Tensionet Trump-Merkel, i kanë hipë nervat NATO-s

July 10, 2018 by dgreca

NATO po mundohet të pengojë përsëritjen e samitit katastrofik të G7/

Drejtuesit e NATOs u mblodhën këtë javë në një takim që synonte dhënien e përgjigjeve më të forta ndaj kërcënimeve globale. Por kriza më e madhe mund të ketë të bëjë me pikëpamjet e ndryshme midis Trumpit dhe Gjermanisë.

Presidenti amerikan tha javën e kaluar në fjalimin e mbajtur në Montana se do të shkojë në takim, “për t’ i thënë NATO-s: ‘Ju duhet të filloni të paguani faturat tuaja. Shtetet e Bashkuara nuk do të kujdesen për çdo gjë!'” Masa e njerëzve shpërtheu në duartrokitje kur Trump iu kthye temës së preferuar: shpenzimeve të ulta të Gjermanisë për çështjet e mbrojtjes dhe kryesueses së saj, kancelares Angela Merkel. Trump tha se “i ka thënë Angelës” se “ai nuk mund garatojë mbrojtjen e mëtejshme dhe….nuk e di sa e mbrojmë ne veten duke ju mbrojtur juve.”

Kjo godet një nga rregullat fundamentale të aleancës ushtarake, të shprehur në artikullin V të saj, për mbrojtjen e ndërsjelltë të njeri tjetrit dhe rrezikon shpresat e NATO-s për të organizuar një samit të dirigjuar mirë më 11 dhe 12 korrik, ditën e inagurimit të selisë së re. Ajo që mund të quhet “sukses” sot është të mos ketë dështim diplomatik si ai që ndodhi në takimin e G7 në fillim të qershorit, ku Trump refuzoi të firmoste deklaratën përfundimtare, e quajti kryeministrin kanadez Justin Trudeau “të pasinqertë” dhe u kap në një fotografi që u shpërnda menjëherë në rrjetet sociale, fotografi në të cilën dukej duke këmbyer vështrime të ashpra me kancelaren gjermane.

Donald Trump Angela Merkel und Jens Stoltenberg (Picture alliance/AP Photo/E. Vucci)

“Ne kemi të drejtë të jemi të nervozuar”, thotë Sophia Besch, nga qendra Centre for European Reform (CER), lidhur me mundësinë që përplasjet Merkel-Trump të prishin samitin. “Trump ka vënë 2 përqindshin si nivelin që çdo udhëheqës evropian të marrë bekimin e tij, prandaj të gjithë janë të shqetësuar.” Vetëm 7 vende aleate përveç SHBA investojnë tek ushtritë e tyre në nivelin e dëshiruar, ndërsa 29 vendet e tjera janë duke e rritur tani buxhetin e mbrojtjes, një tendencë që filloi në vitin 2014.

‘Sherret e NATO-s çojnë ujë në mullirin e Putinit‘

Ndërkohë që i ka dërguar letra shumë aleatëve duke i paralajmëruar se shpenzimet e tyre ushtarake nuk janë të kënaqshme, pakënaqësitë e Trumpit pritet të drejtohen kryesisht kundër Merkelit, e cila drejton ekonominë më të madhe të Evropës, duke dhënë vetëm 1,2 përqind të prodhimit të përgjthshëm bruto për mbrojtjen, me një plan që ta rrisë këtë në 1,5 përqind në vitin 2025.

Megjithëse është dakord se Gjermania duhet të rrisë më shumë shpenzimet e mbrojtjes, Besch mendon se retorika e pafund e Trumpit është kundërproduktive dhe madje e rrezikshme.”‘Çdo gjë që minon aleancën transatlantike shkon në favor të presidentit rus, Vladimir Putin”, i thotë ajo DW. “Mënyra se presidenti Trump veçon Angela Merkelin dhe ndan potencialisht evropianët”.

