Ministria e Kultures – Dielli

Kosovë-Ministria e Kulturës ndau çmimet për teatër

October 2, 2020 by dgreca

-Fituesit e çmimeve falënderuan për përkrahjen e vazhdueshme dhe marrjen e çmimeve e vlerësuan si një mirënjohje institucionale dhe një inkurajim për të punuar edhe më shumë në krijimtarinë e tyre artistike/

PRISHTINË, 2 Tetor 2020-Gazeta DIELLI/ Në Kosovë Ministria e Kulturës ndau çmimet vjetore për teatër.

Sot, zëvendësministrat e Ministrisë së Kulturës, Rinisë dhe Sportit Engelbert Zefaj dhe Halil Matoshi, në një ceremoni solemne, kanë bërë ndarjen çmimeve për teatër për vitin 2019.

Çmimi Kombëtar për Vepër Jetësore, që u ndahet personaliteteve të shquara në fushën e teatrit, për suksesin, të arriturat gjatë karrierës, risitë dhe kontributin e veçantë në avancimin e teatrit, në mënyrë unanime iu nda aktorit dhe regjisorit Luan Daka. Ky çmim iu nda atij duke u bazuar në kreativitetin e thellë, inovacionin dhe origjinalitetin që ai përfaqëson në fushën e artit dramatik, si në teatër, film, televizion dhe radio. Daka në rrafshin artistik është autor i teksteve skenike, regjisor i shfaqjeve, regjisor i radiodramave, aktor i suksesshëm i teatrit dhe filmit, ekspert i fushës teatrore dhe filmike, anëtar i jurive profesionale dhe në rrafshin akademik nga viti 1988 me përkushtimin dhe profesionalizmin tij pedagogjik ka nxjerrë me dhjetëra gjenerata të suksesshme të aktorëve.

Çmimi vjetor për shfaqjen më të mirë, që ndahet për shfaqjen që ka treguar sukses të jashtëzakonshëm për nga vlerat, profesionalizmi, shikueshmëria dhe suksesi në prezantimin kombëtar gjatë vitit paraprak, me tri vota pro dhe dy kundër iu nda shfaqjes “ERVEHEJA” e regjisores Drita Begolli, me arsyetimin se kjo shfaqje është një vepër e jashtëzakonshme që korrespondon me realitetin e të gjitha kohërave. Shfaqja ka koncept, thellësi, guxim dhe art të nivelit të lartë.

Çmimi vjetor për regjinë më të mirë, që ndahet për regjinë kreative, inovative dhe origjinale, në mënyrë unanime iu nda regjisores Elmaze Nura për shfaqjen “KOPRRACI”. Këtë çmim juria e ka ndarë duke u bazuar në nivelin e lartë artistik, kreativitetin e thellë, inovacionin teatror, përkushtimin profesional dhe mjeshtërinë e lartë regjisoriale. Suksesi i jashtëzakonshëm i kësaj shfaqjeje si në rrafshin ndërkombëtar dhe atë vendor është arritur kryekëput në saje të regjisë së Nurës, e cila këtë art të sentencës e sjellë në mënyrë origjinale, të pëlqyeshme dhe me vlera të reja estetike. Me shfaqjen “KOPRRACI” Kosova është përfaqësuar në festivale të rëndësishme ndërkombëtare dhe mbarëkombëtare, duke marrë edhe shpërblim për regjinë më të mirë.

Çmimi vjetor për aktorin/aktoren më të mirë, që i ndahet aktorit/aktores që ka pasur performancë të shkëlqyeshme në një rol ose disa role teatrore, me shumicë votash, iu nda aktorit Adrian Morina për rolin në shfaqjen “Unë jam vetë grua”.

Me shfaqjen “Unë jam vetë grua” Adrian Morina ka sjellë në skenë rrëfimin e shkëlqyer të transgjinorit dhe përmes karakterit të tij ka sjellë një rol të kompletuar.

