mbështetje Kosovës – Dielli

Amerika gjithmonë mbështetje Kosovës

February 19, 2017 by dgreca

Foto Gazeta DIELLI-Behlul Jashari: Në pritje të delegacionit nga SHBA sot herët në mëngjesin me bardhësi bore në Prishtinë para Kuvendit të Kosovës ngrihej Flamuri Amerika/

-Delegacioni nga Partneriteti për Demokraci i Dhomës së Përfaqësuesve të SHBA-ve në Prishtinë. Ritheksohet përkrahja e fuqishme dypartiake e Kongresit të SHBA-ve për Kosovën/

– Kosova është në axhendën e SHBA-ve, ashtu siç ka qenë nga të gjitha administratat dhe asgjë nuk ka ndryshuar, në aspektin e mbështetjes/

-Kryeministri Mustafa: Të arriturat e popullit të Kosovës, rezultat i përkrahjes së pazëvendësueshme të SHBA-ve/

-Kongresmenët edhe në takim me kryeparlamentarin Veseli rikonfirmojnë mbështetjen amerikane për Kosovën/

SPECIALE-Gazeta DIELLI nga korrespondenti në Kosovë Behlul JASHARI

PRISHTINË, 19 Shkurt 2017/ Kongresmenët amerikanë në takimet në Prishtinë rikonfirmojnë mbështetjen SHBA për Kosovën. Një delegacion dypartiak nga Dhoma e Përfaqësuesve e SHBA-ve në vizitën dyditore si pjesë e Partneritetit të Dhomës për Demokraci (HDP) zhvilloi takime dje me kryeministrin e Kosovës Isa Mustafa e sot me kryetarin e Kuvendit, Kadri Veseli.Delegacioni dypartiak nga Dhoma e Përfaqësuesve e SHBA-ve përbëhet nga 20 anëtarë që punon drejtpërdrejtë me shtetet partnere në gjithë botën për të mbështetur zhvillimin e institucioneve legjislative efikase, të pavarura dhe reaguese.Kryeministri i Republikës së Kosovës, Isa Mustafa, në takim me delegacionin dypartiak të Dhomës së Përfaqësuesve të SHBA-ve, udhëhequr nga kongresisti Peter Roskam, ku ishin të pranishëm edhe kongresisti i rangut më të lartë në Komisionin e Partneritetit të Dhomës për Demokraci (HDP), David Price, kongresisti Adrian Smith dhe kongresisti Gerry Connolly, i ka njoftuar gjerësisht për të arriturat e deritashme të Kosovë si dhe për prioritetet e Qeverisë në zhvillimin ekonomik, forcimin e shtetit ligjor, integrimet euroatlantike si dhe avancimin e sistemit arsimor dhe shërbimeve shëndetësore.Kryeministri Mustafa, i njoftoi kongresistët amerikanë edhe për zhvillimet aktuale në Kosovë, që lidhen me çështjen e demarkacionit të kufirit me Malin e Zi, përmbushjen e marrëveshjeve të dialogut të ndërmjetësuar nga BE-ja dhe me praninë e SHBA-së që po zhvillohet në Bruksel, raportet politike në Kosovë, transformimin e FSK-së dhe luftën kundër radikalizmit të dhunshëm dhe terrorizmit.Kongresistët Peter Roskam, David Price, Adrian Smith dhe Gerry Connolly, pasi vlerësuan të arriturat në Kosovë, u interesuan për zhvillimet e ndryshme që lidhen me jetën parlamentare, zhvillimin ekonomik, luftën kundër dukurive negative siç janë radikalizmi dhe terrorizmi dhe çështje të tjera.Kongresisti Peter Roskam, në fjalën e tij theksoi përkrahjen e mëtejme të SHBA-ve për Kosovën, duke u shprehur i impresionuar me progresin