Agjitacioni në rend të ditës

Por James Appathurai, zëvendës asisten i Sekretarit të Përgjithshëm të NATO-s, për çështjet politie dhe politikat e sigurisë, shpjegon se aleanca nuk mund t’ i bjerë shkurt diskutimeve për “paratë, aftësitë dhe kontributet”. Është shumë e rëndësishme që ne të mos përfundojmë në një situatë ku Shtetet e Bashkuara të irritohen aq shumë sa t’u krijohet përshtypja se duhet të marrin vendime të tjera”. Kjo do kishte pasoja të tmerrshme për të gjithë. Ajo që duhet të bëjmë ne është që të tregojmë se ngarkesat janë ndarë në mënyrë të drejtë në kurriz të të gjithëve”. Trump ka sugjeruar tashmë se mund të largojë nga Gjermania 35 mijë ushtarë të personelit të stacionuar aty.

Ka edhe shumë tema të tjera që kërkojnë kujdes, si përgjigje e unifikuar ndaj agresionit rus është një nga më të qartat. Shqetësime të reja janë krijuar nga përgjigja joroduktive e Trumpit për çështjen e aneksimit rus të rajonit ukrainas të Krimesë, një nga ngjarjet më transformuese në historinë e NATO-s së pas Luftës së ftohtë.(Sipas DW)

Komandanti i Forcës Detare të NATO-s vizitoi Shqipërinë

July 7, 2018 by dgreca

Komandanti i Forcës Detare të NATO-s, NënAdmiral Clive CC Johnstone, vizitoi Shqipërinë/

Nga Shefqet Kërcelli/

Në kuadër të bashkëpunimit midis Forcave tona të Armatosura dhe Aleancës Veriatlantike, në datat 4-5 korrik 2018, zhvilloi një vizitë zyrtare në vendin tonë, Komandanti i Forcës Detare të NATO (Allied Maritime Command, MARCOM), NënAdmiral, {VADM}. Clive CC Johnstone.

Në ditën e parë të vizitës, NënAdmiral Johnstone, u prit nga Shefi i Shtabit të Përgjithshëm të FARSH, Gjeneral Brigade Bardhyl Kollçaku. Mbasi i uroi mirëseardhjen në vendin tonë, Gjeneral Kollçaku, theksoi se Forca Detare është një nga prioritetet kryesore te FARSH, për modernizimin, trajnimin dhe stërvitjet e përbashkëta. Këto aktivitete kanë synim përmbushjen e standarteve e kërkesave të NATO-s, por edhe detyrave në nivel kombëtar, në mënyrë që të mund të shtojmë kontributin e FARSH në hapësirën tonë Detare. Në vijim gjatë takimit Gjeneralbrigade Kollçaku solli në vëmendje kontributin e Forcave Detare Shqiptare në Detin Egje, në kuadër të misionit “Sea Guardian”, me një Anije Patrulluese si pjesë e Grupit Detar të NATO-s, të caktuar për të patrulluar në dy zona kundër emigracionit të paligjshëm, si dhe pjesëmarrjen e tyre në stërvitjet vjetore të marinës, kryesisht me vendet e NATO, si Greqia, Italia, Sllovenia dhe Mali i Zi. Nga ana e tij NënAdmirali Johnstone, vlerësoi maksimalisht shërbimin e Forcës Detare Shqiptare në operacionin “Sea Guardian”, në Detin Egje, duke e siguruar Gjenera Kollçakun dhe FA shqiptare për vijimësinë e bashkëpunimit edhe në të ardhmen, si dhe mbështetjen e Forcës Detare Shqiptare në operacionet e NATO-s. Gjatë takimit, të dy bashkëbiseduesit diskutuan edhe për perspektivat dhe mjedisin e sigurisë si dhe sfidat në kuadër të këtij bashkëpunimi me strukturat e NATO-s. Në ditën e dytë të vizitës, NënAdmiral Johnstone vizitoi Komandën e Forcës Detare, ku u prit nga Komandanti i kësaj Force, Gjeneralmajor Ylber Dogjani dhe kuadro të shtabit. Gjatë takimit Gjeneral Dogjani falenderoi VADM. Johnstone për mbështetjen që komanda Detare e NATO-s ka dhënë për Forcën tonë Detare, veçanërisht gjatë qëndrimit në mision në detin Egje. Ai e njohu VADM Johnstone me gjendjen aktuale të Forcës, arritjet dhe sfidat me të cilat përballet FD shqiptare.