Çmimi vjetor për prezantim të suksesshëm ndërkombëtar, që u jepet produksioneve teatrore, regjisorit, aktorit, dramaturgut, skenografit apo krijuesit për performancën dhe suksesin në prezantimin ndërkombëtar, në mënyrë unanime iu nda organizatës kulturore “Qendra Multimedia”, e cila realizoi disa prezantime ndërkombëtare në festivale prestigjioze dhe në të njëjtën kohë ka bërë edhe prezantimin e Kosovës në fushën e teatrit.

Gjatë kësaj ceremonie zëvendësministri Zefaj e vlerësoi lart ndarjen e këtyre çmimeve dhe tha se “kam kënaqësinë që jemi të gjithë bashkë në këtë ditë të rëndësishme për teatrin ku ashtu siç është edhe tradita Ministria e Kulturës, Rinisë dhe Sportit shpërblen laureatët.”

Duke i uruar të gjithë për çmimet zëvendësministri Zefaj tha se “ndarja e këtyre çmimeve është një lloj respekti dhe mirënjohje nga ana e institucioneve për angazhimin dhe punën kreative të artistëve, andaj sot uroj që puna dhe sukseset të mos mungojnë as në vitet e ardhshme”.

Ndërsa, fituesit e këtyre çmimeve falënderuan ministren Dumoshi dhe zëvendësministrat Zefaj e Matoshi për përkrahjen e vazhdueshme dhe marrjen e çmimeve edhe ata e vlerësuan si një mirënjohje institucionale dhe një inkurajim për të punuar edhe më shumë në krijimtarinë e tyre artistike.

MINISTRIA E KULTURËS DHE KËSHILLI I MËHALLËS

May 27, 2018 by dgreca

Ministria e Kultures ne Prishtine nuk e perktahu botimin kritik te doreshkrimit te Martin Camajt/

Ministria e Kulturës e Rinisë dhe Sporteve më në fund e bëri publike angazhimin e saj në jetën kulturore duke mbështetur disa nga individët e caktuar dhe organizatat kulturore, kur e kur më shumë se një herë!

Duke dëgjuar për përkushtimin e ministrit të ri, Kujtim Gashi, për kulturën, kishim menduar se këtë vit do të jetë ndryshe: përkrahja nuk do t’u bëhet vetëm dy a tri shtëpive botuese, sikur ka ndodhur me ministrat e gjertanishëm, dhe se përkrahja nuk do t’u bëhet dy a tri herë individëve të njëjtë, sikur ndodhi edhe kësaj here!

Duke dëgjuar për përpjekjen e shtëpive botuese që në jetën tonë kulturore dhe madje shkencore, të sjellin vepra dhe vlera të rëndësishme kulturore, letrare e shkencore, kishim besuar se ministri sado pak do të formojë një Këshill të denjë jo-oborrtar për vlerësimin e tyre, po atij sikur nuk i mjaftoi kjo, formoi një Këshill të mëhallës, që për letërsinë flasin e kuvendojnë ndër skuta kafenesh e organizata joqeveritare, po kurrë në institucionet arsimore, shkencore, kulturore e publike.

Mjafton t’i hedhësh një sy listës së paraqitur në këtë përzgjedhje, për të parë se si në këtë konkurs janë përfshirë shkrimtarë dhe vepra me krijime letrare që vetëm facebook-u personal i tyre i duron, ndërsa në të njëjtin konkurs janë shpërfillur vepra si ajo e dorëshkrimit të veprës së parë të Martin Camajt, zbulimi i së cilës vitin e kaluar ishte ngjarje më vete në jetën kulturore shqiptare. Nuk besoj se Këshilli i përbërë prej personaliteteve me ‘grada’ shkencore e kulturore, universitare e partiake, nuk e dinte këtë gjë dhe nuk besoj se duhet të ishin më shumë se marangozë, sikur do të shprehej dikur miku im Robert Elsie, për të kuptuar këtë vlerë që gjatë këtij viti pritej t’i shtohej jetës kulturore shqiptare.

