Intervista e Presidentit të Republikës, Bujar Nishani, dhënë gazetarit të televizionit “Klan”, Blendi Fevziu/

Gazetari: Të nderuar teleshikues, mirëmbrëma! Po ju flas nga një studio e improvizuar në Presidencën e Shqipërisë, në  selinë  e Presidentit të Republikës, në një intervistë të lajmëruar gjatë gjithë javës së kaluar, një intervistë e fokusuar te zhvillimet politike që la pas sezoni i kaluar dhe që pritet të fillojnë në këtë sezon të ri politik. Është një intervistë me Presidentin e Republikës, zotin Bujar Nishani. Thashë, sikurse e keni ndjekur, e lajmëruar ditët e fundit është një intervistë premierë e emisionit “Opinion”, që do të vijojë me përditshmërinë e tij katër herë në javë prej datës 12 shtator.
Zoti President, mirëmbrëma dhe faleminderit që pranuat ftesën!

Presidenti Nishani: Kënaqësia është e imja dhe ju uroj suksese në këtë sezon të ri!

Gazetari: Faleminderit! Shpresoj që edhe ju të keni pasur pushime pak a shumë normale. Nuk e di nëse presidentët pushojnë apo jo zakonisht?!

Presidenti Nishani: Pushimi është i nevojshëm për të gjithë për të qenë i përgatitur për çdo sezon pune në mënyrën më dinamike të mundshme.

Gazetari: Keni pushuar këtu apo jashtë?

Presidenti Nishani: Unë, në përgjithësi, pushoj në Shqipëri. Më pëlqejnë vendet e bukura të Shqipërisë, më pëlqen bregdeti, mali e gjithçka.

Gazetari: Thonë se Shqipëria është e bukur ashtu si e ka krijuar Zoti aty ku s’ka vënë dorë njeriu, por aty ku kanë vënë dorë njerëzit, mjedisi është shumë problematik.

Presidenti Nishani: Jo në çdo rast kjo është e vërtetë.

Gazetari: Jo në çdo rast kjo është e vërtetë?! Ju keni pushuar në selinë e Presidentit në Jug apo ….?

Presidenti Nishani: Unë kam qenë në Jug, në Veri, kam qenë në Vermosh, ku pashë një bukuri të veçantë të Shqipërisë. Ishte një vend turistik për t’u admiruar. Kam qenë në Libohovë, në Dhërmi.

Gazetari: Paskeni bërë, pak a shumë, pushime aktive; në lëvizje. Në Vermosh ishit për herë të parë?

Presidenti Nishani: Isha për herë të parë dhe jam mrekulluar.

Gazetari: Ç’do me thënë, jeni mrekulluar?

Presidenti Nishani: Së pari, nga natyra, nga bukuria e vendit, nga mikpritja e njerëzve, por edhe nga disa elementë të tjerë etnografikë, siç ishin kostumet popullore, për të cilët kisha dëgjuar shumë, por nuk i kisha parë aq afër.

Gazetari: Kemi parasysh se kur flasim për turizmin në Shqipëri apo Shqipërinë turistike, kemi parasysh segmentin nga Vlora në Jug, në Sarandë dhe deri diku Durrësin. Pjesën tjetër të Shqipërisë nuk e konsiderojmë turistike.

Presidenti Nishani: Për fat të keq. Çdo vend i Shqipërisë, çdo cep i saj, nga Vermoshi e deri Jug, është i bukur.

Gazetari: Kishte turistë në Vermosh?

Presidenti Nishani: Po, kishte. Ata ishin të vendosur atje edhe me tenda e çadra dhe me mjetet e tyre që lëviznin përgjatë Alpeve, përgjatë maleve të asaj zone.

Gazetari: Përveç pushimeve, ka qenë aktive vera juaj, zoti President?

Presidenti Nishani: Pothuajse, ka qenë aktive çdo ditë. Edhe ditët që kanë qenë jashtë zyrës, që mund të konsiderosh ditë pushimi, kanë qenë të lidhura me zhvillimet e politikës, me zhvillimet në vend me aktivitetet e detyrat e Presidentit të Republikës, çdo ditë pa dyshim.

Gazetari: Zoti Nishani, Ju jeni Presidenti i dytë, sepse paraardhësit kanë dhënë dorëheqjen, që do të tranzitoni pushtetin; pra, do të jeni në detyrën e Presidentit në kalimin e pushtetit nga njëra forcë politike drejt një force tjetër. Duket pak e vështirë në fillim. A jeni i përgatitur Ju për këtë kalim politik?

Presidenti Nishani: Ky është normaliteti i një demokracie të konsoliduar, i një demokracie që funksionon.

Gazetari: A kanë qenë krejt demokratike këto zgjedhje dhe a ka qenë demokratike gjithë situata para dhe pas zgjedhore?

Presidenti Nishani: Unë besoj se po. Ka qenë situatë para dhe pas zgjedhore nga më të mirat e hasura ndonjëherë. Këtë e bazoj jo vetëm në gjykimin tim; ka qenë një fushatë që në mënyrë të përsëritur unë e kam përcjellë edhe tek opinioni vendas dhe te partnerët, e mbështetur tërësisht në vizionin dhe në platformat qeverisëse, kryesisht e fokusuar te çështjet e ekonomisë , si dhe çështjet e tjera që kanë të bëjnë me jetën e qytetarëve. Procesi zgjedhor, pa dyshim, ka qenë një proces i mirë. Natyrisht, që unë besoj se pas daljes së raportit të vëzhguesve ndërkombëtarë, duhet të merren hapa të tjerë për ta përmirësuar akoma më shumë në të ardhmen. Ne kemi nevojë për përsosmëri gjithmonë.

Gazetari: Kishit shqetësim se mund të ndodhte ndonjë problem me zgjedhjet?

Presidenti Nishani: Në mënyrë institucionale, unë nuk kam pasur informacione, identifikime apo indicie që mund të kishte probleme me zgjedhjet; por gjithsesi, shqetësimet shpesh herë shfaqeshin nga aktorë dhe faktorë të ndryshëm të shoqërisë. Për një gjë jam shumë i kënaqur, që në të gjitha rastet kur hamendësohej për shqetësime, për  përplasje sociale që mund të vinin si pasojë e zgjedhjeve, të gjithë dështuan dhe nuk rezultuan të vërteta.

Gazetari: Zoti President, a mund të konsiderohet Shqipëria në një normalitet demokratik pas dy palë rrotacionesh në kushte normale?

Presidenti Nishani: Besoj se po.

Gazetari: Sot e tutje ne mund të quhemi një vend që i kemi përmbushur standardet?

Presidenti Nishani: Unë besoj se i gjithë procesi, ashtu si ju iu adresuat para pak çastesh, fushata zgjedhore, angazhimi i qytetarëve ditën e zgjedhjeve, funksionimi i administratës zgjedhore, me përjashtim të rastit të  Komisionit Qendror të Zgjedhjeve, që ndenji i paplotësuar, veçanërisht mënyra e sjelljes së klasës politike pas daljes së rezultateve paraprake të zgjedhjeve, ka qenë tregues i një pjekurie dhe maturie politike të Shqipërisë dhe institucioneve të saj.

Gazetari: Çfarë ka nevojë të përmirësojë Shqipëria nga zgjedhjet, zoti President?

Presidenti Nishani: Ndoshta do të ishte më mirë që ne të prisnim raportin e institucioneve të specializuara për këtë, por gjithmonë unë e them se gjithnjë kemi mjaft probleme për t’i përmirësuar. Asnjëherë nuk mund të themi që kemi arritur gjithçka.

Gazetari: Duket se e gjithë vëmendja aktuale është e përqendruar tek mazhoranca e re dhe dekretimi që ju do t’i bëni asaj. Ndërkohë,  para kësaj, hasim një veprim paraprak, Kryeministri në detyrë, zoti Berisha ka deklaruar sot në mbledhjen e qeverisë se do t’ju paraqesë Juve dorëheqjen? A do t’ia pranonit menjëherë dorëheqjen Kryeministrit? A ka nevojë Kryeministri që t’ju paraqesë Juve dorëheqjen?

Presidenti Nishani: Natyrisht, procedura e parashikuar në Kushtetutë dhe në ligj, do të ishte mirë të respektohej; kështu që çdo hap që ka të bëjë me një kalim normal të pushtetit, është një hap pozitiv dhe mund të aplikohet në Shqipëri.

Gazetari: Zoti President, edhe në postin Tuaj si Kreu i Shtetit, por edhe si  një figurë politike e këtyre viteve në Shqipëri, si do ta gjykonit vendimin e Kryetarit të Partisë Demokratike, Kryeministrit në detyrë për t’u tërhequr nga udhëheqja e Partisë Demokratike pas një karriere 23-vjeçare në politikën shqiptare?

