ne Kosove – Dielli

DELEGACIONI I BIZNESEVE AMERIKANE NË KOSOVË

March 13, 2019 by dgreca

-Delegacioni i bizneseve amerikane diskuton mundësitë e bashkëpunimit me bizneset kosovare. Takime në Qeverinë e Kosovës, në Ministrinë e Zvillimit Ekonomik, Odën Ekonomike Amerikane në Kosovë…/

PRISHTINË, 13 Mars 2019-Gazeta DIELLI/ Një delegacion i bizneseve amerikane bashkë me Konzullen e përgjithshme të Republikës së Kosovës në Nju Jork, Teuta Sahatqija, në vizitë në Kosovë po diskuton mundësitë e bashkëpunimit me bizneset kosovare. Themeluesi dhe Shefi Ekzekutiv i kompanisë amerikane MD Squared Property Group, Michael Mintz, tha se kapacitetet e të rinjve dhe ndërmarrësve në Kosovë si dhe talenti i tyre janë të jashtëzakonshme.

KRYEMINISTRI HARADINAJ PRITI NË TAKIM DELEGACIONIN E INVESTITORËVE AMERIKANË

Kryeministri i Republikës së Kosovës, Ramush Haradinaj, ka pritur në takim delegacionin e investitorëve amerikanë, të kryesuar nga Michael Mintz, themelues dhe shef ekzekutiv i kompanisë “Squared Property Group LLC”, me të cilët ka biseduar mbi situatën aktuale ekonomike në vend, duke thënë se Kosova ka krijuar klimë tejet të favorshme për investimet e huaja.

Në këtë takim, kryeministri Haradinaj theksoi se me rritjen ekonomike më të madhe në rajon, zvogëlimin e tarifave tatimore, reformat thelbësore në sundim të ligjit dhe ato fiskale, si dhe me ligjin për investime strategjike, Kosova ka hyrë në hartën e vendeve atraktive dhe të sigurta për investitorët e huaj.

“Kosova tashmë e ka Ligjin për Investime Strategjike, që krijon lehtësira dhe kushte të mira për investitorët e huaj. Janë themeluar tri zona të veçanta ekonomike të gatshme për të pritur investitorët e huaj”, ka thënë kryeministri Haradinaj, duke përmendur edhe projektet e mëdha energjetike, ato të energjisë alternative.

Ndër tjerash, gjatë bashkëbisedimit me këtë delegacion, kryeministri Haradinaj shtoi se Kosova tashmë është kthyer në një adresë të besueshme për investime amerikane.

Nga ana e tyre, delegacioni i investitorëve amerikanë falënderuan kryeministrin Haradinaj për pritjen duke shprehur gatishmërinë e bashkëpunimit mes tyre.

DELEGACIONI I BIZNESEVE AMERIKANE, TAKIM NË MINISTRINË E ZHVILLIMIT EKONOMIK

Ministri i Zhvillimit Ekonomik, Valdrin Lluka, priti delegacionin e bizneseve nga Shtetet e Bashkuara të Amerikës, të kryesuar nga konsullja e Kosovës në SHBA, Teuta Sahatqija, me të cilët diskutoi rreth sektorit të teknologjisë informative dhe komunikimit (TIK), sektorit të energjisë dhe klimës të të bërit biznes në Kosovë.

Delegacioni i kryesuar nga znj. Sahatqija, Ani Zeldan, kryeshef ekzekutiv i Quantum Media Group, themeluesja e Partners in Digital Health, Tory Cenaj, avokati Nelson Happy dhe gazetari nga The Washington Diplomat, Larry Luxner, u interesuan rreth klimës së të bërit biznes në Kosovë dhe rreth projekteve në sektorin e TIK dhe atë të energjisë.

Ministri Lluka i informoi se Kosova ka një sistem fiskal shumë të favorshëm për biznese, është një qendër lidhëse në Evropë dhe se Banka Botërore e ka cilësuar si vendin e dytë në rajon në raportin e të bërit biznes.

“Kosova ka një sistem fiskal shumë të favorshëm për biznese, është vendi me borxhin më të vogël publik përshtatur GDP-së, është urë lidhëse me vendet e Evropës dhe ka qasje në tri porte detare, atë të Selanikut, Durrësit dhe të Malit të Zi. Në raportin e të bërit biznes Kosova radhitet e 40-ta në botë dhe e dyta në rajon”, u shpreh ministri Lluka.

Sektori i TIK është i vetmi sektor në Kosovë i cili ka bilanc tregtar pozitiv dhe është sektor i cili u ka mundësuar të rinjve të vendit të punojnë për vendet e Bashkimit Evropian dhe më gjerë, është sektor në të cilin ka projekte të ndryshme dhe nga i cili gjenerojnë vende pune.

“Sektori i teknologjisë informative është sektor i cili ka bilanc tregtar pozitiv dhe është sektor në të cilin kompanitë vendase kryejnë shërbime ‘outsource’ për kompanitë në Evropë, SH.B.A. dhe më gjerë dhe është sektor në të cilin truri nuk ikën nga vendi. Projekti Kosovo Digital Economy (KODE), në të cilin projekt me ndihmën e Bankës Botërore do të investohen 25 milionë euro për shtrirjen e infrastrukturës së rrjetit të internetit në 96% të territorit të Kosovës me synim të veçantë në zonat rurale”, tha ministri Lluka.