E dorëshkrimi i veprës së parë, përkatësisht versionit të parë të veprës Nji fyll ndër male të Martin Camajt, me kërkesë në këtë ministri për botim tekstologjik, ishte një prej kontributeve, që studiuesit dhe institucionet kombëtare, ka më shumë se një dekadë që po përpiqen t’ia kthejnë Martin Camajt dhe atdheut të tij.

Kaq modest, intelektualisht, profesionalisht dhe kulturalisht paska qenë Këshilli i Ministrisë (pasi i mësova vetëm emrat e dy a tre anëtarëve, po i kursej edhe emrat e tyre) sa të mos e di se Martin Camaj nuk është poeti a poetja e facebook-ut N. N.; sa të mos e kuptojë se dorëshkrimi i veprës së parë të Martin Camajt Nji fyll nder male, përkatësisht versioni i parë i saj, i përgatitur me parathënie të autorit dhe jo ai që u botua me parathënie të Dançetoviqit, nuk është një libër i vjetër i shokut Tito; sa të mos ketë dëgjuar që në studimet letrare ky do të ishte i pari botim i këtij lloji në Kosovë dhe një prej veprave të rralla të botuara në gjithë hapësirën shqiptare, e të tjera e të tjera si këto. Si të vlerësohet puna, përkatësisht dija, e një Këshilli të këtij niveli, apo të besojmë se po ky Këshill ndër skuta kafenesh, përsëri do të ankohet, se si ishte ministri Kujtim Gashi, ai ‘që futi në Këshill shokët e mëhallës’ dhe kështu ata me vota imponuan përzgjedhjen e disa botuesve dhe veprave të tyre, ndërsa emra dhe vepra të caktuara të facebook-ut i shtoi në fund vetë ministri!

Ndryshe si të shpjegohet përzgjedhja klanore e shtëpive botuese dhe individëve gjatë këtij viti, si të shpjegohet përzgjedhja, përkatësisht përjashtimi i disa shtëpive botuese dhe individëve, që më parë se sa përjashtimi i botuesve, është përjashtim i vlerave historike dhe letrare të autorëve dhe veprave, që pritej të botoheshin!

Begzad Baliu, editor i shtëpisë botuese ERA.

Prishtinë, më 25 maj 2018

Me respekt, – Regards Prof.dr.Begzad Baliu Prodekan – Vice-dean Universiteti i Prishtinës – University of Prishtina Fakulteti i Edukimit – Faculty of Education E-mail: begzad.baliu@uni-pr.edu (official) bbaliu@yahoo.com (private) Tel: +377 44 173 596

KOSOVA, MINISTRIA E KULTURES “MBARTET” NË PRIZREN

October 7, 2017 by dgreca

-Vendim i Qeverisë së Kosovës: Një pjesë e Ministrisë së Kulturës vendoset në Prizren. E mirëpret qyteti historik, më i madhi jugor i Kosovës afër kufirit me Shqipërinë/

PRIZREN, 7 Tetor 2017-Gazeta DIELLI-Behlul Jashari/ Një pjesë e Ministrisë së Kulturës, Rinisë dhe Sportit e qeverisë së Kosovës do vendoset në Prizren. Ky qytet historik, më të madhi jugor i Kosovës afër kufirit me Shqipërinë, e ka mirëpritur vendimin e Qeverisë.Me kërkesën e Ministrisë së Kulturës, Rinisë dhe Sportit, Qeveria e Kosovës në mbledhjen e të hënës së kësaj jave ka aprovuar vendimin për bartjen e një pjese të stafit politik e profesional të kësaj ministrie në qytetin e Prizrenit. Vendimi do të realizohet nga ministria, komuna dhe institucionet tjera, u paralajmërua në mbledhjen e Qeverisë së drejtuar nga kryeministri Ramush Haradinaj.

Ministri i Kulturës, Rinisë dhe Sportit, Kujtim Gashi, në vizitën në Prizren, dje pasdite, i dorëzoi kryetarit të Komunës, Ramadan Muja, vendimin e qeverisë, si dhe kërkesën e ministrisë për shqyrtim në Kuvendin Komunal dhënien në shfrytëzim të dy objekteve në Prizren – të Rektoratit të Universitetit “Ukshin Hoti”, në qendër të qytetit dhe të Internatit (Xhandarmërisë) në lagjen e Terzinjve.

