SHBA – Page 22 – Dielli

ÇARMATOSJA E SIRISË PA PASOJA SI NË SHQIPËRI DHE NË MARRËDHËNIET SHQIPËRI-SHBA-NATO

November 12, 2013 by dgreca

Nga ELIDA BUÇPAPAJ/

Një mik i nderuar në Facebook më shkruante “Tash Elida do të ishte mirë të shkruash një koment për armët kimike, e jo të postosh komentet e të tjerëve! Pershëndetje” –
Zotëria kishte shumë të drejtë, sepse rreth armëve kimike ne kemi heshtur në mënyrë aktive, duke publikuar të gjitha qëndrimet. Për një gjë mbaj qëndrim të prerë, kur sensibiliteti për armët kimike adresohet si antiamerikanizëm. Këtë lloj manipulimi nuk e pranoj assesi.
Ndërsa fushatat sensibilizuese të elitës, ekspertëve të fushës, ambientalistëve, shoqërisë civile dhe shtypit natyrisht që janë të domosdoshme, duke shmangur qëndrimin politik dhe përfitimin politik.
Për armët kimike të Sirisë me destiancion Shqipërinë u mësua përmes një informacioni të rrjedhur. Kam përshtypjen nga Ministria e Jashtme. Pastaj mësuam se Rama dhe Kerry kishin folur në telefon dhe sipas Sausan Ghosheh, e dërguara në Siri e misionit të Kombeve të Bashkuara të Organizatës Kundër Përdorimit të Armëve Kimike, „më datë 15 nëntor pritet të mblidhet Këshilli Ekzekutiv i Organizatës për Ndalimin e Armëve Kimike, për të vendosur lidhur me procedurat e shkatërrimit dhe vendin“. Vendet që diskutohen janë Franca, Belgjika, Norvegjia dhe Shqipëria.
Unë personalisht, si Elida Buçpapaj parimisht jam kundër ardhjes dhe demontimit të armëve kimike si në Shqipëri ashtu edhe në Europë. Mendoj se armët kimike duhet të eleminohen në Siri nën monitorimin e fortë të OKB-së, BE, SHBA! Mund të demontohen edhe në vendet që i kanë shitur, përsëri nën monitorim shumë të fortë.
Ndërkohë Shqipëria është me SHBA aleat jetik dhe dialogu me ta duhet të jetë shumë i ngushtë, shumë luajal dhe shumë konstruktiv. Pikë.
Ish-Kryeministri Berisha na solli ujgurë në Shqipëri. Po ashtu na solli edhe muxhahedinët në Shqipëri. Nuk i solli me dëshirën e tij, besoj. Aso kohe, qeveria shqiptare pranoi që vendi ynë të strehojë 210 muxhahedinë irakianë me kërkesë të Shteteve të Bashkuara të Amerikës dhe vetë Berisha do të deklaronte se „Premtimi për strehimin e tyre i është bërë edhe Sekretares së Shtetit Clinton gjatë vizitës së saj në Tiranë“. Për strehimin e 210 muxhahedinë irakianë ishte i interesuar edhe përfaqësuesi i Komisionerit të Lartë të Organizatës së Kombeve të Bashkuara për Refugjatët (UNHCR), por Berisha mori në konsideratë kërkesën e Zonjës Clinton. Dhe bëri mirë. Pikë.
I ndryshëm ishte vendimi i qeverisë Berisha për importin e plehrave, ku sipas tijShqipëria bëhej gropa e plehrave të rajonit, jo në kuptim metaforik, në kuptimin ad literam – të cilin Rama e shfuqizoi menjëherë me një prej tri vendimeve të para të qeverisë së tij. Bota e qytetëruar importon lëndë të para, Shqipëria eksporton lëndë të para dhe do të importonte plehra.
Shqipëria është e ndjeshme me temën e çarmatimeve, sepse e ka përjetuar me një tragjedi deaktivimin e armatimeve të kohës të diktaturës, siç ishte Gërdeci. Por kur ky proces u monitorua nga specialistët, gjithçka shkoi në rregull.
Në këtë konteskt, unë mendoj se kryeministri Rama ka bërë një deklaratë të mirë kur ka thënë se për të “është i rëndësishëm partneriteti me SHBA nga llogoret e Irakut tek çarmatosja e Sirisë”.
Të çarmatosësh Sirinë është detyrë e komunitetit ndërkombëtar, por problemi është që kjo çarmatosje të bëhet pa asnjë pasojë si në Shqipëri, ashtu edhe në marrëdhëniet e Shqipërisë me SHBA dhe NATO-n.

