Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Europarlamentari McAllister inkurajon Shqipërinë

by

Europarlamentari gjerman i CDU-së dhe kreu i Komisionit të Parlamentit Europian për Politikën e Jashtme, David McAllister paralajmëron në “Die Welt” nga rritja e ndikimit rus në Ballkan./

Në një artikull të së hënës, (20.03) me titullin “Ballkani një rajon me rrezikshmëri të lartë”, gazeta “Die Welt” shkruan se sikur Bashkimit Europian të mos i mjaftojnë problemet me Brexit, populizmin, Trumpin dhe Turqinë, tani para dyerve të BE-së po rriten tensionet. Në shumë vende të Ballkanit situata zien. Në të njëjtën kohë përpiqen Rusia, Turqia, Kina, Arabia Saudite e Katari të rrisin influencën në rajon -një përzierje e rrezikshme. Kreu i Komisionit të Parlamentit Europian për Politikën e Jashtme, David McAllister, (CDU) thekson se “Ballkani është një rajon me rrezikshmëri të lartë, ku në një kohë të shkurtër një veprim i papërgjegjshëm mund të rindezë konfliktet që besonim se i kishim tejkaluar.”

McAllister: Shqipëria në rrugën e duhur

BE kërkon të kundërveprojë ndaj këtij rreziku duke sjellë një atmosferë të re në bisedimet e anëtarësimit. Shpresa nuk ka vetëm Serbia, shkruan “Die Welt”, por edhe Shqipëria. McAllister thekson, se “sipas Komisionit Europian, parlamentit dhe qeverive ky vend është në rrugën e duhur. Bisedimet e anëtarësimit me Shqipërinë mund të hapen brenda 12 muajve të ardhshëm, më së voni në fillim të vitit 2018”.Eurodeputeti gjerman McAllister ka lëvduar ujdinë që arritën partitë politikë në Tiranë për reformën në drejtësi. “Ky ka qenë një kriter i rëndësishëm për fillimin e negociatave. Kur të fillojnë negociatat, do të hapet që në fillim çështja e shtetit ligjor”, ka theksuar europarlamentari me influencë në Bruksel. Por megjithatë McAllister e sheh Shqipërinë ende larg anëtarësimit në BE.

Serbi: Rrezik nga ndikimi rus

Ndërsa duke folur për Serbinë, e cila i ka hapur në janar 2014 bisedimet e anëtarësimit me BE, McAllister shikon përparime, por edhe probleme. Shqetësimi i tij është përpjekja ruse për influencë në këtë vend. “Moska përpiqet të ndikojë në mënyrë masive mediat, pjesë të shoqërisë civile në Serbi”, thotë eurodeputeti. BE me 1,5 miliardë euro asistencë financiare në Serbi është -me distancë- donatori më i madh në këtë vend që mbështet reformat dhe projektet ekonomike. Megjithatë McAllister është i vetëdijshëm, se në të njëjtën kohë Rusia perceptohet në Serbi si një nga mbështetësit më të mëdhenj të vendit. “Për BE kjo do të thotë që së bashku me ndihmën e politikës serbe dhe shoqërisë civile të bëjë më prezentë angazhimin e saj.”(DW)

