Ruzhdi Lata – Dielli

Lamtumirë Ruzhdi Lata, kryetar i komunës së Dibrës!

November 25, 2018 by dgreca

1 Lati keze 1 Mata Mirenjohje 1 qemali 1 1 Ibrahimi flet

Nga Keze Kozeta Zylo/

Dritë ju pastë shpirti!

Ngushëllime Dibrës dhe familjes së Tij!

Sot, 24 Nentor 2018, është ndare nga jeta Kryetari i Dibrës nën shtetin e Maqedonisë z.Ruzhdi Lata.

Me keqardhje dhe trishtim e morëm këtë lajm për ndarjen e parakohshme tëKryetarit të Dibrës z.Ruzhdi Lata. Ne kemi pasur fatin ta takojmëpara katër vjetësh në Staten Island, New York nënjë tubim me komunitetin dibran, të cilët kanë një përqëndrim të madh në numër në këtë lagje.

Të ftuar si media si TV “Alba Life”, filmuam aktivitetin dhe i morëm intervistë.Gjate intervistës gjithmonë më bënte përshtypje elekuenca e të folurit, qartësia dhe llogjika e mendimeve të ndryshme që ai kishte për Dibrën dhe për Kombin. Rrjedhshmëia në gjuhën shqipe dukej sikur kishte diçka hyjnore me Alfabetin Shqip, dhe pikërisht ai u nda nga kjo botë pasi festoi me dashuri dhe plot gëzim duke përkujtuar 22 nëntorin e vitit 1908, ditën kur burrat më të zgjedhur të kombit tonë kuvenduan dhe njëzëri vendosën që edhe ne të kemi një alfabet të përbashkët do të shkruante në faqen zyrtare të Tij duke iu uruar përzemërsisht të gjithë shqiptarëve Ditën e Alfabetit!

I ndjeri z.Lata gjate fjales së tij me komunitetin dibran në tubim në vitin 2014-të tha: Ju jeni fryma e Dibrës, ndihma juaj është e jashtëzakonshme në mbajtjen dhe zhvillimin e saj.

Në këtë takim ish kandidati për në Kongresin Amerikan z.Emin Egriu u shpreh se unë mora energji dhe bekimin e tij dhe do të punojë me forca të reja për ta pasur fitoren sa më pranë.

Z.Lata iu bëri thirrje gjithë dibranëve dhe komunitetit shqiptar që ta mbështesin kandidaturën e z.Egriu sepse zgjedhja e tij do të jetë një zë shqiptar më shumë në botë.

Z.Lata tha se ne duhet të jemi më të bashkuar se kurrë, t’i lemë grindjet dhe mëritë me njeri tjetrin, por t’i japim dorën dhe të punojmë së bashku për të mirën e Kombit. Në se ne diskutojmë në mënyrë konfliktuale, pa etikë kurrë nuk do të kemi Paqe, dhe rezultatet do të jenë gjithmonë në regres. Pas takimit me kryetarin e Dibrës mjaft të pranishëm para kamerave na folën fjalë miradie dhe thanë se ndjeheshin krenarë që përfaqësonte me aq dinjitet Dibrën, ndërkohë dhe unë si pjesëmarrëse dhe si media në atë takim, mora të njejtën ndjesi për komunikimin e tij plot kulturë, bindës dhe dashamirës me bashkatdhetarët e tij në Diasporë.

Në fund iu përgjigj pyetjeve të ndryshme nga të pranishmit, të cilat u moderuan nga z.Muharrem Borova.

Ish Kryetari i shoqatës atdhetare “Dibra” z.Musa Paçuku i dorëzoi pllakën e mirënjohjes z.Ruzhdi Lata me këtë motivacion: “Mirënjohje për gjithçka që ka bërë për kombin, fenë, Dibrën dhe dibranët. Simbol i kompaktësisë dibrane, i dalluar për mençurinë që ka përcjellë, për gjithë dashurinë dhe respektin, kontributin e madh që ka dhënë dhe vazhdon të japë”.

I ndjeri Ruzhdi Lata do të ngelet në memorjen tonë si një burrë dibran i shquar dhe si një patriot që luftoi vetëm për Kombin!

Lamtumirë Ruzhdi Lata!

