-Ky çmim është simbol i paqes globale dhe na përkujton në obligimin tonë per të qenë më aktiv në paqe përmes fjalëve dhe veprimeve/
-Ambasadorja Ahmetaj falënderoi të gjithë të pranishmit si dhe të gjitha institucionet dhe shtetet që e kanë ndihmuar Kosovën aty ku është sot/
Nga Behlul Jashari/ PRISHTINË, 5 Shkurt 2016/ Sot ne Bruksel, në një ceremoni të organizuar nga Asociacioni për Avancim të Paqes, nën udheheqjen e Arqidukes Herta Margarete Halsburg nga Austria, ambasadorja e Kosovës në Bruksel, Mimoza Ahmetaj, u dekorua me çmimin “Flaka e Paqes” (Flame of Peace).
Çmimi “Flaka e Paqes” u ipet personaliteteve për rolin aktiv në shoqeritë e tyre, e që ne rastin e Kosovës nënkupton bashkëpunimin drejt themelimit teështetit demokratik, nenshkrimin e MSA-se, hapjen e rrugës drejt integrimeve evropiane dhe të tjera.
Ky çmim është simbol i paqes globale dhe na përkujton në obligimin tonë per të qenë më aktiv në paqe përmes fjalëve dhe veprimeve.
Në ceremoni me çmimin e njejtë janë shpërblyer edhe ish kryetari i Keshillit Evropian Herman Van Rompey, njëherit edhe ish kryeministër i Belgjikes, ambasadorja e SHBA-ve prana Belgjikës Denise Bauer dhe ambasadori slloven Matjaz Shinkovec. Më parë, ndër te tjerëve, ky çmim iu është ndarë edhe personaliteteve si Presidentja e Kosovës, Atifete jahjaga, Lech Walesa (Poloni), Adolf Ogi (ish President i Federates Zvicerave), Princi Laurent i Belgjikes, etj.
Njoftimi dërguar nga Brukseli thekson se, gjatë pranimit të çmimit, në fjalen e rastit, ambasadorja kosovare Ahmetaj tha se, “në rrugëtimin tim të shkurtë, qe nga çlirimi i vendit tim, kam pasur priviligjin të shoh lindjen dhe ndërtimin e vendit tim, si dhe momentin më të rëndësishem që nga shpallja e pavarësisë, nënshkrimin e Marrëveshjes së parë kontraktuale me Bashkimin Evropian, gjë e cila e ka vulosur rrugën e Kosovës drejt BE-së”.
Kosova, vijoi ajo, ka bërë hapat e parë në rrugën e saj të gjatë drejt integrimeve evropiane, por ka ende shumë punë për të bërë.
“Institucionet e Kosovës kanë për qëllim ndërtimin e një shoqërie gjithpërfshirëse me diversitetin e saj religjioz, kulturor, me qëllimin e ndërtimit të një shoqërie që në bazë ka rendin dhe ligjin. Në kaq vite te pavarësisë kemi bërë ndryshime që kanë prekë jetët e qytetarëve, mendoni sa shumë ndryshime do të ketë deri në kohën kur Kosova do të jetë anëtare e barabartë e BE-së”, u shpreh ambasadorja kosovare në Bruksel.
Ambasadorja Ahmetaj në fund të fjalimit te saj falënderoi te gjithë të pranishmit si dhe të gjitha institucionet dhe shtetet që e kanë ndihmuar Kosovën aty ku është sot.
