenarinë për këtë bashkëjetesë dhe për këtë harmoni të mrekullueshme që ne kemi falë këtyre marrëdhënieve mjaft tolerante, bashkëpunuese midis komuniteteve tona, por edhe besimeve të ndryshme”, – u shpreh Kryetari i Kuvendit në mesazhin e tij me rastin e festës së Kurban Bajramit.

URIMI I KREUT TE OPOZITES

Kurban Bajrami, Basha uron besimtarët: Zoti i ndihmoftë shqiptarët

Kreu i PD-së, Lulzim Basha, ka uruar të gjithë besimtarët myslimanë për festën e Kurban Bajramit.

Me një mesazh në profilin e tij në Facebook, Basha shkruan se, kjo është dita kur çdokush sprovohet para Zotit.

“Të dashur miq, vëllezër dhe motra, besimtarë myslimanë, Gëzuar Kurban Bajramin!Sot besimtarët kremtojnë dashurinë e Zotit ndaj çdokujt që sprovohet përmes sakrificës.

Zoti i ndihmoftë shqiptarët kudo ku ndodhen!”,- shkruan kreu i PD-së, Lulzim Basha në profilin e tij në Facebook.

Kremohet 103 vjetori i krijimit të Forcave të Armatosura të Republikës së Shqipërisë

December 4, 2015 by dgreca

Nga Shefqet Kërcelli/

Sot paradite, datë 4 dhjetor, në sheshin qëndror të Garnizonit “Skënderbej”, Tiranë, u organizua një ceremoni ushtarake për nder të 103 vjetorit të krijimit të Forcave të Armatosura të Republikës së Shqipërisë. Në këtë ceremoni morën pjesë trupa dhe personel nga të gjitha Forcat, Armët dhe Shërbimet, pjesë përbërëse të Forcave tona të Armatosura. Gjithashtu vec Ministrit të Mbrojtjes, znj.Mimi Kodheli dhe Shefit të Shtabit të Përgjithshëm, Gjeneralmajor Jeronim Bazo, në këtë ceremoni morën pjesë veteranë të FA, deputetë të Kuvendit të Shqipërisë, anëtarë të Komisionit për Sigurinë Kombëtare, Atashe ushtarakë të vendeve anëtare të NATO-s akredituar në vendin tonë, përfaqësues të medias, etj. Mbas përshëndetjes me rastin e 103 vjetorit, pjesmarrësit shoqëruan ekzekutimin e hymnit kombëtar nga tenori Ergys Mita. Në vijim të ceremonisë fillimisht pjesmarrësit i përshëndeti Shefi i Shtabit të Përgjithshëm Gjeneralmajor Bazo dhe më pas Znj.Mimi Kodheli. Në fjalën e tyre drejtuesit e ushtrisë shqiptare vlerësuan rrugën e lavdishme të Ushtrisë Shqiptare nga dita e krijimit, punët e përpjekjet e bëra për reformimin e FA shqiptare deri në pranimin si anëtare me të drejta të plota në NATO. Gjithashtu u evidentua roli i trupave shqiptare në misione të ndryshme paqeruajtëse krah me vendet e tjera si dhe kontributi i popullit shqiptar në luftën kundër terrorizmit dhe forcimin e paqes e sigurisë në botë. Në fund të fjalës, titullarët e MM i uruan ushtarakëve shqiptarë, Gëzuar 103 vjetorin e krijimit të ushtrisë shqiptare! Gjatë ceremonisë u prezantua dhe mënyra më e re e përshëndetjes nga cdo Forcë apo Komandë Mbështetje e Forave tona të Armatosura.

Pse 4 dhjetori shënon krijimin e Ushtrisë shqiptare? Vetëm pak ditë nga akti historik i shpalljes së pavarësisë, 28 nëntor 1912, më 4 dhjetor 1912, Kuvendi Kombëtar i Vlorës, në mbledhjen e tij të parë zgjodhi grupin ekzekutiv të Qeverisë së Përkohëshme të Vlorës. Në përbërje të kësaj trupe bëntë pjesë dhe Dikasteri i rëndësishëm i Luftës {Mbrojtja Kombëtare}, me në krye Gjeneral karriere dhe Komandanti i shquar i kryengritjeve shqiptare të viteve 1911-1912, Mehmet Pashë Dërralla.{Tetova}. Ky dikaster në bashkëpunim me atë të Punëve të Brendëshme do organizonte mbrojtjen e territoreve të vendit, sigurimin e rendit publik, njëkohësisht dhe formimin e organizmave drejtuese të strukturave të Forcave të Armatosura Shqiptare.