Kush është Ruzhdi Lata

(marrë nga faqja zyrtare e Dibrës)

I lindur më 06.05.1953, në Dibër. Shkollën fillore e kreu në vendlindje, të mesmen në Medresenë “Alaudin” në Prishtinë. Pas përfundimit të shkollës së mesme vazhdon studimet ne fakulltetin Filologjik-dega Gjuhë orientale në Universitetin e Prishtinës. Shkallën e tretë të studimeve e kreu në Universitetin e Prishtinës dhe morri titullin Magjistër i shkencave të filologjisë.

Karriera: Prej vitit 1980 ka punuar në Bashkësinë Islame dhe në të njejtën kohë ka ligjëruar në Universitetin e Prishtinës në katedrën e Orientalistikës deri në vitin 1991 kur sërbët me dhunë e larguan nga fakullteti. Punën në Prishtinë e vazhdoi edhe dy vjet në shtëpi private ku fakullteti mbante mësim. Pas vitit 1993 përsëri paralelisht dy vjet punoi në Bashkësinë Islame në Maqedoni dhe në Fakultetin e Shkencave Islame në Shkup deri në vitin 1995. Pas vitit 1995 punoi vetëm në Bashkësinë Islame deri në vitin 2009, pas vitit 2009 gjer në vitin 2013 punoi në Bashkësin Islame dhe ligjerues në katedrën e Orientalistikës në Universitetin Shtetëror të Tetovës. Në vitin 2013 u votua dhe u zgjodh kryetar i Komunë së Dibrës.

Gjuhët: shqip, maqedonisht, sërbokroatisht, turqisht dhe arabisht.

Gjatë karierës është marrë me përkthime nga arabishtja, vepra e dhjetë e Sahihil-Buhariut, nga turqishtja, romani i Sami Frashërit “Dashuria e Talatit me Fitneten”, publikim i disa artikujve në katër vazhdime për Haxhi Vehbi Dibrën, Haki Sharofin, Fuat Dibrën etj.

Pjesmarrës në disa simpoziume ndërkombëtare dhe konferenca shkencore me temë “Kontributi i Ulemave dibranë në lëvizjen kombëtare”, “Kontributi i Ulemave të Rekës”, “Pjesmarrja e hoxhallarëve në Lidhjen shqiptare të Prizrenit dhe në Shpalljen e Pavarësisë” etj.

Përkrahës i lëvizjeve demokratike në Dibër dhe më gjërë, kontribut të veçantë ka dhënë për themelimin e partive politike shqiptare në Dibër pas vitit 1990. Njihet edhe si aktivist për pajtimin e popullatës në raste konfliktesh të të gjitha niveleve dhe ka të regjistruar mbi 150 pajtime. Njihet edhe si organizator për ndihmesë materiale për nevojën e kosovarëve, për pritjen dhe sistemimin e bashkëatdhetarëve nga Kosova në Dibër, për Lëvizjen kombëtare shqiptare në Maqedoni, për nevojat e qytetarëve të Peshkopisë në krizën e vitit 1997 etj.

Për punën e bërë me rastin e 100 vjetorit të Pavarësisë dekorohet Qytetar Nderi nga Këshilli Bashkiak i Peshkopisë.

24 nëntor, 2018

Staten Island, New York

Kryekomunari i Dibres, Lata, u takua me komunitetin dibran në Staten Island

March 9, 2014 by dgreca

Dibranët,në Amerikë, diskutuan hallet dhe brengat të Dibrës së Madhe me Kryetarin e Dibrës, zotëri Ruzhdi Lata,me temën: “Ju, bashkë me Kryetarin, do ta ndërtoni Dibrën! Dibrën do t’a bëjnë vetëm dibranët”/

Nga Beqir Sina/

STATEN ISLAND NEW YORK – Kryetari i Komunës së Dibër e Madhe, vijoi vizitën e tij në Shtetet e Bashkuara, dje me një takim mjaft të ngrohtë me përfaqësues të Komunitetit Dibranë, në ishullin e dibranëve në Nju Jork – Staten Island. Takimi me dibranët në zonën e Tri- Shtetshit, u mbajt të shtunën më datën 8 Mars 2014 ora 12 e mesë-drekës, deri në orën 4 të mbasdrekës, në lokalin e njohur “Klubi Dibra” me pronar bashkëqytetarin dibran Titi Maqellara, në Bay Street, Staten Island -NYC. Si dihet kryetari i Dibrës së Madhe, zoti Lata erdhi në SHBA, javën e kaluar bashkë me nënkryetarin e BDI-së, zotëri Izet Mexhiti, i autorizuar si përgjegjës për diasporën në zgjedhjet parlamentare, të 26 prillit atë të Kërçovës zotin Fatmir Dehari, për të marrë pjesë në zgjedhjen e kanadidatit shqiptarë nga diaspora, duke bërë thirrje që shqiptarët nga Maqedonia të regjistrohen dhe të dalin masivisht në votime më 26 Prill këtu në Shtetet e Bashkuara të Amerikës.