Bruksel- Tahiri u takua me Drejtoren e re për Ballkanin në Shërbimin e Jashtëm të BE-së
Bruksel, 01 tetor 2015- Ministrja për Dialog, Edita Tahiri, është takuar në Bruksel me Drejtoren e re për Evropën Perëndimore, Ballkanin Perëndimor dhe Turqinë, në Shërbimin e Jashtëm të BE-së, Angelina Eichhorst, pasardhëse e Fernando Gjentilinit i cili ka mbajtur këtë post në të kaluarën.Takimi kishte për qëllim vlerësimin e rrjedhave dhe rezultateve të dialogut të Brukselit në periudhën e kaluar. Të dy bashkëbisedueset u pajtuan se ka pasur arritje mjaft të rëndësishme në Dialogun e Brukselit dhe BE-ja ka dhënë një kontribut të madh për ndërmjetësimin e bisedimeve mes dy shteteve, Republikës së Kosovës dhe Serbisë. Duke marrë parasysh se në Konferencën e Rambujesë dhe bisedimet e Vjenës nuk janë arritur marrëveshje mes palëve, u tha se ky dialog ka shënuar rezultate historike ngase për herë të parë janë nënshkruar marrëveshje në mes të shtetit të Kosovës dhe Serbisë, të cilat kanë ndikuar në normalizimin e marrëdhënieve në mes të dyja vendeve dhe përafrimin e agjendave të secilës prej tyre në rrugën e integrimit në Bashkimit Evropian.Ministrja Edita Tahiri theksoi që Kosova ka qenë palë konstruktive në këtë dialog që ndihmon paqen dhe stabilitetin në rajon dhe kërkoi që BE-ja ta nënshkruaj Marrëveshjen për Stabilizim-Asociim me Kosovën sa më shpejtë. Ajo tha se kjo është marrëveshja e parë në mes të shtetit të Kosovës dhe Bashkimit Evropian dhe ne presim të nënshkruhet në muajin tetor të këtij viti, dhe e cila do t’i jep një motivacionin të ri dialogut të mëtejmë të Brukselit dhe reformave evropiane në Kosovë. Po ashtu që edhe vendimi për liberalizimin e vizave me Kosovën të merret këtë vit, e që nga viti tjetër qytetarët e Republikës së Kosovës të mund të udhëtojnë pa viza në vendet e BE-së.
Në takim, ministrja Tahiri përmendi sfidat në procesin e zbatimit të marrëveshjeve dhe paradokset që janë në këtë proces, duke thënë se normalizimi i marrëdhënieve mes dy shteteve kërkon nga Serbia të ndërpres ndërhyrjet në Kosovë duke zhbërë strukturat e mbetura paralele, në respektim të marrëveshjeve të Brukselit.
Në anën tjetër drejtorja Eichhorst e vlerësoi lartë konstruktivitetin e Qeverisë së Kosovës në arritjen dhe zbatimin e marrëveshjeve në dialogun e Brukselit, ajo po ashtu tha se BE-ja mbetet plotësisht e përkushtuar në mbështetje të Kosovës dhe rrugën e saj drejtë BE-së. Ajo premtoi se do të angazhohet për të çuar përpara dialogun e Brukselit dhe fokusi do jetë po ashtu në zbatimin e plotë të marrëveshjeve nga palët.
Në këtë takim, ministrja Tahiri shoqërohej nga këshilltari kryesor politik Dren Zeka, koordinator në dialog dhe sekretari i MAPL-së, Besnik Osmani, koordinator, ndërsa, Angelina Eichhorst, ishte e shoqëruar nga Anna Maria Boura, këshilltare e lartë e Shërbimit të Jashtëm të BE-së dhe ndërmjetësuese në dialog.
Kosovë-Serbi, vazhdojnë bisedimet në Bruksel
-Fokusi i bisedimeve është vlerësimi i gjendjes në zbatimin e disa prej marrëveshjeve ku janë shënuar ngecje dhe zgjidhjet e mundshme/
Nga Behlul Jashari/ PRISHTINË, 27 Shtator 2015/ Delegacioni i Republikës së Kosovës i udhëhequr nga ministrja për Dialog, Edita Tahiri, sot udhëton drejt Brukselit, për të marrë pjesë në raundin e radhës së bisedimeve me ndërmjetësimin e Bashkimit Evropian, mes Kosovës e Serbisë.
Fokusi i bisedimeve është vlerësimi i gjendjes në zbatimin e disa prej marrëveshjeve ku janë shënuar ngecje dhe zgjidhjet e mundshme, ndërsa temat kryesore do të jenë liria e lëvizjes, marrëveshja për njohjen e ndërsjellë të diplomave universitare, kthimi i dokumenteve kadastrale dhe funksionimi i zyrave ndërlidhëse.