Në Europa Plaza në Fier, kremtohet , “San Patrick’s Day”

March 17, 2014 by dgreca

Nga Flora NIKOLLA/

Fier, 17 Mars/ATSH/- Në Europa Plaza, në qytetin e Fierit u kremtua sot, Festa Kombëtare e Irlandës ose siç njihet nga Irlandezët, ”San Patrick’s Day”, në kuadër të një iniciative të Bashkisë së qytetit të Fierit dhe ideatorit dhe realizuesit të Europa Plaza, artistit, Fate Velaj.

Në ceremoninë e organizuar në Europa Plaz , ishte i pranishëm Kryetari i Bashkisë së Fierit, z. Baftjar Zeqo, nën kujdesin e të cilit do të organizohet kjo iniciativë e cila ka marrë përsipër të kremtojë festat kombëtare të vendeve pjesmarrëse të Bashkimit Europian, në qytetin e Fierit, i njohur si qyteti i bashkëjetesës dhe harmonisë.

Ekzekutimi i Himneve kombëtare të dy shteteve,(Shqipëri dhe Irlandë) shënoi nisjen zyrtare të kësaj ceremonie dhe ngritjen e flamurit të Irlandës , ku ishin të pranishëm personalitete të Fierit dhe qytetarë Fierakë.
Europa Plaza, ideuar e projektuar nga Fate Velaj, një artist i njohur me një karrierë brilante në Austri dhe jo vetëm , aktualisht , këshilltar pranë kryeministrit Edi Rama për diplomacinë kulturore, u inaugurua më 24 Nentor 2012 me rastin e 100 vjetorit të Pavarësisë së Shqipërisë.

Europa Plaza, është konceptuar si simbol i faktit që Shqipëria është pjesë e Europës dhe e së ardhmes së përbashket Europiane. Duke u mbështetur në këtë koncept, në çdo festë kombetare të shteteve anëtare te BE, në Europa Plaza, në qëndër të qytetit të Fierit, do të organizohet një ceremoni e veçantë e cila do të shoqërohet me ngritjen e flamurit të shtetit kur ai kremton ditën e tij kombëtare.

Pak ditë më parë në ceremoni të veçantë , në këtë shesh u organizua festa Kombëtare e Bullgarisë.Europa Plaza është një koncept që ka fituar zemrat e te gjithë diplomatëve të huaj në Tiranë dhe ka bërë jehonë ndërkombëtare .

Një kurorë shqiptare në Washington, ceremoninë e përvitshme që nderon viktimat e komunizmit

July 1, 2013 by dgreca

*Në Washington, DC kremtohet përvjetori i gjashtë i nderimit të viktimave të komunizmit SHBA, Ceremoni përkujtimore kushtuar heronjve antikomunistë harrojmë se lufta kundër komunizmit nuk ka mbaruar ende.20 ambasada vendosin kurora për të nderuar viktimat e komunizmit nga e gjithë Bota.

* Siç dihet Shqipëria për nga numëri i popullsisë, ka numërin më të madh të viktimave të komunismit në botë : Të pushkatuar e të vdekur në burgjet e komunizmit 6109 . Të pushkatuar 5157, mes tyre 89 gra . Të dënuar politikë 17900, mes tyre 450 gra . Të vdekur në burg 952, mes tyre 7 gra . Humbën aftësitë mendore 273, mes tyre 29 gra . Të internuar 30383 veta . Burgje 23 . Kampe internimi 48.

