Shqipëria shans për të bërë historinë

October 8, 2015 by dgreca

Ndeshja me Serbinë, Shqipëria shans për të bërë historinë/

Atmosferë festive në Elbasan për ndeshjen Shqipëri-Serbi/

TIRANË, 8 Tetor/Nga Gjergji Mima/ -Ndeshja e futbollit Shqipëri-Serbi e mbrëmjes së sotme në “Elbasan Arena”, e vlefshme për eliminatoret e Kampionatit Europian “Francë 2016”, është një nga sfidat më të rëndësishme që kombëtarja shqiptare kaluajtur në historinë e saj, sepse kjo ndeshje mund të vleje kualifikimin historik për herë të parë në fazën finale të një Kampionati Europian.

Shqipëri – Serbi, skenaret e kuaifikimit të kombëtares

Shqipëria momentalisht ndodhet në vendin e tretë të grupit I, me 11 pikë, 1 më pak se rivalët e drejtëpërdrejtë për vendin e dytë, Danimarka dhe 4 më pak se Portugalia kryesuese. Në këtë aspekt, vendimtare për shanset e kuqezinjve për t’u kualifikuar do të jetë edhe ndeshja e sotme në Braga mes Portugalisë dhe Danimarkës. Nëse skuadra e Olsen nuk fiton në ndeshjen e saj të fundit të kualifikuese dhe kjo kombinohet me suksesin e shumdëshiruar të Shqipërisë në Elbasan Arena, atëherë mbrëmja e sotme do të jetë ajo e festës së madhe, pasi Shqipëria siguron automatikisht vendin e dytë në grup.

E rëndësishme do të jetë që Danimarka të mos fitojë, pasi kjo do t’i lejonte Shqipërisë që të shpresojë kualifikimin nga dera e madhe në Europian edhe në ndeshjen e fundit, të dielën e ardhshme në Yerevan me Armeninë, ku në këtë rast do t’i duhej me cdo kusht fitorja për të siguruar vendin e dytë. Shqipëria ruan këtë opsion për në Yerevan edhe nëse arrin në 8 tetor të njëjtin rezultat me danezët. Skenari më i keq, më mirë të mos thuhet qoftë edhe për supersticion, kombinimet matematikore janë disa, por e sigurt është dicka, Shqipëria ndryshe nga Danimarka është vetë zonjë e fatit të saj dhe ka në dorë për të hedhur cdo skenar negativ. në rast të dy fitoreve rradhazi kuqezi në dy ndeshjet e fundit të kombëtares, atëherë nuk ka opsion që shpëton rivalët.

Shqipëri-Serbi, shifra dhe fakte historike

Në prag të përballjes vendimtare mes Shqipërisë dhe Serbisë në “Elbasan Arena”, mbrëmjen e sotme në oren 20:45, në kuadër të eliminatoreve të Europianit, panoramimi i disa fakteve historike, por edhe të ditëve të sotme, do të jepnin një ide më të qartë rreth diferencave që ekzistojnë mes të ekipeve.

Federata Shqiptare e Futbollit është pranuar në FIFA në vitin 1932, ndërsa homologia serbe është bërë anëtare e institucionit më të lartë të futbollit botëror që në vitin 1919.

Pozicionin më të mirë në renditjen e FIFA-s, të 22-tin Shqipëria e ka arritur në Gusht të këtij viti, pas vendimit të Gjykatës së Arbitrazhit Sportiv në Lozanë për t’i dhënë fitoren 0-3 në tavolinë ndaj Serbisë, për sfidën e Tetorit të një viti më parë, ndërsa pika më e ulët, që është vendi i 124-t, është shënuar në vitin 1994.

Ndërkohë, Serbia pozicionin më të mirë të 10-tin në botë, e ka arritur në vitin 1998, ndërsa pozicioni më i ulët, i 101, është shënuar në vitin 1994.

Golashënuesi më i mirë i kombëtares shqiptare është Erjon Bogdani me 18 gola, ndërsa futbollisti me më shumë ndeshje është Lorik Cana me 86 paraqitje me fanellën kuqezi. Te Serbia si golashënuesi më i mirë i historisë spikat Stjepan Bobek, me 38 gola, ndërsa Dejan Stankovic ka luajtur plot 103 ndeshje, më shumë se cdo futbollist tjetër me kombëtaren serbe.