Presidenti Nishani: Është plotësisht një e drejtë personale dhe individuale e gjykimit politik dhe njerëzor të zotit Berisha. Kjo mbetet një çështje që do të reflektohet, pa dyshim, në historinë politike.

Gazetari: Si do ta gjykonit Ju angazhimin e tij dhe kontributin 23-vjeçar në politikë?

Presidenti Nishani: Unë besoj se është shumë shpejt të bësh analiza të tilla, aq më tepër nga pozicioni i Presidentit të Republikës, por jam i bindur që kontributet janë gjithmonë të rëndësishme për t’u vlerësuar e për t’u parë me syrin kritik; njëkohësisht, për të parë se çfarë kanë sjellë si rezultat këto kontribute dhe këto angazhime të personaliteteve kaq të rëndësishme që janë në krye të punëve të vendit për një kohë të gjatë.

Gazetari: Zoti President, pritet që kuvendi të mblidhet ditën e hënë, datë 9 shtator dhe Ju të ushtroni funksionet Tuaja si Kreu i Shtetit. Pyetja ime e parë dhe e drejtpërdrejtë është: Kur do ta dekretoni Kryeministrin e Ri të Shqipërisë? Kryeministri, ndërkohë po bën disa mbledhje paralele kabineti në qytete të ndryshme të Shqipërisë, pavarësisht se janë jozyrtare.

Presidenti Nishani: Unë nuk kam dekretuar ende asnjë qeveri të re, por siç jeni të njoftuar, unë kam kërkuar mbledhjen e Kuvendit në datën 9 shtator…

Gazetari: Që është brenda limiteve ligjore.

Presidenti Nishani: Po, brenda limiteve ligjore. Në datën 7 shtator është dita e fundit e Kuvendit që mbylli sesionin parlamentar dhe, natyrisht, e gjykova të arsyeshme që pas ditës së diel, datë 8 shtator, 9 shtatori të ishte data më e përshtatshme që Kuvendi i Ri të mblidhej, të kryente detyrimet e para të tij të zgjedhjes së Kryetarit të ri të Kuvendit të Shqipërisë; menjëherë, pas kësaj date, unë pres që koalicioni fitues të sjellë propozimin zyrtar…

Gazetari: Pas verifikimit të mandateve.

Presidenti Nishani: Pas verifikimit të mandateve për të emëruar Kryeministrin e Ri. Me të ardhur propozimi zyrtar nga koalicioni fitues, natyrisht, që Presidenti i Republikës, do të dekretojë emërimin e Kryeministri të Ri.

Gazetari: Sipas Kushtetutës së Republikës së Shqipërisë, Ju keni 7 ditë kohë për ta dekretuar Kryeministrin e Ri, zoti Nishani. Do ta shpenzoni komplet këtë periudhë kohore apo mendoni se mund të kryhet më shpejt?

Presidenti Nishani: Unë mendoj se nuk ka nevojë për asnjë lloj sforcimi të pamotivuar të konsumimit të kohës, koha është gjithnjë në dispozicion të funksionit dhe detyrës që kryen. Në çastin që funksioni, detyra dhe përgjegjësia janë të qarta për t’u ushtruar, ato duhet të ushtrohen në çastin më të parë të mundshëm.

Gazetari: Që do të thotë se Ju do ta dekretoni në çastin më të parë të mundshëm Kryeministrin e Ri?

Presidenti Nishani: Pa diskutim.

Gazetari: Zoti Nishani, ndërkohë, pas dekretimit të Kryeministrit të Ri, ai duhet të paraqesë listën e ministrave për t’u dekretuar sërish nga Presidenti i Republikës, më pas për t’u betuar në Kuvend dhe për të filluar funksionin e tyre ose për të marrë detyrën. Keni sërish 10 ditë kohë. Ju jeni njohur me listën e ministrave, nuk është si rastet e tjera që dekretimi i Kryeministrit ka çuar më pas në bërjen publike të listës së ministrave. A keni Ju, si President i Republikës, pakënaqësi, hezitime dhe paragjykime për ndonjë nga ministrat e deklaruar të mazhorancës së majtë?

Presidenti Nishani: Ushtrimi i detyrave kushtetuese nuk lidhet me pakënaqësitë apo hezitimet personale, përveçse me detyrimet kushtetuese dhe kriteret ligjore.

Gazetari: A keni Ju pakënaqësi në kuptimin e dekretimit të ndonjërit prej emrave që janë deklaruar nga mazhoranca e majtë si ministra të mundshëm?

Presidenti Nishani: Unë ende nuk e kam marrë zyrtarisht propozimin.

Gazetari: Ju e dini shumë se kush janë ministrat e qeverisë së re.

Presidenti Nishani: Pa diskutim. Jam njohur përmes mediave, sepse kanë qenë deklarata zyrtare të përfaqësuesve të mazhorancës së re qeverisëse për emrat, por natyrisht Presidenti i Republikës duhet të reflektojë tek opinioni publik një qëndrim strikt ndaj procedurës dhe ligjit. Kjo nuk do të thotë që ne mund të bëjmë të paqenin; gjithsesi, janë institucionet ato që e ndihmojnë Presidentin e Republikës.

Gazetari: Ç’do me thënë: “Janë institucionet ato që e ndihmojnë Presidentin e Republikës”?

Presidenti Nishani: Janë institucionet e shtetit shqiptar ato që verifikojnë integritetin, ligjshmërinë e propozimeve që vijnë nga forcat politike, aktualisht nga mazhoranca konkrete.

Gazetari: Në momentin që Ju do të keni zyrtarisht listën e ministrave do t’u kërkoni institucioneve të tjera kompetente të hetojnë për secilin prej këtyre emrave? Që do të thotë: A do t’i kërkoni Ju Shërbimit Informativ Shtetëror apo strukturave të tjera të specializuara që të verifikojnë dhe të hetojnë përputhshmërinë e këtyre personave me postin?

Presidenti Nishani: Jo. Presidenti i Republikës duhet t’i ndjekë të gjitha hapat ligjorë dhe kushtetues që e lidhin atë me një detyrë kaq të rëndësishme, sa ç’është dekretimi i një qeverie të re.

Gazetari: Dekretimi do të bëhet ministër për ministër, zoti President?

Presidenti Nishani: Dekretet janë me emra.

Gazetari: Që do të thotë se mund të refuzoni për të dekretuar ndonjë emër të caktuar për arsye të informacioneve që Ju mund të merrni apo për mendimet që keni për një figurë?

Presidenti Nishani: Nëse do të ketë arsye kushtetuese, po.

Gazetari: Vetëm nëse ka raste të arsyeve kushtetuese dhe jo ato që lidhen me opinionin Tuaj?

Presidenti Nishani: Natyrisht, opinioni i Presidenti të Republikës nuk është një opinion që mund të ndikojë në vendimet apo përmbushjet e detyrave kushtetuese.

Gazetari: Cilat quhen arsyet kushtetuese, zoti President?

Presidenti Nishani: Natyrisht, ato që bien ndesh me ligjin, që kanë të bëjnë me karakterin e mospajtueshmërisë të funksionit të detyrës së ministrit. Ato janë qartësisht të përcaktuara në Kushtetutë.

Gazetari: Në qoftë se nga një shërbim i specializuar do të vinte informacioni se dikush prej ministrave mund të ketë pasur lidhje me ish-shërbimet sekrete të kohës së regjimit komunist etj., a do të refuzonit Ju ta dekretonit?

Presidenti Nishani: Nuk mund të paragjykoj asnjë hap të Presidentit të Republikës në këtë çast, por natyrisht, Kreu i Shtetit, do të jetë një respektues strikt i Kushtetutës dhe i ligjeve të vendit, pa diskutim, se kjo është detyra dhe përgjegjësia e tij.

Gazetari: Zoti President, ndërkohë, mbeten 10 ditë kohë nga çasti i marrjes së propozimit të emrave të ministrave deri në dekretimin e tyre, a do të ndiqni për dekretimin e qeverisë të njëjtën rrugë të shpejtë si në dekretimin e Kryeministrit?

Presidenti Nishani: Pa diskutim që do të ndjek një rrugë normale; nuk ka asnjë arsye për të krijuar pengesa artificiale apo tejkalime artificiale të kohës.

Gazetari: Kryeministri që pritet të hyjë në zyrë, por që ende nuk ka hyrë, Zoti Rama, ka paralajmëruar vizita zyrtare në Kosovë, Bruksel dhe më pas në Shtetet e Bashkuara të Amerikës. A mendoni se dekretimi do të kryhet brenda kësaj kohe për t’i mundësuar atij t’i realizojë këto vizita?

Presidenti Nishani: Bashkëpunimi ndërmjet institucioneve është një element i rëndësishëm për funksionimin e tyre, për imazhin e vendit, por edhe për përmbushjen e detyrave të gjithsecilit.