Kreu i MZHE-së delegacionin e bizneseve nga ShBA e informoi rreth “Tech Park Prishtina” dhe “Training and Innovation Park” në Prizren ku parashihet që të krijohen qendra për trajnime dhe qendra të ekselencës digjitale në të cilën do të trajnohen bizneset dhe të rinjtë e vendit.

Përfaqësuesit e delegacionit gjithashtu u interesuan rreth sektorit të energjisë, zhvillimeve dhe projekteve të cilat janë duke u zhvilluar.

Ministri Lluka iu shpreh se Kosova e ka synim përmirësimin e gjendjes së furnizimit me energji elektrike, dhe këtë e dëshmon fakti i nënshkrimit të marrëveshjes me kompaninë “Countur Global” për ndërtimin e termocentralit “Kosova e Re”, si dhe rreth mënyrave të gjenerimit të energjisë nga mbeturinat.

Në fund, përfaqësuesit e bizneseve nga SHBA falënderuan ministrin Lluka për informacionet e dhëna dhe thanë se do të mbeten në kontakt në mënyrë që të informohen më detajisht rreth sektorëve që mbulon Ministria e Zhvillimit Ekonomik ashtu që të shihen hapësirat për investime në të ardhmen.

ODA EKONOMIKE AMERIKANE NË KOSOVË PRITI NË VIZITË DELEGACIONIN E BIZNESEVE TË SHBA

Oda Ekonomike Amerikane në Kosovë priti në vizitë delegacionin e bizneseve amerikane të udhëhequr nga Konzullja e përgjithshme e Republikës së Kosovës në Nju Jork të Shteteve të Bashkuara të Amerikës, Teuta Sahatqija, ku bizneset anëtare patën rastin të shkëmbejnë mundësi bashkëpunimi me ato amerikane si dhe krijimin e lidhjeve të reja në sektorë të ndryshëm.

Drejtori Ekzekutiv i Odës Amerikane, Arian Zeka, tha se ky takim është një mundësi e mirë për të ndërtuar dhe krijuar bashkëpunime të reja me kompanitë amerikane, si dhe një rast i veçantë që bizneset amerikane të njihen me disa nga storiet e suksesit të Kosovës. Zeka falenderoi Ambasadoren Sahatqija jo vetëm për punën e saj në përfaqësimin e Kosovës në Nju Jork por edhe në ndërtimin e marrëdhënieve mes bizneseve si dhe nxitjen e relacioneve ekonomike mes Kosovës dhe Shteteve të Bashkuara të Amerikës e e cila është edhe misioni i Odës Ekonomike Amerikane.

Konzullja e përgjithshme e Kosovës në Nju Jork, Teuta Sahatqija, tha se prioriteti ynë kryesor mbetet krijimi i lidhjeve dhe partneriteteve mes bizneseve kosovare dhe atyre amerikane, si dhe përmirësimi i imazhit të kompanive tona në tregjet ndërkombëtare. Ajo tha se përmes kësaj vizite jemi duke synuar bashkëpunime të reja për bizneset tona duke pasur parasysh kapacitetet e tyre gjë e cila do të ndikojë edhe më tutje në krijimin e imazhit të Kosovës si një vend i përshtatshëm dhe atraktiv për investime të huaja.Themeluesi dhe Shefi Ekzekutiv i kompanisë amerikane MD Squared Property Group, Michael Mintz, tha se kapacitetet e të rinjve dhe ndërmarrësve në Kosovë si dhe talenti i tyre janë të jashtëzakonshme. Ai tha se janë mjaft të impresionuar me zhvillimin e bizneseve në Kosovë si dhe mbështetjen e sektorit privat dhe qeverisë në kultivimin e kapitalit njerëzor si dhe lehtësirave të tjera në zhvillimin e bizneseve në vend./b.j/

Përfaqësues të lartë të Këshillit Kombëtar të Sigurisë së SHBA në Kosovë

February 27, 2019 by dgreca

Presidenti Thaçi: Me çdo kusht do t’i ruajmë marrëdhëniet me SHBA-në/

-Komunikata nga Presidenca e Kosovës për takimin me përfaqësuesit e lartë të Këshillit Kombëtar të Sigurisë së Shteteve të Bashkuara të Amerikës/

1 ashim siguri

-Presidenti Thaçi i ka siguruar zyrtarët e lartë amerikanë se me asnjë kusht dhe në asnjë rrethanë, Republika e Kosovës nuk do t’i rrezikojë marrëdhëniet ndërshtetërore dhe miqësinë me SHBA-në/