Zoti Dogjani theksoi se, po synohet realizimi i objektivave që ka Forca Detare, për sa i përket situatës detare, shkëmbimit të informacionit dhe rritjes së ndërveprueshmërisë me aleatët, gjithashtu vlerësoi operacionin në detin Egje, si një nga eksperiencat më të vyera për efektivat tanë. Nga ana e tij VADM Johnstone, shprehu interes veçanërisht mbi sfidat dhe vështirësitë me të cilat përballet Forca Detare shqiptare dhe nënvizoi mbështetjen e tij për shtimin e kapaciteteve operacionale të FD shqiptare. Për sa i përket operacionit “Sea Guardian”, në detin Egje, VADM. Johnstone tha se, prania e anijes shqiptare atje ndihmoi të balancohej prania e forcave në det, ndaj shprehu falënderim për këtë. Ajo që dua të theksoj është: “Jam i befasuar nga aftësitë që demonstrojnë efektivat tuaj, janë staf shumë i zoti, keni oficerë shumë cilësorë dhe faleminderit për këtë”. Vice Admirali u njoh gjithashtu me strukturën dhe kapacitet që ka Forca Detare dhe më pas zhvilloi vizitë në një nga anijet e klasit Iliria. Zoti Johnstone vizitoi anijen “LISSUS”, e cila ishte bregëzuar enkas për këtë vizitë në molin nr.5 të portit të Durrësit. Këtu Komandanti i MARCOM, u prit nga kuadro dhe detarë të Grupit patrullues të Kepit të Palit dhe ekuipazhi i anijes. Gjatë takimit VADM Johnstone falenderoi direkt detarët tanë për aftësitë e tyre profesionale dhe kontributin në kuadër të operacioneve të NATO-s. Gjithashtu zoti Johnstone zhvilloi një bisedë të ngrohtë, të hapur e miqësore si detari me detarët, pamvarësisht gradës e funksionit. Ndërkohë kuadrot e Flotiles sonë detare dhe ekuipazhi i anijes “LISSUS”, falenderuan VADM Johnstone për vizitën dhe i premtuan se, dhe në të ardhmen detarët tanë do jenë të përkushtuar për kryerjen e operacioneve e stërvitjeve të përbashkëta me strukturat e Komandës detare të NATOS. {MARCOM}. Mbasditen e 5 korrikut, VADM Johnstone u largua nga vendi ynë.

Presidenti i Asamblesë Parlamentare të NATO-s, në Kosovë

June 29, 2018 by dgreca

NATO-Kosova, lidhje të fortë prej shumë vitesh/

1 ok Presidenti 1 Thaci NATO 1 Biseda 1

-Presidenti i Asamblesë Parlamentare të NATO-s, Paolo Alli: NATO-ja dhe Kosova kanë një lidhje të fortë prej shumë vitesh/

-Presidenti Thaçi: NATO është në Kosovë, por tani është koha që edhe Kosova të jetë në NATO/

-Kryeministri Haradinaj: Kosova në NATO e sheh sigurinë dhe paqen e përjetshme/

-Në vizitën sot në Prishtinë, delegacioni i Asamblesë Parlamentare të NATO-s zhvilloi takime fillimisht në Kuvendin e Kosovës/