Gazetari: Zoti President, a keni apo keni pasur Ju vështirësi komunikimi me përfaqësuesit e së majtës gjatë kësaj periudhe që keni qenë në krye të shtetit?

Presidenti Nishani: Natyrisht, nëse mund t’i quajmë vështirësi deklaratat politike, por që te puna e Presidentit të republikës nuk kanë ndikuar. Ato mbeten për t’u gjykuar nga opinioni publik. Për mua është e rëndësishme që çdo institucion të ruajë, në radhë të parë, integritetin e tij institucional, kushtetues, por edhe individual.

Gazetari: Zoti President, ndërkohë, si mendoni se duhet kryer kalimi i pushtetit nga një mazhorancë e djathtë, që e ka ushtruar këtë pushtet për 8 vjet, në një mazhorancë të majtë, që ka marrë një numër prej 83 mandatesh aktualisht?

Presidenti Nishani: Me gjithë problemet që ekzistojnë ende, unë besoj se kemi një administratë civile të konsoliduar.

Gazetari: E cila ndihet e kërcënuar më shumë se çdokush tjetër në këtë vend.

Presidenti Nishani:  Unë do të kërkoja që ajo të mos ndihej e kërcënuar. Është e respektuar maksimalisht nga ligji dhe procedura, por edhe nga politika, me që politika vjen në krye të punëve, edhe në udhëheqje të institucioneve. Unë desha të kthehem te pyetja juaj që kjo administratë civile e konsoliduar, pa dyshim, që e ndihmon kalimin e pushtetit në mënyrë normale. Unë besoj se që nga viti 2005, për hir të së vërtetës, kemi krijuar një traditë të kalimit të pushtetit.

Gazetari: Të kalimit normal të pushtetit, se kalim ka pasur gjithnjë.

Presidenti Nishani: Po, të kalimit normal; kështu që unë do të vlerësoja shumë çdo akt të anëtarëve të kabinetit që largohen nga detyra për të paraqitur një ecuri të të gjitha punëve që ata kanë bërë tek anëtarët e rinj të kabinetit që do të vijnë. Natyrisht, pjesa procedurale është pjesë e dinjitetit të institucioneve të shtetit shqiptar.

Gazetari: Çfarë rol do të luani Ju, si President i Republikës, në këtë kalim të pushtetit nga e djathta drejt së majtës?

Presidenti Nishani: Asgjë më shumë se ç’përcakton Kushtetuta. Nuk mund të dalë Presidenti i Republikës jashtë tagrit të tij Kushtetues: Përgjegjësi shumë të madhe në përmbushjen e detyrimeve të tij kushtetuese, që fillojnë me thirrjen e Kuvendit, me dekretimin e Kryeministrit, të qeverisë, betimin e ministrave dhe paralelisht me këta inkurajimin e institucioneve të pavarura për të përmbushur detyrat e tyre me të njëjtin temp, ritëm dhe përgjegjësi si në çdo kohë normale të qeverisjes.

Gazetari: Pa dyshim, që çdo mazhorancë që vjen ushtron presion ndaj këtyre institucioneve të pavarura ose tenton zëvendësimin e krerëve të tyre me përfaqësues që janë më pranë saj; nuk po them direkt të saj. a do të jeni Ju garant se nuk do të ketë ndryshime thelbësore në këto institucione të pavarura?

Presidenti Nishani: Presidenti i Republikës do të jetë garant i Kushtetutës, do të jetë garant i ligjshmërisë, do të jetë garant dhe i integritetit individual të personave, të cilët kanë marrë përsipër një përgjegjësi për të drejtuar institucione të tilla kushtetuese. Të tria këto së bashku përbëjnë, së pari, detyrën që ka Presidenti i Republikës ndaj vendit, detyrën e tij ndaj shtetit si Kreu i Shtetit, por edhe ndaj imazhit të vendit.

Gazetari: A do të refuzonit Ju që të firmosnit në një rast të mundshëm, apo të refuzonit presionet që mund të keni për zëvendësimin  e Kreut të Shërbimit Informativ Shtetëror, të Kreut të Prokurorisë së Përgjithshme ose institucione të tjera të pavarura, që natyrisht, kësaj mazhorance që vjen do t’i leverdiste t’i kishte të vetat?

Presidenti Nishani: Asnjë presion nuk do të gjejnë te Presidenti i Republikës, por mjedis bashkëpunues.

Gazetari: Atëherë, për çfarë do të bashkëpunojë Presidenti i Republikës me këtë mazhorancë të re që po vjen?

Presidenti Nishani: Për shumë gjëra: Presidenti i Republikës është drejtuesi i një prej institucioneve më të rëndësishme kushtetuese të vendit; Presidenti i Republikës është Kreu i Shtetit Shqiptar; Presidenti i Republikës do të përcjellë apo paraqesë në mënyrë zyrtare politikën e jashtme të shtetit shqiptar që miratohet nga Kuvendi i Shqipërisë dhe zbatohet nga qeveria, por është zëri i Presidentit të Republikës që, në bazë të Kushtetutës, që e paraqet këtë politikë të jashtme të shtetit; Presidenti i Republikës është një aktor i rëndësishëm në përbërjen e institucioneve të larta të vendit, siç janë: Gjykata e Lartë dhe Gjykata Kushtetuese. Natyrisht, këtë e bën në bashkëpunim të ngushtë me Kuvendin. Një qeveri është produkt i një mazhorance parlamentare. Por edhe në ndërmarrjen e reformave të tilla të rëndësishme ku do të spikasin, pa dyshim, ato që lidhen me integrimin evropian të vendit.

Gazetari: Zoti President, e majta-pjesa kryesore e së majtës, ajo që përfaqësohet nga Partia Socialiste, ka votuar kundër jush në Kuvend, pra, nuk ka votuar pro jush; vetëm Lëvizja Socialiste për Integrim ju ka votuar Juve për të qenë President i Republikës. Ndërkohë, ka pasur disa deklarata nga përfaqësues të së majtës, të niveleve të ndryshme, kundër jush gjatë këtij viti që Ju po ushtroni detyrën. A mendoni që këto do të krijojnë një klimë paragjykimi dhe do ta bëjnë më të vështirë bashkëpunimin Tuaj me këtë mazhorancë të re?

Presidenti Nishani: Kjo mbetet pikërisht në sjelljen politike të mazhorancës së re, nuk është çështje e zgjedhjes së Presidentit të Republikës.

Presidenti i Republikës është zgjedhur për një mandat pesëvjeçar. Presidenti i Republikës i ka të përcaktuara qartazi detyrat, të drejtat dhe detyrimet e tij në Kushtetutën e vendit. Nëse Presidenti i Republikës do të jetë në kundërshtim me Kushtetutën e Republikës, pa dyshim, mban përgjegjësinë e tij institucionale dhe ligjore, por unë besoj se mazhoranca e re do të ofrojë atë vizion dhe atë koncept funksionimi institucionesh që ka ofruar dhe do të vazhdojë të ofrojë Presidenti i Republikës, që është: Bashkëpunimi, mbi të gjitha, mirëbesimi midis institucioneve. Kjo është në bazën e themelit të punës së vetë institucionit në mënyrë individuale, por edhe në mënyrë bashkëpunuese dhe në mënyrë kolektive, pasi vërtet institucionet kanë pozicionet e tyre të veçanta, por në fund të fundit, të gjitha janë produkt i shoqërisë, janë në shërbim të shtetit shqiptar dhe duhet të funksionojnë në harmoni dhe në formën e një mekanizmi që komplementon njëri-tjetrin në përmbushjen e të gjitha detyrave që ata kanë.

Gazetari: Një nga akuzat që Ju është bërë nga e majta, zoti President, është fakti se në drejtimin e Institucionit të Presidentit të Republikës keni ndjekur ose përkrahur një linjë që shkon paralel ose në favor të Partisë Demokratike që ju ka zgjedhur, së cilës i keni përkitur deri ditën që jeni betuar si President i Republikës. A është e vërtetë kjo? A i keni dhënë Ju ngjyrim blu Presidencës së Republikës në një farë mënyre?

Presidenti Nishani: Kjo mbetet për t’u gjykuar ftohtë dhe, më mirë se kushdo, nga opinioni publik. Unë e kam shprehur edhe herë të tjera që nuk kam pasur dhe nuk kam asnjë lloj kompleksi që unë kam ardhur politikisht nga Partia Demokratike. Ka qenë zgjedhja ime, me vullnet të plotë, anëtarësia në Partinë Demokratike dhe angazhimi politik brenda kësaj partie politike; ashtu siç është zgjedhja me vullnet të plotë e çdo anëtari të Partisë Socialiste apo të Lëvizjes Socialiste për Integrim, të cilët janë pjesë e atyre partive politike. Nuk mundet askush të thotë se një njeri është i zhveshur nga emocionet politike, por aftësia e individit që merr përgjegjësi të tilla në drejtimin e vendit, të institucioneve të vendit, aq më tepër në institucionin më të lartë kushtetues të vendit, që është Institucioni i Presidentit të Republikës, ka të bëjë pikërisht me menaxhimin e ndjesive të tua individuale dhe mbi mbizotërimin në çdo çast të përgjegjësisë kushtetuese të detyrës që ke për të ushtruar dhe, natyrisht, të korrektesës në zbatimin dhe detyrimin e detyrave të tua kushtetuese.