Vlera totale e futbollistë kuqezi kap shifrën e 34 milionë euro, ndërsa lojtarët serbë vlerësohen 158 milionë euro.

Fitoren më të thellë Shqipëria e ka arritur në miqësore ndaj Qipros në gusht të 2009, me rezultatin 6-1, ndërsa humbjen më të thellë e ka regjistruar me Hungarinë 12-0 në vitin 1950.

Në vitin 1972, Serbia, në atë kohë pjesë e ish-Jugosllavisë, fitoi 10-0 me Venezuelën, ndërsa humbjen më të rëndë e ka pësuar ndaj Cekosllovakisë në vitin 1920 me rezultatin 7-0.

Shqipëria i luan ndeshjet brenda në “Elbasan Arena”, që ka një kapacitet 12 800 vende, ndërsa Serbia në stadiumin e Partizanit të Beogradit, që mund të akomodojë 32 719 persona.

Shqipëri- Serbi, interesim maksimal i medias botërore

Ndeshja e “Elbasan Arena” mes Shqipërisë dhe Serbisë ka tërhequr vëmendjen e disa prej mediave kryesore botërore.

Interesimi i jashtëzakonshëm padyshim që ka të bëjë me historinë mes dy vendeve, por mbi të gjitha me ato që ndodhën një vit më parë në Beograd, me mediat globale që janë të interesuara të bëjnë dhe krahasimin me mënyrën se si u sollën tifozët serbë në 14 tetor dhe atë që do të shohin e përjetojnë në ‘Elbasan Arena’.

Mësohet se në tribunën e shtypit të “Elbasan Arenës” si kurrë më parë në ndonjë stadium shqiptarë do të jenë përfaqësues të mediave më të njohura të planetit. Siç konfirmon zyra e marrëdhënieve për shtyp në Federatën Shqiptare të Futbollit, në tribunën e mediave do të jenë gazetarët e CNN, BBC, Sky, Daily Mail, NY Times e të tjerë dhe padyshim ata të gazetave më të rëndësishme sportive si Gazzetta Dello Sport në Itali, L’Equipe e Francës apo Marca në Spanjë.

Shqipëri-Serbi, masa të rrepta sigurie për mbarëvajtjen e ndeshjes

Për sigurinë dhe mbarëvajtjen e ndeshjes Shqipëri- Serbi në Elbasan janë marrë një sërë masash të rrepta sigurie nga Drejtoria e Policisë së Elbasanit.

Në kuadër të këtyre masave që prej orës 08.00 të mëngjesit të sotëm është ndaluar qarkullimi rrugor tek bulevardet “Qemal Stafa” dhe “Aqif Pasha”, si dhe në aksin rrugor nga ish-Konservimi i vjetër deri tek Harullajt.

Gjithashtu, gjatë ditës nuk do të lejohet parkimi i automjeteve nga rrethrrotullimi i Luleve deri tek ai i Zaranikës; përreth dhe përballë stadiumit; si dhe përgjatë dy bulevardeve kryesore.

Hyrja e tifozëve në stadium do të fillojë në orën 16:30, me qëllim shmangien e radhëve të gjata. Ata do të kontrollohen të gjithë në hyrjen e stadiumit dhe duhet të jenë të pajisur me kartën e identitetit dhe të mos kenë me vete sende të forta, shishe, monedha apo metale. Lidhur me ndeshjen janë angazhuar 1.500 punonjës policie, nga të cilët 308 nga Drejtoria e Elbasanit.

Gjithashtu, të gjitha lokalet në këto zona do të jenë të mbyllura nga ora 12:00 deri në përfundim të ndeshjes, ndërsa në pallatet përreth nuk do të lejohen persona që nuk janë anëtarë të familjeve që jetojnë në to.

TIRANE, 8 Tetor /- Qyteti i Elbasanit është kthyer ditën e sotme në kryefjalën e emocionit, festës dhe shpresës për fitore, për të gjithë tifozët e kombetares shqiptare që do të ndjekin ndeshjen në Shqipëri-Serbi në stadiumin “Elbasan Arena”.

Flamuj kuq e zi, kapele, bluza e shalle me simbolet e Shqipërisë shihen ngado në rruget e sheshet e qytetit te Elbasanit.