e deritashëm të Kosovës duke pas parasysh se ku ka qenë para pak vitesh dhe ku ka arritur tani.Kongresisti Roskam, po ashtu, inkurajoi Qeverinë e Kosovës që të vazhdojë përkushtimin e saj që hap pas hapi të avancohet zhvillimi i gjithanshëm dhe që Kosova të vazhdojë të jetë faktor i stabilitetit në rajon dhe më gjerë, thekson njoftimi dërguar nga Qeveria.Kryeministri Isa Mustafa me këtë rast theksoi se të gjitha të arriturat në Kosovë janë rezultat i përkushtimit të qytetarëve të Kosovës dhe përkrahjes së pazëvendësueshme që SHBA-të kanë dhënë dhe po vazhdojnë të japin për Kosovën.“Qeveria e Kosovës është plotësisht e përkushtuar që të vazhdojë avancimin e të gjitha aspekteve të zhvillimit dhe që në partneritet të përhershëm strategjik me SHBA-të të realizojmë synimet e qytetarëve të Kosovës”, tha kryeministri Isa Mustafa, me këtë rast.Në takim ishin të pranishëm edhe zëvendëskryeministri i parë, Hajredin Kuçi, ministri i Forcës së Sigurisë së Kosovës, Haki Demolli, ministri i Financave, Avdullah Hoti dhe zëvendësministri i Jashtëm, Valon Murtezaj.Në pritje të delegacionit për takim me kryeparlamentarin Kadri Veseli sot herët në mëngjesin me bardhësi bore në Prishtinë para Kuvendit kosovar ngrihej Flamuri Amerikan, krahas Flamurit Shtetëror të Kosovës e Flamurit të BE-së.Në pritje, kryetari i Kuvendit të Republikës së Kosovës, Kadri Veseli, ishte i shoqëruar nga nënkryetarët e Kuvendit, Xhavit Haliti, Sabri Hamiti, Fikrim Damka dhe Slobodan Petroviç.Kryetari Veseli falënderoi anëtarët e Dhomës së Përfaqësuesve të SHBA-ve për interesimin e vazhdueshëm të tyre për zhvillimet në vend, si dhe për mbështetjen e madhe e të pakursyer të Shteteve të Bashkuara të Amerikës për Kosovën në kohë dhe rrethana të ndryshme.Ai i njoftoi mysafirët nga Kongresi Amerikan për përparimet në Kosovë dhe proceset nëpër të cilat po kalon vendi ynë. Veseli e konsideroi shumë të vyer për Kuvendin e Kosovës përkrahjen amerikane nëpërmjet programeve të ndryshme, në mbështetje të deputetëve dhe zyrtarëve të Administratës, të cilët kanë pasur mundësinë të mësojnë shumë nga përvojat e Kongresit.Kreu i Kuvendit tha se Kosova ndihet krenare për marrëdhëniet e shkëlqyera me SHBA-të, të cilat, siç konfirmoi kryetari Veseli, do të mbesin të përjetshme.“Pas vizitës disa ditore që kisha në Shtetet e Bashkuara ku mu konfirmua mbështetja e Administratës së re për Kosovën, kjo vizitë e kongresmenëve në përvjetorin e nëntë të pavarësisë është edhe një rikonfirmim i mbështetjes amerikane për Republikën e Kosovës”, theksoi kryeparlamentari Veseli.Ai falënderoi në mënyrë të veçantë drejtuesit e këtij delegacioni, Peter Roskam dhe David Price, për mbështetjen e vazhdueshme që i kanë dhënë Kuvendit të Kosovës nga Komisioni për Partneritet dhe Demokratizim të Kongresit Amerikan Kuvendit të Kosovës përmes NDI.