Në betejën politike midis palëve politike ka rezultuar që edhe Presidenti i Republikës nuk ka qenë i shmangur nga targeti i zhargonit apo…

Gazetari: Nga targeti i luftës politike apo në shërbim të luftës politike?

Presidenti Nishani: Nga targeti i luftës politike, sepse në të gjitha rastet në një sens normal të gjykimit, Presidenti i Republikës, gjykohet nga mekanizma të caktuar që është Gjykata Kushtetuese dhe pastaj në kuptimin e përgjithshëm, është opinioni publik. Nëse Presidenti i Republikës përmbush një detyrë të tij, kjo nuk do të thotë automatikisht se i ka shërbyer njërës forcë politike apo forcës tjetër. Të qenit jo konfliktual i Presidentit të Republikës, besoj se është një nga përgjegjësitë e Presidentit të Republikës.

Gazetari: Dhe detyrim.

Presidenti Nishani: Dhe detyrim. Kur them përgjegjësi, padyshim që është dhe detyrim.

Gazetari: Ndërkohë, një nga pjesët më të komentueshme, zoti President, ishte nxjerrja nga plani i shpërndarjes që ju i bëtë Shtëpisë Qendrore të Ushtrisë, menjëherë, pasi qeveria vendosi ta kalonte atë si seli të re të Partisë Demokratike. A ishte kjo firmosje një vënie në shërbim të Partisë Demokratike dhe përse e firmosët menjëherë pas vendimit të qeverisë këtë?

Presidenti Nishani: Së pari, do të bëja të njëjtën gjë edhe po t’i jepej për seli Partisë Socialiste.

Gazetari: Po Ju  e vendosët pas vendimit të qeverisë. Mund ta kishit nxjerrë Ju nga plani i shpërndarjes dhe pastaj qeveria ta kalonte si seli?

Presidenti Nishani: Për të mos hyrë dhe sqaruar veprimet e qeverisë, megjithëse …

Gazetari: Ju e kërkuat, zoti President, apo mendoni se ishte i panevojshëm?

Presidenti Nishani: Ja ta sqaroj: Vendimi i qeverisë është bërë zyrtar pas dekretit të Presidentit të Republikës; mund të ketë pasur diskutime në qeveri, kjo është çështje tjetër, e ka pasqyruar qeveria, por akti zyrtar i vendimmarrjes, mesa unë jam informuar, është bërë pasi Presidenti i Republikës ka dekretuar nxjerrjen jashtë planit të përhapjes së objektit. Presidenti i Republikës ka ushtruar ….

Gazetari: U nxor jashtë planit të përhapjes sepse realisht nuk duhej, apo për t’i bërë një dhuratë Partisë Demokratike? Pra, si pasojë e një vendimi të qeverisë politik apo nuk ka rëndësi, të cilën Presidenti e aprovon?

Presidenti Nishani: Këtë do ta shikojmë në dy dimensione. Së pari, në aspektin formal dhe në aspektin përmbajtësor. Në aspektin formal është një e drejtë dhe detyrë ekskluzive e Presidentit të Republikës nxjerrja e këtyre objekteve jashtë planit të përhapjes. Natyrisht propozimi ka ardhur nga ministria e linjës që është Ministria e Mbrojtjes.

Gazetari: Por e pa firmosur nga Shefi i Shtabit të Ushtrisë zoti President.

Presidenti Nishani: Natyrisht, në hartimin e një dokumenti, e një propozimi ku marrin pjesë shumë aktorë nuk është e domosdoshme që të gjithë të bien dakord. Ligji ia lë tërësisht në dorë Presidentit të Republikës vendimmarrjen përfundimtare. Por, natyrisht që Presidenti i Republikës kërkon informacionet e detajuara. Informacionet zyrtare që kanë ardhur tek Presidenti i Republikës, tregojnë që ky ishte një objekt i cili në radhë të parë nuk ishte një objekt që përdorej për pjesën operacionale të ushtrisë, që do të thotë, që nuk ishte një poligon, nuk ishte një depo armatimi, që natyrisht në raste të tilla ishte e domosdoshme që të mbeteshin, në gjykimin tim, pjesë e forcave të armatosura. Ishte një objekt i cili deri në atë kohë ishte vënë në dispozicion për tu përdorur nga disa ente civile brenda forcave të armatosura, për më tepër që këto ente civile tashmë u ishte vënë në dispozicion me një investim të vlerësueshëm të qeverisë një ambient shumë më komod, një ambient shumë më modern dhe padyshim e humbiste rolin që kishte pasur deri në ato momente dhe përderisa kishte një propozim të Ministrisë së Mbrojtjes për të mos e përdorur më. Isha informuar nga debatet që ishin në shtyp që do t’i adresohej një partie politike dhe kjo parti politike ishte partia më e madhe që dilte në opozitë dhe unë besoj për të gjithë këtë dimension dhe vlerat civile të sjelljes institucionale besoj që kemi kryer një akt dhe një veprim krejt korrekt dhe normal.

Gazetari: Zoti President, përderisa kjo godinë i kishte humbur funksionet e saj, përse nuk doli nga plani i shpërndarjes një muaj, dy muaj, tre muaj, pesë muaj përpara dhe a mendoni që në planin e shpërndarjes mund të ketë të tjera objekte që i kanë humbur funksionet e tyre dhe mund të ishin hequr të gjitha së bashku në një listë?

Presidenti Nishani: Në çdo kohë që do t’i vijnë propozimet Presidentit të Republikës, unë do t’i gjykoj në këtë sens që gjykova dhe rastin, që e gjykova pasi erdhi propozimi përkatës.

Gazetari: A mendoni që keni gabuar në këtë moment?

Presidenti Nishani: Unë sapo e thashë që kemi kryer një akt normal dhe korrekt.

Gazetari: A i kërkuat shpjegime Shefit të Shtabit të Përgjithshëm të Ushtrisë se, përse ai nuk pranoi të firmoste një propozim të tillë?

Presidenti Nishani: Shefi i Shtabit të Përgjithshëm nuk është vartësi i Presidentit të Republikës.

Gazetari: Duhet të konsultoheshit me të zoti President?

Presidenti Nishani: Nëse do të ishte një objekt i veprimtarisë operacionale të ushtrisë, pa diskutim.

Gazetari: Ndërkohë që pati mjaft komente që nënvizonin faktin që veprimi që u ndërmor dhe lirimi i selisë së Partisë Demokratike ishte për arsye të interesave pronësore, po e quaj, që ka familja juaj, konkretisht gruaja juaj. Si është ekzaktësisht kjo çështje?

Presidenti Nishani: Padyshim që ishte një insinuatë e padenjë …

Gazetari: Çdo të thotë insinuatë e padenjë?

Presidenti Nishani: Insinuatë e padenjë do të thotë një nismë e intrigave të kafeneve të Tiranës, me një synim të padenjë gjithashtu për të njollosur dhe për të përfolur integritetin e Presidentit të Republikës krejt pa baza, krejt pa fakte. Së pari, prona mbi të cilin është ngritur objekti ku ka qenë deri më tash selia e Partisë Demokratike nuk ka asnjë lloj lidhje me pronësinë e familjes sime.

Gazetari: Nuk ishte bashkëshortja juaj pronare e një pjese të truallit ku është ngritur Partia Demokratike?

Presidenti Nishani: Absolutisht! Nuk ka asnjë lloj lidhje, është një pronë krejt e shtetit dhe nuk ka asnjë lloj pronësie private dhe besoj se akti më i fundit që iu kthye bashkisë së Tiranës e ka vërtetuar këtë gjë.

Gazetari: A kishte pronësi diku aty rrotull bashkëshortja juaj, kam përshtypjen se u përmendën disa zona?