“Ne, sot kryetarit ia kemi dorëzuar kërkesën e cila ka të bëjë me hapësirat e Rektoratit të Universitetit, ku kemi pasur biseda edhe me Rektorin, dhe jemi pajtuar që ky objekt t’i jepet në shfrytëzim Ministrisë, por sigurisht se vendimin përfundimtar do ta merr Komuna. Dhe objekti i dytë do të jetë ai i Internatit, një objekt nën mbrojtje, por në të cilin duhet të investohet për konservimin, restaurimin dhe adaptimin e tij si objekt për shfrytëzim nga Ministria”, tha ministri GashiNdërsa, kryetari i Prizrenit, Ramadan Muja u shpreh se e mirëpret kërkesën nga ana e Ministrisë por edhe faktin se ministri i Kulturës, Rinisë dhe Sportit vjen nga qyteti historik i Prizrenit.“Qyteti i Prizrenit e ka mirëpritur një vendim të këtillë, javën e kaluar, të Qeverisë së Republikës së Kosovës dhe është kënaqësi për ne, qytetin e Prizrenit, për njerëzit e kulturës, e sporteve dhe unë jam shumë i bindur se Komuna e Prizrenit do të bashkëpunojë hollësisht me ministrinë për avancimin e zhvillimit të kulturës në Republikën e Kosovës”, tha ai.Së bashku, Gashi dhe Muja vizituan këto dy lokalitete, ku pritet të vendoset një pjesë e stafit politik, profesional e administrativ i Ministrisë së Kulturës nga fillimi i shkurtit 2018.