Ndërkohë që, përveç tifozëve të kombëtares shqiptarë nga e gjithë Shqipëria, shumë tifozë shqiptarë nga Kosova, Danimarka, Zvicra etj, do të jenë sot në stadium për të parë ndeshjen Shqipëri- Serbi, e cila është vendimtare në rrugëtimin e Shqipërisë drejt Euro 2016.

Qindra tifozë nga Kosova, Presheva dhe Shkupi kanë mbërritur prej mbrëmjes se djeshme në Elbasan dhe të tjerë pritet të mbërrijnë gjate dites.

Tifozët, përveçse shprehin emocionet e mëdha për këtë ndeshje, u bëjnë thirrje të gjithë qytetarëve për të shmangur çdo incident, pasi kjo mund të ndikojë në të ardhmen e futbollit shqiptar.

Kombetarja shqiptare do të kërkojë trepikëshin në fushën e gjelbërt, ndërsa festa në të gjitha trevat shqipëfolëse ka nisur prej ditësh.

Ndërkohë, Policia e Shtetit ka marrë të gjitha masat për të garantuar mbarëvajtjen e ndeshjes. Janë mbi 2300 policë si dhe njësia antiterror që janë angazhuar prej ditës së mërkurë, ndërsa RENEA do të ruajë kombëtaren serbe.

Kompanitë e basteve: Shqipëria favorite përballë Serbisë/

TIRANE, 8 Tetor /ATSH/. – Per ndeshjen Shqiperi – Serbi, në grupin I të eliminatoreve për Euro 2016, qe do te luhet sot ne oren 20.45 ne “Elbasan Arena”, kompanitë e basteve qe operojne ne vend favorizojnë ekipin shqiptar.
Ja disa nga kuotimet e kompanive te basteve:
1              X              2
Eccobet          2.50          2.95         2.80
bet365            2.87          3.00         2.90
eurolloto         2.75          3.00          2.75
lottosport        2.45          3.10          2.80
xhoilloto          2.75          3.00          2.80   /a.ke/

Shqipëria, Kosova dhe vendet tjera themelojnë Qendrën e Ballkanit Perëndimor për Hulumtime dhe Inovacione

September 18, 2015 by dgreca

PRISHTINË, 18 Shtator 2015/ Shqipëria, Kosova, Kroacia, Bosnja e Hercegovina, Serbia dhe Mali i Zi kanë nënshkruar marrëveshjen për themelimin e Qendrës së Ballkanit Perëndimor për Hulumtime dhe Inovacion.Nënshkrimi u bë gjatë Konferencës Ministrore të Ballkanit Perëndimor për Hulumtime dhe Inovacion, e cila është mbajtur sot në Split, Kroaci. Ministri kosovar i Arsimit, Shkencës dhe Teknologjisë, Arsim Bajrami, në Konferencë theksoi se bashkëpunimi në sferën e hulumtimit dhe inovacionit është një domosdoshmëri e kohës për vendet e rajonit dhe një mundësi shumë e mirë që të bashkuara të ecin rrugës së integrimeve evropiane.Sipas njoftimit dërguar nga Ministria kosovare, Qendra e Ballkanit Perëndimor për Hulumtime dhe Inovacione do të jetë një organizatë ndërkombëtare, e pavarur, jo-fitimprurëse dhe në pronësi të palëve nënshkruese të marrëveshjes rajonale.

Kjo qendër do të mbështesë fuqizimin e bashkëpunimit në nivel rajonal dhe ndërkombëtar, duke përmirësuar klimën e Ballkanit Perëndimor për hulumtim dhe inovacion. Për më tepër, kjo Qendër do të promovojë mobilitetin e hulumtueseve të rinj dhe kandidatëve për doktoratë në kuadër të rajonit të Ballkanit Perëndimor, si dhe mes rajonit dhe vendeve tjera.Themelimi i kësaj Qendre dhe asistenca teknike rajonale për të është e paraparë edhe në kuadër të Strategjisë Rajonale të Ballkanit Perëndimor për Shkencë dhe Hulumtim në të cilën është e përfshirë edhe Kosova.Është paraparë që Bashkimi Evropian të mbeshtesë këtë qendër me 200 milionë euro, fond në të cilin do të mund të përfitojnë përmes projekteve edhe hulumtuesit kosovarë./b.j/