PRISHTINË, 27 Shkurt 2019-Gazeta DIELLI/ Presidenti i Republikës së Kosovës, Hashim Thaçi, bashkë me Kryeministrin e Kosovës, Ramush Haradinaj, sot kanë zhvilluar një takim me drejtorin kryesor për Çështje Evropiane në Këshillin e Sigurisë Kombëtare të SHBA-së, John Erath, si dhe me drejtorin për Ballkan të Këshillit Kombëtar të Sigurisë së SHBA-së, Brad Berkley.Komunikata e dërguar në mbrëmje nga Presidenca bën të ditur se, presidenti Thaçi dhe kryeministri Haradinaj me zyrtarët e lartë të Shtëpisë së Bardhë, John Erath dhe Brad Berkley, kanë biseduar për marrëdhëniet bilaterale ndërmjet Kosovës dhe Shteteve të Bashkuara të Amerikës, për situatën politike në Kosovë dhe rajon, si dhe për dialogun ndërmjet Kosovës dhe Serbisë.Zyrtarët e lartë të Këshillit Kombëtar të Sigurisë së SHBA-së, John Erath dhe Brad Berkley, kanë ripërsëritur qëndrimin e qartë të administratës amerikane që taksa duhet të suspendohet me qëllim që të vazhdojë dialogu dhe përpjekjet për arritjen e një marrëveshjeje gjithëpërfshirëse ndërmjet Kosovës dhe Serbisë.Presidenti Thaçi i ka siguruar zyrtarët e lartë amerikanë se me asnjë kusht dhe në asnjë rrethanë, Republika e Kosovës nuk do t’i rrezikojë marrëdhëniet ndërshtetërore dhe miqësinë me SHBA-në.“Institucionet shtetërore duhet të ndërmarrin sa më shpejt veprime konkrete në përputhje më këshillat miqësore të SHBA-së. Këto vendime duhet të jenë në funksion të ruajtjes dhe forcimit të bashkëpunimit strategjik me SHBA-në dhe me përkushtimin tonë shtetëror për dialog dhe marrëveshje paqësore”, ka thënë presidenti Thaçi./b.j/

-“Kosova është e gatshme për marrëveshje ligjërisht obliguese që rezulton me njohje reciproke në kufijtë ekzistues dhe Kosovën e 17 Shkurtit 2008. Poashtu, është e gatshme për marrjen e të drejtave dhe detyrimeve të anëtarësimit në NATO, Kombet e Bashkuara, BE dhe organizatat tjera ndërkombëtare dhe për marrëdhënie të mira fqinjësore”, tha në takim kryeministri Haradinaj/

1 Keshilli i sigurise

PRISHTINË, 27 Shkurt 2019- Gazeta DIELLI/ Në Prishtinë, në Presidencën e Republikës së Kosovës, sot pasdite përfaqësuesit e lartë të Këshillit Kombëtar të Sigurisë së Shteteve të Bashkuara të Amerikës, John Erath dhe Brad Berkley, janë takuar së bashku me presidentin Hashim Thaçi dhe kryeministrin Ramush Haradinaj.
Komunikata për media e dërguar mbrëmjen e sotme nga Qeveria thekson se, kryeministri Haradinaj në takim ka theksuar se Republika e Kosovës është e angazhuar në mënyrë të pakthyeshme për të forcuar demokracinë dhe institucionet e saj.
“Kosova është e gatshme për marrëveshje ligjërisht obliguese që rezulton me njohje reciproke në kufijtë ekzistues dhe Kosovën e 17 Shkurtit 2008. Poashtu, është e gatshme për marrjen e të drejtave dhe detyrimeve të anëtarësimit në NATO, Kombet e Bashkuara, BE dhe organizatat tjera ndërkombëtare dhe për marrëdhënie të mira fqinjësore”, tha kryeministri Haradinaj.
Më tej, kryeministri Haradinaj ka thënë se Kosova është e vendosur për tregti të lirë brenda rajonit të Ballkanit Perëndimor dhe marrëveshja gjithëpërfshirëse ligjërisht obliguese do të përfshijë edhe rregullimin e kapitullit të tregtisë së lirë në mes të Kosovës dhe Serbisë.

Gjithashtu, kryeministri Haradinaj në takim me përfaqësuesit e lartë të Këshillit Kombëtar të Sigurisë së Shteteve të Bashkuara të Amerikës, John Erath dhe Brad Berkley, ka theksuar se Kosova mbështetet në vlerat e një shoqërie shumetnike, të bazuar në të drejtat e njeriut për të gjithë qytetarët dhe komunitetet e saj, duke vlerësuar se Kosova i mbetet besnik miqësisë së përhershme dhe bashkërendimit të politikave me Shtetet e Bashkuara të Amerikës./b.j/

PSE FSHIHET DHE KUSH E NXIT KRIMIN NE KOSOVE?!

February 13, 2019 by dgreca

– Kriminelë e analfabetë edhe në Polici, Prokurori, Gjykata, Shkolla të Kosovës, për interes të krimit, të politikës dhe të Serbisë-/

skender

– Policia e Kosovës, është e stërmbushur me policë ( mund të flasim për disa qindra të tillë-pa përfshirë fare Policët serb!), të cilët janë kryesisht shqipëtar, pastaj disa turq, etj, por që vazhdimisht i shërbejnë Serbisë!

– Një mësues pedofil i njohur është pranuar në një shkollë në Lipjan, edhe pse pedofili ka pasë precedentë pedofilie në shkollat shqipe të Luginës së Preshevës, por serbët e kanë lëshuar që ai të veprojë në Kosovë!

Nga Skender Jashari/Ish i burgosur Politik/

Tashmë pasojat jemi duke i pa. Për fat të keq edhe një viktimë më shumë, duam të jenë viktima e fundit, por gjasat janë të vogla, sepse me siguri mund të themi që edhe qindra a mijëra viktima të tjera, të veprave të ndryshme kriminale do t’i shohim, e mos të flasim për mijëra raste tjera që tashmë kanë ndodhur por që mbahen fshehtë!