SHBA: SHQIPTARI DENOHET EDHE PER KOMPLOT PER TE VRARE AGJENTET E FBI

May 11, 2013 by dgreca

Hysen Sherifi, 29 vjeçar, është dënuar mbrëmjen e se premtes te 10 majit, në Shtetet e Bashkuara me dënim të gjatë me burg për komplot për t’i vrarë dëshmitarët federalë, dëshmia e të cilëve ka ndihmuar në dënimin e tij, për rolin e Sherifit në një komplot të mëparshëm për vrasjen e ushtarëve të Shteteve të Bashkuara dhe të familjeve të tyre.
Hysen Sherifi ishte njëri nga gjashtë myslimanët e dënuar në vitin 2011 për planifikim për ta sulmuar një bazë të Marinës së Shteteve të Bashkuara në Quantico të Virxhinias, dhe caqet tejoqeanike amerikane.
Pak pasi e kishte filluar vuajtjen e dënimit me burg prej 45 vjetësh në këtë çështje të terrorit, ai kishte kërkuar ndihmë nga një i burgosur tjetër për ta angazhuar një vrasës profesional për t’i vrarë me heqje koke informatorët dhe agjentët e agjencisë FBI.
Ai e kishte rekrutuar vëllaun e tij më të vogël, Shkumbin Sherifi, 23 vjeçar, dhe ish mësuesen me prejardhje nga Egjipti, Navine Aly Elsheikh, 48 vjeçare, për të ndihmuar në pagesën e vrasësit dhe për organizimin e vrasjeve.
Mëtutuje, agjencia AP raporton nga Karolina Veriore se një i burgosur nga i cili Sherifi kishte kërkuar ndihmë, doli se ishte informator i qeverisë.
Duke e cituar bashkëpunimin e gjërë të Shkumbin Sherifit dhe Nevine Aly Elsheikh, gjyqtari i lartë amerikan i kësaj çështjeje Earl Britt, e dënoi Shkumbin Sherifin me 3 vjet burg, ndërsa Elsheikh u dënua me 3.5 vjet. Ata ballafaqoheshin me 10 vjet burg secili.
Para se Hysen Sherifit i ishte shqiptuar dënimi, ai i mbajti leksion gjyqtarit për mësimet e Islamit.
“Kurani është e vërteta që i zhvlerëson të gjitha religjionet e tjera”, tha Sherifi, i cili refuzoi ndihmën e avokatit të caktuar nga gjykata dhe e përfaqësoi vetveten në proces. “Nëse ju nuk i nënshtroheni kësaj, ai do t’iu gjykoj rëndë, dhe në ditën e gjykimit ju do të hyni në zjarrin e ferrit”, tha Hysen Sherifi.
Gjyqtari Britt, i cili ka përvojë më se 30 vjeçare, e vulosi dënimin prej katër afateve me burgim të përjetshëm, në fund të dënimit të mëparshëm prej 45 vjet burgim, sa ishte dënuar ai në procesin e mëparshëm.
“Nuk ka dyshim se zoti Sherifi, i akuzuari në këtë rast, e plotëson definimin e terroristit”, tha gjyqtari Britt, dhe shtoi se “Ai ishte zanafilla e këtij konspiracioni, ai ishte organizatori”.
Duke theksuar se i akuzuari nuk ka pasur sukses në kryerjen e ndonjë vrasjeje, gjyqtari tha se shkelja në e madhe e Hysen Sherifit ishte shkatërrimi i jetës së vëllaut të tij Shkumbin, dhe të ish mësueses Elshiekh.
Vëllezërit Hysen dhe Shkumbin Sherifi janë shqiptarë nga Kosova, që në vitin 1999, gjatë luftës në Kosovë, kishin përfunduar si refugjatë në Shtetet e Bashkuara.(Kortezi Bota Sot)