“Kosova po ecën me hapa të sigurt drejt integrimeve euro-atlantike dhe Kosova është faktor stabiliteti në rajon, falë punës dhe përkushtimit të institucioneve por edhe falë mbështetjes së përhershme të miqve tanë, në krye me Shtetet e Bashkuara të Amerikës”, theksoi kryeparlamentari Veseli.Udhëheqësi e delegacionit amerikan, Peter Roskam, nga ana e tij, theksoi se vjen me admirim të madh për Kosovën, të cilën e kanë zgjedhur për ta vizituar si shtetin e parë pas tranzicionit në Shtëpinë e Bardhë, për tu njohur me rrugëtimin e saj, por edhe si miq, për të siguruar që kjo marrëdhënie është e fuqishme dhe mund të thellohet edhe më tej.Ai tha se Kosova është në axhendën e SHBA-ve, ashtu siç ka qenë nga të gjitha administratat dhe asgjë nuk ka ndryshuar, në aspektin e mbështetjes.“Ne përfaqësojmë Dhomën e Përfaqësuesve dhe kemi një marrëdhënie me Kuvendin e Kosovës. Mendojmë se një Kuvend i fuqishëm është një demokraci e fuqishme. Dëshirojmë që marrëdhëniet midis Kongresit Amerikan dhe Kuvendit të Kosovës të jenë unike dhe specifike. Kosova është vendi ynë i parë, sepse ky vend është aq i rëndësishëm dhe e gjithë bota po shikon drejt Kosovës”, tha kongresmeni republikan Roskam, cituar në njoftimin e dërguar nga Kuvendi.Ndërsa kongresisti nga radhët e Partisë Demokratike, David Price, tha se SHBA-të kanë investuar në Kosovë dhe ky udhëtim në Kosovë tregon se pavarësisht ndërrimit të administratës, ajo ka mbështetje të parezervë nga Uashingtoni.Duke u përgjigjur në interesimin e kongresmenëve, nënkryetarët Xhavit Haliti, Sabri Hamiti dhe Sllobodan Petroviç, folën për raportet e brendshme, për raportet e Kuvendit me Qeverinë, për marrëdhëniet midis komuniteteve etj.Njoftimi dërguar nga Ambasada amerikane në Kosovë thekson se HDP-ja është një komision dypartiak me 20 anëtarë nga Dhoma e Përfaqësuesve e SHBA-ve që punon drejtë për drejtë me shtetet partnere në gjithë botën për të mbështetur zhvillimin e institucioneve legjislative efikase, të pavarura dhe reaguese.Më tej bëhet e ditur se, delegacioni që viziton Kosovën udhëhiqet nga Kryesuesi i HDP-së, kongresmeni Peter Roskam (Republikan-Illinois), dhe do të përfshijë kongresmenin e rangut më të lartë në këtë komision, David Price (Demokrat-Karolina e Veriut), pastaj kongresmenin Adrian Smith (Republikan- Nebraska), dhe kongresmenin Gerry Connolly (Demokrat-Virxhinia).Delegacioni takohet me Kryeministrin, Kryetarin e Kuvendit, anëtarë të shumtë të Kuvendit dhe shoqërisë civile, si dhe do të vizitojë pjesëtarët e ushtrisë së SHBA-ve me shërbim në Kosovë.Deklarata thekson se Delegacioni ka kënaqësinë që vie në Kosovë kaq afër Ditës së Pavarësisë së Kosovës, me qëllim që të ritheksojë përkrahjen e fuqishme dypartiake të Kongresit të SHBA-ve për Kosovën. Shtetet e Bashkuara janë të përkushtuara për të ndihmuar Kosovën që të lëvizë në shtegun e përparimit drejtë integrimit evropian duke forcuar institucionet si Kuvendi, dhe duke thelluar marrëdhëniet bilaterale.