Krimi i fundit, tregon fenomenologjinë kriminale të krimeve të cilat u bënë publike në ditët e fundit e sidomos ato që janë shumë më të numërta që janë duke u mbajtur fshehtë, nuk mund dhe s’do duhej kaluar thjesht me arsyetime politike, qoftë edhe arsyetime mjekësore e psikologjike-psikiatrike( duke i quajtur thjesht pedofil)! Këto raste tregojnë shumë më shumë, që rrënjësisht duhet kërkuar në aspektin e fenomenologjisë kriminale!

Joprofesionalizmi, korrupsioni, nepotizmi, politizimi, ndikimi dhe operativiteti mbi porosi politike, rekrutimi dhe gradimi me lidhje me partitë politike por edhe me lidhe të tanishme me Serbinë( agjenturat serbe), patriarkalizmi, religjioni etj, janë parakushtet për pranim, punësim, gradim në Institucionet e Republikës së Kosovës- për fat të keq! E aq më keq, kjo ndodhë sidomos në Institucionet e Sigurisë( policisë, FSK-së, AKI-së), pastaj në Institucionet e Drejtësisë( prokurorisë, gjyqësisë), ato arsimore( nga shkollat fillore deri në Universitete), ato të shëndetësisë( nga qendrat familjare e deri në QKUK), etj etj! Vitaliteti i një shteti, shoqërie, qëndron kryesisht në institucionet e sigurisë, drejtësisë, shëndetësisë, arsimit, ekonomisë!

Në një anë është fatmirësi, por në anën tjetër edhe fatkeqësi, që kam patur mundësinë që të disponoja informata të shumta, shumica e të cilave në një a mënyrë tjetër krimet e tilla lidhen me Serbinë edhe përmes Luginës së Preshevës!

Fillimisht, Policia e Kosovës, është e stërmbushur me policë ( mund të flasim për disa qindra të tillë-pa përfshirë fare Policët serb!), të cilët janë kryesisht shqipëtar, pastaj disa turq, etj, por që vazhdimisht i shërbejnë Serbisë! Deri me rastin e “shpalljes së Luftës kundër terrorizmit islamik nga Qeveria e Kosovës”, në Policinë e Kosovës të Prishtinës, ka vepru grupa e policisë, me porosi të Serbisë, pastaj kjo grup e policisë po thuajse tërësisht është bartur në Fushë Kosovë. Si mbulesë kanë përdorur arsyetime sidomos ndërrim vendbanimi( kryesisht)! Fushë Kosova si qytet me shumicën e banorëve të ardhur nga trojet tjera Shqipëtare, ka bërë që të ketë mundësi për veprimtaritë e tyre kriminale dhe propagandistike shumë më të mëdha.

Prokuroria, deri prokuroria speciale, e njejta ndodhë edhe me gjyqëtarët, që janë mbushur me prokurorë dhe gjykatat me gjyqëtar, që disa sosh prej tyre, tashmë dihen që janë përfshi në veprimtari kriminale të krimit të organizuar; korrupsion; nepotizëm; mbrojtjen e terroristëve islamik të Serbisë; të lidhur me parti politike vendore; e disa të tillë të lidhur edhe që i shërbejnë agjenturave të Serbisë etj.

Mësuesit, profesorët në shkollat fillore dhe të mesme por edhe në fakultete, të vetmin kriter pranimi kanë preferencën-rekomandimin partikan, derisa në konkurse publikohen tërësisht kritere tjera që aspak nuk janë të rëndësishme! P.sh: është pranuar në një shkollë në Lipjan, një pedofil i cili është lëshuar nga Serbia( i cili ka precedente pedofilike në shkollat shqipe të Luginës së Preshevës), për të vepru në Kosovë!

Kriteri kryesor, sado që mund ta fshehin, por të gjithë e dijnë, që në çdo punësim në sektorin publik, pra edhe në polici, prokurori, gjykata, sferën e arsimit a shëndetësisë dhe në çdo sferë tjetër, është lidhja politike!

Në krye të grupës, qëndronin eprorë të policisë, të lidhur me Serbinë, por të njejtët edhe të lidhur me figura të rëndësishme të partive politike në Kosovë, e po ashtu edhe të lidhura edhe me biznese( mbrapa të cilave fshehen veprimtari kriminale ekonomike)! Ndërsa anëtarët e këtyre grupeve kriminalo-politike, brenda policisë së Kosovës, janë kryesisht: analfabet a me shkollim joadekuat, apo ende janë në studime; janë partizan politik; janë të dalluar si materialist etj.