Gazeta DIELLI nga korrespondenti në Kosovë Behlul Jashari

PRISHTINË, 29 Qershor 2018/ NATO-ja dhe Kosova kanë një lidhje të fortë prej shumë vitesh, tha sot në Prishtinë Presidenti i Asamblesë Parlamentare të NATO-s, Paolo Alli, dhe theksoi rëndësinë e vazhdimit të përparimit të Kosovës në rrugën drejt anëtarësimit në NATO.
“Jam këtu sot si President i Asamblesë Parlamentare të NATO-s, për të demonstruar edhe njëherë se Asambleja Parlamentare është shumë e afërt me Kosovën, është shumë e lidhur dhe e përkushtuar me Ballkanin Perëndimor, sepse ne mendojmë se Ballkani Perëndimor është pjesë esenciale e Evropës”, theksoi Presidenti Alli.Ai tha se janë duke bërë më të mirën për të mbështetur përpjekjet që Kosova është dukë bërë në procesin e reformës, që është e nevojshme për anëtarësim në NATO.“Ne shohim progres real, ne shohim gjithashtu se ka punë për t’u bërë, veçanërisht në normalizimin e marrëdhënieve me Serbinë, por ne jemi të sigurt se udhëheqja e juaj është shumë e fuqishme dhe ju do të keni sukses në rrugëtimin tuaj për integrim euroatlantik”, tha Alli, duke theksuar se prezenca e misionit të KFOR-it, përpjekja që NATO ka bërë në vitet e kaluara për të kontribuar në stabilitet, në siguri dhe paqe, është dëshmi se Kosova dhe Ballkani Perëndimor duhet të jenë më afër Evropës.Në pyetjet e gazetarëve për takimet e zhvilluara me zyrtarët e NATO-s, Kryeministri Ramush Haradinaj tha se në këto takime është biseduar për perspektivën e Kosovës, tranzicionit dhe anëtarësimit në NATO.“E gjithë perspektiva e rajonit tonë është një fjalë. Ashtu sikurse vendet tjera edhe Kosova në NATO e sheh sigurinë dhe paqen e përjetshme”, tha Kryeministri Haradinaj, pas takimit me Presidentin e Asamblesë Parlamentare të NATO-s, Paolo Alli.

Duke theksuar bashkëpunimin e vazhdueshëm me NATO-n, Kryeministri Haradinaj tha se Kosova i gëzohet ardhjes së presidentit të Asamblesë Parlamentare, ku edhe Kosova ka statusin e vëzhguesit.
Në takim, Kryeministri Haradinaj ka thënë se Kosova dhe populli i saj do t’i jetë përjetë mirënjohës dhe asnjëherë nuk do ta harrojë ndihmën që NATO ka dhënë në të gjitha fazat e shtetndërtimit.Kryeministri Haradinaj theksoi rolin e rëndësishëm të NATO-s në garantimin e paqes dhe të sigurisë dhe e vlerësoi forcën paqeruajtëse të KFOR-it si një partner të rëndësishëm në Kosovë.Po ashtu, Kryeministri Haradinaj tha se Forca e Sigurisë së Kosovës, e mbështetur nga NATO në çdo periudhë të ndërtimit të saj, ka përmbushur kapacitet operative drejt transformimit në Forcën e Armatosur, në bashkërendim me partnerët ndërkombëtarë.Në vizitën sot në Kosovë, delegacioni i Asamblesë Parlamentare të NATO-s – Presidenti Paolo Alli dhe drejtori i Komisionit për Dimensionin Civil dhe Siguri, Andrius Avizius, zhvilloi takime fillimisht në Kuvendin e Kosovës, me Kryesinë, e pastaj edhe me delegacionin e Kuvendit Kosovar në Asamblenë Parlamentare të Këshillit të Evropës.Edhe presidenti i Republikës së Kosovës, Hashim Thaçi priti në takim të veçantë Presidentin e Asamblesë Parlamentare të NATO-s, Paolo Alli dhe delegacionin.

PRESIDENTI THAÇI PRITI NJË DELEGACION TË ASAMBLESË PARLAMENTARE TË NATO-s

Presidenti i Republikës së Kosovës, Hashim Thaçi, ka pritur sot në takim një delegacion të Asamblesë Parlamentare të NATO-s, i kryesuar nga Paolo Alli, President i Asamblesë.Presidenti Thaçi ka shprehur falënderimin e tij për vizitën, bashkëpunimin dhe përkrahjen që i ka dhënë Kosovës Asambleja Parlamentare e NATO-s.“Kosova është faktor stabiliteti në rajon, e përkushtuar për dialog me Serbinë që do të sjell paqe të qëndrueshme në tërë rajonin”, ka shtuar ai.Kosova, sipas Presidentit, e mirëpret rikthimin e vëmendjes së BE-së në rajonin e Evropës Juglindore, me strategjinë dhe Samitin e Sofjes.“Rezultate konkrete të menjëhershme janë zgjidhja e kontestit të emrit në mes Greqisë e Maqedonisë si dhe fillimi i fazës përfundimtare të dialogut në mes Kosovës dhe Serbisë”, ka thënë ai.Duke folur për kërcënimin global nga terrorizmi, Presidenti Thaçi ka theksuar se Kosova është lider në rajon në luftimin e ekstremizmit e radikalizmit.Nga tjetër, Paolo Alli, President i Asamblesë Parlamentare të NATO-s është shprehur i kënaqur me bashkëpunimin me Kuvendin e Kosovës. Në fund, presidenti Thaçi ka thënë se NATO është në Kosovë, por tani është koha që edhe Kosova të jetë në NATO. Sipas tij, FSK-ja është e gatshme për transformim në një forcë profesionale.