Takimi i organizua nga Shoqata Atdhetare Dibra me qendër në Staten Island dhe e kryesoi kryetari i saj zoti Musa Paçuku. Me këtë rast shoqata Dibra e nderojë me Mirënjohje, kryetarin e Dibrës zotëri Ruzhdi Latën.

Ndërkoh në bashkëbisedimin e mbajtur dje morën pjesë më shumë se 200 dibranë, shumia anëtarë të kësaj shoqate, si dhe veprimtarë të dalluar të këtij komuniteti, afaristë e biznesmen të suksesshëm dibranë në SHBA.

Takimi, pati formën e një forumi bashkëbisedues në mes të parit të Dibrës, maxhistër Ruzhdi Lata, dhe komunitetit dibranë, i cili thuhet se është një ndër komunitetet më të mëdha në SHBA, me rreth 20 mijë dibranë, aqsa mendohet se kan emigruar nga Dibra e Madhe në Amerikë, gjatë 5 dekadave të fundit.

Gjatë bashkëbisedes të mbajtur në lokalin “Dibra Club” kreu i Dibrës, zoti Lata, në fillim të fjalës së tij i përgëzoi dibranët për kontributin që ata japin në të mirë të imazhit të Dibrës dhe shqiptarëve të Amerikës dhe informoi ata për përpjekjet që po bënë Komuna e tij, për të rritur kujdesin dhe bashkëpunimin me diasporën dibrane në SHBA.

Kryetari i Dibrës bëri edhe një ekspoze të detajuar të Komunës

Duke iu drejtuar të pranishmëve, zoti Lata, vuri në dukje arritjet e vitit të parë prej kur ai fitojë edhe mandatin e kryetarit të Komunës së Dibrës së Madhe dhe foli gjithashtu edhe për sfidat që qëndrojnë përpara në rrugën e zhvillmit ekonomik e social të Dibrës dhe konkretisht për të arritur atë se çfarë besuan në votën e tyre dhe duan populli i Dibrës së Madhe .

Kryetari i Komunës së Dibrës Madhe, në Maqedoni, maxhistër Ruzhdi Lata duke bëri një ekspoze të detajuar të punëve që janë bërë deri tani në këtë Komunë, tha se për të lënë pas të shkuarën duhet që dibranët, sot të mos merren shumë me të shkuarën dhe se çfarë është bër më parë , por të gjithë së bashku tha ai duhet të kemi një vështrim të qartë nga e ardhmja e Dibrës, dhe çfarë mund të bëjmë për Dibrën dhe dibranët. Ai dha sqarime rreth çështjes së regjistrimit të dibranëve në SHBA për votimet në Maqedoni dhe rëndësinë e madhe që kan këto zgjedhje, për shqiptarët e Amerikës, duke bër thirrje edhe një her për dalje masive në këto zgjedhje. Në këtë kontekst ai sqaroi edhe pse nuk u zgjodh një dibran(ashtu si dëshorinin të gjithë) për kandidat nga diaspora në zgjedhjet parlamentare në Maqedoni.

Më pasë edhe në përgjigjet e shqetësimeve të dibranëve ai nuk anashkaloi dhe sqaroi mirë si qëndron çështja me devijimin e Lumit të Radikës. Kreu i Dibrës, siguroi dibranët se ; ” Në asnjë mënyrë nuk do të ketë devijim të Lumit të Radikës”. Ku, sipas tij do të bëhet si ka vendosur populli i Dibrës” dhe shtojë si e ka krijuar natyra pra ” Lumi ka rrjedhën dhe drejtimin e saj shekullor dhe atë do të ketë atë perj nga Lindja drejt Perendimit dhe jo nga Perndimi drejt Lindjes, për të “fryrë” dhe mubushur me ujë për lundrim Vardarin e daljen e tij me derdhje në Detin Egje nëpërmjet Greqisë”.