Në takimin për çështjen e diplomave universitare do të marrë pjesë edhe ministri për Arsim, Shkencë dhe Teknologji, Arsim Bajrami.
Në këto takime, qeveria e Republikës së Kosovës do të paraqes qëndrimet e saj për problemet e krijuara nga Serbia në zbatimin e marrëveshjeve në fjalë si dhe do të kërkojë përshpejtimin dhe zbatimin e plotë dhe cilësor të këtyre marrëveshjeve duke theksuar rolin e Bashkimit Evropian si mjaft të rëndësishëm për konsolidimin dhe progresin e këtij procesi.
Takimet do të mbahen në 28 dhe 29 shtator 2015. Për secilën nga temat që do të bisedohen, opinioni do të njoftohet për rrjedhat dhe rezultatet e bisedimeve, paralajmërohet në njoftimin e dërguar nga qeveria e Kosovës.
Kosova dhe Serbia në procesin drejt normalizimit të marrëdhënieve, të kryesuar nga BE e mbështetur nga SHBA, takimin e parë në nivel të lartë kryeministror në Bruksel e kanë zhvilluar në 19 tetor 2012, ndërsa të 28-in në 25 gusht 2015. Bisedimet në nivel kryeministrash kanë pasuar dialogun teknik, të filluar në 8 mars 2011, poashtu në Bruksel, ku në krye të delegacionit kosovar ishte Edita Tahiri atëherë zëvendëskryeministre, tash ministre e Dialogut.
MERGATA- Amet Gjanaj, deputeti i ardhshëm në Bruksel
Në zgjedhjet që u zhvillluan ditën e dielë krahas zgjedhjeve Europiane dhe ato për Parlamentin Federal doli fitues dhe një kanditat shqiptar Amet Gjanaj.
Amet Gjanaj anëtar i Partisë Socialiste të Belgjikës ka fituar me 3800 vota në zgjedhjet për Parlamentin e Brukselit.
Amet Gjanaj është kryetar i Shoqatës “Vatra” dhe mbështetës i shkollës shqipe dhe grupit kulturor “Vatra”. Ai i është përkushtuar prej vitesh mbrojtjes së identiteit dhe vlerave kulturore shqiptare si dhe respektimit të diversitetit në Bruksel.
Zëvendëskryeministrja socialiste, Laurette Onkelinx dha këtë koment në mbyllje të fushatës elektorale, ndërsa mbështeste kandidatin për deputet të Brukselit, Ahmet Gjanaj, i cili renditej i 24-ti.
“E njoh Ahmet Gjanën prej shumë kohësh. Nuk është hera e parë, që punoj me të, dhe e mbështes. Komuniteti shqiptar është i mirëpërfaqësuar në Belgjikë. Janë me dhjetra-mijra burra e gra të integruar më së miri këtu, e ne u detyrohemi, sepse ata janë pjesë e rritjes ekonomike të vendit tonë”, tha Laurette Onkelinx.
Në zgjedhjet e vitit 2009 Gjana pati hedhur kanditaturen e tij ai shprehet :“Faktikisht, në vitin 2009 isha 160 vota larg mandatit, duke siguruar 2853 vota dhe; duke marrë parasysh se tani kam pak më shumë përvojë në menaxhimin e fushatës, më shumë kontakte, por edhe komuniteti shqiptar është rritur disi mendoj se kam të gjitha mundesite, që të marr mandatin e deputetit në Bruksel. Zakonisht, partitë këtu nuk organizojne mitingje nëpër rrugë, nëpër sheshe, por në ambiente të mbyllura dhe ky është aktiviteti përmbyllës, ku nuk merr dikush fjalën për të ngritur zërin dhe për të motivuar personat. Synimi është, që të kalojmë një moment të bukur e të qetë së bashku, dhe gjithçka është bërë në mënyrë krejtësisht vullnetare, këtu nuk ka harxhime të shumta marramendëse.”