Grabitje kazinosh( Prishtinë, Ferizaj); grabitje bankash(Prishtinë); tentim-vrasjesh të kundërshtarëve të islamit radikal( Prishtinë, Ferizaj, Mitrovicë); përqindje në shitjen dhe shpërndarjen e drogës( Prishtinë); vjedhje të drogës dhe gjësendeve me vlerë në rastet e konfiskuara( Prishtinë); kontrabandë droge( Prishtinë, Ferizaj etj); kontrabandë me migrant( Mitrovicë, Gjilan, Kaçanik); trafikim me qenie njerëzore( Prishtinë, Gjilan, Mitrovicë); prodhim narkotikësh( Pejë); falsifikim dokumentesh( Prishtinë, Gjilan); falsifikim të parave( Prishtinë, Ferizaj, Gjilan); prodhim dëshmitarësh falso për të dëshmuar kundër figurave të UÇK-së( Qendra e Paraburgimit Lipjan, Qendra Korrektuese Dubravë); mos regjistrim të rasteve, zhdukje e rasteve në policinë e Kosovës( Prishtinë); lidhja me banda të krimit të organizuar( Prishtinë, Ferizaj, Gjilan, Kaçanik); mos konfiskim të të gjitha sendeve të dyshuara me rastin e arrestimit të terroristëve islamik( Prishtinë, Gjilan, Ferizaj, Kaçanik); mos arrestimi i udhëheqësit shpirtëror( organizatorit), të terroristëve islamik të Grupës së Kaçanikut( për lidhje me Lavdrim Muhaxherin), si dhe mos konfiskimi i parave që kanë fituar terroristët nga lufta terroriste në Siri; mos hetimi, mos gjykimi i terroristëve islamik të Grupës së Kaçanikut( e cila është njohur më herët si Organizata terroriste islamike ”Xhihadi Thërret); mos hetim, mos gjykim për një numër të madh veprash penale të një grupe vehabistësh nga Ferizaji( e që janë gjyku thjesht për garbitje kazinosh); mos hetim, mos gjykimi i Grupit që kreu shumë vepra penale, e që edhe Qeveria e Kosovës, e kishte quajtur “agjent të Serbisë”, të cilët kanë arritur edhe të iknin nga Qendra Korrektuese e Dubravës; tentim-arratisja e fillimvitit 2014, nga Qendra Korrektuese e Dubravës, Pavioni VIII, i sigurisë së lartë; tentim-sulmet e terroristëve islamik, për t’i nxjerrë disa të burgosur nga Burgjet e Kosovës( Burgu i Sigurisë së Lartë-Dyz), disa prej tyre të përfshirë edhe në tradhëtimin e Grupës së Kumanovës, që me direktiva të Shërbimeve sekrete Serbe, tentonin formimin e Shtetit Islamik në Ballkan; zhdukje provash materiale nga policia( Prishtinë); dhënije e kundërligjshme e të drejtës për të dalur jashtë Institucionit korrektues( Qendra e Paraburgimit Lipjan dhe Gjilan, Qendra Korrektuese Dubravë); etj.

Kontrabandë me farmaceutik; falsifikim banderolash të barnave( Prishtinë); pranimi jomeritor i specializantëve në QKUK; mjekim të pandërgjegjshëm; abortime kundërligjore etj.

Pranimi për mësues të artit figurative të agjentit islamik të Serbisë, njëherit me precedente penale në Serbi, për pedofili; dhënija e notave në këmbim të shfrytëzimit seksual( Fakulteti juridik i UP-së); shitje e notave( Fakultetet Juridik dhe Ekonomik të UP-së); regjistrim në fakultet( në Fakultetin Juridik, Ekonomik, Mjekësisë të UP-së); kalimi i provimit dhe kontraktimi i lartësisë së notës me numrin e votave që do ia sjellte studenti( Fakulteti Juridik i UP-së); pranimi i asistentëve kundërligjshëm( Fakulteti Juridik, Filozofik të UP-së); plagjiaturë master dhe doktorate( Fakulteti Juridik, Filozofik të UP-së); pranimi për mësues dhe profesor në shkolla fillore dhe të mesme, në mënyrë të kundërligjshme( Prishtinë, Gjilan, Ferizaj, Kaçanik, Mitrovicë) etj.

Ndërsa: ngacmimet seksuale( kjo është dukuri ende “normale!”); komplimente banale dhe fyese; mashtrime të vogëla; korruptime dhe ryshfete të vogëla; ushtrim i pandërgjegjshëm i profesionit; keqpërdorim i detyrës zyrtare( keqpërdorim i lehtë), etj, në shoqërinë tonë, për fat të keq, konsiderohen si dukuri të falshme, të lejueshme!

Grupet kriminale dhe grupet politike, kanë kumulativitet interesash dhe fuzion qëllimesh, që si grupet kriminale ashtu edhe ato politike, janë përafëruar. Grupet kriminale edhe këtu si në çdo vend, dëshirojnë të fuzionohen, ingranohen dhe të kenë përfitime dhe mbrojtje zyrtarësh institucional në veprimtaritë e tyre kriminale.

Grupet politike( partitë politike), për dallim nga vendet demokratike, në vendet në tranzicion, tentojnë marrjen e pushtetit përmes rrugës plotësisht a pjesërisht kriminale!

Misionet ndërkombëtare, vetëm për të ruajtur paqen dhe stabilitetin në Ballkan( dhe Kosovë), vazhdimisht sakrifikuan dhe heshturazi lejuan gjitha këto!

Politikanët janë pasqyra e popullit, siç fëmija është pasqyra e familjes, edhe përkundër formave të ndryshme të manipulimit të votimeve! Për fat të keq të gjitha organizatat studentore, janë instrumentalizu nga partitë politike-studentët sot s’mund të jenë promotorë të shtetit ligjor të Kosovës-siç dikur ishin promotorë të Lirisë!