Kosova e përfundon në nëntor “autostradën” energjetike drejt Shqipërisë

September 13, 2015 by dgreca

-Në Kosovë është realizuar mbi 80% projekti i linjës 400 kV drejt Shqipërisë/ Nga Behlul Jashari*/ PRISHTINË, 13 Shtator 2015/ Në Kosovë, fundi i nëntorit 2015 do të shënojë përfundimin e projektit të “autostradës” energjetike drejt Shqipërisë, është bërë e ditur pas një vizite inspektuese punimeve, gjatë javës. Kështu, finalizimi i projektit pritet para afatit, ndërkohë që me qëllim të krijimit të kushteve të sigurisë në punë në kuadër të projektit për ndërtimin e linjës 400 kV Kosovë-Shqipëri, ditëve të fundit ka shkyqje në disa linja lokale në rajonin e Gjakovës, në perëndim të Kosovës afër kufirit me Shqipërinë.Dy ministra të qeverisë kosovare, Blerand Stavileci – i Zhvillimit Ekonomik dhe Ferid Agani – i Mjedisit dhe Planifikimit Hapësinor, së bashku me ambasadoren e Gjermanisë në Prishtinë, Angelika Viets, si dhe anëtaren e Bordit të Drejtorëve të Bankës Gjermane për Zhvillim (KfW), Ingrid Hengster, zhvilluan një vizitë inspektuese të punimeve që po zhvillohen në linjën 400 kV Kosovë-Shqipëri.

Kryeshefi ekzekutiv i Operatorit të Sistemit, Transmisionit dhe Tregut të energjisë elektrike të Kosovës-KOSTT, Naim Bejtullahu, ka njofuar se në pjesën kosovare interkoneksioni 400 kV Kosovë-Shqipëri deri më tani është zbatuar më shumë se 80% e projektit. Janë montuar 215 shtylla elektrike të tipit Y, janë shtruar mbi 50 km përçues elektrik, ndërsa procesi i shpronësimeve ka përfunduar për të tre segmentet.

Para fillimit të punimeve, në fazat e përgatitjeve, burimet në Prishtinë kanë njoftuar se projekti për ndërtimin e linjës interkonektive 400 kV Kosovë-Shqipëri konsiston në ndërtimin e një linje te tensionit të lartë me gjatësi rreth 238 km, prej së ciles 85.5 km në territorin e Kosovës dhe 153.5 km në territorin e Republikës së Shqipërisë.

Kosova dhe Shqipëria në vitin 2016 inaugurojnë “autostradën” energjetike, ka thënë kryeministri kosovar Isa Mustafa, i pyetur në konferencën e fundit për shtyp në muajin gusht, ku ka folur edhe për bashkëpunimet në fushën e energjetikës e të tjera.

“Rrjeti energjetik mendojmë se vitin e ardhshëm duhet të aktivizohet. Sivjet presim që të kryhen të gjitha punimet në pjesën tonë, edhe në pjesën e Shqipërisë kryhet vitin e ardhshëm dhe do e inaugurojmë”, ka theksuar kryeministri kosovar.

Kreu i qeverisë së Kosovës ka bërë të ditur se, është duke u punaur që të sigurohet edhe tregu i përbashkët i energjisë elektrike, që të bëhet këmbimi i saj.Në 21 dhjetor të vitit 2013, në praninë e ministrit të Energjetikës dhe Industrisë të Republikës së Shqipërisë, Damian Gjiknuri, ministrit të atëhershëm të Zhvillimit Ekonomik të Kosovës, Fadil Ismajli, dhe ambasadorit të Gjermanisë në Kosovë në atë kohë, Peter Blomeyer, në hapësirat e Lidhjes së Shqiptare në Prizren, në një ceremoni solemne, është nënshkruar kontrata për ndërtimin e linjës interkonektive 400 kV Kosovë-Shqipëri.