SHKRUAN: BEQIR SINA, New York/

WASHINGTON D.C: – Ambasadorë dhe diplomatë nga gati 20 vende të botës, të akredituar në kryeqytetin e Shteteve të Bashkuara – Washington D.C, u mblodhën së bashku me udhëheqës të Kongresit dhe grupe për të drejtat e njeriut nga vendet ish- dhe ende komuniste, në ceremoninë e vendosjes së kurorave te Memoriali i Viktimave të Komunizmit, në afërsi të godinës së Capitol Hill në rrugën Massachusetts Ave.

Në përvjetorin e gjashtë të nderimit të viktimave të komunizmit, aktiviteti u drejtua nga Dr. Lee Edwards, kryetari i Fondacionit të Viktimave të Komunizmit dhe vazhdoi me një seri folësish të shquar. Kongresistët Ileana Ros-Lehtinen nga Florida, Dana Rohrabacher nga California dhe Jim Bridenstine nga Oklahoma kryesuan listën e folësve dhe mysafirëve nga Capitol Hill.

Dr. Lee Edwards paraqiti Medaljen e Lirisë “Truman-Reagan” për Dr. Yang Jianli, një i mbijetuar i masakrës së Tiananmenit dhe ish i burgosur politik në Kinë (2002-2007), themelues dhe kryetar i Iniciativës për Kinën në shekullin e 21-të. Yang Jianli, Ph D., themelues dhe president i Iniciativës për Kinën, iu dha Medalja e Lirisë – Truman-Reagan 2013, mbasi ai ka qenë e njohur gjerësisht si një udhëheqës i madh i lëvizjes Kinës për demokraci dhe një nga avokatët më të rëndësishme ndërkombëtare për tranzicion paqësor demokratik të Kinës.

Medalja e Lirisë – Truman-Reagan u jepet individëve të cilët janë dalluar në luftën vetmohuese dhe kundërshtimin që i kan bërë komunizmit dhe tiranisë. Ndër dekoruarit e mëparshëm të Medaljes së Lirisë përfshihen edhe Lech Valesa, Vaclav Havel, Elena Bonner, Papa Gjon Pali II, William F. Buckley, Henry Senatorin Jr. “Scoop” Jackson, ish i mbijetuari i Holokaustit Tom Lantosh, ish senatori anti komunist Jesse Helms, senatorin Joseph Lieberman, kongresistin Steny Hoyer, ish Sekretari i Mbrojtjes Donald Rumsfeld dhe tash kongresisten Ros-Lehtinen nga Kuba. etj.

Ceremonia shënoi përvjetorin e gjashtë të saj. Ajo nisi udhën e saj me përurimin e memorialit, kushtuar miliona viktimave të komunismit në vitin 2007, që bashkoi ish kongresistin e ndjerë Tom Lantosh me presidentin e atëhershëm George W. Bush dhe kongresistin Dana Rohrabacher.Memoriali i Viktimave të Komunizmit, në Washington, është i përkushtuar për të edukuar këtë brez dhe brezat e ardhshëm në lidhje me historinë, filozofinë dhe trashëgiminë e komunizmit. Në kremtimin e parë, për të nderuar kushtimin që do ti bëhej viktimave të komunismit nga e gjithë bota, përfshirë edhe vendin tonë, përpara një turme ndërkombëtare prej afro një mijë pjesmarrësish në këtë ceremoni foli edhe Presidenti i Shteteve të Bashkuara George W. Bush.

Këtë vit, pas ceremonisë, pati edhe një panel diskutimi, i titulluar “Trashëgimia e Komunizmit”, i cili u mbajt në Auditorium Lehrman në Fondacionin Heritage.

Ngjarja kulmoi me ceremoninë e vendosjes së kurorave dhe përfundoi me një panel diskutimi në fondacionin Heritage. Një kurorë në emër të organizatës Shtëpia e Lirisë Shqiptaro- Amerikan e vendosën zotërinjtë Mustafa Xhepa dhe Jadigjar Luzaj.