Shtetet e Bashkuara të Amerikës bojkotuan Serbinë në Asamblenë e Kombeve të Bashkuara

April 11, 2013 by dgreca

* Incidenti i rëndë në AP të OKB-ës, Presidentia e Shoqatës “Nënat e Srebrenicës” Munira Subasic u nxorr me forcë nga rojet e sigurisë nga salla e OKB-së

* Shtetet e Bashkuara të Amerikës, të mërkurën udhëhoqën një bojkot të një takimi të Asamblesë së Përgjithëshme të OKB-së duke e quajtur atë si “paekuilibruar” dhe “provokuese”

NGA BEQIR SINA/

KOMBET E BASHKUARA NY: Debatin e sotëm në Asamblenë e Përgjithshme të Kombeve të Bashkuara në New York, me temë “Roli i drejtësisë ndërkombëtare dhe pajtueshmëria midis popujve,” e kanë bojkotuar disa vende, në mesin e tyre edhe SHBA, Kanadaja, Jordania, dhe vetë Gjykata Ndërkombëtare e Drejtësisë. Ndërsa, disa vende e kan quajtur një përpjekje e Serbisë dhe kryetarit serb të Asamblesë së Përgjithshme, Vuk Jeremiq, për të minimizuar krimet që kanë kryer serbët në Ballkan në vitet e 90-ta.

Burime diplomatike, nga New Yorku, thanë se Shtetet e Bashkuara të Amerikës, të mërkurën udhëhoqën një bojkot të një takimi të Asamblesë së Përgjithëshme të OKB-së, ku merrte pjesë edhe Presidenti i Serbisë Tomisllav Nikoliç, i cili e nisi fjalimin e tij me një sulm të ashpër mbi gjykatat ndërkombëtare për krime lufte.

Sipas axhensive të lajmeve, thuhet se Misioni i SHBA – në New York, e dënoi takimin e organizuar nga kreu i Asamblesë së Përgjithshme të OKB-së, Vuk Jeremiç i Serbisë, duke e quajtur atë si “paekuilibruar” dhe “provokuese”.

Shteteve të Bashkuara të Amerikës, i janë bashkëngjitur në këtë bojkot edhe Kanadaja, Jordania dhe disa vende të tjera, si dhe zyrtarë të lartë ndërkombëtarë, insitucione ndërkombëtare ligjorë, të cilat e kan bojkotuar, gjithashtu këtë ngjarje, që kritikët brenda OKB-së, thanë se ky takim sipas tyre ishte një përpjekje nga Serbia për të devijuar vëmendjen nga roli i saj në luftërat ballkanike të pas viteve 1990.

Ish Ministri i Jashtëm serb Vuk Jeremiç, i cili mban postin e radhës së Asamblesë së Përgjithëshme të OKB-së, sipas disa burimeve diplomatike, thuhet se refuzoi të lë përfaqësues të familjeve prej masakrës së Srebrenicës të vitit 1995, kryer nga ana e serbëve të Bosnjës, të flasnin në këtë ngjarje.

Diplomatët e huaj – thanë, se shumica e përfaqësuesve të tyre nga vendet evropiane, në OKB, dërguan përfaqësuesit e tyre të nivelit të ulët zyrtarët në mbledhjen e Asamblesë së Përgjithëshme të OKB-së, ku Serbia dhe Ruanda kanë bërë sulme të hapura mbi Gjykatat Ndërkombëtare të vendosura pas luftërave Ballkanike dhe gjenocidit në Ruandë.