*Foto: Shtrirja e përçuesve elektrik në shtyllat nr 1 dhe 2 në linjën 400 kV në Kosovë drejt Shqipërisë

Papa: Nga Shqipëria mund të lindë një profeci e re paqeje

September 6, 2015 by dgreca

Tirana për tre ditë kryeqytet i botës besimtare/

TIRANE, 6 Shtator/- Për rreth tre ditë, Tirana do jetë kryeqyteti i gjithë botës besimtare, si vendi i paqes dhe harmonisë fetare për tre ditë rresht.Paqja, toleranca fetare dhe dialogu janë kryefjala e takimit të 28-të Ndërkombëtar për Paqen, që nisi pasditen e së dielës në Tiranë (6 shtator) dhe do vijojë edhe në datat 7 dhe 8 shtator, në përkujtim të 20-vjetorit të përfundimit të luftës së fundit në Ballkan dhe që organizohet nga Komuniteti Sant’Egidio, në bashkëpunim me Konferencën Ipeshkvnore të Shqipërisë, Kishën Ortodokse Autoqefale të Shqipërisë dhe qeverinë shqiptare.

Në ceremoninë e hapjes së këtij takimi në Pallatin e Kongreseve, Kryeministri Edi Rama u uroi mirëseardhjen në vendin e bashkëjetesës fetare rreth 4000 persona, mes të cilëve krerë të besimeve fetare botërore (katolikë, ortodoksë, protestantë, myslimanë, hebrenj, zoroastrianë, sikh, budistë dhe shintistë), nga Italia, Gjermania, Franca, Belgjika, Iraku, Izraeli, India, Rusia, Indonezia, Qipro, Japonia, Kina, Australia, e shumë vende të tjera nga Europa, Afrika, Azia e Amerika Latine.

“Mirësekeni ardhur në Shqipëri, në vendin që Papa Françesku e quajti vendin e vllazërisë fetare. Ndonëse po ju drejtohem thjeshtë dhe pa emërtesat ceremoniale, të jeni të sigurtë se keni vlerësimin tim më të lartë, jo vetëm për atë që përfaqësoni, por edhe për atë përmasë të paçmuar shpirtërore që përçoni në kohët e vështira që jetojmë, si melhem për qindra mijëra milion besimtarë, por edhe njerëzve vullnetmirë”, iu drejtua kryeministri Rama të ftuarve në nisje të takimit.

Por Rama veçoi një prej të ftuarve. “Askush nuk do të më mbajë mëri, nëse përshëndes në mënyrë të veçantë, një bari shpirtrash i cili vjen për herë të parë në Shqipëri duke na e bërë të gjallë me praninë e tij, rezistencën përballë martirizimit të popullit iraken dhe të krishterëve atje, në mënyrë të veçantë. Prandaj, për forcën e paepur morale dhe për kujtesën që na përcjell që lindja e ardhme e bashkëjetesës fetare dhe e krishtërimit shpirtbardhë irakian nuk ka vdekur. Qofshi i mirëseardhur në Tiranë” i tha Rama imzot Sakos, Patriarku i Babilonisë së Kaledjve.

“Ja ku jemi këtu sot në të njëtin vend, në këtë pallat i cili u çel për ti bërë jehon progandës më të shfrenuar të një regimi atesit. Pikërisht ky pallat, ka mbledhur këtu së bashku të gjthë ju si shprehja më kuptim plotë se paqja jo vetëm është e mundëshme por edhe e vetmja mundësi që e ardhmja na afron. Kjo nismë është edhe një ekologji e shpirtit të arsyes”, tha Rama.

Në këtë takim u lexua edhe një letër e shkruar nga Papa Françesku, ku shpjegon edhe një herë se arsyeja e vizitës së tij vitin e kaluar në Shqipëri ishte për shkak të bashkëjetesës në vendin tonë.

Më tej në letrën e Papa Françeskut, i bëhet thirrje të gjithëve për të mos qëndruar indiferent ndaj krizës së emigrantëve, që janë larguar nga vendi i tyre për shkak të luftës.

Në vijim, mesazhi i plotë i Atit të Shenjtë:

“Ju përshëndes të gjithëve me respekt dhe shpresë se takimi ndërkombëtar për paqen mbahet në Tiranë. Këto takime janë në vazhdën e rrugëtimit të nisur nga Shën Gjoni Pali i II, i cili realizoi takimin e parë historik në Asizi në tetor 1986. Qysh atëherë u çel një shtegtim në të cilin marrin pjesë burra dhe gra që iu përkasin besimeve të ndryshme që vit pas viti ndalet në qytete të ndryshme të botës.