Folësit ishin parlamentarë ndërkombëtarë dhe anëtarë të Kongresit Amerikan shkruan Korrespondenti i AAFH në Washinton, DC, duke shtuar se të ftuar të huaj ishin zëvendës – kryetari i Komitetit të Punëve të Jashtme të Lituanisë, kryetari i Komitetit të Punëve të Jashtme të Parlamentit të Latvias, si dhe kryetari i Komitetit të Punëve të Jashtme të Parlamentit të Estonisë, të cilët detajuan historinë e komunizmit në shtetet balltike. Kryetari i Komitetit të Punëve të Jashtme të Parlamentit letonez duke ju drejtuar statujës, “Perëndesha e Demokracisë”, lidhur me përvojën e vendeve balltike nën komunizëm, ndër të tjera tha: “Kur hedh sytë tek “Perëndesha e Demokracisë”, shoh shpresë, sepse ishte pikërisht ky vend, që mundësojë dhjetëra mijëra latvianë, lituanezë dhe estonezë t’i shpëtojnë terrorit komunist dhe të ushqejnë ëndrrat e tyre për të fituar lirinë e humbur … kjo statujë është simbol shprese jo vetëm për lirinë e shteteve të pavarura balltike, por ajo është shpresa e madhe për të gjithë njerëzit që jetojnë nën shtypjen komuniste.”
Ndërkohë, që sipas AAFH-së thuhet se “Anëtarët e Kongresit Amerikan, i nderuari Jim Bridenstine, Dana Rohrabacher, dhe Ileana Ros-Lehtinen, u zotuan se do të mbështesin pa kursyer të gjitha çështjet në Kongresin Amerikan që kanë të bëjnë me çrrënjosjen e komunizmit dhe ekspozimin e krimeve të komunizmit. E nderuara Ileana Ros-Lehtinen, një refugjate kubaneze dhe gruaja e parë hispanike që shërben në Kongresin Amerikan, tregoi për vuajtjet e vazhdueshme dhe shtypjen e të drejtave të njeriut në vendet komuniste si Vietnami, Kina dhe Kuba. Ajo theksoi se, “Lufta e ftohtë mund të ketë përfunduar për historianët, por të mos harrojmë se lufta kundër komunizmit nuk ka mbaruar ende.”

” Duke folur në emër të kongresmenëve, ajo deklaroi: “Unë zotohem se ne do të japim mbështetjen tonë maksimale si anëtarë të Kongresit që të drejtat dhe liritë … të fitohen kudo dhe se nuk do të lejojmë që në asnjë vend të botës njerëzit të jetojnë nën shtypjen komuniste.”

Në fund të këtij reportazhi korrespondenti i AAFH në Washinton, DC, shkruan se Pas cermonisë së vendosjes së kurorave u mbajt sesioni shkemcor tek Fondacioni Heritage. Panelistët, Dr. Yang Jianli, i porsa nderuar me Medaljen e Lirisë “Truman-Reagan”, Dr. Bruce Klinger, bashkëpunëtor i lartë shkencor i studimeve për Azinë Verilindore e Qëndrore në fondacionin Heritage, Dr. Ariel Cohen, bashkë- punëtor i lartë shkencor për Studimet Ruse dhe Euroaziatike, si dhe Dr. Jose Cardenas, bashkëpunëtor i larte shkencor për Vizioni i Amerikave, analizuan vendet e shtypura nga komunizmi.
Punimet shkencore, që me ekspozimin e sistemit neo-komunist kinez të Dr. Yang Jianli e deri tek analiza e Dr. Cohen për gulagët sllavë, pasqyruan tmerret e komunizmit dhe theksuan rëndësinë e thirrjes së Dr. Lee Edwards në fjalën e tij hapëse: “Ne nuk mund të harrojmë, ne nuk duhet të harrojmë viktimat e sistemit komunist.”
Box : Siç dihet Shqipëria për nga numëri i popullsisë, ka numërin më të madh të viktimave të komunismit në botë : Të pushkatuar e të vdekur në burgjet e komunizmit 6109 . Të pushkatuar 5157, mes tyre 89 gra . Të dënuar politikë 17900, mes tyre 450 gra . Të vdekur në burg 952, mes tyre 7 gra . Humbën aftësitë mendore 273, mes tyre 29 gra . Të internuar 30383 veta . Burgje 23 . Kampe internimi 48