Qytetarët tonë, janë adaptuar dhe vazhdimisht përpjeken që vetë ata apo anëtarët e familjes së tyre, përmes lidhjeve familjare a politike, të punësohen në sektorin publik, nuk mund të dëgjosh ndonjë rast që të kenë besim në meritokraci! Robëritë e stërzgjatura, kanë bërë, që në gjenin e Kombit tonë, të gjendet një mënyrë adaptimi me realitetin, e jo një mënyrë kundërshtimi! Islamizmi kryeson në krijimin e mentalitetit nënshtrues-të robit( jo vetëm tek ne, por në gjitha vendet islamike), e kjo është përforcuar edhe më shumë nga patriarkalizmi! Derisa edhe sot, ndërgjegja jonë nuk është e lirë( e ajo është robëruar me pranimin e islamizmit dhe ortodokso-sllavizmit), edhe për kundër lirisë fizike, kemi robërinë shpirtërore. Kultura islamike, nuk robëroi vetëm Shqipëtarët e besimit islam, të njejtën robëri e shohim edhe tek Shqipëtarët e krishter, ateist etj!

Si rrjedhojë: joprofesionalizmi, korrupsioni, nepotizmi, politizimi, ndikimi dhe operativiteti mbi porosi politike, rekrutimi dhe gradimi me lidhje me partitë politike por edhe me lidhe të tanishme me Serbinë( agjenturat serbe), patriarkalizmi, religjioni etj, janë sfidat më të mëdha të shtetësisë së Republikës së Kosovës. Këto sfida për Republikën e Kosovës, Serbia i ka shfrytëzuar për qëllimet e saj, në defunksionalizimin dhe në shpërpërjen e Shtetësisë së Kosovës.

Mjafton të shihet, politika dhe politikanët e vendit, janë ata që defaktorizuan Kosovën këto dy dekadat e fundit!

Shpresa mbetet vetëm në Çlirimin Shpirtëror të Kombit tonë, duke i’u kthy Kulturës, Përparimit dhe Zhvillimit, para Pushtimit Osman, në kohën kur Universitetet tona konkuronin me Universitetet e vendeve Europiane!

Më:13.02.2019

Serbia ka territor ZERO TERRITOR të vetin në Kosovë

February 11, 2019 by dgreca

Nga Prof.Dr.Mehdi HYSENI/

–Të mos ndiqet tradhtia e Esat Pashës, duke ia falur Kosovën Veriore ish-Serbisë së Madhe kolonialiste dhe gjenocidale, në emër të “normalizimit të marrëdhënieve” me Serbinë dhe në emër të ashtuquajturit “korrigjim i lehtë i kufijve të Kosovës me Serbinë, sepse ajo do të ishte tradhti ndaj popullit shqiptar të Kosovës. Pavarësisht se çfarë do të jetë shpërblimi ndërkombëtar për faljen e Kosovës Veriore Serbisë, historia dhe populli shqiptar atë do ta gjykojnë si akt tradhtir të rëndë dhe të pafalshme, ashtu sikurse Esat Pashë Toptanin dikur.

Ndaj, zgjohuni nga “egjra” e politikës mashtruese serbo-sllave, sepse Kosovës së Shqipërisë etnike nuk i duhen “diplomaci e hollë” dhe “diplomatë elastikë” sikurse Esat Pashë Toptani (agjent i sulltanit, aleat dhe mik i ngushtë i serbëve dhe i malazezëve, të cilëve u fali territore shqiptare) i cili, para se t’ia dorëzonte Shkodrën Malit të Zi, më 23 prill 1913, “kishte vrarë gjeneralin Hasan Riza Pasha, kryekomandantin e forcave turke dhe shqiptare vetëm pse kishte dalë në mbrojtjen e Shkdorës nga pushtimi i Malit të Zi.”

Prndaj, nuk ekziston asnjë argument valid qoftë historik, gjeopolitik, diplomatik, apo juridik i së drejtës së brendshme dhe asaj ndërkombëtare, që përfaqësuesit shtetërorë të Kosovës, të zhvillojnë kurrfarë bisedimesh me palën serbe qoftë në Bruksel, në Vjenë, në Londër, në Berlin, në Nju-Jork apo në Uashington, sepse Kosova nuk është pjesë e territorit të Serbisë, por e Shqipërisë etnike.

Pse ish-Serbia kolonialiste nuk e njeh shtetin e pavarur dhe sovran të Kosovës (17 shkurt 2008), kjo nuk do të thotë se ndonjë pjesë e saj është pjesë përbërëse e territorit të Serbisë.

Pse ndërmjetësuesit e BE-së së Dialogut të Brukselit (2011-2019) dhe aleatët e tyre po ushtrojnë trsyni, që patjetër Kosova të vazhdojë atë Dialog të dështuar 9-vjeçar, kjo nuk nënkupton se ndonjë pjesë territoriale e Kosovës i përket Serbisë.

Pse Rusia me VETO-n e saj në Këshillin e Sigurimit të OKB-së ka “betnouar” statusin e Kosovës, kjo nuk do të thotë se Kosova është provincë e Serbisë.

Pse Rezoluta 1244 e KS-së së OKB-së nuk e njeh pavarësinë e Kosovës, kjo nuk do të thotë se Kosova është krahinë e Serbisë.