SHBA-të, mbështetje Kosovës edhe në bujqësi

January 12, 2016 by dgreca

-Ambasadori Delawie tha se ka shumë potencial në sektorin e bujqësisë si një shtytës i rritjes ekonomike në Kosovë, dhe se ardhmëria e këtij sektori do të jetë e lidhur me zhvillimin e kulturave me vlera të larta dhe rritjen e qasjes në financa për agrobiznese/ Ministri Krasniqi takoi ambasadorin Greg Delawie/
PRISHTINË, 12 Janar 2016/ Ministri kosovar i Bujqësisë, Pylltarisë dhe Zhvillimit Rural, Memli Krasniqi ka pritur sot në një takim ambasadorin e Shteteve të Bashkuara të Amerikës në Prishtinë, Greg Delawie, me të cilin ka biseduar rreth politikave programore në bujqësi, me theks tek programet vjetore mbështetëse.
Ambasadori Delawie tha se ka shumë potencial në sektorin e bujqësisë si një shtytës i rritjes ekonomike në Kosovë, dhe se ardhmëria e këtij sektori do të jetë e lidhur me zhvillimin e kulturave me vlera të larta dhe rritjen e qasjes në financa për agrobiznese.
Ministri e falënderoi ambasadorin për përkrahjen që SHBA-të përmes USAID ka dhënë për Kosovën, me projekte të vazhdueshme edhe në bujqësi, në veçanti projekti NOA dhe tani projektin AGRO, që kap një vlerë prej rreth 12 milionë dollarëve. Ai tha se bashkëpunimi me USAID është i vazhdueshëm dhe që po jep mjaftë rezultate, dhe shfaqi interesin që ky bashkëpunim të jetë edhe në nisma të reja.
Ministri njoftoi ambasadorin për të arriturat gjatë vitit 2015 dhe sfidat që mbesin në këtë sektor. Bujqësia, tha ministri, është prioritet i qeverisë dhe në fakt përben një prej shtyllave kryesore të zhvillimit ekonomik. Në vitin 2015 vit, njoftoi ministri, janë ndarë 43 milionë euro për mbi 37 mijë fermerë në grante dhe subvencione, me ç’rast janë hapur agrobiznese e ferma të reja, si dhe janë hapur po ashtu edhe 2500 vende të reja pune direkte në bujqësi. Kjo përkrahje, theksoi ministri Krasniqi, do të vazhdojë edhe këtë vit, duke avancuar politikat programore, me zgjerim dhe rritje të mbështetjes dhe duke pasur gjithmonë në fokus gjithëpërfshirjen në mundësitë që ofrojnë masat mbështetëse të ministrisë.
Ai theksoi se në vitin 2015 është rritur transparenca dhe efikasiteti në implementimin e programit. Kjo, shtoi ministri, do të vazhdojë gjatë gjithë mandatit me qëllim që masat mbështetëse të japin sa më shumë rezultate dhe të rritet besimi në mundësitë që jep bujqësia./b.j/

Nju Jork-OBI, mbështetje Kosovës

September 29, 2015 by dgreca

-Për anëtarësimin në organizata ndërkombëtare dhe proceset tjera të rëndësishme/

-Kryeministri Mustafa në Nju Jork takon sekretarin e përgjithshëm të Organizatës për Bashkëpunim Islamik, Iyad Ameen Madani-/

Nju Jork, 29 Shtator 2015/ Sekretari i përgjithshëm i Organizatës për Bashkëpunim Islamik, Iyad Ameen Madani, në një takim sot në Nju Jork përgëzoi kryeministrin Isa Mustafa për progresin që po arrihet në Kosovë. Sekretari Madani shprehu mbështetjen konkrete të OBI-it për anëtarësimin e Kosovës në organizata ndërkombëtare dhe proceset tjera të rëndësishme. Gjatë takimit, ku ishte i pranishëm edhe zëvendëskryeministri i parë, njëherësh ministër i Jashtëm, Hashim Thaçi, u bisedua për mbështetjen e mëtejshme të OBI-t për fuqizimin e subjektivitetit ndërkombëtar të Republikës së Kosovës.Kryeministri Isa Mustafa e njoftoi për progresin në Kosovë dhe përkushtimin e Qeverisë së Kosovës për avancimin e gjithmbarshëm të reformave.

Kryeministri Mustafa theksoi angazhimin e Qeverisë së Kosovës për anëtarësimin në organizata ndërkombëtare, duke filluar nga UNESCO, INTERPOL-i dhe organizatat e tjera, duke kërkuar përkrahjen e OBI-t, në këtë rrugë. Kryeministri Mustafa e falënderoi sekretarin Madani për përkrahjen e Kosovës, deri më tani./b.j/

Inva Mula, mbështetje betejës së Kosovës për anëtarësim në UNESCO

September 8, 2015 by dgreca

Nga Behlul Jashari/ PRISHTINË, 8 Shtator 2015/ MPJ kosovare bën të ditur sot se, sopranoja me famë botërore Inva Mula, e cila të shtunën qëndroi në Prishtinë me rastin e ditës ndërkombëtare të bamirësisë, në një shkrim për prestigjiozen “La Lettre Diplomatique”, angazhohet në mbështetje të betejës së Kosovës për anëtarësim në UNESCO. E vendosur prej vitesh në Paris, ku edhe gjendet selia e UNESCO-s, zonja Mula-Ramadani u bën thirrje shteteve anëtare të pranojnë Kosovën në këtë organizëm kyç të Kombeve të Bashkuara. Inva Mula ishte ftuar në Kosovë në manifestimin shpirtëror kushtuar Nënës Terezë, ku këndoi premierë himnin e ri kushtuar shqiptares misionare, nobeliste të paqes. Në vijim ju sjellim të plotë shkrimin e zonjës Mula-Ramadani për botimin diplomatik francez “La Lettre Diplomatique”.