Ndërsa ndryshojnë skenarët e historisë, popujt janë të thirrur të ballafaqohen me shndërrime të thella, ndonjëherë dramatike.

Ndihet gjithnjë e më shumë nevoja që ndjekësit e besimeve të ndryshme të takohen, të dialogojnë, të ecin së bashku e të bashkëpunojnë për paqen, sipas shpirtit të Asizit që përmenden në dëshminë e shndërritshme të Shën Françeskut.

Këtë vit ju keni zgjedhur të ndaleni në Tiranë, kryeqyteti i një vendi që u bë simbol i bashkëjetëses paqësore mes besimeve të ndryshme fetare pas një historie të gjatë vuajtjesh. Është në zgjedhje që unë e bashkëndaj, siç e tregova me vizitën time që kreva në atë qytet në shtatorine vitit të shkuar. Unë zgjodha Shqipërinë, si vendin e parë evropian që doja të vizitoja pikërisht për ti dhënë zemër bashkëjetesës paqësore, pas përndjekjeve tragjike që pësuan besimtarët shqiptarë gjatë shekullit të kaluar. Lista e gjatë e martirëve na flet ende sot për atë kohë të errët, por na flet edhe për forcën e besimit që nuk dorëzohet, nuk thyhet nga prepotenca e së keqes.

Në asnjë vend tjetër në botë nuk ka qënë kaq i fortë vendimi për të përjashtuar Hyjn nga jeta e një populli. Mjaftonte qoftë edhe një shenjë e vetme fetare për të dënuar me burg, madje edhe me vdekje. Kjo ndodhi shumë e zezë e ka prekur thellë popullin shqiptar deri në çastin e lirisë së rigjetur, kur anëtarët e bashkësive fetare, të goditur nga vuajtjet e përbashkëta kanë filluar sërish të jetojnë në paqe së bashku. Për këtë miq të dashur, unë ju jam vërtet mirënjohës veçanërisht ju që keni zgjedhur Shqipërinë. Do të doja të theksoja së bashku me ju atë ç’ka thashë vjet në Tiranë, bashkëjetesa paqësore dhe e frytshme mes personave dhe bashkësive që iu përkasin besimeve të ndryshme fetare është vetëm ajo ç’ka dëshirojmë dhe krejtësisht e mundur e zbatueshme.
Ky është shpirti i Asizit, të jetojmë së bashku në paqe, duke kujtuar se paqja dhe bashkëjetesa kanë një themel fetar. Lutja është gjithnjë në rrënjët e paqes dhe pikërisht sepse e ka themelin e vet paqja është gjithnjë e mundshme ështu siç është emërtimi i takimit tuaj i këtij viti.

Është e nevojshme që të forcohet sidomos sot kur në disa pjesë të botës duket sikur po fiton dhuna, përndjekja dhe shkelja e lirisë fetare, bashkë me nënshtrimin e njerëzve përballë konflikteve e luftrave të cilat vazhdojnë. Nuk duhet t’i dorëzohemi kurrë luftës dhe nuk mund të qëndrojmë indiferent përpara atyre që vuajnë për shkak të luftës dhe dhunës.

Për këtë arsye unë zgjodha për ditën e ardhshme botërore të paqes fjalinë “mposhte indiferencën dhe fitoje paqen”. Por dhunë nuk është vetëm të ngresh mure e pengesa për të bllokuar atë që kërkon paqe, dhunë është të zmbrapsësh atë që largohet nga kushtet çnjerëzore duke shpresuar në një të ardhme më të mirë. Është dhunë të përjashtosh fëmijë e të moshuar nga shoqëria dhe vetë jeta.

Është dhunë ta zgjerosh hendekun mes atij që harxhon tepricën dhe atij që ka nevojë për gjerat më thelbësore. Në këtë botën tonë besimi tek Hyj na bën të besojmë dhe të themi me zë të lartë se paqja është e mundshme. Si besimtarë ne jemi detyruar ta rizbulojmë përsëri këtë thirje universale për paqen, e cila ndodhet në zemrën e traditat tona fetare dhe t’ia ripropozojmë me guxim burrave dhe grave të kohës sonë.