Presidenti ultra-nacionalist i Serbisë Tomisllav Nikoliq, tha në Asamblenë e Përgjithëshme e cila përbëhet nga 193-anëtarë se ” Prokurorët dhe gjykatësit në Gjykatën Ndërkombëtare Penale për ish-Jugosllavinë (ICTY) u sollën në mënyrë të njëanshëm ndaj të pandehurve serbë”

Presidenti i radhës së AP-së, Vuk Jeremiç refuzoi të lë të flasë Shoqatën” Nënat e Srebrenicës” – një grup që përfaqëson familjet e 8,000 burrave dhe djemve muslimanë të vrarë në qytetin Serbenicë – që të marrin pjesë në këtë ngjarje.

Munira Subasiq, presidente e Shoqatës “Nënat e Srebenicës”, e quajti fjalimin Jeremiç dhe përjashtimin e saj nga përfaqësuesit e viktimave si “fyese”.Presidentia Nënat e Srebrenicës, Munira Subasiq, tha se ajo po vinte në Nju Jork, edhe pse ajo nuk ishte e ftuar për të folur në mbledhjen e Asamblesë së Përgjithshme të OKB-ës.
“Vuk Jeremiç nuk ka menduar as për boshnjakët apo kroatët,” tha ajo. “Ai vetëm e ftoi palën serbe dhe njerëzit që nuk e dinë se kush është kush në Bosnje.”
Subasic tha se Jeremiqi e mban takimin “për të paraqitur serbët sikur ata janë viktimat më të mëdha.”

Erin Pelton, zëdhënëse e misionit amerikan në Kombet e Bashkuara, tha se Shtetet e Bashkuara ” nuk pajtohen fuqishëm” me lëvizjen Jeremiq, si e ka quajtur ajo ; “për të mbajtur një debat të paekuilibruar, inflamatorë në tematikë, sot në rolin e drejtësisë penale ndërkombëtare në Asamblenë e Përgjithshme të OKB-ës” dhe në pajtim me këtë SHBA, nuk do të marrën pjesë tha Pelton.

Kryetarët e gjykatave ndërkombëtare dhe disa zyrtarë të lartë të OKB- refuzuan të marrin pjesë.Megjithatë, kreu i OKB-së Ban Ki-mun foli në takim dhe mbrojti me forcë rolin në rritje të drejtësisë ndërkombëtare.

Incidenti i rëndë në AP të OKB-ës, Presidentia e Shoqatës “Nënat e Srebrenicës” Munira Subasic u nxorr me forcë nga rojet e sigurisë nga salla e OKB-së

Munira Subasiq, Presidentia e Shoqatës “Nënat e Srebrenicës” u nxorr me forcë nga rojet e sigurisë nga salla e OKB-së, gjatë debatit publik mbi punën e gjykatave ndërkombëtare penale. Në shenjë irritimi gjatë kohës që po fliste Presidenti serb Tomislav Nikoliq, ajo shfaqet me flamurin që lexon ‘Republika Srpska – gjenocid”. Kryetarja e Shoqatës se Nënave të Srebrenices,”Munira Subasiq u ngirt në këmbe me një triko të veshur ku shkruhej “Srebrenica-pravda je dostizna” dhe “Republika Srpska je genocidna tvorevina”. Siç u tha më vonë, trikoja e veshur ishte e djalit të mitur të zonjës Subasiq, të vrarë në Srebrenicë.

Ambasadori i Jordanisë në OKB-ë, ka deklaruar se ai dhe vendi i tij, “e kan bojkotuar këtë takim mbi drejtësinë penale ndërkombëtare të organizuar nga presidenti i Asamblesë së Përgjithshme Vuk Jeremiq, për shkak se nuk janë të përfshirë viktimat e luftës në Bosnje dhe se kishte njoftime se disa vende kan për të sulmuar ITCY dhe OKB-në për krimet e luftës për ish-Jugosllavinë”.

Princi Zeid Al Husein dhe ambasdori i Liechtenstein-Kristian Wenewaser, mbas incidentit sponsorizuan një konferencë për shtyp për dy grupe të dy viktimave – Munira Subisiq, Presidenten e Shoqatën Nënat e Srebrenicës dhe Shoqata e Dëshmitarëve të mbijetuarit e gjenocidit.