“UNESCO T’UA HAPË DYERT NJERËZVE TË KOSOVËS”
Nga Inva Mula Ramadani
Asnjë art nuk është më kozmopolit se opera. Asnjë gjuhë nuk është më ndërkombëtare se ajo e muzikës. Një vepër operistike është kënaqësi për t’u parë dhe dëgjuar sepse shpërfaq humanitetin – e mendimit, shprehjes dhe sjelljeve.
Por përqafimi i kozmopolitizmit, i vlerave universale nuk është rastesi. Eshtë edukim. Eshtë orientim. Eshtë qëndrim.
Babai im ka lindur ne Gjakovë ( Kosovë), nëna ime në Izhvek të Rusisë, një pjesë e familjes time jeton ende në Kosovë. Unë jam shkolluar në Tiranë dhe kam filluar karierën artistike në Paris për ta zhvilluar atë në përmasa ndërkombëtare nga Prishtina në Tokio, Moskë, Londër, New York, Buenos Aires, Milano,Vjenë , San Paolo, Madrid, Pekin etj etj .
Kjo dinamikë më ka plazmuar ndjenjat së pari të europianizmit, mandej të universalizmit. Sot, ndjehem qytetare e botës. Tejkalimi i kufizimeve “tani” dhe “këtu”, janë parakushte për sukses. Suksesi është gjendje mendore përpara se të bëhet realitet faktik. Ai përjetohet së brendshmi, para se të manifestohet së jashtmi.
Kam kënduar në site të mbrojtura nga UNESCO dhe në evente të UNESCO-s. Në të parat kam ndjerë pakohshmërinë – objekte kulturore të ndërtuar nga paraardhës tanë dhjetra shekuj më herët, sot janë pasuri e mbarë njerëzimit. Kufinjtë kohorë kapërcehen natyrshëm dhe ngjarja mund të ndodhte kurdo si për të na ndërmendur për metafizikën e muzikës dhe kulturës. Në evente të UNESCO-s kam marrë pjesë dhe shoh se si kjo organizatë zbut diferencat, përafron njerëzit, formëson koncepte, inicion aksione, duke krijuar një komunitet të qëndrueshëm dhe të emancipuar.
Ne jemi edhe produkt i rrethanave. E nisa me një rrëfim personal për të ardhur tek besimi im organik se një organizatë që promovon vlerat e kulturës, arsimit, bashkëpunimit, kërkimit shkencor si UNESCO do duhej të përfshinte në gjirin e saj vende dhe t’u ofronte mundësi të rinjve dhe të rejave të ndjehen qytetarë të botës dhe aksionit global për përmirësimin e vendeve te tyre dhe planetit tonë të përbashkët. Eshtë ora që UNESCO t-ua hapë dyert njerëzve të Kosovës.

Zvicra, mbështetje Kosovës në rrugën e zhvillimit ekonomik dhe financiar

January 13, 2015 by dgreca

PRISHTINË, 13 Janar /-Ambasadorja e Zvicrës në Prishtinë, Krystyna Marty Lang, shprehu gatishmërinë e shtetit të saj për të mbështetur Kosovën në rrugën e zhvillimit ekonomik dhe financiar, si dhe për thellimin e bashkëpunimit ndërmjet dy vendeve.
Ministri i Financave Avdullah Hoti, priti sot në takim ambasadoren Marty Lang, të cilën e falënderoi për punën, kontributin si dhe për bashkëpunimin e ngushtë me institucionet e Kosovës, në veçanti me Ministrinë e Financave. Sipas tij, ky bashkëpunim do të vazhdojë edhe në të ardhmen.
Gjatë takimit ministri Hoti e njohu ambasadoren për gjendjen financiare të vendit, përkushtimin e qeverisë për krijimin e kushteve më të mira për thithjen e investimeve të huaja në Kosovë, si dhe për përkushtimin e Ministrisë së Financave në luftimin e ekonomisë joformale./