Dhe e theksoj atë që thashë gjithmonë në Tiranë, besimi i mirëfilltë është burim paqeje dhe jo dhune. Askush nuk mund të përdorë emrin e Hyjit për të ushtruar dhunë. Të vrasësh në emër të Hyjit është një sakrilegj i madh. Të diskriminosh në emër të Hyjit nuk është njjerëzore. Të dashur miq të thuash që paqja është gjithmonë e mundshme nuk është një fjalë e lehtë, por shpreh besimin tonë se asgjë nuk është e pamundur për Hyjin.

Sigurisht na kërkohet një përfshirje personale ashtu edhe e bashkësive tona për punën e madhe për paqen. Nga toka shqiptare, nga toka e martirëve të mund të nisë të lindë një profeci e re paqeje. Unë bashkohem me të gjithë ju që në shumëllojshmërinë e traditave fetare ne të mund të vazhdojmë të jetojmë pasionin e përbashkët për rritjen e bashkëjetesës paqësore në të gjithë popujt e tokës”.

Klosi: Shqipëria, vendi i harmonisë fetare

Ministri i Mirëqënies Sociale Blendi Klosi deklaroi se takimi i 28-të organizohet në kryeqytetin e harmonisë fetare.

“Vetëm në 2 vjet mbështetëm ndërtimin e Xhamisë së Madhe përuruam katedralen e Ortodokseve, pritëm të gjithë sëbashku Papa Franceskun dhe në këto ditë të paqes do përurojmë odeonin e bektashinjve. I nderuar që ju drejtohem në këto ditë, për të thënë se paqja është gjithnjë e mundur”, tha Klosi.

Si përfaqësues të shtetit , vijoi ai, ne kemi detyrimin të garantojmë të drejtën e besimit për të gjithë qytetarët. Shqipëria, sipas tij, është e shndërruar në pikë referimi të bashkëjetesës fetare

Në këtë takim tre ditor marrin pjesë edhe personalitete të shquara të politikës, personalitete të larta të të gjitha besimeve fetare, historian, filozofë, ekspertë të zhvillimeve ndërkombëtare, përfaqësues të botës akademike, gazetarë, teologë, shkrimtarë të njohur.

Në Lutjen për Paqe 2015 janë të ftuar rreth 400 personalitete politike dhe jo vetëm, mes tyre: zv.presidenti i Parlamentit Europian, ministri i Jashtëm italian, ministri italian i Drejtësisë, Sekretari i Përgjithshëm “Besime për Paqen” Japoni, Zv.ministri i Bashkëpunimit dhe Zhvillimit nga Gjermania, ministri i Punëve të Jashtme nga Salvadori, si dhe ish-president i Komisionit Europian, Romano Prodi.

Edhe dita e dytë vijon me panele të ndryshme rreth zhvillimeve ndërkombëtare. Përmes dialogut dhe promovimit të paqes i kundërvihemi dhunës me propozime konkrete dhe të realizueshme, tematika e të cilave do të diskutohet në panelet e organizuara me rastin e këtij eventi.

Propozimet konkrete do të jenë për t’u thënë “Ndal!” konflikteve në botë. Propozimet konkrete do të vijnë nga vendet në konflikt si Siria, Iraku, Nigeria, Mindnao (Filipinet) dhe Libia.

Aktivitete me të rinjtë do të pasurojnë këtë event me tematikë “Nuk ka të ardhme pa Paqe!”. Dita e tretë do të shpallë Apelin për Paqen në të gjithë botën, ku secili nga pjesëmarrësit është i ftuar ta nënshkruajë. Mbjellja e pemës së parë të Paqes nga të gjithë krerët e besimeve fetare do të mbyllë eventin.(Kortezi:ATSH)