Pse Kushtetuta e Republikës së Serbisë në fuqi (2006) Kosovën e ka sanksionuar si pjesë integrale të territorit të saj, kjo nuk do të thotë se Kosova është “koloni e ligjshme” serbe.Pra, sa më sipër, as Qeveria e as Kuvendi i Kosovës nuk kanë të drejtë ligjore e as kushtetuese, që të formojnë dhe të autorizojnë “grupe speciale” për t’i dërguar në “Dalogun tekniko-politik” në Bruksel) për të biseduar me palën serbe të Beogradit, sepse statusi politik i Kosovës së pavarur është mbyllur më 17 shkurt 2008.

Nuk nevojitet “Platformë” për copëtimin e territorit Kosovës, POR për shkolonizimin e Preshevës, të Bujanocit dhe të Medvegjës nga Serbia kolonialiste (1878-2019)

Pra “diplomacia e hollë” e Prishtinës dhe e Tiranës, duhet të angazhohen për mbajtjen e një konference ndërkombëtare, që Kosova dhe Shqipëria ta denoncojnë Serbinë për kolonializmin e saj mbi territoret shqiptare (Preshevë, Bujanoc, Medvegjë dhe Novi Pazar). Në këtë kontekst, PLATFORMA STRATEGJIKE e boshtit Tiranë-Prishtinë, domosdo, duhet të përfshijë edhe çështjen e shkolonizimit të shqiptarëve në Maqedoninë e Veriut, në Mal të Zi dhe në Greqi. Kjo Platformë, do të duhej bërë nga “asët” e politikës së Tiranës dhe të Prishtinës, jo të negociohet me Serbinë kolonialiste për revidimin e kufijve territorialë të Kosovës së Shqipërisë etnike, ashtu siç po dialogohet me palën serbe në Bruksel (2011-2019).

Sikur Serbia të mos kishte bërë agresion dhe gjenocid në Kosovë, me ç’rast masakroi dhe vrau mbi 12000 shqiptarë, shkretoi dhe e dogji Kosovën (1989-1999), domethënë para luftës, atëherë do të kishte pasur kuptim zhvillimi i dialogut paqësor mes Prishtinës dhe Beogradit për zgjidhjen e statusit politik të Kosovës.

Mirëpo, sot, pas gjenocidit të kryer (1989-1999), kur Kosova me ndihmën e Amerikës u pavarësua nga Serbia kolonialiste, çdo dialog me Beogradin për statusin e Kosovës, është në kundërshtim flagrant me të drejtën historike të shqiptarëve mbi Kosovën; është në shpërputhje me normat e parimet e së drejtës ndërkombëtare dhe me dispozitat e Kartës së Kombeve të Bashkuara, sepse Kosova si ish-koloni 100-vjeçare e Serbisë, në ASNJË KUPTIM nuk është territor i Serbisë, por historikisht, de fakto dhe de jure i përket Shqipërisë etnike (shek. II – XXI).

Prandaj, nga e drejta e qeveritarëve të Kosovës, që të zhvillojnë dialog me Serbinë dhe me ndërmjetësuesit e BE-së për kufijtë territorialë të Kosovës. Nga e drejta e Serbisë kolonialiste të kërkojë, ose ndarjen, ose shkëmbimin, ose korrigjimin ose ripërkufizimin gjeopolitik të territorit të Kosovës së Shqipërisë etnike?

Qeveria dhe Kuvendi i Kosovës e as populli shqiptar i Kosovës, nuk duhet të pranojnë asnjë nga opsionet e theksuara politike të “fabrikuara” nga Beogradi dhe nga presidenti i Kosovës, Hashim Thaçi, sepse Serbia nuk ka asnjë pëllëmbë hise të territorit të Kosovës, e cila 100 vjet më parë ishte vetëm plaçkë koloniale e Serbisë.

Prandaj, as Hashim Thaçi dhe, asnjë lider tjetër politik shqiptar i Kosovës, apo i Shqipërisë së Edi Ramës nuk ka kurrfarë obligimi e as të drejteje, që të negociojë me presidentin e Serbisë, Aleksandar Vuçiq për statusin e kufijve territorialë të Kosovës, ku Serbia ka vetëm ZERO SOVRANITET në Kosovë dhe minoritetin e saj kolon serb, si dhe kishat e manastiret e tyre, të cilat janë të mbrojtura sipas Planit të Marti Ahtisarit dhe Kushtetutës në fuqi të Republikës së Kosovës (15 qershor 2008). Kjo është e tëra sa i përket Serbisë dhe serbëve në Kosovë.

Vazhdimi i Dialogut të Brukselit (2011-2019) nga ana e palës shqiptare të Kosovës, de fakto dhe de jure është legalizim, mbështetje dhe amnistim i politikës kolonialiste dhe hegjemoniste të Serbisë së madhe mbi shqiptarët dhe mbi territoret e ankesuara dhe të kolonizuara të Shqipërisë etnike: Nishi, Prokupla, Vranja, Leskovci, Bllaca, Kurshumlia, Presheva, Bujanoci, Medvegja , Novi Pazari etj., duke përfshirë edhe pjesën veriore të Republikës së pavarur të Kosovës, e cila, sipas paralajmërimit parashikues të “diplomacisë së hollë dhe elastike” të “korrigjmit të lehtë të kufijve” të presidentit të Kosovës, Hashim Thaçi, që tani mund të llogaritet se “ është akaparuar” me Beogradin, kinse për ta “këmbyer” me Preshevën, pa Bujanocin dhe pa Medvegjën.