JA SI DO TE LEVIZET TE DIELEN NE TIRANE

September 19, 2014 by dgreca

Ministria e Kulturës bëri sot publike detajet dhe mënyrën se si do të jetë e organizuar vizita e Papa Françeskut në Shqipëri, më datë 21 Shtator 2014, një ditë kjo e veçantë dhe historike për shqiptarët.
Në këtë kontekst është hartuar e vënë në zbatim një plan i posaçëm masash me detyra konkrete për të gjitha strukturat e policisë dhe të gjithë institucionet e përfshira me përgjegjësi për sigurinë e vizitës së Papës në Shqipëri.
Policia e Shtetit do të kalojë në gatishmëri të përforcuar në të gjithë vendin, ndërkohë që 2500 forca policore do të jenë të angazhuara me detyra konkrete për të siguruar mbarëvajtjen e të gjitha aktiviteteve të planifikuara. Janë marrë masa të gjithanshme duke nisur nga Pikat e Kalimit Kufitar e deri në brendësi të territorit.
Policia e Shtetit bën me dije publikun se do të ketë kontrolle të shtuara policore në të gjitha akset rrugore, si dhe në të gjitha pikat hyrëse në kryeqytet. Në zonën ku do të zhvillohet aktivitetet e parashikuara në axhendën e vizitës, masat e sigurisë dhe prezenca e punonjësve të Policisë së Shtetit me uniformë dhe civilë, do të jetë maksimale.
Ministria e Punëve të Brendshme dhe Policia e Shtetit u kërkon të gjithë qytetarëve të kufizojnë në maksimumin e mundshëm lëvizjet me automjetet e tyre në të gjitha akset rrugore të qytetit të Tiranës, si dhe akset që lidhin kryeqytetin me zonat përreth tij gjatë ditës së vizitës së Papës.
Policia do të jetë në gatishmëri të plotë për të shoqëruar të gjitha autoambulancat në rastet e emergjencave shëndetësore.
Lëvizja e automjeteve që do të transportojnë pelegrinët
Autobusët që do të sjellin pelegrinët nga Veriu i Shqipërisë do të devijojnë lëvizjen tek Sheshi Shqiponja përmes Unazës së Re, duke kaluar tek rruga e Kavajës drejt kryqëzimit tek “21 Dhjetori”, ku do të zbresin pelegrinët. Më pas parkimi i autobusëve do të bëhet në Unazën e Re.
Autobusët që do të sjellin pelegrinët nga Jugu i Shqipërisë do të qarkullojnë përmes aksit Plepa- Ndroq-Kombinat, duke kaluar tek rruga e Kavajës drejt kryqëzimit tek “21 Dhjetori„ ku do të zbresin pelegrinët. Më pas parkimi i autobusëve do të bëhet në Unazën e Re.
Autobusët që do të sjellin pelegrinët nga Juglindja e vendit do të kalojnë përmes Unazës së madhe dhe më pas tek Kopshti Zoologjik do të bëhet zbritja e pelegrinëve dhe njëkohësisht parkimi i autobusëve.
Për automjetet me të cilat do të bëhet transporti i personave me aftësi të kufizuar pjesëmarrës në aktivitetet, parkimi i tyre do të bëhet tek Fakulteti Filologjik.
Lëvizja e autobusëve me pelegrinë do të lejohet deri në orën 08:00. Pas orës 08:00 asnjë autobus nuk do të lejohet të hyj në qytet.
Lëvizja e qytetarëve që do të marrin pjesë në aktivitet
Në të gjithë perimetrin që rrethon Sheshin Skënderbej, Bulevardin Dëshmorët e Kombit dhe Sheshin Nënë Tereza janë vendosur 27 pika kontrolli, ku do të realizohet kontrolli i të gjithë pjesëmarrësve në ceremoni me detektor metalesh, lëndësh eksplozive dhe pajisjesh të tjera speciale për kontroll e mbikëqyrje.
U kërkohet të gjithë pjesëmarrësve në ceremoni që të kalojnë përmes këtyre pikave të kontrollit. Nëse tentojnë të kalojnë jashtë këtyre pikave do të shoqërohen në Komisariatet e policisë.
Personat që do të marrin pjesë në ceremoni me ftesa, bashkëngjitur ftesës duhet të kenë edhe kartën e identitetit. Nga ana e policisë do të bëhet kontrolli me listat përkatëse në pikat e kontrollit dhe nuk do të lejohen personat që nuk kanë kartat e identitetit. Personat që kanë ftesë por nuk do të figurojnë në listat që ka Garda apo Policia e Shtetit në pikat e kontrollit do të shoqërohen në ambientet policore.
Lëvizja drejt Aeroportit të Rinasit dhe fshatit Bubq
Aksi rrugor në drejtim të Rinasit do të jetë i bllokuar nga ora 08:00 deri në orën 10:30.
Të gjitha akset rrugore në drejtim fshatit Bubq do të jenë të bllokuara nga ora 17:00 deri në ora 19:00.