“Delegacioni i im e ka bojkotuar takimin e AP nga një ndjenjë e zemërimit në mënyrë, që presidenti i Asamblesë së Përgjithshme ka shfrytëzuar pozitën e tij dhe kjo temë e rëndësishme, e cila është roli i Drejtësisë Penale Ndërkombëtare në Pajtimin, të ketë për qëllimë nisjen e një sulmi të pamerituar nga Partia Radikale Serbe kundër Tribunalit Ndërkombëtar për ish-Jugosllavinë “, tha ambasadori jordanez.

“Ne besojmë se është detyra jonë, për të krijuar një hapësirë në mënyrë që zërat e viktimave të luftës në Bosnjë gjithashtu mund të dëgjohen”, tha Zeid.

Ambasadori i Liechtenstein Kristian Wenewaser ka shprehur shqetësimin e tij se Jeremiq “është duke e shfrytëzuar Asamblenë e Përgjithshme për të ndjekur qëllimet e veta politike, për të cilat ai nuk e ka të qartë se çfarë ai duhet të bëjë si presidenti i Asamblesë së Përgjithshme”.

“Është shumë e trishtuar se kjo është një mundësi e humbur për të çuar përpara drejtësinë penale ndërkombëtare ,” tha Wenewaser, duke shtuar se “Ai(Jeremiq) ka refuzuar për të bërë këtë një ngjarje gjithëpërfshirës që mbulon drejtësinë ndërkombëtare në të gjitha aspektet e saj.”

IRANI SHPALL ARMIQ ZERIN E AMERIKES DHE BBC

January 29, 2013 by dgreca

-”Çdo qeveri që nuk duron kritikat e botuara, meriton të bjerë.”-Tomas Xheferson/

Ne Foto: Fotot e gazetarëve iranianë të arrestuar — marrë nga portali i organizatës për mbrojtjen e gazetarëve, Korrespondentët pa Kufij/

Nga Frank Shkreli/

Mediat ndërkombëtare dhe organizatat për mbrojtjen e gazetarëve njoftuan të djelën për arrestime të reja gazetarësh në Iran, përfshirë edhe korrespondentët e Zërit të Amerikës dhe BBC-së, dy enteve të mëdha të lajmeve ndërkombëtare, të akuzuar për bashkpunim me media të huaja në gjuhën persisht dhe për lidhje, me ato që Irani cilëson, si grupe dhe media ”kundër-revolucionare”, që sipas autoriteteve iraniane bashkpunojnë me kundërshtarët e regjimit.Regjimi i Teheranit i konsideron entet ndërkombëtare të lajmeve, siç janë Zëri i Amerikës dhe BBC-ja, si organizata armiqësore. Lajmet bëjnë të ditur se shumë iranianë dëgjojnë dhe shikojnë programet radio-televizive në gjuhën persishte të Zërit të Amerikës dhe të BBC-së. Sipas lajmeve të bazuara në burimet nga Irani, thuhet se të pakën 14 gazetarë që punojnë për media të ndryshme reformiste të Iranit u arrestuan të shtunën dhe të djelën dhe janë lëshuar fletë-arrestime edhe për disa të tjerë.

Në një njoftim për media, të titulluar Djela e Zezë, organizata franceze Korrespondentët pa Kufij, thotë se udhëheqsi suprem i Iranit, Ali Khamenei po e shton luftën kundër gazetarëve, duke cituar Sekretarin e Përgjithëshëm Chistophe Deloire se në Iran, ”Persekutimi i gazetarëve po intensifikohet nga dita ditë. Irani ende nuk ka dalur nga periudha e terrorit që filloi pas zgjedhjeve të kundërshtuara për president në vitin 2009, dhe tani pesë muaj para zgjedhjeve të ardhëshme në Qershor të 2013-ës — autoritetet iraniane po dërgojnë një paralajmërim të qartë se gazetarëve dhe medias do t’i mbyllet goja.” Organizata për mbrojtjen e gazetarëve, Korrespondentët pa Kufij, bën thirrje për lirimin e menjëhershëm dhe pa kushte të të gjithë gazetarëve që tani mbahen në burgjet e Iranit. Autoritetet duhet që u japin fund menjëherë këtyre valëve arrestimesh, qëllimi i vetëm i të cilave është që të sigurojë stabilitetin e regjimit dhe mbijetesën e tij. Përpjekje të tilla janë të destinuara të dështojnë, thuhet në njoftimin për media të kësaj organizate. Prokurori i Përgjithëshëm i Iranit Gholam Hossin Mohseni Ejehi citohte të ketë thënë me kërcënim gjatë një konferencë shtypi me 21 janar se, ” më kanë ra në dorë informacione të besueshme se disa gazetarë në Iran janë duke bashkpunuar me perendimorët dhe me kundër-revolucionarët jashtë vendit.”