Presidenti Nishani: Natyrisht u përmendën disa zona dhe prandaj thashë që ishte një insinuatë e padenjë dhe një intrigë e një niveli kafenesh duke përdorur vërtetë një pronë ku familja e bashkëshortes sime zotëron pronësi që nga viti ‘93-’94, ku sot njihet si ‘Shtëpia e Toptanësve’, ku sot është objekti me emrin ‘Sarajet’, por që është larg godinës së Partisë Demokratike, por le te themi pronës, sipërfaqes ku është ngritur Partia Demokratike. Dhe insinuata tjetër që ishte në vijimësi të tërë kësaj ideje për të njollosur imazhin e Presidentit të Republikës, kishte të bënte me interesa të shfrytëzimit të pronës për ndërtim etj. në një kohë që ajo pronë në fakt nëse flasim për interesa individuale e penalizon drejtpërdrejti familjen që ka pronën mbi të sepse është një pronë që nuk mund të zhvillohet në asnjë rast për faktin që është monument kulture i kategorisë së parë dhe që të prishet duhet leje e veçantë nga Ministria e Kulturës në radhë të parë, nga qeveria, nga Instituti i Kulturës dhe fakti që unë kam qenë disa vite në pozicione shumë të rëndësishme vendimmarrëse; Ministër i Brendshëm, Ministër i Drejtësisë, prej një viti President i Republikës dhe as është bërë tentativa më e vogël për të abuzuar me ligjin dhe për ta hequr atë objekt nga lista e monumenteve të kulturës me idenë për ta shfrytëzuar më vonë. Pra, pavarësisht se kemi mbetur mjaft korrekt me këtë pasuri, me këtë objekt dhe në tërësi me ligjin, vijnë dhe akuza të tilla por gjithsesi unë besoj se opinioni publik shqiptar është aq i pjekur që gjithçka e vendos në vendin që i takon.

Gazetari: Ju thatë që ishin intriga të kafeneve dhe atyre që quhen ambiente informale të Tiranës, por ndërkohë deklarata janë bërë nga deputetë të Parlamentit aktual dhe atij të rikonfirmuar, të parlamentit të ri të opozitës në drejtimin tuaj.

Presidenti Nishani: Pikërisht kjo ishte dhe keqardhja ime për të cilën unë iu drejtova publikisht dhe opinionit me një qëndrim zyrtar si President i Republikës pasi nëse në mënyrë të përsëritur tentova të anashkaloja pjesën e intrigës dhe të thashethemnajës, në momente të caktuara Presidenti i Republikës duhet të qartësojë dhe opinionin publik në mënyrë zyrtare.

Gazetari: Zoti President,  a e dinit ju që një pjesë e kësaj godine që i takon planit të shpërndarjes, që i takonte ushtrisë shqiptare kishte pronësi private?

Presidenti Nishani: Jo nuk kam pasur informacion të tillë, por edhe në rastin që do t’i kthehej pronarëve do të bëhej vetëm pas firmosje nga Presidenti i Republikës.

Gazetari: Vetëm pas daljes nga plani i shpërndarjes.

Presidenti Nishani: Po.

Gazetari: A mendoni që përmes këtij gjesti ju i keni bërë një favor Partisë Demokratike së cilën i keni përkitur zoti President?

Presidenti Nishani: Gjithsecili le ta gjykojë nga këndvështrimi i tij. Unë kam kryer një akt të mbështetur tërësisht në të drejtën time kushtetuese i cili nuk e dëmton aspak ushtrinë shqiptare dhe nëse ndihmon një parti kryesore të opozitës prapë është një akt civil qytetar.

Gazetari: Megjithatë mund të ndihmonte jo thjesht një parti opozitare, por mund të ndihmonte shtetin shqiptar për tu bërë një universitet, një godinë shtetërore, të cilat i mungojnë shtetit dhe shumë gjëra të tjera.

Presidenti Nishani: Partitë politike dhe aq më tepër parti me kontribute të tilla siç është Partia Demokratike, siç është Partia Socialiste, të cilat janë asete publike të vendit, mbeten të rëndësishme për një shoqëri.

Gazetari: Në qoftë se në muajt në vijim Partia Socialiste do tu kërkonte një gjë të ngjashme për të vetë ose për Lëvizjen Socialiste për Integrim, do të ishit i gatshëm të ribënit të njëjtën procedurë?

Presidenti Nishani: Nuk mund të veprojë me dy standarde Presidenti i Republikës.

Gazetari: Pra, nëse do t’ju vinte një propozim, do të ishit i gatshëm të firmosni për një gjë që varet nga ju?

Presidenti Nishani: Me të njëjtën logjikë dhe procedurë që kanë kaluar dhe akte të tjera të Presidentit.

Publicitet

Gazetari: Zoti President, po diskutonim pak për zhvillimet politike të mbylljes dhe fillimit të sezonit të ri, por ndërkohë ka pasur disa zhvillime dhe brenda Partisë Demokratike të cilës ju i keni përkitur dikur, por që mbi të gjithë është një prej institucioneve të rëndësishme politike në këtë vend. Si i shihni zhvillimet brenda Partisë Demokratike pas largimit të Berishës?

Presidenti Nishani: Është një çështje që i takon tërësisht Partisë Demokratike. Unë vetëm një dëshirë kam që, Partia Demokratike të vazhdojë kontributin e saj tashmë në pozicionin e opozitës shqiptare sepse ashtu siç i kontribuon partia, apo koalicioni, partive që janë në qeverisje vendit, me ushtrimin e detyrave të tyre, me ushtrimin e përgjegjësive, me punët që bëjnë, ashtu dhe opozita i kontribuon vendit me oponencën, me konsensusin, me qëndrimet e saj gjithmonë në përmirësim të çdo hapi, të çdo reforme që ndërmerret në vend. Çështjet e tjera të organizimit, të lidershipit janë tërësisht çështje që u takojnë ekskluzivisht anëtarëve të asaj partie politike. Edhe Partisë Demokratike si çdo parti tjetër politike të vendit që ka kontribute pozitive i uroj gjithmonë suksese në përmbushjen e misionit të saj. Është një mision që është i domosdoshëm dhe i nevojshëm për çdo shoqëri.

Gazetari: Zoti President, ditën që Kryetari i Partisë Demokratike dhe Kryeministri ende në detyrë i vendit dha dorëheqjen, ai pati një takim me ju një ditë më  parë, në mos gaboj. A ju informoi ju Berisha që do të jepte dorëheqjen nga kreu i Partisë Demokratike?

Presidenti Nishani: Jo nuk ka pasur një bisedë të tillë informuese….

Gazetari: Për çfarë ishte biseda dhe ku fokusohej?

Presidenti Nishani: Ka qenë natyrisht për procesin, problematikat e procesit që ishin hasur dhe natyrisht për të gjithë vijimësinë e hapave të tjerë që i takonin dy institucioneve për të bashkëpunuar.

Gazetari: A kishte Kryeministri pakënaqësi për mënyrën sesi u zhvilluan zgjedhjet?

Presidenti Nishani: Natyrisht problematikat shqetësimet që u ndeshën janë bërë prezente dhe nga Kryeministri Berisha. Është krejt normale që midis dy institucioneve të paraqiten këto problematika, këto shqetësime dhe që mbeten pjesë e diskutimeve dhe pjesë e angazhimeve të kohës që vjen.

Gazetari: Ndërkohë, zoti President, ju pritët menjëherë dhe Kryetarin e Bashkisë së Tiranës, njëkohësisht sot dhe Kryetar i Partisë Demokratike, zotin Basha. Përse e pritët zotin Basha atë ditë?

Presidenti Nishani: Takimi brenda ditës ka qenë një koiçidencë sepse takimi me zotin Basha ishte parashikuar disa ditë përpara.

Gazetari: Kishte apo nuk kishte lidhje me dorëheqjen e Berishës kandidimi i Bashës për kreun e Partisë Demokratike?

Presidenti Nishani: Absolutisht! Nuk mund të ketë lidhje me Institucionin e Presidentit të Republikës.

Gazetari: Megjithatë a keni influencuar direkt apo indirekt në garën midis Bashës dhe Olldashit në Partinë Demokratike, qoftë dhe përmes ndikimit që mund të keni në strukturat e Partisë Demokratike pjesë e të cilave keni qenë?

Presidenti Nishani: Unë jam larguar prej një viti nga strukturat e Partisë Demokratike. Së dyti, unë e konsideroj një pozicion shumë serioz dhe të rëndësishëm pozicionin e Presidentit të Republikës.

Gazetari: Presidenti i Republikës ka emocionet e veta, ka bindjet e veta, nuk mund të jetë kaq steril.

Presidenti Nishani: Këtë e thashë dhe më herët të bisedës sonë që, natyrisht nuk është steril, ka emocionet e tij, por aftësia është pikërisht tek menaxhimi i emocioneve dhe unë besoj që kjo është përpjekja që duhet të bëjë çdo individ që vjen në pozicione kaq të rëndësishme, të menaxhojë dhe të orientojë të gjitha emocionet e tij.

Gazetari: Pra, jeni përfshirë apo nuk jeni përfshirë në garën e brendshme të Partisë Demokratike?