Misioni i pamundur i Johannes Hahn në Kosovë

December 3, 2018 by dgreca

1-enver-Bytyci

Nga Enver Bytyçi/

I pari i Kosovës, Hashim Thaçi, thirri në ndihmë Johannes Hahn përmes Mogherinit, me qëllim që ta “mposhtë” kundërshtarin dhe rivalin e tij, kryeministrin Haradinaj. Hahn nisi rrugëtimin e tij fillimisht direkt në Prishtinë e më pas u kthye pak nga rruga për të takuar Aleksandër Vuçiq në Beograd. Vuçiq i premtoi Hashim Thaçit se do t’i bëjë presion zotit Hahn, me qëllim që Brukseli ta shpallë Haradinajn ekstremist. Por nuk ndodhi kjo. Shkaku i vizitës ishte vendosja e taksës 100 përqind të vlerës së mallrave që hyjnë nga Serbia në Kosovë. Sot pasdite komisioneri Europian për Zgjerim u takua në kryeqytetin e Kosovës me tri personalitetet e vendit, presidentin, kreun e Parlamentit dhe kryeministrin. Takoi dhe deputetët e Listës Srpska, të cilët u ngujuan dje ora 11.00 në ambjentet e parlamentit të Kosovës, në shenjë proteste pse Hahn kishte refuzuar këtë takim. Ndërkaq nga deklaratat në përfundim të takimeve dhe bisedave duket se qeveria e Kosovës është e vendosur në zbatimin e vendimit të marrë për taksën, ndërkohë që komisioneri europian ka shpreh befasi nga marrja e këtij vendimi. Haradinaj thotë në deklaratën e tij për shtyp se ia ka shpejguar zyrtarit të lartë të Brukselit arësyet pse qeveria mori vendimin përkatës. Sigurisht që Hahn nuk është pajtuar me ato argumente dhe ka kërkuar heqjen e taksës për mallrat që vijnë nga Serbia në Kosovë. Por Johannes Hahn u duk se e ka zbutur qëndrimin e tij për këtë çeshtje kur deklaroi se “Ka nevojë që të dyja palët t’i adresojnë këto çeshtje”! Kjo do të thotë se gjatë vizitës ai ka kuptuar që nuk është e nuk mund të bëhet fajtore vetëm Prishtina. Në të vërtetë fajtore dhe përgjegjëse për konfliktin e stërzgjatur shqiptaro-serb është Beogradi. Vitet e fundit është bërë bashkëpërgjegjës edhe presidenti i Kosovës Hashim Thaçi. Kemi parë tashmë se sa më shumë lëshime ka bërë Thaçi, aq më shumë është rritur veprimtaria diversioniste e sabotuese e Beogradit në drejtim të Kosovës. Më e keqja është se zoti Thaçi ende nuk dëshiron t’i kundërvihet kësaj skeme. Prandaj dhe fajëson Haradinajn për gjithçka, përfshirë taksën për mallrat e Serbisë. Kësisoj nuk është vështirë të kuptohet se presidenti i Kosovës thërret në ndihmë Serbinë dhe Beogradin për t’i qëruar hesapet me kundërshtarët dhe rivalët e tij politikë në Kosovë. Duhet hetuar a ka bërë të njëjtën gjë me Ibrahim Rugovën dhe Fatmir Sejdiun?! Ka shumë gjasa që po. Derisa sot presidenti i vendit bashkëpunon me të gjitha qarqet antiKosovë në Serbi, Rusi e në botë kundër Kosovës dhe qeverisë së saj, atëherë duhet besuar se ky bashkëpunim nuk ka ardhur “në befasi”, siç u shpreh Hahn për taksën. Bashkëpunimi i zotit Thaçi për eleminimin fizik të Rugovës dhe eleminimin politik të Sejdiut janë përvojat e para të skemës së Thaçit në bashkëpunim me Beogradin! I nxitur nga Beogradi dhe Hashimi Johannes Hahn erdhi me shumë pompozitet në Prishtinë. “Magjinë” e tij e ngjizën te publiku gjithashtu mediat e Ramës dhe të Thaçit. Por në fund të ditës kemi një sukses të pamendueshëm. Në vend që Hahn ta qortojë kryeministrin Haradinaj, ai la të kuptohet se kreu i ekzekutivit të Kosovës është tashmë më shumë faktor sesa kreu i shtetit. Prandaj vizita e tij në Prishtinë do të ketë efekte pozitive. Infoja që ai do të çojë në Bruksel do të jetë ndryshe nga çdo info e mëparshme e shpëlarë, e manipuluar dhe e intriguar edhe si rezultat i retushimeve dhe redaktimeve që atyre u ka bërë Beogradi para se të arrijnë në kryeqytetin europian përmes Hashim Thaçit dhe Gebelsit kosovar, Baton Haxhiu. Takimi me Haradinajn dhe besoj edhe me Kadri Veselin e ka bindur komisionerin për Zgjerim se nuk ekziston vetëm Kosova e Hashimit, por ka dhe një Kosovë tjetër jashtë perimetrit të përceptimit dhe imagjinatës së presidentit të Republikës. Mjafton kjo që ta konsiderojmë të suksesshme vizitën e sotme të Johannes Hahn në Kosovë. Shkoi e u mbars në Beograd, por u shkarkua pas pak orësh në Prishtinë. Ky është sukses jo i vogël.

Tiranë, më 3.12.2018