Ndërsa, duke folur rreth zgjedhjeve Parlamentare në Maqedoni, të ilat mbahen në 26 Prill, zotëri Lata, tha se angazhimi i tanishëm tek ne ka të bëjë me faktorizimin e akoma më të madh të shqiptarëve në qeverinë e ardhshme, ku përndryshe nga 3 vjet më parë, ai tha se tani BDI-ja, partia së cilës ai i përket, synon të marrë të paktën 2 nga 3 deputetët e diasporës. “Këtu nuk është çështje shprese, theksojë, ai, por është çështje angazhimi pasi numri është dominant i njerëzve tanë në SHBA dhe nëse angazhohen shqiptarët që të dalin në votime, të shkojnë deri në konsullatë të Maqedonisë që të votojnë, është më se e sigurt që ne fitojmë edhe një deputet më shumë shqiptarë në parlamentin e Maqedonisë”, u shpreh kryetari i Dibrës maxhistër Ruzhdi Lata, duke u bërë thirrje vazhdimisht disa her edhe në këtë bashkëbisedim komunitetit dibranë, që të mos harrojnë të regjistrohen dhe të dalën masivisht në zgjedhjet e 26 Prillit, vetem e vetëm të zgjidhet një shqiptarë”.

Kryetari i komunë së Dibrës , Ruzhdi Lata, si kryetar komune, tha se për këto 11 muaj prej se kur e mori Komunën në drejtimin e tij ka bërë shumë për të realizuar gjitha projektet e pushtetit vendor. Të cilat ishin edhe premtimet e tija elektorale. Ai u shpreh se gjithmon ka pasur kënaqësinë e tij, që të jetë si kryetar i Dibrës duke potencuar ” Kryetar për të gjithë, pa dallim politik, fetar apo nacionaliteti, kryetar i të gjithë qytetarëve dibranë”. “Pushteti vendor në fillim të mandatit tim, theksoi ai kishte nevojë për sistemim dhe rregullim të mjeteve financiare, sistemim të vendeve të punës dhe këtë e arritëm me sukses. Në komunën e Dibrës nuk ka më punëtorë me kontratë në vepër, por të gjitha kanë vendime, ne nuk duam punëtorë me stres por duam të ketë rehati në vendin e punës, dhe këtë e arritëm qysh në 100 ditëshin e parë të punës time” si kryetar komune tha Lata.

“Kemi paguar shumë borxhe, sqaroi ai sepse duhej të bëhej një punë e tillë, me këtë rast dua të përmend Ndërmarrjen e Gostivarit “Progres,, një vlerë prej 80 mijë euro. Për mua si kryetar është bashkëpunimi i mirëfilltë me qytetarët , jam i pari kryetar që nuk kam bë asnjë ndryshim kadrovik në komunë e jo më në institucione të tjera” ka potencuar Lata.
Sa i takon projekteve ai ka deklaruar se për këtë kohë janë bërë shumë punë , duke filluar qysh nga asfaltimet të lagjeve të shumta të qytetit. Sipas, tij nuk ka pasur tender në këto projekte, sepse i gjithë materiali është ofruar nga ana e pushtetit vendor ,ndërsa krahu i punës ka qene vetë qytetari i çdo lagje të Dibrës së Madhe. Lata foli për ujin e pijëshëm në qytet, energjinë elektrike, spitalin, pastrimin e qytetit, Liqenin e Dibrës, çështjet e tjera administrative, Hdrocentralin e Spiles, kulturën sportin, biznesin vendor, çështjen e shqipes në dokumentat e administratës.

Takimi u mbyll në formën e një bashkëbisedimi, dhe mirëkuptimi, ku me anë të pyetjeve që i moderojë zotëri Muharrem Borova, por edhe përgjigjeve të sakta që dha Kryetari i Komunës së Dibrës së Madhe – Maqedoni, maxhistër Ruzhdi Lata.

Ata së bashku gjatë gjithë kohës shkëmbyen mendime për forcimin e lidhjeve ndërmjet vendorigjinës – vendlidjes dhe diasporës në të gjitha pjesët e jetës së këtij komuniteti, që është dalluar në diasporë për kontributin e madh që ka dhënë në çështjen kombëtare dhe qytetin e tyre Dibrën e Madhe.Në fund u shtrua një darkë për nder të Kryetarit të Dibrës ë Madhe zotëri Ruzhdi Lata.(Foto: Keze Zylo)

Ju bashkë me Kryetarin do ta ndërtoni Dibrën !