ANËTARËT E KRYESISË SË KUVENDIT PRITËN NË TAKIM DELEGACIONIN E LARTË TË ASAMBLESË PARLAMENTARE TË NATO-s.

Anëtarët e Kryesisë së Kuvendit të Republikës së Kosovës, të udhëhequr nga Xhavit Haliti, nënkryetar i Kuvendit, pritën sot në takim Delegacionin e Asamblesë Parlamentare të NATO-s.
Zhvillimet politike në Kosovë, me fokus integrimi evropian, liberalizimi i vizave si dhe anëtarësimi i FSK-së në NATO, ishte temë qendrore gjatë këtij takimi.
Nënkryetari Haliti, fillimisht shprehu falënderim për takimin e përbashkët me udhëheqësit e lartë të delegacionit të NATO-s duke e vlerësuar si ditë të veçantë jo vetëm për Kuvendin, por për të gjitha institucionet e vendit.
Haliti i informoi përfaqësuesit e Asamblesë Parlamentare të NATO-s për zhvillimet politike në Kosovë, për reformat që institucionet kanë bërë në rrugën drejt integrimeve evropiane, si dhe për përmbushjen e kritereve për liberalizimin e vizave, përfshirë këtu edhe aftësimin e FSK-së për t’iu bashkëngjitur NATO-s në misionet e saj.
Nënkryetari i Kuvendit të Kosovës, Haliti, nga përfaqësuesit e Asamblesë Parlamentare të NATO-s me këtë rast kërkoi që ta mbështesin FSK-në si forcë të armatosur të NATO-s, dhe përkrahje për heqjen e vizave për Kosovën.
Kryetarja e komisionit për Integrime Evropiane, Blerta Deliu-Kodra, njoftoi për zhvillimet në zbatimin e procesit të MSA-së, ndërkaq, deputetët Fatmir Xhelili dhe Haxhi Shala, kërkuan mbështetje nga Asambleja e NATO-s dhe aleatëve të tjerë që FSK-ja të transformohet në ushtri të NATOS-s
Paolo Alli, President i Asamblesë Parlamentare të NATO-s, deklaroi se normalizimi i marrëdhënieve me Serbinë është kusht esencial për anëtarësimin e Kosovës në këtë mekanizëm. Po ashtu, ai bëri të ditur se edhe luftimi i korrupsionit dhe sundimi i ligjit janë tepër të rëndësishme për anëtarësimin e Kosovës në BE dhe NATO.
“Normalizimi i marrëdhënieve me Serbinë mbetet kushti më i rëndësishëm për këto procese. Po ashtu edhe luftimi i korrupsionit dhe sundimi i ligjit janë bazike drejtë rrugëtimit në vendet euro atlantike. Lufta kundër terrorizmit mbetet ende sfidë për të gjithë, prandaj mbetet edhe shumë punë për tu bërë”, tha Alli.
Alli, bëri të ditur se Ballkani Perëndimor është rajon i rëndësishëm për Evropën, duke u zotuar se edhe integrimi është i garantuar, por, me kusht që secili shtet të përmbushë obligimet e veta.
” Ne jemi duke vështruar progresin në rajon, dhe e kuptojmë që qytetarët e Kosovës dëshirojnë t’i bashkohen NATO-s, natyrisht që ka ende punë për tu bërë, por, ju siguroj që Kosova është në rrugë të mirë duke i plotësuar objektivat që të bëhet pjesë e NATO-s”, tha Paolo Alli, President i Asamblesë Parlamentare të NATO-s.

Në fund të takimit, Alli, theksoi: “Evropa nuk do të jetë e kompletuar pa i pasur në familje edhe vendet e Ballkanit Perëndimor”.