Presidenti Nishani: Nuk mund të përfshihesha dhe  nuk kisha asnjë arsye përse të përfshihesha.

Gazetari: Ndjekur nga jashtë, si një njeri që ka milituar në atë parti, a mendoni që ardhja e Bashës ishte një zgjidhje e mirë për Partinë Demokratike?

Presidenti Nishani: Gara ishte një moment shumë i rëndësishëm dhe shumë i mirë dhe unë besoj që, meqë po ma kërkoni dhe në gjykimin tim si qytetar i këtij vendi, besoj se ishte një vlerë e shtuar ajo garë dhe njerëzit që garuan janë njerëz me kontribute në Partinë Demokratike.

Gazetari: A mendoni se partia Demokratike do të ketë mundësinë dhe aftësinë të zhvillojë një opozitë të nevojshme për vendin në Parlament?

Presidenti Nishani: Së pari, ja uroj sepse është në të mirë të vendit, është në të mirë të zhvillimit, është në të mirë të demokracisë. Mbetet për tu parë.

Gazetari: Zoti President, zakonisht në Sesionin e Përhershëm të OKB-së që zhvillohet në shtator Presidenti merr pjesë çdo vit ose një vit po e një vit jo. Pse këtë vit ju jeni tërhequr nga pjesëmarrja dhe keni lejuar shkuarjen e Kryeministrit? Ka qenë një raport mesh jush dhe Ramës, pra një marrëveshje midis jush dhe Ramës apo ka qenë një vendim i juaji jashtë kësaj?

Presidenti Nishani: Jo nuk ka pasur asnjë marrëveshje, për hir të së vërtetës, sepse vendimi im për të mos marrë pjesë ka qenë përpara zgjedhjeve parlamentare për shkak të procedurave duhet të organizohej vizita përpara zgjedhjeve parlamentare.

Gazetari: Ka qenë diku rreth maj-qershor.

Presidenti Nishani: Në fund të majit. Unë e kam gjykuar si serioze dhe korrekte që pas zgjedhjeve parlamentare kushdo që do të ishte kryeministër i vendit, qoftë vazhdimi, qoftë kryeministri i ri, duhet të shkonte në këtë aktivitet për të prezantuar qeverinë dhe platformën e qeverisë që do të vinte. Është në dinjitetin e shtetit, është në dinjitetin e vendit, për më tepër që unë kisha qenë një vit më parë kështu që nuk ka asnjë lloj vendi për marrëveshje të veçanta. Unë besoj që është një qëndrim korrekt dhe normal.

Gazetari: Ndërkohë ju sërish do të shkoni në Shtetet e Bashkuara të Amerikës. Dhe s’jeni dhe jeni, duket pak si paradoksale.

Presidenti Nishani: Unë do të jem për shkak se pata dhe kam një ftesë nga ish-Presidenti Clinton. Për koiçidencë aktiviteti i fondacionit të zotit Clinton zhvillohet në të njëjtën kohë me Asamblenë e Përgjithshme të OKB-së.

Gazetari: Dhe shfrytëzon pjesëmarrjen në asamble të drejtuesve politikë.

Presidenti Nishani: Por përfaqësuesi i Shqipërisë në këtë rast në Asamblenë e Përgjithshme të OKB-së do të jetë Kryeministri i ri i vendit. Ndërsa aktivitetet e mia do të fokusohen në; agjendën që ka fondacioni i zotit Clinton, disa takime me komunitetin shqiptar në Boston dhe në Detroit për të cilën, për shkak të agjendës, unë vitin e kaluar nuk pata mundësi t’i realizoja.

Gazetari: Pra, do të vizitoni dhe komunitetet shqiptare në Boston dhe Detroit veç takimit të Fondacionit Clinton. Nuk ka lidhje me sesionin e Asamblesë së OKB-së?

Presidenti Nishani: Jo nuk ka lidhje.

Gazetari: Zoti President, Kryeministri i ardhshëm, pra ai që po vjen në detyrë pritet të organizojë një ceremoni për zgjedhjen e tij. A do të marrë pjesë Presidenti në ceremoninë e organizuar nga Kryeministri i ri?

Presidenti Nishani: Gjithçka në përputhje me kushtetutshmërinë e funksioneve të Presidentit dhe me  protokollin që detyron kreun e shtetit. Kreu i shteti lëviz, vepron mbi bazën e një protokolli të caktuar shtetëror.

Gazetari: Zoti President, si i vlerësoni raportet midis Shqipërisë dhe Shteteve të Bashkuara të Amerikës?

Presidenti Nishani: Janë marrëdhënie të shkëlqyera. Shtetet e Bashkuara janë partneri më i madh strategjik i Shqipërisë. Janë vendi i cili i ka qëndruar pranë Shqipërisë që nga momenti i krijimit të shtetit të parë shqiptar. Është vendi që ka aq shumë kontribute në konsolidimin e demokracisë në Shqipëri. Është një vend i cili e ka mbështetur Shqipërinë dhe kombin shqiptar në tërësi në rrugën drejt konsolidimit dhe prosperitetit kombëtar të tij, kështu që marrëdhëniet janë marrëdhënie të prioritetit të parë.

Gazetari: Megjithatë zoti President, ka pasur deklarata të hapura pakënaqësie të maxhorancës ende në detyrë ndaj Ambasadorit të SHBA-ve në Tiranë, zotit Aleksandër Arvizu. Kujtoj këtu deklaratën e Kryetares ende në detyrë të Parlamentit, zonjës Topalli që është rimarr nga shtypi, por dhe përfaqësues të tjerë të Partisë Demokratike.

Presidenti Nishani: Natyrisht marrëdhëniet e Presidentit të Republikës janë marrëdhënie institucionale me qeverinë e Shteteve të Bashkuara të Amerikës, me shtetin amerikan, me përfaqësuesit e tyre, me popullin amerikan dhe mund t’ju them që, në Shqipëri ekziston nga të gjitha krahët, nga të gjitha këndet një miqësi e madhe, një partneritet i ngushtë me SHBA dhe kjo është e pandryshuar dhe e palëvizshme.

Gazetari: Marrëdhëniet tuaja me Ambasadorin Arvizu?

Presidenti Nishani: Shumë të mira dhe korrekte.

Gazetari: Çdo të thotë shumë të mira dhe korrekte?

Presidenti Nishani: Shumë të mira dhe korrekte në marrëdhëniet që kemi komunikuar në rastet kur ka pasur mesazhe nga qeveria e SHBA-ve për Presidentin e Republikës, ashtu siç dhe kemi bashkëpunuar për të gjitha momentet kur është dashur angazhimi i Presidentit të Republikës.

Gazetari: A kanë qenë të angazhuara SHBA-të drejt një rotacioni të pushtetit në Shqipëri?

Presidenti Nishani: Jo. Nuk mund të përfshihet asnjë shtet pavarësisht marrëdhënieve të shkëlqyera që kemi ne me SHBA-të. Nuk është as në politikën e qeverisë së SHBA-ve, por edhe të traditës për tu përfshirë në rotacionin apo në tranzitimin e pushtetit. Rrotacioni, tranzitimi i pushtetit është tërësisht produkt i qytetarëve shqiptarë, i shoqërisë shqiptare, i demokracisë shqiptare.

Gazetari: Zoti Nishani, duket se problemi më i madh i SHBA-ve për momentin, por edhe të disa vendeve të tjera evropiane,  me pjesëmarrje apo mospjesëmarrje, është zgjidhja e problemit të Sirisë. Cili do të jetë pozicioni i Shqipërisë në rastin e një ndërhyrje amerikane në Siri?

Presidenti Nishani: Një nga elementet dhe vlerat e rëndësishme të Shqipërisë si shtet ka të bëjë me një qëndrim të njehsuar, flas pas viteve ’90 me sistemin pluralist dhe demokratik në Shqipëri, një qëndrim i njehsuar i mazhorancës dhe opozitës në lidhje me politikën e jashtme dhe unë besoj se ky është një aset i cili jo vetëm duhet ruajtur, por dhe duhet konsoliduar sepse në radhë të parë i shërben kontributit që i kërkohet Shqipërisë në lidhje me politikën e jashtme veçanërisht atë rajonale, por në rastin konkret të Sirisë ka një deklaratë mjaft të qartë të qeverisë shqiptare, të Kryeministrit të vendit, të Ministrisë së Jashtme. Ka një deklaratë tërësisht në përputhje me këtë të Kryetarit të Partisë Socialiste, zotit Rama i cili është propozuar tashmë jo zyrtarisht por publikisht nga mazhoranca e re për të qenë Kryeministri i ardhshëm. Ka qëndrime gjithashtu tërësisht të njëjta në prononcime publike të zotit Meta i cili është propozuar për të qenë Kryetar i Parlamentit. Shqipëria e konsideron regjimin e Assadit, regjim kriminal. Aktet ndaj popullsisë civile si akte kriminale. Përdorimin e armëve kimike të papranueshme. Shqipëria është dhe do të mbetet e gatshme përkrah SHBA-ve të gjithë aleatëve të tjerë duke ndërmarrë të gjitha veprimet e nevojshme.