Edhe organizata tjetër e njohur për mbrojtjen e gazetarëve anë e mbanë botës, Komiteti për Mbrojtjen e Gazetarëve, me qendër në Nju Jork, reagoi ashpër ndaj arrestimeve të gazetarëve në Iran duke cituar drejtorin e kesaj organizate për Lindjen e Mesme, Sherif Mansour se, ”Me këtë valë arrestimesh duket se autoritetet iraniane po përpiqen, që në mënyrë paraprake, të heshtin median e pavarur para zgjedhjeve presidenciale të Qershorit.” Ai gjithashtu u bëri thirrje autoriteteve iraniane, që të, ”lirojnë të gjithë gazetarët e burgosur dhe të ndalojnë njëherë e mirë përpjekjet e vazhdueshme që përdoren për të cilësuar kritikët e regjimit si armiqë të shtetit.”

Sipas Komitetit për Mbrojtjen e Gazetarëve, Irani është në vendin e dytë si vendi më i keq për burgosjen e gazetarëve, në të njëjtën ligë me Turqinë dhe Kinën.

Iran has taken a hard line on journalists and bloggers in recent years, following the crackdown on the massive protests that took place over the disputed 2009 election.

Humbja e lirisë së medias dhe e gazetarit për të kryer detyrën e vet një vend, është humbje e lirisë së shtypit në çdo vend. Sulmet kundër gazetarëve në Iran, Turqi, Kinë, Rusi dhe gjetkë duhet të jenë një shqetësim për të gjithë ata që besojnë jo vetëm në lirinë e shtypit por edhe në paqë e demokraci. Dihet se gjatë historisë ishin diktatorët të cilët nuk besonin në lirinë e askujt — as të lirisë personale as të lirisë së shtypit — ata të cilët shkaktuan gjencide dhe vrasje të miliona njerëzve. Ata kryesorët dihen: Hitleri thuhet të ketë vrarë rret 14-milionë vetë Stalini ia ka kaluar këtij duke vrarë mbi 20-milionë, Mao Tse Tungu ndoshta edhe më shumë se Stalini, pastaj Pol Poti dhe ”stalinët” e vegjël komunistë si Ennver Hoxha i ynë, dhe diktatorët e të gjitha ngjyrave anë e mbanë botës. Prandaj promovimi dhe mbrojtja e lirisë së shtypit kudo në botë, është promovim i demokracisë dhe si rrjedhim është promovim i paqës në botë, pasi historikisht janë shtetet diktatoriale ato që kërcënojnë paqën dhe demokracinë në botë.

Fillozofi dhe teoristi moral dhe politik britanik i 1880-ave, Xhon Stuart Mill ka thënë se, ”nëqoftse i gjithë njerëzimi do të ishte i të njëjtit opinion, me përjashtim të një personi, njerëzimi nuk do të ishte më i justifikuar të heshtë atë person, se sa të heshtë të gjithë njerëzimin”. Për më tepër, Xhon Stuart Mill, ka thënë se ”Nëqoftse heshtim një opinion, të gjithë e dimë se, jemi duke heshtur të vërtetën”, dhe se ”një opinion i gabuar mund të ketë në vetvete një të vërtetë të vogël, që është e nevojshme për të zbuluar të vërtetën në terësi.”