PRANVERA E VITIT 1999: NË KOSOVË LIRIA VINTE ME NATO-n

Në Kosovë në pranverën e para 19 viteve nisi të ndodhte liria dhe paqja: Ishte ora 05 e 17 minuta e mëngjesit në 12 Qershorin historik 1999, kur tanket e para të NATO-s të përcjella nga helikopterët hynin në Kosovë.Në Kosovë liria po vinte më pak se tre muaj pas 24 Marsit 1999 të fillimit të ndërhyrjes shpëtimtare të aviacionit të NATO-s me bombardimin e pozicioneve të forcave kriminale serbe të kasapit të Ballkanit, Milosheviç, i cili përfundoi në Gjykatën Ndërkombëtare për Krime Lufte në Hagë.

LIRIA, VLERA JONË E PËRBASHKËT

June 12, 2018 by dgreca

LIRIA ËSHTË VLERA JONË E PËRBASHKËT: E KOSOVËS DHE E ALEATËVE/

1 ramushi zbul

PRISHTINË, 12 Qershor 2018-Gazeta DIELLI/

Kryeministri i Republikës së Kosovës, Ramush Haradinaj, mori pjesë në ceremoninë e zbulimit të pllakës memoriale të ushtarëve të KFOR-it, të rënë gjatë shërbimit në Kosovë.Me këtë rast, kryeministri Haradinaj tha se në këtë ditë të paqes kujtojmë dhe nderojmë burrat dhe gratë, ushtarët e NATO-s dhe KFOR-it, që sakrifikuan jetën e tyre në shërbim të paqes dhe sigurisë në Kosovë.

“Qeveria dhe populli i Kosovës iu është përjetë mirënjohës NATO-s dhe shteteve që kontribuojnë në KFOR. Ne jemi popull që shprehim falënderim, nuk harrojmë të kaluarën dhe duam të kemi një të ardhme të sigurt”, tha kryeministri Haradinaj, duke shtuar se Kosova synon anëtarësimin në NATO, në organizatën e ushtrimit të paqes, për të ndihmuar jo vetëm vetën dhe rajonin, por kudo dhe këdo që ka nevojë.

Kryeministri Haradinaj theksoi gatishmërinë e Kosovës për të kontribuuar për sigurinë dhe paqen në botë, duke mirëpritur qëndrimin e NATO-s në Kosovë.

“Ky memorial është një simbol që Kosova ka vendosur për rrugën e vet në nderimin ndaj të rënëve. Liria është vlera jonë e përbashkët: e Kosovës dhe e aleatëve”, tha kryeministri Haradinaj.

Ministri i Forcës së Sigurisë së Kosovës, Rrustem Berisha, tha se NATO që udhëhoqi operacionin për mbështetjen e paqes në Kosovë, operacion ky që ktheu shpresën për liri dhe siguri, `99 do të mbetet përjetësisht në historinë më të re të Kosovës, si dita e kthimit të shpresës.

Ndërkaq, zëvendës ndihmës asistenti i Sekretarit të Përgjithshëm të NATO-s, John Manza, tha se KFOR-i vazhdon të jetë i suksesshëm në krijimin e një ambienti të qetë dhe të sigurt për lirinë e lëvizjes, për të gjithë ata që jetojnë në Kosovë.

“Ky monument do të mbetet një simbol për një kohë të gjatë për atë se çfarë kemi bërë gjatë këtyre viteve në Kosovë dhe të ndërtojmë një Kosovë të fortë, që synon drejt së ardhmes, e cila është integrimi euroatlantik”, tha zëvendës ndihmës asistenti i Sekretarit të Përgjithshëm të NATO-s, John Manza.

Z.Manza në emër të Sekretarit të Përgjithshëm të NATO-s, falënderoi popullin e Kosovës për këtë iniciativë për ngritjen e këtij monumenti, mjaftë domethënës, në qendër të Prishtinës.