Mediat: Shqipëria në “Euro 2016”, nuk ka kthim pas

September 5, 2015 by dgreca

MEDIAT SERBE MERREN ME BALLISTIN/
Ka nje terheqje vemendje prej medias nderkombetare per paraqitjen e Kombetares Shqiptare ne ndeshjen me te fundit, ate ne Kopenhagen me Kombetaren rivale te Danimarkes.
Mediat italiane kanë qenë ato që kanë shkruar më tepër për takimin që përfundoi 0-0. “La Republika” ka theksuar më tepër nivelin e lartë që tregoi portieri Etrit Berisha përballa sulmit danez.
“Ka përfunduar pa gola ndeshja në kopenhagen, por nuk kanë munguar emocionit. Sidomos, në pjesnën e dytë të takimit, Danimarka tregoi forcën duke sulmuar vazhdimisht, por ajo gjeti hasi në mbrojtjen e ashpër të shqiptarëve, sidomos të atij që shkëlqeu, Etrit Berishës”, shkruajnë mediat italiane.
“Portieri i Lacios ka zgjidhur më shumë se një situatë të rrezikshme, duke mbrojtur portën që sulmohej vazhdimisht nga danezët dhe duke nxjerrë me barazim pa gola djemtë e De Biazit”, vijon më tej artikulli.
Në mediat e tjera ndërkombëtare rezultati është quajtur një barazim i artë, i cili bën shqiptarët të ëndërrojnë finalet e “Euro 2016”-ës në Francë.
BBC-ja e cilëson Kombëtaren të pathyeshme, solide dhe të vendosur në atë që synon dhe sipas saj ajo është në rrugën e duhur dhe nuk ka kthim pas.

MEDIAT SERBE MERREN ME BALLISTIN/
Ballist Morina, njeriu që ngriti dronin mbi stadiumin e Beogradit, 14 tetorin e kaluar, ka qenë më qendër të vëmendjes së mediave serbe.
Shkuarta e tij në Kopenhagë, takimi me futbollistët kuqezinj të “Hotel Hilton”, pozimi me ta, prania në “Telia Parken” duke udhëhequr tifozët kuqezinj, është konsideruar një skandal nga serbët.
Ata që bënë atë dhunë të paparë në stadiumin e Partizanit të Beogradit në ndeshjen ndaj Shqipërisë e shohin veten 10 pikë pas nesh, u tregoi drejtësinë e kulluar KAS-i, duke ua dhënë shqiptarëve 3 pikët në tavolinë, nuk rrinë dot pa u marrë me kombëtaren e drejtuar nga De Biazi.
“Në ndeshjen kualifikuese për në Kampionatin Europian u shënua përsëri skandal, pasi lojtarët e Shqipërisë, para ndeshjes me Danimarkën, në Kopenhagë, janë fotografuar me njeriun që e solli dronin në Beograd, akt ky që e kishte ndërprerë ndeshjen me Serbinë, – shkruan “Tanjug”.
“Ismail Morina, të cilin të gjithë e paraqesin si “Ballist Morina”, ishte së bashku me lojtarët shqiptarë në Danimarkë, me të cilët ka bërë edhe një fotografi në grup. Incidenti me shkaktar këtë person ka ndodhur në Beograd, në tetor të vitit të kaluar, kur mbi stadium u shfaq një dron me flamurin e të ashtuquajturës “Shqipëri e Madhe”.
Ndeshja mes Serbisë dhe Shqipërisë u ndërpre, pasi tifozët sulmuan fushën dhe pati incidente. Serbia mundi Armeninë 2-0, por nuk ka asnjë shans për t’u kualifikuar në finalet e kampionatit europian, ndërsa ndeshjen e ardhshme do ta luajë më 8 tetor, kur do të ndeshet prapë me Shqipërinë”, vijon “Tanjug”.
Ismail Morina ka bërë një gjest shumë interesant para fillimit të sfidës Danimarkë-Shqipëri.
I njohur si “Ballisti”, kuksiani ka udhëtuar në Kopenhagen për të ndjekur ndeshjen kualifikuese, e vlefshme për kualifikim në finalet e “Euro 2016”.
Ai është takuar me gjithë skuadrën, në hotelin ku qëndronin kuqezinjtë në Kopenhagen.Pas takimit, “Ballisti” ka postuar një fotografi në rrjetet sociale, ku shihet duke puthur grushtin e kapitenit të kombëtares shqiptare, Lorik Cana.
“Grushti i shekullit, meriton të puthet”, – ka shkruar Ismail Morina.
Padyshim që grushti është i kapitenit Lorik Cana, me të cilin ai vuri përposhtë një huligan serb, që kishte hyrë në fushë dhe po godiste lojtarët tanë në ndeshjen e ndërprerë në Beograd.