Fleckenstein: Shqipëria në rrugën e duhur, më shumë zë shoqërisë civile

by

TIRANË,9 Janar-Raportuesi i Parlamentit Europian, Knut Fleckenstein, vlerëson se Shqipëria është në rrugë të mbarë dhe premton shumë sa i takon realizimit të reformave për plotësimin e 5 prioriteteve, ndërsa nënvizoi rëndësine e pjesëmarrjes së shoqërisë civile në vendimmarrjen politike.
Deklarata e Fleckenstein erdhi në ditën e dytë të vizitës zyrtare në Tiranë gjatë një bashkëbisedimi me mediat, duke përmbledhur dhe takimet që ai zhvilloi me liderët politike shqiptarë.
Në fjalën e tij, Fleckenstein vlerësoi se Shqipëria po bën hapa premtues sa i takon realizimit të reformave. “Jeni në rrugë të mbarë. Kemi vënë re se janë ndërmarrë mjaft nisma ligjore. Është shumë e rëndësishme që po zbatohet ligji, por nga krahu tjetër, duhet edhe të veprohet në mënyrë të ligjshme”, vijoi Fleckenstein.
Sipas tij, është shumë e rëndësishme që në proçesin e integrimit europian të marrë pjesë e gjithë shoqëria, prandaj po punohet për ngritjen e Këshillit Kombëtar për Integrimin. “Nëse i lihet në dorë vetëm politikanëve, vendi do të humbë. Shpresoj se në të ardhmen e shpejtë do të ketë një Këshill Kombëtar për Integrimin, i cili do të jetë një forum ku do të marrin pjesë përfaqësues nga fusha të ndryshme. E di nga eksperienca në vendin tim, që nëse BE është diçka vetëm për politikanët, nuk do ta fitojnë këtë lojë. Procesi është i suksesshëm vetëm kur të sigurohet një shumicë e gjerë e shoqërisë, që dëshiron të jetojë në një komunitet që ka vlerat për të cilat flasim gjatë gjithë kohës. Për këtë duhet bashkëpunim politik, që t’i shpjegohet qytetarëve se çfarë duhet të realizohet dhe si e ka trajtën integrimi evropian, cfarë risie sjell dhe duhet të bëjnë për të kontribuar, e kështu me radhë”, vijoi Fleckenstein.
Raportuesi i PE në fjalën e tij rikujtoi edhe njëherë pesë prioritet, ndërsa vuri në dukje se janë 3 shtylla kryesore përmes të cilave këto pesë prioritete mund të realizohen. “Së pari, forcimi i shtetit të së drejtës është një proces që nuk ka të bëjë vetëm me krijimin e mjedisit të sigurt për kompanitë, por është një proces që lidhet me luftën kundër korrupsionit, krimit të organizuar dhe që garanton jetën dhe liritë themelore të qtytetarëve. Qeveria ka filluar t’i zbatojë ligjet. Është e rëndësishëm të veprohet në mënyrë të ligjshme, po ashtu. Ky eshte element i rëndësishëm për t’u theksuar. Së dyti, rritja e besimit tek institucionet dhe së treti, forcimi i shoqërisë civile, pasi zëri i qytetarëve nuk duhet të jetë në qoshe të skendës politike, por në qendër të saj, pasi kjo është BE”, tha Fleckenstein. Sa i takon prioriteteve, Fleckenstein tha se janë po ato, reforma në administratë publike; reforma në gjyqësor; lufta ndaj korrupsionit; lufta ndaj krimit të organizuar; mbrojtja e lirive dhe të drejtave të njeriut dhe këtu është mjaft e rëndësishme dhe liria e medias, si një shtyllë që tregon një vend të emancipuar.
Raportuesi foli edhe për dosjen e 21 janarit, ku tha se 4 vite hetim është një kohë e gjatë. “Nesër do të takoj një familjar të një prej viktimave të 21 janarit (Aleks Nikës). Një ngjarje e rëndë që ende nuk ka marrë përgjigje nga drejtësia. 4 vite hetim është shumë kohë e gjatë, pres të kuptoj më shumë nesër”, tha ai.
Fleckenstein foli edhe për tragjedinë në Francë, duke thene se kjo krizë kalohet përmes dialogut politik të të gjithë aktorëve politike në Europë dhe më gjerë, si dhe krijimit të politikave të përbashkëta në fushën e sigurisë.
Raportuesi i PE-së, Fleckenstein, në fund tha se ai nuk ka ardhur në Shqipëri si arbitër apo gjyqtar, por si një përçues i zërit të Bashkimit Europian dhe ndihmës së këtij komuniteti ndaj vendit tonë në rrugën e gjatë drejt integrimit të plotë të Shqipërisë në BE.(Kortezi: Arbi Fortuzi)