Aksi Bubq – Rinas do të jetë i bllokuar nga ora 17:00 deri në 20:30.
Qytetarëve që kanë lëvizje drejt aeroportit u kërkohet që të shfrytëzojnë hapësirat jashtë këtyre harqeve kohore për shkuar në Rinas.
Asistenca mjekësore
Në Bulevardin “Dëshmorët e Kombit” dhe në Sheshin ”Nënë Tereza”, Ministria e Shëndetësisë ka marrë masa në mënyrë që qytetarët të asistohen nga:
Çadra me staf mjekësor të specializuar
15 ambulanca
helikopter mjekësor
dy qendra mjekësore të ndihmës së shpejtë do të ngrihen në Pallatin e Kongreseve dhe përgjatë Blv „Dëshmorët e Kombit”
vullnetarë në pikat e ujit përgjatë gjithë kohës së zhvillimit të aktivitetit;
vullnetarë me çanta uji përgjatë Blv „Dëshmorët e Kombit;
Në Bulevardin „Dëshmorët e Kombit” dhe përreth tij do të vendosen 60 tualete të lëvizshme, me akses edhe për njerëzit me aftësi të kufizuara.
Vullnetarët, e vendosur përgjatë gjithë bulevardit „Dëshmorët e Kombit” do t’i identifikoni nga shenjat dalluese (bluza dhe baxha).
Ekrane LIVE
Ardhja, takimet dhe Mesha e shenjtë që do të mbajë Papa Françesku do të transmetohen LIVE në ekrane të vendosur përgjatë gjithë Bulevardit „Dëshmorët e Kombit”, sheshi „Nënë Tereza” dhe Pallatit të Kongreseve.
Pallati i Kongreseve do të transformohet në një qendër mediatike ku agjencitë ndërkombëtare të medias të akredituara për këtë vizitë do të transmetojnë LIVE vizitën e Papa Françeskut.
Programi i vizitës së Papa Françeskut në Tiranë
Më 21 shtator 2014, ditë e diel, Papa do të mbërrijë në aeroportin e Rinasit në orën 9.00 ku do të pritet me një ceremoni të veçantë nga Kryeministri shqiptar Edi Rama.
Në orën 9:30, Papa do të pritet nga Presidenti i Republikës.
Në orën 10:00 do të takohet me autoritetet në sallën e pritjes së Presidencës dhe do të ketë një fjalim të Atit të Shenjtë.
Në orën 11:00 do të kremtohet një meshë në sheshin “Nënë Tereza”, shoqëruar nga fjala e Papa Franceskut në fund të saj.
Në orën 13:30, papa do të takohet në një drekë me Ipeshkvinë shqiptare dhe shpurën papnore.
Në orën 16:00, papa do të takohet me krerët e komuniteteve të tjera dhe komuniteteve të krishtera në Universitetin katolik “Zoja e Këshillit të Mirë” dhe aty do të mbajë një fjalim.
Në orën 17:00 do të ketë një kremtim të lutjes mbrëmesore në katedralen e “Shën Palit” në Tiranë, ku do të ketë edhe një fjalim të posaçëm.
Në orën 18:30 do të ketë një takim me fëmijët e qendrës “Betania” dhe një përfaqësi të qendrave bamirëse të kishës katolike në Shqipëri.
Në orën 19:45, Papa do të largohet me një ceremoni nga aeroporti “Nënë Tereza”.
Këshilla për qytetarët që do të marrin pjesë në ceremoni
Qytetarët që do të marrin pjesë në ceremoni të evitojnë veshjet e rënda, pasi nga policia do të ketë kontrolle trupore.
Nuk duhet të kenë me vete çanta shpine apo valixhe të ndryshme.
Të mos mbajnë sende të forta apo objekte të tjera që mund të jenë të dyshimta për forcat e policisë.
Nuk do të lejohet mbajtja e shisheve të qelqit. Rekomandohet përdorimi i shisheve plastike për ujë apo pije të tjera freskuese.
Qytetarët që dëshirojnë të marrin pjesë në meshë, duhet të afrohen drejt sheshit para orës 09.00. Pas kësaj ore do të jetë e pamundur hyrja në Sheshin ”Nënë Tereza”. Meshën mund ta ndjekin të gjithë.
Sheshi “Nënë Tereza” është një hapësirë e limituar për arsye sigurie, ku vendi i pjesëmarrjes do të jetë i përcaktuar nga Kisha dhe autoritetet e protokollit të Shtetit.
Përgjatë Bulevardit mesha mund të ndiqet nëpërmjet ekraneve që transmetojnë direkt.
Policia e Shtetit dhe Garda e Republikës ka marrë të gjitha masat për mbarëvajtjen e qetë dhe sigurinë përgjatë gjithë ditës, jo vetëm në zonën e qendrës, por në të gjitha vendet ku do të zhvillojë takime Papa Françesku.
Për qytetarët janë vënë në dispozicion dy numra:
Numra emergjence: Telefononi në numrin 129 për të gjitha rastet kur do të konstatohet diçka të dyshimtë.
Telefononi për ndihmë mjekësore në numrin 127 dhe 042222235(Kortezi ATSH-Almarina Gegvataj)