Gazetari: Mbështetje morale apo dhe mbështetjes përmes vënies në dispozicion të bazave dhe territorit shqiptar për një sulm të mundshëm?

Presidenti Nishani: Hapi i parë është përkrahja politike pa diskutim. Por, natyrisht Shqipëria është një vend anëtar i NATO-s dhe çdo lehtësi aeroportuale apo lehtësi tjetër që do të kërkohet nga Shqipëria është një detyrim dhe përmbushja e detyrave në kuadrin e Aleancës së Atlantikut Verior, por edhe në raportin bilateral me SHBA, Shqipëria është tërësisht e gatshme të vendosë cdo lehtësi për përmbushjen e misioneve që i shërbejnë paqes, lirisë dhe të drejtave të njeriut.

Gazetari: Zoti President, si do të jenë raportet tuaja me Parlamentin e ardhshëm dhe me Kryetarin e Parlamentit? Çfarë raportesh keni ju me zotin Meta?

Presidenti Nishani:  Raporte mjaft korrekte, raporte institucionale, raporte të respektit reciprok. Unë besoj që Presidenti përveç bashkëpunimit me të gjithë aktorët e tjerë, duhet të ketë një bashkëpunim të ngushtë me Parlamentin shqiptar. Padyshim që Kryetari i Kuvendit është një detyrim, por është në përfaqësim të këtij institucioni dhe me grupet parlamentare të parlamentit të ardhshëm, Presidenti i Republikës duhet të jetë shumë i hapur për të komunikuar në vijimësi, në mënyrë të rregullt, për të shkëmbyer pikëpamjet dhe për të bashkëpunuar në të gjitha hapat që jo vetëm pse Kushtetuta ia kërkon, por edhe për të krijuar një ambient i një komunikimi të përhershëm institucional në shërbim të klimës së përgjithshme pozitive.

Gazetari: Çfarë keni biseduar ju me zotin Meta gjatë takimit të korrikut?

Presidenti Nishani: Kam uruar zotin Meta për rezultatin që arriti në zgjedhjet e fundit dhe kemi shkëmbyer, dhe kemi ndarë opinionin e përbashkët për rëndësinë e madhe që ka bashkëpunimi midis institucioneve kaq të rëndësishme të vendit.

Gazetari: Ndërkohë ju keni takuar disa ditë para Metës, ndoshta një ditë nuk mund të jem i saktë, dhe Kryetarin e opozitës dhe Kryeministrin e ardhshëm të Shqipërisë, zotin Rama. Cila ka qenë biseda me zotin Rama? Ku konsistonte ajo?

Presidenti Nishani: Ka qenë një takim pozitiv. Gjithsesi, në po atë linjë dhe të takimit me zotin Meta, ndamë gjithashtu të njëjtën pikëpamje që bashkëpunimi midis institucioneve është një nevojë, është një domosdoshmëri, është një aset i kulturës politike, i kulturës institucionale, por dhe i etikës dhe i modelit civil të sjelljes së institucioneve dhe të drejtuesve të institucioneve. Në fund të fundit është një shërbim që i bëhet vendit dhe imazhit në tërësi të shoqërisë shqiptare. Shoqëria shqiptare sot është një shoqëri e emancipuar dhe kërkon me domosdoshmëri që këtë emancipim që ka shoqëria shqiptare apo le të themi elita e saj të reflektohet në radhë të parë në drejtuesit e institucioneve të tilla që janë të përfshira në procesin e vendimmarrjes.

Gazetari: A keni ju rezerva personale ndaj zotit Rama?

Presidenti Nishani: Rezervat personale asnjëherë nuk mund të ndikojnë në sjelljen institucionale dhe natyrisht në sjelljen institucionale unë nuk i kthehem retrospektivës. Rezervat personale nuk kanë vlerë.

Gazetari: A keni paragjykime ju ndaj kësaj mazhorance të re?

Presidenti Nishani: Asnjë paragjykim. Përkundrazi, e kam uruar dhe e uroj këtë mazhorancë për rezultatin që mori në zgjedhje dhe uroj gjithashtu në përmbushjen e të gjitha detyrave të saj sepse përmbushja e detyrave dhe i angazhimeve prej saj është e mirë për çdo qytetar të vendit tim.

Gazetari: Në rast se marrëdhëniet mes jush do të tensionohen dhe ju keni sulme nga kjo mazhorancë, do të përgjigjeni si President i Republikës?

Presidenti Nishani: Presidenti i Republikës nga ana e tij nuk do te jetë asnjëherë iniciues i konflikteve. Së pari, nuk është në natyrën time, nuk është në bindjet e mia, nuk është në parimet e mia, nuk është në kulturën dhe etikën time gjenerimi i sjelljeve konfliktuale për më tepër që përtej formatit individual jep një dimension shumë më të rëndësishëm pozicioni institucional, ndaj Presidentit të Republikës nuk mund të jetë kurrë një njeri i cili të prodhojë konflikte apo të sjellë elementë të cilët gjenerojnë konflikt më pas.

Presidenti i Republikës ka agjendën e tij. Presidenti i Republikës do të mbrojë dinjitetin dhe integritetin e institucionit, por edhe në tërësi do të jetë një zë shumë i fuqishëm në lidhje me të drejtat e qytetarëve, me të drejtat dhe liritë e institucioneve dhe me përmbushjen në fund të fundit të këtyre detyrave nga çdo institucion tjetër në raport gjithmonë me qytetarin.

Gazetari: Cilat janë pistat kryesore që kjo mazhorancë e re do ndjekë për të cilat mendohet që kanë qenë në rrugë në mbarë dhe përgjatë 8 viteve të kaluara?

Presidenti Nishani: Nuk do të dëshiroja realisht të merrja përsipër orientuesin apo përcaktuesin e platformës dhe të qeverisjes së mazhorancës së ardhshme. Ka një sëre sfidash shumë të mëdha; pa diskutim çështjet që lidhen me ekonominë, punësimin, me infrastrukturën, me shëndetësinë, arsimin dhe ajo e integrimit evropian. Pra, unë besoj që pak a shumë dhe në opinionin publik janë të qarta piketat. Janë sfida për Shqipërinë dhe shqiptarët. Unë do të uroja që kjo rrugë të merrej dhe të përçohej në rrugë racionale, në rrugë efiçente dhe me sa më shumë rezultate.

Gazetari: Zoti President, duket se rizgjedhja e Presidentit, zgjedhjet e ardhshme të Presidentit  përkojnë me mandatin e këtij Parlamenti që fillon punën ditën e hënë. A do të tentoni ju të kërkoni një mandat të ri me këtë mazhorancë e cila ka refuzuar t’ju votonte në 2012-ën?

Presidenti Nishani: Deri në atë ditë është një rrugë e gjatë, por i vetmi preokupim i imi është të mbyll me dinjitet këtë mandat që unë kam marrë.

Gazetari: Pyetja ime ishte, a do të diktohen veprimet dhe mendimet tuaja nga zgjedhjet presidenciale 2017?

Presidenti Nishani: Kjo pyetje është e një dimensioni tjetër. Aspak. Nuk ka asnjë objektiv timin të lidhur me çka do të ndodhë me zgjedhjet e Presidentit të ardhshëm pas katër vitesh apo me zgjedhjet parlamentare pas 4 viteve, por me ecjen, me përmbushjen e detyrave, me bashkëpunimin dhe krijimin e një klime institucionale, civile, qytetare dhe normale për institucionet shqiptare.

Gazetari: Sipas Kushtetutës, Presidentin do ta zgjedhë ky Parlament apo Parlamenti i ri një vjen pas 2017-tës?

Presidenti Nishani: Kjo është një çështje kurioziteti. Megjithatë për kuriozitet, është ky Parlament i cili do të zgjedhë dhe Presidentin e ardhshëm pas katër vitesh.

Gazetari: Në maj ose fund të qershorit.

Presidenti Nishani: Varet nga agjenda e Parlamentit.

Publicitet

Gazetari: Zoti President, ju thatë pak ma parë se një nga pikat më të rëndësishme ose pistat më të rëndësishme që kjo mazhoranca duhet të ndjekë është problemi i integrimit të vendit. Në fakt, pyetjet e mia do të fokusohen në dy-tre pyetje që lidhen me këtë.

A do të luajë një rol pozitiv zgjedhja dhe tranzicioni normal në rrugën integruese të Shqipërisë dhe a ka sinjale Brukseli në këtë drejtim?