Amet Gjanaj ka arritur të shënojë një diferencë të madhe kundrejt dy kandidatëve të tjerë shqiptarë që kanë marrë Burim Demiri ( Federatën e Frankofonëve) me 1225 vota dhe Elona Zhana (Cdh) me 520 vota.(Sonia M)
Alisa Aliu dhe “JAM”, grupi muzikor në Bruksel
Alisa Aliu nga Durrësi është pianiste në grupin JAM në Bruksel. Që në moshën 6 vjeçe ajo u dashurua me muzikën atë muzikë që vazhdon ta luaj po me aq dashuri si dikur. Ajo ka qene aktive në Koek Sound Band në Bruksel. Gjithashtu, ka qenë drejtuese me grupin e valles për fëmijët, po në Belgjikë. Tani është aktive në grupin JAM, i cili kohë e fundit ka patur shumë sukses. Në një intervistë ajo flet për projektet e grupit, arritjet, por shpjegon edhe domethënien e emrit të grupit, i cili tingëllon shumë shqiptar.
Si lindi grupi JAM?
Grupi JAM lindi 24 maj 2013, kjo do të thotë se JAM në 24 maj 2014 bën një vit. Jemi 3 pjesëtarë të grupit; unë si pianiste, Megi si këngëtare dhe një kitarist. Në fillim ishim 2, vetëm unë e Megi…
Si filloi ky bashkëpunim?
Unë koncertin e parë me Megin, e kam pasur në Nëntor 2012, për 100-vjetorin e pavarësisë …në pjesën e parë te Eda Zarit. Aty u kënduan këngë tradicionale shqiptare …suksesi ishte i fuqishëm. Pas koncertit u takuam me shumë njerëz. Midis njerëzve ishte dhe një djalë shqiptar, i cili kishte një restorant diku në Koekelberg “Vintage “(Bruksel) dhe na ftoi të luajmë tek ai. Gjatë kësaj kohe u njohëm me Jean, i cili ishte në kërkim për një këngëtare. Dhe unë kërkoja një kitarist dhe kështu u bëmë 3 persona.
Çfarë domethënie ka emri i grupit?
Ne na duhej emri i grupit për të bërë afishën. Emrin e propozova unë dhe u pëlqye nga të tre. Emri i griupi ka shkronjën e parë të emrit të secilit prej anëtarëve. J ( Jean Cloude), kitaristi, A (Alisa Aiu) M (Megi Bala), pra JAM. Kështu lindi emri JAM dhe tingëllonte kaq bukur në shqip.
Çfarë lloj muzike luani?
JAM, është një koncept pop, e krijon një atmosferë të ngrohtë dhe unike.
A mund të na thoni diçka për këngëtaren?
Megi GM Bala është këngëtare e grupit është nga Tirana. Sikurse dhe unë ajo e ka muzikën me zemër. Këndon shumë mirë. Këngët e saj kanë repertor të ndryshëm. Këndon në gjuhë të huaja, por këngët baladat shqiptare i qan dhe i këndon vërtet me shpirt. Ndonjëherë mundohem të mbaj veten të mos më shpëtojë ndonjë lot kur ajo këndon. Ajo është një hyjneshë e vërtetë…..
Kini organizuar koncerte? Cili është aktiviteti juaj?
Kërkesa kemi sidomos për këngë shqiptare. Pothuajse çdo muaj kemi pasur koncerte e çdo herë kemi pasur shumë sukses.
Kini hedhur në treg dhe një CD. Mund të na thoni diçka më shumë për këtë projekt artistik?
Po kjo është CD e parë e grupit JAM. E regjistruam për festat në Dhjetor. Kjo CD sjell së bashku10 tituj të zgjedhur posaçërisht nga repertori i grupit. Ne jemi të lumtur që ndajmë frytet e punës sonë të përbashkët. Realizimi i kësaj CD-je të parë ishte vërtet një përvojë magjike dhe e paharrueshme. Ne falënderojmë Luna Gillet për pjesëmarrjen e saj dhe energjinë e saj, studio “Shqiponjat” që na ndihmoi për regjistrimin e përpunimin e CD-së, e në veçanti falënderojmë ErmalBytyçin. Në sajë të një pune të lodhshme CD e parë u bë një sukses i vërtetë.
Intervistoi Sonia Memoci