Pa marrë parasyshë se për cilin shtet, qeveri ose regjim bëhet fjalë, kur vjen puna tek liria e shtypit ose mohimi i kësaj lirie, sipas Tomas Xhefersonit, autorit të Shpalljes së Pavarësisë së Shteteve të Bashkuara, ”Çdo qeveri që nuk duron kritikat e botuara, meriton të bjerë.” Kjo thënje e Xhefersonit i përshtatet regjimit tiranik të Iranit dhe gjithë regjimeve diktatoriale të cilat nuk durojnë kritikat nga shtypi.

MIRENJOHJE NE 100 VJETORIN E PAVARESISE

November 26, 2012 by dgreca

100 vjetori i Pavarësisë, mirënjohje Shteteve të Bashkuara të Amerikës/

Në rast se shqiptarët për herë të parë në historinë e re janë të barabartë dhe krenarë në familjen e popujve euroatlantikë, si anëtar të NATO-s apo si qytetarë të lirë të kontinetit të tyre, merita kryesore u takon SHBA-ve, të cilat në fillim të viteve ‘90-të, e nxoren Shqipërinë nga izolimi i vetëkërkuar, ekonomia e centralizuar dhe aleancat antikombëtare me bazë ideologjike, duke e orientuar atë në rrugën e lirisë dhe të begatisë për popullin e saj. Në rast se Shqipëria nuk do të dilte nga izolimi për të përshtatur në vend rregullat e ekonomisë së tregut, lëvizjes së lire dhe hapjes ndaj botës, duke respektuar liritë dhe të të drejtat themelore të njeriut, çështja jonë kombëtare kurrë nuk do mund të bëhej një çështje europiane dhe ndërkombëtare. Ruajtja e miqësisë me Shtetet e Bashkuara të Amerikës është garanci për Shqipërinë demokratike të 100 viteve të ardhshme./

Nga Mujë Buçpapaj (Tiranë)/

Presidenti Amerikan Barak Obama në telegramin dërguar Presidentit shqiptar, Bujar Nishani, konfirmoi edhe njëherë miqësinë e popullit amerikan me shqiptarët, duke i bërë edhe më domethënëse kremtimet e 100 vjetorit të pavarësisë. Ashtu siç kishte deklaruar në Tiranë sekretarja amerikane e shtetit, Hilari Klinton, edhe presidenti Amerikan shprehu ndjenjat më bensike ndaj Shqipërisë dhe pavarësisë së saj, duke rishprehur një qëndrim të konfirmuar tashmë të politikës shtetërore amerikane, prej fillimit të shekullit të njëzetë.

Në rast se shqiptarët për herë të parë në historinë e re, janë të barabartë dhe krenarë në familjen e popujve euroatlantikë, si anëtarë të NATO-s apo si qytetarë të lirë të kontinetit të tyre, merita kryesore u takon SHBA-ve, të cilat në fillim të viteve ‘90-të, e nxorën Shqipërinë nga izolimi i vetëkerkuar, ekonomia e centralizuar dhe aleancat antikombëtare me bazë ideologjike, duke e orientuar atë në rrugën e lirisë dhe të begatisë për popullin e saj. Në rast se Shqipëria nuk do të dilte nga izlomi, për të përshtatur në vend rregullat e ekonomisë së tregut, lëvizjes së lire dhe hapjes ndaj botës, duke respektuar liritë dhe të të drejtat themelore të njeriut, çështja jonë kombëtare kurrë nuk do mund të bëhej një çështje europiane dhe ndërkombëtare.