Në ceremoninë e zbulimit të pllakës memoriale të ushtarëve të KFOR-it, të rënë gjatë shërbimit në Kosovë, e cila u bë nga Kryeministri i Republikës së Kosovës, Ramush Haradinaj dhe ndihmës asistenti i Sekretarit të Përgjithshëm të NATO-s, John Manza, morën pjesë edhe ministri të Forcës së Sigurisë së Kosovës, Rrustem Berisha, komandantit të forcës së Sigurisë së Kosovës, Gjeneral Lejtnant, Rrahman Rama, komandantit të KFOR-it, Gjeneral Major, Salvatore Cuoci, drejtorit të NALT-it, gjeneral Ralf Hofman, ish-komandant të KFOR-it, nga Gjermania dhe Franca, ambasadorë të akredituar në Kosovë, Atashe të Mbrojtjes, familjarë të ushtarëve të NATO-së dhe të KFOR-it, që kanë humbur jetën në Kosovë, zëvendëskryeministra, ministra, zëvendësministra, deputetë dhe pjesëmarrës të shumtë.

Italia, NATO-s: Arta, Preveza, Suli, e deri në Kostur banohen nga shqiptarët

May 10, 2018 by dgreca

1 Libri 1 Gazeta, Eleftheria e majit 1960 1 Gazeta, Iperiotikos Agon

Nga Arben Llalla/

Është shkruar vite më parë për një raport i Italisë drejtuar NATO-s në vitin 1960, ku qytetet Preveza, Suli, Filipias, Parga, Paramithia, Konica, Janina, Pogoni, Kosturi, Follorina, e kështu me radhë janë toka shqiptare që banohen nga 2/3 të popullsisë etnike shqiptare. Raporti i Italisë drejtuar NATO-s u pasqyrua në gazetat greke në fillim të vitit 1960 dhe më tej pati një reagim të ashpër nga ministri i jashtëm i Greqisë, Evangjelios Averof, i cili ishte vlleh me rrënjë nga fshati Meçovë i krahinës së Pindit. Ai i kërkoi qeverisë italiane ta anullonte menjëherë raportin dhe të jepte shpjegime të plota, madje të kërkonte ndjesë.

Ambasada italiane në Athinë bëri të qartë në një reagim paraprak që raporti nuk pasqyronte pikëpamjet e qeverisë italiane dhe se ky hetim i plotë ishte bërë me porosi. Raporti italian u konsiderua i pasaktë, i papranueshëm dhe anti-grek. Qeveria italiane u akuzua se ambasada e saj ka shpërndarë një njoftim në gjuhën shqipe, shoqëruar me një hartë të Shqipërisë së Madhe. Në shumë qytete të Greqisë u zhvilluan tubime anti-italiane.

Ne po sjellim faksimile e dy gazetave greke “Iperiotikos Agon” dhe “Eleftheria” e majit 1960, ku pasqyrohen reagimet e Greqisë për raportin e Italisë drejtuar NATO-s që vendbanimet në fjalë janë toka shqiptare.

Ky raport i Italisë krijoi acarime pa precedent me Greqinë, pra dy vende anëtare të Paktit të Atlantikut të Veriut ishin futur në sherr për çështjen e tokave shqiptare në Çamëri dhe në pjesën e Greqisë së Veriut.

Britaniku Ouen Pirsën në librin e tij (Owen Pearson) në librin “Albania as dictatorship and democracy, London, New York 2006, shkruan: “Në maj të vitit 1960, Greqia i dërgoi një protestë të fortë qeverisë italiane ndaj një raporti zyrtar “tejet tendencioz” mbi Shqipërinë, që ishte dërguar nga Shtabi i përgjithshëm italian i mbrojtjes dhe i qarkulluar mes komandave të tjera të NATO-s në selinë supreme, atë kohë, në Paris. Fragmente nga raporti italian u botuan në shtypin grek më 29 maj 1960 dhe që u konfirmuan nga burime zyrtare.”

Kjo tronditi thellë dhe befasoi qeverinë greke, e cila asnjëherë nuk kishte hequr dorë nga pretendimet territoriale ndaj të ashtuquajturit “Epiri i Veriut”, pra Shqipëria e Jugut.

Raporti, duke folur mbi përbërjen etnologjike të kombit shqiptar, vëren se qytetet epirote të Janinës, Prevezës, Kosturit, Pargës, Konicës e të tjerë ndodhen në Shqipërinë e Jugut, dhe se dy të tretat e popullsisë së Epirit përbëhen nga shqiptarë etnikë “që formojnë elementët më të mirë të zonës”.