March 1, 2014 by dgreca

Kryetari i Dibrës Ruzhdi Lata takohet në 8 Mars me komunitetin dibranë në Staten Island/

Nga Beqir Sina/STATEN ISLAND : Njoftohen të gjithë dibranët në zonën e Tri- Shtetshit se të shtunën më datën 8 Mars 2014 ora 12 e mesëdrekës deri në orën 4 të mbasdrekës, do të mbahet takimi me të parin e Komunës së Dibrës maxhistër Ruzhdi Lata. Takimi do të mbahet në lokalin e njohur Klubi Dibra me pronar bashkëqytetarin tonë Titi Maqellara dhe gjendet në adresën Bay Street, Staten Island – Siper tek BARI PIZZA. Takimi është i organizuar nga Shoqata Atdhetare Dibra dhe është i hapur për të gjithë dibranët. Ky takim ka një rëndësi të veçantë për të tu takuar dhe për të zhvilluar një bashkëbisedim me Kryetarin e Dibrës, dhe dibranëve që kan një pjesë të jetës së tyre në Dibër të Madhe. Dhe jetojnë me hallet e brengat e familjeve të tyre në Dibër të Madhe.Do të diskutohet çështja e regjistrimit të dibranëve në SHBA për votimet në Maqedoni dhe ajo i devijimit të Lumit të Radikës.Kryetari i komunë së Dibrës , Ruzhdi Lata, si kryetar komune, ka dëshmuar për këto 11 muaj prej se kur e mori Komunën në drejtimin e tij se ka për të realizuar gjitha projektet e pushtetit vendor. Të cilat ishin edhe premtimet e tija elektorale. Ai gjithmon ka shprehur kënaqësinë e tij si kryetar i Dibrës duke potencuar se është kryetar për të gjithë, pa dallim politik, fetar apo nacionaliteti.

“Pushteti vendor në fillim të mandatit tim kishte nevojë për sistemim dhe rregullim të mjeteve financiare, sistemim të vendeve të punës dhe këtë e arritëm me sukses. Në komunën e Dibrës nuk ka më punëtorë me kontratë në vepër por të gjitha kanë vendime, ne nuk duam punëtorë me stres por duam të ketë rehati në vendin e punës”, ka deklaruar në tremujorin e parë të punës së tij si kryetar Lata.
“Kemi paguar shumë borxhe sepse duhej të bëhej një punë e tillë, me këtë rast dua të përmend Ndërmarrjen e Gostivarit “Progres,, një vlerë prej 80 mijë euro. Për mua si kryetar është bashkëpunimi i mirëfilltë me qytetarët , jam i pari kryetar që nuk kam bë asnjë ndryshim kadrovik në komunë e jo më në institucione të tjera” ka potencuar Lata.
Sa i takon projekteve ai deklaruar se për këtë kohë janë bërë shumë punë , asfaltime të lagjeve të shumta. Sipas tij nuk ka pasur tender në këto projekte, sepse i gjithë materiali është ofruar nga ana e pushtetit vendor ,ndërsa krahu i punës ka qene vetë qytetari i lagjes.
Ai ka pasur në fokus asfaltimin në lagjen Varosh, lagja e Inqarit, rruga “Dervish Mustafa”, rruga “22 Dhjetori” lagja Konjarëme rrugën “Xhavit Ushtelenca”, lagja Tabakane, lagja Bomovë, asfaltime të rrugëve dhe mbushje të gropave në qytet. Përgatitje për pllakëzim të rrugëve tjera të qytetit, përmirësimi i gjendjes së rrugës për në kalimin ndërkufitar “Bllatë,, në bashkëpunim me ndërmarrjen “Rrugët e Maqedonisë”, asfaltimi i rrugës në lagjen Rajçicë, ndikimi i përfundimit në aksin rrugor Dibër-Strugë, vendosja e gurthemelit të gjimnazit në fshatin Mogorçë.
Kryetari Lata gjithashtu ka në plan edhe disa projekte të tjera në sferën e urbanizmit për planin e përgjithshëm detal urbanistik,rikonstruimin e pusetave të ujësjellësit,si dhe takimet dhe pjesëmarrjet e tij nëpër manifestime të ndryshme si brenda ashtu edhe jashtë shtetit.

Këto janë disa nga projektetet e tij për të cilat ju si dibran që keni një pjesë të jetës suaj atje në Dibër të Madhe, dhe çdo ditë mendoni e punoni edhe për prindërit tuaj atje që mund t’i diskutoni së bashku me të parin e Dibrës – Kryetarin e Komunës magjistër Ruzhdi Lata.