Rivendojsa e aleancave natyrore me SHBA-të, dhe aleatët tjerë perëndimore dhe nderkombëtarë, bëri të mundur prezentimin e çështjes së Kosovës, dhe në përgjithësi të çështjes shqiptare në Ballkan, e cila rezulton të jetë çeshtja më e nderlikuar në Europë si një çeshtje e një kombi të ndarë padrejtësisht nga fuqitë europiane në vitin 1913. SHBA-të e inkurajuan Shqipërinë të linte pas të kaluarën diktatoriale duke shikuar nga e ardhmja, si një komb i cili dëshiron të konkurojë me dinjitet në rajon dhe Europë. Gjatë këtyre 22 vjetëve në liri, SHBA-të e kanë ndihmuar Shqipërinë financiarisht, dhe politikisht duke qënë sot në këtë 100 vjetor një vend në liri, krejt i ndryshëm nga ai i dy dekadave më parë, kur sekretari amerikan i shtetit, Xhejms Beker, na pati premtuar se liria punon, se liria jep rezultate, për t’u shndërruar sot në një demokraci, që, siç tha edhe zonja Klinton më 1 nëntor 2012, fuksionin dhe ecën përpara.

Është krejt e qartë se në rast se SHBA-të nuk do të kishin marrë në dorë çeshtjen shqiptare, ajo jo vetëm nuk do të ishte zgjidhur ndonjëherë, por as që do të shtrohej për zgjidhje. Spastrimi etnik i kryer nga shteti serb ndaj shqiptarëve të Kosovës në vitet 1998-1999, është dëshmia më e mirë e këtij kërcënimi ndaj ekzistencës së kombit shqiptar, por edhe e vendosmerisë së sinqertë e SHBA dhe Presidentit Amerikan Bill Klinton për të mbrojtur shqiptarët në ditën e tyre më të veshtirë. Është thënë disa herë se kremtimi 100 vjetorit të Pavarësisë nuk do të kishte ndonjë emocion të madh në rast se Kosova nuk do të ishte e lirë dhe e pavarur. Kolacioni ndërkombëtar i udhehequr nga SHBA-të bëri të mundur jo vetëm çlirimin e Kosovës por edhe njohjen e pavarëisë së saj, integrimit të saj në strukturat ndërkomëbëtare. Vetëm falë mbeshtetjes së SHBA 100-vjetori i Pavarësisë tonë, festohet sot edhe në Shkup, me flamuj kuq e zi, me akademi përkujtimore, me veprimtari masive ku janë përfshirë mbi njëmilionë shqiptarë etnikë që jetojnë në Maqedoni.

Nuk duhet të harrojmë se pas çdo urimi dhe përshendetje që ne i japim njëri-tjetrit dhe miqve tanë në këtë 100 vjetor, qëndrojnë SHBA-të, Presidenti Uillson, Presidenti Regan, Presidenti Xh.H.Bush, Presindeti Bill Klinton, Presidneti Xh.W. Bush, Presidneti Barak Obama dhe mijëra zyrtarë amerikanë të të gjitha niveleve që mbrojten çështjen shqiptare në të gjitha kohërat, që lobojnë edhe sot anambanë botës për Shqipërinë për Kosovën dhe shqiptarët në rajon. Shqipëria në këtë 100 vjetor ka shumë sfida përpara. Konkurenca në familjen e popujve është e madhe, ndërsa kërkesat e ndërkombëtarëve ndaj shtetit shqiptar janë shumë më të mëdha krahasuar me dhjetë apo 20 vjet më parë. Shqipëria tashmë është një shtet 100 vjeçar, por ajo duhet ta reflektojë këtë pjekuri në institucionet e saj, në zbatueshmëinë e ligjit dhe fuknsionimin e institucioneve.

Vertetë, SHBA-të janë miq të shqiptarëve, por ne duhet të ruajmë dhe ta forcojmë edhe më tej këtë miqësi, duke krijuar lidhje edhe më të ngushta me shtetin amerikan, duke kryer gjithmonë detyrat tona të cilat janë shumë të rëndësishme për ecjen përpara të demokracisë bazuar tek ekonomia e tregut dhe garantimi i lirive dhe i të të drejtave themelore të njeriut. Njëqind vjet më parë rilindësit tanë e patën të qartë vizionin për të nxjerrë Shqipërinë nga perendoria osmane dhe hedhur themelet e një shteti të modelit europian, perëndimor, i takon këtij brezi të shqiptarëve që të dijnë të orientojnë Shqipërinë e 100 viteve të ardhshme, të sigurtë dhe krenare.