Presidenti Nishani: Unë besoj që po. Ka pasur në vijimësi mesazhe që zgjedhjet janë një element i rëndësishëm i pjekurisë dhe maturisë jo vetëm të shoqërisë, por dhe të klasës politike. Fakti që patëm një proces të tillë si ky që sapo kaluam besoj që i kanë shërbyer pozitivisht dhe objektivit që ka Shqipëria për marrjen e statusit të vendit kandidat. Unë besoj që tashmë edhe pas plotësimit të atij kriteri aq shumë të mbajtur në tryezë, të votimit të tre ligjeve, apo të dy ligjeve dhe të aktit të rregullores së Parlamentit, tashmë nuk ka më asnjë pengesë formale le të themi.

Gazetari: A ka shanse Shqipëria për marrjen e statusit në dhjetor?

Presidenti Nishani: Unë besoj se ka shanse, por ajo që do të marr përsipër ka të bëjë me faktin që Presidenti i Republikës do të bashkëpunojë ngushtë edhe me institucione të tjera, por dhe si Institucion i Kreut të Shtetit në mënyrë për të afruar dhe për ta bërë sa më të mundshëm në kontaktet me partnerët tanë marrjen e këtij statusi për Shqipërinë. Unë prej kohësh e kam deklaruar dhe e kam besuar fort se Shqipëria dhe Shqiptarët e meritojnë prej kohësh këtë status jo vetëm për faktin e të qenit një pjesë reale të Europës, jo vetëm për faktin e ndërmarrjes të një sërë reformash shumë të rëndësishme përgjatë një periudhë të gjatë kohe, jo vetëm për faktin e arritjeve që ka pasur Shqipëria në kontekstin e legjislacionit, në kontekstin e institucioneve, por edhe për shkak të asaj çka besojnë shqiptarët. Unë jam i prirur ta përsëris dhe do të përsëris vazhdimisht se është shumë e rëndësishme t’ja tregojmë edhe Brukselit, por t’ja tregojmë edhe vendeve të tjera të BE- së, cili është qëllimi kryesor i shqiptarëve për procesin e integrimit. Ajo që unë kam parë dhe që më ka kënaqur vërtetë dhe që ja kam përcjellë edhe partnerëve tanë ka të bëjë me faktin që, synimi dhe angazhimi i shqiptarëve në këtë proces nuk ka të bëjë thjesht me një përfitim të një çasti, të një momenti të caktuar, të një përfitimi të një fondi financiar, apo të mentaliteteve të tilla. Ka të bëjë pikërisht me atë që shqiptarët kërkojnë që në Shqipëri përgjatë këtij procesi dhe përmes këtij procesi të arrijmë dhe të implementojmë standardet evropiane.

Gazetari: Cilat janë vendet që janë skeptike për integrimin e Shqipërisë, vendet evropiane. Kam parasysh që mbas statusit vjen hapja e negociatave dhe këtu deklarimi i secilit vend, vendimmarrja e secilit vend është shumë e rëndësishme.

Presidenti Nishani: Nuk ka pasur një diskutim konkret për Shqipërinë ende në Këshillin Europian. Ajo që pritej nuk u realizua për shkak të moskalimit të tre ligjeve në sezonin e kaluar.

Gazetari: A ka një skepticizëm që vjen nga Gjermania, Franca dhe Hollanda?

Presidenti Nishani: Unë nuk besoj. Unë kam pasur një takim të shkëlqyer në Tiranë me Ministrin e Jashtëm gjerman, zotin Westerwelle dhe aq më tepër një takim të shkëlqyer me presidentin gjerman në Berlin ku gjeta një dashamirësi dhe një qëndrim shumë të mirë pro Shqipërisë për të marrë statusin natyrisht e lidhur me reformat që i kërkoheshin Shqipërisë.

Gazetari: A ka një paragjykim ndaj Shqipërisë nga disa vende anëtare të BE-së? A ka një lloj shqiptaro-fobie ndaj nesh?

Presidenti Nishani: Në mënyrë institucionale nuk ka pasur dhe nuk kam ndeshur, por individë dhe grupe të caktuara e kanë shfaqur një shqiptaro-fobi, kjo është evidente. Unë jam i bindur që ato nuk mund të ndikojnë në vendimmarrjet e institucioneve të tilla të rëndësishme sic është Komisioni Europian, Këshilli Europian dhe qeveritë e vendeve të BE-së.

Gazetari: Ky opinion shqiptaro-fobi është shprehur dhe në formë institucionale apo vetëm në formë opinioni?

Presidenti Nishani: Nuk ka pasur në formë institucionale.

Gazetari: Deri tani nuk ka pasur asnjë paragjykim në këtë drejtim?

Presidenti Nishani: Nuk ka pasur. Në mënyrë institucionale nuk ka pasur.

Gazetari: Ndërkohë që Kryeministri që pritet të hyjë në detyrë është shprehur që sot e tutje raportet me Kosovën do të marrin një dimension të ri dhe do të ndryshojnë krejtësisht në sensin pozitiv. Çfarë prisni ju në raportet midis Shqipërisë dhe Kosovës?

Presidenti Nishani: Unë e thashë dhe pak më parë dhe gjykoj se është mjaft e rëndësishme dhe unë ju falënderoj dhe për pyetjen që ju adresoni. Përsa i takon çështjes së politikës së jashtme, ka qenë vërtetë një vlerë e madhe që nuk ka pasur divergjenca apo qëndrime të ndryshme midis opozitës apo mazhorancës asnjëherë, pavarësisht se cila parti apo koalicion ka qenë mazhorancë dhe cila ka qenë në opozitë. Ndaj çdo debat që mund të nisë në lidhje me orientime të ndryshme apo me diferenca të ndryshme në politikën e jashtme nuk do të jetë pozitiv. Unë shpresoj që nuk do të ketë ndonjë ndryshim të qëndrimit dhe të sjelljes së shtetit shqiptar në politikën e jashtme, me Kosovën aq më tepër.

Gazetari: A kemi bërë aq sa duhet në raportet mes nesh?

Presidenti Nishani: Unë besoj që kemi shumë për të bërë veçanërisht në marrëdhëniet ekonomike dhe kërkohet një strategji e përbashkët me Kosovën në marrëdhëniet ekonomike. Zhvillimet që kemi pasur deri më tash me Kosovën sidomos që kanë të bëjnë me komunikimin kanë qenë të paimagjinueshme.

Gazetari: Besoj që të vetmen gjë konkrete kemi ekipin kombëtar të futbollit.

Presidenti Nishani: Ajo është një pararendës i asaj çka ne duhet të kthejmë në ndjesi pozitive.

Gazetari: Përpara se t’ju falënderoj për intervistën, po insistoj dhe një herë në dy-tre pika që i hapa në fillim.

Gazetari: Kur pritet të dekretoni Kryeministrin e ri, zoti President?

Presidenti Nishani: Unë besoj që me të ardhur propozimi nga mazhoranca e re qeverisëse…

Gazetari: Që do të thotë brenda datës 10, të nesërmen e mbledhjes së Parlamentit?

Presidenti Nishani: Besoj që brenda datës 10 mund të dekretohet Kryeministri i ardhshëm.

Gazetari: Edhe kur do të dekretohet qeveria e re?

Presidenti Nishani: Ajo pastaj ka të bëjë me raport me korespondecën midis Kryeministrit të emëruar nga Presidenti dhe Presidentit të vendit.

Gazetari: Sapo Kryeministri të sjellë emrat e ministrave?

Presidenti Nishani: Natyrisht me t’i sjellë dhe me të drejtën kushtetuese që ka Presidenti i Republikës….

Gazetari: Ju keni të drejtën kushtetuese 10 ditore, për shembull.

Presidenti Nishani:  E përsëris edhe një herë, koha duhet shfrytëzuar në mënyrë racionale dhe asnjë herë për të krijuar pengesa të panevojshme artificiale.

Gazetari: Sa kohë do t’ju duhet institucioneve të specializuar të ‘check’-ojnë dhe të sjellin një përgjigje për emrat e qeverisë së re?

Presidenti Nishani: Unë besoj që institucionet tona janë efiçente.

Gazetari: A do të kërkoni një verifikim dhe të Kryeministrit nga këto institucione?

Presidenti Nishani: Unë besoj që, tashmë disa personalitete që janë aktivë në politikë dhe në drejtim të institucioneve kanë qenë ndërkohë të verifikuara.

Gazetari: Kur mendoni që qeveria e re mund të hyjë në zyra, zoti President?

Presidenti Nishani: Le t’ia lëmë kohës, por unë besoj pa vonesa të panevojshme.

Gazetari: Ju falënderoj sot për këtë intervistë.

Presidenti Nishani: Edhe unë ju uroj, siç ju thashë në fillim, sezon të mbarë ju dhe gjithë kolegëve tuaj!

Gazetari: Faleminderit zoti President!